دوهی سێشەمبی 15/10/2024، ل سەلاحەدین سەرۆك مەسعود بارزانی پێشوازی لد. محەمەد ئەلحەسان، نوونەرێ تایبەت یێ سكرتێرێ گشتیێ رێكخراوا نەتەوەیێن ئێكگرتی ل ئیراقێ كر.
ب گۆڕەی بەیاننامەیەكا بارەگەهێ بارزانی» د دیدارەكێدا سەرۆك بارزانی پیرۆزباهی ل د. محەمەد ئەلحەسان كر و هیڤییا سەركەفتنێ بۆ خواست د ئەرك و كارێ وی یێ نوو دا».
هەر د وێ دیدارێدا، وەكو د بەیاننامەیا بارەگەهێ بارزانی دا هاتی» بیر و بۆچوون سەبارەت رەوشا سیاسی و پێشهاتەیێن ئیراقێ و دەڤەرێ و گەفێن پێشبەری سەقامگیرییا ئیراقێ و دەڤەرێ و رۆلێ (یونامی) د چارەسەركرنا كێشەیان و پەیداكرنا سەقامگیریێ، هاتنە لێكگوهارتن».
پەیوەندیێن د ناڤبەرا هەرێما كوردستانێ و حوكمەتا ئیراقا فیدرال و هەروەسا هەلبژارتنێن پەرلەمانێ كوردستانێ وپێدڤییا ئەنجامدانا وان د سەقایەكێ ئارام و زەلالدا تەوەرێن دی یێ وێ دیدارێ بوو.

دوهی سێشەمبی 15/10/2024، مەسرور بارزانی، سەرۆكێ حوكمەتا هەرێما كوردستانێ، پێشوازی ل د. محەمەد ئەلحەسان، نوونەرێ تایبەت یێ سكرتێرێ گشتیێ رێكخراوا نەتەوەیێن ئێكگرتی ل ئیراقێ كر.
ب گۆڕەی بەیاننامەیەكا حوكمەتا هەرێما كوردستانێ» سەرۆكێ حوكمەتا هەرێمێ سەرەرای پیرۆزباهییا دەستبكاربوونێ، پشتەڤانییا حوكمەتا هەرێما كوردستانێ ژ پێخەمەت سەرئێخستنا ئەركێ وی وەكو نوونەرێ تایبەت یێ سكرتێرێ گشتیێ رێكخراوا نەتەوەیێن ئێكگرتی ل ئیراقێ دوباتكر» .
سەرۆكێ حوكمەتا هەرێمێ دوپاتی ل گرنگییا بەردەوامبوونا رۆلێ (یۆنامی) ژ پێخەمەت پاراستنا سەقامگیریێ و ئاشتیێ و ئاسایشا ئیراقێ و هەرێما كوردستانێ كر.
نوونەرێ تایبەت یێ سكرتێرێ گشتیێ رێكخراوا نەتەوەیێن ئێكگرتی ل ئیراقێ ئاماژە ب وێ چەندێ كر» هەرێما كوردستانێ نموونەیەكا گەش و جوان یا پێشكەفتنێ و ئاڤەدانیێیە و دبیت ببیتە مودێلەك بۆ هەموو دەڤەرێن دی یێن ئیراقێ» . هەروەسا بەرهەڤییا نەتەوەیێن ئێكگرتی ژی بۆ هەر هەماهەنگییەكێ ل گەل حوكمەتا هەرێما كوردستانێ دیاركر.
وەكو د بەیاننامەیا حوكمەتا هەرێمێدا ئاماژە پێ هاتییە كرن» تەوەرەكێ كۆمبوونێ یێ تایبەت بوو ب بەرهەڤیێن هەلبژارتنێن پەرلەمانێ كوردستانێ، هەردو ئالی د هەڤڕا بوون ل سەر گرنگییا ئەنجامدانا هەلبژارتنان د رەوشەكا ئارام و دادپەروەرانە و دوور ژ پێشێلكاری و سەختەكاریێ».
د پشكەكا دی یا كۆمبوونێدا، بیر و بۆچوون ل دۆر ئەنجامدانا سەرژمێرییا گشتی یا ئاكنجیبوویان ل ئیراقێ كو بڕیارە ل 20/11/2024 بهێتە ئەنجامدان، هاتنە لێكگوهارتن.
سەرۆكێ حوكمەتا هەرێما كوردستانێ دوپاتكر» پشتەڤانیێ ل پڕۆسەیا سەرژمێرییا گشتی دكەین، بەلێ دڤێت تنێ ژ پێخەمەت پێشئێخستن و پێشڤەبرنا خزمەتگوزارییان و د بەرژەوەندییا هەموو هەڤوەلاتی و پێكهاتەیێن ئیراقێ بیت و بۆ هیچ مەبەست و ئارمانجەكا سیاسی نەهێتە بكارئینان».

