ئه‌ڤرۆ نيوز:
ژ ئه‌گه‌رێ هێرشێن ئه‌لكترۆنى په‌خشێ رووداو HD ل سه‌ر هه‌يڤا ده‌ستكرد يا نيلساتێ راوه‌ستيا.
مالپه‌رێ رووداو ئه‌ڤ په‌يامه به‌لاڤكريه و بينه‌رێن خوه ئاگه‌هدار كرينه كو ئه‌و دشێن ب رێيا په‌خشێ SD ته‌ماشه‌ى رووداو بكه‌ن، هه‌ر ديسا ل هه‌يڤێن ده‌ستكرد يێن هۆتبيرد و توركسات ژى په‌خشێ وان هه‌يه.
ئاماژه ب وێ چه‌ندێ ژى كريه كو د بزاڤێن به‌رده‌وام دانه ژ بۆ چاره‌كرنا ئه‌و كێشه‌يا هه‌ى.
ئه‌ڤرۆ نيوز:
سپێده‌هيا ئه‌ڤرۆ رۆژا شه‌مبى 31ى كانوونا دويێ 2016 دو ته‌قينێن خوه‌كوژى ل ده‌ڤه‌ره‌كا بازرگانى يا ناڤه‌راستا به‌غدا هاتنه ئه‌نجام دان و 65 كوشتى و بريندار ل دووڤ خوه هێلان.
د به‌ياننامه‌كێ دا، عه‌ميد سه‌عد مه‌عن، ئاخفتنكه‌رێ ب ناڤێ فه‌رمانده‌يا ئۆپه‌راسيۆنێن به‌غدا راگه‌هاند: هه‌ردو ته‌قين يێن “سنك” يا ناڤه‌راستا باژێرێ به‌غدا خوه‌كوژى بوون و دو كه‌سان ب كه‌مه‌رێن مينرێژكرى خوه په‌قانديه.
ب گۆره‌ى پێزانينان، د هه‌ردو ته‌قينان دا 21 كه‌س هاتينه كوشتن و 44 كه‌س ژى بريندار بووينه، ژ ئه‌گه‌رێ گرانيا برينێن هنده‌ك ژ وان پێشبينى دهێته كرن ژمارا كوشتيان زێده ببيت.
ئه‌ڤرۆنیۆز، سالار دۆسكى:
پشتى بهایێ ئه‌مپێرێ كاره‌بێ بۆ هه‌یڤا 12 ل دووف ده‌مژمێرێن كاره‌با گشتى 16 هزار و 500 دینار ژلایێ لژنا مولیدان ڤه بۆ هاتینه ده‌ست نیشانكرن، ڤێ چه‌ندێ نه‌رازیبوون پشت خوه هێلان، ل سه‌ر ڤێ بریارێ پارێزگه‌رێ دهۆك فه‌رمان دا پێداچوون دبهایێ ئه‌مپێرى دا بهێته‌كرن وه‌ك پارێزگه‌هێن دى سه‌رده‌رى ل گه‌ل وه‌لاتێن پارێزگه‌ها دهۆك دبهایێ ئه‌مپێرى دا بهێته كرن.
جه‌هوه‌ر عه‌لى قایمقامێ قه‌زا دهۆك ل سه‌ر بابه‌تى بۆ ئه‌ڤرۆ نیۆز گۆت: پشتى نه‌رازیبوونێن وه‌لاتیان كو ئه‌مپێر بوویه 16 هزار و 500 و پشتى فه‌رمانا پارێزگه‌رى كو ده‌مژمێرێن كاره‌بێ و بهایێ ئه‌مپێرى دڤێت وه‌ك هه‌موو پارێزگه‌هێن هه‌رێما كوردستانێ بیت، ئه‌ڤرۆ 29/12/2016 كومبوونه‌كا دى هاته ئه‌نجامدان و ده‌مژمێر كاره‌بێ و بهایێ ئه‌مپێرى بۆ هه‌یڤا ئێك هاتنه ده‌ست نیشانكرن.
