ئەڤرۆ:

وەزارەتا دەرڤە یا تورکیا راگەھاند کو ھێرشا ل سەر ھەولێرێ خزمەتا ئارامی و پێکڤەژیانا ل عیراقێ ناکەت و ھەر ھێرشەک کو ئارمانجا وێ وەلاتیێن سڤیل و تێکدانا ئارامیا عیراقێ و ھەرێما کوردستانێ بیت ئەو ب توندی شەرمزار دکەن و داخواز ژ حوکمەتا عیراقێ و ھەرێما کوردستانێ ژی کر کو پێدڤیە کەسێن دەست د وێ ھێرشێ دا ھەی بھێنە دادگەھکرن و بگەھنە سزایێن خوە.

وەزارەتا دەرڤە یا تورکیا ئەو یەک ژی دیار کر کو گرۆپێن تیرۆرستی ھەردەم دخوازن ئارامی و پێکڤەژیانا ل عیراقێ و ھەرێما کوردستانێ تێک بدەن، د ھێرشا ل ھەولێرێ دا مخابن ھندەک وەلاتیێن سڤیل بریندار بووینە، تورکیا ب توندی ڤێ ھێرشێ شەرمزار دکەت و داخواز ژ حوکمەتا عیراقێ، ھەرێما کوردستانێ و ھێزێن نێڤدەولەتی ژی دکەت کو د شەرێ ل دژی تیرۆرێ دا پتر ھاریکاریا ئێکتر بکەن.

وەزارەتا دەرڤە یا تورکیا د دووماھیا داخۆیانیا خوە دا ھەڤخەمیا خوە بۆ ھەرێما کوردستانێ دیار دکەت و ئاماژە ب ھندێ ژی دکەت کو ب سالانە گرۆپێن تیرۆرستی بوونە ئاریشەکا مەزن بۆ ھەموو خەلکێ عیراقێ و ھەرێما کوردستانێ و زیانێن گەلەک مەزن گەھشتینە خەلکێ سڤیل، تورکیا ھەردەم پشتەڤانیا خوە بۆ عیراقێ و ھەرێما کوردستانێ دیار کریە و دڤێت تاوانبارێن ھێرشا ل سەر ھەولێرێ بگەھنە سزایێن خوە.

ئەڤرۆ، ھۆشەنگ تاجر:

چاڤدێرێن سیاسی دیار دکەن کو دەمەکە ئیران و ھێزێن دی کار بۆ لاوازکرنا پێگەھێ ھەرێما کوردستانێ دکەن و ھەموو کارتێن ھەی ل دژی ھەرێما کوردستانێ بکار دئینن و نھا ژی ب رێیا گرۆپێن سەر ب حەشدا شەعبی کار بۆ تێکدانا ئارامیا ھەرێما کوردستانێ دکەن کو ئارمانجا سەرەکی ژی لاوازکرنا پێگەھێ ھەرێما کوردستانێ یە.

سدیق مەحمودی چاڤدێرێ سیاسی یێ رۆژھەلاتێ کوردستانێ بۆ ئەڤرۆ دیار کر کو ئاشکرایە ھەرێما کوردستانێ بوویە جھێ گرنگ د ھەڤسەنگیێن سیاسی یێن ل دەڤەرێ و ب تایبەتی ژی پشتی ریفراندۆما ھەرێما کوردستانێ د ئاستێ رۆژھەلاتا ناڤین دا ب تایبەتی ژی ھەر دو وەلاتێن ئیران و تورکیا کار بۆ لاوازکرنا پێگەھێ ھەرێما کوردستانێ دکەن، ئیران و تورکیا رۆژانە دەڤەرێن سنوری یێن ھەرێما کوردستانێ بۆردومان دکەن و گۆت: (ب تایبەتی ئیران گەلەک کارتان ل دژی ھەرێما کوردستانێ بکار دئینیت، بەری نھا ب رێیا بەلاڤکرنا فلمەکێ خواستن وەسا نیشا بدەن کو وان ھەرێما کوردستانێ پاراستیە، نھا ل بەغدا ب رێیا ھێزێن شیعە ب ھەموو رەنگەکێ کار دکەن دا بابەتێ بۆدجەی و موچێ فەرمانبەرێن ھەرێما کوردستانێ وەکو کارتەکا فشارێ ل دژی ھەرێما کوردستانێ بکار بینن و دخوازن ھەرێما کوردستانێ ھەموو نەفتا خوە رادەستی بەغدا بکەت).

