ئەڤرۆ نیوز،زنار تۆڤی:
بەیار باشۆری راگەهاندکارێ یانا سێمێلێ بۆ رۆژناما ئەڤرۆ دیارکر: پشتی یانا سێمێلێ یا فۆتسالا کچان بوویە قارەمانا خۆلا عێراقێ،ئەڤرۆ رۆژا ئێکشەمبی 19.3.2017 ژلایێ خالد دۆسکی وەزیرێ وەرزش و لاوان یێ حوکمەتا هەرێما کوردستانێ ل ئاڤاهیێ وەزارەتێ هاتنە پێشوازیکرن،زێدەتر گۆت ژی:وەزیرێ وەرزش و لاوان پێشوازیەکا گەرم ل خانمێن فۆتسالا سێمێلێ کرن و هەروەسا سۆزدایە کو پشتی جەژنا نەورۆزێ ئەو دێ سەرەدانا یانا سێمێلێ کەت و دیسان دێ دیاریان ژی پێشکێشی یاریزانێن فۆتسالا کچان کەت.
ئه‌ڤرۆ نيوز:
ئه‌ڤرۆ رۆژا ئێكشه‌مبى رێكه‌فتى 19ى ئادارا 2017ێ پشككێشان بۆ ناڤێن حه‌جيان هاته كرن ئه‌وێن حه‌زا چوونا حه‌جێ بۆ سێ سالێن داهاتى هه‌ين.
ل هه‌رێما كوردستانێ 86 هزار و 463 كه‌سان ناڤێ خوه بۆ فه‌ريزا حه‌جێ تۆماركريه، 43 هزار و 211 كه‌س ژ ره‌گه‌زێ نێرن و 43 هزار و 252 كه‌س ژى ژ ره‌گه‌زێ مێ نه.
ل سه‌رانسه‌رى پارێزگه‌ها دهۆكێ 19 هزار و 296 كه‌سان ناڤێن خوه تۆمار كرينه و بۆ ئه‌ڤ ساله دێ ناڤێ 1090 كه‌سان ده‌ركه‌ڤيت.
ئه‌ڤه سه‌ره‌رايى وێ چه‌ندێ كو بۆ هه‌رسێ سالان دێ ناڤێن 13 هزار و 80 كه‌سان ده‌ركه‌ڤن كو هزار و 291 كه‌س دێ وه‌كو پێگوهۆڕ هێنه تۆماركرن.
بۆ ئه‌ڤ ساله كۆژمێ چار مليۆن و 500 هزار ديناران دێ ژ هه‌ر حه‌جيه‌كى/حه‌جيه‌كێ هێنه وه‌رگرتن وه‌كو مه‌زاختيێن پرۆسا ئه‌نجامدانا فه‌ريزا حه‌جێ و هه‌موو حه‌جى ژى دێ ب رێيا هێلا ئه‌سمانى يا عيراقه گه‌هشتێ كه‌ن.
ژبلى وى مه‌زاختى هه‌ر كه‌سه‌كێ/كه‌سه‌كا ناڤێ خوه تۆمار كربيت 50 هزار دينار يێن ژێ هاتينه وه‌رگرتن كو دبيته چار مليار و 323 مليۆن و 150 هزار دينار.
ناڤێن حاجيان 2017
ده‌ڤه‌رێن كوردستانى يێن ده‌رڤه‌ى ئيدارا هه‌رێمێ
ناڤێن حاجيان 2018
ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ
ناڤێن حاجيان 2019
ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ
ئه‌ڤرۆ نيوز:
وه‌زيرێ ده‌رڤه يێ بريتانيا بوريس جۆنسۆن د په‌يامه‌كێ دا پيرۆزيا جه‌ژنا نه‌ورۆزێ ل سه‌رۆكێ هه‌رێما كوردستانێ مه‌سعود بارزانى دكه‌ت و هيڤيا ب هێزكرنا په‌يوه‌نديێن ناڤبه‌را وه‌لاتێ خوه و هه‌رێما كوردستانێ دكه‌ت.
