سه‌ره‌كى نووترين نووچه

کۆمەلگەھەکا نوو یا پەروەردەی دێ کەڤیتە کاری

12/01/2016 13:09

497

ئەڤرۆ نیوز:
شاندەکێ رێکخراوا کویکا یا کوری ب سەروکاتیا (ھان) رێڤەبەرێ گشتی یێ رێکخراوا کویکا ل کوردستانێ سەرەدانا رێڤەبەریا گشتی یا پەوەردا پارێزگەھا دھۆکێ کر .
ئەڤرۆ سپێدێ رێکەفتی 12/1/2016 عەبد یوسف ئەحمەد رێڤەبەرێ گشتی یێ پەروەردا پارێزگەھا دھۆکێ پێشوازیا رێڤەبەرێ گشتی یێ رێکخراوا کویکا یا کوری وشاندێ ل گەل دا کر .
د روینشتنەکێ دا بەحسێ قووناغاێن کاری ل کومەلگەھا ئیتووت یا پەروەردەیی کر و رێڤەبەرێ گشتی یێ پەروەردێ دا دیار کرن کو ئەو ئاریشا ھەی یا دابینکرنا کارەبێ بوو کومەلگەھا ناڤبری چارەسەر بوویە و رەزامەندیا جھێن پەیوەندیدار ھاتیە وەرگرتن و ل ڤان نێزیکان و د ماوێ (20) رۆژان دێ کارەب ھێتە دابین کرن.
ژ لایێ خوە ڤە رێڤەبەرێ گشتی یێ رێکخراوا کویکا دیار کر کو ل حەفتیا بھێت ھەموو کەلوپەلێن کۆمەلگەھێ دێ ژکوریا گەھنە پارێزگەھا دھۆکێ و ب دووماھی ھاتنا ڤان کاران ل ھەیڤا بھێت دێ پروژە کەڤیتە د خزمەتا پەروەردێ دا.
رێکخراوا کویکا یا کوری نێزیکی (9) ملیون دولاران ل ڤێ پروژەی مەزاختینە .
کومەلگەھا ناڤبری کومەلەگەھا پەروەردەیی و دێ خزمەتا ھەموو قوناغێن خواندنێ کەت ھەر ژ باخچێن زارۆیان ھەتا قووناغا ئامادەیی و ل سەر شێوازەکێ نوو و پێشکەفتی ھاتیە ئاڤاکرن.

ب وێنه‌: كرياره‌كا خوه‌كوژى ل توركيا چه‌ندين قوربانى ل دووڤ خوه‌ هێلان

12/01/2016 12:39

354

ئه‌ڤرۆ نيوز:

ل مه‌يدانا سولتان ئه‌حمه‌د ل سته‌مبۆل په‌قينه‌ك روودا، هه‌ر چه‌نده‌ هه‌تا نوكه‌ ژمارا كوشتى و برينداران نه‌هاتيه‌ راگه‌هاندن، به‌لێ ب گۆره‌ى پێزانينێن ل به‌ر ده‌ست دبيت زێده‌ترى 10 كه‌سان هاتبنه‌ كوشتن و نێزيكى 20 كه‌سان ژى بريندار ببن.

هه‌ر ب گۆره‌ى ژێده‌رێن ميديا توركى به‌لاڤكرين زێده‌ترى 10 ئه‌مبۆلانسان بريندار ڤه‌گوهاستينه‌ و تيمێن هه‌وارهاتنا ده‌سپێكى گه‌هشتينه‌ جهێ روودانێ بۆ چاره‌كرنا ده‌سپێكى يا برينداران و ئه‌و ده‌ڤه‌ر هاتيه‌ گه‌مارودان.
هه‌ر چه‌نده‌ هه‌تا نوكه‌ كه‌سێ به‌رپرساتيا خوه‌ ژ روودانێ ديار نه‌كريه‌، به‌لێ ژ به‌ر كو كريارا خوه‌ كوژيه‌ پێشبينى دهێته‌ كرن چه‌كدارێن داعش ئه‌ڤ كاره‌ ئه‌نجام دابيت.

