ئه‌ڤرۆ نیوز،عه‌لی حاجی :
ل دووڤ سالناما كه‌نیسه‌یا ئه‌رمه‌نیان یا ره‌سولی بریاره ل رێكه‌ڤتی 6/1/2021 رێ و ره‌سمێن جه‌ژنا ژ دایك بوونا حه‌زره‌تێ مه‌سیح ل كوردستانێ ب رێڤه بچن .
داوود ماردیروسیان سه‌رۆكێ لژنا كارگێریا ملله‌تێ ئه‌رمه‌ن بۆ ئه‌ڤرۆ نیوز گۆت : سالانه ل رێكه‌ڤتی 1/6 لگوره‌ی سالناما كه‌نیسه‌یا ئه‌رمه‌نیان یا ره‌سولی رێ و ره‌سمێن جه‌ژنا ژ دایك بوونا حه‌زره‌تێ مه‌سیح ل سه‌رانسه‌ری جیهانێ و ب تایبه‌تی ژی ل كوردستانێ د رێڤه دچن، له‌ورا ل رۆژا 6/1/2021 ێ ل پێنچ كه‌نیسه‌یێن تایبه‌ت یێ ئه‌رمه‌نان ل كوردستانێ د بن رێكارێن ساخله‌میێ دا رێ و ره‌سمێن جه‌ژنێ ب شێوه‌یه‌كێ ئاسایی ب رێڤه بچن و هه‌می به‌رهه‌ڤی ژی هاتینه كرن دا كو ب شێوه‌یه‌كێ باش ئه‌و رێ و ره‌سم ب رێڤه بچن،هه‌ر ب هه‌لكه‌ڤتا جه‌ژنا ژ دایك بوونا حه‌زره‌تێ مه‌سیح جه‌ژنا هه‌می ئه‌رمه‌نێن كوردستانێ و عێراقێ و جیهانێ پیروز دكه‌ین و هیڤی خازین كو ئه‌ڤ جه‌ژنه ژی ببیته جه‌ژنا خێر و به‌ره‌كه‌تێ بۆ هه‌می ملله‌تێ كورد و عێراقێ و ب هێڤیا وێ چه‌ندێ ژی نه كو ژیان ئاسایی بیته ڤه و ببیته جه‌ژنا ب دوهی هاتنا كورونایێ .
ل دوماهیێ گۆت ژی : سالانه بێ چ كێشه‌یه‌ك ئه‌رمه‌ن ل كوردستانێ جه‌ژنێن خوه دگێرن و ئه‌و ئێمناهیا ل كوردستانێ هه‌یی ژی بوویه ده‌لیڤه‌یه‌ك كو زێده‌تر پێكڤه ژیان ل كوردستانێ موكوم ببیت و ل هه‌می جه‌ژنان ژی دا هه‌می ئولێن ل كوردستانێ دا هه‌ین پیروزباهیێ ل ئێك دكه‌ن .
ئەڤرۆ نیوز، عەلی حاجی:
رێڤەبەرێ چاندنێ ل زاخۆ بۆ ئەڤرۆ نیوز دیار كر ب رێیا رێكخراوەكێ چەندین دەلیڤێن بۆ كچ و كوران هاتینە دیتن كو گرێدایی ب كارێ چاندنێ ڤە یە و هەر دیسان دەست ب هەوەكا بەلاڤكرنا نەمامێن چەندین جورێن فێقی هاتیە كرن .
زێدەتر ئەحمەد سامی گۆت: (نێزیكی 10 جورێن فێقی كو زێدەتری 10 هەتا 12 نەمامێن فێقی كو ب بهایەكێ كێمتر ژ بازاری ب سەر جوتیاران دا دهێتە بەلاڤ كرن كو ب رەنگەكێ جوتیار بشێت مفایی ژ وان نەمامان ببینیت كو ب كوالێتیەكا باش و هەكە ئەو بەرهەمە بهێتە چاندن دێ قەبارەیەكێ باش ئەو بەرهەمە كەڤیتە د بازاری دا و هەر دیسان ب رێیا رێكخراوەكا بیانی چەندین دەلیڤێن كاری بۆ زێدەتری 45 كەسان ژ كچ و كوران ڤەدیتیە كو ب رێیا وان دەلیڤێن كاری ژی دێ چاوانیا فێربوونا كاری دگەل داران كو هەتا دگەهیتە فروتنێ و ئەو كارە ژی ل باغداریا زاخۆ دهێتە كرن) .
