ب بەرهەڤبوونا مەسرور بارزانی، جێگرێ سەرۆكێ پارتی دیموكراتی كوردستان، هەوا بانگەشیا پارتی بۆ هەلبژارتنێن جڤاتا نوونەرێن ئیراقێ ب شێوەیەكێ فەرمی دەستپێكر و تێدا جێگرێ سەرۆكێ پارتی پەیڤەك پێشكێشكر ئەڤە دەقێ وێ یە:

گەلەك سوپاس بۆ بەرهەڤبوونا هەوە ئەڤرۆ بۆ دەستپێكرنا هەوا بانگەشەیا هەلبژارتنان ل پارێزگەها دهۆكێ، گەلەك خوەشحالم جارەكادی پشتی سالەكێ ژ هەبژارتنێن هەرێما كوردستانێ، ڤێجارێ ئەم یێن كۆمڤەبین بۆ هەلبژارتنێن جڤاتا نوونەرێن ئیراقا فیدرال هیڤیدارین وەك هەر جار لیستا پارتی دیموكراتی كوردستان لیستا 275 ڤێجارێ سەركەفتنەكا مەزن بدەستڤەبینیت.
ب هیڤییا خودای و دلسۆزییا زارۆیێن پێشمەرگەیێن قەهرەمان، كادرێن وەفاداران پارتی، جەماوەری خۆڕاگرێ رێبازا بارزانی ئەم پشتڕاستین كو ڤێجارێ دێ ب سەركەڤین بەلێ مە دڤێت مەزنترین سەركەفتن ل سەر ئاستێ ئیراقێ بدەستڤەبینین.
هەموو هەلبژارتن د گرنگن بەلێ ڤێجارێ د ڤان هەلبژارتناندا مە بۆ وێ چەندێیە ئەم نوونەرێن راستەقینەیێن خەلكێ كوردستانێ بهنێرینە بەغدا تاكو ل وێرێ داكۆكیێ ژمافێن دەستووری یێن خەلكێ كوردستانێ بكەن و ئەڤ خووشك و برایێن هاتینە بەربژاركرن كوڕ و كچێن هەوەنە و خووشك و برایێن هەوەنە و ئەز یێ د وێ باوەریێدا دێ باشترین شێوە پارێزگاریێ و بەرگریێ ژمافێن خەلكێ كوردستانێ كەن و هیڤیدارم د سەركەفتی بن.
د هەلبژارتناندا هەموو جاران ئەم هەوە د وەستینین بەلێ نەچارین چونكە خەلكەكێ دی ژی بزاڤێ دكەت ل شوونا پارتی دیموكراتی كوردستان ئەو بچن و ڤان پۆستێن گرنگ یێن حوكمەتێ یان جڤاتا نوونەرێن ئیراقێ وەك نوونەرێن خەلكی خوە بدەنە نیاسین و مە دیت چەندین جاران هەكە پارتی دیموكراتی كوردستان ل جهەكی پشكدارییەكا كارا و ب هێز نەبیت، خەلكەكێ دی نوونەراتییا خەلكێ كوردستانێ كربیت هەموو دەمان مافێن خەلكێ كوردستانێ یێن هاتینە بنپێكرن، ژ بەر وێ چەندێ گەلەك یا گرنگە نوونەرێن راستەقینەیێن خەلكێ كوردستانێ كو نوونەرێن پارتی دیموكراتی كوردستانن ئەو سەركەڤن و ئەو نوونەراتییا هەوە بكەن، لەوما گەلەك یا گرنگە هوون هەموو پشكدارییەكا كارا د ڤان هەلبژارتناندا بكەن.
ل رۆژا ئێكشەمبی دبیت هەوە دیتبیت سەرۆك بارزانی بانگەشەیا هەلبژارتنان بۆ پارتی دیموكراتی كوردستان دەستپێكر و فەرمانا سەرۆك بارزانی بۆمە هەموویان د دیار و رۆهنن جارێ ئەم هەموو ل سەر رێنمایی و شیرەتێن سەرۆك بارزانی د بەردەوام بین و ب ڤی رەنگی بانگەشیا هەلبژارتنان دەست پێ بكەین ل سەرخوە و ئاستەكێ بلند و رەوشتەكێ بلند یێ پارتایەتی یێ رێبازا بارزانی كو هەژی هەوەیە و ئەم ب ڤی رەنگی دێ چینە دناڤ ڤان هەلبژارتناندا
بەلێ د هەمان دەمدا سەرۆك بارزانی دو پەیامێن گرنگ هەبوون و ئەز حەز دكەم دوبارە بكەمەڤە. پەیاما ئێكێ ئەوە كو پێدڤییە هە پارتییەكێ دلسۆز یێ بەردەوام بیت د بەرگریێ ژ مافێن خەلكێ كوردستانێ ڤێجارێ ئەركێ ڤان خووشك و برایێن مە ئەوە پارێزگاریێ ژ مافێن دەستووری یێن هەرێما كوردستانێ ل بەغدا بكەن ئەڤە ئەركێ ئێكێیە و پەیاما ئێكێیە و پێدڤییە پارتی بەرگریكار و پارێزڤانا مافێن خەلكێ كوردستانێ بیت.
پەیاما دویێ بۆ نەحەزێن پارتی بوو دەمێ سەرۆك بارزانی گوتی بەس خوە ب وەستینن چونكە پارتی ب هەوە ناشكێت، ئەم ژی یێن د وێ باوەریێدا كو پارتی ناشكێت چونكە سەرۆك بارزانی سەرۆكێ مەیە، چونكە رێبازا مە یا پڕە ژ قوربانیدانێ و وەستیانا پێشمەرگەیێن قەهرەمان و خوونا شەهیدێن كوردستانێ د رێكا پارتی و بارزانی دا ئەڤ وەلاتە یێ گەهاندیە ڤێ قووناغێ ژ بەر وێ چەندێ هەتا گیانێ شەهیدێن مە دگەل مەدایە و لاڤایێن بنەمالێن شەهیدان و دایكێن شەهیدان د گەل مەدانە هندی ئەڤ جەماوەرێ خۆڕاگر دگەل مەدابیت پارتی چو جاران ناشكێت.
خووشك و برایێن هێژا..
بۆچی ئەڤ هەلبژارتنە بۆمە د گرنگن؟ ئەڤ هەلبژارتنە د گرنگن چونكە كاریگەرییەكا راستەوخوە ل سەر ژیانا مە ل هەرێما كوردستانێ هەی، مەدیت ئەڤ دەمێ بۆری چەند ئاستەنگ بۆمە هاتنە پێش و چەند پلان بەرامبەر هەرێما كوردستانێ گێران بۆ وێ چەندێ ئەم سەركەفتی نەبین سەرەرای ڤان هەموو پیلان و قەیرانان نەتنێ ئەم رانەوەستیان بەلكو ئەم بەر ب پێشڤە چووین، بەلێ گرنگە ئەو جهێن كو پیلان دژی خەلكێ كوردستانێ دهێنە گێران ئەو جهێ كو مافێ دەستووریێ خەلكێ كوردستانێ دهێتە بنپێكرن ئەم پشكەكێ شەڕێ خوە ڤەگوهێزینە وێ مەیدانێ و ئەو میدان ئەڤرۆ جڤاتا نوونەرێن ئیراقێیە ژ بەر ڤێ چەندێ پێدڤییە ئەڤ خووشك و برایێن پیشمەرگە ڤی شەڕی بۆمە ل جڤاتا نوونەرێن ئیراقێ بكەین، خەلكێ دی شانازیێ ب وێ چەندێ دكەت كو نەهێلایە بەرنامەیێ حوكمەتا هەرێما كوردستانێ بەر ب پێشڤە بچیت و شانازیێ ب وێ چەندێ دكەن كو ب هێزبووینە ل مەیدانێن دی، بەلێ ئەم شانازیێ ب وێ چەندێ دكەین كو د مەیدانا هەرێما كوردستانێدا ئەم هەموو دەمان د خزمەتا مللەتێ خوەدا بووین و چو جاران مە (موسامەوە) ل سەر مافێ مللەتێ خوە نەكریە و گەلەك یا گرنگە ئەو جهێ كو پێدڤییە بەرگری ژ مافێن دەستووری بهێتە كرن و هەموو خالێن دەستووری بهێنە بجهئینان هەبوونەكا ب هێز مە هەبیت و پشكدارییەكا ب هێز مە هەبیت بۆ وێ چەندێ نەهێلین هیچ كەسەك هەر بیر و باوەرەكا هەبیت بۆ دژایەتییا هەرێمێ پێچێنەبیت پلانێن خوە سەربێخیت، هەكە هزرا خوە تێدا بكەن گەلەك جاران بەرنامە و پلان هەبوون بۆ وێ چەندێ نەهێلن هەرێما كوردستانێ ب مافێن خوە یێن دەستووری شاد ببیت یان بەر ب پێشڤە بچیت، مە گەلەك بەرنامە هەبوون و گەلەك جاران ژی ئەم تێدا یێن سەركەفتین، بەلێ شیانێن مە و هەموو هێزا مە گەلەك جارا پشكەك بۆ وێ چەندێ بوو ئەم خزمەتا هەوە بكەین و پشكەك بۆ وێ چەندێ بوویە بەرامبەر ڤان پلان و ڤان بەرنامەیێن كو دژی هەوە هاتینە دانان راوەستین، هەكە ل وێرێ ئەڤ بیاڤە هەبا ئەم بشێین ل وێرێ د سەركەفتی بین و ب هێز بین بێگومان هەموو هێز و وەزیا مە دا بۆ خزمەتكرنا كوردستانێ بن و كوردستان چەند پێشكەفتییە دا دوجاركی پێشكەڤیت.
گەلەك خالێن دەستووری یێن هەین هێشتا نەهاتینە بجهئینان، كێشەیا مە كێشەیا مووچەی نینە، بەلكو كێشەیا مە كێشەیا ناسنامەیا نەتەوەیییە و یا ئاخێیە یا كیانێ كوردستانێیە، یا مافێ خەلكێ كوردستانێیە، یا پێكڤەژیانێیە، یا هەموو ئایین و نەتەوەیێن جودایە د ڤی وەلاتیدا كو ئەم ب شانازیڤە دشێین بێژین ئەڤرۆ كوردستان نموونەیا پێكڤەژیانا هەموو نەتەوە و ئایینایە.
