ئەڤرۆ نیۆز،زنار تۆڤی:
خانما سترابێژ نازدار جزیری ژبۆ پشتگیریا ریفراندۆما سەربەخۆیا هەرێما كوردستانێ،نوکە ل كوردستانێ یە و بریارە چەندین ئاهەنگێن جەماوەری ساز بکەت.
هەروەسا بریارە ئەڤرۆ پێنجشەمبی 7/9/2017 ل هۆلا كۆنفرانسان ل دهۆكێ ئاهەنگەکا جەماوەری بۆ نازدار جزیری بهێتە سازکرن،هەروەسا نازدارێ ل ئەکاونتێ فەرمی یێ خۆ ل تۆرا جڤاکی یا ئینستگرامێ پارچە ڤیدیۆیەک ل دەمێ پرۆڤان دا بەلاڤکریە و ئاماژە ب هندێ دایە کو دێ ئاهەنگەکێ سازکەت بۆ پشتگیریا ریفراندۆما سەربەخۆیا هەرێما كوردستانێ ل دهوکێ.
ئه‌ڤرۆ نیوز: ڤه‌ده‌ر ره‌شاڤای:
پشتی هه‌رێما كوردستانێ بریار دای ل 25 ئیلۆنێ رێفراندۆما سه‌رخوه‌بوونا كوردستانێ بكه‌ت، حه‌یده‌ر عه‌بادی، سه‌رۆكوه‌زیرێن ئیراقێ چه‌ندین جاران ب گۆتنێن جودا دژایه‌تییا خوه بۆ وێ بریارێ دیار كرییه، لێ تشتێ حه‌یده‌ر عه‌بادی گه‌له‌ك دوباره دكه‌ت ئه‌ڤ رسته‌یه: رێفراندۆما كوردستانێ نه یا ده‌ستووریه.” و ئه‌ڤه پتری سێ جاران د ده‌لیڤه‌یێن جودا دا دوباره كر.
تشتێ سه‌رنجراكێش ئه‌وه ئه‌ڤرۆ ب زمانه‌كێ كولانكی گۆت: ئه‌سله‌ن رێفراندۆما كوردستانێ نه یا ده‌ستووریه.”
تشتێ ژ وێ سه‌رنجراكێشتر عه‌بادی نابێژیت: “رێفراندۆما هه‌رێما كوردستانێ” به‌لكو دبێژیت: “رێفراندۆما كوردستانێ.”
ئه‌ڤرۆ نیوز:
ئونگ سان سوو كی، سه‌رۆكا دیفاكتۆ یا میانمارێ بۆ ئێكه‌م جار ل سه‌ر توندوتیژیێن میانمارێ ل دژی رۆهینگیا هاته ده‌نگ و گۆت: “تیرۆرست چیایه‌كێ نووچه‌یێن شاش” ل دۆر قه‌یرانا رۆهینگیا به‌لاڤ دكه‌ن.
ئۆفیسا سوو كیێ ل سه‌ر تۆرا جڤاكییا فه‌یسبۆكێ په‌یامه‌ك به‌لاڤ كر كو تێدا سوو كیێ ره‌ت كر بزاڤێن سوپایێ میانمارێ ل راخینا شه‌رمزار بكه‌ت و گۆت: سوپا ب باشترین ره‌نگ به‌رگریێ ژ هه‌مى خه‌لكێ ویلایه‌تا راخینا دكه‌ت، هه‌روسا هۆشداری دان كو زانیاریێن شاش دێ په‌یوه‌ندیێن وه‌لاتێ وێ د گه‌ل وه‌لاتێن دی دا تێكده‌ت.
ناڤهاتیێ ره‌خنه ل توركیا گرتن ب تایبه‌ت جێگرێ سه‌رۆكوه‌زیرێن توركیا كو هنده‌ك وێنه به‌لاڤ كربوون و گۆتبوو ئه‌و وێنه موسلمانێن رۆهینگیانه لێ ل دووڤ دا دیار بوو ئه‌و وێنه یێن وه‌لاته‌كێ دینه.