جه‌هه‌وه‌ر عه‌لى ئه‌و ژى گۆت: كاركرنا مولیدان بۆ هه‌یڤا ئێك سالا 2017 دێ حه‌فتى سپێدێ بۆ هه‌شتى سپێدێ بیت ژ به‌ر ده‌وامان و پێنجى ئێڤارى هه‌تا دوازده‌ى شه‌ڤێ و ئه‌ڤه به‌رنامێ پارێزگه‌هێن دى یه و دێ بهایێ دهۆكێ ژى وه‌ك یێ وان لێ هێت.
گۆت ژى: دووماهیا هه‌یڤا ئێك دێ بها هێته دان و دێ نێزیكى هه‌شت هزار دیناران بیت بۆ هه‌ر ئه‌مپێره‌كێ كاره‌بێ
قائیمقامێ دهۆك ئه‌و ژى گۆت: ل هه‌یڤا دوزاده و ژ به‌ر نه‌باشیا ره‌وشا كاره‌با نشتیمانى و زێده‌كاركرنا مولیدان بهایێ ئه‌مپێرێ كاره‌بێ گران ب بوو و دیسا بهایێ گازوایلێ ژى ڤێ هه‌یڤێ گران بوو، له‌وما بهایێ ئه‌مپێرى بوو 16 هزار و 500 و بتنێ وه‌لاتى دێ 15 هزار دیناران ده‌ن و دڤێت خه‌لك ڤى پاره‌ى بده‌ت و ئه‌ڤه یێ هه‌یڤا چووی یه.
جڤاتا پارێزگەها دهۆكێ ئەڤرۆ 29ى كانوونا ئێكێ 2016 ل سەر گرانیا بهایێ ئەمپیرێن كارەبا موەلیدان رونكرنەك بەلاڤكر، ئەڤە ژی دەقێ رونكرنی یە:
روهنكرنەك ل دۆر رەوشا بهایێ كارەبا موەلیدان:
وەكو خەلكێ مە پێ هایدار، لێژنا سەرپەشتیا بلندا موەلیدان كو ب ئیمتیاز لێژنا پارێزگەها دهۆكێ یە، ل رۆژا 27-12-2016 دگەل ئالیێن پەێوەندار وب سەرۆكاتیا قائیمقامێ قەزا دهۆكێ، كو د هەمان دەمێ دا سەرۆكێ وێ لێژنێ یە، كۆمبوونەك كر ل دۆر میكانزمێن هەر جار بهایێ ئەمپێرەكێ كارەبا موەلیدان ب 16.500 دیناران هاتە دەستنیشانكرن وبریار هاتە دان.
لێ خەلكێ مە یێ دلسۆز گازندە ژ بریار 16.500 دیناران كرن ب شێوەیێن جۆدا گڤاشتن كرن وپشتی ئێدارا پارێزگەها دهۆكێ بەرائەتا خوە ژ ڤی بریارێ دای وەسا دایە خویاكرن كو هایدار نینە!!، بریارە ئەڤرۆ رۆژا 29-12-2016 جارەكا دی لێژنا ناڤبری كۆم ببیت.
پسیار ئەوە ئەرێ گەلۆ ئەگەر بهێن ل سینۆرێ دهۆكێ ژی بهایێ كارەبێ وەكو هەولێر وسلێمانیێ لێ بێت دێ چەند دەمژمێران موەلیدە كار كەن و ئەرێ هوون دزانن دێ چەند دەمژمێران كارەبا موەلیدان هەبیت و چەند دەمژمێران نابیت.
ئەری هوون دزانن دێ ئالۆزی دروست بن چونكی رەوشا بازارێ ب گشتیی و كلینكێن نوشداری وفرنێن نانی و ماركێت و خومەتگوزاریێن دی دێ ژكار كەڤن، دشێن بیژین هوسا ژیان دێ زەحمەت بیت.
