ئه‌ڤرۆ نيوز:
تانوكه ژماره‌كا وه‌لاتێن وه‌كو ماليزيا و توركيا و يابان و ئه‌نده‌نوسيا راگه‌هاند كو سوبه ئێكه‌م رۆژا ره‌مه‌زانێ يه و وه‌لاتێ مه‌غرب ژى رۆژا سێ شه‌مبى وه‌ك ئێكه‌م رۆژا ره‌مه‌زانێ دياركر.
مه‌ريوان نه‌قشبه‌ندى رێڤه‌به‌رێ په‌يوه‌نديێن وه‌زاره‌تا ئه‌وقاف و كاروبارێن ئاينى ئاشكراكر كو هه‌رێما كوردستانێ پشكه‌كه ژ عيراقێ و جيهانا ئيسلامى، له‌وما دێ ل گه‌ل ديوانا وه‌قفا سونى هه‌ماهه‌نگيێ كه‌ين و ل ده‌مژمێر 7 بۆ 9 ئه‌ڤ شه‌ڤه دێ ئێكلا بيت.
ئه‌ڤرۆ نيوز:
ژ ئەگەرێ تێکچوونا رەوشا ئابووری یا حوکمەتا ھەرێما کوردستانێ، پێشبینی دھێتە کرن کو ئێدی بەلاڤکرنا گازا سپی یا بەری نھا ژ ئالیێ حوکمەتێ ڤە ب بۆھایێ 40 ھزار دیناران بۆ ئێک بەرمیل ژ دەستێن حوکمەتێ دەرکەڤیت و ببیتە بازرگانی و بکەڤیتە د دەستێ کەرتێ تایبەت دا و بۆھا ژی ژ 40 ھزار دیناران گرانتر لێ بھێت. سەرۆکێ لیژنا پیشەسازی و ووزێ ژی ل جڤاتا پارێزگەھا دھۆکێ راگەھاند کو پلێتا ژمارە دو یا زڤستانا سالا بۆری ناھێتە مەزاختن و ئێدی بۆ زڤستانا ئەڤ سالە ژی چو پلێت نینن و دێ گازا سپی ب بازرگانی ھێتە فرۆتن.
عەبدولسەمەد تێلی، سەرۆکێ لیژنا پیشەسازی و ووزێ ل جڤاتا پارێزگەھا دھۆکێ بۆ ئەڤرۆ راگەھاند، ل مەھا ئێک ژ ئەڤ سالە یا 2016 بریار ژ وەزارەتا سامانێن سرۆشتی دەرچوو بوو کو ئێدی کار ب پلێتێن گازا سپی نەھێتە کرن و چو پلێت نەھێتە مەزاختن و ھوسا پلێتا ژمارە دو ئەوا مایە د دەستێن خەلکی دا پووچ بوو، چونکو وەزارەتا سامانێن سرۆشتی راگەھاند کو د شیانێن وان دا نینە ڤێ پشتەڤانیێ بۆ خەلکی بکەن، لەوما بەلاڤکرنا گازا سپی ل سەر وەلاتیان ب پلێت ھاتە راگرتن و پلێتا ژمارە دو نەھاتە مەزاختن.
سەرۆکێ لیژنا پیشەسازی و ووزێ ل جڤاتا پارێزگەھا دھۆکێ ئاشکرا کر، بەری ھینگی پشتەڤانیا گەلەک کەرتێن دی ژ ئالیێ حوکمەتێ ڤە دھاتە کرن، بۆ نموونە پشتەڤانیا موەلیدان دھاتە کرن ب دانا گازوایلێ، و ئەو پشتەڤانیە د بۆ ئەگەر کو بۆھایێ ئەمپێرێ کارەبێ یێ ھەیڤانە ل سەر خەلکی دھاتە کێمکرن، بەلێ ئەو پشتەڤانیە ھاتە راگرتن، ھەروەسا پشتەڤانیا کەرتێ ھێلێن ناڤخۆ وەکو تەکسی و رەف و ترۆمبێلێن بارھەلگر دھاتە کرن و پشتەڤانیا کارگەھان دھاتە کرن و ئەڤ پشتەڤانیە ھەموو ھاتینە راگرتن.
