ئه‌ڤرۆنيۆز:
وه‌زاره‌تا په‌روه‌ردێ ل هه‌رێما كوردستانێ، پشتى ده‌ستپێكرنا دانا مۆله‌تا خواندنێ، چه‌ند رێنما بۆ دانا مۆله‌تێ ده‌ركرن.
ل دووڤ وان رێنمايێن وه‌زاره‌تا په‌روه‌ردێ بۆ دانا مۆله‌تێ دبوارێ خواندنێن(ماسته‌ر ودكتۆرايێ)، پێدڤيه مامۆستا، يان فه‌رمانبه‌ر لارى نه‌بوونا جهێ ده‌وامكرنا وى وئه‌و زانكۆيا وه‌ردگريت بينيت.
دوان رێنمايان داهاتيه ژى كو پێدڤيه ئه‌وێ داخوازا مۆله‌تێ دكه‌ت،سۆزنامه‌كێ داگريت كو پشتى تمامبوونا خواندنا خوه، دو جاران هندى ده‌مێ مۆله‌تێ دبوارێ په‌روه‌ردێ دا خزمه‌تێ بكه‌ت.
ديسا هاتيه كو هه‌ر مامۆستا وفه‌رمانبه‌ره‌كێ وه‌زاره‌تا په‌روه‌ردێ، بێ رازيبوونا وه‌زاره‌تا په‌روه‌ردێ بخوينيت ومۆله‌تێ وه‌رنه‌گريت، وى ده‌مى وه‌زاره‌تا په‌روه‌ردێ دانپێدانێ باوه‌رناما وى ناكه‌ت ول دووڤ قانوونێ دێ ڤه‌كۆلينێ دگه‌لدا كه‌ت.
دهه‌مان رێنمايان دا هاتيه، ئه‌وێن ل ده‌ستپێكا ڤێ سالێ ده‌ست ب خواندنێ كرى وژئه‌گه‌رێ راوه‌ستيانا مۆله‌ت دانێ ومامه‌لا مۆۆله‌ت دانێ بۆ نه‌هاتيه تمامكرن، دشێن رۆهنكرنێ بۆ وه‌زاره‌تا په‌روه‌ردێ بهنێرن دا كارێ پێدڤى بۆ وان بهێته كرن.
ئه‌ڤرۆ نيۆز:
به‌رى ده‌مه‌كێ كێم ياريا دناڤبه‌را يانا زاخۆ ويانا ئه‌لحوسه‌ين دچارچۆڤێ قۆناغا سيێ ژخۆلا عيراقێ يا ياناب يا ته‌پا پێ، ب وه‌كهه‌ڤيێ بێ گۆل ب دووماهى هات.
ئه‌ڤرۆ ئێڤارى ل سه‌ر ياريگه‌ها يانا زاخۆ هه‌ردو يانێن زاخۆ وئه‌لحوسه‌ين بێ گۆل وه‌كهه‌ڤ بوون وب ڤى ئه‌نجامى يانا زاخۆ خاله‌ك بده‌ستڤه‌ئينا پشتى دو دوراندنان د هه‌ردو قۆناغێن بۆرى دا.
ب ڤى ئه‌نجامى يانا زاخۆ ب خاله‌كێ ل رێزا 17 دهێت درێزبه‌ندا خۆلێ دا ئه‌وا ژ 20 يانان پێك دهێت، ويانا ئه‌لحوسه‌ين شيا خالا چارێ بده‌ستڤه‌بينيت ول رێزا 10 دهێت.
دهه‌ردوو ياريێن خوه يێن بۆرى دا، يانا زاخۆ تاكه نوونه‌را هه‌رێما هه‌ريما كوردستانێ دخۆلا عيراقى يا ته‌پا پێ دا هاتبوو دوراندن ل سه‌ر ده‌ستێ هه‌ردو يانێن نه‌فت ئه‌لجنووب وئه‌لحدوود ب ئێك ئه‌نجام ئه‌وژى 0-1.