هه‌روه‌سا سه‌رۆكا میانمارێ وه‌ك ئاماژه‌ك بۆ وێ شاشییا وی به‌رپرسێ تورك خویا كر: ئه‌و شاشی پرته‌كا بچووكه ژ وان نووچه‌یێن شاش یێن دهێنه به‌لاڤ كرن كو وه‌كی بانگه‌شه‌كێ یه بۆ تیرۆرستان و ناكۆكییان د ناڤبه‌را وه‌لاتان دا دروست دكه‌ن.”
ئه‌ڤرۆ نیوز:
ئه‌مینه ئه‌ردۆغان، هه‌ڤژینا ره‌جه‌ب ته‌یب ئه‌ردۆغان سه‌رۆكێ توركیا د سه‌ره‌دانه‌كێ دا گه‌هشته نێزیكی سنۆرێ به‌نگلادشێ د گه‌ل میانمارێ دا ب مه‌ره‌ما گه‌هاندنا هاریكاریێن مرۆڤایه‌تی بۆ موسلمانێن رۆهینگیایی یێن ژ توندوتیژیێن میانمارێ دره‌ڤن.
رۆژنامه‌یا ده‌یلی سه‌باح یا توركی راگه‌هاند: وه‌زیرێ ده‌رڤه یێ توركیا، مه‌ولود چاویشئوغلۆ و خاتینا ئێكێ یا توركیا، ئه‌مینه ئه‌ردۆغان ل گۆری پێشنیازا ئه‌ردۆغانی گه‌هشتنه به‌نگلادشێ و بریاره ناڤهاتی سه‌ره‌دانا كه‌مپێن په‌نابه‌رێن رۆهینگیا ل به‌نگلادشێ بكه‌ن.
ئه‌ڤرۆ نیۆز،ره‌مه‌زان هه‌رنى :
ریڤه‌به‌رێ چاندنا ئاكرێ بۆ ئه‌ڤرۆ نیۆز دیاركر: ئه‌ڤ ساله دو هه‌مبه‌ری پار برنجێ كوردی هاتیه چاندن ل قه‌زا ئاكرێ كو ئەڤ سالە 2800 دونه‌مێن ئه‌ردی هاتینە چاندن ل ئاكرێ و شه‌ش جۆرین برنجی دهێته چاندن ئەو ژی (شه‌ش مه‌هی ،پینج مه‌هی ، سێ مه‌هی ،كه‌س نه‌دیتی ، تحالف ، سه‌درى ) هەروەسا برنجێ شەش مەهی پتر ژ هەموو جۆرێن دیتر دهێتە چاندن و پتریا ڤی برنجی ل ده‌ڤه‌را سورچیا دهێتە كرن.
ئه‌حمەد جه‌میل ریڤه‌به‌رێ چاندنێ ل ئاكرێ زێدەتر دبێژیت:ئەم هه‌رده‌م د هاریكاریا جوتیارێن ده‌ڤه‌رێ دکەین داكو زیده‌تر گرنگیێ ب به‌رهه‌مین چاندنی بده‌ن،مە 35 مه‌كینه‌یێن سپیكرنا برنجی ل سه‌ر جوتیاران دا دابه‌شكرینه،هەروەسا بریار و ره‌زامه‌ندیا درۆستكرنا دو گوره‌پانێن كونکریتی هاتیه‌دان،ژ پێخەمەت ل ده‌می درینا برنجی جوتیار برنجی خو ل سه‌ر وان گوره‌پانا هشك بكه‌ن و زیان به‌ر برنجی وانا نه‌كه‌ڤیت، هه‌روه‌سا د پلانا وه‌زاره‌تێ دا پاره هاتیه دابینكرن بو مه كو هند ئامیرین درینا برنجی ژبۆ جوتیارین ده‌ڤه‌ری بكرین.
ئه‌حمه‌د زێده‌تر گوت:ژبه‌ر جوانى و ناڤودەنگیا برنجێ ئاكرێ دچیته هه‌موو پارێزگه‌هێن كوردستانێ ب تایبه‌تى ل خوارنگه‌هان ،هه‌روه‌سا خه‌لك ل ده‌رڤه‌ى ئاكرێ دهێت بو كرینا برنجى كوردى.