هه‌روه‌سا په‌سنا رۆلێ گه‌لێ كورد ل شه‌رێ دژى داعش و هه‌مبێزكرنا ژماره‌كا زۆرا ئاوارێن عيراقێ دكه‌ت و به‌حسێ سه‌ره‌دانا خوه كوردستانێ ل سالا 2015ێ دكه‌ت و هيڤيداره جاه‌كا دژى سه‌ره‌دانا كوردستانێ بكه‌ت.
ب ڤێ شيعرا پيره‌مێردى ئه‌وا ب هه‌لكه‌فتا نه‌ورۆزێ هاتيه گۆتن، وه‌زيرێ ده‌رڤه يێ بريتانيا دووماهى ب په‌ياما خوه بۆ سه‌رۆكێ هه‌رێما كوردستانێ ئينايه:
“ئه‌م رۆژی ساڵی تازەیە نەورۆزە هاتەوە!”
ئه‌ڤرۆ نيوز، نيوار محه‌مه‌د سه‌ليم:
ئه‌ڤرۆ رۆژا ئێكشه‌مبى رێكه‌فتى 19ى ئادارا 2016ێ رێڤه‌به‌ريا پۆليسێن هاتنوچوونێ ل پارێزگه‌ها دهۆكێ پلانا خوه بۆ رۆژانێن نه‌ورۆز راگه‌هاند و ئاماژه دا وێ چه‌ندێ كو ل زالگه‌ها دهۆك بۆ ئه‌ڤريكێ و رێيا دهۆك بێسرێ ل رۆژانێن جه‌ژنێ دێ هێنه سنورداركرن.
ئازاد تاها، به‌رپرسێ په‌يوه‌ندى و راگه‌هاندنێ ل رێڤه‌به‌ريا هاتنوچوونا پارێزگه‌ها دهۆكێ د پرێس كۆنفرانسه‌كى دا ئه‌ڤرۆ رۆژا ئێكشه‌مبى 19ى ئادارا 2017ێ راگه‌هاند كو ل هه‌رسێ رۆژێن جه‌ژنا نه‌ورۆزێ دێ رێيا گه‌ليێ بێسرێ بۆ دهۆكێ ژ ده‌مژمێر 9:00ى سپێدێ هه‌تا 1ى نيڤرۆ ب تنێ چوون بيت و ل وى ده‌مى هاتن دێ ب رێيا سكرێ دهۆكێ بيت.
رائيدێ مافپه‌روه‌ر گۆتژى: “ل زالگه‌ها گه‌ليێ ئه‌ڤريكێ ژى بۆ گه‌لى كورتكى ب تنێ چوونه و هاتن دێ ب رێيا گۆندێ شێخ هه‌سنا بيت”.
به‌رپرسێ په‌يوه‌ندى و راگه‌هاندنێ ل رێڤه‌به‌ريا هاتنوچوونا پارێزگه‌ها دهۆكێ خۆيا ژى كر كو ژ ده‌مژمێر 4:00ى ئێڤارى رێيا گه‌ليێ بێسرێ و سكرێ دهۆكێ ب تنێ دێ بنه چوون بۆ دهۆك و گۆت: “ل گه‌لى كورتكى ژى ل هه‌مان ده‌م دێ ب تنێ بيته هاتن و چوون ناهێته كرن”.
ل گۆر سه‌رپێچكه‌ران ژى رائيدێ مافپه‌روه‌ر دا زانين كو ئه‌ڤ ساله پتر دێ گڤاشتن هه‌بيت و ترۆمبێلا ل تورابى هاتنوچوونێ بكه‌ت دێ هێته سزادان و گۆت: “نابيت ب چو ره‌نگه‌كى قه‌لابه، شه‌فه‌ل، لۆرى و ماتۆرسكل بچنه جهێن گه‌شتيارى و به‌رۆڤاژى رێنمايان دێ هێنه سزادان”.
