ئەڤرۆ نيوز:
رێڤەبەریا گشتی یا رەوشەنبیری و ھونەری ل دھۆکێ ب ھەماھەنگی ل گەل سەرۆکاتیا باژێرڤانیا دھۆکێ دێ کەرنەڤالێ پێنجێ یێ رۆژا پارێزگەھبوونا دھۆکێ ل ئێڤاریا رۆژا 25/5/2017ێ ل پارکێن دھۆک مۆل گێڕیت.
حەسەن عارف، بەرپرسێ پشکا چالاکیان ل رێڤەبەریا گشتی یا رەوشەنبیری و ھونەری ل دھۆکێ بۆ رۆژناما ئەڤرۆ ئاشکرا کر کو کەرنەڤالێ پێنجێ یێ رۆژا پارێزگەھبوونا دھۆکێ دێ ب کردوسێن خەملاندنا ترۆمبێلان و رووپیڤانێن جەماوەری و ئاھەنگ و سترانان ھێتە گێڕان و بۆ ڤێ مەرەمێ ژی چەندین لیژنە ھاتینە پێک ئینان و راسپاردن داکو سەرەدانا ھەموو سازیێن کارگێری یێن پارێزگەھا دھۆکێ بکەن و ھەر سازیەک ل گۆرەی کارێ خوە پشکداری کەرنەڤالی ببیت و کارێ خوە د ناڤ کەرنەڤالی دا نیشان بدەن و گۆت: “سەرەرایی ڤێ چەندێ مە ئاگەھداریەک د سایتێن رێڤەبەریا خوە دا بەلاڤ کریە و تێدا داخوازکریە ھەر کەس و لایەنەکێ ھزرەک یان کارەک یان پێشنیارەک بۆ زەنگینکرنا کەرنەڤالی ھەبیت یان حەزا پشکداریێ د کەرنەڤالی دا ھەبیت بلا ھزر یان کار یان پێشنیارا خوە ھەر ژ ئەڤرۆ رۆژا 10/5/2017ێ و ھەتا 15/5/2017ێ پێشکێشی رێڤەبەریا گشتی یا رەوشەنبیری و ھونەری ل دھۆکێ بکەت”.
ناڤھاتی ئاماژە دا وێ چەندێ کو وان ل بەرە ڤی کەرنەڤالی بێخنە د خزمەتا بەلێ بۆ ریفراندومێ دا و دێ پشتەڤانیەکا ب ھێز ل ئەنجامدان و سەرخستنا ڤێ پرۆسێ ھێتەکرن و گۆت: “باشترین کارێن کەرنەڤالی دێ ژ لایێ لیژنەکا بسپۆر ڤە ھێنە ھەلسەنگاندن و دێ سێ سەرکەفتی ھێنە ھەلبژارتن”.
ل دووماھیێ بەرپرسێ پشکا چالاکیان ل رێڤەبەریا گشتی یا رەوشەنبیری و ھونەری ل دھۆکێ خویا کر کو د ھەمان کەرنەڤال دا پێنج کەسێن ژ کەڤن دا ب کارەکی ل سەرانسەری پارێزگەھا دھۆکێ ناڤداربووین و خزمەتا پارێزگەھا ناڤھاتی کری دێ ھێنە خەلاتکرن و گۆت: “سال رۆژا پارێزگەھبوونا دھۆکێ ل رۆژا 27ی گۆلانێ یە، بەلێ ئەڤ سالە رەنگە ھەیڤا رەمەزانا پیرۆز ب کەڤیتە د 27ی گۆلانێ دا ژ بەر ڤێ چەندێ مە ب فەر دیت کەرنەڤالێ پێنجێ یێ رۆژا پارێزگەھبوونا دھۆکێ ل 25/5/2017ێ ب گێڕین”.
کەرنەڤالێ پێنجێ یێ رۆژا پارێزگەھبوونا دھۆکێ دێ ھێتە گێڕان
نيشاندان