تێلی ئاماژە دا وێ چەندێ ژی کو ھەتا بەری نھا پشتەڤانیا ترۆمێلێن حکوومی یێن رێڤەبەریێن میری دھاتە کرن، بەلێ خوە ئەو پشتەڤانیە ژ ل 14/5/2015 ھاتیە راگرتن ب نڤیسارەکا وەزارەتا سامانێن سرۆشتی و گۆت ژی: ھەر د ڤی چارچووڤێ نەمانا پشتەڤانیێ دا و ژ ئەگەرێ تێکچوونا رەوشا دارایی یا حوکمەتا ھەرێما کوردستانێ، بەلاڤکرنا گازا سپی ژ ئالیێ حوکمەتێ ڤە یا ھاتیە راگرتن.
ل دور چارەسەریێ ژی، عەبدولسەمەد تێلی، سەرۆکێ لیژنا پیشەسازی و ووزێ ل جڤاتا پارێزگەھا دھۆکێ ئاشکرا کر کو ئەم نھا ل پێگوھۆرەکی دگەرین کو گەلەک کارتێکرن ل سەر خەلکی نەھێتە کرن کو د خزمەتا خەلکی دا بیت و رەنگە پارەیەکێ گەلەک کێم بچیتە سەر بۆھایێ بەرمیلا گازێ کو نێزیکی 10 ھەتا 15 ھزار دیناران بیت و گۆت ژی: ئەو پلێتا ژمارە دو یا مایی ھاتیە ھەلوەشاندن و بۆ زڤستانا ئەڤ سالە ژی ب چو رەنگان گازا سپی ب پلێتان ناھێتە مەزاختن.
غالب محەمەد، سەرۆکێ لیژنا پیشەسازی ل جڤاتا پارێزگەھا سلێمانیێ راگەھاند، ھەکە ئەڤ بریارە بھێتە بجھئینان، دێ بۆ وەلاتیان کارەکێ گەلەک خراب بیت و ب چو رەنگان د بەرژەوەندا وەلاتیان دا نابیت و دێ وەلاتی گەلەک زەرەرمەند بیت، چونکو ھەکە نھا بۆھایێ ئێک بەرمیلا گازی سپی یا حوکمەت ل سەر وەلاتیان دابەش دکەت ب 40 ھزار دیناران بیت، ھەکە بکەڤیتە دەستێ کەرتێ تایبەت دێ بەرمیل ب 80 ھزار دیناران بیت.
ناڤبری ئاماژە دا وێ چەندێ، ھەکە حوکمەت گازا سپی بۆ ھەموو سالێ بکەتە بازرگانی دێ زیانەکا مەزن ب وەلاتیان کەڤیت، بەلێ ھەکە د سالێ ھەموویێ دا ب تنێ ئێک بەرمیلا گازا سپی بدەتە وەلاتیان ب بۆھایێ 40 ھزار دیناران و پشتی ھینگی ھەکە وەلاتی پێدڤی بوون بۆ خوە بکرن، گەلەک کارتێکرن ل وان نابیت و بۆھایێ گازا سپی ژی گەلەک کاتێکرن لێ نابیت و ل بازاری گەلەک گران نابیت و گۆت ژی: بکەڤیتە دەستێ کەرتێ تایبەت دێ زیانەکا مەزن ب خەلکی کەڤیت.
ئاشکرا ژی کر کو نھا گازوایل و پانزین ب ھەموو شێوەیان بووینە بازرگانی و گازا سپی د ھەمان رێ دا دەربازردبیت و ئەگەرێ سەرەکی یێ ڤێ چەندێ بۆ تێکچوونا رەوشا ئابووری یا حوکمەتا ھەرێما کوردستانێ ڤەدگەریت و گۆت ژی: ھەکە ببیتە بازرگانی ژی پێدڤیە گەلەک بازرگان گازا سپی بینن، بۆ ھندێ بۆھایێ ئێک بەرمیل ژ 100 ھزار دیناران بھێتە خوارترێ و زیانەکا مەزن ب وەلاتیان نە کەڤیت.
