ئەڤرۆ نیوز:
پاتریک کۆکبۆرن بسپۆرێ کاروبارێ رۆژھەلاتا ناڤین بۆ رۆژناما ئیندێپێندێنت دیار کر کو ئێدی چو کەسەک نەشێت بەحسێ عیراقێ و سووریەکا ئێکگری بکەت، چونکو ئەو ھەر دو وەلات پارچە بووینە و ئەڤرۆکە ھەرێمێن جودا دەرکەڤتینە، ھاتنا داعشێ و شەرێ نھا ژی جارەکا دی بۆ ھەموو ئالیان سەلماند کو سیستەمێ کەڤن یێ رۆژھەلاتا ناڤین تێک چوویە و شەرێ نھا شەرێ ئاڤاکرنا نەخشێ نوو یێ رۆژھەلاتا ناڤینێ یە کو ئەڤ شەرە ژی دێ ب سالان ڤەکێشیت و گۆت: (من دڤێت بێژم کو شەرێ نھا بۆ پارچەبوونا رۆژھەلاتا ناڤین دھێتە کرن ئەڤ شەرە دێ ب سالان ڤەکێشیت و دێ ھێشتا گەلەک خوین ھێتە رێتن ھەتا کو ھندەک وەلاتێن نوو ئاڤا دبن، ل عیراقێ دێ سێ دەولەت ئاڤا بن و ل سووریێ ژی رەنگە دو یان سێ دەولەت ئاڤا ببن و ھەتا ئەو دەولەت و سنۆرێ وان ب دروستاھی دیار ببن دێ شەر بەردەوام بیت و ئەڤ شەرە دێ کاریگەریا خوە ل ئەمریکا و ئورۆپا کەت و دێ ب ملیۆنان خەلک ل رۆژھەلاتا ناڤین بەرێ خوە دەنە ئورۆپا).
ناڤھاتی د بەردەوامیا ئاخڤتنا خوە دا ئەو یەک ژی دیار کریە کو کورد و ھندەک نەتەوێن دی ل رۆژھەلاتا ناڤین کو د ناڤ سنۆرێ وەلاتێن وەک سووریا، تورکیا و عیراقێ دا دژین دخوازن بگەھنە مافێن خوە، لێ مخابن ژ بەر کو سیستەمێ وان وەلاتان دیموکراتیک نینە ئەو دانپێدانێ ب مافێ کوردان و سوننە و کێم نەتەوێن دی ناکەن و ب ھاتنا داعشێ ئەو ناکۆکی پتر دژوار لێ ھاتن و ئەڤرۆکە ژی شەر دژوارتر لێ ھاتیە و دڤێت ھەموو کەس و ئالی باش بزانن کو ئێدی سیستەمێ کەڤن یێ رۆژھەلاتا ناڤین ژناڤ چوویە و شەرەکی مەزن ژ بۆ ئاڤاکرنا سیستەمەکی نوو ل رۆژھەلاتا ناڤین برێڤە دچیت و گۆت: ( ژ بەر ناکۆکیێن روسیا و ئەمریکا و وەلاتێن دی یێن دەڤەرێ شەرێ نھا دێ دەمدرێژ بیت و ژ بەر وان ناکۆکیان ژی دێ گەلەک گرۆپێن وەک داعشێ و رێکخراوێن دی یێن تیرۆرستی دەرکەڤن و ژ بەر ھندێ ژی ئەز دبێژم دێ پارچەبوونا رۆژھەلاتا ناڤین ب سالان ڤەکێشیت و رەنگە گەلەک وەلاتێن دی یێن رۆژھەلاتا ناڤین ژی وەک سووریێ وێران ببن، پشتی شەرەکی دژوار ژی دێ نەخشێ نوو دیار بیت و سنۆرێ گەلەک وەلاتان دیار بن و ب ئاڤابوونا چەند وەلاتێن دی ل رۆژھەلاتا ناڤین دێ شەرێ وێ دەڤەرێ ب دووماھی ھێت).

ئەڤرۆ نیوز، ئەیاد بەرواری:
داواکاریا گشتی ل تورکیا راگەھاند ئەڤرۆ دو شەمبی 28 دیسێمبەرێ، راگەھاند ئەو دێ ڤەکۆلینێ ل گەل (سەلاحەدین دەمیرتاش) ھەڤسەرۆکێ پارتا دیموکراتا گەلان (ھەدەپە) ڤەکەت، پشتی سەرەدانا وی یا ڤێ دووماھیێ بۆ رۆسیا بوویە جھێ گەنگەشێ ل تورکیا و داخۆیانی ل موسکۆ داین و گوتی ئێخستنا فرۆکا رۆسی ژلایێ تورکیا ڤە کارەکێ شاش بوو، د بەرسڤێ دا سەرۆک وەزیرێن تورکیا گوتبوو ( ئەڤ داخویانی یە خیانەتە).
داواکاریا گشتی ل ئەنقەرە، ل دووڤ سایتێ (ھاڤنگتۆن پۆست) گوت” ڤەکۆلین دێ ھێتە ئەنجامدان ژبەر وان داخۆیانیێن دەمیرتاشی داین ل دۆر پرسا (ڕێڤەبەریا خوەسەر) بۆ کوردان ل تورکیا و ڤەکۆلین دگەلدا دێ ل دووڤ قانوونا گرێدای تاوانێن دژی سیستەمێ دستووری ھێتە کرن.
دەمیرتاش ھەڤسەرۆکێ مەزنترین پارتا پشتەڤانیا کوردان دکەت ل تورکیا کو ل دووماھی ھەلبژارتن ل چریا ئێکێ، نۆڤێمبەرا بۆری 78 کورسی ل پەرلەمانێ تورکی بدەستڤەئیناین، دەمێ سەرەدانا رۆسیا کری ل 23 ڤێ مەھێ، راگەھاندبوو ( ئێخستنا فرۆکا رۆسی ژلایێ تورکیا ڤە شاشی بوو) و داود ئوگلۆی سەرۆک وەزیرێن تورکیا ئەڤ داخۆیانیا دەمیرتاشی ب (خیانەت) ھژمارت و کۆمبوونەکا خوە ل گەل وی ل دۆر دانوستاندنێ ل سەر بەرھەڤکرنا دستوورێ نوو بۆ تورکیا ھەلوەشاند.
سەرۆک وەزیرێن تورکیا ئەڤرۆ دوشەمبی راگەھاند کو ئەو دێ دانوستاندنێ ل دۆر پرسا بەرھەڤکرنا رەشنڤیسا دستوورێ نوو یێ تورکی ل گەل ھەموو لایەنان ئەنجام دەت، بەلێ ئەو دانوستاندنێ ل دۆر ئێکگرتنا ئاخا تورکیا ل گەل کەسێ ناکەت، وەکو ئاماژەک بۆ سەلاحەدین دەمیرتاش ھەڤسەرۆکێ پارتا دیموکراتا گەلان (ھەدەپە).