نێچیرڤان بارزانی، جێگرێ سەرۆكێ پارتی دیموكراتی كوردستان داخواز ژ خەلكێ سلێمانیێ كر بۆ ئێك جار ژی بیت پارتی تاقی بكەن و دەنگی بدەنە پارتی.
دوهی دوشەمبی 14/10/2024، نێچیرڤان بارزانی، جێگرێ سەرۆكێ پارتی دیموكراتی كوردستان، د چارچۆڤەیێ پشكداریكرنێ د كەرنەڤالێ جەماوەریێ پارتیدا ل سلێمانیێ پەیڤەك پێشكێشكر و راگەهاند: پارتی و بارزانییان دیرۆكەكا تایبەت یا ل گەل سلێمانیێ هەی، هیچ ئالییەك نەشێت دەرزێ بێخیتە وێ پەیوەندیێ».
نێچیرڤان بارزانی گۆت ژی» جاران خەلكێ سلێمانیێ تشتەك دگۆت، دگۆت بۆ ئاڤەدانیێ و خزمەتێ پارتیبوونەكێ قەردارین، لەوما خەلكێ سلێمانیێ و ڤێ دەڤەرێ، داخوازێ ژ هەوە دكەم، بۆ ئێك جار ژی بیت پارتی تاقی بكەن و دەنگی بدەنە پارتی و دەستێ پارتی ل ڤێ دەڤەرێ ب هێز بكەن، هەوە پشتڕاست دكەین دێ پارتی ل ئاستێ سۆزێن خوە بیت و بۆ ئاڤەدانیێ و خوەشگوزەرانیێ خەمساریێ ناكەت».
جێگرێ سەرۆكێ پارتی گۆت ژی «دڤێت گەنج د ئاگەهدار بن، ب ئاخڤتن و لڤینێن بێ ناڤەرۆك و بەتال نەهێنە ب سەردابرن، ئەوا د مفایێ وان و پاشەڕۆژا وان و كوردستانێدا بیت تنێ و تنێ كار و كریارە، پارتی حزبا پڕۆژەیان و كار و كریارایە».
رۆهنكر ژی « لەوما دەمێ هوون دچنە دناڤ خەلكیدا، ل سلێمانیێ، ل هەلەبجە، ل هەموو جهان. بێژنە وان پارتی دێ وان پڕۆژەیان تمام كەت كو دەست پێكرینە، ئەوان ژی دێ دەست پێكەین كو مە نەكرینە. پارتی د تاریترین دیرۆكا سیاسییا كوردستانێدا چرایەكا رۆهن بوو، دژی ملكەچیێ، ژ پێخەمەت خۆڕاگریێ، ئازادیێ، دیموكراسیێ و دادپەروەریێ، سەرەرای هەموو وان فشارێن كو ل ڤێ دەڤەرێ ل سەر پارتی هەین، هوون جەماوەرێ پارتی نموونەیا وێ خۆڕاگریێ نە. لەوما پشتڕاست بن كو دێ هەموو بزاڤ و شیان و ئەزموون و شارەزاییا خوە بكارئینین بۆ ب هێزكرنا بنەما و میكانیزما سیستەمێ دیموكراسی ژ پێخەمەت باشتركرنا خزمەتان بۆ هەموو دەڤەر و پێكهاتەیێن كوردستانێ».

سەرۆكێ حوكمەتا هەرێما كوردستانێ، بەنداڤا بەستووڕە ل هەولێرێ ڤەكر و راگەهاند: ل نێزیك جهێ بەنداڤا بەستووڕە، ل سەردەمێ سەنحاریبی بەنداڤ لێ هاتییە دروستكرن و ئاڤ بۆ ناڤ باژێرێ هەولێرێ هاتییە برن.
دوهی دوشەمبی 14/10/2024، مەسرور بارزانی، سەرۆكێ حوكمەتا هەرێما كوردستانێ، د رێوڕەسمەكێ تایبەتدا، بەنداڤا بەستووڕە ل پارێزگەها هەولێرێ ڤەكر كو ب هاریكارییا گرۆپێ كۆمپانیێن كار هاتییە دروستكرن.
پشتی ڤەكرنا بەنداڤێ ،سەرۆكێ حوكمەتا هەرێما كوردستانێ د پەیڤەكێدا، خوەشحالییا خوە ب ڤەكرنا پڕۆژەی دیاركر كو بەری سالەكێ بەرێ بنیاتی بۆ هاتبوو دانان، هەروەسا سوپاسییا شێخ باز بەرزنجی، سەرۆكێ گرۆپێ كۆمپانیێن كار كر بۆ تمامكرنا پڕۆژەی ل دەمێ خوە كو د دەمێ سالەكێدا و ژ ئالیێ ئەندازیار و پسپۆر و شارەزایێن ناڤخوەیی هاتە بجهئینان.