ئەنجومەنی پاریزگەها دهۆكێ
29-12-2016
ئه‌ڤرۆ نيوز:
پەیڤدارێ ئێکەتیا وەبەرئینەرێن ھەرێما کوردستانێ راگەھاند، ژبەر قەیرانێن سیاسی و دارایی و شەڕێ داعشێ و نەجێگربوونا رەوشا ئابووری ل ھەرێما کوردستانێ، د دو سالێن بۆری دا مە پاشڤەچوونا بەرچاڤ ل کەرتێ ئابووری ل ھەرێما کوردستانێ یا ھەی ب تایبەتی د کەرتێ تایبەت دا و ب تایبەتتر د وەبەرئینانێ دا کو د دەمێ بۆری دا مە زێدەتر ژ 30 ملیار دۆلاران پاشڤەچوون د پرۆژێن وەبەرئینانێ دا یێن ھەین، ئاماژە دا کو ئیران یا ئاسانکاریێن مەزن بۆ وەبەرئینەرێن ھەرێمێ بەرچاڤ دکەت ب مەرەما ڤەکێشانا وان بۆ ئەنجامدانا پرۆژێن وەبەرئینانێ ل ئیرانێ.
مەلا یاسێن پەیڤدارێ ئێکەتیا وەبەرئینەرێن ھەرێما کوردستانێ بۆ رۆژناما ئەڤرۆ گۆت: ھندەک وەبەرئینەر، ب تایبەتی یێن بیانی، ژبەر قەیرانا دارایی ھەرێما کوردستانێ یا بجە ھێلای، دیسا مە 25 دەرفەتێن وەبەرئینانێ ل ھەرێما کوردستانێ کو پەیوەندی ب وەبەرئینەرێ دەرەکی ڤە و دیسا وەبەرئینەریا ھەڤپشک (وەبەرئینەرێ دەرەکی و یێ ناڤخوەیی) ژ دەست داینە، ئەو وەبەرئینەرێن ل ھەرێما کوردستانێ ماین ب تایبەت یێن خودان سەرمایا وەبەرئینانێ، ھندەک پرۆژێن وان یێن وەبەرئینانێ یێن راوەستیاین و ھندەک ژ وان ھەرێما کوردستانێ بھێلن و ل دەرڤە وەبەرئینانێ دکەن.
مەلا یاسین ئاماژە دا وێ چەندێ کو وەبەرئینەرێن ھەرێما کوردستانێ یێ کارێن وەبەرئینانێ ل چەندین وەلاتان دکەن وەکو جورجیا و تورکیا و چەندین وەلاتێن ئورۆپی و عەرەبی، بەلێ ل ڤێ دووماھیێ ئیران یا ئاسانکاریێن باش بۆ وەبەرئینەران دکەت ب تایبەتی وەبەرئینەرێن ھەرێما کوردستانێ کو نوکە ھژمارەکا بەرچاڤ یا وەبەرئینەرێن ھەرێمێ دخوازن پرۆژێن وەبەرئینانێ ل ئیرانێ ئەنجام بدەن.
پەیڤدارێ ئێکەتیا وەبەرئینەرێن ھەرێما کوردستانێ خویا کر ژی، شاندێن ئیرانی ئەوێن ب رێیا کونسولگەریێن خوە دھێنە ھەرێما کوردستانێ، سەرەدانا وەبەرئینەرێن ھەرێما کوردستانێ دکەن و ھندەک وەبەرئینەر ب حەزا خوە دچن وەبەرئینانێ ل ئیرانێ دکەن و ل دەمێ بۆری کۆنگرەکێ وەبەرئینانێ ل پارێزگەھا کەرمانشاە یا ئیرانی ھاتە ئەنجامدان کو ھژمارەکا بەرچاڤ یا وەبەرئینەرێن ھەرێمێ پشکداری تێدا کربوو.
