ئەڤرۆ، عەزیز ھەورامی
ژ ئەگەرێ کێم شیانێن ھێزێن عیراقی ژ پۆلیس و حەشدا شەعبی و پۆلیسێن فیدرالی، دیاربوونا تیرۆرستێن داعشێ ل دەڤەرێن کوردستانی یێن دەرڤەی ئیدارا ھەرێما کوردستانێ ب شێوەکێ بەرفرەە یا سەرھلدای و فەرماندەکێ پێشمەرگەی ژی دبێژیت، ب وێ رەوشا رەفتار ل گەل داعشێ بھێتە کرن، ل پاشەرۆژێ مەترسی یا ھەی دەڤەرەکا بەرفرھە داگیر بکەت,
نوری حەمە عەلی، فەرماندێ میحوەرێ پردێ – کەرکووک یێ پێشمەرگێ کوردستانێ بۆ رۆژناما ئەڤرۆ گۆت”پشتی نەمانا پێشمەرگەی ل کەرکووکێ ل سالا ٢٠١٧، داعشێ ھەر ھەبوون ل سنورێ دەڤەرێ ھەبوو، بەلێ د نوکە دا ب بەرفرەھی ھەبوونا داعشێ یا دھێتە تێبینیکرن و ئەو چەنجە ژی دزڤریت بۆ خەمساری و کێم شیانیا ھێزێن عیراقی ڤەدگەریت”.
نوری حەمە عەلی گۆت ژی” ھەتا نوکە ھێزێن پێشمەرگەی و ھێزێن عیراقی نەگەھشتینە رێککەفتنێ ل سەر وێ چەندێ کو ھێزێن مە بزڤرن بۆ دەڤەرێن سنوورێ مادێ ١٤٠، ھەکە پێشمەرگە ل وان دەڤەران ھەبیت، رێ ب تیرۆرستێن داعشێ نادەت ل وان دەڤەران ھەبوون ھەبیت، ژبەرکو دا پێشمەرگە وان ژناڤ بەت”.
وی فەرماندێ پێشمەرگەی دیارکر” چەکدارێن تیرۆرستێن داعشێ ب مەفرەزان کریارێن تیرۆرستی ئەنجام ددەن و لڤین ژی ل کەرکووکێ و دەوروبەرێن وێ یا ھەی، بەلێ د نوکە دا نەشێن دەڤەرەکا بەرفرھە داگیر بکەن، لێ ب پشت راستی ڤە ئەگەر بھێت و نەھێنە ژناڤبرن دێ ل پاشەرۆژێ بنە مەترسی ودێ شیانێن داگیرکرنا دەڤەرەکا بەرفرھە ھەبن”.
چەکدارێن تیرۆرستێن داعشێ ھێرشان دکەنە سەر ھێزێن عیراقی ژ لەشکری و حەشدا شەعبی و پۆلیسێن فیدرالی و ب دەھان کەسان ژێ دکوژیت و بریندار دکەت و بەرفرەھبوونا ھێرشێن داعشێ کێم شیانێن ھێزێن عیراقی د سەلمینیت.
فەرماندێ میحوەرێ پردێ – کەرکووک دووپاتیێ ل وێ چەندێ دکەت کو ھێزێن عیراقی شیانێن کونترۆلکرنا رەوشا ئەمنی ل دەڤەرێ نینە، لەوما داعش دشێت ب وێ ساناھیێ کریارێن تیرۆرستی یێن بەرفرھە ئەنجام بدەت ، تاکە چارەسەر ژی رێککەفتنە ل گەل وەزارەتا پێشمەرگە و تنێ پێشمەرگە دشێت دووماھیێ ب داعشێ ل وی سنووری بینیت.
نيشاندان