ئه‌ڤرۆ نيوز:
ئۆمێد محه‌مه‌د رێڤه‌به‌رێ كونترۆلا كاره‌با هه‌رێما كوردستانێ راگه‌هاند كو ژ ئه‌گه‌رێ كێمبوونا خواستێ ل سه‌ر ب كارئينانا كاره‌بێ ب ره‌نگه‌كێ به‌رچاڤ دشيان دايه پشتى نه‌ورۆزێ 15 ده‌مژمێران كاره‌با نشتميانى بۆ وه‌لاتيان دابين بكه‌ن و مواليدێن ئه‌هلى ژى دشێن ماوێ ماوى كاره‌بێ دابين بكه‌ن و ب ڤێ چه‌ندێ كاره دێ بيته 24 ده‌مژمێرى.
ئەڤرۆ نیوز:
پەیڤدارێ وەزارەتا ساخلەمیا حوکمەتا ھەرێما کوردستانێ خویا کر، کو ھەرێما کوردستانێ ل ئاستێن بلند بزاڤان دگەل حوکمەتا عیرقێ دکەت ھەتا پشکا دەرمانێن ھەرێما کوردستانێ نەھێنە بڕین و گۆت: ئەگەر بڕیارا بڕینا دەرمانا بھێتە بجھئینان دێ مە ژی ھەلویستێ خوە ھەبیت ژبەرکو بڕیارەکا سیاسیە.
دکتۆر خالس قادر، پەیڤدارێ وەزارەتا ساخلەمیا حوکمەتا ھەرێما کوردستانێ بۆ رۆژناما ئەڤرۆ گۆت “ھێشتا بڕیارا حوکمەتا عیرقێ بۆ بڕینا پشکا دەرمانێن ھەرێما کوردستانێ نەچوویە د بیاڤێ بجھئینانێ دا و دەرمان وەکی بەرێ بۆ ھەرێما کوردستانێ تێن، بەلێ بەری نوکە ژی ھەر ب شێوەیەکێ ئاسایی دەرمان بۆ ھەرێما کوردستانێ نەھاتینە و ل گۆر پێدڤیێن ھەرێما کوردستانێ بەغدا دەرمانا نادەتە ھەرێمێَ، ئەڤ پێشنیارا ژلایێ وەزیرێ ساخلەمیا عیرقێ ڤە بۆ بڕینا دەرمانێن ھەرێمێ نوکە ل سەر ئاستێن بلند، ھەرێما کوردستانێ یا بزاڤان دکەت ئەڤ بڕیارە نەھێتە بجھئینان”.
دکتۆر خالس قادر گۆت ژی “ئەڤ دەرمانێن بەغدا دەتە ھەرێما کوردستانێ پشکەک ژ وان بۆ ئاوارەیێن عیرقێ تێنە دابینکرن یێن ل ھەرێمێ ئاکنجی، ئەم وەکی ھەرێما کوردستانێ دخوازین بەغدا چ پێنگاڤێن وەسا نەھاڤێژیت و ئەگەر بڕیار گەھشتە ڤی ئاستی بەغدا دەرمانێن خەلکێ کوردستانێ ببڕیت ئەڤە دێ بیتە بڕیارەکا سیاسی و ئەمژی وەکی ھەرێما کوردستانێ وی دەمێ بێدەنگنابین و دێ مەژی ھەلویستێ خوە ھەبیت”.
ئەڤرۆ نیوز:
د چەند رۆژێن بۆری دا پێلەکا بەفر و بارانێ ھەرێما کوردستانێ ڤەگرت و ژ ئەنجامێ وێ ل سەنتەرێ ناحیا کانی ماسێ 20 سەنتیمەترێن بەفرێ و ل خالا گۆمرکیا سەرزێری ژی پتری 30 سەنتیمەترێن بەفرێ بارینە، دیسا بلندترین رێژا بارانێ ژی ل ناحیا چەمانکێ باری یە و ب تنێ د 24 دەمژمێران دا 67 ملیمێن بارانێ بارینە و سەرجەمێ گشتی یێ ئەڤ سالە دگەھیتە 591 ملیمان.