ئه‌ڤرۆ نیوز ، هلۆرى:
سه‌رۆكێ هه‌رێما كوردستانێ مه‌سعود بارزانى ل گه‌ل رۆژنامه‌ڤان و نڤیسه‌ران و هونه‌رمه‌ندان ل هه‌ولێر كومبو و چه‌ندین ته‌وه‌رێن گرنگ به‌حسكرن و دیاركر كو گڤاشتنێن زۆر لسه‌ر پاشێخستنا ریفراندۆمێ دهێنه‌كرن.
مه‌سعود بارزانى سه‌رۆكێ هه‌رێما كوردستانێ د كومبوونا خوه دا گۆت: ( عیراقێ هه‌موو روویێن هه‌ڤپشكیێ ل گه‌ل كوردان شكاندینه و دنها ژى دا حه‌شدا شه‌عبى هه‌ره‌شه‌یان دكه‌ت ، و ریفراندۆم ژى كارتا فشار و موزایدان نینه به‌لكو ل گوره‌ى قانونێن نیڤده‌ولى ریفراندۆم مافه‌كێ قانونى یه و ده‌ستوورێ عیراقێ ژى رێك ب ئه‌نجامدانا ریفراندۆمێ دایه ، ژبه‌ركو دنهادا ماده‌م به‌غدا هه‌ڤپشكى و شه‌راكه‌تێ قبول ناكه‌ت دڤێت جودابوونێ قبول بكه‌ت و بو ڤێ مه‌ره‌مێ ژى مه دڤێت ب دانوستاندن بگه‌هینه ئه‌نجامان )
بارزانى گۆت ژى: (ده‌وله‌تا كوردستانێ ل داهاتى دێ كومارا دیموكراسى یا په‌رله‌مانى بیت ، دخوازم كو ب زوترین ده‌م چاره‌سه‌ریا قه‌یرانێن دارایى ل كوردستانێ بهێنه‌كرن و دڤێت هه‌موو پارتێن كوردستانێ ژى هه‌ڤكاربن ، و مه دڤێت ل گه‌ل عیراقێ ببینه دوو هه‌ڤسویێن باش ژبه‌ركو عیراق ب مه‌زهه‌بى حوكمى دكه‌ت و مه چوو رێكه‌فتن ژى ل گه‌ل عیراقێ نه‌كرینه هه‌تاكو بجهـ ژى بكه‌ین )
سه‌رۆكێ هه‌رێما كوردستانێ دیاركر ژى كو بریارا ئه‌نجامدانا ریفراندۆمێ بریارا هه‌موو لایه‌نێن سیاسیه نه‌ك حزب و كه‌سه‌كێ و گۆت ژى : ( هه‌ر كه‌سێ وه‌سا تێبگه‌هیت كو ریفراندۆم یا حزبى و كه‌سى یه ئه‌و وى زوله‌مه‌كا مه‌زن كر، و رۆژا 25 ئیلونێ رۆژا راگه‌هاندنا سه‌ربخوى یا كوردستانێ یه وهه‌ر كه‌سێ داخوازا پاشئێخستنێ بكه‌ت ئه‌م داخوازا به‌دیلان ژێ دكه‌ین و ئه‌گه‌ر به‌دیل نینن ئه‌م ژى درژدین لسه‌ر ئه‌نجامدانا ریفراندۆمێ)
مه‌سعود بارزانى گۆت ژى: (ل ئاینده كوردستان ژ هه‌موو رویان ڤه دێ باشتر بیت و د بورى دا مه سه‌لماند كو ئه‌م ئه‌گه‌رێن سه‌قامگیریێ بوینه ب تایبه‌تى بو هه‌ڤسویێن خوه ، سه‌ره‌راى كو به‌رى نها مه زور ده‌رفه‌ت ژ ده‌ستدایه ، به‌لێ ئه‌ڤ جاره ره‌نگه دوماهى ده‌رفه‌ت بیت و خوزى مه زوتر ژى بریارا ریفراندۆمێ دابایه ، یان دڤێت ده‌ربچین یان ژى دڤێت ده‌ستان ژ هه‌ر تشتى داهێلین و خوه بده‌ین ده‌ست قه‌زا و قه‌ده‌رێ ، ره‌نگه بو ده‌مه‌كێ وه‌لاتێن جیهانێ فشاران بێخنه سه‌ر مه به‌لێ دڤێت ژ بیر نه‌كه‌ین كو جیهان لسه‌ر به‌رژه‌وه‌ندیان دچیت و كار ب ئه‌مرێ واقع دكه‌ن و پیشتر ژى ئه‌و ل گه‌ل فیدرالیێ و هه‌بوونا پێشمه‌رگه‌ى نه‌بوون به‌لێ ئه‌مرێ واقعى ئه‌و نه‌چاركرن كو ل گه‌ل بن)