ناڤھاتی ئەو یەک ژی دیار کر کو ھەری دووماھیێ ژی گرۆپێن سەر ب ئیرانێ ب موشەکان ھێرشی ھەولێرێ کرن کو ھێرشا دو رۆژێن بۆری یا ل سەر ھەولێرێ پەیامەکا ئاشکرایە ژ ئالیێ ئیرانێ و گرۆپێن سەر ب وێ یێن ل عیراقێ، وان دڤێت ئارامیا ل ھەرێما کوردستانێ تێک بدەن، چونکو ھەرێما کوردستانێ تنێ دەڤەرا ئارامە ل عیراقێ و خوەدان پێگەھەکێ خوە یێ ب ھێزە و گۆت: (پرانیا کارتێن کو ئیرانێ و گرۆپێن سەر ب وێ ل دژی ھەرێما کوردستانێ بکار ئینان بێی ئەنجام مان و نھا ژی دخوازن ئارمیا ھەرێما کوردستانێ تێک بدەن، ئارمانجا سەرەکی ژی بێگومان بۆ لاوازکرنا پێگەھێ گرنگ یێ ھەرێما کوردستانێ یە).

سەعید مورادی ئەندامێ رێکخراوا مافێن مرۆڤی یا رۆژھەلاتێ کوردستانێ ژی بۆ ئەڤرۆ دیار کر کو ھەبوونا ھەرێما کوردستانێ وەسا کریە کو رۆژانە د ئاستێ نێڤدەولەتی دا بەحسێ مافێن کوردان بھێتە کرن، ب سەدان کەنالێن تەلەفزیونی و دەزگەھێن راگەھاندنێ ل ھەرێما کوردستانێ ھەنە کو رۆژانە بەحسێ کوردان ل ھەموو جیھانێ دکەن، ئەو یەک ب دلێ دوژمنێن گەلێ کوردستانێ نینە وان دڤێت دەنگ و ئیرادا گەلێ کوردستانێ ژناڤ ببەن و ژ بەر ھندێ ژی ب ھەموو رەنگەکێ کار بۆ لاوازکرن و ژناڤبرنا قەوارێ ھەرێما کوردستانێ دکەن و گۆت: (ئیران ل بەغدا ھێزێن شیعە ل دژی ھەرێما کوردستانێ بکار دئینیت، نھا ژی میلیشاتێن شیعە بووینە مەترسیەکا گەلەک مەزن بۆ ھەرێما کوردستانێ، ئیران د بیاڤێ ھەوالگیری و کەلتوری ژی ب ھەموو رەنگەکێ ل دژی ھەرێما کوردستانێ کار دکەت، گرنگە ھەموو ھێزێن کوردی پێکڤە کار بۆ پاراستنا ھەرێما کوردستانێ بکەن، چونکو براستی ژی ھێرشا ڤێ دووماھیێ ل سەر ھەولێرێ مەترسیەکا گەلەک مەزنە).