كۆمبوونا پارتى و ئێكه‌تى يا به‌رده‌وامه‌

12/01/2016 12:27

ئه‌ڤرۆ نيوز:

ئه‌ڤرۆ به‌رى نيڤرۆ كۆمبوونا هه‌ردو مه‌كته‌بێن سياسى يێن پارتى ديموكراتى كوردستان و ئێكه‌تى نشتيمانى كوردستان ل نڤيسينگه‌ها نێچيرڤان بارزانى ل هه‌ولێر يا به‌رده‌وامه‌.

شاندێ ئێكه‌تيێ ژ هه‌ر ئێك ژ مه‌لا به‌ختيار و سه‌عدى ئه‌حمه‌د پيره‌ و قوباد ته‌له‌بانى و عومه‌ر فه‌تاح پێكهاتينه‌ و يێ پارتى ژى ژ هه‌ر ئێك ژ نێچيرڤان بارزانى و فازل ميرانى و مه‌حمود محه‌مه‌د و دلشاد شه‌هاب.

ب گۆره‌ى پێزانينێن ل به‌ر ده‌ست دێ ئێك ژ ته‌وه‌رێن گرنگێن ڤێ كۆمبوونێ دانوستاندن بيت ل سه‌ر هه‌بوون و نه‌بوونا گۆڕان د ناڤ حكومه‌تێ دا.

كه‌نگى بڕيارا كێمكرنا بهايێ كارتێن ئه‌نترنێتێ دێ كه‌ڤيته‌ كارى؟

12/01/2016 12:23

1900

ئەڤرۆ نيوز:
وەزیرێ ڤەگوھاستنێ و گەھاندنێ یێ حوکمەتا ھەرێما کوردستانێ دیار کر کو سەرێ ھەیڤا بھێت دێ بریارا کێمکرنا بھایێن ئەنتێرنێتی ھێتە بجھئینان.
ل گۆر نووچەکێ ماڵپەڕێ فەرمیێ یەکگرتووی ئیسلامی کوردستان، مەولود باوەموراد، وەزیرێ ھەرێمێ بۆ کاروبارێن پەرلەمانی و وەزیرێ ڤەگوھاستنێ و گەھاندن ب وەکالەت ئاشکرا کریە کو نڤیسارا خوە بۆ ھەموو کۆمپانیێن ئەنترنێتێ ئاراستە کریە و داخواز ژێ کریە کو پابەندی بڕیارا وەزارەتێ ببن.
ھەروەسا د نووچەی دا ھاتیە کو وەزیرێ ڤەگوھاستنێ و گەھاندن ب وەکالەت پێشبینیێ دکەت کو ل دەستپێکا ھەیڤا شوباتا بھێت بریارا وەزارەتێ سەبارەتی کێمکرنا بھایێن ئەنترنێتێ ل ھەرێما کوردستانێ بکەڤیتە د وارێ بجھئینانێ دا.
مەولود باوەموراد ئاماژە ب وێئێکێ ژی کر کو وەزارەتێ ل سەر بھایێن نوو یێن کارتێن ئەنترنێتێ گەنگەشە ل گەل وان کۆمپانیان کریە و وەزارەتێ بڕیار دایە کو 30% ژ بھایان بھێنە کێمکرن.

ئاژانسەکا فرەنسی: ئەوێن کوردستان پارچەکری دزانن باشترین ھەڤپەیمانێن وان کوردن

12/01/2016 12:18

168

ئەڤرۆ نيوز:

