ئه‌ڤرۆ نیوز:
هنارتیێ نه‌ته‌وه‌یێن ئێكگرتی ل سووریێ پێشنیاز کر، ھەكەر سیستەمێ دەستھه‌لاداریێ ل سووریێ ناڤەندی بیت، دڤێت مافێ ڤیتۆ یێ ژ بۆ کوردان ھەبیت، ل دژی ھەر بریارەکە حکوومەتا ناڤەندی.
دیمستورا ئه‌و یه‌ك بۆ ئالیێن دانوستانكار یێن سووریێ ل جنێڤێ پێشنیاز كرییه و خواستییه د ده‌ستوورێ نوو یێ سووریێ دا بهێته بنه‌جهكرن.
ئەڤرۆ نیوز ، ھلۆری:
ئەڤرۆ سەرۆکێ ھەرێما کوردستانێ مەسعود بارزانی ل گەل ماموستایێن زانکویێ ل ھەولێر کومبوو ، و د کومبوونێ دا بەحس ل سەر چەند تەوەرەکێن گرنگ کر و دوپاتکر کو ریفراندۆم دێ ل دەما خوە دا ھێتە ئەنجامدان.
بارزانی د کومبوونا ل گەل ماموستایێن زانکویێ گۆت: ( ب چوو رەنگان پاشڤە نازڤرین ل بارا ئەنجام نەدانا ریفرندۆمێ ، بەلکو دێ د دەمێ خوە دا ھێتە ئەنجام دان و بو درۆستکرنا دەولەتا کوردی بەرھەڤین ھەموو جورێن باجەکێ بدەین ، و رەنگە پشتی ئەنجاممدانا ریفراندۆمێ دەولەتێن جیھانی ھەلویستێ خوە دیار بکەن ، بەلێ پێدڤی یە باجێ بدەین ھەتاکو بگەھینە ئەنجامان ، داخوازێ ل ھەموو ماموستایێن زانکویێ دکەم کو پشکداریێ دنڤیسین و دارشتنا دەستوورێ نویێ کوردستانێ بکەن )
مەسعود بارزانی سەرۆکێ ھەرێما کوردستانێ دیارکر ژی کو ھەفتیا بوری ل گەل چەند وەزیرەکێن دەرڤە کومبویە و چوو وەلاتیان ژی بەحس لسەر وێ یەکێ نەکریە کو ریفراندۆم مافەکێ رەوایێ گەلێ کورد نینە و گۆت ژی: (وەزیرێن دەرڤە دگوت رەنگە ریفراندۆم ببیتە سەدەما وێ یەکێ کو شەرێ داعش لسەر ھزرێن ھەوە بچیت و باشترە ریفراندۆم بو دەمەکێ دن بھێتە پاشئێخستن بەلێ من بو وان دیارکر ئەرێ بەدیلەکێ پاشئێخستنا ریفراندۆمێ چی یە)
بارزانی ل بارا کەرکوکێ گۆت: (ناسناما کەرکوکێ کوردستانە و ھەر کەسێ بخوازیت ب لایەکێ دا ببەت ھەتاکو دوماھی کەس دێ روو ب روویێ وان بین ، ئەگەر کەسەکێ ڤیا خوە ب سەپینیت لسەر کەرکوکێ دی َتشتەکێ وەسا ب سەری ھێت کو ئەوی ھزر بو نەکری ، و کەرکوک دێ ھەر مینیت باژێرێ پێکڤە ژیانێ)
ئەڤرۆ نيۆز،رێژين نهێلى:
سه‌رۆكێ هه‌رێما كوردستانێ مەسعود بارزانی راگه‌هاندیە:هەکە پشتی ریفراندومێ به‌غدا ئه‌نجامان ره‌تبكه‌ت،دێ ده‌وله‌تا كوردستانێ راگه‌هینین و دوپاتكر ژی،کو وه‌زیرێ به‌رگریا ئه‌مریكا ب ئاشكرایی گۆتیه وی کو واشنتۆن ل دژی ریفراندومێ نینه.
