مەسرور بارزانی، جێگرێ سەرۆكێ پارتی دیموكراتی كوردستان د چارچۆڤەیێ بانگەشەكرن و پشتەڤانیكرنا لیستا 190 یا پارتی دیموكراتی كوردستان بۆ هەلبژارتنێن پەرلەمانێ كوردستانێ ل گەل كاسبكارێن باژێرێ هەولێرێ كۆمبوو.
د كۆمبوونێدا مەسرور بارزانی، جێگرێ سەرۆكێ پارتی دیموكراتی كوردستان پەیڤەك پێشكێشكر و راگەهاند» هوون دشێن بڕیاردەر بن و دشێن بڕیارێ ل چاوانییا حوكمڕانییا داهاتییا هەرێما كوردستانێ بدەن، رێكا دەستنیشانكرنا حوكمڕانیێ و دەستهەلاتێ دەنگدانە و ل سەر سندۆقێن دەنگدانێ هوون دێ بڕیارێ دەن كی ل ئاستێ باوەرییا هەوەیە».
گۆت ژی» هەموو ئالییەك بۆریێ پارتی دزانیت چیە و من رێز یا بوو هەموو ئالییەكێ سیاسی ژی یا هەی، هندەك روودانان دێ ئینمە بیرا هەوە كو دێ كاریگەری هبەیت ل سەر وێ چەندێ كو هوون چاوان دێ بڕیارێ دەن، پارتی ژ رۆژا ئێكێ كو هاتیە دامەزراندن بۆ خزمەتكرنا خەلكێ هەرێما كوردستانێ هاتییە دامەزراندن، چەترێ پارتی یێ بەرفرهەیە و جهێ هەموو كەس و ئالییەكی تێدا دبیت، هەر كەسەكێ باوەری ب دیموكراسیێ، دادپەروەریێ، سەقامگیریێ و پاراستنا كەرامەتا ئاخا كوردستانێ هەبیت دێ جهێ وی د ناڤ پارتیدا هەبیت، پارتی یا بوویە بزاڤەكا رزگاریخواز بۆ هەموو گەلێ مە، پارتی تنێ د قالبێ حزبەكا سیاسیدا ناهێتە كێمكرن، پارتی چادرەكە كو هەموو كوردستانییەك دشێت ل بن چەترێ وێ درێژیێ ب خەباتا خوە بدەت».
جێگرێ سەرۆكێ پارتی دیموكراتی كوردستان ئاماژە ب وێ چەندێ دا كو دەنگدان ب پارتی، دەنگدانە ب ئاسایش و سەقامگیری و خوەشگوزەرانی و ئاڤەدانییا كوردستانێ.
هەروەسا رۆهنكر ژی» پارتی چادرەكە هەر كوردستانییەك دشێت ل بن چەترێ پارتی درێژیێ ب خەباتا خوە بدەت، دەمەكی كو هێرش ل سەر كوردستانێ دهێتە كرن، پێشڕەوییا بەرگریكرنێ و ئەو ئالیێ كو ل سەنگەرێ بەرگریكرنێیە ژ ئاخا كوردستانێ، هەردەم پارتی بوو و هەر دێ پارتی ژی بیت «.
مەسرور بارزانی راگەهاند ژی» كەس بلا ب درووشمان نەهێتە خاپاندن، ناخوازم سۆزا بدەین، دخوازم بینمە بیرا هەوە كا مە چ كریە، پارتی چو جاران سۆزەك نەدایە كو بجهنەئینابیت، ژ نوكە و پێڤە ژی ئەوا پارتی دبێژیت دێ بجهئینیت لەوما دشێن باوەریێ پێ بینن».
گۆتژ ی» ئەو جهێ پارتی تێدا بالادەستە، ئاڤەدانی یا تێدا هەی، ئەو جهێ ژ نوكە و وێڤە پارتی تێدا حوكمڕان و بالا دەست بیت، دێ رۆژانە ئاڤەدانێ تێدا زێدەر بیت».
ئاماژە ب وێ چەندێ ژی كر» پارتی رۆلەكێ سەرەكی هەبوو د وێ چەندێ دا گەلێ كوردستانێ ل سەر هەموو دوژمن و نەحەزێن كوردستانێ سەربكەڤیت» .
جێگرێ سەرۆكێ پارتی ئەوژی بەرچاڤكر» پارتی ئێك رۆژ ژی یا بەرهەڤ نینە خەلكی بكەتە قوربانی خوە، بەلكو هەر جار خوە كریە قوربانییا خەلكێ كوردستانێ و ژ نوكە و وێڤە ب وی شێوەی دێ بەردەوام بیت».

فەرماندەیا پێشمەرگێ زێرەڤانی، دەنگوباسەكێ بێبنەمایێ كەنالێ نەوەی نوێ رەت دكەت كو وی كەنالی دەنگوباسەك بەلاڤكریە كو هێزەكا سەر ب فەرماندەیا پێشمەرگێ زێرەڤانی چوویە سەر عومبارەكا فلیكسێن نەوەی نوێ ل پارێزگەها دهۆكێ.