ئاژانسا لێدیزۆن یا دەنگوباسان، د راپۆرتەکێ دا بەحسێ گوھۆرینا نەخشێ رۆژھەلاتا ناڤین دکەت و دبێژیت کوردستان دێ دەولەتەکا نوو بیت ل وێ دەڤەرێ و دبێژیت” نوکە ل کوردستانێ پەرلەمانەک و حوکمەتەکا کوردی یا ھەی، کورد 35 ملیۆن کەسن، رووبەرێ کوردستانێ 500 ھزار کیلۆمەترێن دوجارکی نە، کورد ب زمانێن عەرەبی و تورکی و فارسی نا ئاخڤن، بەلکو زمانێ خوە یێ ھەی، ئەوژی زمانێ کوردی یە”.
ئاژانسا ناڤبری دبێژیت، نوکە 18 ملیۆن کورد ل باکوورێ کوردستانێ دژین و 7 ملیۆن ل باشووری و 8 ملیۆن ل رۆژھەلاتی و 2 ملیۆن ل رۆژئاڤای.
دیسا ئاماژە ب وێ چەندێ کریە، ژ ئەگەرێ پارچەبوونا وەلاتێ وان، پتریا کوردان ئاوارەی وەلاتێن رۆژئاڤا بووینە و پتریا وان ل ئەلمانیا د ئاکنجی نە کو ھژمارا وان دگەھیتە 650 ھزار کوردان، ژبلی ئەلمانیا ل وەلاتێن دی یێ ئورۆپا و ل ئەمریکا ژی دژین.
بەلاڤکریە ژی کو پشتی کوردستان ھاتیە پارچەکرن ل ڕێککەفتنا (سایکس- بیکۆ)ی دا د ناڤبەرا بریتانیا و فرەنسا، پشتی وێ ل سالا 1920 بریتانیا ویلایەتا مووسل ب تمامی ژ کوردستانێ ڤەکر، ل سالا 1961 ێ کوردان دەست ب شورەشێ کر و ل سالا 1991 ێ کوردان ل ھەرێما کوردستانا نوکە سەرھلدان دژی (سەدام حسێن) ی سەرۆکێ وی دەمێ یێ عیراقێ کر، سەرھلدانا کوردان ڕەنگڤەدان ل دووڤ خوە ئینا، چونکی کورد خودان ئیرادەکا ب ھێز بوون، لەوما سەرۆکێ ئەمریکا یێ وی دەمی (جۆرج بوش)ی، ھێلا 36 دانا ودەڤەرا دژەفرین ل سەر عیراقێ سەپاند و پشکەک ژ کوردستانێ کەفتە دبن کونترۆلا کەردان ڤە.
ئاژانسا فرەنسی ئاماژێ ددەتە پشکداریا کوردان د پرۆسا سیاسی دا ل عیراقێ پشتی 2003 ێ و دبێژیت” پشتی ژناڤچوونا رژێما سەدامی ل 2003 ێ، کوردان پشکداری د ئاڤەدانکرنا عیراقێ دا کر، بەلێ کوردان ل گەل ھندێ ژی پەرلەمان و حوکمەتا کوردی ژی دروست کربوو و بوونە خودان ھێزا خوە ئەوژی پێشمەرگەیە کو کورد وەکو سومبۆلەکا پیرۆز سەحدکەنە پێشمەرگەی، چونکی پێشمەرگەی بەرگری یا ژ ئاخا کوردستانێ کری” زێدەتر دبێژیت” ل سالا 2005 ێ ئێکەم ھەلبژارتن ل عیراقێ پشتی ژناڤچوونا سەدامی ھاتنە ئەنجامدان، کوردان دەنگێن باش بدەستڤەئینان و بوونە نەتەوێ دویێ ل عیراقێ، جەلال تالەبانی وەکو سەرۆکێ عیراقێ ھاتە ھەلبژارتن و مەسعود بارزانی وەکو سەرۆکێ ھەرێما کوردستانێ ھاتە ھەلبژارتن”.
ئەڤ ئاژانسا فرەنسی، بەحسێ قۆناغا پشتی وەرگرتنا سەرۆک بارزانی بۆ پۆستێ سەرۆکاتیا ھەرێمێ دکەت و دبێژیت” پشتێ ڤێ چەندێ کوردستانێ ب ڕەنگەگێ مەزن گەشەکر، کورد دەست ب ھێزکرنا پێگەھێ خوە کر ب جۆرەکی کوردێن پارچێن دی یێن کوردستانێ بەر ب ھەرێما کوردستانێ ڤە ھاتن و چەندین وەلاتان ژی نوونەراتیێن خوە ل ھەرێما کوردستانێ ڤەکرن، کوردستان بۆ مۆدیلەکا دیموکراسی ل رۆژھەلاتا ناڤەراست”.
خویاکر ژی” عیراق کەفتە ململانێ یا سیاسی ل گەل کوردستانێ بۆ وێ چەندێ ڕێگریێ ل پێشڤەچوونا کوردستانێ بکەت، لەوما پێشمەرگە وەکو ھێز ل عیراقێ قەبوول نەکر، پاشی شەڕێ داعشێ دەستپێکر، داعشێ ھێرش کرە سەر کوردستانێ ل وان دەڤەرێن ب سەر عیراقێ ڤە، بەلێ پێشمەرگە شیا وان دەڤەران ئازاد بکەت ژ داعشێ و ئالایێ کوردستانێ لێ بلند بکەت و پێنگاڤان ب ھاڤێژن بەر ب سەرکەفتنێن زێدەتر، نوکە پێشمەرگێ کوردستانێ کاریگەرترین ھێزە روو ب روویێ داعشێ دبیت”.
د پشکەکا دی یا راپۆرتا خوەدا، ئاژانسا فرەنسی دبێژیت” ژبلی وێ چەندێ کوردستان بنگەھەکێ گرنگ یێ سامانێن سروشتی یە ل دەڤەرێ، پێگەھێ کوردستانێ یێ گرنگە ل وێ دەڤەرێ، لەوما پێدڤیە بھێتە گوتن ئەوێن کوردستان پارچەکری، نوکە ھزر د چ دا دکەن، دەمێ دزانن باشترین ھەڤپەیمان ل دەڤەرێ بۆ رۆژئاڤای کوردن، چ ژ روویێ ھێزێ ڤە و چ ژ روویێ جوگرافیایێ ڤە و چ ژی ژ روویێ سامانێن سروشتی ڤە، لەوما دشێن بێژین کورد د نەخشێ رۆژھەلاتا ناڤەراست دا، دەولەتە”.