ئه‌ڤرۆ نيۆز:
ئه‌ندامه‌كێ جڤاتا نوونه‌رين عيراقێ ژ هه‌ڤپه‌يمانيا نيشتمانى، ئاشكراكر 100 ئه‌ندامێن جڤاتێ دئێك روونشتن دا ژى به‌رهه‌ڤ نه‌بووينه.
سادق ئه‌لمحنا ئه‌ندامێ فراكسيۆنا هه‌ڤپه‌يمانيا نيشتمانى ل جڤاتا نوونه‌ران ئاماژ دا كو سه‌رۆكاتيا جڤاتا نوونه‌ران يا ئێكلاكه‌ر نينه دجهئينانا برگا نه‌به‌رهه‌ڤبوونێ دروونشتنێن جڤاتێ دا ئه‌وا دپه‌يره‌وێ ناڤخوه‌يێ جڤاتێ دا هه‌ى.
وى په‌رله‌مانتارى زێده‌تر بۆ ئاژنسا ئه‌لمه‌علومه گۆت، 100 ئه‌ندامێن جڤاتا نوونه‌ران دئێك روونشتنا جڤاتێ دا ژى به‌رهه‌ڤ نه‌بووينه وئه‌ڤه شه‌رمه بۆ جڤاتا نوونه‌ران وئه‌ندامێن جڤاتێ.
زێده‌تر گۆت، ئه‌و 100 په‌رله‌مانتار دبه‌لاڤكرينه ل سه‌ر هه‌موو فراكسيۆنان.
به‌رى نوكه په‌رله‌مانتار محه‌مه‌د ئه‌للكاش داخوازا هه‌لوه‌شاندنا جڤاتا نوونه‌ران وئه‌نجامدانا هه‌لبژارتنێن پێشوه‌خت ژبه‌ر نه‌به‌رهه‌ڤبوونا به‌رده‌وام يا هژماره‌كا مه‌زن يا په‌رله‌مانتاران بۆ روونشتنێن جڤاتا نوونه‌ران وناڤبرى سه‌رۆكێ جڤاتێ سه‌ليم جبوورى ب به‌رپرسيار زانى ژ زيده‌بوونا ڤێ دياردێ ژلايێ په‌رله‌مانتارن ڤه.
ئه‌ڤرۆ نيۆز:
سه‌رۆك وه‌زيرێن هه‌رێما كوردستانێ، ئه‌ڤرۆ پێنج شه‌مبى 30/11/2017 پێشوازى ل باليۆزێ ئه‌مريكا ل عيراقێ وشانده‌كێ دگه‌لدا كر.
ئه‌ڤرۆ نيڤرۆ، نێچيرڤان بارزانى سه‌رۆك وه‌زيرێن هه‌رێما كوردستانێ پێشوازى ل دۆگلاس سيليمان باليۆزێ ئه‌مريكا ل عيراقێ كر وبه‌حسێ دووماهى پێشهاتين سياسى وره‌وشا ئه‌منى ل عيراقێ وهه‌رێما كوردستانێ وده‌ڤه‌رێ وره‌شنڤيسێ پرۆژێ قانوونا بودجا گشتى يا عيراقێ هاته كرن,
دديداره‌كێ دا، په‌يوه‌نديێن دو قۆلى يێن ئه‌مريكا وهه‌رێمێ وزێده‌تر پێشڤه‌چوونا وان دبوارێن جودا دا ب شێوه‌كى كو دبه‌رژه‌وه‌نديێن هه‌ردولا دا بيت، دانوستاندن وبه‌حس ل سه‌ر هاته كرن.
ديسا په‌يوه‌نديێن هه‌ريمي وبه‌غدا ودووماهى پێشهاتێن وان په‌يوه‌نديان وچاره‌سه‌ركرنا كێشێن هه‌لاويستى دناڤبه‌را هه‌ردولا، لايه‌نه‌كێ دى يێ وێ ديدارێ بوو.