بارزانى ل دوماهیێ گۆت: (نه‌خێر و به‌لێ بابه‌ته‌كێ دیموكراسى یه و هه‌ركه‌سێ بێژیت نه‌خێر دڤێت به‌رسڤا گه‌لێ كورد ژى بده‌ت ، و ئه‌ز ل وێ باوه‌ریێ نه‌بووم كه‌سه‌ك ل كوردستانێ هه‌بیت بێژیت نه‌خێر)
ئه‌ڤرۆ نیوز ، نه‌وزاد هلۆرى:
كونسولگه‌ریا ژاپونێ ل عیراقێ دیاركر كو ئه‌وان ئه‌ڤرۆ 500 ملیون دینار ب قه‌ر دانه حكومه‌تا عیراقێ ب مه‌ره‌ما چاره‌سه‌ركرنا كێماسیێن خوه یێن دارایى,
ل گوره‌ى به‌یاننامه‌یه‌كێ كو ئه‌ڤرۆ شه‌شێ مه‌ها ئیلونێ دانه‌یه‌ك بو شه‌فه‌ق نیوز هنارتیه تێدا هاتیه : ( گرێبه‌سته‌كا فه‌رمى دناڤبه‌را دناڤبه‌را هه‌ردوو حكومه‌تێن ژاپوون و عیراقێ هاتیه ئیمزاكرن كو مه‌ره‌م ژى ئه‌و بویه كو كاروبار و قه‌یرانێن خوه‌یێن دارایى پێ چاره‌سه‌ر بكه‌ت ب تایبه‌تى دوارێ كارگێرى و ئابوورى دا )
ل ڤێ دوماهیێ ژ ئه‌گه‌را داكه‌فتنا بهایێ په‌ترولێ و درۆستبوونا شه‌ر و ئالوزى و هاتنا داعش بو ده‌ڤه‌رێن عیراقێ و ئاواره‌بوونا هژماره‌كا زور یا خه‌لكێ عیراقێ بویه سه‌ده‌م كو حكومه‌تا عیراقێ په‌نایێ بو كرنا قه‌رێن مه‌زن ببه‌ت.
ئه‌ڤرۆ نیوز ، نه‌وزاد هلۆرى:
ب مه‌ره‌ما پشته‌ڤانیكرنا ریفراندۆما سه‌ربخوى یا كوردستانێ رێڤه‌به‌ریا ره‌وشه‌نبیرى و هۆنه‌رى یا ئاكرێ دێ دووباره جاره‌ك دن خه‌تیرێن ئاگرى بو سه‌ربخویى یا كوردستانێ هه‌لكه‌ت ڤه.
دڤى واریدا كاوه زوهێر رێڤه‌به‌رێ رێڤه‌به‌ریا ره‌وشه‌نبیرى و هونه‌رى یا ئاكرێ بۆ ئه‌ڤرۆ نیوز گۆت: ( ب مه‌ره‌ما پشته‌ڤانیا ریفراندۆمێ ژ بو سه‌ربخوى یا كوردستانێ پایته‌ختێ نه‌ورۆزێ دێ دووباره جاره‌ك دن خه‌تیرێن ئاگرى ل كه‌لها دێرینا ئاكرێ هه‌لكه‌ت ڤه )
زێده‌تر گۆت: ( رێورسم دێ لرۆژا ئێكشه‌مبى رێكه‌فتى 10 ئیلونا 2017 ل ده‌مژمێر 7ێ ئێڤارى ل سه‌رێ گرى ل ئاكرێ ده‌ستپێكه‌ت ، و دوڤدا دێ كونسێرته‌كا جه‌ماوه‌رى و هونه‌رى بو هه‌لبه‌ستڤان بورهان زێبارى هێته ئه‌نجام دان)
ئه‌ڤرۆ نيوز:
ژێده‌رێن راگه‌هاندنێ ل وه‌لاتێ توركيا ئاشكه‌را كر كو سه‌رۆك وه‌زيرێن عيراقێ حه‌يده‌ر عه‌بادى، پشتى بهێنڤه‌دانا جه‌ژنا قوربان دێ سه‌ره‌دانا وه‌لاتێ توركيا كه‌ت ب مه‌ره‌ما دانوستاندنێ ل دۆر پرسا ريفراندۆما هه‌رێما كوردستانێ.