دوهی دوشەمبی 30 ئیلۆنا 2024، فەرماندەیا پێشمەرگێ زێرەڤانی، راگەهاند» دەنگوباسەكێ بێبنەما و بەرۆڤاژی ئەتیكێتێن رۆژنامەڤانی، ژ ئالیێ كەنالێ ئێن ئار تی ڤە هاتیە بەلاڤكرن كو هێزەكا سەر ب فەرماندەییا مە چوویە سەر عومبارەكا فلیكسێن نەوەی نوێ ل پارێزگەها دهۆكێ، ب رایا گشتی رادگەهینین كو ئەڤ دەنگوباسە یێ دوورە ژ راستیێ و رەت دكەین «.
هەروەسا دیاركر» ئەم وەكو فەرماندەیا پێشمەرگێ زێرەڤانی دوپات دكەین، كو ئەركێ هێزێن مە پاراستنا هەموو تەخ و چین و ئالییایە بێ جوداهی و هێزێن مە كارەكێ ب شێوەی نە ناكەت، هەروەسا ئارمانجا مەیە ژی رۆژێن بانگەشێ و پڕۆسەیا هەلبژارتنان د رەوشەكا ئارامدا دەرباز ببن».
ل دوماهی دبێژیت» فەرماندەییا مە ب مافێ خوە دزانیت كو سكالایەكا قانوونی ل سەر كەنالێ ناڤبری تۆمار بكەت چونكە ب دیتنا مە ئەڤە بزاڤەكە بۆ شێواندنا ناڤێ پیرۆز یێ پێشمەرگەی ژ ئالیێ كەنالێ ئێن ئار تیڤە».

دوهی دوشەمبی 30/9/2024 لژنا بلند یا سەرپەرشتییا هەلبژارتنێن پارتی پەیامەك بەلاڤكر و تێدا راگەهاند، پەیاما پارتی (ئارامی و ئاڤەدانی، پێكڤەیی و خۆڕاگری) یە و لڤین و رەفتار و دەربڕینێن سەرۆكێ ئێكەتیێ، دەربڕینێ ژ جەوهەرێ خوە دكەت و ل سەر سندۆقان دێ بەرسڤا وی دەین.
د پەیاما لژنا بلند یا سەرپەرشتییا هەلبژارتنێن پارتی دیموكراتی كوردستان دا هاتیە» لڤین و رەفتار و دەربڕینێن سەرۆكێ ئێكەتیێ ل سەر ستەیجی، دەربڕینێ ژ جەوهەرێ خوە دكەت و پێدڤی ب هیچ بەرسڤەكێ ناكەت».
هەروەسا ئاماژەكر» درووشمێ پارتییا مە (ئارامی و ئاڤەدانی، پێكڤەیی و خۆڕاگری) یە و ل رۆژا 20 ئۆكتۆبەرا 2024 ل سەر سندۆقێن دەنگدانێ دێ بەرسڤا وی دەین».

دیدار: هۆشەنگ تاجر:

چاڤدێرەکێ سیاسی ل بەلجیکا دیار دکەت، رۆژهەلاتا ناڤین بەر ب گوهۆڕینێن مەزن ڤە دچیت و ئەو یەک دێ کاریگەریا خوە ل سەر هەرێما کوردستانێ ژی کەت، هەروەسا ژ بۆ هەلبژارتنێن هەرێما کوردستانێ ژی گەلەک گرنگە ئەو لیستە سەرکەڤیت یا خەمخۆرێ کوردستانێ و قەوارێ هەرێمێ پاراستی.

دارا ناتق چاڤدێرێ سیاسی ل وەلاتێ بەلجیکا سەبارەت ب هەلبژارتنێن پەرلەمانێ کوردستانێ بۆ ئەڤرۆ دیار کر، ئەڤ هەلبژارتنە د قۆناغەکا گەلەک هەستیار دا برێڤە دچن، چونکی رۆژهەلاتا ناڤین بەر ب گوهۆڕینێن گەلەک مەزن ڤە دچیت، ئەو یەک دێ کاریگەریا خوە یا مەزن ل هەرێما کوردستانێ ژی کەت، ئیرانێ دڤێت ب رێیا هێزێن نێزیکی خوە کاریگەریێ ل هەلبژارتنان بکەت، هەروەسا ئەم دزانین هندەک هێزێن شیعە ل بەغدا ژی یێ ب رێیێن جودا جودا کار دکەن دا نەهێلن هێزا نیشتمانپەروەر ل هەرێما کوردستانێ کو ب سالانە ژ بۆ پاراستن و پێشڤەبرنا قەوارێ هەرێما کوردستانێ کار کریە و قوربانی دایە، د ڤان هەلبژارتنان دا سەرکەڤیت، ژ بەر ڤێ یەکێ ژی گەلەک گرنگە خەلکێ مە ل هەرێما کوردستانێ دەنگێ خوە بدەتە وێ لیستێ یا کو ب سالانە ژ بۆ ئازادیا پارچەیەک ژ ئاخا مە کار کریە و قوربانی دایە.