هەكە پارتی دیموكراتی كوردستان ل جڤاتا نوونەرێن ئیراقێ یا ب هێز بیت بێگومان دێ پێچێبیت كاریگەرییەكا مەزن ل داڕێشتنا قانوونان هەبیت و رێگریێ بكەت ل پلانێن دژی هەرێمێ هەین هەرچەندە مە بەری نوكە ژی ئەم د وێ باوەریێ دابووین كو ئیراقەكا فیدرالی دێ زێدەتر خزمەتا هەرێما كوردستانێ كەت بەلێ ب مخابنیڤە گەلەك كەس یێن هەین باوەری ب فیدرالییەتێ نەبوویە و گەلەك بەندێن دەستووری ژی د دەستوورێ ئیراقێدا نەهاتنە بجهئینان د ڤێت ئەم ل سەر وان خالان راوەستین و بەری هەموو تشتەكی بزاڤەكا جدی بكەین بابەتێ كیانێ كوردستانێ مسۆگەر بكەین و رێ نەدەین كەسەك هزر بكەت بهۆستەك وەلاتێ مە ببەت، بابەتێ دی پرسا شایستە و بابەتێ داراییێ هەرێما كوردستانێیە كو ب مخابنیڤە مە دیت ئەڤ چەند سالە وەك كارتەك دژی هەرێما كوردستانێ دهێتە بكارئینان ئەوژی ژبەر وێ چەندێ چونكە هەبوونا مە ل بەغدا وەسا یا ب هێز نەبوویە، ئەم د وێ باوەریێدا بووین دەستوور دێ هێتە بجهئینان بەلێ ب مخابنیڤە نە دەستوور هاتە بجهئینان و نە كەسەك ژی ل وێرێ بوو بشێت ل شوونا مە پارێزگاریێ ل مافێن مە بكەت ژبەر ڤێ چەندێ دڤێت ئەم زەند و باسكا هەلدەین و بچین جارەكادی پارێزگاریێ ل مافێن خوە بكەین، هەكە بەغدا و حوكمەتا فیدرالی یا پشتەڤان بیت و هەموو پێگیریێن خوە یێن دەستووری بەرامبەر هەرێما كوردستانێ بجهبینیت باوەركەن كوردستانێ دێ گەلەك چیتە قووناغێن سەركەفتی، ل دەمێ بۆری گەلەك كەسان باوەر نەدكر مە ئەڤ دەستكەفتە ژی هەبن، گەلەك رێگری هاتنە كرن چ ل ناڤخوە و چ ل دەرڤە ، پلان هاتنە گێران، ئەو بەرنامەیێن مە هەبوون بۆ خزمەتكرنا خەلكێ كوردستانێ بهێنە راگرتن و نەهێلن ئەم سەركەڤین، كەسێ باوەر نەدكر ئەم بشێین ڤان ئاستەنگان دەرباز بكەین و ڤان خەونان بكەینە راستی، مادەم هەتا نوكە ئەم د سەركەفتی بووین ژ ڤێرێ و وێڤە هیڤییا من گەلەك زێدەترە كو دێ سەركەفتنێن زێدەتر و پێشكەفتنێن زێدەتر بدەستڤەینین، ل ڤێرێ مە گەلەك پرۆژە هەبوون دخوازم هندەكا بۆ هەوە باس بكەم چونكە گەلەك یا گرنگە دەمێ هوون دچن دگەل خەلكەكی د ئاخڤن و داخواز دكەن دەنگێ خوە بدەنە بەربژارێن پارتی دیموكراتی كوردستان بێگومان دێ پرسیاركەن بۆچی پارتی دیموكراتی كوردستان و چو ئالییەكێ دی نە؟ ئەڤ پرسیارە مە ژی ژ وەلاتییان یا هەی بۆچی پارتی و بۆچی چو ئالییەكێ دی نە؟ بنێرنێ كا پارتی بۆ هەوە چ كریە و بنێرن كا خەلكێ دی ژی بۆ هەوە چ كریە، ئەڤەیە بەرسڤا مە بۆ وی خەلكێ هێشتا گومان هەبن ل سەر وێ چەندێ كا دێ چاوان بەربژارێن خوە هەلبژێرن، بنێرنێ دەمێ رۆژێن تەنگاڤییاندا پارتی ل سەنگەرێن بەراهیێ یێن بەرگریێ بوو، سەنگەرێن پێشمەرگەی د پڕ بوون ژ ئەندام و سەركردەیێن پارتی و پێشمەرگەیێن پارتی بەرگری ژ ئاخا كوردستانێ دكر و ل كەرامەتا مللەتێ مە دكر، ئەڤرۆ ژی پارتی سەركێشا كاروانێ ئاڤەدانیێیە، ژبەر ڤێ چەندێ پێدڤییە پارتی بهێتە هەلبژارتن ژ ئالیێ خەلكێ كوردستانێڤە وباوەرییا خەلكێ كوردستانێ بۆ پارتی بیت چونكە د خوەشیێ و نەخوەشیێدا هەموو دەمان پارتی دگەل خەلكێ خوە دا بوو و چو جاران خەلكێ خوە بجه نەهێلایە.
بلا خەلكێ مە پرسیارا ئالیێن دی بكەت و هەر كەسەك یێ ئازادە بۆ خوە بانگەشەیا هەلبژارتنان بكەت و هەر كەسەكێ ئازادە باسێ بیر و بۆچوونێن خوە بكەت، باسێ بەرنامەیێ خوە یێ هەلبژارتنان بكەت، باسێ پاشەڕۆژا وەلاتێ خوە بكەت، بەلێ ئایا سۆزدان تنێ بەسە؟ یان پێدڤییە ئەم هەلسەنگاندنێ و بڕیارێ ل سەر كار و كریارێن ڤان ئالییان بدەین، پارتی ناهێت سۆزا بدەتە خەلكێ كوردستانێ و بێژیت دەنگێ بدەنە من چونكە فلان رۆژی دێ بۆ هەوە ڤی تشتی كەم یان دێ بۆ هەوە ڤی دەستكەفتی بدەستڤەئینم، پارتی هند دەستكەفت یێن هەین كو بچیت ب سەرباندی بێژیتە خەلكی من ئەڤ هەموو دەستكەفتە بۆ هەوە هەبوون و ئەز دخوازم ب پشتەڤانییا هەوە هەموویان دەستكەفتێن زێدەتر ژی بۆ وەلاتی بدەستڤەبینیت، ئەو دیرۆكا پارتی هەی و ئەو خزمەتا پارتی كری و ئەو شەهیدێن پارتی داین و ئەو زەحمەتا پارتی كێشای هیچ ئالییەكی دی ل كوردستانێ نینە بشێت ململانێیا پارتی بكەت، دبیت خەلكەكی پێشبینیێن دی هەبن، بەلێ باوەر بكەن پارتی ناهێتە قیاسكرن ب هیچ ئالییەكی، دەستكەفتێن پارتی ناهێنە قیاسكرن دگەل هیچ ئالییەكی، دلسۆزییا پارتی و وەفادارییا پارتی ژی بۆ ئاخ و خەلكێ كوردستانێ دگەل ئالییەكی ناهێتە قیاسكرن.
مە ل ڤێرێ بەرنامە د دانان چاوا خزمەتا خەلكێ كوردستانێ بكەین و ئالیێن دی بەرنامە د دانان چاوا نەهێلن ئەم خزمەتا خەلكێ كوردستانێ بكەین، جوداهییا مە و وان ئەڤەیە ئەم یێن د خزمەتا هەوە دا و ئەو رێگر بوون ئەم خزمەتا هەوە بكەین جوداهییا مە ئەڤەیە.
ب سەربلندیڤە دەمێ هوون دچن داخواز دەنگێن خەلكێ كوردستانێ دكەن بێژنێ دەنگی بدەنە مە چونكە مە سینگێ خوە كریە قەلغان بۆ هەوە ژبۆ وێ چەندێ شەرەف و كەرامەتا مللەتێ خوە بپارێزین، بێژنێ دەنگی بدەنە مە چونكی ئەم ئەو كەس بووینە یێن كو هەموو دەمام بەرامبەری دوژمنێن ڤی وەلاتی ئەم راوەستیاینە، دەنگی بدەنە مە چونكە مە باوەرییا ب پاشەڕۆژا ڤی مللەتی هەی و ئەو تشتی هەتا نوكە مە ئەنجامدای پێنگاڤێن دەستپێكینە بۆ دەستكەفتێن گەلەك زێدەتر.
راستە حوكمەتا هەرێما كوردستانێیە بەلێ سەركردایەتییا ڤێ حوكمەتێ ژ ئالیێ پارتی دیموكراتی كوردستان بوویە، شانازییا حوكمەتێ بۆ هەموو خەكێ كوردستانێیە، بەلێ شانازییا پارتی زێدەترە چونكە سەركێشییا ڤێ حوكمەتێ و ئەجیندایێن ڤێ حوكمەتێ ژ ئالیێ پارتیڤە هاتیە دانان و هاتییە بجهئینان، ژ بەرڤێ چەندێ مەزنترین دەستكەفتا ڤێ حوكمەتێ جارەكادی بۆ پارتی دزڤریت و دڤێت هوون هەموو د سەربلند بن و شانازیێ ب وێ چەندێ بكەن كو ئەڤ حوكمەتە حوكمەتا هەوە بوویە و ئەڤ دەستكەفتێن ڤێ حوكمەتێ بدەستڤەئیناین ئەنجامێ پشتەڤانی و دەنگێن هەوەبوویە.
ئەم وەك هەرێما كوردستانێ هەتا نوكە مە تنێ 5% ژ داهاتێ ئیراقێ د دەستدابوو، ئەو بودجەیا كو حوكمەتا ئیراقێ دانای و ئەو هووردەكاریێن چوویە دناڤدا ل ئەنجامێ دووماهیێ تنێ 5% ژ بودجەیا گشتییا ئیراقێ بۆ هەرێما كوردستانێ هاتیە و ئەو پێشكەفتنا نوكە د كوردستانێدا هەی هەرچەندە رێژەیا ئاكنجیێن هەرێما كوردستانێ نوكە ل دووڤ ئامارێن ل ڤێ جووماهیێ هاتینە كرن 14% یە، ئانكو 14% ئاكنجی و 5% داهات، ئەڤ دەستكەفتێن نوكە ل هەرێما كوردستانێ هەین 5% ژ داهاتێ ئیراقێ بۆ رێەیا 14% ژ ئاكنجیێن ئیراقێ هەبوویە، بەرامبەر وێ 86% ئاكنجیێن هەموو ئیراقێ 95% ژ داهاتێ ئیراقێ ل بەردەست بوو بلا بهێن بەراورد بكەن كا ئەو پێشكەفتنێن ل هەرێما كوردستانێ هەین یان هەر باژێرەكێ دی یێ ئیراقێ بلا بنێرنێ كا پێشكەفتنا هەرێما كوردستانێ ل چ ئاستە و پێشكەفتنا باژێرێن دی ل چ ئاستە.
