ئەڤرۆ نیوز:
ھەڤسەرۆکێ بەرێ یێ باژێرڤانیا مەزنا مێردینێ راگەھاند کو حوکمەتا ئاکپارتی یاریان ب پاشەرۆژا تورکیا دکەت و ل ژێر ناڤێ ریفراندۆما بۆ بجیە کرنا سیستەمێ سەرۆکاتیێ تورکیا بەر ب ژ ناڤچوونێ ڤە دبەت و دڤێت حوکمەت ژ شاشیا خوە ڤەگەریت و ژ بۆ چارەکرنا پرسا کوردی ژی دڤێت جارەکا دی ڤەگەریتە سەر مێزا دانوستاندنان.
ئەحمەد تورک ھەڤسەرۆکێ بەرێ یێ باژێرڤانیا مەزنا مێردینێ د داخۆیانیەکی دا بۆ دەزگەھێن راگەھاندنێ دیار کر کو نەورۆزا سالا ٢٠١٧ ل باکورێ کوردستانێ بەرسڤەکا گەلەک رون و ئاشکرا بوو کو گەلێ کوردستانێ دێ بەرخوەدانا خوە ل ھەمبەر زۆلم و زۆرداریا دەستھەلاتدارێن تورکیا بلندتر کەت و گۆت: (حوکمەتا ئاکپارتی و سەرۆک کۆمارێ تورکیا بۆ سەرخستنا ریفراندۆمێ تورکیا دھاڤێژنە ناڤ ئاگری و ھەر ئاخاڤتن و کریارەکا وان رەوشا وەلات ئالۆزتر دکەت و دڤێت دەست ژ سیاسەتێن خوە یێن کرێت بەردەن و ڤەگەرنە سەر مێزا دانوستاندنان و پرسگرێکا کوردی و پرسگرێکێن دی یێن تورکیا ب دیالۆگێ چارە بکەن، ھەکە وەسا نەبیت تورکیا رۆژ ب رۆژێ بەر ب پارچەبوونێ و شەرێ ناڤخوەیی ڤە دچیت و ئەو یەک رێ بۆ کارەساتەکا مەزن ڤەدکەت).
سەبارەت ب گرتنا سیاسەتمەدار، سەرۆکێن باژێرڤانیێن کوردان و پەرلەمانتارێن ھەدەپێ ژی ئەحمەد تورک راگەھاند کو دیرۆکا تێکۆشینا گەلێ کوردستانێ بۆ ھەموو کەسەکێ سەلماندیە کو گەلێ کورد و شۆرەشگێرێن کورد ب سیاسەتێن زۆرداری و کوشتن و گرتنان ناھێنە تەسلیم گرتن و گۆت: (گەلێ کورد ب دۆزا خوە را گرێداییە و نەورۆزا ئەڤسالە ژی دا خوەیا کرن کو گەلێ کورد ئێدی ژ بلی ئازادی، ژیانەکا ب رومەت و وەکھەڤ چو تشتەکی دی قەبوول ناکەت و داخواز ژ سەرۆک کۆمار و بەرپرسێن دی یێن تورکیا دکەم کو تورکیا نەکەنە گۆلا خوونێ و گەلێن تورکیا نەکەنە قوربانا سیاسەتێن خوە یێن شاش و پارچەکری).
ئەحمەد تورک ھەروەسا راگەھاند ژی دڤێت دۆرپێچا ل سەر رێبەرێ پەکەکێ عەبدولا ئۆجەلانی بھێتە راکرن و پەرلەمانتار و سیاسەتمەدارێن کورد بھێنە ئازادکرن و گۆت: (ئەڤە ٤٠ سالن ژ بلی ئاشتیێ و دیالۆگێ ھەموو رێ ل تورکیا ھاتنە جەرباندن و د ئەنجام دا دەرکەڤتیە ھۆلێ کو ب شەری و کوشتنان پرسگرێکا کوردی چارە نابیت و دڤێت ئەقلێ راست یێ چارەسەریێ بکەڤیتە پێش ئەقلێ تێکدەر و قۆناغا ئاشتیێ جارەکا دی بھێتە دەستپێکرن و دۆرپێچا ل سەر ئۆجەلانی بھێتە راکرن و سیاسەتمەدارێن کورد بھێنە ئازاد کرن ھەکە پێنگاڤەکا وەسا ل تورکیا بھێتە ئاڤێتن دێ رێ بۆ چارەکرنا پرسگرێکا کوردی ڤەبیت).