ناڤبری دیار ژی کر هەر دیسان ب هەماهەنگی دگەل كومپانیەكا دەرئینانا نەفتێ ل زاخۆ رابوویە ب كڕین و دابینكرنا چار ئامیرەیێن سەردەم بۆ كێلانا ئەردی كو ب رێیا رێڤەبەریا مە ئەو ئامیرە ب جوتیاران دهێتە دان بۆ كێلانا ئەردێ گەنمی و ئەڤە ژی وەكو هاریكاریەكا باشە دگەل جوتیاران دهێتە كرن.
ئەڤرۆ نیوز:
وەزارەتا دارایی و ئابووری یا حوکمەتا هەرێما کوردستانێ راگەهاند کو د چارچۆڤێ بەرنامێ چاکسازیێ و ئەو کەسێن کو ناڤێ وان دو جاران و پتر د سیستەمێ بایۆمیتری دا هەبوون موچێ وان هاتینە بڕین.
وەزارەتا دارایی و ئابووری یا حوکمەتا هەرێما کوردستانێ دیار ژی کریە کو موچێن ١٠ هزار و ٦٠٩ کەسان هاتیە بڕین.
ئەڤرۆ نیوز، بارزان مزووری:
ژێدەرەکێ دناڤ کەمپا ئێسیان بۆ ئەڤرۆ نیۆز دیار کر کو ئەڤرۆ سپێدێ رێککەفتی 4/1/2021 ل کەمپا ئێسیان ل سنۆرێ قەزا شێخان کچەک بناڤێ”ئەسمەهان خدر”د ژیێ 22 سالیێ دا دناڤ خیڤەتێ دا خوە خەندقاندیە.
ل گۆر زانیاریان “ئەسمەهان خدر” خەلکا کۆمالگەها سیباشێخدرێ یە ل قەزا شەنگال ئەڤە چەند سالە ئاوارە بوویە قەزا شێخان.
ئەڤرۆ نیوز:
سەربەست تروانشی ئەندامێ ئەنجۆمەنێ سەرکردایەتیا پارتی و بەرپرسێ لقێ ئێک ل بارەگایێ لقێ پێشوازیا بەرێز حەجی چولی بالەتەیی کر.
دڤێ رینشتنێ دا هەردو ئالیان گەنگەشە لسەر رەوشا ژیارا خەلکێ هەژار و کێم دەرامەتێ سەنتەرێ پارێزگەها دهوکێ کرن.
دڤێ رینشتنێ دا سەرمایەدار حەجی چولی بریار دا کو گازا سپی لسەر (١٠٠٠) مالباتێن هەژارێن سەنتەرێ پارێزگەها دهوکێ دابەش بکەت.
بەرپرسێ لقێ سوپاسیا کارێن وی یێن خێر خوازی یێن بەرێ و ڤێ دەست پێشخەریا نها کری و گوت: (ئەم ڤی کاری بکارەکێ مروڤایەتی و نشتیمان پەروەری لقەلەم ددەین و هیڤیدارین هەر سەرمایەدارەک د چوارچوڤێ شیان و بەرپرسیارەتیا خوە هاریکار و هەڤکارێن خەلکێ دەستکورت بن چونکی دەولەمەندبوونا هەر دەولەمەندەکی د ڤی وەلاتی دا ب سایا خوینا شەهیدان و کورێن هەژاران بوویە).
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ل هەرێما کوردستانێ ٩٧ کەسێن دی تووشی ڤایرۆسێ کۆرۆنایێ بووینە و نەخوشەک ژی مریە.
