ئەڤرۆ نیۆز،زنار تۆڤی:

پەیڤدارێ دەستەیا گشتی یا گەشتوگۆزارێ ل هەرێما کوردستانێ دا دیارکرن:کو د هەردو رۆژێن ئێکێ و دویێ یێن جەژنا قوربانێدا 145 هزار گەشتیار هاتینە هەرێما کوردستانێ.

نادر رۆستی پەیڤدارێ دەستەیا گشتی یا گەشتوگۆزارێ ل هەرێما کوردستانێ بۆ ئەڤرۆ نیۆز دبێژیت:ل هەردو رۆژێن جەژنا قوربانێدا 145 هزار گه‌شتیار هاتینە هه‌رێما كوردستانێ و هەروەسا هاتنا گه‌شتیاران یا به‌رده‌وامە و هژماران وان د بلندبوونێ دایە.

هەروەسا گۆت ژی:ئه‌ڤه‌ ئامارێن سه‌ره‌تایی یێن هاتنا گه‌شتیارانه‌،لێ ئامارا دوماهیا هاتنا گه‌شتیاران دێ ل رۆژانێن داهاتی ب هوورکاریێن ته‌مام‌ را‌گه‌هینین.

ئەڤرۆ نیۆز،زنار تۆڤی:

كۆمسیۆنا بلند یا سه‌ربه‌خۆ یا هه‌لبژارتن و راپرسیێ ل هه‌رێما كوردستانێ کێشە‌یا ده‌نگده‌رێن ده‌رڤه‌ی وه‌لاتی چاره‌كر و مه‌رجێ هه‌بوونا پلێتا ئاهێن خوارنێ راكر.

ئارام نه‌جمه‌دین رێڤه‌به‌رێ گشتی یێ فه‌رمانگه‌ها هه‌ولێرێ یا كۆمسیۆنا بلند یا سەربەخۆیا هەلبژارتن و راپرسیێ ل هه‌رێما کوردستانێ دیارکریە:ژبەر مه‌رجێ هه‌بوونا پلێتا ئاهێن خوارنێ بۆ پشكداریكرنا ده‌نگده‌رێن ده‌رڤه‌ی وه‌لاتی د ریفراندومێ دا ببوو كێشه‌ و پتریا كه‌سێن ل ده‌رڤەی وەلاتی‌ پلێتا ئاهێن خوارنێ نه‌مایه‌، له‌ورا جڤاتا كۆمسیاران پرۆژه‌یه‌ك به‌رهه‌ڤكر و راده‌ستی كۆمسیۆنێ كر و د پرۆژه‌یی دا، مه‌رجێ هه‌بوونا پلێتا ئاهێن خوارنێ هاتیه‌ راكرن.

هەروەسا گۆتیە ژی: ئه‌ڤرۆکە پرۆسا خۆ تۆماركرنا ده‌نگده‌رێن ده‌رڤه‌ی وه‌لاتی ده‌ستپێكریه‌،هەتاکو نوکە 70 كه‌سان ناڤێن خوه‌ تۆماركرینه‌، ژبه‌ركو پتریا وان ئه‌و كێشه‌ هه‌بوو، له‌ورا ئه‌و مه‌رجه‌ هاتیه‌ راكرن و ئه‌ڤرۆ دێ چه‌ندین رێنمایێن نوو ده‌ركه‌ڤن، داكو ده‌نگده‌رێن ده‌رڤه‌ی وەلاتی بشێن ب ساناهی ناڤێن خۆ‌ تۆمار بكه‌ن.

ئەڤرۆ نیۆز،زنار تۆڤی:

حوکمەتا ئەمریکا دێ چەندین جۆرێن چەک و تەقەمەنیان بۆ هێزێن پێشمەرگێ کوردستانێ هنێریت.

ل دووڤ نووچەکێ گۆڤارا (فۆرێین پۆلیسی) یا ئەمریکی ئەڤ چەندە دیارکریە،لێ دەمێ گەهشتنا وان هاریکاریێن ئەمریکا بۆ هێزێن پێشمەرگەی ئاشکرا نەکریە.

هەروەسا گۆتیە:هنارتنا چەک و تەقەمەنیان ل چارچۆڤێ یاداشتا لێک تێگەهشتنا دناڤبەرا هەرێما کوردستانێ و ئەمریکا دایە،کو تێدا ئەمریکا سۆزا هنارتنا ئەوی برێ پارەیی دابوو.

هاریکاریێن سەربازی پێکهاتینە ژ:
– 4400 چەکێن M16.
– 100 ترۆمبێلێن جۆری هامڤیی یێن گولەنەبر.
– ب دەهان دۆشک.
– 36 تۆپێن 1.5 ملیمی و چەندین چەکێن دی.

هەروەسا دیارکریە کو بهایێ وان هاریکاریان دگەهیتە 300 ملیۆن دۆلاران، بۆ وان دو لیوایێن وەزارەتا پێشمەرگەینە،یێن کو ب سەرپەرشتیا ئەمریکا هاتینە پێکئینان و مەشق پێ هاتیە کرن.

رۆژا سێشەمبی 12/7/2016 ب چاڤدێریا مەسعود بارزانی، سەرۆكێ هەرێما كوردستانێ، کەریم سنجاری، وەزیرێ پێشمەرگەی ب وەكالەت و ئێلیزا سلۆتكین،هاریکارێ وەزیرێ بەرگریا ئەمریكا لێك تێگەهشتنەکا سەربازی دناڤبەرا هەولێرێ و واشتنتۆن دا هاتیە ئیمزاکرن.