مالپه‌رێ تورك پرێس يێ توركى به‌لاڤكريه كو سه‌ره‌دانا وه‌لاتێ فره‌نسا ژى كه‌ت، به‌لێ ئاشكه‌را نه‌كريه كو ژ به‌ر هه‌مان مه‌ره‌مه يان ژى بۆ مه‌ره‌مه‌كا دى يه.
بڕياره ل 25ى ئيلۆنا ڤێ هه‌يڤێ ريفراندۆم ژ بۆ سه‌ربه‌خۆيا هه‌رێما كوردستانێ ب مه‌ره‌ما ده‌وله‌تبوونێ ل هه‌رێما كوردستانێ و ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ هێته كرن.
هه‌ر ئێك ژ وه‌لاتێن عيراق و توركيا دژى ئه‌نجامدانا ڤێ ريفراندۆمێ نه و ته‌كست ل سه‌ر ئێكرێزيا ئاخا عيراقێ دكه‌ن، به‌لێ سه‌رۆكێ هه‌رێما كوردستانێ و حوكمه‌تا وێ د رژدن ل سه‌ر ئه‌نجامدانا ريفراندۆمێ و ب مافه‌كێ خوه يێ ره‌وا دزانن.
هه‌ر چه‌نده ئه‌نجامێن ريفراندۆمێ ب ره‌نگه‌كێ ئێكسه‌ر ناهێنه بجهئينان، به‌لێ پێشبينيه‌كا زۆر دهێته كرن كو ئێدى هه‌رێما كوردستانێ ژ حوكمه‌تا عيراقێ جودا ببيت و ببيته وه‌لاته‌كێ سه‌ربه‌خۆ.
ئه‌ڤرۆ نیوز ، هلورى:
نیڤرویا ئه‌ڤرۆ ل هه‌ولێرا پایته‌خت ماموستایێن ئاینى ل به‌رامبه‌ر ئێكه‌تیا زانایێن ئاینێ ئیسلامێ كوردستان ل هه‌ولێر خرڤه‌بوونه‌كا نه‌رازیبوونێ ئه‌نجام دا و تێدا داخواز ل ده‌وله‌تێن ئیسلامى و جیهانێ كر كو بێده‌نگ نه‌بن.
سه‌رۆكێ ئێكه‌تیا زانایێن ئاینێ ئیسلامێ ل كوردستانێ لقێ هه‌ولێر دناڤ نه‌رازیبوونا ماموستایێن ئاینى ل هه‌ولێر گۆت: ( كاره‌ساتێن دژى مروڤایه‌تى به‌رامبه‌ر موسلمانێن بورما ل میانمار هاتینه‌كرن و به‌رده‌وامن ژى ، و ئه‌م وه‌كو گه‌لێ كورد به‌رامبه‌ر ڤێ یه‌كێ دراوه‌ستین و زێده‌بارى شه‌مبزاركرنا ڤێ یه‌كێ د هه‌مان ده‌م دا دخوازین كو ب زوترین ده‌م ئه‌ڤ توندوتیژى و كوشتنه به‌رامبه‌ر موسلمانێن بورما بهێته راگرتن)
زێده‌تر گۆت: ( گه‌لێ كورد وه‌كو گه‌له‌كێ زولم و سته‌م و كوشتن و وێرانكارى ب چاڤێن خوه دیتى ب توندى كوشتنا وه‌لاتیێن سڤێل ل میانمار شه‌مبزاردكه‌ت و دخوازین كو وه‌لاتێن ئیسلامى و رێكخراوێن مروڤایه‌تى بهێنه سه‌رخه‌ت و ئه‌ڤان كیارێن هوڤانه رابگرن)
نيشاندان