ھەروەسا مەلا یاسین گۆت: وەبەرئینەرێن ھەرێما کوردستانێ یێن پرۆژێن وەبەرئینانێ ل ئیرانێ ئەنجام ددەن دکێمن، بەلێ ب دیتنا من ھەکە ھەتا سالا بھێت رەوشا نەجێگیر یا و قەیرانا دارایی د بەردەوام بن، ئیران دێ وەبەرئینەران ھاندەت کو قانوونا نوو یا وەبەرئینانێ ل ئیرانێ 100% پرۆژان ب ناڤێ وەبەرئینەران دکەت و ل پتریا پارێزگەھێن ئیرانێ بەرھەڤی بۆ ئەنجامدانا پرۆژێن وەبەرئینانێ دھێتە کرن و دەمێ ئەم ل کۆنگرێ وەبەرئینانێ ل کەرمانشاە، ب بھایێ شەش ملیار دۆلاران پرۆژێن وەبەرئینانێ دانانە بەرچاڤێن وەبەرئینەرێن ھەرێمێ ب مەرەما وێ چەندێ کو د سالا داھاتی دا وەبەرئینەرێن ھەرێمێ بەر ب وەبەرئینانێ ل ئیرانێ بچن، وەبەرئینەرێ ھەرێما کوردستانێ ژی گەلەک چاڤلێکرنێ دکەت و ھەکە پرۆژەکێ وەبەرئینانێ یێ وەبەرئینەرەکێ ھەرێمێ سەرکەفتنێ ل ئیرانێ ب دەستڤە بینیت، وەبەرئینەرێن دی ژی دێ چاڤ لێ دکەن و د دووڤ دا چن بۆ ئەنجامدانا پرۆژان ل ئیرانێ.
مەلا یاسین گۆت ژی: ھژمارا وەبەرئینەرێن ھەرێمێ یێن پرۆژێن خوە ڤەگوھاستینە دەرڤە ژ 20 وەبەرئینەران نابۆرن، بەلێ مە نێزیکی ھزار وەبەرئینەرێن دی یێن ھەین و ئەم ناخوازین ببیتە مۆدێل و پتریا وان بەر ب ئەنجامدانا پرۆژێن وەبەرئینانێ ل دەرڤە بچن، چونکی ئەڤە دێ بیتە خالەکا مەترسیدار و پێدڤیە جڤاتا بلند یا وەبەرئینانێ و جڤاتا بلند یا ئابووری ل ھەرێما کوردستانێ کۆمبوونەکا بلەز بکەن و چارەیەک بھێتە دانان کو ئێدی زێدەتر ئابوورێ ھەرێما کوردستانێ پاشڤە نەچیت، ژبەر کو ب راستی ئابوورێ ھەرێمێ یێ د مەترسیەکا مەزن دا.
زێدەتر گۆت: ھەرێما کوردستانێ یا تووشی قەیرانەکا ئابووری یا مەزن بووی و پێدڤیە حوکمەتا ھەرێما کوردستانێ چاکسازیێن مەزن بکەت و پێداچونەکا رژد د رەوشا کەرتێ تایبەت دا بکەت کو سەرمایەدارێن کورد ل شوونا سەرمایێ خوە ل دەرڤە بدەنە کارێ، ل ھەرێما کوردستانێ پرۆژێن خوە ئەنجام بدەن، ھەکە نە، گەلەک وەبەرئینەرێن ھەرێمێ دێ نەچار بن پرۆژێن وەبەرئینانێ ل دەرڤە ئەنجام دەن.
ئه‌ڤرۆ نيوز:
رێڤەبەرێ کۆمسیونا بلندا سەربەخۆیا ھەلبژارتنان ل دھۆکێ بۆ رۆژناما ئەڤرۆ ئاشکرا کر کو ھەر کەسەکێ ناسناما خوە یا ھەلبژارتنان بەرزەکربیت دێ 25 ھزار دینار ل دووڤ قانوونێ ژێ ھێنە وەرگرتن.
یوسف سەلمان رێڤەبەرێ کومسیونا دھۆک یا ھەلبژارتنان ل دھۆکێ ئاشکەرا کر کو ھەر کەسێ کارتا خوە یا ھەلبژارتنان بەرزەکری دێ 25 ھزار ژێ ھێنە وەرگرتن، چونکی ھەر کەسێ قەستا بنگەھێن تۆمارکرنێ بکەن دڤێت ناسناما کۆمیسونێ دگەل بیت و گۆت “ئەڤە ژی ل دووڤ پیرابوونێن یاسایی ئەم فەرمانا دادوەری پێ دەردئێخین و ناسنامەکا دی بۆ چێ دکەین”.
