NO IORG
نووترين نووچه

ئەڤرۆ نیوز:

بەرپرسێن ساخلەمیا ئیرانێ دیار دکەن کو رێژا مرنا ب کۆرۆنایێ ل وی وەلاتی ل گۆر چەند مەهێن بۆری گەلەک زێدە بوویە و ل تەهرانێ رۆژانە ٣٥٠ کەس ژ بەر کۆرۆنایێ دمرن.

ئەو یەک د دەمەکێ دایە کو گەلەک جاران رێکخراوا ساخلەمیا جیهانی دیار کریە کو بەرپرسێن ئیرانێ ئامارا دروست یا تووشبوون و مرنا ب کۆرۆنایێ بەلاڤ ناکەن.

 

ئەڤرۆ نیوز:

 

حوکمەتا عیراقێ جەخت ل پابەندبوونا بەغدا و هەولێرێ دکەت ب رێککەفتنا دناڤبەرا وان دا، پەیڤدارێ کازمی دبێژیت، چ نەهاتیە گوهۆرین و دێ مووچێ فەرمانبەرێن هەرێما کوردستانێ هەتا پەسەندکرنا بودجێ 2021 هنێرین.

 

ئەحمەد مەلا تەلال، پەیڤدارێ سەرۆکوەزیرێن عیراقێ، د کۆنفرانسەکێ رۆژنامەڤانی دا راگەهاند، هەتا نوکە حوکمەتا عیراقێ و هەرێما کوردستانێ پابەندی ب وێ ئ رێککەفتنێ یابۆ قۆناغەکێ دناڤبەرا وان دا هاتیە کرن، دەمێ وێ ژی سێ هەیڤن، سەبارەت ب دابینکرنا پشکەک ژ مووچێ فەرمانبەرێن هەرێما کوردستانێ د بەرامبەر پابەندبوونا حوکمەتا هەرێما کوردستانێ ب بەشە نەفتێ و رادەستکرنا 50٪ یا داهاتێ گومرکان.

هەروەسا گۆتیە، ئەو رێککەفتنە یا بەردەوامە و کار پێ دهێته کرن هەتا پرۆژە قانوونا بودجێ 2021 دهێتە پەسەند کرن، دێ هەیڤانە 320 ملیار دیناران بۆ هەرێمێ رەوانە کەین.

 

ئەڤرۆ نیوز:
لژنا دارایی یا پەرلەمانێ عیراقێ کۆمبوویە، بڕیاردەرێ لژنا دارایی یا پەرلەمانێ عیراقێ گۆتیە، ل رۆژا ئێکشەمبیا بهێت حوکمەتا عیراقێ دێ دەست ب دابەشكرنا مووچێ فەرمانبەران کەت.

د. ئەحمەد سەفار، بریاردەرێ لژنا دارایی ل پەرلەمانێ عیراقێ راگەهاندیە، ل رۆژا پێنجشەمبی دێ پەرلەمانێ عیراقێ پرۆژە قانوونا پرکرنا کورتئینانێ ب دەستکاریڤە پەسەند کەت، راستەوخۆ ل رۆژا ئێکشەمبیا بهێت حوکمەتا عیراقێ دێ مووچە دابەش کەت.

 

ئەڤرۆ نیوز:

 

چەندین خێزانێن هەلەبجە ل ‌سه‌ر ره‌ڤاندنا زارۆیێن وان ژ ئالیێ په‌كه‌كێ ڤه‌، سكالا ل دەستەیا مافێ مرۆڤی یا هەرێما کوردستانێ تۆمار کرینە.

رێڤه‌به‌را گشتی یا ده‌سته‌یا مافێ مرۆڤی ل هەرێما کوردستانێ راگەهاندیە، كۆمه‌كا سكالایان ژ ئالیێ چه‌ندین خێزانێن هه‌له‌بجه‌ گه‌هشتینه‌ وان، كو زارۆیێن وان ژ ئالیێ رێکخراوا تیرۆریستیا پەکەکێ ڤه‌ هاتیه‌ ره‌ڤاندن، دیسان چەندین خێزانێن دیتر هه‌نه‌، دترسن سكالایان تۆمار بکەن.

 

تاڤگه‌ عومه‌ر زێده‌تر دبێژیت: ئەو خێزانه‌ ژ ره‌وشا زارۆیێن خوه‌ د دلگرانن و هه‌تا نوكه‌ چ ژ چاره‌نڤیسێ وان نزانن، وان خێزانان بۆ ئاگه‌هداربوون ل سه‌ر ره‌وشا زارۆیێن خوه‌ سه‌ره‌دانا په‌كه‌كێ كریه‌، به‌لێ وان رێك نه‌دایێ زارۆیێن خوه‌ ببینن.

 

 

ئەڤرۆ نیوز:
سەرۆکێ رووسیا رێککەفتنا راوەستاندنا شەرێ ناگۆرنۆ کاراباخ راگەهاند.

