ئەڤرو نیوز ، نەوزاد هلوری:
دەمەک بەریا نها لسەر رێیا گشتی دناڤبەرا سلێمانی و کەلار شەش کەس بونە قوربانی.
دڤی واریدا پولیسێن گەرمیان گۆت: (دەمەک بەریا نها ژ ئەگەرا وەرگەریانا ترومبێلەکێ ژ جۆرێ کەیا مەهافی لسەر رێیا گشتی دناڤبەرا سلێمانی بو کەلار ل نێزیک گوندێ بەرلوت وەرگەریا و د ئەنجامدا دوو کەسان گیانێ خوە ژ دەست دا و چوار ژی برینداربوون)
زێدەتر گوت: (برینا بریندارەکێ دژوارە و ئەو و ل گەل بریندارێن دن بو نەخۆشخانا تەنگاڤیان هاتینە رەوانەکرن)
ئه‌ڤرۆ نیوز ، هلورى:
ئه‌ڤرۆ كومبوونه‌ك دناڤبه‌را ئێكه‌تیا نیشتمانیا كوردستانێ و ته‌ڤگه‌را گۆڕانێ هاته ئه‌نجامدان ب تایبه‌تى لسه‌ر هه‌ردوو پرسێن كاراكرنا په‌رله‌مانێ كوردستانێ و ئه‌نجامدانا ریفراندۆمێ بو سه‌ربخوه‌ى یا هه‌رێما كوردستانێ ، و ل گوره‌ى ئه‌وان زانیاریێن كو ده‌ست ئه‌ڤرۆ نیوز كه‌فتى ئێكه‌تى دكومبوونێ دا پاكێچه‌كا حه‌فت خالى ئاراسته‌یێ گۆڕانێ كریه.
ناڤه‌روكا ئه‌وان خالێن كو ئێكه‌تى ئاراسته‌یى َگۆڕانى كرى پێكدهێت ژ :
1- كارا كرنا په‌رله‌مانێ كوردستانێ
2- قانونا هه‌لبژاردنان و ده‌سته‌به‌ركرنا مافێن ده‌نگه‌ده‌رێن كو ل ده‌ڤه‌رێن ده‌رڤه‌یێ هه‌رێمێ بهێته راستڤه‌كرن ، داكو نوونه‌رێن راسته‌قینه‌یێن خوه ل په‌رله‌مانى هه‌بن.
3- دانا باوه‌ریێ ب سه‌روك و ئه‌ندامێن ئه‌نومه‌نا سندوقا داهاتیێ په‌ترۆل و غازێ.
4- په‌سه‌ندكرنا قانونا ریفراندۆمێ بو سه‌ربخوه‌ى یا كوردستانێ.
5- بو درۆستبوونا هه‌ڤسه‌نگیێ دناڤبه‌را موچه‌یێن پله بلند و موچه‌یێن كێم ، پێدڤى یه پاشه‌كه‌فتا موچه‌یان د رێیا په‌سه‌ندكرنا پروژه قانونه‌كا تایبه‌ت بهێته راكرن و گه‌رنتیا دانه‌ڤه‌یه‌ا موچه‌یێ پاشه‌كه‌فتكریێ فه‌رمانبه‌ران ژى بهێته‌دان.
6- لژنا به‌رهه‌ڤیا ده‌ستوورى بو راپرسیێ ، باوه‌ریێ پێ بهێته‌دان بو به‌رهه‌ڤیێن ده‌ستوورێ ده‌وله‌تا كوردستانێ
7- ل دوماهیێ قانونا سه‌روكاتیا هه‌رێما كوردستانێ هژمار 1 یا سالا 2005 بهێته راستڤه‌كرن.
