هه‌ولێر، قائید میرۆ
ره‌وشا ئیراقێ د قۆناغه‌كا مه‌ترسیدار دا ده‌باز دبیت و په‌رله‌مانتاره‌كێ كورد ژی ل جڤاتا نوونه‌رێن ئیراقێ دبێژیت، پێشبینی دهێته‌كرن ره‌وش هێشتا به‌ر ب ئالۆزیان بچیت و شه‌ڕ و پێكدادان ژی په‌یدا ببن. هه‌روه‌سا گۆت، هندی به‌ر ب ژڤانێ هه‌لبژارتنان بچین، ئیراق سه‌قامگیریێ ب خوه‌ڤه نابینیت.
دیار ته‌یب به‌رواری، ئه‌ندامێ جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان بۆ رۆژناما ئه‌ڤرۆ دیاركر”ئیراق ئێكه ژوان ولاتێن دكه‌ڤیته ده‌ڤه‌ره‌كێ كو لڤینه‌كا زۆر تێدا هه‌یه و جۆره‌كێ هه‌ڤڕكیێ د ناڤبه‌را هێزێن هه‌رێمایه‌تی و جیهانی دهێته‌كرن، بتایبه‌تی ئه‌مریكا و كۆمارا ئیسلامیا ئیرانێ، ڤه‌ژه‌نا ڤێ هه‌ڤڕكیێ ژی لسه‌ر مه‌یدانا ئیراقێ دیار دبیت، بێگومان ئامیر و ئامرازێن ڤێ هه‌ڤڕكیێ ژی هژماره‌كا هێزێن چه‌كدار و سه‌ركرده‌یێن ئیراقێ نه، له‌وڕا ژی به‌رده‌وام پرسیار دهێته‌كرن كه‌نگی دێ ئیراق ته‌ناهیێ بخوه‌ڤه بینیت”.
دیاری گۆت ژی” هه‌لبژارتنێن داهاتی ئێكه ژوان ته‌حه‌دیاتا و گه‌له‌ك لایه‌نێن سیاسی وه‌سا هزر دكه‌ن پشتی ده‌ركه‌فتنا ئه‌نجامێن هه‌لبژارتنێن داهاتی گوهۆڕینێن به‌رچاف دێ په‌یدا بن، به‌لێ دیاره رۆژ بۆ رۆژێ ئه‌و هیڤیا هه‌ی ب دروستی جهێ خوه ناگریت، چونكه ژلایێ ئه‌منی ڤه گه‌له‌ك هه‌ڤڕكی دناڤا ئیراقێ دا یێن هه‌ین، هه‌كه ئه‌م به‌حسێ گرۆپا تیرۆرستی یا داعشێ بكه‌ین یان وان هگرۆپێن كو دناڤا ئیراقێ دا هێرشی سه‌ر هێزێن هه‌ڤپه‌یمانان دكه‌ن مه‌ترسیه ل سه‌ر ئیراقێ، هه‌روه‌سا ژلایێ ئابوری ڤه ره‌وشا ئیراقێ د مه‌ترسیێ دا، ژ به‌ر كو هه‌رچه‌نده بهایێ دۆلاری هاتیه بلندكرن و باج هاتینه زێده‌كرن، به‌لێً كاریگه‌ریێن راسته‌وخوه ل سه‌ر ژیانا وه‌لاتیان كریه”.
ڤی په‌رله‌مانتاری ئاماژه كر” پێشبینی دهێته‌كرن خوه‌نیشادان و ئالۆزی ل هه‌یڤێن داهاتی ئیراقێ ڤه‌گرن و مه‌ترسیا بكارئینانا هێزێ ژی یا هه‌ی، چونكه ل ئیراقێ تنێ چه‌ك د ده‌ستێ هێزێن فه‌رمی یێن حكومه‌تێ دا نینه، به‌لكو هه‌تا عه‌شیره‌ت و لایه‌نێن سیاسی ل ئیراقێ چه‌كدار یێن هه‌ین و ترس هه‌یه توندوتیژی په‌یدا ببیت، ره‌وش د ئاسته‌كی دایه مرۆڤ نه‌شێت بێژیت دێ هه‌لبژارتنێن پێشوه‌خت یێن داهاتی ل ئیراقێ د سه‌قایه‌كێ ئارام دا ب ڕێڤه‌بچن، رۆژ بۆ رۆژێ ئاسته‌نگ بۆ حوكمه‌تا ئیراقێ په‌یدا دبن و رێگرن ل هه‌مبه‌ر پرۆسا هه‌لبژارتنێن داهاتی”.
ل دۆر رێكه‌فتنا د ناڤبه‌را هه‌رێمێ و به‌غدا، دیار ته‌یب به‌رواری دبێژیت” چه‌ندی ئه‌م نێزیكی رێڤه‌چوونا پرۆسا هه‌لبژارتنان ببین، ئه‌ڤه چو گومان تێدا نینه هه‌ر لایه‌نه‌ك ب جۆره‌كی به‌حسێ رێكه‌فتنا د ناڤبه‌را هه‌رێمێ و به‌غدا دكه‌ت، پێشبینی دهێته‌كرن هه‌لویستێن جودا ببینین، به‌لێ تشتێ به‌رچاف په‌یوه‌ندیێن باش د ده‌مێ نوكه دا یێن هه‌ین د ناڤبه‌را هه‌ردو لایه‌نان دا وبزاف دهێنه‌كرن ئه‌و په‌یوه‌ندی بمینن د ئه‌ڤی ئاستی دا هه‌كه باشتر لێ نه‌كه‌ن د پاشه‌ڕۆژێ دا، پشتی هه‌لبژارتنان ژی هه‌ر كه‌سه‌كێ سه‌ركێشیا پرۆسا پێكئینانا كابینا نوو یا حوكمه‌تا ئیراقێ بكه‌ت، وێ راستیێ باش دزانیت كو هه‌رێما كوردستانێ گرنگیا خوه هه‌یه بۆ ئیراقێ، هه‌تا ئیراق سه‌قامگیریێ بخوه‌ڤه بینیت، لێ ناهێته ڤه‌شارتن گه‌له‌ك لایه‌ن ژی هه‌نه كو دژی حوكمه‌تا ئیراقێ نه و حه‌زناكه‌ن پلانێن حوكمه‌تێ سه‌ربگرن”.
نيشاندان