ل شه‌ڤا بورى ڤلادیمێر پۆتینى راگەهاند، ئێدی شەر د ناڤبەرا هێزێن ئازەربایجانێ و ئەرمەنستانێ دا ل هەرێما ناگۆرنۆ کاراباخ ناهێتە کرن و سەرۆکێن هەردو وەلاتان ئاگربەستا راوەستاندنا شەری ب سەرپەرشتیا رووسیا ئیمزا کریە.

پۆتینی دیار کر ژى: هێزێن ئاشتى پارێز یێن رووسی دێ ل هەرێما کاراباخ و تایبەت ل سەر هێلا تەماسێ د ناڤبەرا سۆپایێن هەردو وەلاتان دا بەلاڤ بن.
د هه‌مان ده‌مدا، سەرۆکێ رووسیا د راگەهاندنا خوه‌ دا داخواز ژ ئازەربایجانێ و ئەرمەنستانێ کر، گرتیان ژى ل هەڤدو بگوهۆرن.

 

ئەڤرۆ نیوز:

 

رێکخراوا ساخلەمیا جیهانی دبێژیت: ل بهارا بهێت دێ ڤاکسینێ کۆرۆنایێ ل ناڤ خەلکێ گەلەک هەژار هێتە بەلاڤ کرن.

هه‌روه‌سا دیار كرییه‌: ڤاکسینێ کۆرۆنایێ ژ رەهـ وڕیشال دێ ئاراستەیێ بەلاڤبوونا کۆرۆنایێ گوهوریت کو ب رێژەیا ٩٠% سەرکەڤتن ب دەستڤەئینایە.
بەریۆس ئیلۆرد مەزنە شیرەتکارێ رێكخراوا ساخله‌میا جیهانى، د کۆنگرەکێ ڕۆژنامەڤانی دا گۆت: ئەنجامێ تاقیکرنێن هەردو کۆمپانیێن فایزەر یا ئەمریکی و بیۆنتیک یا ئەلمانی گەلەک د ئەرێنی بوون، لێ هێشتا گەلەک کار مایە ل سەر بهێتە کرن.
ناڤهاتى گۆت ژى: ل هەیڤا ئادارا بهێت دێ دەست ب دابەشکرنا وی ڤاکسینی هێتە کرن و ل پێشیێ دێ بۆ وان وەلاتان بیت یێن خەلکێ وان گەلەک هەژار و پێدڤی ب وی دەرمانی هه‌ى.

ئەڤرۆ نیوز:

وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٧٦٥ کەسێن دی ل هەرێما کوردستانێ تووشی کۆرۆنایێ بووینە و هەروەسا ٢٧ نەخوشێن کۆرۆنایێ ژی مرینە.

وەزارەتا ساخلەمیێ هەروەسا دیار ژی کریە کو د ماوەیێ ٢٤ دەمژمێرێن بۆری دا ٥٩٣ نەخوشێن کۆرۆنایێ ژی ب تەمامی چارەسەر بووینە.

ل پارێزگەها دهۆکێ ژی ٢٠٧ کەسێن دی تووشی کۆرۆنایێ بووینە و هەشت نەخوشێن کۆرۆنایێ ژی مرینە، د هەمان دەمی دا ٤٣٠ نەخوشێن کۆرۆنایێ ژی ب تەمامی چارەسەر بووینە.

ئەڤرۆ نیوز، عەلی حاجی :

رێڤەبەرێ ناحیا دەرکارێ ب وەکالەت بۆ ئەڤرۆ نیوز دیار کر بۆ دەما دو رۆژانە سوپایێ تورکیا بەردەوام دەڤەرێن وان توپباران دکەت و زیانێن ماددی ژی دروست کرینە بۆ پاسەوانێن سنوری .

زێدەتر شەلاش فندی گۆت: (دوهی رۆژا دوو شەمبێ سوپایێ تورکیا ٢٦ ب توپاران هەر ئێک ژ دەڤەرێن شەرانشا سەری و خارێ و نێزیک شکەڤتا بهێرێ توپباران کرن و ئەڤرۆ رۆژا سێ شەمبێ ژی ل دانێ سپێدێ نێزیکی ٥٠ هەتا ٦٠ توپان سوپایێ تورکیا توپبارانا دەڤەرێن سەر ب ناحیا دەرکارێ ڤە کرینە و نێزیکی دوو توپان ژی نێزیکی هێزێن پاسەوانێن سنوری کەڤتینە و زیانێن ماددی ژی ل دووف خوە دا پەیدا کرینە و هەر دیسان یا بویە جهێ مەترسیێ ژی توپەک ل پشت کەمپا ئاوارەیێن ئێزدی کەفتیە و ئەو چەندە ژی بویە ئەگەرێ دروست کرنا ترسێ بۆ ئاوارەیان،ل حەفتیا بوری ژی دا چەندین جاران دەڤەرێن مە هاتینە توپباران کرن ژ ئەگەرێ هەبونا هێزێن پەکەکێ ل وان دەڤەرا و شەر ژی دناڤبەرا سوپایێ تورکیا و هێزێن پەکەکێ دا دروست بوینە) .