مه‌سعود بارزانی سه‌رۆكێ هه‌رێما كوردستانێ،د هه‌ڤپه‌یڤینه‌كێ دا ل گەل رۆژنامه‌یا شه‌رقولئه‌وسه‌ت دا گۆتيه:گه‌لێ كوردستانێ هیڤیخوازه کو حوکمه‌تا عێراقێ ئه‌نجامێن ریفراندومێ قه‌بوول بكه‌ت و پشتی ریفراندومێ به‌غدا بهێته پێش و دانپێدانێ ب ئه‌نجامێن وێ بكه‌ت، لێ هەکە ب گه‌ف و خوه دووركرنێ ئه‌نجامان ره‌تبكه‌ت،سه‌ركردایه‌تیا كوردستانێ ئێكسه‌ر دێ ده‌وله‌تا كوردستانێ راگه‌هینیت.
بارزانی گۆتیە ژى:کو د سه‌ره‌دانا خوه‌یا هه‌ولێرێ دا وه‌زیرێ به‌رگریا ئه‌مریكا ب ئاشكرایی گۆتیه کو ئه‌مریكا ل دژی رێفراندوما هه‌رێما کوردستانێ نینه،لێ بتنێ ئه‌و د ترسن کو ریفراندوم كاریگه‌ریێ ل شه‌رێ دژی داعشێ بكه‌ت،لێ وان واشنتۆن پشتراستكریه کو ریفراندوم ناهێته پاشخستن و كاریگه‌ریێ ل شه‌رێ دژی داعشێ ناكه‌ت.
ئه‌ڤرۆ نیوز:
جڤاتا ناوچه‌دارییا قه‌ره‌ته‌په كو ده‌ڤه‌ره‌كا كوردستانی یا ده‌رڤه‌ی ئیدارا هه‌رێما كوردستانێ یه، ب پرانییا ده‌نگان بریار دا ئه‌و ناوچه پشكداری ریفراندۆما سه‌رخوه‌بوونا كوردستانێ ل 25 ئیلۆنێ ببیت.
جڤاتا قه‌ره‌ته‌په ژ 15 ئه‌ندامان پێكدهێت، د ده‌نگدانێ دا 10 ئه‌ندامان رازیبوونا خوه دیار كر (4 كورد و 3 عه‌ره‌ب و 3 توركمان)، 5 كه‌سێن دی ب نه‌خێر ده‌نگ دا ( 4 عه‌ره‌ب و توركمانیه‌كی)
ناوچه‌یا قه‌ره‌ته‌په سه‌ر ب ده‌ڤه‌ردارییا خانه‌قینی یه و 45 هزار كه‌س ژ كورد و توركمان و عه‌ره‌بێن سونه لێ دژین.
دهێته زانین كو پتری 2.5 ملیۆن كه‌سان ل ده‌ڤه‌رێن كوردستانی یێن ده‌رڤه‌ی ئیدارا هه‌رێمێ مافێ ده‌نگدانێ د رێفراندۆمێ دا هه‌یه.
ئه‌ڤرۆ نیوز:
هه‌ڤپه‌یمانییا نێڤده‌وله‌تی یا دژی داعشێ بۆ رێگرتنا ڤه‌گۆهاستنا تیرۆستێن داعشێ ل سه‌ر سۆرێ لبنانێ به‌ره‌ڤ سنۆرێ ئیراقێ، رێییا كاروانێ پاسێن داعشێ بۆمبه باران كر هه‌روه‌سا پره‌كا د رێییا وان دا ژناڤ بر.
په‌یڤدارێ هه‌ڤپه‌یمانیێ راین دیلۆنی دژایه‌تییا خوه بۆ رێككه‌فتنا رژێما سووریێ و لبنانێ د گه‌ل داعشێ دیار كر كو ل گۆری رێككه‌فتنێ ب سه‌دان چه‌كدارێن داعشێ دێ ژ سه‌ر سنۆرێ لبنانی بۆ سه‌ر سنۆرێ ئیراقێ هێنه ڤه‌گۆهاستن.
ئەڤرۆ نیوز ، نەوزاد ھلۆری:
ئێڤاریا ئەڤرۆ ل سنوورێ قەزا شێخان یا سەر ب پارێزگەھا دھۆک د روودانەکێ دا دوو کەس ھاتنە کوشتن و حەفت ژی بریندارن.
