ئەڤرۆ، سالار محەمەد دۆسکی:

پشتی کەفتنا رژێما بەعس ھەتا نوکە ئەو رادیۆ ژ پەخشی ھاتیە راوستاندن بەرامبەر ھەمی رادیۆ و تەلەڤزیۆنێن دی دەست ب پەخشێن خوە کرن، بەلێ ئەرشیفێ ٦٤ سالان یێ رادیۆیێ بەرزەبوویە و کەسەک نوزانیت ل کیڤە یە.

جەمال بەرواری، بێژەرێ رادیۆیا کوردی بەغدا، نوکە ئاکنجیێ تاخێ نزارکێ یە ل باژێرێ دھۆکێ بۆ رۆژناما ئەڤرۆ گۆت: رادیۆیا کوردی ٢٩/١/١٩٣٩ ل بەغدا ھاتیە دانان ل دەسپێکێ پشکەک بۆ ل گەل رادیۆیا بەغدا بۆ دەمێ ١٥ خولەکان دووڤ دا زێدەبوو ٣٠ خولەک پشتی بەیانا ١١ ئادارێ ١٩٧٠ بۆ رێڤەبەریەکا سەربەخوە وەک رادیۆیا عەرەبی ل بەغدا و چەندین پشک ب خوەڤە دگرتن وەک (بێژەران، رەوشەنبیری، ھەمی رەنگ، گوندان، پەرتووکخانە، تەنسیق)

بەرواری ئەو ژی ئاشکرا کر کو پەخشێ رادیۆیێ ل دەمژمێر پێنج و نیڤی سپێدێ دەست پێ دکر ب دەنگێ کەوی پشتی قورئانا پیرۆز بۆ ماوێ ٣٠ خولەکان و دووڤ دا گۆتارێن ئایینی ژی دھاتنە پەخشکرن ھەر جارەکێ مامۆستایەکێ ئاینی ئەو گۆتار پێشکێشکر و ژ ئەوان مامۆستان (شێخ بەحمید ئەترۆشی، شێخ عومەر مولود دیبگەی، ئەبو زەید مستەفا سندی، شێخ شەعبان گولی، شێخ ئەیوب درباس) دووڤ دا پرۆگرامێ سپێدەباش دەست پێ دکر  و بەردەوام بەردەوام بوون ھەتا دەمژێر ٢:٠٠ شەڤێ.

جەمال بەرواری ئەو ژی گۆت: پتریا نڤیسەر و رەوشەنبیریێن کورد پشکداری پرۆگامێن رادیۆیێ دبوون ( د.بدرخان سندی، د.رەشید فندی، د.نسرین فەرخی، عەبدوالقادر قەزاز، مەحفوز مایی، د. عزەالدین مستەفا رەسول، خالد محەمەد شەیف، جەعفەر مایی، محەمەد سەلیم سواری، نسرەت ھادی، د. شەوکەت سندی، کەمیلا عەلی)

جەمال بەرواری ئەو ژی گۆت: ھونەرمەندێن کورد ل بەغدا ماف ھەبوو ھەیڤێ سترانەکێ تۆمار بکەن، ھەکە یێن پارێزگەھێن دی بان ئەوان ماف ھەبوو ھەیڤێ دو سترانا تۆمارکەن، ژ وان ھونەرمەندێن سەرەدانا ئێزگێ کوردی ل بەغدا کرین، ( محەمەد عارف، عیسا برواری، گولبھار، ئەیاز یوسف، ئەردەوان زاخولی ، تحسین تاھا، عەبدوللا زێرین، سەمیر زاخویی، بشار زاخویی،نسرین شێروان، محەمەد تەیب تاھر، غانم سیتو، ئسماعیل جومعە، شاکر ئاکرەیی، کەمال ئاکرەیی، میران ھەرکی، رەسول گەردی ، تاھر توفیق، ژیان ئەحمەد، فوزیا محەمەد، براھیم حەسەن، حەسەن جزیری، ئەنوەر قەرداغی، کەریم کابان، محەمەد جزا، قادار کابان) گەلەکێن دی ژی ب ھەمان شێوە خزمەتا ھونەرێ کوردی، وەک (تیپا دھۆک یا مۆزیکێ) ب سەرپەرشتیا ھونەرمەند ( دلشاد محەمەد سەعید) تیپێن مۆزیکێن (ھەولێر و سلێمانیێ) تیپا مۆزیکێ(باوەجی) ل باژێرێ کویە، زێدەباری ھونەرێ سترانێ، پشکا ھونەرێ شانویێ ژی رۆلەکێ بەرچاڤ ھەبوو، ژ ھونەرمەندێن ئەڤان کاری بکەن، (فەرھاد شەریف، ھاشم عەلی مەندی، فازل قەساب، ئەحمەد محەمەد عەلی، نەسیرین مەرجان) گەلەکێن دی.

بەرواری ئەو ژی ئاشکراکر کو ژ وان بێژەرێن دێرین ل وی سەردەمی، ( کامل کاک ئەمین) ئێکەم بێژەرێ کورد بۆ ل بەغدا پشت مایکرفونێ راوستیایی، (سادق بھائەدین، محەمەد ئەمین ئوسمان، مەحمود مفتی، محەمەد سەدیق ئیمام، سەگڤان عەبدوالحکیم، نھایە جەلال، عەبدوللا عەباس، عەبدوالوھاب تەلەبانی، جەمال بەرواری، نازم سلێمان جخسی، موفق سلێمان بەرواری، خالد خوشناو، موئەیەد تەیب، جەعفەر یبراھیم ئێمنکی)

