ئەڤرۆ:
پەیڤدارێ فەرمیێ میلیشیاتێن (حەشد شەعبی) یێن شیعی د داخۆیانیەکێ دا بۆ ئەڤرۆ رەت کر وان ھەلویستەکێ دوژمنکاری دژی پێشمەرگەی ھەبیت و دیارکر کو ئەو ھەردو ل گەل لەشکرێ عیراقێ یێ شەرێ ئێک دوژمن دکەن ئەوژی تیرۆرستێن داعشن و ئاشکراکر ژی کو ژ بلی ھزار ئەندامێن ئێزدی یێن دناڤ (حەشد شەعبی) دا، 500 مەسیحی ژی یێن دناڤ وێ میلیشیاتێ دا ھەین.
کەریم نوری پەیڤدارێ میلیشیاتێن (حەشد شەعبی) بۆ ئەڤرۆ گوت” مە چو ئاریشە ل گەل ھێزێن پێشمەرگەی نینن، بەرۆڤاژی مە ھەماھەنگی یا ھەی ب تایبەتی پشتی سەرەدانا (ھادی عامری) بۆ ھەرێما کوردستانێ و ھەڤکاری ژی د ناڤبەرا مە و پێشمەرگەی دا د ڕاکرنا دۆرپێچا ل سەر ناحیا (ئامرلی) و رزگارکرنا ( جەلەولا، سەعدیە و سلێمان بێگ)”.
ل دۆر ھاتنا ھەر ھێزەکێ بۆ کەرکووکێ، ئایا پێدڤی ناکەت ب ھەماھەنگی بیت ل گەل پێشمەرگەی؟، کەریم نوری گوت” بەلێ ئەم ژی ل گەل ڤێ بوچوونێ ینە و بۆ ھەر لڤینەکا ھێزێن مە، پێدڤیە مە ھەماھەنگی ھەبیت ل گەل ھەرێما کوردستانێ، ب تایبەتی ل دەڤەرێن نێزیکی کوردستانێ یان دھێنە ناڤکرن ب (دەڤەرێن ناکوکی ل سەر) و ھەکە مە ناکوکی ل گەل ھەرێما کوردستانێ ھەبن ل سەر ھندەک دەڤەران، مە چو ناکوکی ل دۆر شەرێ دژی تیرۆرستێن داعشێ نینن و سەرکردایەتیا کوردستانێ چو رێگرێ ل سەر ڤێ چەندێ نینە، بەلکو پێشوازیێ ژی لێ دکەت” لێ گوت ژی”چوونا ھێزێن مە بۆ کەرکووکێ یا گرێدای ب سروشتێ ئۆپەراسیۆنێن داھاتی یە، ھەکە پێدڤی کر ھێزان ب ھنێرین، دێ ھنێرین و داعش ل کیرێ بیت دێ حەشد شەعبی ھەبوونا خوە لێ ھەبیت”.
ناڤبری رەت دکەت میلیشیاتێن (حەشد شەعبی) ھەردو ناحیێن جەلەولا و سەعدیە کونترۆل کربن پشتی رزگارکرنا وان ژ لایێ پێشمەرگەی ڤە و گوت”سەعدیە ژ لایێ مە و ھێزێن پۆلیسان و تیپا پێنج یا لەشکرێ عیراقێ ڤە یا ھاتیە رزگارکرن، جەلەولا ژی ژ لایێ پێشمەرگەی و حەشد شەعبی پێکڤە یا ھاتیە رزگارکرن و کورد ب خوەژی ڤێ چەندێ دبێژن”.
پەیڤدارێ میلیشیا (حەشد شەعبی) دامەزراندنا ھزار کوردێن ئێزدی دناڤ حەشد شەعبی دا نەڤەشارت کو ل ڤێ دووماھیێ بۆ جارا ئێکێ مووچێ خوە ژی وەرگرتیە و گوت” نە ب تنێ ئێزدی، بەلکو مەسیحیان ژی فەوجەکا دناڤ حەشد شەعبی دا ھەی و ھژمارا وان ژی دبیتە 500 کەس و ئەڤەیە رامانا ناڤێ (حەشد شەعبی) کو بۆ ھەموو پێکھات و خەلکێ عیراقێ بیت و نە ب تنێ گرێدای پێکھاتەکی یان لایەنەکی بیت و ئە چەندە ژی نھێنیا سەرکەفتنا (حەشد شەعبی) یە”.
د بەرسڤا پرسیارەکا ئەڤرۆ دا، ئایا پێکئینانا حەشد شەعبی و زیرەڤانێن نیشتمانی کو شوینگرێن لەشکرێ عیراقێ نە ئەوێ ب تنێ وەکو ناڤ یێ مای، نە ئاماژێن ب ھێزن بۆ پارچەبوونا عیراقێ، کەریم نوری دبێژیت” ئەز بەرۆڤاژی دبینم، بەلکو حەشد شەعبی دێ ئێکرێزیا عیراقێ پارێزیت، نوکە ھێزێن مە یێ شەری نە ل ئەردێ خوە دکەن وەکو بەرگریەک ژ وەلاتیێن وی ئەردی و بۆ مە شەرەفە مە دەڤەرا زلوعیە و چەندین دەڤەرێن فوراتا ناڤین رزگارکرین”.
ل دۆر ھندەک کریارێن حەشد شەعبی ل جەلەولا و سەعدیە ب تایبەتی دژی کوردان و دیاردەیا رەڤاندنا چەندین وەلاتیێن کورد ل سەر رێیا بەغدا ژ لایێ چەکدارێن حەشد شەعبی و ئازادکرنا وان بەرامبەر پاران، یان کوشتنا وان، کەریمی گوت” مە چو سەرپێچی نەکرینە و ئەو کەسێن مە ب ڤێ چەندێ تۆمەتبار دکەن، داعشێ ری سپی دکەن، ژ بەر کو چەکدار و تیرۆرستێن داعشێ نە ڤان جۆرە کریاران دکەن و ئەوێن ڤان تۆمەتان ئاراستەی مە دکەن، مەرەما وان ب وێ چەندێ ئەوە ناڤێ (حەشد شەعبی) کرێت بکەن و ئەو ب خوە د مفادارن ژ داعشێ، ھەکە ھندەک کەس بۆ مەرەمێن خراب ھاتبنە دناڤ (حەشد شەعبی دا) و بزاڤا کرێتکرنا ناڤێ حەشد شەعبی بکەن، دێ سزا دەین و دێ سکالایێ ل سەر ھەر سیاسیەکی کەین یێ بێ بەلکە مە تۆمەتبار بکەت”.