یوسف سەلمان تەکەز ل وێ چەندێ ژی کر کو 35% وەلاتیان سەرەدانا بنگەھێن دەنگدانێ کریە و گۆت “بەری نوکە رۆژانە مە تا 700 کەسان تۆمار دکرن، لێ نوکە ل سەر 2400 کەسان دا ئەم تۆمار دکەین، ھەر چەندە مە بزاڤ کریە ئەڤ پارە ژ وەلاتیێن ناسنامە بەرزەکری نەھێتە وەرگرتن، بەلێ ئەڤە پێرابوونن و ژ ھەمی پارێزگەھێن عیراقێ دگریت”.
ئەڤرۆ نيوز:
ڕێڤەبەرێ کاروبارێن پشکنینێ ل ڕێڤەبەریا گشتی یا گەشت و گۆزارێ ل پارێزگەھا دھۆکێ بۆ ئەڤرۆ دیار کر ھەرچەندە پێشبینیێ دکەن کو ب ھەلکەفتا ھاتنا سەرێ سالا نوو یا زایینی و گەشتێن زڤستانێ کو زۆر کێم بھێن، لێ ھندەک بەرھەڤی بۆ کرینە.
شەمال جەعفەر عەلی، ڕێڤەبەرێ کاروبارێن پشکنینێ ل ڕێڤەبەریا گشتی یا گەشت و گۆزارا دھۆکێ ئاشکرا کر، ئەو گەشتیارێن ب ھەلکەفتا سەرێ سالا نوو قەستا پارێزگەھا دھۆکێ دکەن ب رێکێن کۆمپانیێن گەشتیاری؛ یێن د بیاڤێ گۆزاری دا کار دکەن دێ ھێنە پارێزگەھێ و گۆت “پڕانیا گەشتیاران ژی ژ ناڤەراست و باشوورێ عیراقێ دھێن و ھندەک گەشتیار ژی بیانینە و ب رێیا دەرگەھێ خالا سنووریا ئیبراھیم خەلیل دێ ھێنە پارێزگەھا دھۆکێ”.
شەمال جەعفەر دا زانین کو 30 ھەتا 35 خوارنگەهـ، کافێ و ھولان پڕۆگرامێن خوە یێن تایبەت ب ھاتنا سەرێ سالێ ھەنە و بەرھەڤی ژی ھاتینەکرن کو ل شەڤا سەرێ سالێ دەست ب ئاھەنگان بکەن.
رێڤەبەرێ کاروبارێن پشکنینێ ل رێڤەبەریا گەشت و گۆزارێ ل دھۆکێ خویا ژی کر، جھێن پلە نایاب وەکو جھێن پێنج ستێٍر یێن ھاتینە نەچارکرن کو ل شەڤا سەرێ سالێ ئاھەنگان بگێرن و د خزمەتا گەشتیاران دا بن، داکو ئەو گەشتیارێ سەرەدانا پارێزگەھێ دکەت بشێت دەمێن خۆش ببۆرینن.
ئه‌ڤرۆ نيوز:
بەرپرسەکا پارێزگەھا ھەولێرێ ئاشکرا کر کو دەرمان ل ھەرێما کوردستانێ نەماینە و ھەکە ڕەوش ب ڤی رەنگی بمینیت و بەغدا پشکا ھەرێما کوردستانێ نەدەت دێ نەخۆشخانە و جھێن ساخلەمی بێ دەرمان مینن، ھەروەسا دبێژیت: ڕۆژانە ب دەھان بریندارێن سۆپایێ عیراقێ ب مەرەما چارەسەرکرنێ دگەھنە نەخۆشخانێن ھەولێرێ.