ل گۆر ئامارا وەزارەتا ساخلەمیێ ٩٩٥ نەخوشێن کۆرۆنایێ ژی ب تەمامی چارەسەر بووینە.
ل پارێزگەها دهۆکێ ژی ٢٦ کەسێن دی تووشی کۆرۆنایێ بووینە و هەمان دەمی دا ٣٧٧ نەخوش ژی ب تەمامی چارەسەر بووینە و چ حالەتێن مرنێ نەهاتینە تۆمارکرن.
ئەڤرۆ نیوز:
پشکا چاڤدێریا بازاری ل هەولێرێ ب هەڤکاری ل گەل ئاسایشێ شیان دەست ب سەر ١٠ تەن دەرمانێن قەچاغ بگرن کو ب رێیێن نەئاسایی ژ ئیرانێ دەربازی هەرێما کوردستانێ هاتبوونە کرن.
د. گۆڤەند رێڤەبەرێ چاڤدێریا بازاری راگەهاند کو رێڤەبەریەکا هەی ب ناڤێ کۆنترۆلکرنا ئینان و دروستکرنا دەرمانی و رۆژانە ژی چاڤدێریێ دکەن و هەر دەرمانەک بێی دەستوری دەربازی هەرێما کوردستانێ ببیت دێ دەست ب سەر دا هێتە گرتن و یێن ب ڤی کاری رابن دێ پێرابوونێن قانوونی دگەل دا هێنە کرن.
ئەڤرۆ نیوز، عەلی حاجی :
رێڤەبەرێ گشتیێ گەشەپێدانا جڤاكی ل پارێزگەها دهوكێ دیار كر ب رێیا كاراكرنا سەنتەرێن جڤاكی پروژەیێ خوە كارا كرن ل دور نەهێلانا دیاردەیا زارویان ل سەر جاددەیان و دێ ب رێیا رێكخراوەكا نێڤدەولەتی كار ل سەر پروژەیی كەن .
زێدەتر دكتور شێرزاد هروی گۆت: (پێشتر وان پروژەیەك پێشكێشكر بوو ل دور دانانا پلانەكێ بۆ نەهێلانا زارویان ل سەر جاددەیان و هەر دیسان ئەو زارویێن كو ژبەر رێگریا خێزانێ ژ قوتابخانێ هاتیە دابرین، ئەم دێ ل دویڤ ئەگەران چین و هەر دەما بزانین زاروك ژ بەر هەژاریێ كار دكەت یان ژی ژبەر نەبوونا پارەیی نەشیایە بچیتە قوتابخانێ دێ ناڤێ وی ل رێكخراوا یونسێڤ هێتە تومار كرن دا كو موچەیەك بۆ خێزانا وی بهێتە دان و دوبارە ئەو زارویە دێ چیتە قوتابخانێ و نابیت ل سەر جادەیان كار بكەت و هەكە بەروڤاژی وێ چەندێ كو توندوتیژی ژلایێ مالان ڤە دگەل دا دهێتە كرن د وی دەمی دا سەمیانێن وی زاروكی دێ روو ب روویی دادگەهێ كەن، سەنتەرێن جڤاكی ل هەمی قەزایێن سەر ب پارێزگەها دهوكێ هاتینە كارا كرن ب مەرەما دوبارە كاراكرنا پروژەیێ وان) .
ناڤهاتی ئەو چەندە ژی دیار کر ب رێیا تیمێن تایبەت دێ چاڤدێری هێتە كرن و هەر دیسان مە پولیسێن توندوتیژی و جڤاكی هەنە كو ئەو ژلایێ خوە ڤە ل سەر ڤان كەیسان مە ئاگەهدار دكەن و ئەم ژی ب رێیا وی پروژەی دێ وان كێشەیان چارەسەر كەین پێخەمەتی وێ چەندێ مافێ زاروكی نەهێتە خوارن.
نيشاندان