سەرۆكێ حوكمەتا هەرێما كوردستانێ ئاماژە ب وێ چەندێ دا كو دروستكرنا ڤان بەنداڤان، پشكەكە ژ ستراتیژییەتا حوكمەتا هەرێمێ بۆ مفا وەرگرتنێ ژ ژێدەرێن ئاڤی یێن كوردستانێ ژ پێخەمەت دابینكرنا ئاسایشا ئاڤێ.
مەسرور بارزانی دوپاتكر ژی كو ئەڤ جۆرە بەنداڤە، دێ كاریگەرییەكا هەمە ئالییانە ل سەر پێشئێخستنا ئابوورێ كوردستانێ د بوارێن جۆرا و جۆر دا هەبیت، چ ژ روویێ گەشتوگوزاریڤە، یان دابینكرنا وزێ و سامانێ ماسێ و باشتركرنا رەوشا ئاڤا ژێر ئەرد و گوهۆڕینێن سەقای.
مەسرور بارزانی گۆت ژی” ل نێزیك جهێ بەنداڤا بەستووڕە، ل سەردەمێ سەنحاریبی بەنداڤ لێ هاتییە دروستكرن و ئاڤ بۆ ناڤ باژێرێ هەولێرێ هاتییە برن، لەوما جهەكێ گرنگ یێ دیرۆكیییە ژی و دشیاندایە بۆ گەشتوگوزاریێ سەرەدانا وی بهێتە كرن”.
سەرۆكێ حوكمەتا هەرێمێ داخواز ژ خەلكێ كوردستانێ كر كو هاریكارێن حوكمەتێ بن د پاراستنا وان پڕۆژەیێن دهێنە دروستكرن و ژینگەهێ ژی بپارێزن و دەستكاریێ نەكەن.

دوهی دوشەمبی 14/10/2024، ب بەرهەڤبوونا مەسرور بارزانی، سەرۆكێ حوكمەتا هەرێما كوردستانێ، كۆنفرانسێ (خزمەتگوزاریێن ساخلەمی، چاكسازیێن دەرمانان و پێدڤێن نوشداری و ستراتیژییا ریفۆرمێ د سیستەمێ ساخلەمیێدا. چاكسازی د خزمەتگوزاریێن ساخلەمی و دەرمانان) بڕێڤەچوو.
د پەیڤەكێدا كو د چارچۆڤەیێ كۆنفرانسیدا پێشكێشكری، مەسرور بارزانی، چاكسازیكرن د كەرتێ ساخلەمیێدا ب پێدڤییەكا هەنووكەیی و داهاتی هەژمارت. بۆ وێ چەندێ بەردوام بشێین ڤی كەرتی بەر ب پێشڤە ببەین تاكو خزمەتەكا باشتر پێشكێشی وەلاتییان بكەین و پشتڕاستبوونەكا زێدەتر ب هەڤوەلاتییان بدەین.
سەرۆكێ حوكمەتا هەرێمێ گۆت ژی» خوەشحالم ب وان داتایێن هاتینە بەرچاڤكرن، ب راستی ئەڤە جهێ دلخوەشیێیە و پشتڕاستیێ ددەتە هەڤوەلاتییان كو كەرتێ مە یێ ساخلەمیێ د ئاستەكێ باش دایە، بەلێ مە دڤێت باشتر بكەین، ئێك ژ ئەركێن گرنگ یێن كابینەیا حوكمەتێ ئەنجامدانا پڕۆسەیەكا بەرفرهە یا چاكسازیێ بوو د كەرتێ ساخلەمیێدا و چەندین بزاڤ ژی هاتینە كرن ل گەل ئالیێن پسپۆر یێن بیانی ژی ئاخڤتن و گەلەك كۆمبوون و كۆنفرانس یێن هاتینە كرن، بۆ وێ چەندێ ئەم بشێین وان خالان دەستنیشان بكەین كو پێدڤی ب چارەسەریێ و چاكسازیێ و ریفۆرمێ هەیە كو چەندین سالە دبیت كەرتێ ساخلەمیێ ژێ دنالیت».
سەرۆكێ حوكمەتێ ئاماژە ب وێ چەندێ كر» هندەك كار یێن هاتینە ئەنجامدان و بەرهەمێ وان ژی بۆمە یێ دیارە، بابەتێ رێنمایێن ئینانا دەرمان و خۆراكی و وەرگرتنا پێرابوونێن قانوونی بەرامبەر سەرپێچكاران، دزانم كو گەلەك ئالی هەبوون پێشتر مامەلە ب ئینان و بازرگانیكرن ب بابەتێ دەرمانان كریە و ژ سنوورێن جودا ئینانا ڤان دەرمانان، مخابن بۆ وێ چەندێ مفای بگەهینیتە هندەك بازرگانان، ب تایبەت ژی بۆ ئەوین كو نە بەرپرسیار بوون. دەستخوەشیێ ل وەزارەتا ساخلەمیێ و وەزارەتێن پەیوەندیدار دكەم كو ئەڤ پێرابوونە وەرگرتین و كارەكێ باش ژی بۆ كۆنترۆلكرنا دەرمانان و خۆراكی كریە».