ئەڤرۆ نیوز:
رێڤەبەرێ گشتیێ ساخلەمیا نەینەوا ب وەکالەت دیارکر کو ب ھەڤکاری ل گەل رێڤەبەریا گشتیا ساخلەمیا دھۆکێ و رێکخراوا نوشدارێن بی سنۆری یا جیھانی دێ نەخۆشخانەکا نشتەرگەریان ل دەڤەرا تل مەر ل ناحیا زومار ھێتە دروستکرن وەکو دەسپێک بۆ شەری رزگارکرنا پارێزگەھا نەینەوا.
د. ئەحمەد نازم ئاغا دوبەردانی رێڤەبەرێ گشتیێ ساخلەمیا نەینەوا ب وەکالەت بۆ ئەڤرۆ دیارکر کو بۆ ماوی ھەیڤەکێ دێ نوشدار و کارمەند و ستافێ نەخۆشخانێ ھێنە مەشقدان ژ لایێ رێکخراوا نوشدارێن بێ سنۆر یا جیھانێ و پاشی دێ دەست ب کارێ خوە کەن ل نەخۆشخانا نشتەگەریان دەڤەرا زومار و گۆت: “نوشدار و کارمەندێن ساخلەمیێ ژ لایێ ساخلەمیا نەینەوا دێ ھێتە دابینکرن و ترۆمبێلێن ھاوار ھاتنی دێ ساخلەمیا دھۆکێ دابین کەت و رێکخراوا نوشدارێن بێ سنۆر ژی دێ ھەڤکاریێ کەت.
د. سیروان محەمەد ئەسود رێڤەبەرێ پشکا تەکنیکی ل رێڤەبەریا گشتیا ساخلەمیا دھۆکێ دیارکر کو ھەموو پێدڤیێن نشتەرگەریان بۆ نەخۆشخانا نشتەگەریان ل دەڤەرێ دێ ھێنە دابینکرن ب رێیا ساخلەمیا دھۆکێ د گەل ساخلەمیا نەینەوا و رێکخراوا نوشدارێن بی سنۆر نوکە حازری یێ دھێنە کرن دێ کەڤتە د خزمەتا خەلکێ دەڤەرێن رزگارکری دا.
د. سیروان گۆت: “ساخلەمیا دھۆکێ دێ ترۆمبێلێن ھاوار ھاتنێ دابین کەت بۆ نەخۆشخانێ و ستافی نەخۆشخانێ دێ ژ لایێ ساخلەمیا نەینەوا ڤە ھێتە دابینکرن و رێکخراوا نوشدارێن بێ سنۆر دێ ل دووڤ شیانێن خوە دەرمانان و پێدڤیێن ساخلەمیێ دابین کەت، چەندین جۆرێن نشتەگەریان دێ ل زومار ھێنە ئەنجامدان ب تنێ ھەکە حالەتەک پێدڤی نەخۆشخانێن دھۆکێ بیت دێ ب رێیا ترۆمبێلێن ھاوار ھاتنی بۆ دھۆک ھێتە ڤەگوھاستن.
د. ئەحمەد نازم رێڤەبەرێ گشتیێ ساخلەمیا نەینەوا ب وەکالەت دیارکر کو ساخلەمیا دھۆک ھەموو شیانێن خوە خزمەتێن ساخلەمیێ دگەھینیتە دەڤەرێن رزگارکری و چەندین رێکەفتن یێن ھاتینە مۆرکرن بۆ چێکرنا نەخۆشخانا و بنگەھێن ساخلەمیێ و گۆت ژی: “دێ نەخۆشخانەکا نشتەگەریان ل دەڤەرا زومار ھێتە دروستکرن د وەختەکێ گەلەک نێزیک دا”.