دڤی واریدا ھێمن سلێمان بەرپرسێ راگەھاندنا پولیسێن دھوکێ بو ئەڤرۆ نیوز گۆت: ( ئێڤاریا ئەڤرۆ لسەر ئاریشەیەکا کەڤن شەر دناڤبەرا دوو خێزانێن ناحیا کەلەکچی روویدا و د ئەنجام دا دوو کەس ھاتینە کوشتن و حەفت ژی بریندارن)
زێدەتر گۆت: ( پەرێن ڤەکولینێ ھاتینە ڤەکرن و پولیس گەھشتینە جھێ روودانێ و رەوشت ئارامکریە)
ئه‌ڤرۆ نیۆز،ره‌مه‌زان هه‌رنى:
رێڤه‌به‌رێ گشتی یێ وه‌زاره‌تا شه‌هید و ئه‌نفالكریان ل حوکمه‌تا هه‌رێما كوردستانێ دیاركر:وه‌ك وه‌زاره‌ت چاڤه‌رێ ده‌مه‌ك گونجایێ دكه‌ین بۆ ئینانا ده‌رێ یێن گورێن ب كوم یێن كوردێن ئێزدى ئه‌وێن ل 3/8/2014 و ل دووڤ دا هاتینە كوشتن ل چه‌ندین جهێن شنگالێ و كومه‌لگه‌هێن ده‌ردور کو ب كوم هاتینە ڤه‌شارتن.
به‌ره‌ڤان حه‌مدى رێڤه‌به‌رێ گشتی یێ وه‌زاره‌تا شه‌هید و ئه‌نفالكریان ل حوکمه‌تا هه‌رێما كوردستانێ بۆ ئه‌ڤرۆ نیۆز خویاكر:پشتى وێ تاوانا مه‌زن ئه‌وا ل هەیڤا تەباخێ ل سالا 2014 ب سه‌ر كوردێن ئێزدى دا هاتى و ب سه‌دان وەلاتى ده‌ربەده‌ربوون و كه‌فتنه ده‌ستێن داعشان و پاشی هاتنه كوشتن و ل گورێن ب كوم هاتینە ڤه‌شارتن ل شنگالێ و ده‌ردورێن وێ،كو ل گورى زانیاریا 39 گورن و 14 ژ وان ل سه‌ر ئه‌ردى نه جهێن وان دیارن و 25 گورێن دن ژى نه‌دیارن و ل گورەى پلانێن وه‌زاره‌تا شه‌هید و ئه‌نفالكریان ل حوکمه‌تا هه‌رێما كوردستانێ پێدڤیه هه‌موو گور بهێنه دیتن و ڤه‌كرن.
به‌ره‌ڤانى ل دۆر هژمارا كه‌سێن ناڤ گورێن ب كوم خویاكر ژی:هه‌تا نوكه دیارنینه كا هه‌ر گوره‌كێ چه‌ند كه‌س تێدا هاتینه ڤه‌شارتن،ژبه‌ركو ئه‌و ده‌لیڤه‌یا ئه‌منى نه‌بوویه کو سه‌ره‌دانا وان جهان بكه‌ین،به‌لێ ل دووڤ به‌رنامه‌یه‌كێ دارشتى هه‌موو گورێن ب كوم یێن كوردێن ئیزدى دێ هێنه راكرن كو سالا 2014 پشتى چه‌ند مه‌هه‌ك بورین ل سه‌ر وێ تاوانێ 3 گورێن ب كورم هاتینه دیتن و راكرن ولێگه‌ریان و بزاڤ بۆ گورێن مایى ژێ دبه‌رده‌وامن.