ئه‌ڤرۆ نیۆز،ره‌مه‌زان هه‌رنى:
ئه‌ندامه‌كێ په‌رله‌مانێ كوردستانێ ل پشكا كریستیانا ئاشكراكر:ب ره‌نگه‌كێ گشتى مه‌سیحیێن كوردستانێ و ده‌شتا مووسل پشته‌ڤانیا ریفراندۆما كوردستانێ دكه‌ن یاکو ل 25/9 دهێته ئه‌نجامدان و مە دڤێت ل سه‌ر ئیداره‌یا كوردستانێ ڤەبین،هه‌روه‌سا هەموو ده‌ڤه‌رێن مه‌سیحیا بهێن ئاڤه‌دانكرن و پاراستن ژلایێ ئه‌منى ڤه و مه داخواز ژ حوکمه‌تا كوردستانێ و حوکمه‌تا عیراقێ كریه بو ڤێ مه‌به‌ستێ،ژبه‌ركو ژ ئه‌گه‌رێ سوپایێ عیراقێ زیان گەهشتینە ده‌ڤه‌رێن مه‌سیحیان،له‌ورا پێدڤیه حوکمه‌تا عیراقێ ئه‌ركێ ئاڤه‌دانكرنێ قه‌ره‌بووكرنا مه‌سیحا بجه بكه‌ت كو داخواز لێ هاتیه كرن.
كه‌مال یه‌لدا نوونه‌رێ كریستیانا ل په‌رله‌مانێ كوردستانێ بۆ ئه‌ڤرۆ نیۆز خویاكر ژی:مه هه‌موو دكیومێنت به‌رهه‌ڤ كرینه كو چه‌ند زیان به‌ر مه‌سیحیا كه‌فتیه هه‌یا 30 كچ و ژنێن و زه‌لامێن مه‌سیحا هاتینه ره‌ڤاندن و هێشتا نه‌هاتینه ئازاد كرن،مه شه‌هید ژى داینه ل ده‌شتا مووسل،له‌ورا مه دڤێت ببینه ئیداره‌یه‌كا سه‌ربه‌خۆ ل ده‌شتا موسل یان پارێزگه‌هه‌كا سه‌ربه‌خو ل ده‌شتا مووسل سه‌ر ب كوردستانێ ڤه‌بین.
نوونه‌رێ كریستیانا ل په‌رله‌مانێ كوردستانێ خویاكر ژى:مه‌سیحیێن ده‌شتا مووسل هژمارا وان 130 هزار كه‌سن و 3 هزار خێزانن 60 % ده‌ڤه‌رێن وان ل ژێر ده‌سهه‌لاتا سوپایێ عیراقێ دانە 40% ل ژێر ده‌سهه‌لاتا هێزێن پێشمه‌رگه‌ى دایه،لێ پتر ئاواره ڤه‌گه‌ریاینه وان ده‌ڤه‌رێن پێشمه‌رگه دپارێزیت.
پشتى سالا 2014 رێكخراوا تیرۆرستیا داعش ده‌ست ب سه‌ر مووسلێ داگرتى 80% مه‌سسیحێن ده‌شتا مووسل ئاواره بووینە بۆ هه‌رێما كوردستانێ و نها هژماره‌كا وان ڤه‌گه‌ریاینه وان جهێن ل ژێر كونترۆلا پێشمه‌رگه‌ى دا.
ئه‌ڤرۆ نیوز ، نه‌وزاد هلۆرى:
ده‌مه‌كێ كێم به‌رى نها هێزه‌كا زور یا پولیسێن فیدرال كو سه‌ر ب سوپایێ عیراقێ یه ل نێزیك قه‌زا حه‌ویجه ل باشوورێ كه‌ركوك هاتنه جێگیركرن.