خانزاد وەسۆ، سەرۆکا لیژنا ساخلەمیێ ل جڤاتا پارێزگەھا ھەولێرێ بۆ ڕۆژناما ئەڤرۆ دیار کر، حوکمەتا عیراقێ دەرمان و کەلوپەلێن ساخلەمیێ بۆ ھەرێما کوردستانێ وەکو پێدڤی ناھنێریت و گۆت: “مە چەندین جاران داخوازا دابینکرنا دەرمانا کریە، بەلێ بزاڤێن مە سەرنەکەفتینە، ھەتا رێڤەبەرێ عمبارا دەرمانان ژی ل وەزارەتا ساخلەمیێ ئەڤ چەندە بۆ مە راگەھاندیە، ھەکە رەوشا ھنارتنا دەرمانان ب ڤی رەنگێ نوکە بمینیت؛ ب ئێکجاری دەرمان دێ ب دووماھی ھێن و دەرمان ل نەخۆشخانە و جھێن ساخلەمیێ نامینن، حوکمەتا عیراقێ پشکەکا زۆر یا کێم فڕێ دکەت و بەھرا ھەموو وەلاتیان ناکەن”.
خانزادێ ئاماژە ب وێ چەندێ ژی کر، ئاریشا ژ ھەموویان مەزنتر ئەوە، ئەو دەرمانێن دھێنە بکارئینان پتریا وان بۆ ئاوارە و سەربازێن عیراقی نە و گۆت: “مە دووڤچوون یا کری، دیسا مە سەرەدانا نەخۆشخانان ژی یا کری، ل باژێڕێ ھەولێرێ سێ نەخۆشخانە تایبەت بۆ بریندارێن سۆپایێ عیراقێ ھاتینە تەرخانکرن و ڕۆژانە ب دەھان بریندارێن سۆپایێ عیراقێ ل مووسلێ بۆ نەخۆشخانێن ھەولێرێ دھێنە ڤەگوھاستن، ھندی بریندار گەلەکن، نەخۆشخانە تژی بوویە و جە ل سەر تەختێن نەخۆشخانێ نەمایە، لەو گەلەک بریندار ل سەر ئەردی ھاتینە دانان”.
ئه‌ڤرۆ نيوز:
ل سالا 2016 بزاڤەکا چڕو پڕ یا سەرەدانێن دپلوماسی و سەرۆکێن جیھانی و بەرپرسێن رۆژئاڤا بۆ ھەرێما کوردستانێ ھاتینە ئەنجامدان، کو بادەکێن لەشکری و ئیمناھی و ئابوری و سیاسی ھاینە بەحسکرن.
وەسا دیارە کو بەردەوامیا شەرێ دژی داعشێ د دەمێ دو سالێن بوری دا و سەرکەفتنێن پێشمەرگەیێن قارەمان ل سەر تیرۆرستێن داعشێ و پرۆسا رزگارکرنا مووسلێ، ڤان خالان ھەموویان ھەرێما کوردستانێ کرە ناڤەندەکا سیاسی یا گرنگ و روگەھا سەرەدانێن سیاسی و ھاتنا شاندێن بیانی بۆ ھەولێرا پایتەخت، بۆ ھندێ دانوستاندن و پێکگوھارتنا بیرو و بوچوونان ل گەل مەزنە بەپرسێن ھەرێما کوردستانێ ل دۆر کێشێن گرنگ و گەرم و گۆڕێن ل دەڤەرێ بکەن.
• ل رێککەفتی 10 / 1/ 2016 ، لودڤایک ئاشتەر جێگرێ سەرۆک وەزیرێن ھولەندا ل گەل شاندەکی، سەردانا ھەرێما کوردستانێ کرن، و ل گەل سەروک بارزانی کومبوون.
• ل رێککەفتی 11/ 1/ 2016 سەرۆکێ ھەرێما کوردستانێ مەسعود بارزانی ل گەل بالیۆزی ئیتالی (مارکۆ کارنیلوس) و شاندێ ل گەل کومبوو، بۆ ھندێ تیمێن نوشداری بۆ ھاریکاریا ھێزێن پێشمەرگەی بۆ ھەرێمێ بھێنە رەوانەکرن.
