ئەندامەکا پەرلەمانێ تورکیا کو د هەمان دەمی دا ئەنداما شانێ ئیمرالیێ یە سەبارەت ب سەرەدانا خوە یا بۆ هەولێرێ و دیدار ل گەل سەرۆک بارزانی دیار دکەت کو رۆلێ سەرۆک بارزانی بۆ ئاشتیێ و چارەسەرکرنا پرسا کوردی ل تورکیا گەلەک گرنگە.

پەروین بولدان ئەنداما پەرلەمانێ تورکیا کو د هەمان دەمی دا ئەنداما شاندێ ئیمرالیێ یە سەبارەت ب سەرەدانا خوە بۆ هەرێما کوردستانێ و دیدار ل گەل سەرۆک بارزانی دیار کر، د هەر دو سەرەدانێن مە یێن بۆ ئیمرالیێ دا عەبدوللا ئۆجەلان سەرۆکێ پەکەکێ داخواز ژ مە کر کو سەرەدانا سەرۆک بارزانی بکەین و گۆت: (ئۆجەلانی دیار کر نێرینێن سەرۆک بارزانی بۆ ئاشتیێ و چارەسەرکرنا پرسا کوردی ل تورکیا گەلەک گرنگە و داخواز ژ مە کر سەرەدانا سەرۆک بارزانی بکەین و رەوشا هەی بگەهیننە جەنابێ وی و د هەمان دەمی دا نێرینێن سەرۆک بارزانی ژی وەربگرین، چونکی ژ بۆ ئاشتیێ و چارەسەرکرنا پرسا کوردی ل تورکیا رۆلێ سەرۆک بارزانی گەلەک گرنگە).
ناڤهاتیێ ئەو یەک ژی دیار کر، ئەڤا نها ل تورکیا روو ددەت گەلەک گرنگ و دیرۆکی یە، بێگومان ژ بۆ چارەسەرکرنا پرسا کوردی ل تورکیا نها زەمینەکا گونجای هاتیە پێش و بەرپرسێن تورکیا ژی باش دزانن ئێدی نەشێن د بابەتێ چارەسەرکرنا پرسا کوردی دا وەکو بەرێ رەفتارێ بکەن، چونکی گوهۆڕینێن گەلەک مەزن ل رۆژهەلاتا ناڤین روو ددەن و هەر ئالیەکێ ژی دڤێت پێگەهێ خوە ل دەڤەرێ بهێز بکەت، تورکیا ژی باش دزانیت هەتا پرسا کوردی چارەسەر نەکەت نەشێت وەکو وەلاتەک بهێز سیاسەتێ بکەت و گۆت: (بەرپرسێن تورکیا گەهشتینە ڤێ باوەریێ ئێدی بێی چارەسەرکرنا پرسا کوردی ئەو نەشێن ل سەر سیاسەتا خوە یا جاران بەردەوام بن، د هەمان دەمی دا ئۆجەلان ژی باش دبینیت کو گوهۆڕینێن نها ل دەڤەرێ دشێن ببنە دەلیڤەیەکا دیرۆکی بۆ چارەسەرکرنا پرسا کوردی و بێگومان قۆناغا نها ژی وەسا دەستپێکریە و ئەم هیڤیدارین دەولەتا تورکیا ژی ب ئەرکێ خوە رابیت و پشتی پەیاما ئۆجەلانی ئەو ژی ب کریاری دەست ب هندەک تشتان بکەن).
ئەنداما شاندێ ئیمرالیێ ئەو یەک ژی دیار کر، هەر کەس بەحسێ قۆناغەکا نوو ل تورکیا دکەت، لێ دڤێت ژ بۆ ڤێ یەکێ ژی دستوورێ نها یێ تورکیا بهێتە گوهۆڕین و دهێتە خواستن هەبوونا کوردان ب فەرمی ل تورکیا بهێتە قەبوول کرن و گەلەک ئاستەنگێن هەی ژی نەمینن، بێگومان ژ بۆ ڤێ یەکێ ژی دێ ب دەربازبوونا دەمی گەلەک تشت هێنە ئاشکرا کرن و گۆت: (لێ یا گرنگ ئەوە دەولەتا تورکیا ب رۆلێ خوە رابیت، چونکی گرنگە شەڕێ چەندین سالێن بۆری ب دووماهی بهێت، بۆ دووماهی هاتنا شەڕی ژی هندەک گوهۆڕینن قانوونی و سیاسی هەنە دڤێت بهێنە کرن دا شەڕ ب دووماهی بهێت).