کامیران محەمەد، سەرۆکێ باژێرڤانیا کانی ماسێ بۆ رۆژناما ئەڤرۆ ئاشکرا کر، ل شەڤا 17 ل سەر 18/3 پێلەکا بەفرێ دەڤەرا کانی ماسێ ڤەگرت و د ئەنجام دا 20 سەنتیمەترێن بەفرێ ل سەنتەرێ ناحیێ و پتری 30 سەنتیمەتران ژی ل خالا گۆمرکیا سەرزێری بارینە و سەقایێ دەڤەرێ ژی گەلەک ساربوویە و گۆت: “د ڤێ حەفتیێ دا پێشبینی دھێتە کرن ھێشتا بەفر ل دەڤەرێ بباریت، ھەروەسا نوکە ھەموو رێیێن ھاتنوچوونێ ل دەڤەرا کانی ماسێ ھاتینە ڤەکرن و خەلک دشێن ب سەناھی ھاتنوچوونێ بکەن”.
ژ لایەکێ دیڤە ھاشم یەحیا، بەرپرسێ پشکا کەشناسیێ ل قەزا ئامێدیێ بۆ ئەڤرۆ دیار کر کو د چەند رۆژێن بۆری دا رێژەکا زۆرا بارانێ ل دەڤەرا ئامێدیێ باریە و گۆت: رێژا ھەرە پترا بارانێ ل ناحیا چەمانکێ باری یە کو دگەھیتە 67 ملیمان و سەرجەمێ گشتیێ بارانبارینێ ژی دگەھیتە591 ملیمان، دیسا کێمترین رێژا بارانبارینێ ل ناحیا کانی ماسێ بوویە کو دگەھیتە 16 ملیمان”.
ھاشم یەحیا خویا ژی کر، ل سەنتەرێ قەزا ئامێدیێ 34 ملیمێن بارانێ بارینە کو سەرجەمێ گشتی دبیتە 486 ملیم، ل ناحیا دێرەلۆکێ 35 ملیم بارینە کو سەرجەمێ گشتی دبیتە 452 ملیم، ل سەرسنکێ 48 ملیم بارینە و سەرجەمێ گشتی دبیتە 591 ملیم، ل بامەرنێ ژی 36 ملیمێن بارانێ بارینە و سەرجەمێ گشتی دبیتە 443 ملیم و گۆت: “ھەتا نوکە رێژا بارانبارینێ ل سنوورێ قەزا ئامێدیێ نەگەھشتیە رێژا پار ڤی دمی کو دۆرێن 740 ملیمێن بارانێ ل سەنتەرێ قەزا ئامێدیێ باری بوون”.
ئەڤرۆ نیوز:
ئاژانسەکا جیھانی دیار دکەت کو ژ بەر شەر و ناکۆکیێن ل تورکیا و باکورێ کوردستانێ گەلەک کوردان نەڤێت پشکداریێ د ریفراندۆمێ دا بکەن، چونکو باوەریا گەلەک کوردان ب سیاسەتا دەولەتا تورکیا و یا پەکەکێ ژی نەمایە و ژ بەر ھندێ ژی ئەو کورد دێ چارەنڤیسێ ریفراندۆمێ دیار کەن، ھەکە پشکداریێ نەکەن ژی رەنگە ئەو یەک د بەرژەوەندیا ئەردۆگانی دا بیت چونکو دێ بیتە ئەگەر دەنگێ نەخێر کێم بن.