• رێککەفتی 14 / 1/ 2016 جەنەرال تۆم بیکیت ھنارتیا تایبەتێ ئێمناھیا حوکمەتا بەریتانیا گەھشتە ھەرێما کوردستانێ ل گەل شیرتکارێن لەشکری یێن رۆژھەلاتا ناڤین و ل گەل سەرۆک بارزانی کومبوون.
• رێککەفتی 21/ 1/ 2016 سەرۆک بارزانی ب ئامادەبوونا سەرۆًکێ حوکمەتا ھەرێمێ کومبوونەک ل گەل جەنرال لوید ئۆستن سەرکردێ ھێزێن دەڤەرا ناڤێن یێن ھێزا ئەمریکی ئەنجامدان.
• رێککەفتی 25 / 1/ 2016 سەرۆک بارزانی ل گەل ھێزێن ھەڤپەیمانان ل دۆر رزگارکرنا مووسلێ ژ چەکدارێن داعشێ کومبوو.
• رێککەفتی 7 / 3 / 2016 شاندەکێ ھەڤپشک یێ نەتەوەیێن ئێکگرتی و ئێکەتیا ئەورۆپی و وەلاتێن گرۆپێ حەفت بەنکا دەولی، سەرەدانا ھەرێما کوردستانێ کرن.
• رێککەفتی 17/ 3/ 2016 سەرۆک بارزانی پێشوازیا وەزیرێ دەرڤەیێ بەریتانی فلیپ ھاموند و شاندێ ل گەل دا کرن.
• رێککەفتی 26 / 3/ 2016 سکرتێرێ نەتەوەیێنئ ێکگرتی بانکی موون و شاندێ ل گەل سەرەدانا ھەرێما کوردستانێ دا، و ل گەل سەرۆک بارزانی کومبوون.
• رێککەفتی 5 / 4/ 2016 نێچیرڤان بارزانی ل گەل سەرۆکێ نوونەریا کاروبارێن دەرڤەیێ کونگرێسێ ئەمریکی (ئاید رویس) و شاندێ ل گەل کومبوو.
• رێککەفتی 12 / 4/ 2016 وەزیرێ بەرگریا فەرەنسا (ئایڤ لودریان) و شاندەکێ تایبەت گەھشتنە ھەرێما کوردستانێ.
• رێککەفتی 14 / 4/ 2016 سەرۆکێ ھەرێما کوردستانێ ل گەل سەرکردێن ھێزێن دەڤەرا ناڤێن یا ئەمریکی جەنەرال ( جوزێف ڤوتێل ) کومبوو وپیروًَزباھیا پۆستێ نوو لێکرن.
• رێککەفتی 22/4/ 2016 سەرۆًکێ دەستەیا سوپاسالارێ ئەمریکی یا ھەڤپشک گەھشتە ھەرێما کوردستانێ و ژلایێ سەرۆک بارزانی ڤە ھاتە پێشوازیکرن.
• رێککەفتی 28/4/2016 سەرۆکێ دەستەیا سوپاسالارێن ھێزێن کەندی جەنەرال (جونپان ناڤس) ل گەل سەرۆک بارزانی کومبوو.
• ھەر دھەمان رۆژدا سەرۆک بارزانی ل گەل وەزیرێ گەشپێدانا تورکیا (جەودەت یلماز) و شاندێ ل گەل کومبوو.
• ل ئێڤارا رۆژا رێککەفتی 28/4/2016 ھەمان رۆژدا سەرۆک بارزانی ل ھەولێرا پایتەخت ل گەل جێگرێ سەرۆکێ ئەمریکی (جو بایدن) و شاندێ ل گەل کومبوو.
• رێککەفتی 10 /5 / 2016 سەرۆک بارزانی ل گەل وەزیرێ بەرگریا ئیتالیا (روبیرتا پێنۆتی) کومبوو.
