ئه‌ڤرۆ نيوز:
رێڤەبەرێ سامانێن ماسیان ل دھۆکێ دیار کر، نوکە دەمێ زێدەبوونا سامانێ ماسیانە، ژ بەر ھندێ بڕیار ھاتەدان ھەر ژ نوکە گرتنا ماسیان بھێتە قەدەغەکرن ھەتا 25/6/2017 داکو ماسی د ناڤ رووبار و سکرێن دھۆکێ دا بەرەڤ نەمانی نەچن و کیم نەبن.
شوکری عومەر، رێڤەبەرێ سامانێن ماسیان ل دھۆکێ ئاشکرا کر، ب تنێ ماسیێن پڕۆژێن ناڤخۆیی ل بازاری دێ ھێنە فرۆتن، وەکو دیتر نابیت ماسیێن رووبار و سکران بھێـنە گرتن و فرۆتن، چونکو دەمێ زێدەبوونا سامانێ ماسیانە د ڤی وەختێ سالیێ دا ھەکە نێچیرڤان ماسیان بگرن دێ سامانێ ماسیان بەرەڤ کێمبوونێ چیت.
ناڤبری خویا ژی کر، ل پارێزگەھا دھۆکێ گەلەک جۆرێن ماسیان یێن ھەین، وەکو: ماسیێن شیخات، کارب، شەبوت، جری، ماسی زەر، ماسی رەش و گەلەک جۆرێن دێ یێن ماسیان ھەنە، ھەکە د ڤی وەرزی دا ماسی بھێنە گرتن دێ بەرەڤ نەمانی چن.
شوکری عومەر ئاماژە دا وێ چەندێ ژی کو وان داخواز ژ وەزارەتا چاندن و ژێدەرێن ئاڤێ یا حوکمەتا ھەرێما کوردستانێ کریە 10 ملیۆن خەرزێن ماسیان بۆ وان دابین بکەت، دا کو بەردەنە د ناڤ سکرێ مووسلێ دا و گۆت: “لێ ژ بەر قەیرانا دارایی ھێشتا بۆ مە نەھاتینە دابینکرن، چونکو جۆرەکێ ماسیان ل سکرێ مووسلێ مەترسی ل سەر ماسیێن دی دروستکریە ئەو ژی ماسیا شیخاتە کو جۆرێن دی یێن ماسیان دخۆت و زیانێ دگەھینیتە ماسیان، لەورا ئەم کار دکەین ماسیان زێدە بکەین و نەھێلین کێم ببن، ب تایبەتی د سکرێ مووسلێ دا”.
رێڤەبەرێ سامانێن ماسیان ل دھۆکێ راگەھاند، ئەو جۆرێ ماسیا شیخات گەلەک بەرگریا سەرمایێ دکەت، ھەروەسا ژی یێ ئەرزانە ژی ب تنێ کارتێکرنێ ل ژینگەھێ دکەت، چونکو جۆرێن دی یێن ماسیان دخۆت ئەڤە نەیا باشە ژ بەر کو دێ جۆرێن دی یێن ماسیان بەرەڤ کێمبوونێ چن، ھەکە ماسیا شیخات بەردەوام وان بخۆت، ژ بەرکو ئەڤ جۆرێ ماسیان سالێ دو جاران خەرزی دئینیت نە وەکو ماسیێن دی یە سالێ جارەکێ خەرزی بینیت.
شوکری ئاشکرا ژی کر کو نوکە گرتنا ماسیان قەدەغەیە، لێ ھەموو وەرزێن سالێ گرتنا ماسیان ب ئامیرێن کارەبێ و تورێن ھوور و رێیێن نەقانوونی پێدڤیە قەدەغەبیت، چونکو رێیێن نەقانوونی ھەموو جۆرێن ماسیێن ھوور و مەزن دھێنە گرتن، ئەڤە ژی زیانێ دگەھینیتە خەرزێ ماسیان و بەرەڤ کێمبوونێ دچن، لەورا ژی باشترە ئامیرێن کارەبێ و تۆرێن ھوور ئەو رێیێن ماسیێن مەزن و بچووک پێکڤە دھێنە گرتن بھێنە قەدەغەکرن ل ھەموو وەرزێن سالێ.
نيشاندان