د چارچۆڤەیێ پشكداریێ د كۆنفرانسێ ئاسایشێ ل میۆنشن ل ئەلمانیا، نێچیرڤان بارزانی، سەرۆكێ هەرێما كوردستانێ چەندین دیدار و كۆمبوون ل گەل سەركردەیێن وەلاتێن جیهانێ ئەنجامدان.
ل دەستپێكا كۆمبوونێن خوە، نێچیرڤان بارزانی ل گەل گویدۆ كرۆسێتۆ، وەزیرێ بەرگریێ ئیتالیا كۆمبوو و د دیدارەكێدا پەیوەندیێن هەرێما كوردستانێ و ئیتالیا و ب هێزكرنا هاریكارییا هەڤپشك د ناڤبەرا هەردو ئالییاندا و بەرهنگاربوونا گەفێن داعشێ گەنگەشەكر.
سەرۆكێ هەرێمێ رێز و سوپاسییا هەرێما كوردستانێ بۆ وێ پشتەڤانیێ دوپاتكر ئەوا ئیتالیا ل وارێ راهێنانا پێشمەرگەی و ب هێزكرنا شیانێن وی د چارچۆڤەیێ هەڤپەیمانییا نێڤدەولەتییا دژی داعشێ پێشكێش دكەت. هەروەسا داكۆكی ل پێدڤییا ئیراقێ و هەرێما كوردستانێ بۆ بەردەوامییا پشتەڤانییا نێڤدەولەتی بۆ نەهێلانا ئێكجارییا داعشێ كر.
وەزیرێ بەرگریێ ئیتالیا دوپاتی ل سەر گرنگییا هەڤپشكیێ ل گەل هەرێما كوردستانێ و پێگیرییا وەلاتێ خوە بۆ بەردەوامییا پشتەڤانیێ ل پێشمەرگەی و ب هێزكرنا هاریكارییا لەشكری و ئەمنی ل گەل ئیراقێ و هەرێما كوردستانێ كر، هەروەسا رۆلێ هەرێما كوردستانێ د پاراستنا سەقامگیریێ ل دەڤەرێ بلند هەلسەنگاند.
هەر د بەردەوامییا دیدار و كۆمبوونێن خوە دا ل كۆنفرانسێ میۆنشن، نێچیرڤان بارزانی، سەرۆكێ هەرێما كوردستانێ ل گەل ئورسۆلا ڤۆندەرلاین، سەرۆكا كۆمیسیۆنا ئێكەتییا ئۆرۆپا كۆمبوو و تێدا سەرۆكێ هەرێمێ پشتەڤانییا ئێكەتییا ئۆرۆپا ل هەرێما كوردستانێ بلند هەلسەنگاند، هەروەسا هەردو ئالییان دوپاتی ل پێشڤەبرنا پەیوەندییان و بەرفرەهكرنا هاریكارییا هەڤپشك یا ئێكەتییا ئۆرۆپا ل گەل ئیراقێ و هەرێما كوردستانێ د هەموو واراندا كر، ل دۆر رەوشا ئیراقێ و هەرێما كوردستانێ و پێشهاتێن سووریێ ژی، بیر و بۆچوون لێكگۆهارتن.
سەرۆكا كۆمیسیۆنا ئێكەتییا ئۆرۆپا بۆچوونێن سەرۆكێ هەرێما كوردستانێ دەربارەی رەوشا سووریێ و دەڤەرێ ب گشتی، ب جهێ گرنگیێ هەژمارتن، هەروەسا رێز و پێزانینا ئێكەتییا ئۆرۆپا بۆ رۆلێ هەرێما كوردستانێ و قەهرەمانییا پێشمەرگەی د بەرهنگاربوون و شكاندنا داعشێدا دوپاتكر و ئاماژە ب گرنگییا رۆل و پشكدارییا ئافرەتێ د شەڕێ دژی داعشێ و بەرهنگاربوونا تیرۆرێدا كر.
هەر ل میۆنشن، نێچیرڤان بارزانی، سەرۆكێ هەرێما كوردستانێ، ل گەل شێخ ئەحمەد ئەلعەبدوللا ئەلئەحمەد ئەلسەباح، سەرۆك وەزیرێن كوێتێ كۆمبوو و تێدا پەیوەندیێن كوێتێ ل گەل ئیراقێ و هەرێما كوردستانێ، رەوشا ناڤخوەییا ئیراقێ و هەرێما كوردستانێ، پەیوەندیێن هەولێرێ و بەغدایێ، رەوشا سووریێ و دوماهی پێشهاتێن دەڤەرێ، گەنگەشەكر.