چاڤدێرێ سیاسی ئەو یەک ژی دیار کر، مخابن هندەک هێز ل هەرێما کوردستانێ ژ بۆ بەرژەوەندیێن خوە یێن تەنگ نها خزمەتا بەرژەوەندیێن دوژمنێن هەرێما کوردستانێ دکەن، یێن ل بەغدا ژی بزاڤا ڤێ یەکێ دکەن د ڤان هەلبژارتنان دا ب رێیا وان هێزان پێگەهێ خوە ل هەرێما کوردستانێ بهێز بکەن و نەهێلن هێزا نشتیمانپەروەر و پارێزڤانا هەرێما کوردستانێ سەرکەڤیت ژ بەر ڤێ یەکێ ژی ئەز داخواز ژ هەموو دەنگدەرێن کورد ل هەرێما کوردستانێ دکەم کو بچنە سەر سندوقێن دەنگدانێ و پشتەڤانیا وێ لیستێ بکەن یا کو دێ قەوارێ هەرێما کوردستانێ پارێزیت و دێ رێگریێ ل پیلانێن دوژمنان کەت، سەرکەفتنا لیستا پاراستنا قەوارێ هەرێما کوردستانێ د ڤان هەلبژارتنان دا گەلەک گرنگە.
دارا ناتق ئەو یەک ژی دیار کر، گەلێ کورد ل هەرێما کوردستانێ هشیارە و ئازادیخوازە، خەلکێ مە ل هەرێما کوردستانێ ب سالانە ژ بۆ ئازادیا پارچەیەک ژ وەلاتێ مە کار کرینە و ب هزاران شەهید داینە، گەلێ مە ل باشوورێ کوردستانێ ل هەمبەر رژێما سەدام ب سالانە خەبات کرن، ئەنفال و کیمیابارانێ نەشیا ئیرادا گەلێ مە لاواز بکەت، ژ بەر ڤێ یەکێ ژی گەلەک گرنگە گەلێ مە د ڤان هەلبژارتنان دا ژی رێ نەدەت هندەک هێزێن دی بریارێ ل دۆر پاشەرۆژا وی بدەن و گۆت: (پێدڤیە خەلکێ مە ب پشداریکرن د هەلبژارتنان دا و دەنگدان ب لیستا نشتیمانپەوەر و لیستا کو هەتا نها قەوارێ هەرێما کوردستانێ پاراستی، بەرسڤا دوژمن و نەیارێن گەلێ مە بدەن، دڤێت نەهێلین دەستکەفتیێن نەتەوەیی یێن گەلێ مە ل باشوورێ کوردستانێ بکەڤنە مەترسیێ دا، ژ بەر ڤێ یەکێ ژی ئەڤ هەلبژارتنە گەلەک گرنگە و دڤێت خەلکێ مە گەلەک هشیار بیت و رێ نەدەت پیلانا نەیار و نەحەزێن گەلێ مە سەر بگریت).
چاڤدێرێ سیاسی د دووماهیا ئاخڤتنا خوە دا ئەو یەک ژی دیار کر، هندەک هێزێن سیاسی ژ بۆ بەرژەوەندیێن خوە داخوازیێن کوردان گەلەک بچووک نیشا ددەن و د راستی دا کار بۆ لاوازکرنا هەرێما کوردستانێ ل هەمبەر بەغدا دکەن، دڤێت گەلێ مە ب رێیا سندوقێ دەنگدانێ بەرسڤا وان بدەن، چونکی بابەتێ مە وەکو کورد ل گەل دوژمنێن مە تنێ مووچە و پارە نینە، بەلکو بابەت پرسێن نەتەوەیی نە و دڤێت کورد بگەهنە هەموو مافێن خوە یێن نەتەوەیی، دیارە کێ کار بۆ مافێن نەتەوەیی دکەت، د بەرنامە و درووشمێن هێزێن سیاسی دا ئەو یەک دیارە، ژ بەر ڤێ یەکێ ئەز هێڤیدارم ب سەرکەفتنا لیستا کوردپەروەر و ئەو لیستا کار بۆ بدەستڤەئینانا مافێن نەتەوەیی یێن گەلێ کورد دکەت، پێگەهێ هەرێما کوردستانێ پشتی هەلبژارتنان بهێزتر لێ بهێت و رێ نەهێتە دان هندەک هێزێن ناڤخوەیی کار بۆ بەرژەوەندیێن دوژمنێن مە بکەن و قەوارێ هەرێمێ لاواز بکەن.

مەسرور بارزانی، جێگرێ سەرۆكێ پارتی دیموكراتی كوردستان، ل گەل هەژمارەكا خودانكار و وەبەرئێنەر و بازرگان و ئەندامێن ژۆرا بازرگانییا هەولێرێ كۆمبوو.
مەسرور بارزانی د كۆمبوونێ راگەهاند» بێگومان هەلبژارتنێن پەرلەمانێ كوردستانێ دێ كاریگەری ل سەر ژیانا مە هەموویان هەبیت، یا هەوە و یا هەموو خەلكێ كوردستانێ، راستە دەمێ دهێتە گۆتن هەموو هەلبژارتن د چارەنڤیسسازن، بەلێ ئەڤ هەلبژارتنە ب تایبەت د چارەنڤیسسان، چونكە پاشەڕۆژا قەوارەیێ هەرێما كوردستانێ یا پێڤە گرێدایە. هەر بڕیارەك بهێتە دان، ئەم دێ بڕیارێ ل سەر پاشەڕۆژا هەرێما كوردستانێ دەین. دێ بڕیارێ ل سەر چارەنڤیسێ خوە دەن، دێ بڕیارێ ل سەر پاشەڕۆژا ژیانا خوە و یا زارۆیێن خوە و كار و كاسبییا خوە دەن. ئەڤە گەلەك یا گرنگە هەموو بڕیارێن هەموو ئالییان د بەرژەوەندییا خوە و هەموو خەلكێ كوردستانێدا بیت، بۆ وێ چەندێ ئەم بزانین دێ چاوان بڕیارێ دەین».