نێچيرڤان بارزانى ودۆگلاس سيليمان دووپاتى ل سه‌ر دانوستاندنه‌كا جدى دناڤبه‌را حوكمه‌تا عيراقێ وحوكمه‌تا هه‌رێما كوردستانێ ل سه‌ر بنه‌مايێ دستوورێ عيراقێ كر.
ئه‌ڤرۆ نيوز، نيوار محه‌مه‌د سه‌ليم، ژيمان سه‌عيد:
ل دەما ئاڤاھیێ مزگەفتا پێغەمبەری سلاڤێن خودێ ل سەر بن ھاتیە ئاڤاکرن، ھندەک خانی بۆ ھەڤژینێن وی ب رەخ ڤە ھاتنە ئاڤاکرن. ئێک ژ وان ژی بۆ دایکا موسلمانان عایشایێ.
پتریا خانیێن پێغەمبەری سلاڤێن خودێ ل سەر بن ژ ئاخێ و بەلگێن قەسپان ھاتبوونە چێکرن، بانێن وان ژی ئەو دارێ بەلگێن قەسپان بوو.
فرەھیا وان ئاڤاھیان چار مەتر و نیڤ بوو، بلنداھیا وان ژی نێزیکی سێ مەتران بوون، د خانی دا دەرگەھەکێ بچووک ھەبوو ناڤبرەکا بچووک ژی دابوویێ ب قەبارێ سێ مەتر ب سێ و نیڤ، ئەو ناڤبر ب ھندەک دار و بەلگێن قەسپان پێک ھاتبوون.
دھێتە گۆتن کو خانیێ عایشایێ رازیبوونا خودێ ل سەر بیت دو دەرگەە تێ بوون، ئێک دکەڤتە رۆژئاڤایی کو ژ مزگەفتێ د چیووێ و یێ دژی ل رۆژھەلاتی بوو.
ل ھەمبەر ڤان خانیان، وەکو ناڤ دەرگەھەکی ھەبوو، پێغەمبەری سلاڤێن خودێ ل سەر بن بۆ چوونا دەف ھەڤژینێن خوە ب کار دئینا.
دەرگەھێن ڤان خانیان ژی ب فرەھیا نێزکی 70 سم و درێژاھیا نێزیکی مەتر و نیڤان بوون.
دھێتە گۆتن کو تەختێ عایشایێ ژ بەلگ و دارێن قەسپان ھاتبوو چێکرن و بالیفەکەک ژی ل سەر ھەبوو و یێ پێغەمبەری ژی سلاڤ ل سەر بن ژ دارا لیفکی و پیستێ گیانەوەران پێک دھات.
ئه‌ڤرۆ نيۆز:
ئه‌ڤرۆ پێنج شه‌مبى 30/11/2017 ل پيرمام، سه‌رۆك بارزانى ل گه‌ل پارت ولايه‌نێن سياسى يێن توركمانى كۆمبوو.
سه‌رۆك بارزانى، ههلويست وپشكداريا پێكهاتێ توركمانى دپرۆسا ريفراندۆمێ دا ب بلند نرخاند ودووپاتى ل به‌رده‌وامبوونا پێكڤه‌ژيانێ وبه‌رگريكرنێ ژ ماف ويه‌كسانيێ دناڤبه‌را هه‌موو پێكهاتێن نه‌ته‌وى وئايينى يێن كوردستانێ كر. ل دۆر باژێرێ كه‌ركووكێ ژى، سه‌رۆك بارزانى دياركر كه‌ركووك يا كوردستانيه، به‌لێ مولكێ چو پێكهاته‌كى ب تنێ نينه وپێدڤيه ببيته نموونا پێكڤه‌ژيانا ئايينى ونه‌ته‌وى.