مە گەلەك بزاڤ كرینە كو خەلكێ مە یێ ئاسوودە بیت هندەك ماف گەلەك د سەرەتایی نە بۆ خەلكێ هەرێما كوردستانێ ئێك ژوان كارەبایە، كێشەیا 30 سالان كو هەموو ئیراق تێدا دنالیت و نەهاتیە چارەسەركرن مە ل سالا 2023 بڕیاردا و ب دروستی ل سالا 2024 دەست هاڤێتە بەرنامەیێ (رۆناهی) بۆ وێ چەندێ كارەبایا هەرێما كوردستانێ بكەینە 24 ساتی، سوپاس بۆ خودای نوكە سەنتەرێن هەموو باژێرێن مە یێن مەزن ل هەر چار پارێزگەهێن دهۆكێ، هەولێرێ، سلێمانیێ و هەموو پارێزگەها هەلەبجە بوویە كارەبایا 24 ساتی و هەكە خودا حەز بكەت بۆ سالا داهاتی 2026 هەموو كوردستان دێ بیتە كارەبایا 24 ساتی، ئەڤە ئێك ژ وان خالان بوو یێن گەلەك كەسان گومان هەبوو كو ئەم بشێین تێدا ب سەركەڤین، بەلێ ئیرادەیەكا ب هێز یا خووشك و برایێن هەوە ئەم شیاین ڤی بەرنامەی بكەینە راستی و ئەم د بەرهەڤین ئەزموونا خوە بێخینە د خزمەتا هەموو ئیراقێدا و هەكە وان بڤێت ئەم د بەرهەڤین هاریكارییا هەموو ئیراقێ ژی بكەین.
خالەكا دی بابەتێ دروستكرنا بەنداڤانە بۆ وێ چەندێ ئاڤا بارانێ ب هەروە نەچیت و چەندین بەنداڤ ل سەرانسەری كوردستانێ مە یێن دروستكرین هیڤیدارم د بەردەوام بین دا بكەڤنە د خزمەتا جوتیار و خەلكێ كوردستانێدا، مفایێ ڤان بەنداڤان هەم بۆ هەوای و هەم بۆ خزمەتا چاندنێ و هەم بۆ رێكخستنا بیرێن ئاڤێ یێن بن ئەرد گەلەك یا گرنگ بوو.
ژ بلی ڤان تشتان پڕۆەیێن گەلەك مەزن یێن ئاڤێ بۆ گەهاندنا وێ بۆ باژێرا دیسان پشكەكا مەزن ژ وان پڕۆژیان یێن ب دووماهی هاتین و هندەكێن دی یێن د وارێ بجهئینانێدا.ئەڤ پرۆژەیێ مەزن یێ بۆ هەولێرێ هاتیە بجهئینان د دەمێ 12 مەهاندا كەسێ باوەر نەدكر ئەم دێ بجهئینین ئەوژی پرۆژەیێ ئاڤێ بۆ ئاكرێ و بەردەرەش و بۆ سلێمانیێ و چەمچەمال و بۆ هەر جهەكێ پێدڤی بیت ئەڤە ژی د بەرنامەیێ حوكمەتا هەرێما كوردستانێ دا كو پرسا ئاڤێ ل هیچ باژێرەكێ كوردستانێ نەمینیت و ئەڤە ژی دەستكەفتەكێ دی یە كو بەرنامەیێ ڤێ حوكمەتێ كو دیسان ژی دبێژم ژ ئالیێ پارتیڤە دهێتە بڕێڤەبرن ویێ هاتیە بجهئینان و كەفتییە د خزمەتا خەلكێ كوردستانێدا. بابەتێ دێ ئەوژی بابەتێ دروستكرنا رێ و پرانە ئەو رێ و پرێن نوكە ل هەرێما كوردستانێ هەین نابێژم هەموو یێن تمام بووین بەلێ رێژەیەكا مەزن رێیێن مە گەلەك یێن باشتر بووین و سەبارەت روودانێن ترۆمبێلان یێن كێمتر بووین ومرن و زەحمەت و ئازارا دگەهشتە خەلكێ كوردستانێ دیسا یا كێمبتر بووی و ئەڤە دیسا دەستكەفتە و دێت هوون ڤان تشتان بكاربینن د بانگەشەیا هەلبژارتناندا و بێژنێ ئەڤە ئەو تشتن یێن مە ئەنجامداین و هێشتا مە بەرنامە یێن هەین و دێ باشتر ژ ڤان ئەنجامدەین بێی جوداهی ل هەموو جهان ژی ئەڤ پرۆژە یێن هاتینە بجهئینان ب شەر ئاستێ هەموو كوردستانێ و ل سەر ئاستێ هەموو پارێزگەهان.
بابەتێ هەژمارا من یان چێكرنا سیستەمەكێ بانكی یان یێ دەزگەهێ دارایی ل سەر ستانداردەكا نێڤدەولەتی بۆ كوردستانێ ئەڤە ژی پشكەكا دی بوویە ژ دەرئەنجام و دەستكەفتێن ڤێ حوكمەتێ و پارتی. ئێك ژ تشتێن دبیت نەهێتە دیتن چێكرنا ژێرخانەیا ئابۆری بوویە و مە گەلەك ب رژدی كار ل سەر كریە و ئەڤە دێ بیتە وەرچەرخانەك بۆ پێشئێخستنا ژێرخانەیا ئابۆرییا هەرێما كوردستانێ ب شێوەیەكێ گشتی، هەروەسا دیجیتالكرنا بەرنامەیێن خزمەتگوزاریێن حوكمەتێ دا زێدەتر بشێین خزمەتا وەلاتییان بكەین و زەحمەتا وان كێمتر بكەین و دەمێ بڕێڤەبرنا كارێن وان كێمتر بكەین و رۆتینیاتان كێمتر بكەین و پێنگاڤێن گەلەك باش یێن هاتینە هاڤێتن، خزمەتێن دیجیتالێ یێن گەلەك باش هاتینە كرن ئێك ژوان بابەتێ پەروەردەیێیە و باشتركرنا ئاستێ كەرتێ ساخلەمیێ ل هەرێما كوردستانێ مە نوشدارێن گەلەك باش هەنە بەلێ مخابن شیانێن ل بەردەستێن وان یان جهێ كارێ وان دبیت د ئاستێ خواندنا وان یان شیانێن وان نەبیت، حوكمەتا هەرێمێ ب كێم شیانێن خوە گەلەك بزاڤكریە كەرتێ ساخلەمیێ ژی كارەكێ جدی تێدا بكەت.
ئەڤ هەموو دەستكەفتە هەر هوسا نەهاتینە بەلكو خەلكەكی خوە پێڤە وەستاندییە، ب شەڤ و رۆژ بەرنامە هەبوو ئەم نەگەهینە ڤێ قووناغی و بەرنامە هەبوو رێگری ل مە بهێتە كرن دا چ جاران بەراوردا هەرێمێ ل گەل چ جهێن دی نەهێتە كرن، بەلێ سەرەرای ڤێ چەندێ ئەم گەلەك د رژد بووین كو پێدڤییە ئەم بەر ب پێشڤە بچین.
ئەڤ تشتێ هاتیە كرن دەستكەفتە دەمێ هوون ل گەل خەلكی د ئاخڤن ڤان تشتان بێژنە خەلكی و بیژنێ رێگری ل مە هاتە كرن بەلێ ئەڤ تشتە هەموو مە ئەنجامدان و ئەوێن نوكە داخواز دەنگێن هەوە دكەن هەر ئەوبوون یێن نەدهێلا ئەم ڤان دەستكەفتان بجهبینین و هەڤپەیمانی دروستكرن و داخواز ژ حوكمەتا فیدرالی دكر رێ نەدەن هەرێما كوردستانێ بەر ب پێشڤە بچیت چونكە وان ژی ئەو قەناعەتا هەی كو پێشكەفتنا هەرێما كوردستانێ دزڤریت بۆ پارتی و هەتا ئالیێن كوردستانی دلێ وان ب سەركەفتن و پێشكەفتنا كوردستانێ یێ خوەش نینە چونكە ئەوژی دزانن كوردستانێ ئانكو پارتی و پارتی ئانكو كوردستان. مادەم ناڤێ پارتی و كوردستانێ ژ ئێك ناهێتە جوداكرن هوون بۆچی دەنگێن خوە د فەوتینن و ب هەروە دبەن هوون بۆچی ب دووڤ بیروباوەرەكێ یان مەنهەجەكی دكەڤن كو هوون ژی دزانن نە چو پاشەڕۆژ هەیە و نە مەبەستا وان خزمەتكرنا خەلكێ كوردستانێیە فەرموون ئەڤە حزب هەوە دەنگێن خوە بدەنێ دا ئەوژی زێدەتر خزمەتا هەوە بكەت.
دخوازم وێ هزری نەكەن كو ئەڤە هەلبژارتنێن بەغدانە و د گرنگ نینن بۆمە، بەلێ بۆمە د گرنگن چونكە ئەو ئاستنەگێن ل وێرێ بۆمە دهێنە چێكرن رێگریێ ل پێشكەفتنا كوردستانێ دكەن، نابیت بیاڤ هەبیت ل وێرێ رێگری بهێتە كرن، دڤیا خەلكەكێ بهێز نوكە ل جڤاتا نوونەرێن ئیراقێ بیت بۆ وێ چەندێ رێخوەش ببیت هەماهنگییەكا باشتر د ناڤبەرا بەغدا و هەولێرێ هەبیت و دەستوور وەك خوە بهێتە بجهئینان و هەموو مافێن خەلكێ كوردستانێ ژی بهێنە مسۆگەركرن وێ دەمی دێ بینن كا پێشكەفتنا كوردستانێ دێ چەند زێدەتر بیت. شەڕێ مە نە تنێ ل هەرێما كوردستانێیە بەلكو شەڕێ مە ل بەغدایێ ژییە و پێدڤییە ئەم وێ بكەین یا كو خێرا ڤی مللەتی تێدا.
هیڤییا من ئەوە سەرەدانا هەموو مالێن دهۆكێ و باژێرێن دی و گوندان بكەن و بێژنە خەلكێ ئەم حەز دكەین پشتەڤان بن و دەنگێن خوە بدەنە مە دا ئەم زێدەتر خزمەتا هەوە بكەین و یا ل سەر مە خزمەتكرنە و داخوازا مە ژ خەلكی دەنگێن وانە.

سەرۆک مەسعود بارزانی دوهى دوشەمبی 13ی چریا ئێكێ 2025ێ، پێشوازی ل جەنەرال دەیڤد پێتریۆس سەرۆکێ پێشتر یێ دەزگەهێ هەواڵگرییا ئەمریکا (سی ئای ئەی) کر.
جەنەراڵ دەیڤد پێتریۆس خۆشحاڵییا خۆ ب دوبارە دیتنا سەرۆک بارزانی نیشاندا و گۆت: دووماهی جار من سەرۆک بارزانی دیتی ل بەرەیێن شەری بوو ل سحێلا ل سالا 2016 ێ” هەروەسا ستایشا ڕۆلی بەرچاڤێ سەرۆک بارزانی و هەرێما کوردستانێ کر” ژ پێخەمەتی پاراستنا سەقامگیری و ئاسایشا هەرێما کوردستانێ و عێراقێ و دەڤەرێ و ژ پێخەمەتی ب دەستڤەئینانا ئارامی و دیموکراسی و پێکڤەژیانێ، ڕووبروو ئەوان گرۆپ و رێکخراوێن تیرۆرستی بوون” كو پشتی سالا 2003 ێ” ل عێراقێ سەرهلدا و بوونە گەفێن راستەقینە بۆ سەر هەموو دەڤەرێ و جیهانێ.