هەردو ئالییان پەیوەندیێن دیرۆكی یێن كوێتێ و هەرێما كوردستانێ بلند هەلسەنگاندن و دوپاتی ل بەرفرەهكرنا هاریكارییا هەڤپشك د هەموو واراندا كر. هەروەسا د هەڤڕابوون ل سەر گرنگییا پاراستنا ئارامیێ و سەقامگیریێ و دوورئێخستنا وەلاتێن دەڤەرێ ژ كێشە و ئالیۆزییان.
سەبارەت رەوشا سووریێ ژی، هەردو ئالییان دوپاتی ل گرنگییا ئارامی و سەقامگیرییا وی وەلاتی و پاراستنا مافێن پێكهاتەیێن وی كر، هەروەسا بەردەوامییا بەرهنگاربوونا تیرۆرێ و مەترسی و گەفێن داعشێ ب پێدڤی زانی.
هەر د چارچۆڤەیێ كارنامەیا خوە دا ل كۆنفرانسێ ئاسایشێ ل میۆنشن، نێچیرڤان بارزانی، سەرۆكێ هەرێما كوردستانێ د دیدارەكێدا ل گەل بۆریس پیستۆریوس، وەزیرێ بەرگریێ ئەلمانیا، باس ل پەیوەندیێن ئەلمانیا ل گەل ئیراقێ و هەرێما كوردستانێ و پەیوەندیێن هەولێرێ و بەغدایێ كر و دەرباەری گەفێن داعشێ و پێشهاتێن دەڤەرێ ب تایبەتی سووریێ، بیر و بۆچوون لێكگۆهارتن.
سەرۆكێ هەرێمێ رێز وپێزانینێن هەرێما كوردستانێ بۆ هاریكاری و پشتەڤانییا ئەلمانیا ل ئیراقێ و هەرێما كوردستانێ دیاركر، هەروەسا دوپاتی ل گرنگی و پێدڤییا هەرێما كوردستانێ ب بەردەوامییا ڤان هاریكارییان كر.
ژ ئالیێ خوەڤە، وەزیرێ بەرگریێ ئەلمانیا پێگیرییا وەلاتێ خوە ب پشتەڤانییا هەرێما كوردستانێ دوپاتكر، هەروەسا ب هێزكرنا هاریكارییا هەڤپشك یا ئەلمانیا ل گەل ئیراقێ و هەرێما كوردستانێ بۆ بەهنگاربوونا تیرۆرێ ب پێدڤی هەژمارت.
سەرۆكێ هەرێمێ ل میۆنشنێ ل گەل ئالار كاریس، سەرۆكێ ئیستۆنیا كۆمبوو و تێدا گەنگەشە ل دۆر پەیوەندیێن دو ئالییانە د ناڤبەرا ئیستۆنیا و ئیراقێ و هەرێما كوردستانێ هاتە كرن هەروەسا باس ل چاوانییا ب هێزكرنا هاریكارییا هەڤپشك د وارێن ئاسایشێ و تەكنولۆژیایێ و پەروەردێدا هاتەكرن. سەرۆكێ ئیستۆنی خواستا وەلاتێ خوە بۆ پێشڤەبرنا پەیوەندییان ل گەل هەرێمێ دوپاتكر و سەرۆكێ هەرێمێ بۆ سەرەدانا ئیستۆنیا ڤەخواند.
هەروەسا نێچیرڤان بارزانی ل گەل دەیڤید لامی، وەزیرێ دەرڤەیێ بریتانیا كۆمبوو و د دیدارەكێدا پەیوەندیێن بریتانیا ل گەل ئیراقێ و هەرێمێ هاتنە گەنگەشەكرن و باس ل چاوانییا ب هێزكرنا هاریكاریێ د وارێن سیاسی، ئەمنی و ئابووریدا هاتە كرن. سەرۆكێ هەرێمێ پێزانینا خوە بۆ پشتەڤانییا بەردەوام یا بریتانیا ل ئیراقێ و هەرێمێ دیاركر، ب تایبەتی د وارێ بەهنگاربوونا تیرۆرێ و پێشڤەبرنا دەزگەهێن ئەمنی دا، ژ ئالیێ خوەڤە وەزیرێ دەرڤەیێ بریتانیا راگەهاند كو وەلاتێ وی د پشتەڤانییا هەرێما كوردستانێ دا دێ بەردەوام بیت.