قه‌زا شنگالێ دكه‌ڤیته روژئاڤا باشورێ كوردستانێ و سه‌ر ب پارێز گه‌ها مووسل ڤه یه 120 كلم ل سه‌نته‌رێ پارێزگه‌هێ دووره،ژمارا ئاكنجیێن وێ به‌ریا هاتنا داعش 412 هزار كه‌س بوون ئێزدى و موسولمان و مه‌سیحى و عه‌ره‌ب ل شنگالێ دژیان سێ ناحیه هه‌بوون،ئەو ژی(سنونێ،گرعوزێر ،بلێج)بوون، ل 3 تەباخا 2014 ژلایێ تیرورستێن داعش هاتنه گرتن 6 هزار و 417 كه‌س هاتنه ده‌سته‌سه‌ركرن و هزار و 293 كه‌س ژى ژ ژن و زارۆک و زه‌لامان هاتنه كوشتن و ل گورێن ب كوم دا هاتنه ڤه‌شارتن،د ئۆپه‌راسیونه‌كا تایبه‌ت یا پێشمەرگێ کوردستانێ دا ل 12/11/2015 شنگال ب ته‌مامى هاته ئازاد كرن.
ئه‌ڤرۆ نیوز،ره‌مه‌زان هه‌رنى:
به‌رپرسێ پشكا ئاژه‌لداریێ ل رێڤه‌به‌ریا چاندنێ ل ئاكرێ خویاكر:کو ژبه‌ر هاتنا مریشكێن بیانى بۆ ناڤ بازارێن كوردستانێ مریشكا نافخو دچیته ده‌رڤه‌ى كوردستانێ خه‌لك پتر مریشكا نافخو دكرن ژبه‌ر تام و ساخله‌میا وێ.
ئه‌ندازیار عیماد ئه‌حمه‌د به‌رپرسێ پشكا ئاژه‌لداریێ ل رێڤه‌به‌ریا چاندنا ئاكرێ بۆ ئه‌ڤرۆ نیوز دیار كر:ل سنورێ قه‌زا ئاكرێ 17 پروژه‌یێن مریشكان هه‌نه كو هه‌موو پروژه‌یان موله‌تا كاركرنێ و ب خودانكرنا مریشكان هه‌یه،ژبلى وان كه‌سێن كو رێژه‌كا كێم یا مریشكان ب خودان دكه‌ن و دفروشن كو ب پروژه ناهێنه هژمارتن و هژماره‌كا پروژه‌یان ژى دقوناغا بجهئینانێ دانه.
ئه‌ندازیار عیماد خویاکر ژی:هه‌ر پروژه‌یه‌ك 10 بۆ 12 هزار مریشكا ب خودان دكه‌ن و هنده‌ك ژى هه‌تا 24 هزار مریشكا ب خودان دكه‌ن ل ناڤ پروژه‌یێن خوه مریشكا ئاكرێ ل پارێزگه‌هێن دهوك و هه‌ولێرو سلێمانیێ دهێنه فروتن.
هێشتا دیارکر ژی: ژبه‌ر رێژا گه‌له‌كا مریشكا نافخویى مریشكا ئاكرێ دچیته ده‌رڤه‌ى كوردستانى َو ل پرانیا پارێزگه‌هێن عیراقێ دهێنه فروتن ئه‌گه‌ر مریشكا بیانى ئه‌وا دروست كرى نه‌هێته ناڤ كوردستانێ دێ مریشكا نافخو بازارێ نافخویى پر كه‌ت و پێدڤى ب به‌رهه‌مێ بیانى نابین , ئه‌گه‌رێ سه‌ره‌كیێ هنارتنا مریشكا نافخو بۆ ده‌رڤه ژبه‌ر مریشكا توركى و به‌رزایلى یه ل ناڤخویا كوردستانێ.
به‌رپرسێ پشكا ئاژه‌لداریێ ل رێڤه‌به‌ریا چاندنا ئاكرێ گۆت ژی:هەکە مریشكا بیانى نه‌هێـته نافخویا كوردستانێ خودان پروژه‌یێن بیانى شیانێن دابینكرنا مریشكا خومالى هه‌نه بۆ هه‌مى كوردستانێ، له‌ورا خودان پروژه گازنده‌یا ل نه‌چونا مریشكا نافخویى دكه‌ن بهایێ وێ گه‌له‌ك یێ ئه‌رزانه ل چاڤ مریشكا بیانى.