جەمال بەرواری گۆت ژی: پشتی کەفتنا رژێما بەعس ل ٢٠٠٣ ئیسماعیل گەیلانی ھاتە بەغدا و ل گەل چوومە ئێزگێ کوردی، ئەرشیفێ ٦٤ سالا یێ ستران و چاف پێکەفتن بخوە ڤەدگرتن و ئسماعیل گەیلانی گەھاندە ھەولێرێ، دووڤ دا ئسماعیل گەیلانی وەغەرکر، کەسەکێ نەزانی ئەو ئەرشف چلێ کر، فرۆت یان دا ئێکی، ژ ٢٠٠٣ ھەتا نوکە رادیۆیا کوردی ھاتیە راوستاندن و کار ناکەت و بەرامبەر رادیۆیا دەنگێ جەماھیری و یا بەغدا دەست ب کارێن خوە کرنە ڤە، دیسام ن گەلەک بزاڤکرن ب رێکا لقا پارتی دیموکراتی کوردستان ل بەغدا کو ئەف رادیۆیە بزڤریتە ڤە لێ یا بێ مفا بوو.

ھەولێر، قائید میرۆ

لایەنێن سیاسی پڕۆژە بۆ سیستەمێ لامەرکەزی بەرھەڤکرینە و بڕیارە کار بۆ بجھئینانا سیستەمێ لامەرکەزی بھێتەکرن ل ھەرێما کوردستانێ، سەرۆکێ فڕاکسیۆنا پارتی ل جڤاتا پارێزگەھا دھۆکێ ژی راگەھاند ، پارتی دگەل سیستەمێ لامەرکەزیا ئیداری و کارگێڕی یە ھەکە وەکی خوە بھێتە بجھئینان ھەروەسا دبێژیت، پارێزگەھا دھۆکێ دێ یا مفادار بیت ژ ڤی سیستەمی.

ھشیار فەریق، سەرۆکێ فڕاکسیۆنا پارتی دیموکراتی کوردستان ل جڤاتا پارێزگەھا دھۆکێ بۆ رۆژناما ئەڤرۆ گۆت” ئەم وەکی فڕاکسیۆنا پارتی ل جڤاتا پارێزگەھا دھۆکێ دگەل سیستەمێ لامەرکەزی نە، چونکە پارتی ژی دگەل سیستەمێ لا مەرکەزی یە ل ھەرێما کوردستانێ ئەوژی بۆ دابەزاندنا دەستھەلاتان ژبۆی پارێزگەھان، چونکە ھەکە دەستھەلات ب پارێزگا و یەکەیێن ئیداری بھێتەدان، بێگومان دێ وەلاتی زووتر شێت پەیاما خوە گەھینیت و ئاریشەیا خوە چارەسەر بکەت”.

ھشیاری زێدەتر گۆت” ئەم ب مەرجەکی ل گەل سیستەمێ لامەرکەزیا کارگێری و دارایی نە، کو ئەو سیستەمێ لا مەرکەزی وەکی خوە بھێتە چەسپاندن، نەکو ببیتە ئەگەرەک بۆ جوداکرنا ھەرێما کوردستانێ و چو زیان ژی بۆ پێگەھێ ھەرێما کوردستانێ نەبن، لەوڕا ژی د خۆلا دوویێ یا جڤاتا پارێزگەھێن ھەرێما کوردستانێ دا قانوونا ھژمار سێ یا جڤاتا پارێزگەھان یا سالا ٢٠٠٩ێ دەستپێکەک بوویە بۆ لامەرکەزیێ، ئەم ھەموو ببینە خودانێ ڤی پرۆژەی نەکو تنێ پارێزگەھەکێ ڤەگریت و ڤێ پارێزگەھێ ژ ھەرێما کوردستانێ ڤەقەتینیت، ھەکە پڕۆژێ لامەرکەزی ب شێوەیەکێ باش بکەڤیتە د بیاڤێ بجھئینانێ دا، چو گومان تێدانینە دێ ئێکسانیەکا جڤاکی ژی پەیدابیت”.

سەرۆکێ فڕاکسیۆنا پارتی ل جڤاتا پارێزگەھا دھۆکێ ئاماژەکر”ھەکە  پڕۆژێ سیستەمێ لامەرکەزی سەربگریت، پارێزگەھا دھۆکێ دێ مفادارترین پارێزگەھا ھەرێما کوردستانێ بیت،     ژ بەر کو ژ ھەموو لایەنان ڤە ئەم گەلەک د مەغدوورین، بەلێ ئەم دگەل بکارئینانا درووشمێن سیاسی و موزایەدێ نینین بۆ سیستەمێ لامەرکەزی، ئانکو ئەم دگەل لێدانا پێگەھێ ھەرێما کوردستانێ نینین بناڤێ چ سیستەم و پرۆژەیان، بەلکو ئەم دگەل نیەتەکا پاقژین بۆ زێدەتر خزمەتکرنا خەلکێ خوە”.

ھشیار فەریق دیارکر”پێدڤیە لیژنێن قانوونی ل جڤاتێن پارێزگەھان ل ھەرێما کوردستانێ و کەسێن شارەزا کار بۆ بەرھەڤکرنا پڕۆژە قانوونەکێ بکەن و کۆنفرانسەک بھێتە گرێدان، ھەتا ھەموو پشکداریێ بکەن و پڕۆژەیەکێ ئێکگرتی و سەردەمیانە بھێتە بەرھەڤکرن، پڕۆژە تنێ یێ سلێمانیێ نینە، ھەر ژدەستپێکا ڤێ خۆلا جڤاتێن پارێزگەھان داخواز ھاتیەکرن بۆ لامەرکەزیا ئیداری وەکی من ئاماژە ب وێ چەندێ کری ئەم وەکو پارێزگەھا دھۆکێ دێ ژ ھەموو پارێزگەھان مفادارتربین”.