خەلیل ئیسماعیلی چاڤدێرێ سیاسی یێ رۆژھەلاتێ کوردستانێ ژی دیار کر کو دوژمنێن گەلێ کوردستانێ ب ھەموو رەنگەکێ کار دکەن دا قەوارێ ھەرێما کوردستانێ لاواز بکەن و ژناڤ ببەن، ب ھەموو رەنگەکێ کار بۆ ھندێ دکەن، دورپێچەکا گەلەک مەزن ل سەر ھەرێما کوردستانێ ھەیە، چەندین سالن ئیران ناھێلیت بەغدا بودجێ ھەرێما کوردستانێ فرێکەت و گرۆپێن سەر ب ئیرانێ و ئەو میلیشاتێن ل عیراقێ ژی بووینە مەترسیەکا گەلەک مەزن و گۆت: (دڤێت ئەمریکا و ھێزێن ھەڤپەیمانیا نێڤدەولەتی ل ھەمبەر ھێرشا ڤێ دووماھیێ ل سەر ھەولێرێ بێدەنگ نەمینن، چونکو ئیرانێ دڤێت بزانیت کا دێ ھەلویستێ ئەمریکا چ بیت، بێگومان ھەکە ھەلویستێ ئەمریکا توند بیت ئێدی ئەو جارەکا دی ھێرشێن وەسا ناکەن لێ ھەکە ھەلویستێ ئەمریکا نەرم بیت بێگومان دێ ھێرشێن وەسا د بەردەوام بن).

ئەڤرۆ:

بەرپرسەکێ ھێزێن سووریا دیموکرات کو نەخواستیە ناڤێ وی بھێتە ئاشکرا کرن بۆ ئاژانسا سپوتینگ یا روسیا دیار کریە کو ب ناڤبژیڤانیا روسیا گەرەکا دی یا دانوستاندنان دێ د ناڤبەرا شامێ و ھێزێن سووریا دیموکرات دا دەستپێ کەت.

ھەمان بەرپرسی دیار کریە کو د دانوستاندنێن ڤێجارێ دا دو خالێن گەلەک گرنگ ھەنە کو دێ ل دۆر وان خالان دانوستاندن برێڤە چن، یا ئێکێ بابەتێ ھێزێن سووریا دیموکراتە کو دڤێت ب رەنگەکێ قانوونێ ل سووریێ و رۆژئاڤایێ کوردستانێ ھەبوونا وان ژ ئالیێ شامێ ڤە بھێتە قەبوولکرن و خالا دی ژی دڤێت شام ب فەرمی ھەبوونا رێڤەبەریا خوەسەر یا باکورێ سووریێ قەبوول بکەت، چونکو بەری نھا چەندین جاران ھەڤدیتن د ناڤبەرا رێڤەبەریا خوەسەر و شامێ دا برێڤە چووینە و شام بەرھەڤ نەبوو ھەبوونا رێڤەبەریا خوەسەر قەبوول بکەت و ژ بەر ھندێ ژی دانوستاندن نەگەھشتنە چو ئەنجامان و ڤێجارێ دڤێت شام ھەلویستێ خوە ل دۆر مافێن کوردان ب گوھۆریت.

چاڤدێرێن سیاسی ژی دیار دکەن کو روسیا دڤێت کوردان و شامێ نێزیکی ھەڤدو بکەت دا رۆلێ ئەمریکا ل سووریێ بھێتە لاوازکرن، لێ ھەکە کورد خوە ب  تەمامی نێزیکی شامێ و روسیا بکەن و خوە ژ ئەمریکا دوور بکەن ئەو یەک دێ ئەنجامێن خوە یێن گەلەک خراب بۆ کوردان ھەبن، چونکو ئارمانجا سەرەکی یا روسیا و شامێ لاوازکرنا پێگەھێ کوردانە و ھەتا ھێزێن ئەمریکا ل سووریێ بن و پشتەڤانیێ ل کوردان بکەن دێ پێگەھێ کوردان ژی ب ھێز بیت.

ب، سەرجان مەحمود:

ئاژانسەکا نووچەیان دیار دکەت کو بەرپرسێن حوکمەتا تورکیا داخواز ژ ئەمریکا کرینە کو ئێدی پشتەڤانیا کوردێن سووریێ نەکەت و ھەکە ئەمریکا دەستان ژ پشتەڤانیکرنا کوردێن سووریێ بەردەت تورکیا ژی بەرھەڤە دەستان ژ سیستەمی موشەکی یێ روسیا بەردەت، لێ ھەتا نھا ئەمریکا بەرسڤەکا ئەرێنی نەدایە تورکیا.