هەر ل درێژییا كارنامەیا خوە دا ل كۆنفرانسێ ئاسایشێ ل میۆنشن، سەرۆكێ هەرێما كوردستانێ، د دیدارەكێدا ل گەل دۆستێ دێرین یێ كوردستانێ، سیناتۆر كریس ڤان هۆلن، ئەندامێ جڤاتا پیران یا ئەمریكی، سوپاسییا پشتەڤانییا بەردەوام یا گۆنگرێسێ ئەمریكی ل هەرێما كوردستانێ كر.
ژ ئالیێ خوەڤە سیناتۆر هۆلن رۆلێ هەرێما كوردستانێ د پاراستنا ئارامیێ و سەقامگیریێ ل دەڤەرێ بلند هەلسەنگاند و بەردەوامییا پشتەڤانییا گۆنگرێسێ ئەمریكی و دۆستێن گەلێ كوردستانێ ل ئەمریكا بۆ هەرێما كوردستانێ، دوپاتكر.
هەروەسا سەرۆكێ هەرێما كوردستانێ د دیدارەكێدا ل گەل هانز جۆرج ئەنگەلكە، وەزیرێ دەولەتێ بۆ كاروبارێن ناڤخوەییا ئەلمانیا، باس ل هاریكارییا هەڤپشك یا ئەلمانیا ل گەل ئیراقێ و هەرێما كوردستانێ كر. هەر د كۆمبوونێدا هەردو ئالییان دوپاتی ل پێشڤەبرنا هاریكارییا ئەلمانیا ل گەل ئالیێن پەیوەندیدارێن ئیراقێ و هەرێما كوردستانێ ل دۆر پرسا مشەختان و مشەختییا نە قانوونی و بەرهنگاربوونا تاوانێ كر، هەروسا رۆناهێ ئێخستە سەر پەیوەندیێن هەولێرێ و بەغدایێ و رەوشا ناڤخوەییا ئیراقێ و هەرێما كوردستانێ.
د دیدارێدا سەرەرای شەرمزاركرنێ، نێچیرڤان بارزانی، هەڤسۆزییا خوە بۆ گەل و دەولەتا ئەلمانیا و كەوسكارێن قوربانیێن هێرشا تیرۆرستییا رۆژا پێنجشەمبیا بۆری ل میۆنشن دیاركر كو ژ ئەنجامێ هێرشەكێ ب ترۆمبێلێ، هەژمارەكا هەڤوەلاتییان برینداربوون.
هەر ل میۆنشن ل ئەلمانیا د كۆمبوونا سەرۆكێ هەرێما كوردستانێ و د. محەمەد ئەلخلێفی، وەزیرێ دەولەتێ ل وەزارەتا دەرڤەیا قەتەرێ، باس ل پێشڤەبرنا پەیوەندیێن وەلاتێ قەتەرێ ل گەل ئیراقێ و هەرێما كوردستانێ و رەوشا ئیراقێ و هەرێما كوردستانێ و دوماهی پێشهاتێن رۆژهەلاتا ناڤین و دەڤەرێ ب گشتی و سووریێ ب تایبەتی، هاتە كرن و هەردو ئالییان پشتەڤانییا خوە بۆ ئارامیێ و سەقامگیریێ ل سووریێ دوپاتكر و پرسا كوردان و پێكهاتەیێن دی ل سووریا نوو، گەنگەشەكر. سەبارەت ڤێ چەندێ نێچیرڤان بارزانی داكۆكی ل پاراستنا مافێن كوردان و هەموو پێكهاتەیان و پشكدارییا وان یا كارا د ئاڤاكرنا پاشەڕۆژا سووریێ دا كر.
د كۆمبوونا نێچیرڤان بارزانی، سەرۆكێ هەرێمێ ل گەل ئەیمەن حسێن عەبدوللا ئەلسەفەدی، جێگرێ سەرۆك وەزیران و وەزیرێ دەرڤە و كاروبارێن كۆچبەران یێ ئوردنی، باس پەیوەندیێن دناڤبەرا ئوردنێ و ئیراقێ و هەرێما كوردستانێ، هەروەسا چاوانییا ب هێزكرنا هاریكارییا هەڤپشك د وارێن سیاسی و ئابووری و دوماهی پێشهاتێن دەڤەرێ هاتە كرن.