دڤى واریدا رائید جه‌وده‌ت ژ پولیسێن فیدرالیێن عیراقێ بو ئه‌ڤرۆ نیوز گۆت: ( وه‌كو خوه به‌رهه‌ڤكرن بو شه‌رێ ل گه‌ل داعش ل قه‌زا حه‌ویجه یا سه‌ر ب پارێزگه‌ها كه‌ركوك هێزه‌كا زورا پولیسێن فیدرالیێن عیراقێ ب چه‌كێ گران ڤه ل نێزیك حه‌ویجه جێگیربوون و چاڤه‌رێ فه‌رمانا شه‌رى دكه‌ن)
زێده‌تر گۆت: ( ئه‌و چه‌كێن كوپ ولیسێن فیدرالى ل گه‌ل خوه ئینایى پێكدهێن ژ تانك و زریپوش و هاون و دوشك و فروكێن ڤێراگه‌هشتن و توپێن دویر هاڤێژ و ترومبێلێن گوله‌نه‌بر و چه‌ندین جورێن دن یێن چه‌كێ گران و سڤك ل گه‌ل دایه )
ئه‌ڤرۆ نیوز ، هلۆرى:
به‌رى 50 سالان رێكخراوا یونسكو كو ئێكه ژ رێكخراوێن نه‌ته‌وه‌یێن هه‌ڤگرتیێن ئه‌مریكا ب مه‌ره‌ما پێشئێخستنا په‌روه‌رده و زانست و كه‌لتوورى رۆژا 8 ئیلونێ وه‌كو رۆژا جیهانى یا نه‌هێلانا نه‌خوانده‌واریێ راگه‌هاند ، و ب مه‌ره‌ما رێكخستنا جڤاكێ نیڤده‌ولى ب ره‌نگه‌كێ كارتێكه‌ر بو به‌ره‌ڤانیكرن ل نه‌خواندواریێ ل هه‌موو جیهانێ داكو ئێدى جیهان و تاكێن جڤاكى ژ نه‌خوێنده‌واریێ و نه‌زانینێ رزگار ببن و كومه‌لگه‌هه‌كا ساخله‌م بهێته هه‌وبونێ.
ئه‌ڤ رۆژه له هه‌موو جیهانێ سالانه ژلایێ حكومه‌ت و رێكخراوێن جیهانى ب تایبه‌تى رێكخراوێن په‌روه‌رده‌یى دهێته ساخكرن و هژماره‌كا زورا چالاكیان ب مه‌ره‌ما هوشاركرن و تێگه‌هاتنا زێده‌تر یا جڤاكى ئه‌نجام دده‌ن ، و چاره‌سه‌ریێن گونجاى بو ئاریشه‌یێن په‌روه‌رده‌یى دبینن.
رێكخراوا یونسكو نووترین به‌رنامه‌یێ كارێ خوه راگه‌هاند كو دێ هه‌تا سالا 2030 ب باشترین شێوه و كوالێتى كار بو نه‌هێلانا ئێكاره‌كى یا نه‌خوێنده‌واریێ یان بلندكرنا زورترین ئاستێ نه‌خوێنده‌واریێ بلند كه‌ت.
ل گوره‌ى زانیاریێن رێكخراوا یونسكو ل سه‌رانسه‌رێ جیهانێ 750 ملیون كه‌سێن نه‌خوێنده‌وار هه‌نه و ژ وانان ژى 490 ملیون ژ ره‌گه‌زێ مێیینه‌ن.
ئه‌ڤرۆ نیوز ، نه‌وزاد هلۆرى:
وه‌سا بریاره كو ئه‌ڤرۆ فلمه ڤیسته‌ڤاڵا دهۆك یا نیڤده‌ولى يا پێنجێ ل باژێرێ دهۆك ب رێڤه بچیت كو تێدا كومه‌كا فلمێن بیانى و نافخوى پشكدارن ژ وانان 11 كورته فلمێن ڤیسته‌ڤالێن كان و ئوسكارن ، به‌رپرسێ پشكا په‌نه‌ل و پرێسكونفرانسان ژى دده‌تن دیاركر كو بزاڤێن زور دێ هێنه‌كرن كو كه‌رتێ تایبه‌ت ل دهۆك گرنگیێ ب كه‌رتێ سینه‌مایێ و به‌رهه‌مئینانا فلمان بده‌ن.