ئاژانسا نووچەیان یا بلومبێرک ل سەر زارێ دو بەرپرسێن حوکمەتا تورکیا دیار دکەت کو دستھەلاتا تورکیا ژ ئەمریکا دخوازیت ھەڤکاریا کوردێن سووریێ نەکەت و ھەر دەمێ ئەمریکا دەست ژ پشتەڤانیکرنا کوردێن سووریێ بەردەت ئەو ئامادەنە دەستان ژ سیستەمێ موشەکی یێ روسیا بەردەن.

ھەژی ئاماژەپێدانێ یە کو دەمەکە حوکمەتا تورکیا ھەول ددەت ل گەل حوکمەتا نوو یا ئەمریکا دەست ب دیالۆگێ بکەت و ل گەل سەرۆک بایدن ھەڤدیتنەکێ ساز بکەت لێ ھەتا نھا بەرپرسێن ئەمریکا بەرسڤەکا ئەرێنی نەداینە دەستھەلاتدارێن تورکیا و ئەمریکا دخوازیت بەری ھەڤدیتنان تورکیا د وارێ سیاسی و کڕینا موشەکێن روسی دا خوە ئێکلا بکەت و ب رەنگەکێ زەلال دەستان ژ کڕینا موشەکێن S٤٠٠ بەردەت و ل دووڤ رێنمایێن ھەڤپەیمانیا ناتۆ بزاڤێ بکەت.

د ڤێ مژارێ دا ئاژانسا نووچەیان یا بلومبێرک نووچەیەک ل سەر زارێ دو بەرپرسێن حوکمەتا تورکیا بەلاڤ کر و راگەھاند دو بەرپرسێن تورکیا بۆ وان دیار کرینە کو ئەو ئامادەنە دەستان ژ کڕینا موشەکێن روسی بەردەن لێ مەرجەک وان ھەیە و ئەڤ ژی دڤێت ئەمریکا پەیوەندیێن خوە ل گەل ھێزێن سووریا دیموکرات بدەتە راگرتن و د مژارا کوردێن سووریێ دا ل گەل تورکیا جە بگریت، ژ بەر کو نابیت زێدەتر شەرڤانێن کورد بھێنە ب ھێزکرن و د ھەمان دەمی دا دڤێت ئەمریکا گەرەنتیا وێ یەکێ ژی بدەت کو پێدڤیا تورکیا ب چ چەکی ھەبیت ئەمریکا بۆ وان دابین بکەت.

ئاژانسا ناڤھاتی راگەھاند ژی ھەر د ڤێ دەربارێ دا ھولوسی ئاکار وەزیرێ بەرەڤانیێ یێ تورکیا راگەھاندیە کو ئەو گرنگیێ ددەنە پەیوەندیێن ل گەل ئەمریکا و دشێن پرسا موشەکێن روسی پێکڤە چارەسەر بکەن و گۆت: (ئەم د مژارا یەپەگێ و ھێزێن سووریا دیموکرات دا گەلەک ھەستیارین و دڤێت ئەمریکا ڤێ یەکێ باش بزانیت و راستیا یەپەگێ و ھێزێن سووریا دیموکرات قەبوول بکەت و ئێدی ھەڤکاریا وان نەکەت و ھەکە د ڤێ مژارێ دا ئەم چارەسەریەکا گونجای پەیدا نەکەین و ئەمریکا گۆھداریا مە نەکەت ئەم نەشێین پەیوەندیێن باش ل گەل ئەمریکا دروست بکەین).