سەرۆک بارزانی بخێرهاتنا جەنەرال دەیڤد پێتریۆس کر و هەروەسا سوپاسییا هێزێن هەڤپەیمانان و ئەمریکا کر کو ڕۆلەكێ بەرچاڤ هەبوو د پڕۆسا ئازادکرنا عێراقێ دا ژ دیکتاتۆرییەتێ و لدووڤدا پشتەڤانیا وان بۆ هێزێن پێشمەرگەیی و هێزێن ئەمنیێن عێراقێ ژ پێخەمەت بەرهنگاربوونا تیرۆرێ و پاراستنا سەقامگیرییا عێراقێ و هەرێما کوردستانێ.
سەرۆک بارزانی تەكەزی ل سەر بجهئینانا بڕگێن دەستوورێ هەمیشەیێ عێراقێ کر كو رێیا چارەیا ئێکجارییە بۆ رزگاربوونا عێراقێ ژ وان تەنگەژەیێن سیاسی و هیڤی خواست هەموو لایەنێن سیاسی پێکڤە لدووڤ چارەسەرییا گرفتان رابن و دەستان ژ تۆلڤەكرنێ و ڕق و کینا بەرامبەر ئێك بەردەن” هەروەسا سەرۆک بارزانی رەشنڤیسێ یاسایێ نەفت و گازێ یێ سالا 2007 ێ” وەكو نموونە ئینا و” هەكە ل وی دەمی هاتبا پەسەندكرن و بجهئینان، نوكە چ گرفتێن یاسایی دەربارەیی نەفت و گازێ نەبوون” تەكەزی ل سەر داوی رێککەڤتنا دناڤبەرا حکومەتا هەرێما کوردستانێ و حکومەتا فیدڕالییا عێراقێ کر” دەربارەیی نەفت و گازێ و ب ئەرێنی وەسفکر و هیڤی خواست ئەڤ رێککەڤتنە ببیتە بناغەک بۆ چارەسەرییا هەموو کێشان.

مەسرور بارزانی، سەرۆکێ حوکمەتا هەرێما کوردستانێ، د ئاهەنگا خولا 30ێ یا دەرچوویێن زانکۆیا دهۆک ڕاگەهاند: «ئەز گەلەک دلخۆشم کو ئەز د گەل هەوە مە د ڤێ ڕۆژا خۆش دا. پیرۆزباهیێ ل هەموو قوتابیێن خۆشتڤی دکەم. سەرکەفتنا هەوە، بەرپرسیاریەکا مەزن دئێخیتە سەر ملێن هەوە پشتی هوون ڤەدگەڕنە ناڤ جڤاکى.»
ڕۆژا دوشەمبی 13-10-2025، مەسرور بارزانی، سەرۆکێ حوکمەتا هەرێما کوردستانێ د ئاهەنگا خولا 30ێ یا دەرچوویێن زانکۆیا دهۆک دا، وێڕای پیرۆزباهی کرنێ ل قوتابیێن دەرچوویێن خولێ، دووپات کر کو سەرکەفتنا قوتابیان، بەرپرسیاریەکا مەزن دئێخیتە سەر ملێن وان پشتی ڤەدگەڕنە ناڤ جڤاکى دا، و گۆت: «بەردەوام بن ل سەر خواندنا زێدەتر. هندەکێن دی ژ هەوە دێ هێنە ناڤ جڤاکێ و دێ بنە کەسێن کاریگەر د سیاسەتا وەلاتێ خۆ دا، د ئاڤاکرنا وەلاتێ خۆ دا.»
سەرۆکێ حوکمەتا هەرێما کوردستانێ گۆت: «ئەم شانازیێ ب هەوە دکەین. چاڤێن مە ل هەوە نە. هوون هیڤی و ئومێدا پاشەڕۆژێ نە. سوباهی دێ بنە ئەو سەرکردە کو ئەم هەموو چاڤەڕێی نە وەلات بکەڤیتە دەستێن هەوە و ڕۆژ ب ڕۆژ بەرەڤ پێشڤە ببەن.»
مەسرور بارزانی گۆت: «د جهێ خۆ دایە گەلەک سوپاسیا مامۆستایێن هێژا بکەم سەرەڕای زەحمەتییا ژیانێ و وان هەموو ئاستەنگ و کێشە و گرفت و بەربەستێن بۆ وان هاتینە دروست کرن ژ لایێ ژیانێ ڤە، دیسان بەردەوام بوون ل پرۆسەیا خواندنێ هەوە نەهێلا قوتابى بێ بەهر بن ژ خواندنا خۆ. هوون جهێ شانازییا مە نە، جهێ ڕێز و پێزانینا مە نە. بەردەوام بن ل خواندنا خۆ، ئەم ژی دێ بەردەوام بین ل خزمەتکرنا هەوە، هیڤیدارین ڕۆژەکێ قەرەبوویا زەحمەتییا هەوە بکەینەڤە.»
سەرۆکێ حوکمەتا هەرێما کوردستانێ سوپاسیا دایک و بابێن قوتابیێن دەرچوویی کر کو سەرەڕای زەحمەتییێن ژیانێ، وان نەهێلا ڕۆلێن وان بێ بەهرە بن ژ خواندنا خۆ و هەموو پشتەڤانییا خۆ بۆ مسۆگەرکرنا پاشەڕۆژا وان. ب دابینکرنا پاشەڕۆژا وان، پاشەڕۆژا کوردستانێ بجهـ دئێت.
مەسرور بارزانی سوپاسیا پێشمەرگەیى و هێزێن ئاسایشێ کر کو بەردەوامن ل پاراستنا هەرێما کوردستانێ بۆ هندێ کو ڤێ زانکۆیێ و زانکۆیێن دی ژی ل هەرێما کوردستانێ بەردەوام بن ل فێرکرنا قوتابیان و نەوەیەکا نوو. خەبات و ماندووبوونا پێشمەرگەیى و هێزێن ئاسایشێ جهێ ڕێز و پێزانینێ یە.

هۆشەنگ تاجر:

هژمارەک ژ چاڤدێرێن سیاسی یێن کورد دیار دکەن، نها ل رۆژهەلاتا ناڤین گوهۆڕینێن مەزن روو ددەن، ل بەغدا ژی پیلان ل دژی هەرێما کوردستانێ دهێنە گێران و کار بۆ نەهێلانا قەوارێ هەرێما کوردستانێ دهێنە کرن، گرنگە پارتی ب هێزەکا مەزنڤە بچیتە بەغدا.

حەسەن خالدی چاڤدێرێ سیاسی یێ رۆژهەلاتێ کوردستانێ دیار کر، چاڤێ هەموو کوردان ل هەرێما کوردستانێ یە، کورد ل هەموو جیهانێ چاڤەرێ نە کو ل هەرێما کوردستانێ رەوشا کوردان گەلەک باش ببیت و کورد ل ئیراقێ ببنە هێزەکا گەلەک مەزن و کاریگەر، مخابن د چەند سالێن بۆری دا گەلەک پیلان ل دژی هەرێما کوردستانێ هاتنە گێران و کار بۆ نەهێلانا قەوارێ هەرێما کوردستانێ هاتە کرن، جهێ داخێ یە هندەک کەس ل هەرێما کوردستانێ بۆ بەرژەوەندیێن خوە یێن تەنگ پشتەڤانی ل پیلانێن دوژمنێن کوردستانێ کرن، لێ پارتی شیا گەلەک پیلانێن ل دژی کوردان ژناڤ ببەت، گرنگە د رەوشا نها یا هەستیار دا کورد پشتەڤانیێ ل لیستا پارتی دیموکراتی کوردستان بکەن دا دەستکەفتیێن هەی بهێنە پاراستن و پیلانێن ل دژی هەرێما کورستانێ ژی بهێنە ژناڤبرن.
ئیبراهیم باران چاڤدێرێ سیاسی یێ باکورێ کوردستانێ ژی دیار کر، پارتی دیموکراتی کوردستان تنێ هێزا نەتەوەیی یە ل کوردستانێ کو د هەموو قووناغێن خەباتا خوە دا بەرگری ل مافێن رەوا یێن گەلێ کوردستانێ کریە، نها پارتی نە تنێ ل هەرێما کوردستانێ بەلکو ل پارچەیێن دی یێن کوردستانێ ژی بوویە هیڤیەکا مەزن بۆ هەموو کوردان، ژ بەر ڤێ یەکێ ژی کورد ل باکورێ کوردستانێ چاڤەرێنە لیستا ٢٧٥ یا پارتی د ڤان هەلبژارتنان دا سەرکەفتنەکا گەلەک مەزن بدەستڤە بینیت، ئەم دزانین ل بەغدا تنێ حساب بۆ پارتی دهێتە کرن، هێزێن دی د چەند سالێن بۆری دا سەلماندن کو وان چو بەرنامە بۆ پاشەرۆژا کوردستانێ نینن، ژ بەر ڤێ یەکێ ژی ئەم پشتەڤانیێ ل لیستا سەرۆک بارزانی دکەین و مە هەموویان دڤێت لیستا پارتی دیموکراتی کوردستان سەرکەفتنەکا مەزن بدەستڤە بینیت.
ل ئالیێ دی گەلەک ژ چاڤدێرێن سیاسی یێن کورد ب رێیا تۆرێن جڤاکی پشتەڤانیا خوە بۆ لیستا پارتی دیموکراتی کوردستان دیار دکەن و داخواز دکەن وەلاتیێن هەرێما کوردستانێ دەنگێ خوە بدەنە لیستا ٢٧٥ دا هەم قەوارێ هەرێما کوردستانێ یا پاراستی بیت و هەم ژی پێگەهێ کوردان ل بەغدا بهێز بیت.

دوهی ئێكشەمبی 12/10/2025، ب بەرهەڤبوونا سەرۆك بارزانی و جێگرێن سەرۆكێ پارتی، بانگەشەیا فەرمییا پارتی دیموكراتی كوردستانێ بۆ پشكداریێ د هەلبژارتنێن خولا شەشێ یا جڤاتا نوونەرێن ئیراقێ ل هەولێرێ دەستپێكر.
بانگەشەیا پارتی ل هۆلا سەعد عەبدوللا بڕێڤەچوو، ژ بلی بەربژارێن پارتی بۆ هەلبژارتنێن خولا شەشێ یا جڤاتا نوونەرێن ئیراقێ، ئەندامێن سەركردایەتیێ و مەكتەبا سیاسی یا پارتی بەرهەڤی كەرنەڤالێ جەماوەری بۆ پشتەڤانییا لیستا 275 یا پارتی دیموكراتی كوردستان بوون.