هەروەسا گۆت» ئەڤ هەلبژارتنە مە دئێخیتە سەر دوریانەكێ، هندەكێ ل بۆریێ خوە ژی بنێرین دیارە هندەك كەسان بزاڤا وێ چەندێ كریە كو قەوارەیێ هەرێما كوردستانێ بهێتە لاوازكرن، مافێن دستووری یێن هەرێما كوردستانێ بهێنە لاوازكرن و پێشلێكرن. مافێن خەلكێ كوردستانێ رادەستی دەستهەلاتا فیدرالی ل بەغدا بهێتە كرن، مووچە و بودجە بهێنە راگرتن، پەرت و بەلاڤبوون و جوداكاری ل كوردستانێ دروست ببیت، شكۆیا پێشمەرگەی بشكێت و ئاخا هەرێما كوردستانێ بهێتە رادەستكرن، ژ پێخەمەت بەرژەوەندییا خوە د بەرهەڤ بوون ڤی قەوارەی ب تمامی تێك بدەن، ئەڤە ئەو بەرەیە هەكە نوكە ژی ل درووشمێن وان بنێرین گەلەك ب راشكاوی دەربڕینەكا زۆر ب راستگۆیانە د كریارێن خوە دا دبێژن (دێ راگرین)، ( ئێدی بەسە دێ تێك دەین) ، ( ناهێلین)، (دێ راوەستینین). ئەڤ جۆرە درووشمە هەموو درووشمێن تێكدانێ و وێرانكاریێ و تاریێ و راوەستاندنێ نە، من نەدیت ئێك باسێ پاشەڕۆژێ و ئومێدێ بكەت یان باسێ پێكڤەژیانێ و سەركەفتنێ بكەت یان باسێ باشتركرنا رەوشا خەلكێ كوردستانێ بكەت، ژ بلی پارتی دیموكراتی كوردستان».
جێگرێ سەرۆكێ پارتی دیموكراتی كوردستان دیاركر» هوون ب خوە باشتر ژ من دزانن، ململانێیەكا سیاسییا مەزن یا هەی و هەر ئێك ژی سۆزێن جودا ددەت، بۆ وێ وێ چەندێ چ بكەین و چاوان بەر ب ڤان هەلبژارتنان بچین، مافێ خەلكییە ژی داخوازا دەنگدانێ ژ هەوە بكەت. بەلێ ئەز داخوازێ ژ هەوە دكەم پێداچوونەكێ د بۆریێ هەموو ئالییاندا بكەن، بۆ وێ چەندێ بزانن ئەگەرێ دروستبوونا وان رێكخراو و حزبێن سیاسی چ بوو، ب كورتی بۆ هەوە باس بكەم كو پارتی هەر ژ دەستپێكا دروستبوونا وێ بۆ وێ چەندێ بوو، بەرگریێ ژ پێناسەیا نەتەوەیی و نیشتمانییا كوردستانێ بكەت، بۆ وێ چەندێ بوو چەترەكی دروست بكەت كو جهێ هەموو پێكهاتەیان ب هەموو ئایین و پێكهاتەیێن جوداڤە ل بن چەترێ پارتی بكەت، بۆ وێ چەندێ روو ب روویێ ستەم و ستەمكاریێ ببن. بۆ وێ چەندێ ژ پێخەمەت ب دەستڤەئینانا مافێن خەلكێ كوردستانێ ب هەموو پێكهاتەیێن وێ ڤە خەباتێ بكەت».
ئاماژەكر ژی» ب دیتنا من پارتی د ڤێ پەیاما خوە دا یا راستگۆ بوو، هەر ژ سەردەمێ بارزانیێ نەمر و سەردەمێ سەرۆك بارزانی پارتی یا راستگۆ بوو د سۆزێن خوە دا ل گەل خەلكێ كوردستانێ د خەباتا گەلێ كوردستانێدا، د وێ چەندێ دا كو مساوەمە ل سەر هیچ مافەكێ دستووری و قانوونی و ئاساییێ خەلكێ كوردستانێ نەكریە. ئالیێن دی ژی حزبێن سیاسی ل كوردستانێ یێن هەین د قۆناغێن جودا هەر ئێك ب شێوازەكی كار بكەت، بەلێ دروستبوونا وان ئالیێن سیاسی گەلەك یا جودابوو ژ دروستبوونا پارتی، پارتی دروست بوو، چونكە هەبوونا مە وەكو نەتەوە، نیشتمانێ مە وەكو كوردستانێ، ل بن مەترسییا ژناڤچوونێ بوو، ئەو دروست بوون بۆ بەرژەوەندییا خوە، چونكە ژ پارتی جودا بوون، ئانكو بزاڤەكا رزگاریخوازا كوردستانی هەبوو، دەمێ پارتی هاتیە دامەزراندن، ئەڤ بزاڤا هاتە دروستكرن، ئانكو پێدڤی نەبوو هزر د بزاڤەكا دی یا رزگاریخوازی بكەت، چونكە درووشم ئێكن، تو ژ پێخەمەت وەلاتێ خوە و ئاخا خوە و نیشتمانێ خوە و كەرامەتا مللەتێ خوە خەباتێ دكەی، باشە بۆ ئەڤ جوداهییە؟ جوداهییا دوبەرەكیێ، لاوازكرنا بەرەیێ رزگاریخوازا كوردستانێ، بۆچی هاتە كرن؟ گەلەك یا دیارە و گەلەك یا ئاسایییە، كو دیارە بابەتێ كەسی بوو. ڤێجا بۆ ڤێ چەندێ گرنگە، دەمێ ئەز باسێ بۆری دكەم، چونكە ئەڤ ململانێیە ب دوماهی نەهاتیە، ئەو ململانێیا سیاسی و سەربازی كو پێشتر هەبوو، هەتا نوكە یا بەردەوامە، بەلێ نوكە جۆرێ وێ یێ هاتیە گوهۆڕین، نوكە ل شوونا وێ چەندێ ب شەڕ و ل جەبهەی و ب شێوازێن دی ململانێ بهێتە كرن، ل سەر سندۆقا دەنگدانێ و ب شێوازێ دیموكراتی ئەو ململانێیە دهێتە كرن، خوزی هەر وەسا ژی با، خوزی ململانێیەكا سیاسی با، خوزی ل سەر سندۆقێن دەنگدانێ ئەم روو ب روویێ خەلكێ كوردستانێ بباین و هەر كەسەك ب قەدەر وێ چەندێ باوەرییا خەلكێ كوردستانێ وەرگرتی، شیابا حوكمڕانیێ بكەت، بەلێ مخابن ئالیێن دی ل كوردستانێ هەبوون پەنا بریە بەر تێكهەلبوون ل گەل ئەجیندایەكا دەرەكی ل سەر حیسابا خەلكێ كوردستانێ و بۆ لاوازتركرنا قەوارەیێ هەرێما كوردستانێ تنێ بۆ وێ چەندێ بەرژەوەندییا خوە بپارێزن».
مەسرور بارزانی راگەهاند ژی» ئەڤ هەلبژارتنە بۆ وێ چەندێ نە هوون بڕیارێ بدەن، نەبێژن مە شولە پێ نینە، پێشتر ژی ل گەل كۆمەكا برادەرێن دی روونشتم و من هەمان ئاخڤتن گۆت، هەلوەست وەرنەگریتن هەلوەستە، هوون كو دبێژن مە شولە پێ نینە بلا خەلكەكێ حزبی بچیت دەنگی بدەت، بلا ئەوێ مفادار بچیت دەنگی بدەت، باوەر بكەن ئەڤە هیچ ژ كێشەیان چارەسەر ناكەت، چونكە هەكە هوون دەنگی نەدەن، خەلكەكێ دی ل شوونا هەوە دێ دەنگی دەت، دێ خەلكەكێ دی بڕیارێ ل سەر پاشەڕۆژا هەوە دەت، ل سەر زارۆیێن هەوە بڕیارێ دەت، ل سەر شێوازێ ژیانا هەوە بڕیارێ دەت، ل سەر شێوازێ كار و كەسابەتا هەوە بڕیارێ دەت، نوكە هەكە هوون نەچن دەنگی بدەن، دێ خەلكەكێ دی ل شوونا هەوە بڕیارێ ل چارەنڤیس و پاشەڕۆژا هەوە دەت، ئایا چەڤ چەندە ب دلێ هەوەیە، یان ژی ئەگەر نە دڤێت هەوە هەلوەست هەبیت، نەكو تنێ هوون، كەسوكارێن هەوە و دەوروبەرێن هەوە و و نیاسێن هەوە و هەر كەسەكێ هەوە كاریگەری ل سەر هەبیت، هەروەسا بۆچوونا خوە ژی بۆ بێژن، ئەم دخوازین ل گەل هەموو پێكڤە بچین دەنگی بدەین بۆ وێ چەندێ ئەم بشێین پاشەڕۆژەكا گەشتر و مسۆگەرتر و كوردستانەكا سەقامگیرتر بۆ خوە ئاڤا بكەین. داخواز ژ هەوە دكەم و هیڤیدارم هوون ل گەل من د هەڤڕا بن و رۆژا 20 ئۆكتۆبەرێ، دەنگ ب لیستا 190 یا پارتی دیموكراتی كوردستان بدەن».

مەسرور بارزانی دوپاتكر پێكهاتەیێن جودا جودا پشكەكا گرنگن ژ گەلێ كوردستانێ و ل بن سیبەرا پارتی، دێ بنەمایێن پێكڤەژیانێ ل كوردستانێ ب هێزتر بن.
مەسرور بارزانی، جێگرێ سەرۆكێ پارتی دیموكراتی كوردستان ل گەل پارت و ئالیێن ئەندام د هەڤپەیمانییا مەسیحی كۆمبوو.
مەسرور بارزانی، جێگرێ سەرۆكێ پارتی ل بەرپەرێ خوە یێ تایبەت ل سەر تۆرا جڤاكییا فەیسبووكی بەلاڤكر» د كۆمبوونێدا باس ل وێ چەندێ كریە كو پێكهاتەیێن جودا جودا یێن كوردستانێ، ب تایبەتی كلدان و ئاشووری و سریان و ئەرمەن، پشكەكا گرنگن ژ گەلێ كوردستانێ و ئەم هەموو پێكڤە خودانێن ڤی نیشتمانی نە».