ھەر د ڤێ مژارێ دا ئەرگون باباھان رۆژنامەڤانێ تورک ژی راگەھاند کو تورکیا ھەول ددەت ل گەل بەرپرسێن ئەمریکا ب ئاخڤیت لێ ئەمریکا بەرسڤا داخوازیا تورکیا نادەت و گۆت: (دیارە ئەمریکا ب چو رەنگەکێ رازی نابیت کو تورکیا موشەکێن روسی بکار بینیت و دێ بەردەوام ھاریکاریا کوردێن سووریێ کەت و ھەکە دەستھەلاتدارێن تورکیا دخوازن خوە نێزیکی ئەمریکا بکەن دڤێت بێی مەرج دەستان ژ کڕینا سیستەمێ موشەکی یێ روسیا بەردەن و د سیاسەتا خوە یا ل سووریێ دا ل گەل ئەمریکا جە بگرن، چونکو ژ بلی ھندێ چو رێیێن دی ل پێشبەری تورکیا نەماینە).

چاڤدێرێن سیاسی ژی دیار دکەن کو ھەلویستێ ئیدارا نوو یا ئەمریکا ل دۆر سووریێ ب دلێ تورکیا نینە، چونکو بایدن دڤێت بەرۆڤاژی سەردەمێ ترامپی پێگەھێ ئەمریکا ل سووریێ ب ھێز بکەت و ژ بۆ ھندێ بێگومان دێ پتر ھاریکاریا کوردێن سووریێ کەت، ئەو یەک ژی بوویە جھێ دلگرانیا تورکیا و ئەردۆگان ب ھەموو رەنگەکێ کار بۆ ھندێ دکەت کو کارتا سیستەمێ موشەکی یێ روسی ل دژی ئەمریکا بکار بینیت دا ئەمریکا دەستان ژ پشتەڤانیکرنا ھێزێن سووریا دیموکرات و کوردێن سووریێ بەردەت.

ئەڤرۆ:

دوھی شەمبیێ ١٣/٢/٢٠٢١ ب پشکداریا مەسرور بارزانی، سەرۆکێ حوکمەتا ھەرێما کونسۆل و نوونەرێن وەلاتان، ھەروەسا ١٠ گەنجێن خودان ھزرێن نوو، پێنجەمین کۆنفرانسێ کوردستانێ و نێڤدەولەتی (تێدیکس نیشتیمان) دەستپێکر.

د وی کۆنفرانسی دا، مەسرور بارزانی گۆتارەک پێشکێش کر و ئەڤە دەقێ وێ یە:

ئەز ئەڤرۆ یێ لڤێرێ بۆ نیشادانا پشتەڤانیا خوە و حوکمەتا ھەرێما کوردستانێ بۆ وان گەنجێن ئەڤرۆ ل ڤێرە کۆمبووین، ھەروەسا بۆن یشادانا پشتەڤانیا خوە بۆ گەنجیچن مە ب گشتی، ژ زاخۆ ھەتا خانەقینێ کو ل چەند ھەیڤێن بۆری دا، ژ نێزیک ئاگەھداری  بیر و بۆچوون و ھزر و پەرۆشی و گەشبینیا وان بووم، بۆ باشتربوونا رەوشا کوردستانێ. چ ئەو گەنجێن ل ھەولێرێ کاری بۆ بەرفرەھکرنا کارێ بەرگدروویاخوە و ھناردەکرنێ بۆ بازارێ نوو دکەن، یان ئەو خانما رزگار بووی یا ئازا یا ئیزدی، ل دھۆکێ دوکانەکا شریناھیان یا بچووک ڤەکریە و ب رێیا وێ چەندێ ھاریکاریا خێزانا خوە دکەت.