سەرۆك بارزانی د چارچۆڤەیێ رێوڕەسمێ بانگەشەیا فەرمی یا پارتیدا پەیڤەك پێشكێشكر ئەڤە دەقێ وێ یە:
خوە گەلەك ب بەختەوەر دزانم ئەڤرۆ ل گەل هەوە كۆم دبم بۆ بانگەشەیا هەلبژارتنێن خولا شەشێ یا یا جڤاتا نوونەرێن ئیراقێ.
هەموو هەلبژارتن د گرنگن، ژ بەر وێ چەندێ نەشێم بێژم ئەڤ هەلبژارتنە گەلەك د گرنگن، هەر هەلبژارتنەك د رەوشەكا جودا دا دهێت.
من گوهلێبوویە كو پشكەكا مەزن ژ خووشك و برایێن ئەرەب و توركمان د چارچۆڤەیێ لیستا 275 پارتیدانە، لەوما دخوازم خوەشحالییا مەزن یا خوە دەرببڕم، ئەو گەشێ هەبوونا وان گەشەیێ ب بنەمایێن حزبێ ددەت و گەشەیێ ب هێزا حزبێ ددەت، نەهجێ راست یێ پارتی دیموكراتی كوردستان نیشا ددەت.
هەبوونا هەوە دناڤ وێ لیستێدا، هێزەكا دی زێدەت دكەت ژ هێزا پارتی دیموكراتی كوردستان، هەوە هەموویان رادسپێرم كو ئێك دەست كار بكەن بۆ بەرگریكرنێ ژ مافێن گەلێ كوردستانێ و مافێ هەر تاكەكێ ئیراقێ، خوە ب نوونەرێن هەموو پارێزگەهێن ئیراقێ نەك تنێ هەرێما كوردستانێ بزانن.
یا گرنگ ئەوە لیست ب سەركەڤیت، هوون هەموو د خوەشتڤی نە، هوون هەموو خووشك و برانە، گرنگ ئەوە لیستا 275 ب سەركەڤیت، هەكە لیست سەربكەڤیت، ئانكو هوون هەموو سەركەفتیبوون، پێدڤییە سەرنجا هەوە ل سەر سەرێخستنا لیستێ بیت، هەر كەسێ ژ هەوە دەربچیت ل روانگەها مە ب رامانا وێ چەندێیە، هوون هەموو د خوەشتڤی نە.
ب پێدڤی دزانم پێچەكێ بزڤرم بۆ دیرۆكێ، دەولەتا ئیراقێ كو هاتیە دامەزراندن پشتی شەڕێ جیهانیێ ئێكێ، ل سەر وی بنەمای هاتە دامەزراندن كورد و ئەرەب هەڤپشكن د ڤی وەلاتیدا، ئەڤە ژی پشتی وێ چەندێ هات، پشتی كو پەیمانا لۆزان و رێككەفتنا سیڤەر تێكچووین، تنێ مافێ بڕیاردانێ ل چارەنڤیسێ خوە كو ئایا ل گەل ئیراقێ بن یان ژی ل گەل توركیا بن، تنێ ب باشوورێ كوردستانێ هاتە دان، ئەوێن دی هاتنە پارچەكرن هەروەك هەموو دەڤەرێ هاتنە پارچەكرن، وی دەمێ كوردێن باشوور دەنگ دا ل گەل دەولەتا ئیراقێ بن، بەلێ ب مەرجەكی كو هەڤپشك بن د حوكمیدا، بەلێ مخابن ئەم نەك هەر نەبووینە هەڤپشك، مافێ وەلاتیبوونێ ژی مە نەبوو، پشتی وێ مە مافێ ژیانێ ژی نەما، هەڤپشكییا كە بوو ئەنفال، كیمیاباران و وێرانكرنا گوندێن مە، گەلەك ژ وێ مخابنتر پشتی سالا 2003 نانێ مال و زارۆیێن وان ئەنفالكری و كیمیابارانكرییان بڕی، ل شوونا قەرەبوویا وان قوربانییان بدەن.
سەرەرای هەموو وێ ستەم و زۆردارییا كو ل خەلكێ كوردستانێ هاتیە كرن، بەلێ مەردانە و سەربلندانە ل مەیدانێ راوەستان و خوە نەچەماند و بەرگرییەكا مەردانە ل ماف و بزاڤێن خوە كرن، د هەر دەلیڤەیەكا كو بۆ ئاشتیێ هاتبیتە پێش ژدەست نەدایە، ل سالێن 1953، 1964، 1966، 1970، 1990، ل هەموو ڤان دیرۆكان دانوستاندن هاتیە كرن بۆ ئاشتیێ، بەلێ د ئەنجامدا مخابن دوبارە شەڕ دەستپێ دكر، چونكە باوەری ب ماف وپێكڤەژیانێ و دیموكراتیێ نەبوو، درووشمێ شۆڕشا ئیلۆنێ ( دیموكراتی بۆ ئیراقێ، ئۆتۆنۆمی بۆ كوردستان) بوو وی دەمی، وی سەدەمی خواندنا پارتی گەلەك یا راست و دروست بوویە، هەكە دیموكراتی ل ئیراقێ نەبیت، نە كورد و نە ئەرەب و نە توركمان و نە هیچ دین و مەزهەبەك نەشێت ب مافێ خوە شاد بیت.
دڤێت دیموكراسییەكا راستەقینە هەبیت، وی دەمی ماف ژی دێ مسۆگەر بن، سەرەرای وان هەموو تاوانێن دژی خەلكێ كوردستانێ هاتینە كرن، بەلێ دەمێ دەلیڤە بۆ خەلكێ كوردستانێ هاتە پێش، مەردانە و مرۆڤدۆستانە رەفتار كر. ل سالا 1991 كو دو فەیلەقێن ئیراقێ رادەست بوون، ئەو دو فەیلەقە بوون كو ئەنفال و وێرانكرنا گوندان ل سەر دەستێ وان بوو، بەلێ ئێك كەس ژی ژ وان نەهاتە ئێشاندن، هەموو هاتنە ئازادكرن، ب كەیفا خوە هەر ئێك ژ وان بڕیارا خوە دا بۆ كیڤە بچیت، ڤێ چەندێ وەكر ئەز ب خوە ل گەلەك جاران شانازیێ ب وێ چەندێ بكەن كو ئێك ژ ژ نەتەوەیی و ڤی مللەتیمە.
دەلیڤەیا زێرێن ل سالا 2003 بوو، سالا 2003 رژێما بەعس ژناڤچوو و دەلیڤەیەكا زێرین بۆ هەموو خەلكێ ئیراقێ هاتە پێش، ئەم ب ئیرادەیەكا پاقژ و ئیرادەیەكا گەلەك ب هێز چووینە بەغدا بۆ وێ چەندێ هەموو پێكڤە ل سەر بنەمایێ( هەڤپشكی، هەڤسەنگی و لهەڤكرن). ئیراقەكا نوو دابمەزرینین. ب هەموو شیانێن خوە مە بزاڤكر ئەڤ ئیراقە بهێتە دروستكرن تا گەهشتە دەستووری ل سالا 2005، كەس هندی مە ب ڤی دەستووریڤە نەوەستیایە، وی دەمی ژی كو زڤریم كوردستانێ، من گوت: سوپاس بۆ خودای دەستوور ب دووماهی هات، راستە نە دەستوورەك بوو كو هەموو خواستێن مە بجهئینابیت یان ژی ب دلێ مە هەموویان بیت، بەلێ هەكە لێنێرینەكا لۆژیكانە بكەین، دەستوورەكێ گەلەك باشە، هەتا ئاسەكێ مەزن مافێن مە مسوگەر دكەت، یێ بێ كێماسی ننیە، بەلێ ئەرێنیێن وی گەلەك زێگەترن ژ نەرێنیێن وی. هەكە ئەڤ دەستوورە هاتبا بجهئینان، ئیراق تووشی گەلەك ژ وان كێشەیان نەدبوو، كەلەك ژ گرفتێن د ناڤبەرا هەرێما كوردستانێ و بەغدایێ دا ژی روو نەدان، مخابن پێگیری پێ نەهاتە كرن.
هەرچەندە ئەو قانوونا نوكە هەلبژارتن ێ پێ هێنە ئەنجامدان نە دادپەروەرانەیە، قانوونەكا وەسا نینە كو مافی بدەتە هەر كەسەكی ل دووڤ قەبارە و سەنگێ خوە، بەلكو هاتیە سنوورداركرن، هەر كەسەك، هەر ئالییەك، هەر حزبەك ژ بەر وێ چەندێ ئومێدەوارین ل هەلبژارتنێن داهاتی ئەو قانوونە بهێتە گوهۆڕی.
نوكە دخوازم بۆ وان كەسێن كو ل بەغدایێ دژی هەرێما كوردستانێ بوون، هەڤڕكی دكر ل سەر وێ چەندێ كی زێدەتر دژایەتییا هەرێمێ دكەت. كی زێدەتر زیانێ دكەت.ب تایبەتی ل ناڤ جڤاتا نوونەران، دئینمە بیرا وان كو چەند بڕگەیەك د دەستووریدا هەنە، بلا وان بڕگەیان بخوونن، وی دەمی دێ زانن ئایا هەرێما كوردستانێ سەرپێچی كریە یان ژی غەدر ل هەرێما كوردستانێ هاتیە كرن؟
ل دیباجەیا دەستووری دا (نحن شعب العراق الذي آلى على نفسه بكل مكوناته وأطيافه ان يقرر بحريته واختياره الاتحاد بنفسه، وأن يتعظ لغده بأمسه، وأن يسن من منظومة القيم والمثل العليا لرسالات السماء ومن مستجدات علم وحضارة الانسان هذا الدستور الدائم. إن الالتزام بهذا الدستور يحفظ للعراق اتحاده الحر شعبا وأرضا وسيادة). . بلا ئەو باش وان بڕگەیان بخوونن و پاشی گازندەیان ژ هەرێمێ بكەن.
مادەیا ئێكێ دبێژیت (العراق دولە اتحادیە)، ئەز ناخوازم بچمە د هووردەكارییاندا، ئیراق دەولەتەكا فیدرالییە نەك دەولەتەكا ناڤەندی، دەولەتا ناڤەندی نەما، پشتی 2003 ب گۆڕەی وی دەستووری و ئەو رێككەفتنا مە ئەنجامدای، دەولەتا ناڤەندی نەمایە، هەر رەفتارەكا ب شێوەیێ دەولەتا ناڤەندی، نەقانوونی و نە دەستوورییە. چ ئەوێن ل جهێن دی یێن ئیراقێ هاتبیتە كرن، چ ئەوێن دژی هەرێما كوردستانێ هاتبیتە كرن.
مادەیا سیێ: (العراق بلد متعدد القومیات واڵادیان والمژاهب)، مە گەلەك ل سەر ڤێ مادەیێ ژی كاركر، رامانا وێ ئەوە ب ئێك پێكهاتە ئیراق ناهێتە بڕێڤەبرن، دڤێت ئەڤە هەمو هەڤپشك بن، دڤێت پێكهاتە هەموو هەڤپشك بن.