عادل عه‌بدولرحمان به‌رپرسێ پشكا په‌نه‌ل و پرێسكونفرانسان ل پێنجه م فلمه ڤیسته‌ڤاڵا دهۆك یا نیڤده‌ولى بۆ ئه‌ڤرۆ نیوز گۆت: ( فلمه ڤیسته‌ڤالا نیڤده‌وله‌تى یا دهۆك ب كومه‌كا فلمێن نافخوه و بیانى سوبه‌هى رێكه‌فتى 9 ئیلونا 2017 ده‌ست پێ كه‌ت و هه‌تا رۆژا 16 ئیلونێ دێ یا به‌رده‌وام بیت و بو ئێكه‌مین جار ژى دوو گروپ و 11 كورته فلمێن هه‌ردوو ڤیسته‌ڤالێن بناڤ و ده‌نگێن جیهانى ” كان و ئوسكار ” دێ پشكداربن كو ئه‌ڤ یه‌ك ژى شانازیه‌كا مه‌زنه بو پارێزگه‌ها دهۆك و هه‌تا ئه‌وان بخوه ئه‌ڤ یه‌ك ب شانازى دیته)
زێده‌تر گۆت: (دچارچوڤێ رۆژانێن فلمه ڤیسته‌ڤاڵا دهۆك یا نیڤده‌ولى دێ پێنج په‌نه‌لێن تایبه‌ت لسه‌ر سینه‌مایێ و چه‌وانیا به‌ر ب پێشڤه‌برنا وێ و كێماسى و خالێن لاواز و ب هێزێن بوارێ سینه‌مایێ هێنه رونكرن و دانوستاندن لسه‌ر هێنه‌كرن كو ژلایێ كه‌سایێ بسپوور و تایبه‌تمه‌ن دوارێ سینه‌مایێ ل جیهانێ هێنه ب رێڤه‌برن و ئێك ژوانان ژى سه‌رۆكا ئێكه‌تیا ره‌خنه‌گرێن سینه‌مایێن جیهانى لژێر ناڤ و نیشانێن ره‌خنه‌یێن سینه‌مایى كو مه‌ره‌م ره‌وشه‌نبیركرنا بوارێ سینه‌مایێ و پێگه‌هاندنا كادرێ سینه‌مایێ یه ل كوردستانێ ب تایبه‌تى ل پارێزگه‌ها دهۆك و هژماره‌كا زور یا مێهڤانێن بیانى و نافخوه‌ى دوارێ سینه‌مایى دا دێ مێهڤان بن و دانوستادنێ لسه‌ر كه‌ن ، ئه‌ڤه زێده‌بارێ كو رۆژانه دێ ورگ شوپ و كونفرانسێن رۆژنامه‌ڤانى دێ بو ده‌رهێنه‌ر و سینه‌ماكار و زارڤه‌كر و به‌رهه‌ڤهێنه‌رێن فلمان هێنه ئه‌نجامدان و زورترین زانیارى دێ هێنه به‌حسكرن و گه‌هاندن ب تایبه‌تى ژى بو رۆژنامه‌ڤانان )
بزاڤێن خورت دێ هێنه‌كرن كو كه‌رتێ تایبه‌ت بهێته رازیكرن كو خوه ل بوارێ سینه‌مایێ بكه‌ن خودان و ده‌ست ب وه‌به‌رهێنانا فلمان بكه‌ن ، و كومه‌كا سوپرازێن گرنگ دێ د فلمه ڤیسته‌ڤاڵا دهۆك یا نیڤده‌ولى دا هێنه پێشكێشكرن هه‌ر بوو نموونه ڤیستیڤاڵ دێ پێشوازیا فلمێ ئه‌فسانه‌یا پاشایى كو چێروك لسه‌ر ژیانا ده‌رهێنه‌رێ كوردێ بناڤ و ده‌نگ یه‌لماز گونه‌یه و كچا یه‌لماز گونه‌یى بخوه دێ به‌رهه‌ڤى نمایشێ بیت و ره‌نگه دوڤدا كومه‌كا دیدار و زانیاریان ژى روون بكه‌ت ، عادلى هوسا گۆت.