رۆناهی ژی ئێخستە بابەتەكێ دی كو حوكمەتا هەرێمێ ئەنجامدایە ئەوژی ئەوە كو گرنگی هاتیە دان ب دروستكرنا نەخۆشخانەیان ل جهێن جودا ل هەرێما كوردستانێ و گۆت» مە چەندین نەخوەشخانەیێن نوو ب ئاست و كوالێتییەكا باش یێن دروست كرین و ئەوێن هەین ژی، مە دەست ب نووژەنكرنا هندەكان یا كری و نوكە ئەو پڕۆسەیە یا بەردەوامە و هندەك ژ وان نەخوەشخانەیان ژی كو پێشتر هەبوون، مە بەرنامە یێ هەی كو ئاستێ وان نەخوەشخانەیان باشتر بكەین ژ روویێ دابینكرنا ئامیرە و تەكنەلۆژیا نوو بۆ نەخوەشخانەیان، هەروەسا باشتركرنا كارێن خزمەتگوزاری ل وان نەخوەشخانەیان».
ل دۆر بزاڤێن حوكمەتا هەرێمێ ژی بۆ چارەسەركرنا نەخوەشێن پەنجەشێرێ، سەرۆكێ حوكمەتا هەرێمێ راگەهاند» جهێ خوەشحالیێیە كو حوكمەتا هەرێمێ گرنگییەكا مەزن دایە بابەتێ چارەسەركرنا نەخوەشێن پەنجەشێرێ و مە بڕیارا دروستكرن و دامەزراندنا چەندین سەنتەرێن نوو ژی ل سەرانسەری كوردستانێ یا دای، ل هندەك جهان یێن د قۆناغا دروستكرنێدا و هیڤیدارم زوو ئەو سەنترە بهێنە تمامكرن و بكەڤنە د خزمەتا هەڤوەلاتییاندا. بیگومان دێ ئامیرەیێن پێشكەفتی د وان سەنتەراندا هەبن كو دێ وەكەت هەڤوەلاتیێن مە پێدڤی ب وێ چەندێ نەبیت ژ هەرێما كوردستانێ بچنە دەرڤە و هەر ل ڤێرێ دێ چارەسەرییا خوە وەرگرن، دێ هاریكار ژی بیت بۆ هەڤوەلاتیێن دی یێن ئیراقێ و رۆژهەلاتا ناڤین كو بشێن وەكو جهەكێ پێشكەفتی، سەرەدانا وان نەخوەشخانەیان بكەن ل هەرێما كوردستانێ».
باس ل وێ چەندێ ژی كر كو مە بزاڤ كریە تنێ ئەم گرنگیێ ب سەنتەرێن باژێران نەدەین، گەلەك ژ وان نەخوەشحانەیان یێن ل باژێرك و گوند و جهێن دەرڤەی باژێرێن مەزن هاتینە دروستكرن، ئەڤە ژی بۆ وێ چەندێیە كو ئاسانكاری بۆ هەڤوەلاتییان بهێنە كرن تاكو نەچار نەبن هەردەم بۆ چارەسەرییێ سەرەدانا باژێرێن مەزن بكەن، بەلكو ئەو سەنتەر و ئەو پسپۆریێن كو پێدڤینە بۆ وان بهێنە هنارتن بۆ جهێن نێزیكی وان و گونجای.
مەسرور بارزانی دوپاتكر كو ئێك ژ وان بابەتێن گرنگی پێدای، بابەتێ قانوون و مافێن نەخوەش و نوشداری بوو كو د كابینەیێدا بەردەوام ل سەر ڤێ چەندێ گەنگەشێن چڕ هاتینە كرن، كا چاوان دێ مافێن نوشداری د پاراستی بن، د هەمان دەمدا مافێن هەڤوەلاتی و نەخوەشی ژی د پاراستی بن، بۆ وێ چەندێ پشتڕاست بن ژ روویێ قانوونی ڤە هاریكاری و پشتەڤانی ل مافێن هەموو تاكەكی دهێتە كرن.