ناڤهاتی دیار کر ژی توپبارانا هێزێن تورکیا ل دەڤەرا مە یا بەردەوامە و زێدەتر ژ دەڤەرێن دیتر نوکە سنورێ ناحیا مە دهێتە توپباران کرن و ئەڤە ژی بو هەبونا هێزێن پەکەکێ ڤەدگەریت ل دەڤەرێن مە .

 

ئەڤرۆ نیوز:

کۆمپانیێن ڤایزەر و بایۆئێنتیک راگەهاند، ڤاکسینێ وان سەرکەفتن بدەستڤە ئیانە و ب رێژا 90% یا چالاکە.

هەردو کۆمپانیێن ڤایزەر و بایۆئێنتیک ب هەماهەنگی کار ل سەر بەرهەمئینانا ڤاکسینێ دژی ڤایرۆسێ کۆرۆنایێ کریە، ئەڤرۆ ب فەرمی راگەهاند، ڤاکسینێ وان ل سەر 43 هزار و 500 کەسان هاتیە تاقیکرن و سەرکەفتن ئینایە.

هەروەسا راگەهاندیە، ب حەفت رۆژان پشتی وەرگرتنا ڤاکسینێ دویێ، بەرگریا 90% یا تووشبوویێن تاقیکرن ل سەر هاتیە کرن، چالاک بوویە و بۆ ئێکەم جار کۆمپانیەک ئەنجامێن قوناغا سیێ ژ تاقیکرنێن ڤاکسینا دژی کۆرۆنایێ رابگەهینیت.

جۆرە پرۆتینەکێ هەڤشێوێ کۆرۆنایێ د ناڤا ڤاکسینێ دا هەیە و ئەو پرۆتینە بەرگریا لەشی هشیار دکەت و شیان هەنە شەرێ ڤایرۆسێ کۆرۆنایێ ژی بکەت.

بریارە ل دوماهیا ڤێ هەیڤێ ، ڤایزەر و بایۆئێنتیک ڤاکسینا خوە رادەستی ساخلەمیا جیهانی بکەن و بهێتە پەسەند کرن.

 

ئەڤرۆ نیوز، زنار تۆڤی:

 

د. جاسم محەمەد عەبدو، بۆ ئەڤرۆ نیوز دیاركر: دێ ئەڤ سالە تاقیگه‌هه‌كا پشكنینا كۆرۆنایێ ل زانكۆیا دهۆكێ هێته‌ ڤه‌كرن، پارێزگارێ دهۆكێ و زانكۆیا دهۆكێ پشته‌ڤانی ل ڤی پرۆژەی كریه،‌ دێ ساخله‌میا دهۆكێ تاقیگه‌هه‌كا پشكنینا كۆرۆنایێ دناڤ زانكۆیا دهۆكێ دا دروست كه‌ت.

ناڤهاتی گۆت ژی: نوکە رۆژانە 500 هه‌تا 600 پشكنینێن كۆرۆنایێ ب تنێ ل تاقیگەها مەلبەندی یا دهۆكێ دهێنه‌ كرن وئەڤ رێژە به‌ره‌ف زێده‌بوونێ ڤه دچن و نوکە‌ ل نه‌خۆشخانا لالاڤ یا كۆرۆنایێ ژى تاقیگه‌ها پشكنینا كۆرۆنایێ هاتیه‌ ڤه‌كرن دێ یا تایبه‌ت بیت بۆ پشكنینا تووشبوویێن كۆرۆنایێ دناڤ نه‌خۆشخانێ دا و دێ نەخۆش ل وێرێ چاره‌سه‌ریێ وه‌رگرن، هەروەسا ئەڤ سالە دێ تاقیگه‌هه‌كا پشكنینا كۆرۆنایێ ل زانكۆیا دهۆكێ ژى هێته‌ ڤه‌كرن.

ناڤهاتى گۆت ژی: ساخله‌میا دهۆكێ دێ تاقیگه‌هه‌كا پشكنینا كۆرۆنایێ دناڤ زانكۆیا دهۆكێ دا دروست كه‌ت ئه‌وژى دێ كه‌فته‌ دخزمه‌تێ دا دى پتر ستافێ زانكۆیێ تێدا پشكنینان ئه‌نجام ده‌ت و نوکه‌ كار ل سه‌ر ڤی پرۆژەى دهێته‌ كرن، ئه‌ڤ هژمارا پشكنیێن رۆژانە ل دهۆكێ دهێنه‌ كرن ژ هه‌موو جهـ و ده‌ڤه‌ران دهێنه‌ وه‌رگرتن كو گه‌شتیار ژى دناڤدانه‌.

website security
WP Facebook Auto Publish Powered By : XYZScripts.com