ئەوان بازرگانیەکا بچووک کریە و خەلکێ خوەجە ب کارخستینە، کو ب عەقلیەتەکا نوو و ل سەر بنەمایێ پشت ب خوە بەستنێ و داھێنانێ کار دکەن. ژ بەر ڤێ چەندێ ژی ئەز ئەڤرۆ یێ ل ڤێرێ، تاکو دەستپێکەکا نوو د ناڤبەرا حوکمەتا ھەرێما کوردستانێ و ھەوە دەست پێ بکەین، کو پەیوەندیەک بیت، ل سەر بنەمایێ باشترکرنا رەوشا کوردستانێ ژ لایەکی، و پەیداکرنا دەلیڤێن راستەقینە بۆ گەنجان ژ لایەکی دی ڤی، ئەڤە ژی دەرفەتەکە بۆ زێدەتر لێک نێزیکبوونا مە ژ ھەڤدوو.

ئەز دزانم ئەو ئاستەنگێن ل بەردەم ھەوە ھەین، د دژوارن و ھندەک ژ وان، بۆ چەندین نەڤیە یێن ھەین، بەلێ د ھەمان دەم دا دزانم، ئەو دەلیڤێن نوکە ھەین ب ساناھی ب دەستڤە نەھاتینە.

ئەز ژی وەکو پتریا خەلکێ کوردستانێ د خێزانەکێ دا یێ ژدایک بوویم، بەردەوام د ژیانەکا نە سەقامگیر دا بوو و ل ئاوارەییێ ژیاینە و مە ھەست ب راستیێن تەحل یێن ژیانێ کریە و بەردەوام ب حەسرەت خواستا مە زڤرین بوو بۆ نیشتیمانی، ئەز دزانم خواندن و پەروەردا باش، دشێت چ گۆرانکاریەکا مەزن د ژیانا مرۆڤی داد روست بکەت. ھوون بەختەوەرن کوپ تریا ھەوە ئەو زەحمەتیە نەدیتیە، کود ایک و باب و باپیرێن ھەوە، ل چەرخێ بۆری دیتین و روو ب روو بووین.

ئەز دزانم کو نوکە چاڤەریێن ھەوە د جودانە. (ئارین) ێ کورێ من گەلەک جاران دبێژیتە من” بیر و بۆچوونێن گەنجان نوکە د جوداترن و خواست و داخوازیێن وان د زێدەترن، لەوما دڤێت زێدەتر دەلیڤێن کاری بۆ گەنجان پەیدا بکەین”.

تێ دگەھم کو نابیت ئەم بۆریێ خوە، بەردەوام وەکو بیانویەک، بکاربینین بۆ لێکدانا وێ ڤالاھیا د ناڤبەرا گەنجان و حوکمەتێ دا دروست بووی، بەلێ بۆ وێ چەندێ مفای ژ دەلیڤا راستەقینە یا ب ھێزکرنا ڤێ پەیوەندیێ وەربگرین، دڤێت ل پێدڤی و پێگەھێ ھەڤددوو تێبگەھین. لەوما ب راشکاوی بۆ ھەوە دبێژم: ئەز ب خوە یێ پێگیرم ب پەیداکرنا دەلیڤێ بۆ گەنجێن مە. بێگومان حوکمەتێ رۆلەکێ گرنگ یێ ھەی د پەیداکرنا وێ دەلیڤێ دا و پێدڤیە حوکمەت چارچۆڤێ قانوونی و ئابووری بۆ گەشەپێدان و ھاندانا ھەڤپشک و ھەڤپشکیا کەرتێ گشتی و تایبەت دیار بکەت، بۆ وێ چەندێ خودان کار و بازرگان، گەشێ بکەن و ھەروەسا ھاریکاریا گەشەپێدانا بزنسا بچووک ژی بکەن.

ھەروەسا دزانم کود بیت مەشق و پەروەردا دروست ھەبیت، بۆ وێ چەندێ زوورترین دەلیڤە بۆ گەنجێن مە پەیدا ببن، بەلێ بێگومان رێیەکا درێژ یا ل بەراھیا مە بۆ ئەنجامدانا ڤان گۆرانکاریان، دەم دڤێت و ھندەک جاران ھندەک کەس خودان بەرژەوەندیێن تایبەتن و رێگریێ ل ئەنجامدانا چاکسازیێ دکەن.

