ئه‌ڤرۆ:
رۆژناما (گاردیان) یا بریتانی راپۆرته‌ك ل دۆر زیانێن شه‌رێن په‌كه‌كێ ل ده‌ڤه‌رێن سنووری یێن هه‌رێما كوردستانێ به‌لاڤكر.
وێ رۆژناما بریتانی د وێ راپۆرتا خوه دا به‌حس ل نه‌هامه‌تیێن خه‌لكێ ده‌ڤه‌رێن سنووری یێن هه‌رێمێ كر كو به‌رده‌وام دبنه قوربانیێن شه‌رێ چه‌كدارێن په‌كه‌كێ و له‌شكرێ توركی.
د وێ راپۆرتێ دا چه‌ند كه‌سه‌ك به‌حسێ چیرۆكا ژیانا سه‌خت یا خوه و گیان ژ ده‌ستدانا كه‌سوكارێن وان ژ ئه‌نجامێ شه‌رێ په‌كه‌كێ و له‌شكرێ توركی ل ده‌ڤه‌رێن وان دكه‌ن.
ب گۆره‌ی وێ رۆژنامێ، پشتی ب دووماهی ئینانا ئاگربه‌ستێ د ناڤبه‌را له‌شكرێ توركی و چه‌كدارێن په‌كه‌كێ ل سالا 2015، هژمارا قوربانیێن مه‌ده‌نی ل ده‌ڤه‌رێن سنووری ب تایبه‌ت ل سنوورێ قه‌زا ئامێدیێ ل پارێزگه‌ها دهۆكێ، بلند بوویه.
هه‌ر د وێ راپۆرتێ دا، كوشتنا سێ وه‌لاتی و پێشمه‌رگێن خانه‌نشین ل دووماهیا سالا 2020 ل سنوورێ قه‌زا ئامێدیێ وه‌كو نموونه‌ك هاتیه به‌حسكرن و ئاماژه ب وێ چه‌ندێ هاتیه كرن كو خه‌لكه‌كێ زۆر یێ وێ ده‌ڤه‌رێ ژ ترسا شه‌رێ په‌كه‌كێ و له‌شكرێ توركی، گوند و جهێن خوه بجه هێلاینه و به‌ر ب ده‌ڤه‌رێن دی چووینه.
ئاماژه كریه ژی كو” رێكخراوا (Christian Peacemaker Teams) ئاشكرا كریه كو زێده‌تر ژ 400 گوند ژ ئه‌گه‌رێ شه‌رێن په‌كه‌كێ هاتینه چۆلكرن و زێده‌تر ژ 100 وه‌ولاتیێن مه‌ده‌نی ژی ژ ئه‌نجامێ شه‌رێن په‌كه‌كێ و له‌شكرێ توركی یێن شه‌هید بووین”.
ئێك ژ وان كه‌سێن بۆ رۆژناما (گاردیان) یا بریتانی ئاخڤتی، ناڤێ وی (به‌ختیار) بوو، ئه‌و دبێژیت” ژبلی كو په‌كه‌كێ شه‌ر یێ ئینایه ده‌ڤه‌را مه، رێ ژی ناده‌ته خه‌لكی بچنه سه‌ر جهێن خو و كارێن خوه یێن چاندنێ بكه‌ن”.
هه‌روه‌سا شڤانه‌كێ په‌زی ب ناڤێ (شێخۆ) بۆ رۆژناما بریتانی گۆت” هه‌تا نوكه دو شڤان ب ده‌ستێ چه‌كدارێن په‌كه‌كێ یێن هاتینه كوشتن و ئێك ژی یێ كه‌فتیه به‌ر بوردۆمانا فرۆكێن توركی”.
ل دووڤ داتایێن رێكخراوا (Airwars)، ل سالا 2020 نێزیكی 33 وه‌لاتیێن مه‌ده‌نی ل ده‌ڤه‌رێن سنووری یێن هه‌رێما كوردستانێ ژ ئه‌نجامێ شه‌رێ په‌كه‌كێ و له‌شكرێ توركی شه‌هید بووینه و 23 كه‌س ژی بریندار بووینه، وێ رێكخراوێ ئاماژه كریه ژی كو ئه‌ڤ هژماره هه‌مبه‌ركرن ل گه‌ل سالا 2019 دو جاركی بووینه.
راپۆرتا رۆژناما بریتانی دیاركر ژی كوه ێرشێن په‌كه‌كێ و چالاكیێن له‌شكری د ناڤ ئاخا توركیا و باكوورێ كوردستانێ ل سالا 2020 ب رێژه‌یا 60% یێن كێم بووین و پتریا چالاكی و شه‌رێن خوه ئیناینه ده‌ڤه‌رێن سنووری یێن هه‌رێما كوردستانێ.
نيشاندان