به‌رپرسێ پشكا په‌نه‌ل و پرێسكونفرانسان ل فلمه ڤیسته‌ڤاڵا دهۆك يا نیڤده‌ولى دیاركر ژى كو بزاڤێن خورت دهێنه‌كرن كو ئه‌ڤ ساله جودا ژ سالێن بورى زورتین بینه‌ر به‌رهه‌ڤى ڤیستیڤالێ ببن و گۆت ژى: ( ڤیسته‌ڤال دێ ب فلمێ زه‌رێ یێ ده‌رهێنه‌رێ كورد كازم ئوس ده‌ست پێ كه‌ت و خه‌لكێ باكورێ كوردستانێ یه ، چێرۆكا فلمى لسه‌ر سترانه‌كا كه‌لتورى یا كوردى یه و بینه‌ره‌كێ ئه‌مریكا گه‌له‌ك پێڤه دهێته‌گرێدان و لدوڤ ناڤ و ده‌نگیێن وێ دهێت هه‌تاكو دهێته جهێ ئه‌وێ سترانێ كو رامان ژى ئه‌وه لدوڤ نوخ وازیێ دچیت)
عادلى د درێژاهیا ئاخفتنێن خودا دیاركر ژى كو بو ئێكه‌مین جار ئه‌ڤ ساله پشكه‌كا نوو ل فلمه ڤیسته‌ڤالا دهۆك یا نیڤده‌ولى هاتیه زێده‌كرن كو ئه‌و ژى پشكا نوهاده و گۆت ژى: ( ئه‌ڤ پشكه تایبه‌ته بوان كه‌سانێن كو ژ نوو چوینه دناڤا جیهانا سینمایى و كارێن وان ل قوناغێن ده‌ستپێكێ نه ، و دناڤا ئه‌ڤێ پشكێ دا دێ سیمنار و ورگ شوپ لسه‌ر نڤیسین و ده‌رهێنه‌ریا فلمان و چه‌ند بابه‌ته‌كێن دن ژى هێنه پێشكێشكرن و چوار رۆژان دێ یا به‌رده‌وام بیت و باوه‌رنامه دێ لسه‌ر پشكدارێن وێ هێنه پێشكێشكرن )
فلمه ڤیسته‌ڤالا دهۆك یا نیڤده‌ولى دێ ژلایێ حكومه‌تا هه‌رێما كوردستانێ و چه‌ند سپونسه‌ره‌كان ب رێڤه‌چیت و 131 فلمێن نافخوه و بیانى پشكداریێ لسه‌ر ده‌ستڤه‌ئینانا 17 خه‌لاتان كه‌ن ، دیسان د ڤیسته‌ڤاڵى دا 70 فلمێن بیانى بخوڤه دگریت و نێزیكێ 30 فلمێن درێژ و 17 دیكیومێنتارى و هژماره‌كا فلمێن كورت پشكدارن.
ئه‌ڤرۆ نیوز ، نه‌وزاد هلۆرى:
چه‌كدارێن داعش پشتى كو هژماره‌كا زور یا چه‌كدارێن خوه ژده‌ست داین ، دنهادا ئه‌و ژنێن كو وه‌كو جیهادا نیكاح بكاردئینان بو كریارێن خوه كوژیێ بكاردئینن.
شلوڤه‌كار دده‌ن دیاركر كو كومپانیا IHS Markit سه‌ر و سمایێن ژنان ، ژ ژنانى بو زه‌لامانى دگوهرن و داكو د قادا شه‌رى دا نه‌هێنه خویاكرن كو ژنن كو ئه‌ڤ یه‌ك ژى بو وێ یه‌كێ دزڤریت كو نها داعش د قه‌یرانا نه‌بوونا چه‌كدارێن زه‌لام دا دبوریت و هژماره‌كا زور یا چه‌كدارێن خوه ل قادا شه‌رى ژ ده‌ستدایه.