دپشكه‌كا دى يا كۆمبوونێ دا، سه‌رۆك وسكرتێر ونوونه‌رين پارتێن توركمانى يێن كوردستانێ، سوپاسيا ههلويست وخه‌مخۆريا سه‌رۆك بارزنى كر دپاراستن وبه‌رچاڤ وه‌رگرتنا مافێ پێكهاتێ توركمانى ل سالێن بۆرى ول ده‌مێ نڤيسينا دستوورێ عيراقێ وهه‌روه‌سا پشته‌ڤانيكرنا به‌رده‌وام يا سه‌رۆك بارزانى ل پێكهاتێ توركمانى.
به‌رهه‌ڤبوويێن كۆمبوونێ دووپاتى ل وێ چه‌ندێ كر كو ريفراندۆم ده‌ستكه‌فته‌كێ ديرۆكى يێ هه‌موو پێكهاتێن كوردستانێ يه ودياركرن كو توركمان ل گه‌ل گه‌لێ كورد وپێكهاتێن دى يێن كوردستانێ چاره‌نڤيس وپاشه‌رۆژه‌كا هه‌ڤپشك يا هه‌ى.
هه‌ر دوێ كۆمبوونێ دا، به‌حس ل پرۆسا سياسى ل هه‌رێما كوردستانێ وعيراقێ وبابه‌تێ هه‌لبژارتنان هاته كرن ودووپاتى ل پاراستنا ده‌ستكه‌فت ومافێ پێكهاتان دپرۆسا هه‌لبژارتنان وئيستيحقاقێن سياسى وهه‌لبژارتنان يا پێكهاتێن نه‌ته‌وى وئايينى ل كوردستانێ هاته كرن.
ھەڵبژاردن و ئیستحقاقاتی سیاسی و ھەڵبژاردنی پێکھاتە نەتەوەیی و ئایینییەکانی کوردستان کرایەوە.
ئه‌ڤرۆ نيۆز:
پێشكێشكارا كه‌نالێ كه‌ركووك يێ ئه‌سمانى، نێرگز قادر، پشتى به‌رنامه‌ك ل كه‌نالێ كه‌ركووك يێ ئه‌سمانى ب جلكێن كوردى وئالايێ كوردستانێ پێشكێشكرى، تووشى گه‌فان ببو ژلايێ هيزا دژه تيرۆر يا عيراقى.
نێزگز قادر دبێژيت، ئالايێێ كوردستانێ دێ ل سه‌ر سه‌رێ خوه دانم.
نێرگزێ زێده‌تر بۆ باسنيۆز گۆت، ژبه‌ر پێشكيشكرنا من بۆ به‌رنامه‌كێ ب جلكێن كوردى وئالايێ كوردستانێ ڤه، ئه‌فسه‌ره‌كێ ده‌زگه‌هێ دژه تيرۆر يا عيراقى ل كه‌ركووكێ گه‌ف ل من كرن. دياركر ژى، شانازيێ ب ئالايێ نه‌ته‌وا خوه دكه‌م ويا به‌رهه‌ڤم ئالايێ كوردستانێ ل سه‌ر سه‌رێ خوه دانم.
پشتى له‌شكرێ عيراقى وحه‌شدا شه‌عبى ده‌ست ب سه‌ر كه‌ركووكێ دا گرتى، ئالايێ كوردستانێ ژ هه‌موو جهێن وى باژێرى راكرن وئالايێ عيراقێ بلندكرن.
ئه‌ڤرۆ نيۆز:
كۆمپانيا (فه‌يسبووك) يا ئه‌مريكى بۆ ژێبرنا چه‌ندين به‌رپه‌رێن سه‌خته، داخوازه‌كێ ژ هه‌موو بكارئێنه‌رێن خوه دكه‌ت.