ئه‌ڤرۆ نیۆز،ره‌مه‌زان هه‌رنى :
نوونه‌رێ كوردێن شه‌به‌ك ل جڤاتا نوونه‌رێن عیراقێ دیار كر،باشترین دیارى و داخوازیا مه ل كوردستانێَ ئه‌وه كو رێیا ڤه‌كه‌ن ئه‌و كوردێن ل سنورێ سوپاى عیراقى و حه‌شدا شه‌عبى بشێن ل وى ساترى ده‌رباز بن كو ل ناڤبه‌را گوندێن شه‌به‌كا هاتیه دروست كرن و كوردێن شه‌به‌ك ب گشتى ل گه‌ل رێفراندوما كوردستانێ دانه،ئەم دخوازین ل عیراقێ جودابین ژبلى نه‌خوشیێ مه چو مفایه‌ك ل عیراقێ نه‌دیتیه نوكه پتر ل 200 كوردێن شه‌به‌ك ب دیل ل ده‌ست داعش دانه.
سالم جمعە نوونه‌رێ كوردێن شه‌به‌ك ل جڤاتا نونه‌رێن عیراقێ بۆ ئه‌ڤرۆ نیوز دیارکر:پشتى رزگاركرنا گوند و ده‌ڤه‌رێن شه‌به‌كا ل ده‌شتا مۆسل نوکە ئه‌و ده‌ڤه‌ر یێن هاتینە ئاڤه‌دانکرن یێن بووینە دوبه‌ش به‌شه‌ك ل ژێر ده‌سهه‌لاتا هێزێن پێشمه‌رگه‌ى دایه و به‌شه‌ك ل ژێر كونترۆلا سوپایێ عیراقێ دایه دناڤ وان دا ژى حه‌شدا شه‌عبى كو گوندێن شه‌به‌كا بووینه دوبه‌ش و دیواره‌ك ناڤ به‌را وان دا هاتیه دروستكرن، به‌شه‌ك سه‌ر ب كوردستانێ ڤەیه و به‌شه‌ك سه‌ر ب حوکمه‌تا ناڤه‌ندى ڤەیە و هه‌موو شه‌به‌ك دژى وێ دابه‌شكرنێ نه ئه‌وا نوکەل ناڤبه‌را شه‌به‌كا دروست بووى،ل ده‌شتا مۆسل مه هه‌میا دڤێت ڤه‌گه‌رینه سه‌ر هه‌رێما كوردستانێ وه‌ك دیار نوکە هه‌موو پێكهاته‌یێن ده‌شتا مووسل ل گه‌ل به‌غدا نه‌ماینه دى َداخوازێ كه‌ین پاریزگه‌هه‌ك بۆ مه بهێته دامه‌رزاندن.
سالم جمعە دیارکر ژی:مه داخواز كریه و ئیمزا ژى كوم كرینه كو ناحیه‌ك بهێته دامه‌رزاندن بو كوردێن شه‌به‌ك ل گه‌ل چه‌ندین ناحیێن دى بۆ كو مه نه‌ته‌وێن دى ل ده‌شتا مووسل ژبه‌ركو ئه‌م خوه ب كوردێن ره‌سه‌ن دزانین وه‌ك شه‌به‌ك .
سالم جمعه خویاکر ژی،مه داخوازكریه ب فه‌رمى كو ئه‌و ساترێ ب ره‌نگێ دیوار ناڤبه‌را گوندێن شه‌به‌كا دا هاتیه دروست كرن بهێته راكرن ژبه‌ركو 26 گوندێن لایێ پێشمه‌رگه‌ى د ئارامن به‌لێ ئه‌و 35 گوندێن دكه‌ڤنه لایێ دى یێ ساترى كو سوپایێ عیراقێ و حه‌شدا شه‌عبى پاراستنا وان ده‌ڤه‌را دكه‌ت و مه‌ترسى هه‌یه لسه‌ر ژیانا كوردێن شه‌به‌ك،له‌ورا داخواز دكه‌ین هه‌مو كوردێن شه‌به‌ك ڤه‌گه‌رنه سه‌ر هه‌رێما كوردستانێ،هه‌روه‌سا كوردێن شه‌به‌ك فه‌وجه‌ك هه‌یه نوكه فه‌وجه‌كا دێ د مه‌شق و راهێنانان دایه مه‌دڤێت ئه‌ڤه ب هویرى چاڤدێریا ده‌شتا موسل بكه‌ن،مه وه‌ك كوردێن شه‌به‌ك ب فه‌رمى ل جڤاتا نونه‌رێن عیراقى دیار كریه كو مه‌نه‌ڤێت پشتى هنده نه‌خوشیێ جاره‌كادى ل عیراقى بین و ل گه‌ل حوکمه‌تا به‌غدا بین.