ئاژانسا رویتەرز یا نووچەیان د راپۆرتەکێ دا ل دۆر ریفراندۆما ل تورکیا بەحسێ گرنگیا رۆلێ کوردان دکەت و دیار دکەت کو کورد دێ چارەنڤیسێ ریفراندۆمێ دیار کەن و ژ بەر ھندێ ژی رۆلێ کوردان ل باکورێ کوردستانێ دێ گەلەکێ گرنگ بیت و حوکمەتا تورکیا ژی دڤێت ب ستراتیژیەکا نوو مفایێ ژ ھەلویستێ کوردان وەربگریت، چونکو ئەو کوردێن کو باژێرێن وان خراب بووینە ئەو ژ دەولەتا تورکیا توورە نە و د ھەمان دەمی دا باوەریا وان ب سیاسەتا پەکەکێ ژی نەمایە و دبێژن سیاسەتا شاش یا پەکەکێ بۆ ئەگەر کو تورکیا باژێرێ مە وێران کەت و ژ بەر ھندێ ژی ئەو دبێژن کو ریفراندۆمێ چو گرنگیا خوە بۆ وان نینە و وان نەڤێت پشکداریێ د وێ ریفراندۆمێ دا بکەن.
د بەردەوامیا راپۆرتێ دا ئەو یەک ھاتیە دیار کرن ئەردۆگان و ھەڤالێن وی باش دزانن ھەکە نەشیان دەنگێ وان کەسان بدەستڤە بینن ژی باشترە ھەما ئەو پشکداریێ د ریفراندۆمێ دا نەکەن، چونکو ھەکە ئەو پشکداریێ د ریفراندۆمێ دا نەکەن دێ رێژا دەنگێ نەخێر کێمتر بیت و ئەو یەک د بەرژەوەندیا ئەردۆگانی دایە و ژ بەر ھندێ ژی دەنگێ کوردان ل دڤەرێن شەری دێ چارەنڤیسێ ریفراندۆما تورکیا دیار کەت، چونکو رێژا دەنگێ وان کوردێن کو ژ دەولەتێ و پەکەکێ توورە نە گەلەک زێدەیە و ھەکە ئەو پشکداریێ د ریفراندۆمێ دا بکەن دێ دەنگێ نەخێر گەلەکێ زێدە بیت و ئەو یەک د بەرژەوەندیا ئەردۆگانی دا نینە، حوکمەت باش دزانیت ئەو کوردێن باژێرێن وان وێران بووینە گەلەکێ توورە نە و ژ بەر ھندێ ژی نھا د بەرژەوەندیا ئەردۆگانی دایە ئەو کورد پشکداریێ د ریفراندۆمێ دا نەکەن.
د راپۆرتێ دا ئاماژە ب وێ چەندێ ژی ھاتیە کرن کو نە پەکەکێ شیایە چو تشتەکێ بۆ وی خەلکی بکەت و نە ژی دەولەتا تورکیا سۆزەک وەسا دایە وان کو کارتێکرنێ ل ھەست و ھەلویستێ وان بکەت، ژ بەر ھندێ ژی ھەتا نھا دیار نینە کا دێ ھەلویستێ وی خەلکی چاوا بیت، گەلەک راپرسی ژی ھاتنە کرن لێ ھەمی راپرسی ژی وێ یەکێ نیشا ددەن کو دەنگێ وی خەلکێ ھەتا نھا بریار نەدایی کا دێ پشکداریێ د ریفراندۆمێ دا کەت یان نە، دێ چارەنڤیسێ ریفراندۆمێ دیار کەت ژ بەر ھندێ ژی نھا د راستی دا ھەم دەولەتا تورکیا و ھەم ژی پەکەکێ ژ ھەلویستێ وان کوردان دترسن.
ل ئالیێ دی پەیڤدارێ پارتیا دیموکراتیک یا گەلان ئۆسمان بایدەمیر ژی دیار کریە کو پشتی ھەڤسەرۆک و گەلەک ئەندامێن پەرلەمانی یێ پارتیا مە ھاتنە گرتن و زۆرداریا دەولەتێ ل سەر کوردان زێدە بوویی وێ یەکێ کارتێکرن ل دەنگێ کوردان کریە و رێژا دەنگێ نەخێر د ناڤ کوردان دا ل تورکیا ب رەنگەکێ بەرچاڤ زێدە بوویە.