ئەڤرۆ نيوز:

ب سەدەھان سالە کورد ژبۆ سەربخوەیا کوردستانێ بەرەڤانیێ ژ خوە دکەن، بەلێ ھێشتا ئارمانجا سەربخوەیێ نە ھاتیە بەری، زلھێزێن جیھانی ب ئەلتەرناتیڤان دگەرن و بزاڤا بۆ گوھوڕینا نەخشێ رۆژھەلاتا ناڤەراست دکەن، چونکی ھەد وەلاتێن سوریا و عیراقێ نە دەستھەلات و نە سەروەری نەماینە، ب شێوەکێ پراکیتیکی ژی یێن ھاتینە پارچە پارچەکرن، ب ئەگەرێ دەستھەلاتێن دکتاتوری و مەزھەبی ل عیراقێ پرۆژێ ئێکگرتنێ ل عیراقێ شکەستن خواریە، چ دکتاتوریا سونی بیت ( 1921ـ 2003) یان ژی دکتاتوریا مەزھەبی یا شیعی بیت (2003 ـ 2017)، ئەڤە بەلگەیێ وێ راستیێ یە کو ئێدی ل عیراقێ کورد و شیعە و سونە دناڤا مالەکێ و ئاخەکێ دا کومنابن و پێکڤە ناژین.
ل گۆڕ دەنگۆباسەکێ مالپەرێ (ێوت کوردستان) ویلایەتێن ئێکگرتیا ئەمریکی نەخشێ دەولەتا کوردستانێ ل سوریا و عیراقێ بەرھەڤ دکەت، و بڕیارە پشتی نەمانا شەرێ داعشێ ل دەڤەرێ ھەلوەشاندنا کۆمارا سوریا یا بەعسی ب دووماھی بھێت.
ھەر ل گۆڕ مالپەرێ ناڤبری ویلایەتێن ئێکگرتیا ئەمریکی داخوازێ ژ کوردان دکەت، ئێکگرتنێ بکەن و خودان ھەمان ئارمانجا دروستکرنا دەولەتا کوردستانێ ل عیراقێ وسوریا بن، وی دەمی ئەمریکا ژی دێ پشتەڤانیا ھێزێن کوردی بۆ راگەھاندنا دەولەتا کوردستانێ کەت.
ل گۆڕ پێزانینان بڕیارە ل ھەاڤینا بھێت کو بتەمامی (عیراق و سوریا) ژ چەکدارێن تیرۆرستێن داعشێ بھێنە پاقژکرن، و دووماھی ب نەخشێ کەڤنێ ھەر دو وەلاتان بھێت.

ئه‌ڤرۆ نيوز:

پشکداریا کوردان دشەڕێ دژی داعشێ دا ل عیراقێ یا بێ بەرامبەر نابیت و گرەنتیێن ئەمریکی و رۆسی یێن ھەین کو دامەزراندنا دەولەتا کوردی ئەوا بەردەوام سەرۆکێ ھەرێما کوردستانێ مەسعود بارزانی داخوازیا وێ دکەت، دێ بەرامبەری وێ پشکداریێ بیت.