نوونه‌رێ شه‌به‌كا ل جڤاتا نوونه‌رێن عیراقێ دیارکر ژی:ل گورى وێ ئامارا لبه‌ر ده‌ست هژمارا كوردێن شه‌به‌ك ل ده‌شتا مووسل 450 بۆ 500 هزارایه،هه‌وره‌سا ل شه‌رێ دژى داعش و قاعیده 1487 كوردێن شه‌به‌ك هاتینه كوشتن و 217 كوردێن شه‌به‌ك ل ده‌ستێ داعش دانه وه‌ك دیل و ئه‌م چۆ لێ نزانین كا ره‌وشا وان چه‌وایه.
ئەڤرۆ نیوز ، نەوزاد ھلۆری:
رێڤەبەریا پولیسێن پارێزگەھا دھوکێ ب بەرھەڤبوونا ف پارێزگەرێ دھوکێ و پلەدارێن رێڤەبەریا پولیسان رێ ورسمێن دەرچونا خولا پولیسێن نوو دامەزراندی ھاتنە گێران.
لیوا تارق ئەحمەد رێڤەبەرێ پولیسێن پارێزگەھا دھۆکێ دچارچوڤێ رێورسمێن دامەزراندنا وان پولیسان دا گۆت: (ئارمانج ژخولێ ئەوبویە پولیسێن نوو دامەزراندی فێری مەشق وراھێنانێن تایبەت ببن کو تەناھیا دەڤەرێ وملک وسامانا وەلاتییان ب پارێزن دخوازین کو پولیسێن نوو چاڤ ل پێشمەرگەی بکەن کا چاوا ئەوا سەنگەرا دپارێزن پولیس ژی تەناھیا نافخویی ب پارێزن ھەموو بەرھەڤبن بو پشتەڤانیکرنا ریفراندومێ کو دەولەتا کوردستانێ بھێتە راگەھاندن ومللەت ژھەموو نەھامەتیان بھێتە پاراستن وسوپاسیا پارێزگەرێ دھوکێ وھەموو لایەنان دکەین کو پشتەڤانیا مە کری)
ژلایەکێ دن ڤە فەرھاد ئەترۆشی پارێزگەرێ دھوکێ وگوت: (ئەرکێ سەرەکی یێ ھێزێن نافخویی بەرقراکرنا تەناھیێ و پاراستنا ملک وسامانێ وەلاتیانە وچەسپاندنا یاسایێ یە دخوازین کو مەشق وراھێنان وبابەتێن دەرچویێن خولێ وەرگرتین برەنگەکێ پیشەیی وپراکتیکی د ئەرکێ روژانەدا بجە بینن و سەرەدەریەکا شارستانی ل گەل وەلاتییان بکەن وخزمەتا گەل وەلاتێ خو بکەن)
زێدەتر گوت: (دخوازین ژ ھەموو کەسان کو ھاریکاربن بو ئەنجامدانا ریفراندومێ چونکو سەربورا ئێکێ یە دڤێت ھەموو لایەک ھاریکاربیت دا ئەو پروسە بھێتە ئەنجامدان ودەولەتا کوردستانێ بھێتە ئاڤاکرن ، و وەکو پارێزگەھا دھوکێ پشتەڤانیا خوە بو ھەر چالاکیەکێ دەردبرین)
ل داویا رێورسمان خەلات ل سەر راھینەرێن خولێ وباوەرنامە ل سەر دەرچویێن خولێ ھاتنە بەلافکرن.
دھێتەزاینن کو ٨٣پولیسێن نوو دامەزراندی بو ماوێ دوو ھەیڤا مەشق وراھێنان دکرن ل سەر چاوانیا ب کارئینانا چەکێن جورا وجور وراھێنانێن پاراستنا تەناھیا نافخویی .
نيشاندان