بۆچوونا ئێكگرتوو ل سه‌ر ريفراندۆمێ

12/01/2016 12:16

107

ئەڤرۆ نیوز:

ئەندامەکێ سەرکردایەتیا ئێکگرتوو ئیسلامی راگەھاند، رەوشا نوکە یا ھەرێما کوردستانێ یا بەرھەڤە و چو دەمەکی ژی د دیرۆکا ھەرێما کوردستانێ دا وەکو ڤێ قۆناغێ یا گونجای نەبوو بۆ سەربخوەیێ و دورستبوونا دەولەتا کوردستانێ، ئەم وەکو ئێکگرتوو ئیسلامی ب ھەموو شێوەکی پشتەڤانیێ ل ھەر بزاڤەکێ دکەین کو ڕیفراندۆم بھێتە ئەنجامدان.
غازی سەعید ئەندامێ سەرکردایەتیا ئێکگرتوو ئیسلامی زێدەتر گوت” ئێکڕێزی بەرێ بناغێ ھەر پێشکەفتنەکێ یە د وی بواری دا و دھەر بوارەکێ دی ژی دا، لەوما پێدڤیە ھەموو لایەنێن سیاسی ل ھەرێما کوردستانێ د رژد بن ل سەر بابەتێ ئەنجامدانا ڕیفراندمێ و پێکئینانا دەولەتا کوردستانێ، ئەو تشتەکێ جێگیرە، کەس قەبوول ناکەت لایەنەک ل سەر وی بابەتی یێ ناکۆک بیت، ھەکە لایەن د ناکۆک بن، نەشێن د وێ پرسێ دا پێنگاڤێن باش ب ھاڤێژن، لەوما پێدڤیە ل ڤێ قۆناغێ، مە گۆتارەکا ئێکگرتی ل ھەرێما کوردستانێ ھەبیت و جوداھی د گۆتارا سیاسی دا نەبیت، بابەتێ ڕیفراندۆمێ پرسەکا گرنگە، ئەڤە 100 سال ب سەر ڕێککەفتنا (سایکس – بیکۆ) ی ڤە دەرباز بوون و ئەڤرۆ ڕەوشا ھەرێما کوردستانێ یا گونجایە و چو دەمەکی ژی د دیرۆکا ھەرێما کوردستانێ دا وەکو ڤێ قۆناغێ یا گونجای نەبوو بۆ سەربخوەیێ و دروستبوونا دەولەتا کوردستانێ، لەوما پێدڤیە ھەموو لایەن ل سەر وی بابەتی خوە بکەنە ئێک بۆ وێ چەندێ گەلێ کورد بگەھیتە ئومێدین خوە”.
غازی ئاماژە دا کو ل دەڤ ئێکگرتووی ئیسلامی بابەتێ سەربخوەیێ و ڕیفراندۆمێ بەری ھەموو تشتەکی یە، ھەتاکو د کۆنگرێ شەشێ یێ ئێکگرتووی دا، خالا ئێکێ یا مە، بەحسێ سەربخوەیێ و دەولەتا کوردستانێ دکەت، ھەر بزاڤەکا بۆ وێ چەندێ ژی ھێتە کرن، ئەم ب ھەموو شێوەکی پشتەڤانیێ لێ دکەین و ھەڤ ھەلویستین”.