پێدڤیە ئابوورەکی ئاڤا بکەین کو کێمتر پشتبەستنێ ب کەرتێ گشتی بکەت، ئابوورەک بیت، زێدەتر پشت ب ھەماھەنگیێ  و ھاریکاریێ د ناڤبەرا کەرتێ گشتی و تایبەت ببەستیت بۆ پێشخستنا ژێرخانا ئابووری و پشتەڤانیکرنا بازرگانیا بچووک و ناڤین کو بشێن زوورترین دەلیڤێن کاری پەیدا بکەن.

ئەز یێ پشت راستم ل سالێن داھاتی، بازرگانی و بزنسا بچووک و ناڤین، ئەوێن ژ لایێ گەنجێن وەکو ھەوە دھێنە ب رێڤەبرن، دێ گەشێ کەت و بیتە پشکەک ژ وەرچەرخانەکا گەلەک پێدڤی، ل ئابوورەکێ پشت بەستی ب بھایێ نەجھگیر یێ پەترۆلێ، بۆ ئابوورەکێ گەشگیر، کو ژ جڤاکەکێ بکارئێنەر ببینە جڤاکەکێ بەرھەمھینەر.

ئەز یێ ب پەرۆشم بۆ وێ چەندێ بزانم ئەم دشێن چ بدەستڤە بینین ژ وزا کەسک و نووکەر، ل پیشەسازیا تەکنەلۆژیا پێشکەفتی، د بوارێ گەشتیاری، د کارێن داھێنەرانە و پتریا بوارێن دی یێن ئابوورێ مە. ئەڤە دێ وەرچەرخانەک بیت د دەمێ درێژخایەن دا، کو دەلیڤێن کاری دێ پەیداکەت و ھاریکارە بۆ وێ چەندێ، ھەرێما مە پێشبەرگیێ بکەت، پشت راستم ئەم د ئاراستەکێ راست دا گاڤان د ھاڤێژین، کو خوەشبەختانە ھەرێما کوردستانێ د جیھانێ دا، یا ناڤدارە ب وێ چەندێ کو پەناگەھەکا ئارام و لێبۆدە بوو و ئەم ژی پەرە ب وان بھایان ددەین، لەوما ئەز د وێ باوەریێ دا مە کو ھەرێما کوردستانێ، کو خودانا ئاکنجیێن گەنج و بەرھرەمەند و ھیوا بەخشە نەکو تنێ دشێت ببیتە سەنتەرەکێ بازرگانی ل کوردستانێ، بەلکو دێ بیتە مەلبەندەکێ ئابووری و بازرگانی و وەبەرئێنانێ یا گرنگ ل عیراقێ و ل دەڤەرێ.

ئەز ب تایبەتی پەرۆشێ پەیداکرنا دەلیڤێ بۆ ب دیجیتالکرنا کوردستانێ مە، کو گەلەک یا پێدڤی و گرنگە بۆ بدەستڤەئینانا وان پێشکەفتنێن ئەم دخوازین د کاروبارێن حوکمەتێ دا بدەستڤەبینین، کو پشکەکا سەرەکی یا کارناما چاکسازیا کابینا نەھێ یا حوکمەتا ھەرێما کوردستانێ یە، ب ئاراستەیا بدەستڤەئینانا دادپەروەریێ و شەفافیەتێ. د راست یدا مە سیستەمەکێ تمام دیجیتالی بۆ داراییا گشتی یا حوکمەتا ھەرێما کوردستانێ دەستپێکریە، کو ب تمامی ژلایێ کارمەندێن گەنج یێن خودان شیانێن کوردستانی دناڤ حوکمەتێ دا، ھاتیە دروستکرن و گەشە پێ ھاتیە دان. ھەروەسا مە مفا ژ گەنجێن گەشەپێدەرێن خوە وەرگرتیە بۆ دانانا خزمەتگوزاریێن دیجیتالی یێن دی، ب تایبەتی د پۆرتال و وێبسایتێ حوکمەتا ھەرێمێ کو ئارمانجا وێ پێشکێشکرنا خزمەتگوزاریێن گشتی یە.