رۆژناما (رای الیوم) کو عەبدولباری عەتوان سەرنڤیسەرێ وێ یە، د گۆتارا خوە یا سەرەکی دا ل رۆژا 21 ئادارا 2017 ێ، دبێژیت (پرسیارا ھەرە گرنگ ل سەر زمانێ گەلەک عیراقیان، بەلکو دەڤەرا رۆژھەلاتا ناڤین ھەموویێ، دێ پشتی شکەستنا داعشێ ل مووسلێ چ روودەت) و زێدەتر دبێژیت ( ھەموو لایەنێن دگەھنە ئێک دپرسا ژناڤبرنا داعشێ ل مووسلێ وەکو دەستپێکەک بۆ دەرکرنا وێ ژ باژێرێ رەقە یێ سووری، ب ئاشکرایی بەرسڤا ڤێ پرسیارێ نادەن و گۆمان ژی ل سەر ھەبوونا پلان، یان نەخشێن دیارکری دڤی بابەتی دا یێن ھەین).

ل دووڤ وێ رۆژنامێ، بەرسڤ تنێ یا ل دەڤ ئێک کەسی کو وێرەکی ل دەڤ ھەبوو رابگەھینیت ئەوژی سەرۆکێ ھەرێما کوردستانێ، مەسعود بارزانی یە کو د پەیڤەکا خوە دا ب ھەلکەفتا جەژنا نەورۆزی ل 20 ئادارێ گۆتبوو (گەلێ کوردستانێ ب دەھان سالان بەرگری ژخوەکر ھەتا قۆناغا بەرگریکرنێ دژی تیرۆرستێن داعشێ و نوکە ئەم یێ دبینین چاوان ھەوە تیرۆرست دەرکرن و شکاندن و رۆژا سەرکەفتنا دووماھیێ یا نێزیک دبیت و ئەنجامێ قوربانیێن ھەوە و پێشمەرگەی، دڤێت بدەستڤەئینانا بریارا مافێ چارەنڤیس و سەروەریێ ل سەر ئاخا خوە بیت، وەکو ھەموو گەلێن جیھانێ).
رۆژناما (رای الیوم) بەردەوامیا گۆتارا خوە دا دبێژیت، مافێ چارەنڤیس ئەوێ مەسعود بارزانی بەحس لێ دکەت، راگەھاندنا دەولەتا کوردی یا سەربخوەیە ل باکوورێ عیراقێ وەکو پاداشتەک بۆ کوردان ژبەر شەڕێ وان دژی رێکخستیا داعشێ و شەھیدبوونا پتر ژ ھزار پێشمەرگەیان دوی شەڕی دا ب تایبەتی ل شنگالێ و کەرکووکێ، دیسا ل تاخێن رۆژھەلاتا مووسلێ مل ب ملێ ھێزێن عیراقی و شارەزایێن لەشکری یێن ئەمریکی.
ب دیتنا وێ رۆژنامێ، پشکداریا کوردان دشەڕێ دژی داعشێ دا، یا بێ بەرامبەر نابیت و گرەنتیێن ئەمریکی و رۆسی یێن ھەین کو دامەزراندنا دەولەتا کوردی دێ بەرامبەری وێ پشکداریێ بیت و شاشیەکا دیرۆکی دێ ھێتە راستڤەکرن ب ھەلوەشاندنا پەیمانا سیڤەر یا سالا 1920 کو دووپاتی ل سەر ڤی مافی کربوو. شکەستنا رێکخستیا داعشێ ژی، ئانکو دامەزراندنا دەولەتا کوردی، یان ژی دەستپێکە بۆ دامەزراندنا وێ دەولەتێ و ئەڤ پێنگاڤە ژی ب پلە ئێک دێ ب بریارەکا نێڤدەولەتی و ئەمریکی بیت.
ل دووماھیا گۆتارا خوە، رۆژناما ناڤبری دبێژیت، پرسیارا نوو ئەوە، ئایا ئەڤ ھاوکێشا نوو د قۆناغا پشتی (دەولەتا ئیسلامی) دا، دێ دووماھیا شەڕەکی و دەستپێکرنا شەڕەکێ دی بیت؟.