ب وێنه‌: وه‌زيرێ ئه‌وقافێ ب وه‌كاله‌ت ئه‌ڤ كاره‌ ل دهۆكێ كرن

11/01/2016 13:54

1580

ئەڤرۆنیۆز، سالار دۆسکی:
ل ژێر چاڤدێریا د. پیشتوان ساد وەزیرێ ئەوقاف و کارۆبارێن ئاینی ب وەکالەک و ب ئامادەبوونا فەرھاد ئەمین پارێزگەرێ دھۆکێ و رێڤەبەرێ گشتیێ ئەوقاف و کارۆبارێن ئاینی پارێزگەھا دھۆکێ و چەند کەساتیێن دەرڤەرێ، ئەڤرۆ 11/1/2016 ئاڤاھیێ نوویێ رێڤەبەریا گشتی یا ئەوقاف و کاروبارێن ئاینی دھۆکێ ھاتەڤەکرن، دووڤدا ئاڤاھیێ رێڤەبەریا کارۆبارێن مەسیحیان ل تاخێ بارزان ھاتە ڤەکرن تەنشت پارکا بارزانی.

هه‌ر وه‌سان ل ھولا ساخلەمی یا دھۆکێ کومبوونەک ل گەل ھەژمارەکا مەزن یا زانایێن ئاینی کر و دناڤا ھولێ دا پەیڤەک پێشکێشکر و رۆلێن زانایێن ئاینی د دیرۆک و مێژوویا مللەتێ کورد دا بلند نرخلند و ئاشکراکر کو ئەو زانایێن ئاینی یێن ھاتینە ڤەگوھاستن ئەگەر ئەوبوویە کو ئەڤە تشتەکێ نورمالە و ھەموو جھان گوھۆرین ھەیە.

دیسان خواست زانایێن ئاینی پتر رۆلێ خوە ببین دپێشڤەبرنا جڤاکی دا و کار بکەن و ھاندانا خەلکی بدەن و تایبەت کەسانێ، دەولەمەند بۆ ئاڤاکرنا مزگەڤتان ھەکە جھەکی پێدڤی بوو و ھەکە نە ھاند بدەن قوتابخان ئاڤا بکەن و ئەڤە ھەر بۆ زارۆکێن وانە.

ل دووماھێ وەزیرێ ئەوقاف و کارۆبارێن ئاینی خواست بەردەوام دوعا بۆ پێشمەرگێ کوردستانێ بھێنەکرن ل سەر مینبەرێن مزگەڤتان، دووڤ دا گوھداریا چەند خواست و گلە و گازندێن زانایێن ئاینی کر و بەرسڤا ھەموو پرسێن وان دا.