چه‌كدارێن داعش دئێرشێن خوه دا بو سه‌ر باژێرێ ره‌قه ل سوریێ و باژێركێ ته‌له‌عفه‌ر رێژه‌یه‌كا زور یا عه‌ردێ خوه ژ ده‌ستدایه و هێزێن عیراقى و شه‌ركه‌رێن ئازادكه‌رێن باژێرێ ره‌قه ئه‌و عه‌رد گرتینه و دهێته چاڤه‌رێكرن كود اعش زێده‌تر وان جهان ژ ده‌ست بده‌ت.
لودوفیكو كارلینو شلوڤه‌كار و شاره‌زایێ گوهرینا سه‌ر و سیمایێ ژنان دبێژیت : ( دنهادا چه‌كدارێن داعش پلانا بكارئینانا ژنان ده‌ستپێكریه بو كریارێن خوه كوشتنێ ئه‌ڤه پشتى كو گوهرینان لسه‌ر سیمایێ وان دهێنه‌كرن ، ئه‌ڤه د ده‌مه‌كێ دایه كوپ ێشتر ئافره‌ت دناڤ داعشێ دا بو مه‌ره‌مێن جیهادا نیاحى هاتیه بكارینان )
ئەڤرۆ نیۆز،زنار تۆڤی:
پارێزگارێ سلێمانیێ ئاگاداریەکێ بەلاڤ دکەت و ئاشكرا دکەت،کو گروپێ نه‌خێر هیچ مۆلەتەکێ یاسایی بۆ كه‌رنه‌ڤالێ نه‌خێر وه‌رنه‌گرتیه،لەورا بەرپرسیارەتیا هەر كارو كارڤەدان و روودانەکا نەخواستی دکەڤیتە ستوویێ ئامادەكاریێن وێ چالاكیێ.
پارێزگارێ سلێمانیێ ئاگەهداریەکێ بەلاڤ دکەت و تێدا هاتیە،ئەڤ چالاكیا مەدەنی و سیاسی کو بریارە ل یاریگەها سلێمانیێ بهێتە ئەنجامدان ب ناڤێ (كەرنەڤالا نەخێر،د نوکەدا بۆ ریفراندۆمێ) ،هیچ مۆلەتەکا یاسایی وەرنەگرتیە.
ئه‌ڤە ژی ده‌قێ ئاگەهداریا پارێزگارێ سلێمانیێ یە:-
ماوەیەكە ل ڤێرێ و وێراهە بەحس ل ئەنجامدانا كەرنەڤالەکێ بۆ (نەخێر د نوکەدا) ل یاریگەها سلێمانیێ دهێتەکرن،ئەڤ كەرنەڤالە د بەشەک ژ راگەهناندا وەك كەرناڤالێ (نەخێر د نوکەدابۆ ریفراندۆمێ) و ل جهەکێ دیتر تر ب مەراسیما ڤەکرنا یاریگەها سلێمانیێ دهێتە بناڤکرن،ئەم هەموو لایەكێ ئاگەهدار دكەین كو بۆ هەر چالاكیەكا مەدەنی و سیاسی پێدڤیە مۆلەت ژ پارێزگەها سلێمانیێ بهێتە وەرگرتن،بەلێ ئەڤ چالاكیا مەدەنی و سیاسی کو بریارە ل یاریگەها سلێمانیێ بهێتە ئەنجامدان ب ناڤێ(كەرنەڤالێ نەخێر،د نوکەدا بۆ ریفراندۆمێ) ، هیچ مۆلەتەکا یاسایی وەرنەگرتیە،لەورا ئەم هەموو لایەكێ ئاگەهدار دكەین کو بەرپرسیارەتیا هەر كارو كارڤەدان و روودانەکا نەخواستی دكەڤیتە ستوویێ ئامادەكارێن ڤێ چالاكیێ،کو ل لەلایەكێ دهێتە بناڤکرن ب (كەرنەڤال) و لە لایەکێ دیتر دهێتە بناڤکرن ب (مەراسیما ڤەکرنا یاریگەها سلێمانیێ).