گەلەك باسێ وێ چەندێ دهێتە كرن پرسا پەترۆل و غازێ، دیسان ل دۆر ڤێ چەندێ پتر ژ حەفتییەكێ مە دانوستاندن ل سەر وێ مادەیێ كرینە، مادەیا (111) كو دبێژیت: (النفط والغاز هو ملك كل الشعب العراقی فی كل الاقالیم والمحافظات) هیچ ناكۆكییەك مە نینە ل سەر ڤان هەردو مادەیان.
مادەیا (112) دبێژیت: (اولا:- تقوم الحكومە الاتحادیە بإدارە النفط والغاز المستخرج من الحقول الحالیە مع حكومات الاقالیم والمحافظات المنتجە علی ان توزع وارداتها بشكل منصف یتناسب مع التوزیع السكانی فی جمیع انحا‌و البلاد، مع تحدید حصە لمدە محددە لڵاقالیم المتچررە والتی حرمت منها بصورە مجحفە من قبل النظام السابق والتی تچررت بعد ذلك بما یؤمن التنمیە المتوازنە للمناطق المختلفە من البلاد ،وینڤم ژلك بقانون. پانیا:- تقوم الحكومە الاتحادیە وحكومات الاقالیم والمحافڤات المنتجە معا برسم السیاسات الاستراتیجیە اللازمە لتگویر پروە النفگ والغاز بما یحقق اعلی منفعە للشعب العراقی معتمدە احدپ تقنیات مبادئ السوق وتشجیع الاستثمار.) ل ڤێرێ مەبەستا مە ئەوە پەیڤا (معا)، ئێك حەفتیێ گەنگەشە بوول سەر وێ چەندێ (بالتنسق) یان (معا) ل دووماهیێ (معا) جهگیر بوو ئانكو هەر چ بهێتە كرن دڤێت پێكڤە بیت، نابیت وەزیرێ پەترۆلێ یان وەزیرەكێ دی ل وێرێ ب كەیفا خوە بڕیارێ بدەت و حیسابێ بۆ نەكەت، هەرێم ب ڤێ چەندێ پێگیربوویە، بەلێ خەلكێ دی پێگیری پێ نەكریە.
مادەیەكا دی مادەیا (115) یە : (كل ما لم ینص علیه فی الاختصاصات الحصریە للسلطات الاتحادیە یكون من صلاحیە الاقالیم والمحافظات غیر المنتظمە فی اقلیم والصلاحیات الاخری المشتركە بین الحكومە الاتحادیە والاقالیم تكون اڵاولویە فیها لقانون الاقالیم والمحافظات غیر المنتظمە فی اقلیم فی حالە الخلاف بینهما.) ئەڤە ژی دیسان مافەكێ مەزن ب هەرێمێ ددەت، بەلێ دیسان كار پێ نەهاتە كرن.
گەلەكێن دی یێن هەین، مادەیا (121) باسێ دەستهەلاتێن هەرێمێ دكەت ناخوازم گەلەگ دەمێ هەوە بگرم، بەلێ ل ڤێرێ دخوازم بۆ هەوە و بۆ هەموو خەلكێ ئیراقێ رۆهن بكەم:
ل شوباتا 2007 ل ڤێرێ ل پیرمام چەندین كۆمبوون د ناڤبەرا شاندێ هەرێمێ و شاندێ حوكمەتا فیدرالی و پسپۆرێن شارەزا ل وەلاتێن دی وەك كەنەدا و گەلەك ژ وەلاتێن دی دا، ب بەرهەڤبوونا بالیۆزێ ئەمریكا و بالیۆزێ بریتانیا ژی، ئەم گەهشتینە رێككەفتنەكا گەلەك رێكوپێك، ئەو قانوونا چو بۆ جڤاتا وەزیران، وەزیرەكی ژ وەزیران گوتبوو كورد نزانن جوداهیێ د ناڤبەرا ئاڤێ و پەترۆلێدا بكەن، ئەم ب خوە دێ وان تووشی وان پێگیرییان كەین؟ نەهێلا ئەو قانوونە بچیت. ئێدی هەكە كێشەیەك ل سەر پەترۆل و غازێ هاتە پێش، خەتابار بەغدایە نەك هەرێم، هەكە وی دەمی ئەو قانوونە بڕێڤەچووبا، گەلەك تشتەكێ باش بوو و پترییا وان كێشەیان روو نەددان.
نوكە ژی پشتی وێ چەندێ كو ئەو رێككەفتنا بەری چەند رۆژان د ناڤبەرا حوكمەتا هەرێمێ و حوكمەتا فیدرال و كۆمپانیێن پەترۆلێدا، هیڤیدارم ئەڤە بەردەوام بیت و ئەڤە ببیتە هۆكارێ وێ چەندێ كو ئەو قانوونە، ئەڤجا چ راستڤەكرنا پێدڤی بیت یان وەك بنەمایەك بۆ بزڤرین، یان قانوونەكا دی، هەر چ زووترە قانوونا پەترۆل و غازێ ل سەر ڤی بنەمای بهێتە كرن، ئەم هیچ د دودل نینین و د بەرهەڤین ژی بۆ وێ رێككەفتنێ، بەلێ شرۆڤەكرنێن شاش بۆ بەندێن دەستووری قابلی قەبوولێ نینە.
خالەكا دی كو گەلەك یا گرنگە، مادەیا 140 كو ئەو مادەیە دبێژیت ل وان دەڤەران (تطبیع، احصا‌ء، استفتاء) بهێتە كرن، هەتا نوكە وان خوە ژ ڤێ چەندێ ڤەدزییە، رامانا وێ ئەو نینە كو ب دیتنا وان دێ دەم ڤێ چەندێ ژ بیرا خەلكێ كوردستانێ بەت، ئەڤ پرسە دڤێت بهێتە چارەسەركرن ب گۆڕەی ڤان بنەماین كو د دەستووریدا هاتین، بۆ وێ چەندێ ئیراقێ ئارام بیت، بۆ وێ چەندێ ئەم هەموو پێكڤە نڤشێ داهاتی تووشی ڤان كێشەیان نەبن یێن ئەم و ئەوێن بەری مە تووش بووین، بلا بۆ خوە ژیانەكا بەختەوەر و ژیانەما ئاسوودە ببنە سەر، هەر مژوولی ڤان كێشەیان بن، خودا ڤێ چەندێ قەبوول ناكەت.
مادەیەكا دی كو زۆر گرنگە، مادەیا (65) كو دبێژیت: (اولا: یتم انشاء مجلس تشریعی یدعی ب (مجلس الاتحاد ) یضم ممثلین عن الاقالیم والمحافظات غیر المنتظمە فی اقلیم، وینظم تكوینه وشروط العضویە فیه ،واختصاصاته، وكل ما یتعلق به بقانون یسن بأغلبیە ثلثی أعضا‌و مجلس النواب.) ل ڤێرێ كازندەیێ ژ خوە ژی دكەین، ژ كوردان و نوونەرێن كوردان ل بەغدایێ و حوكمەتا هەرێمێ و هەموو حزبێن هەرێمێ ژی، مە ژی ئەڤ مادەیا پشت گوه هاڤێتیە كو تشتەكێ گەلەك گەلەك گرنگ بوو، ژ بەر وێ چەندێ ئەڤە ئەركێ هەوەیە ل گەل ئالیێن دی ژی بزاڤێ بكەن دڤێت ئەڤ مادەیە بهێتە بجهئینان، چونكە ئەڤە گرەنتییەكە بۆ وێ چەندێ ئێدی هەر كەسەك و هەر وەزیرەك و هەر دادگەهەك نەهێت ب كەیفا خوە بنپێكرنا قانوونێ بكەت و ب ناڤێ قانوونێ خەلكی سزا بدەت.
ئەوێن دی، یا دداگەها فیدرالی، مادەیا (92) دبێژیت: (اولا :- المحكمە الاتحادیە العلیا هیئە قضائیە مستقلە مالیا واداریا. ثانیا:- تتكون المحكمە الاتحادیە العلیا من عدد من القضاە وخبرا‌ء فی الفقه الاسلامی وفقها‌ء القانون، یحدد عددهم وتنڤم گریقە اختیارهم، وعمل المحكمە، بقانون یسن باغلبیە پلپی اعچا‌و مجلس النواب.) ئەڤە ژی دیسا بنپێكرنا دەستوورییە، هەتا نوكە ئەڤ دادگەهە نەهاتیە دروستكرن، ئەڤ داگەهە نوكە ئەو داگەه نینە كو د دەستووریدا هاتی، ئەڤە ژی دڤێت بهێتە چارەسەكرن بۆ وێ چەندێ ژ نوكە و پێڤە نە هەرێم و نە خەلكی دی یێ ئیراقێ تووشی غەدرێ نەبن ب ناڤێ قانوونێ و ب بڕیارا قانوونی یا سیاسیكری.
بەرێزان…
نوكە ژی ئەم یێ خوە بەرهەڤ دكەین بەر ب هەلبژارتنان بۆ خولا شەشێ یا جڤاتا نوونەرێن ئیراقێ، داخواز دكەم هەلبژارتنێن گەلەك ل سەرخوە و ئارام و بێ كێشە بن، هەتا هەكە وێنەیێن هەوە ل جهەكی بهێنە دڕاندن، هوون وی كارێ شاش نەكەن، ئەو كارەكێ شاشە و هوون بلندتر بن ژ وێ چەندێ. ئاخڤتنەكا نەشرین، بەرسڤا وان نەدەن، هەكە تشتێ وەسا هاتە كرن كو بوختان دژی هەرێمێ هاتە كرن، وی دەمی دڤێت ب شێوەیەكێ رەوا بهێتە بەرسڤدان، بەلێ ب وی شێوەیێ كو (فعل و رد فعل) خوە نەئیننە وی ئاستی.
داخوازێ ژ هەموو خەلكێ كوردستانێ دكەم كو ب گەرمی بچنە سەر سندووقێن دەنكدانێ و دەنگ بدەن.
