ئەڤرۆ نیۆز،زنار تۆڤی:

دو ئەندامێن بلند یێن جڤاتا نوونەرێن ئەمریکا راگەھاند،هەکە ھەرێما کوردستانێ ژ لایێ ھێزەکێ روو ب روو کۆمکوژیان بیت، سەرۆکێ ئەمریکا دێ ھێزێ بۆ پاراستنا وان بکار ئینیت.

دێفین نۆنس، سەرۆکێ لژنا ھەوالگێریێ ل جڤاتا نوونەرێن ئەمریکا بۆ مالپەرێ واشنتۆن ئێکزامینەر راگەھاندیە،کو پێدڤیە دەست د ئالۆزیێن ھەولێرێ و بەغدا وەردەن، بۆ وێ ئێکێ ژی دخوازیت سەرەدانا ھەرێما کوردستانێ بکەت، ژبەرکو ئەو ناخوازیت کۆمکوژی دروست بن.

نۆنس بەرگری ژ کوردان کرن ھەمبەری گەفێن ھێزێن عێراقی و حەشدا شەعبی و دوپات کر، ئارمانجا ئیرانێ پشتی ریفراندۆما کوردستانێ، زێدەکرنا ئاریشانە.

ژ لایەکی دی ڤە، ئیلیۆت ئێنجل، بەرپرسێ لژنا کاروباێن دەرڤە ل جڤاتا نوونەرێن ئەمریکا راگەھاند، ئەو ژی د گەل وێ ئێکێ یە و پێدڤیە ل دوور وی بابەتی تشتەکی بکەن و ھاریکاریا کوردان بکەن.
ئێنجل ئاشکرا کر، پشتراستن چو کۆمکوژی ب سەر کوردان دا ناھێن،هەکە دوماهی بژاردەیا وان ھنارتنا ھێزێ ژی بیت، پێدڤیە وی کاری بکەن.

ئەڤرۆ نیۆز،زنار تۆڤی:

بەرێ سپێدەهیا ئەڤرۆ سوپایێ عێراقێ و حەشدا شەعبی هێزێن پێشمەرگەی ل دەڤەرا سحێلا ل باكۆرێ زومار و هەروەسا ل رۆژئاڤایێ دیجلە بوردۆمانکرن و دەست ب ھێرشكرنێ كریە،لێ هێزێن پێشمەرگەی ل گوندێن بەردیە و حەمەد ئاغا زیانەکا زۆر گەهاندیە چەكدارێن حەشدا شەعبی.

هەروەسا:پێشمەرگەی ل ھەردو گوندێن جرونیێ و عەین عوزێر پاشەكشە ب چەكدارێن حەشدا شەعبی كریە و هەروەسا پێشمەرگەی هژمارەکا تانك و زرێپۆشێن حەشدێ تێكشكاندینە.

د ڤی‌ شه‌ریدا هێزێن پێشمه‌رگێ كوردستانێ زیانەكا زۆر ل چه‌كدارێن حەشدێ دایە و سێ هه‌مڤی و دو تانك و باجەرەک تێكشكاندینه‌ و فرۆكه‌کا بێ فرۆكه‌ڤان یا چاڤدێریێ یا حه‌شدیاشه‌عبی ئێخستیە‌ خوارێ.

پێشتر ئەنجوومەنێ ئاسایشا ھەرێما كوردستانێ د راگەهاندنەکێدا،ئەڤ دۆخە ب مەترسیدار بناڤکریە و داخواز ژ حوکمەتا بەغدا كریە،کو دەستپێشخەریا ھەرێما كوردستانێ قەبول بكەت و دەست ب ئەنجامدانا گفتوگۆیێن بێ مەرج بهێتە کرن.

ئەڤرۆ نیۆز،زنار تۆڤی:

دەستەیا سەرۆکاتیا پەرلەمانی بریاردا روونشتنا ژمارە (4) یا ئاسایی یا خولا پاییزێ،یا ســالا چارێ ل كاتژمێر (11) بەری نیڤرۆیا رۆژا پێنجشەمبی بهێتە پاشخستن بۆ هەمان کاتژمێر ل رۆژا شەمبی ٢٨-١٠-٢٠١٧.

پشتی کاراکرنا پەرلەمانی ئەڤە چارەمین روونشتنا ئاسایی یا پەرلەمانیە، ئەڤەژی پشتی هنگێ هات دەمێ ل روونشتنا ژمارە ٣ یا سالا چارێ یا پەرلەمانی دا،دەمێ کو ماوێ ڤێ خولا پەرلەمانی بۆ هەشت هەیڤان درێژکری،چونکی هەلبژارتن ل دەمێ خۆدا برێڤە نەچوون،ل ١-١١-٢٠١٧.

بزاڤا گۆران و کۆمەلا ئیسلامی پشکداری د روونشتنا بوری یا پەرلەمانی دا نەکربوون، بەلێ هەردو فراکسیۆنان بریار دایە کو ل روونشتنا رۆژا شەمبیێ بەشداریێ د کۆمبوونا پەرلەمانی دا بکەن.