پارێزگارێ سلێمانیێ.
ئه‌ڤرۆ نیوز ، نه‌وزاد هلۆرى:
ده‌مه‌كێ كێم به‌رى نها شه‌ش خوكوژێن داعش دڤیا خوه بگه‌هینن سه‌نگه‌رێن پێشمه‌رگه‌ى ل سنوورێ مێحوه‌رێ حه‌ردان یا سه‌ر ب ناحیا عه‌یازیه یا سه‌ر ب قه‌زا ته‌له‌عفه‌ر ، و به‌لێ كه‌فتنه كه‌مینه‌كا پێشمه‌رگه‌یان.
دڤى واریدا نه‌قیب بێدار زێبارى ژ هێزا پێشمه‌رگێ پاراستنا ژینگه‌ها دهۆك ل ناحیا عیازیه بو ئه‌ڤرۆ نیوز گۆت: (ده‌مه‌كێ كێم به‌رى نها شه‌ش خوكوژێن داعش دڤیا خوه بگه‌هینن سه‌نگه‌رێن پێشمه‌رگه‌ى ل گوندێ خه‌رائیج ل مێحوه‌رێ حه‌ردان ل ناحیا عه‌یازیه یا سه‌ر ب قه‌زا ته‌له‌عفه‌ر ، و به‌لێ كه‌فتنه كه‌مینه‌كا پێشمه‌رگه‌یان و پێشمه‌رگێن سه‌ر ب فه‌وجا 3 یا سه‌ر ب لیوا 12 ئه‌و نه‌چاركرن كو خوه بته‌قینن یان خوه راده‌ست بكه‌ن ، دئه‌نجام دا چوار ژ وانان خوه ته‌قاند و دوو ژ وان ژى خوه راده‌ست كر)
زێده‌تر گۆت: ( هژماره‌كا چه‌كدارێن داعش ل سنوورێ ناحیا عیازیه یێن هه‌یى و ل جهێن بلند و چیایى خوه ڤه‌شارتینه و دخوازن كو خوه بگه‌هینن سوریا به‌لێ هێزێن پێشمه‌رگه‌ى هه‌موو رێك ل وان گرتینه و ب چوو ره‌نگان رێك ب وان ناهێته‌دان و ئه‌نجام تنێ ئه‌وه كو خوه راده‌ست بكه‌ن یان بهێنه كوشتن)
ئه‌ڤرۆ نیوز ، نه‌وزاد هلۆرى:
ده‌مه‌ك به‌ریا نها سه‌رۆكێ هه‌رێما كوردستانێ مه‌سعود بارزانى دیداره‌كا كه‌نالێ ئه‌لعه‌ره‌بیه‌یێ سعودى دیاركر كو رژێمێن ئێك ل دوڤ ئێكێ یێن عیراقى َهه‌موو جورێن تاوانان به‌رامبه‌ر گه‌لێ كورد كرینه و چوو ژ وان ژى پێگیرنه‌بوویه ب دانا مافێن گه‌لێ كورد ، و هه‌رده‌ما سه‌ربخوى یا هه‌رێما كوردستانێ ژى درۆست بوو ئه‌ركێ من ژى دوماهى دهێت و ئه‌ز بو پوستى سه‌روكاتیا هه‌رێما كوردستانێ خوه به‌ربژێر ناكه‌م ڤه.