ل دۆر كوالێتییا كۆنترۆلی ژی، سەۆكێ حوكمەتا هەرێمێ گۆت» دەمێ من دیتی ئەو سێكتەرێن نوكە ب هووری ئاخڤتن ل سەر هاتییە كرن، ئەڤە پشتڕاستیێ ددەتە هەڤوەلاتی، كو دەمێ دچیت دەرمانەكی ژ دەرمانخانەیێ بكریت، پشتڕاست بیت كو ئەڤە یێ ژ پشكنین و كوالێتییا كۆنترۆلی یا دەزگەهێن پەیوەندیدارێن حوكمەتێ دەرچووین و هەڤوەلاتی دشێت باوەریێ ب وان دەرمانان بینیت. ل ڤێرێ داخوازێ ژ هەڤوەلاتییان دكەم، ئەوێن كو سەرەدانا جهێن پێدڤی دكەن بۆ وەرگرتنا دەرمانان ژ دەرمانحانەیان، وێ چەندێ ل بەرچاڤ وەربگرن، ئەو ستێكەر بۆ پشتڕاستبوونا هەوەیە، هەر جۆرە دەرمانەكی ئەڤ ستێكەرە پێڤە نەبیت كو یێ رێپێدایە ژ ئالیێ حوكمەتا هەرێما كوردستانێ و وەزارەتا ساخلەمیێ هیڤییە وان دەرمانان وەرنەگرن، چونكە ئەو ژ دەرڤەی پێرابوونێ حوكمەتێ، دبیت ب شێوەیێ قاچاخ، مخابن ل هندەك خالێن سنووری یێن هەرێمێ هێشتا د بەردەوامن و ئیننە دناڤ هەرێما كوردستانێدا. مە هەموو بزاڤ یێن كرین بۆ وێ چەندێ پێرابوونێن پێدڤی بهێنە وەرگرتن ل بەرامبەر ب قاچاخ ئینانا هەر جۆرە كەرەستەكی ل هەر سنوورەكێ كوردستانێ نەمینیت، بەلێ هێشتا یا مای و هەتا ئەم پشتڕاست نەبین كو هەموو خالێن سنووری ب شێوەكێ ب هێز یێن هاتینە كۆنترۆلكرن. لەوما پشكەكا كۆنترۆلی ل سەر هەڤوەلاتی دمینیت كو یێ هشیار و ژێر بیت و سەحكەنە وان دەرمانان و یێ ستێكەر پێڤە نەبیت، باوەریێ پێ نەئینن. د بەرنامەیێ حوكمەتێدا بوو بۆ دابینكرنا سیستەمێ بیمە و دلنیایێ بۆ نەخوەشی، بۆ كێمكرنا مەزاختییان ل سەر هەڤوەلاتی و هاریكارییا وی د وەرگرتنا چارەسەرییا ساخلەمییا باش و رێكوپیكدا كو پێدڤی بیت بۆ وان هەڤوەلاتیێن كو نەچارن چارەسەرییا بەردەوام وەربگرن» .
هەروەسا ئاماژە كر كو بابەتێ ساخلەمیێ تنێ ئەركێ حوكمەتێ و وەزارەت و نوشداران نینە، پشكەك ژێ هەڤوەلاتی ب خوە پێدڤییە جۆرێ دەرمانی، جۆرێ ژیانێ، وەرزشكرن، گرنگیدان ب شێوازێ ژیانێ و كێمكرنا سترێس و سەرەدانا نەخوەشخانەیان و پشكنینێن بەردەوام، ب تایبەتی وان رێنمایێن كو نۆشدار ددەنە هەموویان، گەلەك یا گرنگە چ ئافرەت بیت و چ زەلان بیت، گەنج بیت یان پیر بیت، كو هەست ب وێ چەندێ بكەین مە پێدڤی ب پشكنینایە یان ژی ل هندەك تەمەنان دا، گەلەك دێ باش بیت ئەم سالانە ئەوان پشكنینێن بەردەوام بكەین و ژئەگەرێ وێ چەندێ كو ئامیرە و تەكنەلۆژیایا پێشكەفتی یا هەی، دشیاندایە ب دەستنیشانكرنا دەستپێكا نەخوەشیێ، چارەسەرییەكا باش و گونجای بۆ بهێتە دیتن، ژ وێ چەندێ كو گرنگیێ پێ نەدەین یان پاشبێخین تاكو خودێ نەكەت نەخوەشیێ كارێ خوە كربیت و ئێدی ژ دەستێ نۆشداری ژی دەربكەڤیت، لەوما داخوازێ ژ هەڤوەلاتییان دكەم، ئەوژی هاریكارێن حوكمەتێ و نۆشدارێن خوەشتڤی بن وسەرەدانا بنگەهێن نوشداری بكەن و پشكنینێن پێدڤی بۆ خوە بكەن تاكو مە هەموویان پێكڤە جڤاكەكێ ساخلەم هەبیت.