جێگرێ سەرۆكێ پارتی دوپاتكر» جهێ شانازیێیە، پارتی هەردەم جهیچ باوەرییا هەموو پێكهاتەیان و ب تایبەتی مەسیحییان بوو و ل بن سیبەرا پارتی، دێ بنەمایێن پێكڤەژیانێ ل كوردستانێ ب هێزتر بن و دێ مافێن پێكهاتەیان د پاراستی بن».
هەڤپەیمانییا مەسیحی، سوپاسیێن خوە بۆ پشتەڤانییا بێسنۆر یا سەرۆك بارزانی و پارتی دیاركر كو هەردەم پشتەڤان و بەرگریكار و پارێزەرێن مافێن پێكهاتەیان بوو و روو ب روویێ هەمو بزاڤێن پێشێلكرنا مافێن پێكهاتەیان راوەستییایە.

بەرپرسێ لقێ 9 یێ پارتی دیموكراتی كوردستان ل ئاكرێ راگەهاند: بۆ شكاندنا پیلانێن دوژمنێن كورد و كوردستانێ و پاراستنا دەستكەفتان دەنگ ب لیستا 190 یا پارتی دیموكراتی كوردستان بدەن.
د. مەردان خدر، بەرپرسێ لقێ 9 یێ پارتی دیموكراتی كوردستان ل ئاكرێ د چارچۆڤەیێ ئاهەنگەكا جەماوەرییا مەزندا ل گۆندێ شەرمن ل سنۆرێ قەزا ئاكرێ، بۆ سەرئێخستنا لیستا 190 یا پارتی دیموكراتی كوردستان گۆت» بۆ شكاندنا پیلانێن دوژمنێن كورد و كوردستانێ و پاراستنا دەستكەفتان دەنگ ب لیستا 190 یا پارتی دیموكراتی كوردستان بدەن».
گۆت ژی» هەلبژارتنێن ڤێجارێ بۆ خولا شەشێ یا پەرلەمانێ كوردستانێ گرنگی و تایبەتمەندییەكا هەی ژ بەر كو دوژمنێن كورد و كوردستانێ دزانن هەكە پارتی لاواز بیت دێ هەرێما كوردستانێ لاواز بیت، لەوما هەموو بزاڤان دكەن هەرێما كوردستانێ لاواز بكەن».
بەرپرسێ لقێ 9 یێ پارتی ئاماژەكر» پێدڤییە مللەتێ كورد ڤێجارێ ب هشیاری بچیتە سەر سندۆقێن دەنگدانێ و دەنگی بۆ ب هێزبوونا كوردستانێ بدەن و دەنگی ب پاراستنا دەستكەفتان بدەن و دەنگی ب وێ لیستێ بدەن كە دشێت دەستكەفتێن مەزن بۆ هەرێما كوردستانێ و خەلكێ كوردستانێ ب دەستڤە بینیت، هەڤدەم رۆژانە دبینین تنێ ئەو حزب و لیستەیە و دناڤ حوكمەتێ ژی دا ئەو بەرگریێ دكەت و رێگریێ دكەت كو پیلانێن دوژمنان سەرنەگرن».

د رێورەسمەكی دا ئەڤرۆ رۆژا ئێكشەمبی 29/9/2024 هەژمارەكا ئەندام و لایەنگرێن ئێكەتی نشتیمانی كوردستان و نەوەی نوێ ل سنۆرێ لقێ 8 یێ پارتی دیموكراتی كوردستان ل ئیدارەیا سەربەخوەیا زاخۆ بڕیار دا بهێنە د ناڤ رێزێن پارتی دیموكراتی كوردستاندا.
د رێوڕەسمەكیدا كو دوهی ئێكشەمبی 29/9/2024 هاتیە ئەنجامدان، عومەر ئورەیی، بەرپرسێ لقێ 8 یێ پارتی دیموكراتی كوردستان راگەهاند» ئەڤرۆ هەژمارەكا گەنجان ل سنۆرێ ئیدارەیا سەربەخوە یا زاخوە بڕیار دا ژ ناڤ رێزێن ئێكەتی نشتیمانی كوردستان و نەوەیی نوێ بهێنە د ناڤ رێزێن پارتی دیموكراتی كوردستاندا و ژ ئەڤرۆ وێڤە بۆ لیستا (190) یا پارتی كاربكەن.
بەرپرسێ لقێ 8 یێ پارتی ئەوژی گۆت «ڤان گەنجان ب پشتڕاستیڤە بڕیارەكا دروست یا دای و پەشێمان نابن، ژ بەر كو یێن هاتینە د ناڤ پارتەكا مەزن دا كو ئەو پارتە كو ئەڤرۆ ڕێبەرییا ڤی مللەتی دكەت».

دیدار، هۆشەنگ تاجر:

سەرۆکێ گشتی یێ پارتا وەلاتپارێزێن کوردستانێ دیار دکەت ئەڤ هەلبژارتنە بۆ هەرێما کوردستانێ گەلەک گرنگن، د دەمەکێ هەستیار دا دهێنە ئەنجامدان و ب سەرکەفتنا هێزێن نشتیمانپەوەر دێ هەرێما کوردستانێ بهێزتر کەڤیت و دێ دەستکەفتێن هەی ژی هێنە پاراستن.