ھەڤدەم ھەر د سەردانا خوە دا بۆ پارێزگەھا دھۆک نوکە وەزیرێ ئەوقافێ ل قەزا زاخۆ یە و ب مەرەماڤەکرنا قوتابخانەکێ ل وێ قەزایێ و ھەر ئەڤرۆ دێ رێورەسمێن سەردانا وی ب دووماھی ھێن بۆ پارێزگەھا دھۆک.

دو رێڤه‌به‌ر هاتنه‌ گوهۆڕين

11/01/2016 12:58

2926

ئەڤرۆ نیوز، سالار دۆسکی:
رێڤەبەرێ راگەھاندنێ ل رێڤەبەریا گشتی یا پەروەردێ ل پارێزگەھا دھۆکێ ئاشکراکر کو ل سەر فەرمانا وەزیرێ پەروەردێ رێڤەبەرێ پەروەردا دھۆک یا رۆژھەلات ھاتیە ڤەگوھاستن بۆ پەروەردەکا دی ل سنورێ پارێزگەھا دھۆک.
ئەحمەد عەبدولا زبێر رێڤەبەرێ راگەھاندنێ ل رێڤەبەریا گشتی یا پەروەردێ ل پارێزگەھا دھۆکێ بۆ مالپەرێ ئەڤرۆ نیۆز گۆت: ل سەر فەرمانا د.پیشوان سادق وەزیرێ پەروەردێ حوکمەتا ھەرێما کوردستانێ، سەمیر عەبدولعزیز رێڤەبەرێ پەروەردا دھۆک رۆژھەلات ھاتە ڤەگۆھاستن بۆ رێڤەبەریا پەروەردا قەزا سێمێلێ و سوباھی 12/1/2016 دێ دەست ب کاربیت.
ئەحمەد زوبێری ئاشکراکر ژی کو پوستێ رێڤەبەریا پەروەردا دھۆک رۆژھەلات و ل سەر پێشنیارا وەزیرێ پەروەردێ دێ بۆ ئافرەتەکێ بیت و ئەڤە ب سیڤی دێ ھێتە پرکرن و ل دووڤ چەندین مەرجان، کو دڤێت باروەرناما بەکالوریوس و پێ ھەل ھەبیت، چ نەخوشی ل جەم نەبن، چ سزایێن قانوونی ل سەر نەھاتبیتە زیندانکرن.

بارزانى و هێرۆ دێ كۆم بن

11/01/2016 11:56

166

ئه‌ڤرۆ نيوز:

ب گۆره‌ى گۆتنێن مه‌حمود محه‌مه‌د ئه‌ندامێ مه‌كته‌با سياسى يا پارتى ديموكراتى كوردستان ل ڤان رۆژێن بهێت ژ بلى كۆمبوونا هه‌ردو مه‌كته‌بێن سياسى يێن پارتى ديموكراتى كوردستان و ئێكه‌تى نشتيمانى كوردستان، دێ مه‌سعود بارزانى سه‌رۆكێ هه‌رێما كوردستانێ و هێرۆ ئيبراهيم ئه‌حمه‌د هه‌ڤژينا سكرتێرێ گشتيێ ئێكه‌تى نشتيمانى كوردستان كۆم بن.

پەرلەمانتارێن عیراقێ پشتەڤانێن سەربخوەیا کوردستانێ نە

11/01/2016 11:17

356

ئەڤرۆ نیوز:
ئەندامەکێ جڤاتا نوونەرێن عیراقێ ژ فراکسیۆنا پارتی دیموکراتی کوردستان ئاشکراکر کو ئەو داخویانیێن پەرلەمانتارێن عیراقێ ل دۆر سەربخوەیا کوردستانێ ددەن، تنێ مەرەمەک پێ ھەیە و بەرۆڤاژی پشتەڤانیێ ل سەربخوەیا کوردستانێ دکەن.
ئیسلام حسێن گۆلی، ئەندامێ جڤاتا نوونەرێن عیراقێ ژ فراکسیۆنا پارتی دیموکراتی کوردستان بۆ رۆژناما ئەڤرۆ گۆت” چەرخەک ل سەر ڕێککەفتناما (سایکس بیکۆ) ی ڤە دەرباز بوو و خەلکێان وەلاتێن ھاتینە دروستکرن ژ ئەنجامێ وێ ڕێککەفتنێ، چو ژیانەکا خوەش ل گەل ئێک نەدیت، چونکی ب ھەموو تشتان ل گەل ھەڤدو ناگونجن و جوداھی ژ ئێک دو ھەل گەل ئێک یا ھەی”.