ل دوماهیێ سەرۆكێ حوكمەتا هەرێمێ دویاتكر كو» بابەتێ چاكسازی و ریفۆرمێ تشتەك نینە د كۆنفرانسەكیدا ب دوماهی بهێت یان ژی د كابینەیەكا حوكمەتێدا ب دوماهی بهێت، تشتێ باش یێ هاتییە كرن و پێنگاڤێن باش یێن هاتینە هاڤێتن، بەلێ ریفۆرما نۆشداری و ریفۆرم د كەرتێ ساخلەمیێدا تشتەكێ بەردەوامە، مە پێدڤی ب راهێنانا نۆشداران یا هەی، ب راهێنانا ستافێن نەخوەشخانەیان یا هەی، ب بلندكرنا ئاستێ خواندنێ ل كولیژێن نۆشداری یا هەی، مە پێدڤی ب ئینان و مفا وەرگرتن ژ تەكنەلۆژییا سەردەم یا هەی، گەلەك جاران چارەسەرییا باشتر ژ ئەگەرێ بكارئینانا تەكنەلۆژییایێ دهێتە كرن، پێدڤییە ئەم مفای ژێ وەرگرین و نۆشدارێن بەرێزێن مە پشكدار ببن د كۆنفرانسێن نێڤدەولەتیدا تاكو ئاشنا ببن ب چارەسەرییا پێشكەفتی كو نوكە ل وەلاتێن پێشكەفتی مفا ژێ دهێتە وەرگرتن. ب هەر حال ئەڤە دێ پڕۆسەیەكا بەردەوام بیت و هیڤیدارم كەرتێ ساخلەمیێ و وەزارەتا ساخلەمیێ و نۆشدارێن بەرێز و هەموو هەڤوەلاتیێن كوردستانێ، ئەم هەموو پێكڤە، بەر ب ریفۆرمەكا باشتر، چاكسازییەكا ب لەزتر، وەلاتەكێ ئاڤەدانتر و وەلاتەكێ ساخلەمتر پێنگاڤان ب هاڤێژین».

نوونەرێ سەرۆك بارزانی د هەوا بانگەشەیا هەلبژارتناندا ل شەقلاوە راگەهاند: پارتی یا وەفادارە بۆ ئاڤەدانكرنا وەلاتی، چونكە پارتی بۆ خزمەتكرنا ئاخ و مللەتی یا هاتییە دامەزراندن.
دوهی دوشەمبی 14/10/2024، سیداد بارزانی، نوونەرێ سەرۆك بارزانی د هەوا بانگەشەیا هەلبژارتناندا ل شەقلاوە گۆت» بۆ دیاركرنا چارەنڤیسێ هەرێما كوردستانێ، خەلكێ شەقلاوە خەبات و قوربانییەكا ئێكجار مەزن ژ پێخەمەت ئاخ و كەرامەتا ڤێ هەرێمێ یا دای».
نوونەرێ سەرۆك بارزانی گۆت ژی» شوین تبلێن خەلكێ ڤێ دەڤەرێ ل چیایێ سەفینی و هەموو جهەكی د دیارن، ئەڤجا ل شۆڕەشا ئیلۆنێ بیت یان ژی گۆلانێ، هەتا نوكە ژی بەرگریكارێن سەرسەختێ ئاخ و پەرلەمان و حوكمەتا هەرێما كوردستانێ نە و پەیڕەوێن بارزانیێ نەمرن».
پتر گۆت» پێدڤییە بۆریێ خوە ژبیر نەكەین و بزانین بۆ وێ چەندێ ل پاشەڕۆژێدا ژی بزانین چ بكەین، پارتی دیموكراتی كوردستان ژ رۆژا دامەزراندنا خوە بۆ وێ چەندێ هاتییە دامەزراندن كو خزمەتا ڤێ ئاخێ و ڤی مللەتی بكەت، دەمێ پارتی هاتییە دامەزراندن بێهیڤیێ روو ل ڤێ هەرێمێ كربوو. شۆڕەشێن كوردی، كۆمارا كوردستان هیچ ژ وان نەمابوون، پارتی هیڤی بەخشی گەلێ كوردستانێ. بارزانیێ نەمر ب رێكا ئێكەتییا سوڤییەتا جاران داستانەكا مەزن تۆماركر، ئیرادەیەكا ب هێز نیشا هەموو جیهانێ دا، كو ب هیچ شێوەیەكی د بەرهەڤ نینن خوە رادەست بكەن».
سیداد بارزانی، نوونەرێ سەرۆك بارزانی راگەهاند ژی» پارتی یا سەربلندە ب وێ دیرۆكی، پارتی خودانا جەماوەرەكێ ب هێزە كو هوون هەموو نموونەیەكا مەزنن، پارتی یا سەربلندە ب وێ دیرۆكا كو هەی، لەوما پارتی یا وەفادارە ب ئاڤەدانكرنا وەلاتی و نیشتمانی، خەلكەك یێ هەی دیرۆك نینە، هەكە باسێ بۆری ژی بكەن ژ شەرمزاریێ زێدەتر تشتەكی دی بۆ نامینیت».

ئەندامەكێ مەكتەبا سیاسییا پارتی راگەهاند: هەلبژارتنێن پەرلەمانێ كوردستانێ د ژڤانێ خوە یێ دیاركریدا دێ هێنە ئەنجامدان و ئاماژەكر: رێژەیا پشكدارییا دەنگدەران، یا ئێكلاكەرە.