د. ئەحمەد ئەو ژی دیار کر کو ل گەل ساخلەمیا دھۆکێ چەندین ریکەڤتن یێن ھاتینە مۆرکرن بۆ دروستکرنا بنگەھێن چاڤدێریا بۆ ژنێن دوگیان و خزمەتکرنا ژنێن دوگیان ل دەڤەرێن رزگارکری و د بەرنامەی دایە چەندین خزمەتێن دی یێن ساخلەمیێ بگەھنە دەڤەرێن رزگارکری ب پشتەڤانیا ساخلەمیا دھۆکێ.
ئەڤرۆ نيوز:
ئەندامەکێ لژنا ئابووری و وەبەرھئێنانێ ل جڤاتا نونەرێن عیراقێ راگەھاند:لگۆری ئەو مەرجێن سندۆقا نەختینەیا نێڤ دەولەتی بۆ عیراقێ داناین پێدڤیە ھندەک دەرمالە و مەزاختیێن حوکمەتێ کێم بکەت.
زاھر ئەلعەبادی ئەندامێ لژنا ئابووری و وەبەرھێنانێ ل جڤاتا نونەرێن عیراقێ دیارکر ل گەل کێمکرنا دەرمالەیان و ھندەک دەرمالە ژی دێھێنە برین ئەو ژی دەرمالەیا ھەڤژینێ و زارۆکانە بۆ کەسێ فەرمانبەر و مووچە خور، پێدڤیە کێمکرن ل پشکا ئاھێن خوارنێ یێن ھەیڤانە بۆ وەلاتیان و پشتەڤانیا بھایێ پەنزینێ و کارەبێ نەھێتەکرن.
زاھر ئەلعەبادی ئەو چەندە ژی دیارکر ئەو برین و کێمکرن پێدڤی ب رەزامەندیا جڤاتا نونەرێن عیراقێ نینە و حوکمەت بخو دشێت ئەوی کاری بکەت.
ھەر ب ئەگەرێ قەیرانا دارای توشی عیراقێ بوویی بەغدا نەچارە قەران ژ سندۆقا نەختینەیا نێڤ دەولەتی وەربگریت و لگۆری مەرجێن وێ سندۆقا نەختینەیا نێڤ دەولەتی دڤێت حوکمەت مەزاختیێن خوە کێم بکەت .
ئه‌ڤرۆ نيوز:
د پرێس کۆنفرانسەکی دا ساخلەمیا پارێزگەھا دھۆکێ راگەھاند وان پلانەکا خۆرت بۆ کۆنترۆلکرنا جھێن گشتی ل ھەیڤا رەمەزانێ دانایە، رێڤەبەرێ کاروبارێن خوەپاراستنا ساخلەمیێ ل پارێزگەھا دھۆکێ دیار کر کو بەری ھەیڤەکێ وان پلانا خوە بۆ ھەیڤا رەمەزانا پیرۆز دانایە دا کو زێدەتر کۆنترۆلا جھێن گشتی بھێتەکرن و گۆت: “مە چەندین بڕیار و رێنمایێن تایبەت بۆ ھەیڤا رەمەزانێ دەرکرینە”.
د. بەختیار ئەحمەد رەشید، رێڤەبەرێ کاروبارێن خوەپاراستنا ساخلەمیێ ل پارێزگەھا دھۆکێ ئاشکرا کر کو د پێنج ھەیڤێن بۆری دا تیمێن وان سەرەدانا پتری 20 ھزار جھان ل پارێزگەھا دھۆکێ کریە و گۆت: “مە 92 جھێن گشتی داخستینە و 165 جھێن دی سزاداینە و زێدەباری ڤێ چەندێ مە ھۆشداری دایە 123 جھان”.
ناڤبری ئاماژە دا وێ چەندێ کو ئەو داخوازێ ژ خەلکی دکەت ل دەمێ کرینا ھەر تشتەکی بلا خوە ژ مێژوویا چێکرن و ئێکسپایەرا وی کەرەستەی پشتراست بکەن دا کو گیانێ وان یێ ساخلەم بیت و گۆت: “د گەل دەستپێکا ھاتنا وەرزێ بھارێ تیمێن مە یێن رەشاندنێ دەست ب ھەوا رەشاندنا چەپەرێن ھێزێن پێشمەرگەی کریە بۆ وێ چەندێ کو مێش و مۆر لێ نەمینین و ب ھەمان شێوە ل کەمپێن ئاوارە و پەنابەران ژی ئەڤ ھەوە ھاتیە ئەنجامدان”.