مستەفا ئۆزچەلیک سەرۆکێ گشتی یێ پارتا وەلاتپارێزێن کوردستانێ د دیدارەکا تایبەت دا بۆ رۆژناما ئەڤرۆ دیار کر، ئەڤ هەلبژارتنە د دەمەکێ دا دهێنە کرن کو بەغدا و نەیارێن گەلێ کوردستانێ دخوازن قەوارێ هەرێما کوردستانێ لاواز بکەن و دەستکەفتێن هەی ژناڤ ببەن و گۆت: (د هەمان دەمی دا ئەڤ هەلبژارتنە بۆ کوردان دەلیڤەکا گەلەک مەزن و دیرۆکیە، هەکە ل هەرێما کوردستانێ هێزێن نشتیمانپەروەر سەرکەڤن و بشێن هەڤپەیمانیەکا کوردستانی و نەتەوەیی ئاڤا بکەن دێ شێن پێگەهێ هەرێما کوردستانێ گەلەک بهێز کەن).
سەرۆکێ گشتی یێ پارتا وەلاتپارێزێن کوردستانێ ئەو یەک ژی دیار کر، ژ ئەنجاما ئێکەتیا هێزێن سیاسی یێن کوردستانی ل باشوورێ کوردستانێ پشتی سالا ١٩٩١ پارچەیەک ژ وەلاتێ مە هاتە ئازادکرن و پشتی سالا ٢٠٠٣ ژی دەمێ کورد ئێکگرتی بوون شیان ب فەرمی و دستووری هەبوونا هەرێما کوردستانێ ب عێراقێ بدەنە قەبوول کرن، نها ژی دڤێت هێزێن کوردی هەمان هەلوەست هەبیت بۆ پاراستنا دەستکەفتیێن گەلێ کوردستانێ ل هەرێما کوردستانێ و گۆت: (سەرکەفتنا هێزێن وەلاتپارێز و خوەدان هزرا نەتەوەیی د ڤان هەلبژارتنان دا دێ بیتە ئەگەر هەرێما کوردستانێ دەستکەفتیێن هەی پارێزیت و یێن زێدەتر ژی بدەستڤە بینیت، ژ بەر ڤێ یەکێ ژی ئەم هێڤیدارین ئەڤ هەلبژارتنە ب سەرکەفتنا کوردپەروەران و وەلاتپارێزان ب دووماهی بهێت).
ناڤهاتی ئەو یەک ژی دیار کر، هێڤیدارم خەلکێ مە ب رێژەیەکا باش پشکداریێ د هەلبژارتنان دا بکەن و خوەدان ژ ئیرادا خوە دەرکەڤن و پاشەرۆژا خوە ب دەستێ خوە دیار بکەن، هەروەسا هێڤیدارم ئەڤ هەلبژارتنە د کەشەکێ ئارام و دیموکراتی دا بهێنە کرن و گۆت: (بێگومان خۆلا بهێت یا پەرلەمانێ کوردستانێ دێ گەلەک یا گرنگ بیت، هێڤیدارم پەرلەمانێ نوو ژی ل گۆر دلێ خەلکێ کوردستانێ بیت، هەروەسا دڤێت هەموو هێزێن سیاسی ژی ئیرادا خەلکێ قەبوول بکەن و رێزێ ل بریارێن حوکمەتا نوو و سەرۆکاتیا هەرێما کوردستانێ بگرن، دا هەرێما کوردستانێ هەردەم یا ئارام و ئاڤەدان و پێشکەفتی بیت).
مستەفا ئۆزچەلیک ئەو یەک ژی دیار کر، دڤێت دەنگدەرێن کورد باش بزانن هەرێما کوردستان نە تنێ ژ بۆ وەلاتیێن هەرێما کوردستانێ بەلکو ژ بۆ هەموو کوردێن ل جیهانێ پەناهگەکا مەزنە و جهێ هێڤیا مە هەموویانە، ژ بەر ڤێ یەکێ ژی هێڤیدارم حوکمەتا نوو یا هەرێما کوردستانێ بشێت هەموو پرسێن هەی چارەسەر بکەت، دا هەموو پێکهاتێن ل هەرێما کوردستانێ بشێن ب ئازادی بژین، دیموکراسی و پێکڤەژیانا هەی بهێزتر بکەن و گۆت: (بابەتێ ماددێ ١٤٠ ژی گەلەک گرنگە، هێڤیدارم پشتی هەلبژارتنان هەموو پارتێن سیاسی بشێن پێکڤە کار بۆ چارەسەرکرنا ماددێ ١٤٠ بکەن، هەروەسا هێزێن کوردستانێ بشێن پێکڤە ل هەمبەر بەغدا ئێک هەلوەست بن، ئەو یەک ژی گەلەک گرنگە).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر وەکو پارتا وەلاتپارێزێن کوردستانێ ئەم هێڤیدارین پەرلەمانێ نوو، حوکمەت و سەرۆکاتیا هەرێما کوردستانێ بشێن پێکڤە کار بۆ بهێزکرنا پێگەهێ هەرێما کوردستانێ بکەن، دا بشێن هەڤالبەندێن هەرێما کوردستانێ زێدە بکەن و دوژمن و نەیاران ژی کێم بکەن، بێگومان ئەو یەک داخوازیا هەموو کوردەکێ یە و گۆت: (هێڤیدارین پەرلەمانێ نوو، حوکمەت و سەرۆکاتیا هەرێما کوردستانێ پشتی هەلبژارتنان بشێن پێکڤە هشیاریا نەتەوەیی د ناڤ جڤاکێ کوردی ل هەرێما کوردستانێ دا زێدەتر بکەن، دا دەستکەفتیێن هەی بهێنە پاراستن و کار بۆ بدەستڤەئینانا دەستکەفتیێن زێدەتر بکەن).