دوهی دوشەمبی 14/10/2024، هشیار زێباری، ئەندامێ مەكتەبا سیاسییا پارتی دیموكراتی كوردستان ل كۆنفرانسەكێ رۆژنامەڤانی ل باژێرێ دهۆكێ، ل دۆر ئەنجامدان هەلبژارتنێن پەرلەمانێ كوردستانێ، بانگەشێ و بەرهەڤیێن كۆمسیۆنێ بۆ پڕۆسەیا هەلبژارتنان، سازكر.هشیار زێباری گۆت» شەڕێ د ناڤبەرا ئیسرائیلێ و حزبوللا یا لوبنانی و گرژی و ئالۆزیێن دی یێن دەڤەرێ كاریگەری ل سەر هەلبژارتنێن پەرلەمانێ كوردستانێ نابیت و دێ ل ژڤانێ خوە یێ دیاركریدا هێنە ئەنجامدان، د خوازین حوكمڕانییەكا باش ژێهاتی سەركردایەتییا هەرێما كوردستانێ بكەت بۆ وێ چەندێ بشێت روو ب روویێ ئاستەنگێن داهاتی ببیت».
ئاماژەكر ژی» مە داخواز ژ قۆنسلخانە و رێكخراوێن نێڤدەولەتی یا كری چاڤدێرییەكا هوور یا هەلبژارتنێن پەرلەمانێ كوردستانێ بكەن، بۆ وێ چەندێ پڕۆسە ب پاقژی و دوور ژ پێشێلكاریێ و سەختەكاریێ بڕێڤەبچیت».
سەبارەت بانگەشەیا هەلبژارتنان، هشیار زێباری گۆت» پارتی خوە ژ بێرێزیێ و ناڤزراندنێ ب كەسایەتی و ئالیێن سیاسی یێن دی یێن هەرێما كوردستانێ یا پاراستی و رۆژا 20 ڤێ مەهێ دێ بەرسڤا هەموو ئاخڤتن و بێرێزی و ئەزمان درێژییەكا بەرامبەر پارتی دەین».
وی ئەندامێ مەكتەبا سیاسییا پارتی داخواز ژ وان دەنگدەران كر یێن كارتێن خوە وەرنەگرتین، سەرەدانا نڤیسینگەهێن كۆمسیۆنا بلند یا سەربخوە یا هەلبژارتنان ل ئیراقێ بكەن و كارتێن خوە وەربگرن، بۆ وێ چەندێ بشێن پشكداریێ هەلبژارتناندا بكەن».
دوپاتكر ژی» رێژەیا پشكدارییا دەنگدەران ب تایبەت ل دەڤەرا بەهدینان یا ئێكلاكەرە، ئانكو چەند رێژە زێدە بیت، پارتی دێ كورسیێن زێدەتر د هەلبژارتێن پەرلەمانێ كوردستانێ ب دەستڤەئینیت».

سالار محەمەد دۆسكی:

رۆژان جەبار محەمەد، كچا شەهید جەبار سندی، خووشكا شەهیدی و برازا شەهیدی، بەربژارا هەژمار (22) لیستا (190) یا پارتی دیموكراتی كوردستان، هەلگرا باوەرناما دبلوم و بەكالوریۆس و نوكە قوتابیا ماستەرێ یە، بۆ رۆژناما ئەڤرۆ گۆت: دێ كاری ل سەر بەرنامێ‌ لیستا پارتی كەم كو هەمی بیاڤێن ژیانێ بخوە ڤە گرتینە، چونكو ژ مالباتەكا خودان شەهیدم دێ زێدەتر گرنگیێ دەمە تەوەرێ پێشمەرگە و شەهیدان و ئەنفالكریان، دیسا دێ گرنگیەكا تایبەت دەمە تەوەرێ ئافرەتێ و پاراستنا خێزانا كوردی و ئەڤە بوو من گەلەكا گرنگە، هەر دیسا دێ مە گرنگیەكا تایبەت بۆ خواندنا بلند هەبیت و ئەو كێم و كاسیێن هەین دێ بزاڤا كەین بهێنە چارەسەركرن و پتر گەشێ بكەت و زێدەتر تەكنولۆژیا زانیاریا بخێنە كاری و خوە ژ كاروبارێن دەستی دوور بكەین، چونكو من باوەرنامەك د ڤی بیاڤی دا هەیە من پرۆژەیێن تایبەت هەنە كو مفای ژ تەكنولۆژیا پێشكەفتی د كاروبارێن كارگێری و روتنی دا وەربگرین.