ل ڤێرێ نەچارم ب راشكاوانە ڤێ چەندێ ژی بێژم، هەر جارا بەر ب هەلبژارتنان دچین، دیسان جارەكادی پیلانگیری دژی پارتی دەست پێ دكەت. شیرەتا من بۆ وان ئەڤەیە پێداچوونێ ب خوەدا بكەت، مرۆڤ دڤێت جارەكێ دو جاران سێ جاران عیبرەتێ وەربگریت، پارتی ب هەوە ناشكێت، چ ل ناڤ هەرێمێ، چ ب هەڤپەیمانییا گرۆپەكێ ل بەغدا، ل هەر جهەكێ هزر د وێ چەندێدا بكەن ب هەڤپەیمانییا خوە هەرێمێ دێ شكێنن، وەلاهی هەرێم ناشكێت و دێ هوون پەشێمان ژی بن، هوون نەشێن پارتی بشكێنن، پارتی گەلەك گەلەك مەزنترە ژ وێ چەندێ ب هەڤپەیمانییا ڤی و یێ دی بشكێت. ئەم دخوازین هەموو كێشە بهێنە چارەسەركرن، كورت و بوخت، هەكە باوەری ب ڤان مادەیێن دەستووری هەیە كو ئیراق وەلاتەكێ فیدرالییە. نەخشەرێیە بۆ چارەسەركرنا هەموو كێشەیان، هەكە هەرێمێ ئێك داخواز زێدەتر ژ ئەوا د دەستووریدا هاتی داخواز كر، بێژنێ نابیت چونكە دەستوور رێ نادەت، بەلێ ئێك كادە د دەستووریدا كێمتر یان رەفتار تیدا بهێتە كرن و شایستەیێ هەرێمێ و شایستەیێ گەلێ كوردستانێ، ئەم قەبوول ناكەین. ئەڤجا هەكە نیازا چارەسەكرنا كێشەیان هەبیت، گەلەك ب ساناهییە، زڤرینە بۆ دەستووری، بێی كێم و زێدە دەستوور بهێتە بجهئینان، دێ هەموو كێشە چارەسەر بن.
ل ڤی دەمی ئەزموونەكا مەزن ژی پەیدا بوو، هەم ل هەرێمێ و هەرم ل بەغدایێ ژی، ئەم د بەرهەڤین ب گۆڕەی دەستووری دووماهیێ ب هەموو كێشەیان بینین، دڤێت ژی بهێنە ب دووماهی ئینان، ل كیرێ هەرێمێ شاشی كریە، دڤێت پێداچوونێ د خوەدا بكەت، هەرچەندە غەدەر ل هەرێمێ هاتیە كرن، بەلێ هەكە ل جهەكی، لێ دڤێت بەغدا ژی بۆ دەستووری بزڤریت، هەكە بەهانەیا ئیراقێ ئارامی بیت و ئەو پێكڤەژیان و برایەتییا هەی، بمینیت.
ل دووماهیێ ئەز جارەكادی هیڤییا سەركەفتنێ بۆ هەموە دكەم، لاڤایا سەركەفتنێ بۆ هەوە كەم، هوون خوە ب نوونەرێن هەموو خەلكێ ئیراقێ بزانن، ل وێرێ ل گەل ئالیێن دی، ل گەل پەرلەمانتارێن دی، هەڤبەندییەكا رێكوپێك ودۆستانە دروست بكەن، پێكڤە بەرگریێ ژ كوردان بكەن، ژ ئەرەبان بكەن، ژ توركمانان بكەن، ژ ئێزدییان بكەن، ژ هەموو كەسەكی بكەن، كی یێ ستەملێكرییە بەرگریێ ژێ بكەن، نەچن ل وێرێ خوە دوور بكەن، یان موزایەدە، ئەوا نەباش موزایەدەنە، ژموزایەداتا نەترسن، ژ كەسێ نەترسن چونكە چیایێن كوردستانێ یێن ل پشتا هەوە، پارتی یا ل پشتا هەوە.
ئینشائەللا هوون دێ گیانێ شەهیدان شاد كەن و دێ دلێ خەلكێ كوردستانێ ژی شاد كەن.

بەرپرسێ لژنەیا بلند یا هەلبژارتنێن پارتی دیموكراتی كوردستان راگەهاند: بەرنامەیێ كارێ پارتی بۆ جڤاتا نوونەرێن ئیراقێ، بجهئینانا دەستوورێ بەردەوام یێ ئیراقێیە، پێشكەفتنا ئابۆری و دادپەروەری ل هەرێما كوردستانێ و ئیراقێیە، هەروەسا دبێژیت: پارتی ژ پێخەمەت پێكڤەژیان و ماف و ئازادیێن هەموو پێكهاتەیێن كوردستانێ خەباتێ دكەت.
دوهی ئێكشەمبی 12/10/2025، مەحموود محەمەد، بەرپرسێ لژنەیا بلند یا هەلبژارتنێن پارتی دیموكراتی كوردستان ل رێوڕەسمێ دەستپێكرنا بانگەشەیا هەلبژارتنێن جڤاتا نوونەرێن ئیراقێ د پەیڤەكێدا بەرنامەیێ پارتی دیموكراتی كوردستان بۆ خولا نوو یا جڤاتا نوونەرێن ئیراقێ بەرچاڤكر.
مەحموود محەمەد د پەیڤەكێدا گوت» پارتی دیموكراتی كوردستان دوپاتیێ ل بجهئینانا دەستوورێ بەردەوام یێ ئیراقێ دكەت، بۆ وێ چەندێ سەروەرییا ئاخێ یا پاراستی بیت و كێشە چارەسەر ببن، چونكە ژێدەرێ هەموو كێشەیێن ئیراقێ، بجهئینانا دەستوورییە.
بەرپرسێ لژنەیا بلند یا هەلبژارتنێن پارتی باس ل وێ چەندێ ژی كر» پارتی ژ پێخەمەت پێشكەفتنا ئابۆری، هەمەجۆركرنا جۆرێن داهاتی، بجهئینانا مادەیا 140 یا دەستووری، دادپەروەری ل هەرێما كوردستانێ و ئیراقێ كار دكەت» .
گوت ژی» پارتی دیموكراتی كوردستان ب سەرۆكاتییا سەرۆك بارزانی، ژ پێخەمەت ماف و ئازادیێن هەموو پێكهاتەیێن كوردستانێ و پێكڤەژیانێ خەباتێ دكەت و بزاڤێن مە ژ پێخەمەت وێ چەندێ دوپات دكەین، هەڤدەم پارتی بۆ چارەسەركرنا كێشە و ناكۆكییان، دانوستاندن ب تاكە رێچارەسەر دزانیت و دوپاتیێ ل دەولەتەكا دیموكراسی ل ئیراقێ دكەت».
بەرپرسێ لژنەیا بلند یا هەلبژارتنێن پارتی دیموكراتی كوردستان داخوازێ ژ دەنگدەران دكەت ل رۆژا 11/11/2025، ژ پێخەمەت بجهئینانا دەستوورێ بەردەوام یێ ئیراقێ، بەرژەوەندیێن هەرێما كوردستانێ و ئیراقێ، پاشەڕۆژەكا گەشتر، ئارامی و خوەشگوزەرانی ب درووشمێ هەڤپشكی، هەڤسەنگی و لهەڤكرن دەنگ ب پارتی دیموكراتی كوردستان بدەن..

دوهی ئێكشەمبی 12/10/2025، مەسرور بارزانی، سەرۆكێ حوكمەتا هەرێما كوردستانێ كەنیسەیا (ئەم ئەلنوور) ل قەزا عەنكاوە ل پارێزگەها هەولێرێ ڤەكر.
د پەیڤەكێدا كو ل مەراسیمێن ڤەكرنا وێ كەنیسەیێ پێشكێشكری، سەرۆكێ حوكمەتا هەرێما كوردستانێ هیڤی خواست خووشك و برایێن كریستیان مفای ژ وێ كەنیسەیێ وەربگرن كو ژ ئالیێ وەزارەتا ئەوقاف و كاروبارێن ئایینی ل حوكمەتا هەرێما كوردستانێ هاتیە دروستكرن.
ئەوژی بەرچاڤكر كو حوكمەتا هەرێما كوردستانێ دێ بەردەوام بیت د بزاڤێن خوە دا بۆ ب دووماهی ئینانا وێ رەوشا سەپاندی ل دەشتا نەینەوا، تاكو خووشك و برایێن كریستیان بشێن بزڤرن دناڤ مالێن خوەدا
دەقێ پەیڤا سەرۆكێ حوكمەتا هەرێما كوردستانێ..
قەداسەتا پاتریارك كار ئەگناتیۆس ئەفرام
قەداسەتا پاتریارك كاردینال لویس ساكۆ
گەلەك خوەش حالم ئەڤرۆ د ڤی رێوڕەسمیدا پشكدارم كو ڤەكرنا كەنیسەیا (ئوم ئەلنوور) كو ژ ئالیێ وەزارەتا ئەوقاف و كاروبارێن ئایینی ل حوكمەتا هەرێما كوردستانێ هاتیە دروستكرن.
ئەڤ كەنیسەیە ب ناڤێ (ئەم ئەلنوور) هاتیە ڤەكرن ئانكو دایكا رۆناهی، كو ئێكە ژ ناسناڤێن حەزرەتا مەریەما پاكیزە (سلاڤێن خودێ ل سەر بن). حەزرەتا مەریەم نەك تنێ ل ئایینێ كریستیان، بەلكو ل ئایینێ ئیسلامێ ژی پێگەهەكێ گەلەك تایبەت هەیە و د قورئانا پیرۆز دا، ل دەهان ئایەتان، ب رێزەكا مەزنڤە ناڤێ وێ هاتیە، مە گەلەك خانم یێن هەین كو ب وی ناڤی هاتینە ناڤكرن. هیڤیدارم ئەڤ كەنیسەیە، ببیتە جهەكێ گرنگ یا خوداپەرستییا خووشك و برایێن كریستیان ل عەنكاوە و ببیتە مەلبەندەكێ زێدەتر پێشڤەبرنا برایەتیێ و دۆستایەتیێ د ناڤبەرا ئایینان و گەشەپێدانا كەلتوورێ پێكڤەژیانێ ل هەرێما كوردستانێ.
ل ڤان سالێن دووماهیێ، ب تایبەتی ژی پشتی هێرشا تیرۆرستێن داعشێ ل سەر هەرێما كوردستانێ و مووسلێ و دەشتا نەینەوا، هزاران خووشك و برایێن كریستیان ژ وان دەڤەران، نەچاربوو مال و حالێن خوە بجه بهێلن و پەنایێ بۆ هەرێما كوردستانێ بینن، ب تایبەتی ژی ل عەنكاوە ئاكنجی ببن و ب ئاشتی و ئارامی بژین، ئەڤ كەنیسەیەژی، دیارییەكا حوكمەتا هەرێما كوردستانێیە بۆ وان خووشك و برایێن كو وەك گوهلێبوویم، پشكەكا مەزن ژێ ژ ئاوارەیێن دەشتا نەینەوانە كو ژ ئەگەرێ نەئارامییا دەڤەرا وان، هەر ل ڤێرێ ماینە ومفای ژ ڤێ كەنیسەیێ وەردگرن و خوداپەرستیێ تێدا دكەن.
حوكمەتا هەرێما كوردستانێ دێ بەردەوام بیت د بزاڤێن خوەدا بۆ دووماهئینانێ ب وێ رەوشا سەپاندی ل دەشتا نەینەوا و بۆ دروستكرنا سەقایەكێ ئارام، بۆ وێ چەندێ خووشك و برایێن مە بشێن ب سەربلندی و ب ئارەزوویا خوە بزڤرن بۆ مال و كەنیسەیێن خوە.