د دەمەکی دا ئەڤ پێنگاڤە دێ بنە ئەگەرێ زێدەکرنا شەفافیەتێ و کاراکرنێ د خزمەتا گشتی دا، ھەروەسا ھاریکارە بۆ ھەوە ژی د گەھاندنا ھزرێن ھەوە بۆ بازاری و ب ساناھی تۆمارکرنا براند و کۆمپانیان و کاروبارێن پێدانا باجێ ژی دێ ب ساناھیتر کەت.

بەلێ ھەوە ھەموویان رۆلەکێ گەلەک مەزن د پێشڤەبرنا حوکمرانیێ یێ ھەی و بێگومان حوکمەتا ھەرێمێ ب تنێ نەشێت وی رۆلێ بگێریت، لەوما مە پێدڤی ب پشتەڤانیێ یا ھەی، مە دڤێت ھوون پشکەک بن ژ دیالۆکێ و دانوستاندنێ، ب ئارمانجا باشترکرن و ب ھێزترکرنا نیشتمانێ مە، بۆ وێ چەندێ کوردستان ب ھێزتر بیت، پێدڤیە ھوون گەنج خوە رێکبێخن و ل پیناڤی پێشخستنا کوردستانێ دا ھزرێن نوو بەرچاڤ بکەن.

ھیڤیدارم گوە ل وان دەنگ و پرۆپاگندا نەکەن، کوب ۆ ھەوە دبێژن ئەم نەشێین بەر ب پێشڤە گاڤا بھاڤێژین و پێشبکەڤین. گوھێ خوە نەدەنە وان کەسان، کو بەردەوام گومان ھەیە و ب رەشبینی دبێژن، ئەم ھەر ل بەرێ یێن راوەستیاین، بەلێ بەردەوام ئەو بۆچوونە یێن ھاتینە پۆچەلکرن، لەوما داخوازێ ژ ھەوە دکەم ھەوە باوەری ب خوە و شیانێن خوە ھەبیت، چونکی ھوون دشێن گورانکاریان دروست بکەن و پشت راست بن کاریگەریا ھەوە یا بێ سنورە.

ل رۆژێن بۆری ل گەل ھژمارەکا خودانکاران کۆمبووم، خوەشحال بووم کو من گوھێ خوە دا ئەزموونێن وان د چاوانیا دروستکرنا کارێن خوە دا و پەرەپێدان ب مارکێن خوە و ئەو ئاستەنگێن روو ب روو بووین. بۆ من گەلەک جھێ سەرنجێ بوو گوھێ خوە بدەمە پەرۆشیا وان و د ھەمان دەم د اگوە ل پێشنیازێن وان بگرم کا حوکمەت دشێت چ بکەت ل پیناڤی ئاسانکاریان بۆ گەشەپێدانا کارێن بازرگانی.

دخوازم پرەکێ دروست بکەم بۆ زێدەتر گەھشتنا دەنگێ گەنجان ب حوکمەتێ، کو ب دیتنا من ئەڤە کارەکێ گەلەک گرنگە، لەوما دخوازم گوھێ خوە بدەمە ھەوە و حوکمەتا ھەرێمێ مفای ژ شیانێن ھەوە وەرگریت.

من داخواز کریە کو گرۆپەکێ نوونەراتیا گەنجان بھێتە دروستکرن بۆ وێ چەندێ نیگەرانی و خواست و داخواز و ھزرێن گەنجان راستەوخوە بگەھنە نڤیسینگەھا من، خوەشحالم کو تیما من یا پێکھاتیە ژ چەندین گەنجێن خودان شیان و ژێھاتی کو گەلەک ب وەستیان کاردکەن بۆ وێ چەندێ ھاریکار بن بۆ بدەستڤەئینانا ڤان ئارمانجان.