ئه‌ڤرۆ نیۆز،رەمه‌زان هه‌رنى:

ئه‌ندامه‌كا لێژنه‌یا كاروبارێن پێشمه‌رگه‌ى ل په‌رله‌مانێ كوردستانێ خویاكر:بریارا ئاڤاکرنا خانیا و دابه‌شكرنا پارچێن ئه‌ردی بۆ كه‌س و كارێن شه‌هیدێن شه‌رێ داعش ل په‌رله‌مانێ كوردستانێ ده‌رچوویه‌ و هه‌تا نها ئه‌و بریار نه‌هاتیه‌ جێبه‌جێکرن.

به‌هار عه‌بدولره‌حمان ئه‌نداما لێژنه‌یا كاروبارێن پێشمه‌رگه‌ى ل په‌رله‌مانێ كوردستانێ بۆ ئه‌ڤرۆ نیۆز ئاشكراکر:ئه‌گه‌رێن سه‌ره‌كى یێن بجه نه‌كرنا بریارا دابه‌شكرنا خانى و پارچێن ئه‌ردی ڤەدگەریت بۆ روتینیاتێن ل فه‌رمانگه‌هێن حكومى كو كار ل سه‌ر ڤێ پرسێ دكه‌ن.

هه‌روه‌سا گوت ژی:بزاڤێن به‌رده‌وام دكه‌ین كو هەر بریارەكا ل په‌رله‌مانێ كوردستانێ ده‌ربچیت بهێته‌ بجهكرن،به‌لێ قه‌یرانا دارایى ئه‌گه‌ره‌كێ سه‌ره‌كی یێ بجهنەئینانا ڤێ بریارێ یه‌،ل گه‌ل به‌شه‌كێ روتینیاتێن ل ناڤ فه‌رمانگه‌هێن حكومى.

بهارێ خویاکر ژی:هه‌موو شه‌هێدین كوردستانێ دێ پارچه‌ ئه‌رد و خانیا وه‌رگرن چاڤه‌رێ دكه‌ین ده‌مه‌ك نێزیك ئه‌و بریاره‌ بهێته‌ بجهكرن و هه‌موو وارس و که‌س و كارێن شه‌هیدان ببنه‌ خودان پارچێن ئه‌ردی و خانى ل كوردستانێ و هه‌ر وارسه‌كێ شه‌هیدا ل سنورێ خوه‌ دێ مفادار بیت ژ ڤێ بریارێ.

ئه‌ڤرۆنیۆز،عه‌زیز ره‌سول هه‌ورامانی:

پۆلیسێن هه‌لە‌بجه‌ د‌ كۆنگره‌کێ ڕۆژنامهڤانیدا ئامارێن رۆژانێن جه‌ژنێ ئاشكراکرن و راگه‌هاند،د رۆژانێن جه‌ژنێدا 11 روودانێن دزیكردنێ و ته‌قه‌كرنێ و شه‌ره‌چه‌قۆیان رووداینە‌.

رائید به‌رزان عوسمان پەیڤدارێ پۆلیسێن پارێزگەها هه‌لە‌بجه‌ د‌ كۆنگره‌کێ ڕۆژنامه‌ڤانیدا گۆت:ئه‌و پلانا ئه‌منی یا بۆ پاراستنا سه‌رومالێ وەلاتیان و وان گه‌شتیارێن روودکەنە سه‌یرانگەهان هاتیە دانان،ب ‌هەڤكاریا ئاسایشێ و پۆلیسێن هاتنوچوونێ،ئەم شیاینە زۆر باش جێبه‌جێی بكەین و ‌کێمترین حالەت و روودانێن شه‌ری و دزیكرنێ هاتینە ئه‌نجامدان ل‌ سنورێ پارێزگەها هه‌له‌بجه‌ و ناحیێن ده‌وروبه‌ر.

ناڤهاتی گۆتیە ژی:گه‌نجەکێ هه‌له‌بجه‌ ڤیایە ب رێیا‌ ده‌بانجێ خۆ بكوژیت و فیشه‌كەک ل خۆ دایە و نوکە ل‌ ژێر چاڤدێریا هوور یا نۆشداری دایه‌ ل‌ نه‌خۆشخانا سلێمانیێ،هه‌روه‌سا دو حاله‌تێن ته‌قه‌كرنێ هاتینە تۆماركرن و‌ كه‌سەک برینداره‌ بوویە،ب ‌شه‌رێ چه‌قۆیان ژی شه‌ش كه‌س بریندار بووینه و ترۆمبێلەکێ ل زارۆیەکێ دایە و وی زارۆیی‌ گیانێ خۆ ژ ده‌ستدایه‌‌.

هەروەسا دیارکر ژی:ئافره‌تەکێ ل سنورێ پارێزگەها هه‌ولێرێ روو دکەتە پارێزگەها هه‌لە‌بجه‌ بۆ دزیكرنێ پشتی کو ل‌ درگەهێ مالەکێ ددەت و دزانیت كه‌س ل مال نینە دچیته‌ ژوور ڤە و گۆژمێ‌ 400 ‌هزار دینارێن عێراقی و ده‌بانجه‌کێ ددزیت،بەلێ پشتی دەمەکێ کێم دهێتە دەستگیرکرن.

رائید بەرزانی گۆت ژی:په‌رێن ڤەکۆلینێ بۆ حالەتێن دزی و شه‌رکرنێ هاتینە ڤەکرن ب ‌فه‌رمانا دادوەری و‌ 7 كه‌س هاتینە ده‌ستگیرکرن.