عسمەت سەلمان، بەرپرسێ پشکا چاڤدێری و سلامەتیا خۆراکی دیار کر کو وان تیمێن خوە بۆ ھەیڤا رەمەزانێ کرینە سێ شەفت و ھەتا دەمژمێر 12ی شەڤێ دێ دووڤچوونا جھێن گشتی کەن و گۆت: ” پشتی بۆرینا دەھـ سالان جارەکا دی رێ ب چێکرنا شەربەتا مێۆیژان ل دھۆکێ ھاتەدان، بەلێ چەندین مەرجێن تایبەت ھاتینە دانان و ل سەر ھەموو جھێن چێکرنا شەربەتێ ھاتینە بەلاڤکرن دا کو پێگیریێ پێ بکەن”.
ناڤبری خویا کر کو ل پێنج ھەیڤێن بۆری یێن ئەڤ سالە تیمێن وان یێن دووڤچوونان 367 تەنێن کەرستێن ئێکسپایەر یێن ھشک د گەل 115 ھزار لیتر ل جھێن گشتی ژناڤبرینە و گۆت: “نوکە خودانێن جھێن گشتی زێدەتر ژ جاران ھاریکارن دگەل وان دا، چونکی دەمێ کەرەستەکێ ئێکسپایەر دبینن ئەو ب خوە ژ یێن دی جودا دکەن”.
بەرپرسێ پشکا چاڤدێری و سلامەتیا خۆراکی ئاشکرا کر کو وان سێ خالێن گۆمرکی ھەنە کو ھەر کەرستەکێ خوارنێ و ڤەخوارنێ بھێنە د ناڤ ھەرێمێ دا د ناڤا تاقیگەھێن وان دا پشکنین بۆ دھێنە کرن و گۆت: “د پشکنینێن فیزیایی یێن پێنج ھەیڤێن بۆری دا ل سەرانسەری پارێزگەھێ 54 ھزار و 308 پشکنین ھاتینەکرن و د ئەنجام دا سێ ھزار و 542 نەباش دەرکەتینە و سەرەرایێ ڤێ چەندێ 86 ھزار و 442 پشکنینێن بەکتریۆلۆجی ژی ھاتینە کرن و د ئەنجام دا 304 نەباش دەرکەتینە و 28 ھزار پشکنینێن کیمیاوی ژی ھاتینەکرن و د ئەنجامدا 196 نەباش دەرکەرتینە”.
ئەڤرۆ نیوز:
نوونەرەکێ کورد ل بەغدا ئاماژە ب دووماھی پێشھاتێن ناڤبەرا ھەرێما کوردستانێ و حوکمەتا عێراقێ دکەت و ئاشکراکر، ڤێجارێ کورد ل گەل بەغدا دێ خوە ئێکلا کەن، یان دێ شەریکێن بەغدا بین یان دێ خوە ژ عێراقێ جۆدا کەین، ھەروەسا دیارکر، مەرج نینە بەغدا یا رازیبیت لسەر ریفڕاندۆمێ پێدڤیە خەلکێ ھەرێما کوردستانێ بڕیارا خوە بدەت.