سەربەست لەزگین، بەرپرسێ مەكتەبا رێكخستنا پارتی ل پارێزگەها دهۆكێ پەیامەك ئاراستەی خەلكێ پارێزگەها دهۆكێ و ئیدارەیا سەربخوەیا زاخۆ ئەڤە دەقێ وێیە:
خەلكێ شەرەفمەندێ پارێزگەها دهۆكێ و ئیدارەیا سەربخوە یا زاخۆ..
دیسان ل هەرێما كوردستانێ ئەم د پێشوازییا وەرزەكێ نوو یێ ئازادیێ و دیموكراسییەتێ داینە ژبۆ موكمكرنا شەرعییەتا كوردستانێ كو ئارمانجا هەرا پیرۆز یا پارتییە ئەم بەر ب هەلبژارتنێن خولا شەشێ یا پەرلەمانێ كوردستانێ ڤە دچین.
هەر ژ دەستپێكا سەرهلدانا گەلێ مە ل بهارا سالا 1991ێ دیموكراسییا كوردستانێ ب ئەندازیارییا سەرۆك و رێبەر مەسعود بارزانی پڕۆژەیێ سەرەكیێ پارتی دیموكراتی كوردستان بوویە، ب پشتەڤانییا خودایێ مەزن و خەلكێ كوردستانێ و دیرۆكا پڕ سەروەرییا پارتی و سەركردایەتییا حەكیمانەیا سەرۆك بارزانی هەتا ئەڤرۆ پارتی ل سەر ئاستێ كوردستانێ و گەلەك جاران ژی ل سەر ئیراقێ هێزا سیاسییا ئێكێ بوویە و هەر ب ڤێ پشتەڤانیێ دێ مینیت هێزا ئێكێ چونكە پارتی ب كریار یا سەلماندی كو خودانا راستەقینەیا ئاخ و خەلكێ ڤی وەلاتییە.
خۆڕاگرێن دەڤەرا بەهدینان..
دەڤەرا بەهدینان كا چاوان لاندكا شۆڕەشێن ئیلۆن و گۆلانێ و مەیدانا ب دەهان داستان و قەهرەمانییا بوویە، هەروەسا كەلها زەر و بانكا دەنگ و جەماوەرێ پارتییە، دوهی خەلكێ ڤێ دەڤەرێ ب خوینا خوە، ئەڤرۆ ژی ب دەنگ و پشتەڤانییا خوە بەرگریێ ژ دەستكەفت و سەركەفتنێن مللەتێ مە دكەت، وەكو چیایەكێ خوەرست و نەلڤ ل بەر سینگێ هەموو نەیار و دوژمنێن سەروەریێ و شەرعییەتا كوردستانێ راوەستییاینە و د بەرهەڤ بووینە بۆ پێشكێشكرنا هەموو فیداكارییەكێ.
دەنگدەرێ هێژا .. رێڤینگێن رێكا ئازادیێ و دیموكراسیێ
لیستا 190 یا پارتی دیموكراتی كوردستان لیستا خوینا شەهیدان و خوە نەچەماندن و بەرگریێیە، لیستا ئارامی و ئاڤەدانی و پێكڤەیی و خۆڕاگریێیە. پشكدارییا هەوە د هەلبژارتناندا و دەنگدانا هەوە بۆ لیستا 190 و بەربژارێن پارتی مسۆگەركرنا ئاسایش و ئاڤەدانی و پێشەڕۆژەكا گەشە بۆ نڤشێ نوو، لیستا 190 یا پارتی سەر دەستێ پێشمەرگێ كوردستانێ و مالباتێن شەهیدان هاتیە راگرتن، ب زەند و باسكێن قوتابی و لاو و ئافرەت و جوتیار و پالانڤە هاتیە ئاڤاكرن، زانا و رەوشەنبیر و نڤیسەر و ئەكادیمی هەموو دەمان دناڤ پارتیدا رۆلەكێ كاریگەر هەبوویە، لیستا 190 لیستا مافخوازایە بێی جوداهییا ئۆل و نەتەوە و رەگەز بەرگری كریە ب پشتەڤانییا جەماوەرێ خوە یێ وەفادار و دلسۆز و دێ هەر بەردەوام بیت، ئەم د پشتڕاستین ژ پشتەڤانییا دهۆكا داسنییا و زاخۆكا پرا دەلال و دلێ سەرۆكی و سێمێلیێن خوین گەرم و ئاكرەییێن كەلها ئاگری و پایتەختێ نەورۆزێ و ئامێدییا كەلها زانینێ و شێخانا پێكڤەژیانێ و باتیفیێن چاڤنەترس و جوتیار و رێنجبەرێن بەردەرەشێ، ئەم هەموو پێكڤە ل 20 ئۆكتۆبەرا 2024 دێ مزگینییا سەركەفتنا لیستا 190 یا پارتی دەینە سەرۆكێ خوە و دێ داستانەكا دی یا دیموكراسییەت و شارستانییەتێ تۆماركەین.