بەری چەند رۆژان، مە پرۆژەیەكێ رێ و پران ل نێزیك پەرستگەها لالش ڤەكر كو ئاسانكارییەكا مەزن بوو بۆ خووشك و برایێن مە یێن ئێزدی. هەر ئەڤرۆ ژی پشتی ڤەكرنا ڤێ كەنیسەیێ، بەرێ بناغەیێ پەیمانگەها ئەزهەر یا ئایینی دێ دانین و هەروەسا دێ پشكداریێ د ئاهەنگا درەچوونا پەیمانگەها پێشنڤێژ وگوتارخوینان ل هەولێرێ كەین. ئەڤە هەموو بەلگە و نیشانا هەمەڕەنگییا جڤاكا كوردستانێ و گرنگیدانا حوكمەتا هەرێما كوردستانێیە ب هەموو ئایینان و ب زێدەتر ب هێزكرنا پێكڤەژیانا ئاشتییانە و ئازادییا ئایینی ل هەرێما كوردستانێ.
حوكمەتا هەرێما كوردستانێ دێ بەردەوام بیت ل سەرئێخستنا پەیاما ئاشتیێ و پێكڤەژیانێ و رێزگرتنێ ل هەموو ئایینان نەك تنێ ل هەرێما كوردستانێ، بەلكو ل سەرانسەری رۆژهەلاتا ناڤین.
دوبارە پیرۆزباهییا ڤەكرنا ڤێ كەنیسەیێ ل هەوە دكەم و خودایێ مەزن كوردستانێ بپارێزین و هەردەم ب خوەشی و برایەتی بژین.

هۆشەنگ تاجر:

هژمارەک ژ چاڤدێرێن سیاسی یێن کورد دیار دکەن، گرنگە د ڤان هەلبژارتنان دا پارتی ب هێزەکا مەزنتر ژ جاران بچیتە بەغدا، چونکی نها مەترسیێن مەزن ل سەر قەوارێ هەرێما کوردستانێ هەنە و بهێزبوونا پارتی دێ بیتە ئەگەرێ بهێزبوونا کوردان ل بەغدا.

حەسەن بیلدرجی چاڤدێرێ سیاسی یێ باکورێ کوردستانێ بۆ ئەڤرۆ دیار کر، یا راست پێدڤیا کوردان ب هێزەکا نەتەوەیی و مەزن ل بەغدا هەیە کو بشێت بەرەڤانیێ ژ مافێن گەلێ کوردستانێ بکەت و د هەمان دەمی دا هێزەکا کاریگەر بیت و ل هەمبەر سیاسەتا توندرەو یا بەغدا ژی راوەستیت و خوەدان هەلوەست بیت، هەتا نها تنێ هێزا شیایە کارەکێ وەسا ل بەغدا بکەت پارتی دیموکراتی کوردستان بوویە، ژ بەر ڤێ یەکێ ژی د ڤان هەلبژارتنان دا ئەز داخواز ژ هەموو دەنگدەرێن هەرێما کوردستانێ و دەڤەرێن دی یێن کوردی دکەم ئانکو من دڤێت هەموو دەنگدەرێن کورد دەنگێ خوە بدەنە لیستا ٢٧٥، چونکی بهێزبوونا پارتی ئانکو بهێزبوونا کوردان ل بەغدا.
ئەحمەد شادی چاڤدێرێ سیاسی یێ رۆژهەلاتێ کوردستانێ ژی دیار کر، گرنگە ئەم ڤێ راستیێ بزانین کو هەلبژارتنێن ڤێجارێ گەلەک جودانە، چونکی ل رۆژهەلاتا ناڤین گوهۆڕینێن گەلەک مەزن روو ددەن، مەترسی ل سەر کوردان هەنە لێ د هەمان دەمی دا هەکە کورد بهێز بن دێ گەهنە گەلەک مافێن خوە، ژ بەر ڤێ یەکێ ژی ئەز پشتەڤانیێ ل لیستا پارتی دیموکراتی کوردان دکەم و هێڤیدارم ڤێجارێ ژی پارتی وەکو هەلبژارتنێ بۆری بیتە هێزا ئێکێ ل سەر ئاستێ ئیراقێ، چونکی هەر کەس دزانیت ل ئیراقێ تنێ هێزا کو حسابەک بۆ دهێتە کرن پارتی یە و گرنگە وەلاتیێن هەرێما کوردستانێ ژی ژ بۆ پاشەرۆژا گەش بۆ وەلاتێ خوە دەنگێ خوە بدەنە پارتی و پشتەڤانیێ ل لیستا سەرۆک بارزانی بکەن.
هژمارەک زێدە ژ چاڤدێرێن سیاسی و کەسێن ئەکادیمی یێن رۆژئاڤایێ کوردستانێ ژی دیار کرن، سەرۆک بارزانی و پارتی دیموکراتی کوردستان د رۆژێن تەنگاڤ دا پشتەڤانی ل رۆژئاڤایێ کوردستانێ کرینە نها پارتی ب هەموو شیانێن خوە دڤێت کورد ل رۆژئاڤایێ کوردستانێ بگەهنە مافێن خوە، ژ بەر ڤێ یەکێ ژی وەکو کوردێن رۆژئاڤا ئەو پشتەڤانیێ ل لیستا ٢٧٥ یا پارتی دیموکراتی کوردستان دکەن، چونکی ب سەرکەفتنا پارتی دێ پێگەهێ کوردان ل ئیراقێ و دەڤەرێ بهێز بیت.

نێچیرڤان بارزانی، سەرۆكێ هەرێما كوردستانێ، ل ئەنقەرە ل گەل رەجەب تەیب ئەردۆغان، سەرۆككۆمارێ توركیا كۆمبوو.
د كۆمبوونەكێدا باس ل هەڤبەندیێن توركیا ل گەل ئیراقێ و هەرێما كوردستانێ هاتە كرن، هەروەسا وارێن هاریكارییا هەڤپشك یا توركیا و هەرێما كوردستانێ، رەوشا گشتییا ئیراقێ، پرۆسەیا سیاسی و هەلبژارتنێن جڤاتا نوونەرێن ئیراقێ، رەوشا ناڤخوەییا هەرێما كوردستانێ و پێشهاتێن سووریێ گەنگەشەكر.
هەردو ئالییان ئاستێ هەڤبەندیێن توركیا و هەرێما كوردستانێ بلند هەلسەنگاند و بەرهەڤی نیشادا بۆ زێدەتر پێشڤەبرنا هاریكارییا هەڤپشك د هەموو واراندا، ب تایبەتی د وارێ ئابۆری و لێكگوهارتنا بازرگانی و هاریكاریێ د كەرتێ وزەیێدا.
هەر سەبارەت ڤێ چەندێ رۆناهێ ئێخستە سەر دەستپێكرنا هنارتنا پەترۆلا هەرێما كوردستانێ بۆ بازارێن جیهانێ ب رێیا بەندەرێ جەیهان یێ توركی كو د بەرژەوەندییا ئابۆرییا هەموو ئیراقێدایە. هەردو ئالی هەڤڕابوون كو پرۆسە خزمەتا ئارامییا ئیراقێ ب گشتی دكەت.
سەرۆككۆمارێ توركیا بەردەوامییا پشتەڤانییا وەلاتێ خوە بۆ ئیراقێ و هەرێما كوردستانێ دوپاتكر و هەڤبەندیێن وەلاتێ خوە ل گەل هەردو ئالییان ب گرنگ و جهێ پیتەپێدانا توركیا هەژمارت.
ژ ئالیێ خوەڤە نێچیرڤان بارزانی رێز و سوپاسی بۆ پشتەڤانی و هاریكارییا توركیا ل ئیراقێ و هەرێما كوردستانێ دیاركر و دوپاتكر كو توركیا جیرانەكا گرنگ یا هەرێما كوردستانێ و ئیراقێیە و دشیاندایە د گەلەك واراندا و بۆ بەرژەوەندییا هەڤپشك، پێكڤە هاریكاریێ بكەن.
پاراستنا ئارامییا دەڤەرێ، پێنگاڤێن پرۆسەیا ئاشتیێ ل توركیا، دوماهی پێشهاتێن رۆژهەلاتا ناڤین و چەند پرسێن دی یێن جهێ گرنگییا هەڤپشك، تەوەرەكێ دی یێ كۆمبوونێ بوو .
ژ ئالییەكێ دی ڤە د چارچۆڤەیێ سەردانا خوە دا بۆ توركیا نێچیرڤان بارزانی، سەرۆكێ هەرێما كوردستانێ ل ئەنقەرە ل گەل هاكان فیدان، وەزیرێ دەرڤەیێ توركیا كۆمبوو.
د كۆمبوونەكێدا هەردو ئالییان دوپاتی ل خواستا دوقۆلی بۆ پێشڤەبرنێ ب هەڤبەندیێن توركیا ل گەل ئیراقێ و هەرێما كوردستانێ كر، هەروەسا ل دۆر چاوانییا بەرفرەهكرنا وارێن هاریكارییا هەڤپشك، بیر و بۆچوون لێكگۆهارتن.
ل تەوەرەكێ دی یێ كۆمبوونێ باس ل پرسا ئاڤێ د ناڤبەرا توركیا وئیراقێدا هاتە كرن، سەبارەت ڤێ چەندێ نێچیرڤان بارزانی داكۆكی ل پێدڤییا هەماهەنگیێ د ناڤبەرا ئیراقێ و توركیا كر، ب شێوەیەكی، بڕێڤەبرنا ئاڤێ هەموو پێدڤیێن هەردو ئالییان دابین بكەت. رەوشا دەڤەرێ و چەند پرسێن جهێ گرنگییا هەڤپشك، ئالییەكێ دی یێ كۆمبوونێ بوو.

سەرۆكاتییا هەرێما كوردستانێ راگەهاند: رێز و سوپاسییا خوە بۆ رەجەب تەیب ئەردۆگان، سەرۆككۆمارێ توركیا دوپات دكەین كو ل كۆمبوونا ل گەل نێچیرڤان بارزانی، سەرۆكێ هەرێما كوردستانێ ل رۆژا پێنجشەمبی 9/10/205، فەرمان دای گەشتێن ئەسمانی یێن هێلێن فرۆكەڤانی یێن توركیا دەست پێ بكەن.
سەرۆكاتییا هەرێما كوردستانێ دیاركر: ئەڤ بڕیارە د چارچۆڤەیێ هەڤبەندییا ب هێز د ناڤبەرا هەرێما كوردستانێ و توركیا دهێت كو پشتڕاستین دێ هاریكار بیت بۆ زێدەتر پێشڤەبرنا هاریكارییا هەڤپشك و د بەرژەوەندییا هەردو ئالییاندا ب تایبەتی دێ د بەرژەوەندییا وەلاتیێن مە ل سنوورێ سلێمانیێ دا بیت.