دکتۆر عەرەفات کەرەم، پەرلەمانتارێ پارتی ل پەرلەمانێ عێراقێ بۆ رۆژناما ئەڤرۆ گۆت” بۆ ئێکلاکرنا پرسێن ھەلاویستی و دووماھی ھەلوێستی بەغدا ل سەر ھەرێما کوردستانێ بڕیارە شاندەکێ ھەرێما کوردستانێ سەرەدانا بەغدا بکەت، شاندا ڤێجارێ دێ بشێوەیەکێ زەلالتر ل سەرەدانێن بۆری دانوستانان لدۆر پرسێن ھەلاویستی ل گەل عێراق و مانا ھەرێما کوردستانێ ل گەل بەغدا ئێکلا کەت، چونکە خەلکێ ھەرێما کوردستانێ یێ نەچار نینە پشتی چەندین سالان شەڕکرنێ دژی گروپا تیرۆرستیا داعش، جارەکادی ھەر ل گەل بەغدا بمینیت، مووچە و بودجە بۆ ھەرێمێ و فەرمانبەرێن وێ نەھێنە ھنارتن، ماددێ 140 مووچێ پێشمەرگە و فەرمانبەران و پرسا ریفڕاندۆمێ دێ مژارێن سەرەکیێن شاندێ بلندێ ھەرێما کوردستانێ ل گەل بەغدا بن، مە ھەڤپەشکی دڤێت ل گەل عێراق، نەک وەکی نوکە پشکەکبین ل عێراقێ و حوکمەتا عەبادی ژی نانێ خەلکێ ھەرێما کوردستانێ ببڕیت، ئەڤە دڤێت بھێتە ئێکلاکرن، ھەکە ئەم ھەڤپشکین د عێراقێ دا ئەڤە دێ پشکدارێن راستەقینە بین، ھەکە ھەڤپشک ژی نینن، ئەڤە کورد د ئازادن چارەنڤیسێ خوە دیاربکەن و وی دەمی دێ زانن چاوا چارەنڤیسێ خوە دیارکەن.
دکتۆر عەرەفاتی گۆت: ھەکە بەری سێ سالا ھەرێما کوردستانێ ریفڕاندۆم رێڤەبربا و خوە ژ عێراقێ جۆدا کربایە، نوکە ئەم توشی ئەڤێ قەیرانا دارایی نەدبووین، چونکە ھەبوونا دەولەتا سەربخوە بەپرسیاریەتیێن نێڤدەولەتی ھەنە، چاوا یونان توشی قەیرانا دارایی ھات و ئێکەتیا ئورۆپا دەستێ وێ گرت، وەسا دا ھاریکاری بۆ ھەرێما کوردستانێ ژی ھێتەکرن و قانوون و دستوورێن نێڤدەولەتی و نافخۆیی بۆدەربازکرنا ئەڤێ قووناغێ دا دھاریکاربن، ھەردەمێ عێراق وەکی نوکە سەرەدەریێ ل گەل ھەرێما کوردستانێ بکەت، ئەڤە باشتر بێی ڤەگەڕیان بۆ بەغدا خەلکێ ھەرێما کوردستانێ چارەنڤیسێ خوە دیاربکەت، مەرج نینە بەغدا ژی رازیبیت یان رازینەبیت بۆ ریفڕاندۆمێ، دڤێت کورد بڕیارێ لسەر بدەن و خەلکێ ھەرێما کوردستانێ خوە ئێکلا بکەت، خوە ھەتا ھەتا ئەم ڤی شێوەی ل گەل بەغدا ناژین.
ئەڤرۆ نيوز:
بەرپرسێ پەیوەندی و ڕاگەھاندنێ ل رێڤەبەریا ھاتنوچوونا دھۆکێ بۆ ئەڤرۆ دیار کر کو رێڤەبەریا گشتی یا ھاتنوچوونا ھەرێمێ ب مەرەما ساخکرنا رۆژا جیھانی یا ژینگەھێ بڕیار دایە، ئەڤرۆ 5/6/2016 ل دەمژمێر 11 ل سەرانسەری ھەرێما کوردستانێ ھەموو ترۆمبێل بۆ دەمێ سێ خۆلەکان دێ ھێنە ڤەمراندن.