دوهى چار شه‌مبى 29/11/2017، مالپه‌رێ (ده‌يلى مه‌يل) يێ بريتانى، ئاگه‌هداريه‌ك بۆ هه‌موو بكارئێنه‌رێن فه‌يسبووكى به‌لاڤكر وتێدا ئاماژه هاتيه كرن كو كۆمپانيا فه‌يسبووكى داخوازێ ژ هه‌موو بكارئێنه‌رين تۆرا خوه دكه‌ت، بۆ به‌رده‌واميبوون ل بكارئينانا به‌رپه‌رێن خوه ل سه‌ر تۆرا فه‌يسبووكى، پێدڤيه وێنه‌كێ رۆهن يێ خوه بۆ كۆمپانيا فه‌يسبووكى بهنێرن.
دياركر ژى، ئه‌و داخوازيا فه‌يسبووكى بۆ وێ چه‌ندێ يه، هه‌موو ئه‌و به‌رپه‌رێن سه‌خته، يان ئه‌وين بۆ هاككرنێ وكارێن دى ل فه‌يسووكێ هاتينه ڤه‌كرن، بهێنه ژێبرن.
وێ ئاگه‌هداريا فه‌يسبووكێ رۆهنكريه، هه‌ر كه‌سه‌ك وێنێ خوه بۆ فه‌يسبووكى نه‌ڤرێكه‌ت، ئێدى نه‌شێت بچيته دناڤ به‌رپه‌رێ خوه‌دا ل سه‌ر فه‌يسبووكى ونه‌شێت بكاربينيت، فه‌يسبووك ژى ب شێوه‌كێ ئوتۆماتيكى داخوازيا خوه دێ ئينيته سه‌ر شاشێن وان كه‌سان ئه‌وين دڤێت وێنێن خوه بۆ كۆمپانيێ ڤرێكه‌ن.
كۆمپانيا فه‌يسبووكى هه‌موو بكارئينه‌رين فه‌يسبووكى پشت راست دكه‌ت كو پشتى وێنێن بكارئێنه‌ران دگه‌هێته وان وكۆمپانى پشت راست دبيت كو ئه‌و به‌رپه‌رێن وان دسه‌خته نينن، وێنێن وان ل ده‌ف خوه ناهێلێت ودێ وان وێنان ژێ به‌ت.
ئه‌ڤرۆ نيۆز:
رێڤه‌به‌رێ گشتيێ دارايى ل كۆمسيۆنا هه‌لبژاردن وراپرسيان ل هه‌رێما كوردستانێ، راگه‌هاند، ل رۆژا ئێك شه‌مبى يا داهاتى دێ ده‌ست ب به‌لاڤكرنا پارێن كارمه‌ندێن سه‌ر سندۆقان هێته كرن وئه‌و به‌لاڤكرنه دێ چه‌ند رۆژان ڤه‌كێشيت.
زه‌ره‌ده‌شت مه‌لا حه‌سه‌ن، رێڤه‌به‌رێ گشتيێ دارايى ل كۆمسيۆنا هه‌لبژاردن وراپرسيان ل هه‌رێما كوردستانێ گۆت، رۆژا ئێك شه‌مبيا داهاتى 3/12/2017 دێ ده‌ست ب به‌لاڤكرنا پارێن كارمه‌ندێن سه‌ر سندۆقان دپرۆسا ريفراندۆمێ دا ل پاريزگه‌هێن هه‌ولێر، سلێمانيێ ودهۆك هێته كرن.
ناڤبرى زێده‌تر بۆ خه‌ندان گۆت، ئۆفيسێن كۆمسيۆنێ ل باژێران خشته‌كێ تايبه‌ت يێ هه‌ى بۆ به‌لاڤكرنا پاره‌ى وپرۆسا به‌لاڤكرنا دێ چه‌ندين رۆژان ڤه‌كێشيت كو هه‌ر رۆژه‌كێ دێ چه‌ند بنگه‌هه‌ك پاره‌ى وه‌رگرن.
كۆمسيۆنێ به‌رى نوكه پارێ كارمه‌ندێن سه‌ر سندۆقێن پرۆسا ريفراندۆمێ ل پارێزگه‌ها هه‌له‌بجه به‌لاڤكربوون.
نيشاندان