• رێککەفتی 11/ 5/ 2016 سەرۆ بارزانی پێشوازی ل وەزیرێ برگریا ھنگاری (ستیڤان شمیچکۆ) و شاندێ ل گەل کرن.
• رێککەفتی 15 / 5/ 2016 وەزیرێ ئتیلاعاتا ئیرانێ ل ھەولێرێ ل گەل سەرۆک بارزانی کومبوو.
• رێککەفتی 12/7/ 2016 ب ئامادەبوونا سەرۆکێ ھەرێما کوردستانێ مەسعود بارزانی رێککەفتنا لەشکری دناڤبەرا وەزارەتا ھەرێما کوردستانێ و وەزارەتا بەرگریا ئەمریکی ل ھەولێرێ ھاتە ئیمزاکرن.
• د ھەمان رۆژدا سەرۆک بارزانی پێشوازی ل وەزیرێ بەرگریا کەندی (ھارجێت سینگ ساجان) کر.
• رێککەفتی 23/7/ 2016 سەرۆک بارزانی ل گەل شاندەکێ بالۆزخانا ئەمریکی ل بەغدا کومبوو، ورەخنەیێن توند سەبارەت نەپشکدارکرنا شاندێ ھەرێما کوردستانێ د کونگرێ وەلاتێن ھەڤپەیمانان د شەرێ دژی تیرۆرستێن داعشێ ل واشنتۆن کرن.
• رێککەفتی 15 / 9/ 2016 سەرۆک بارزانی پێشوازیا جێگرێ وەزیرێ دەرڤەیێ ئەمریکی (تونی بلینکین) کر.
• رێککەفتی 22/ 9/ 2016 سەرۆک بارزانی ل گەل وەزیرێ بەرگریا بەریتانی (مایکل ڤالۆن) کومبوو.
• دھەمان رۆژدا سەرکدرێ ھێزێن دەڤرەا ناڤێن یا ئەمریکی جەنەرال (جوزێف ڤۆتیل) گەھشتە ھەرێما کوردستانێ.
• رێککەفتی 23/ 9 / 2016 سەرۆک بارزانی ل گەل وەزیرا بەرگریا ئەلمانی و شاندێ ل گەل دا کومبوو.
• رێککەفتی 23 / 10 / 2016 سەرۆک بارزانی پێشوازیا وەزیرێ بەرگریا ئەمریکی ئاشتون کارتەر و شاندێ ل گەل کرن.
• رێککەفتی 25 / 10/ 2016 سەرۆک بارزانی پێشوازیا سەرۆک وەزیرێن سویدی (ستیڤان لوڤین) و شاندێ ل گەل کرن.
• رێککەفتی 3/ 12 / 2016 وەزیرێ دەولەتا بەریتانی یێ کاروبارێن گەشپێدانا دەولەتێ ( روی ستیوارت ) و شاندێ ل گەل سەردانا ھەرێما کرن.
• رێککەفتی 10/ 12/ 2016 سەرۆک بارزانی ل گەل ژمارەکا جەنەرال و بەرپرسێن لەشکری ئەمریکی یێن بەرێ و ھێزا ھەڤپەیمانیا نێدەولی یێن پشکداری د شەرێ سالا 1991 دا بۆ پاراستنا کوردستانێ دا کرین کومبوو.
• رێککەفتی 11/12/2016 سەرۆک بارزانی ل گەل وەزیرێ بەرگریا ئەمریکی ئاشتون کارتەری کومبوو.
• رێککەفتی 18/ 12/ 2016 سەرۆک بارزانی پێشوازیا وەزیرێ دەرڤەیێ وەلاتێ بەلجیا و ھولەندا و لۆکسمبۆک کرن.
• رێککەفتی 23/ 12/ 2016 وەزیرێ بەرگریا کەندا ( ھارجیت سینگ ساجان) گەھشتە ھەرێما کوردستانێ و ژئالیێ مەزنە بەرپرسێن ھەرێما کوردستانێ ڤە ھاتە پێشوازی کرن.
نيشاندان