رایدێ مافپەروەر ئازاد تاھا، بەرپرسێ پەیوەندی و ڕاگەھاندنێ ل رێڤەبەریا ھاتنوچوونا دھۆکێ ئاشکرا کر، مەرەم ژ ڤێ چالاکیێ ئەوە، ژینگەە ژ پیسبوونێ بھێتە پاراستن و وەلاتی و شۆفێر بھێنە ھشیارکرن ژ زیانێن پیسبوونا ژینگەھێ و گۆت: “ل دووڤ بڕیارا رێڤەبەریا گشتی یا ھاتنوچوونا ھەرێمێ ھەموو ترۆمبێل، ژ بلی ترۆمبێلێن ھەوارھاتنا ب لەز بۆ دەمێ سێ خۆلەکان ل گۆرەپان و جادە و ناڤ باژێر و باژێرکان دێ ھێنە ڤەمراندن، لەو ئەم دخوازین ھەموو شۆفێر پێگیریێ پێ بکەن، دا کو بیتە ھۆکارەک بۆ پاقژ ڕاگرتنا ژینگەھێ “.
رایدێ مافپەروەر ئازاد تاھا ئاماژە ب وێ چەندێ ژی کر، ھەر شۆفێرەکێ پێگیریێ پێ نەکەت و سەرپێچیێ بکەت ل دووڤ برگا ھەشت یا جۆرێ سەرپێچیێ دێ ھێتە سزادان.
ئه‌ڤرۆ نیوز:
چه‌كدارێن جڤاتا سه‌ربازى یا منبح كو پشكه‌كن ژ هێزێن سوریا دیموكرات ب سه‌رۆكایه‌تیا ئێكه‌تیا پاراستنا گه‌ل، دوهى رێیا سه‌ره‌كى یا د ناڤبه‌را منبج – ره‌قه‌یا پایته‌ختێ داعش بڕین.
جڤاتا سه‌ربازیا منج د راگه‌هاندنه‌كێ دا ئاماژه ب وێ یه‌كێ كریه كو پشتى گرتنا رێیا منبج، ئێدى چه‌ك و پێدڤیێن لوجستى بۆ ره‌قه ناچن.
ل رۆژا 24 ئایارێ، ده‌ست ب ئوپه‌راسیونا كونترولكرنا ره‌قه ل باكوورێ وى باژێرى هاتیه كرن كو ره‌قه ب پایته‌ختێ داعش دهێته نیاسین.
ئه‌ڤرۆ نیوز:
سه‌عدى ئه‌حمه‌د پیره ئه‌ندامێ مه‌كته‌با سیاسى یا ئێكه‌تیا نیشتمانیا كوردستان راگه‌هاند” ل نێزیك دێ ل گه‌ل پارتى دیموكراتى كوردستان كوم بین، مه پرۆژه‌یه‌ك هه‌یه بۆ چاره‌كرنا قه‌یرانێن ناڤخو و ب نێرینا مه رێككه‌فتنا د ناڤبه‌را گۆران و ئێكه‌تیێ پێنگاڤا ئێكێ یه بۆ ئاشتبوونا ناڤ مالا كوردى”.
سه‌عدى پیره ئاماژه ب وێ یه‌كێ كرژى كو وان رێككه‌فتن ل گه‌ل گۆڕان كریه و ئه‌و نه‌بووینه ئێك حزب، له‌وما گه‌له‌ك یا ئاسایى یه جودا ل گه‌ل گۆران و پارتى كوم ببین.
ئه‌ڤرۆ نیوز:
قاره‌مان شێخ كه‌مال جێگرێ سه‌رۆك ئه‌ركانێ وه‌زاره‌تا پێشمه‌رگه‌ى بۆ ئوپه‌راسیونان دیاركر كو وه‌زاره‌تا پێشمه‌رگه‌ى داخواز ژ هه‌ڤپه‌یمانان كریه كو فرۆكێن بێ فرۆكه‌ڤان بۆ وان دابین بكه‌ن ژبه‌ر كو وه‌زاره‌تا وان ژ به‌ر قه‌یرانا دارایى نه‌شێن ڤان جوره فرۆكان بكریت.
جێگرێ سه‌رۆك ئه‌ركانێ وه‌زاره‌تا پێشمه‌رگه‌ى بۆ ئوپه‌راسیونان ئاماژه ب وێ چه‌ندێ كر كو ئه‌وان هنده‌ك فرۆكێن بێ فرۆكه‌ڤان یێن هه‌ین، به‌لێ نه ژ وانن یێن تایبه‌تمه‌ندیێن بلند هه‌ین.
نيشاندان