ئه‌ڤرۆ نيوز:
سەرۆکێ قەوالێن ئێزدیان، دیارکر ئێزدیان چەندین داخوازی ئاراستەی سەرۆکێ ھەرێما کوردستانێ مەسعود بارزانی کرن ژوانا ژێ داخواز ھاتە کرن ھەموو دەڤەرێن ئێزدیان سەر ھەرێما کوردستانێ ڤە بن ئێدی ئێزدی نەشین دگەل عەرەبان بژێن پشتی کارەساتا شنگال روودایی.
قەوال بەھزاد سلێمان سڤۆ، سەرۆکێ قەوالێن ئێزدیان بۆ ئەڤرۆ دیارکر مە داخواز ژ سەرۆک بارزانی کر دەڤەرێن ئێزدیان بھێنە ئاڤادانکرن و خەلکی زەرمەند بھێتە قەرەبوول کرن وھەموو پرۆژەیێن خزمەتگوزاری بھێنە دابین کرن بۆ دەڤەرین ویرانکری وەکو باشیک و بەحزانی و شنگال و سنوونی و ھەموو دەڤەرێن دێ ھاتینە ویرانکرن ژلایێ تیرۆرستێن داعش.
خۆیا ژی کر خەلکی باشیک وبەحزانی داخوازا ئاڤاکرنا مەزارگەھێن ئاینی کرن 21 مەزارگەھێن ئاینی ھاتبوونە پەقاندن ژلایێ تیرۆرستێن داعش ڤە مە داخواز ژ سەرۆکێ ھەرێما کوردستانێ کر پشتەڤانیی بکەت بۆ ئاڤاکرنا ھەموو مەزارگەھێن ئیزدیان وگەلەک داخوازیێن دێ ھاتینە کرن لێ یا ژ ھەموو گرنگتر ئەو دەڤەرێن ئێزدیان سەر عێراقی ڤە نەمینن ھەموو بھێنە سەر ھەرێما کوردستانێ ڤە .
قەوال بەھزاد سلێمان ئەو ژی دیارکر ل رۆژا 17/3/2017 سەرۆک مەسعود بارزانی دگەل میری ئێزدیان و میر تەحسین بەگ و بابا شێخ و ھەموو ئەندامێن جڤاتا روحانیی و کەساتێن و رەوشەنبیرین ئێزدیان کۆمبوو گەلەک گەنگەشە ل سەر رەوشا ئێزدیان ھەموو وارەکی دا ھاتە کرن.
سەرۆکێ قەوالێن ئێزدیان گۆت: سەرۆک بارزانی ئێش وئازارێن ئێزدیان ب ئێش و ئازارێن ھەموو کوردستانێ زانین وگۆت عیبادەتی ودینداریێ و زمانی ئێزدیان کوردییە بۆ ھیچ کەس و لایەنەکێ نینە پیناسەک ب سەر ئێزدیاندا بسەپینت ئێزدی کوردێن رەسەنن ھەموو پشتەڤانیا خوە بۆ ئێزدیان بۆ پاشەرۆءژا ئێزدیان دیارکر بەحسی ئازادکرنا ھەموو دەڤەرێن ئێزدیان ھاتە کرن بتایبەتی یێن شنگال ماین ھەتا نوکە دەستێن تیرۆرستێن داعش دا و داخوازی ھاتە کرن ھەموو شیانان پشتەڤانیی و ھاریکاریا شنگالیان بھێتە کرن.
سەرۆکێ قەوالێن ئێزدیان ئاشکرا کر کو سەرۆک بارزانی زۆر پشتەڤان و خەمخوری ئێزدیانە دێ باشتر ژێ بۆ پاشەرۆژا ئێزدیان کارکەت ژین وژیارا ئێزدیان خوش کەت ھەر وەکو جەنابی سەرۆک ژی کۆمبوونی دا دیارکر ھەتا دام ودەزگەھێن رەسمی و ھێزا پێشمەرگەی ھەبیت نابیت ھێزەکا دێ ھەبیت رێگری ل ئاڤادانیی وچالاکێن دام ودەزگەھێن حکومەتی بکەت.
نيشاندان