ئیسلام گولی زێدەتر گۆت” بۆ ئاڤاکرنا ھەر وەلاتەکی، دڤێت سەربخوەیا ئابووری ھەبیت و ئابوورێ وێ د دەستی وێ دابیت و بلا کێماسی ھەبن ژی، ھەتا رادەکێ باش، کوردستانێ سەربخوەیا ئابووری یا ھەی و عیراقێ ژی ھەتا رادەکی باوەری ب ڤێ چەندێ یا ھەی، دیسان ئەوژی دەرەھەکە بۆ سەربخوەیێ کو وەلاتێن جیران ل سەر بنیاتێ بەرژوەندیان پشتەڤان و ھاریکاربن، د ھەمان دەم دا ژی کوردان گەلەک دەرگەە یێن ھەین بۆ زێدەبوونا داھاتێ خوە، وەکو دەرگەھێن سنۆری ، گەشت و گوزار، چاندن و گەلەک سامانێن دی یێن سرۆشتی یێن ھەین”.
ھەمبەر ھەلویستێ لیستێن عەرەبی و تایبەت یێن شیعی ل سەر دامەزراندنا دەولەتا کوردستانێ، ڤی پەرلەمانتارێ ل سەر فراکسیۆنا پارتی ئاشکراکر کو” داخویانیێن پەرلەمانتارێن عیراقێ ل سەر سەربخوەیا کوردستانێ یێن د پشت کامیرێن دەزگەھێن راگەھاندنێ ددەن چو راستی بۆ نینە، بەلکو بەرۆڤاژی وان داخویانیان، ئەو پشتەڤانێن دروستبوونا دەولەتا کوردی نە، پەرلەمانتارەکێ عیراقی ب خوە ژی گوتە من، ھەموو پەرلەمانتار پشتەڤانێن وێ چەندێ نە کو کوردستان سەربخوە بیت و بۆ من دیارکر کو بۆ وان ئەو باوەری یا پەیدابووی کو ئێدی کورد ناڤەگەرن سەر ب عیراقێ ڤە و ئەڤە مافێ ھەوە کوردانە، نە ئاخا ھەوە وەکو یا مەیە و نە زمان و نە کەلتۆر و نە ھەتا ڕەفتار ژی”.
ب دیتنا ئیسلام گولی” باوەری یا بوو سونە و شیعان پەیدابووی بۆ جودابوونا کوردستانێ، تنێ دەم یێ کا کەنگی دێ سەربخوەیا کوردستانێ ھێتە راگەھاندن”.
سەبارەت مانا پەرلەمانتارێن کورد ل بەغدا، ئیسلام گولی گۆت” ھەبوونا ئەندامێن کورد ل بەغدا گەلەک یا گرنگە و ناھێلین تشتێ ھەی ژ دەست بچیت، ھەکە ب ھەبوونا ھەموو ئەندامێن کورد ژ ھەموو لیستان ل بەغدا نەبا، ل مەھێن بۆری ھەموو بزاڤ دھاتنەکرن 17% ھاتبا کێمکرن بۆ 10% و راستە ھەر ئەوژی ناھێـتەدان، بەلێ دیارکرنا رێژا بۆدجا ھەرێما کوردستانێ دناڤ بۆدجا عیراقێ دا گەلەک یا گرنگە، راستە بۆمە ھەموویان نەخوەشە ئەم ل بەغدا، بەلێ ھەبوونا مە ھەر چاوان بیت گەلەک یا باشە، ھەر چ پۆست بیت، وەزیر، ئەندام پەرلەمان، بریکارَن وەزیران و کەسانێن لەشکەری بن”.

نيشاندان 1...1,000 2,000 2,3602,3612,362...3,034 زێده‌تر

لاپه‌ر 2,361 ژ 3,034