مه‌سعود بارزانى سه‌رۆكێ هه‌رێما كوردستانێ دیاركر كو سه‌ركرداتیا هه‌رێما كوردستانێ ل سالا 2003 ب مه‌ره‌ما هه‌ڤپشكیێ پشكدارى ل گه‌ل عیراقێ كریه به‌لێ عیراقێ هه‌تا نها كورد وه‌كو هه‌ڤپشك نه‌دیته و گۆت: (رژێمێن ئێك ل دوڤ ئێكێ یێن عیراقى هه‌موو جورێن تاوانان به‌رامبه‌ر گه‌لێ كورد كرینه و چوو ژ وان ژى پێگیرنه‌بوویه ب دانا مافێن گه‌لێ كورد ، و سه‌ره‌راى كو مه بریارا ریفراندۆم بو سه‌ربخوه‌یێ ل گه‌ل عیراقێ گیروكریه ژى به‌لێ سه‌ركرداتیا كوردستانێ بریار دا كو ریفراندۆمێ بكه‌ت و هه‌ر كه‌س و لایه‌نه‌كێ داخوازا پاشێخستنا ریفراندۆمێ بكه‌ت ئه‌م داخوازا گه‌رنتیان ژێ دكه‌ین )
زێده‌تر گۆت: (حكومه‌تا عیراقێ پێگیرى ب ده‌ستوورى و ماددا 140 كو تایبه‌ته ب ده‌ڤه‌رێن ڤه‌قه‌تیایى ڤه نه‌كریه ، بریار بوو كو هێزێن پێشمه‌رگه‌ى ببیته پشكه‌ك ژ سوپایێ عراقێ به‌لێ ئه‌ڤ یه‌ك نه‌هاته‌كرن ، و ل سالا 2011 ژى مه هوشیارى ل بارا خراب بوونا ره‌وشا عیراقێ دانه به‌غدا به‌لێ چوو به‌رسڤ نه‌بوون ، دڤێت به‌غدا قبول بكه‌ت كو گه‌لێ كورد دێ ریفراندۆمێ ئه‌نجام ده‌ت ، ئه‌م دێ دانوستاندنێن زێده‌تر ژى ل گه‌ل عیراقێ كه‌ین و هه‌تا نها ژى چوو ده‌وله‌تێن جیهانى دژاتیا خوه بو ریفراندۆما هه‌رێما كوردستانێ دیارنه‌كریه)
بارزانى دیاركر ژى كو هه‌رده‌ما سه‌ربخوى یا هه‌رێما كوردستانێ ژى درۆست بوو ئه‌ركێ من ژى دوماهى دهێت و ئه‌ز بو پوستى سه‌روكاتیا هه‌رێما كوردستانێ خوه به‌ربژێر ناكه‌م ڤه و دێ هه‌ر مینم پێشمه‌رگه و زێده‌تر گۆت: (ب چوو ره‌نگان ریفراندۆم كارتێكرنێ ل شه‌رێ داعش ناكه‌ت و هێزێن پیشَمه‌رگه‌ى هه‌یبه‌تا شه‌رێ داعش ژناڤبریه )
سه‌رۆكێ هه‌رێما كوردستانێ دیاركر ژى كو نها كوردستان د ده‌وله‌ته‌كا تایفى دا دبوریت و گۆت ژى: ( ریفراندۆم بۆ سه‌ربخوه‌ى یا كوردستانێ بو درۆستبوونا ده‌وله‌ته‌كا دیموكراتى و فیدرالى یه و هه‌موو پێكهاته‌یێن كوردستانێ دێ خوه تێدا بینن و مافێن وان هێنه پاراستن ، ریفراندۆم چوو كارتێكرنێ ل پارچه‌یێن دن یێن كوردستانێ ناكه‌ت )
ل بارا په‌ترولێ بارزانى گۆت: ( هه‌رێما كوردستانێ ئێكلایانه په‌ترۆل ره‌وانه‌یێ ده‌رڤه نه‌كریه هه‌تاكو حكومه‌تا عیراقێ بودجه و موچه‌ییێن خه‌لكێ هه‌رێما كوردستانێ برى ، دوڤدا هه‌رێما كوردستانێ بریاردا په‌ترۆلا خوه سه‌ربخوه بفروشیت)
نيشاندان