هەمان بەربژار گۆت ژی: سەرەرای كو گەلەك بۆ زاخۆ هاتیەكرن و لێ‌ هەكە چووینە پەرلەمانی دێ هەمی بزاڤا كەین زێدەتر پرۆژەیێن ستراتیجی بۆ ڤی باژێری بهێنە ئەنجامدان و بەرەف گەشەبوونێ ڤە بچیت و دێ پالپشت و پشتەڤان بین بۆ ئیدارا سەربەخۆیا زاخۆ، چونكو زاخو وارگەهێ شەهیدان و پێكڤەژیان و سەرهلدانێ یە و لاندكا هەر دو شۆڕەشێن ئیلۆن و گولانێ یە.
هەروەسا بەربژار رۆژان جەبار سندی گۆت: داخوازێ ژ خەلكێ كوردستانێ دكەم بەرەف سندۆقێن دەنگدانێ بچن و دەنگێ خوە بدەنە لیستا(190) یا پێشمەرگەی و یا بەرخودانێ و پارتی دیموكراتی كوردستان تاكە پارتە بەرەڤانیێ ژ قەوارەیێ هەرێما كوردستانێ دكەت و پارتی، ئانكو كوردایەتی و كوردستان، لەوما گرنگە پارتی سەربێخین دا ئەم ژی هەر بمینین پاراستی و هەرێما كوردستانێ هەرا تەنا و ئارام بیت.
ل دووماهیێ بەربژارا هەژمار (22) ل سەر لیستا (190) رۆژان جەبار سندی گۆت: دەمێ هاتیمە بەربژاركرن من باوەری ب خودێ و پشتبەستن ب پێشمەرگەی و مالباتێن شەهیدان و ئەنفالكریان و زیندانیێن سیاسی ئینایە، و گازی دكەمێ و بێژم كچا شەهیدانم و ژ ژینگەها هەوە مە و كاودانێن هوون تێدا ژیاین تێدا دەربازبوویمە و دبینم دێ زێدەتر ئێش و ئازارێن هەوە گەهینم.

سالار محەمەد دۆسكی:

بەهجەت عەلی سپینداری، بەربژارێ هەژمارە 6 ل سەر لیستا 190 یا پارتی دیموكراتی كوردستان بۆ رۆژناما ئەڤرۆ دیار كر، كارناما پارتی بۆ خولا شەشێ یا پەرلەمانێ كوردستانێ یا رۆهن و ئاشكرایە و دبێژیت: ل پەرلەمانێ كوردستانێ دێ‌ هەمی بزاڤان ژ بۆ بجهئینانا وێ كارنامێ كەین، چونكی كارنامەكا تێر و تەسەلە و هەمی ئالیێن ژیانێ ڤەدگریت و پارتی ژ بەرپرسایەتیێ دوور ناكەڤیت و دێ هەر پارتی بیت خودانا ڤی مللەتی.
بەهجەت سپینداری گۆت: «پارتی وەك پارتەكا خودان خەبات و قوربانیدان ب درێژاهیا دیرۆكێ، مێژوو شاهدێ خەبات و بەرخودانا پارتی یە، خودانا هەردو شۆڕەشێن ئیلۆن و گولانێ و سەرهلدانێ‌ یە، بەرەڤانی ژ ئاخا كوردستانێ كریە و شەرێ داعشێ‌ باشترین نموویە، پارتی هەلگرا دیاركرنا چارەنڤیسێ مللەتێ مە و بجهئینانا ڕیفڕاندۆما كوردستانێ یە، لەوما دبێژم پارتی بۆ ئەڤرۆ و سوباهی یە و پارتی خودان بەرنامەیە و دێ هەر پارتی بیت خودانا ڤی مللەتی».
بەربژارێ هەژمارە 6 گۆتژی: «پەیداكرنا دەلیڤەیێن كاری بۆ گەنجان دێ ژ كارێ‌ مە بیت، دێ بزاڤێن مە ئەو بن ل سەر هەمی تەوەرا كار بكەین، لێ تەوەرێ خوشكرنا ژین و ژیارا خەلكێ مە دێ تەوەرەكێ سەرەكیێ كارناما لیستا 190 بیت و ئەڤە ژی جهێ رێزا هەر كەسەكی یە».
ناڤهاتی زێدەتر گۆت: «داخوازێ ژ هەمی خەلكێ كوردستانێ دكەم بچنە سەر سندۆقێن دەنگدانێ و دەنگی بدەنە لیستا 190، لیستا هەردو داستانێن (پردێ و سحێلا) لیستا ئاڤەدانیێ و بەرگیریێ و ب تنێ درووشمێ پارتی دەربڕینێ ژ پاشەرۆژ و ئاڤەدانیێ و پێكڤەژیانێ دكەت، دیسا دەنگی بدەنە هەژمارە 6 دێ هەمی بزاڤا كەین زێدەتر خزمەتا گەل و وەلاتێ خوە بكەین، چونكی وەلاتێ مە ژ هەژی خزمەتێن مەزنترە.