نێچیرڤان بارزانی دوپاتی ل سەر گرنگییا پەیوەندییان ل گەل ئوردنێ كر و ئامارە ب رۆلێ كاریگەرێ ئوردنێ د پشتەڤانیكرنا سەقامگیرییا هەرێمایەتیدا كر و خواستا هەرێما كوردستانێ بۆ پێشڤەبرنا هاریكارییا هەڤپشك ل گەل ئوردنێ دوپاتكر. ژ ئالیێ خوەڤە وەزیرێ دەرڤەیێ ئودرنێ پێگیرییا وەلاتێ خوە ب هێزكرنا پەیوەندییان ل گەل ئیراقێ و هەرێمێ دوپاتكر و رۆلێ هەرێما كوردستانێ سەقامگیرییا ئیراقێ و دەڤەرێ بلند هەلسەنگاند.
هەر د چارچۆڤەیێ پشكداریكرنێ د كۆنفرانسێ ئاسایشێ ل میۆنشن، نێچیرڤان بارزانی، سەرۆكێ هەرێما كوردستانێ ل گەل د. عەبدوللەتیف بن راشد ئەلزەیانی، وەزیرێ دەرڤەیێ وەلاتێ بەحرەینێ كۆمبوو و هەردو ئالییان پەیوەندیێن بەحرەینێ ل گەل ئیراقێ و هەرێما كوردستانێ گەنگەشەكر و رۆناهی ئێخستە سەر دوماهی پێشهاتێن دەڤەرێ، هەروەسا باس ل چاوانییا ب هێزكرنا هاریكارییا دو ئالییانە د وارێن هەڤپشكدا هاتە كرن.
سەرۆكێ هەرێمێ دوپاتی ل سەر گرنگییا بەرفرەهكرنا ئاسۆیێ هاریكارییا د ناڤبەرا هەرێما كوردستانێ و وەلاتێ بەحرەینێ د وارێن سیاسی و ئابووریدا كر، هەروەسا ئاماژە ب رۆلێ هەرێما كوردستانێ د هێزكرنا سەقامگیرییا دەڤەرێدا كر. ژ ئالیێ خوەڤە وەزیرێ دەرڤەیێ بەحرەینێ خواستا وەلاتێ خوە بۆ ب هێزكرنا پەیوەندیێن خوە ل گەل ئیراقێ و هەرێما كوردستانێ دیاركر و رۆلێ هەرێما كوردستانێ د پاراستنا ئاسایش و سەقامگیرییا دەڤەرێدا بلند هەلسەنگاند. هەروەسا هەردو ئالییان ل دۆر رەوشا سووریێ و چەند پرسێن دی یێن جهێ گرنگییا هەڤپشك، بیر و بۆچوون لێكگۆهارتن.
هەر ل میۆنشن، نێچیرڤان بارزانی، سەرۆكێ هەرێما كوردستانێ ل گەل پەتریارك ئیگناتیۆس ئەفرامێ دویێ، پەتریاركێ كەنیسەیا سریانێن ئۆرتۆدۆكس ل ئەنتاكیا كۆمبوو، و د دیدارەكێدا هەردو ئالییان رەوشا مەسیحییان ل ئیراقێ و سووریێ و ئەو ئاستەنگێن د نوكە دا روو ب روویێ وان دبن گەنگەشەكر، هەروەسا باس ل چاوانییا ب هێزكرنا بزاڤێن ئاشتیێ و پێكڤەژیانێ دناڤبەرا پێكهاتەیێن ئایینی و نەتەوەیی یێن جودا جودا ل دەڤەرێ كر.
سەرۆكێ هەرێمێ دوپاتی ل سەر گرنگییا پێكڤەژیانا ئاشتییانە و پاراستنا مافێن مەسیحییان و هەموو پێكهاتەیان كر، هەروەسا ئاماژە ب پێگیربوونا هەرێما كوردستانێ كر د پشتەڤانیكرنا فرەهییا ئایننی و كەلتووری و ب هێزكرنا سەقایەكێ لێبۆرینێ و رێزگرتنێ ل هەڤدو.
هەر ل میۆنشن سەرۆكێ هەرێمێ ل كەل ماركۆ رۆبیۆ، وەزیرێ دەرڤەیێ ئەمریكا كۆمبوو، و د دیدارەكێدا، نێچیرڤان بارزانی سوپاسییا هەرێمێ بۆ پشتەڤانییا بەردەوام یا ئەمریكا ل ئیراقێ و هەرێمێ ب تایبەتی د وارێ بەرهناگربوونا تیرۆرێ و ب هێزكرنا ئاسایشێ وسەقامگیریێدا نیشاندا و دوپاتی ل گرنگییا بەردەوامییا هاریكارییا هەڤپشك ل گەل ئەمریكا كر و سەرۆكێ هەرێمێ وەزیرێ دەرڤەیێ ئەمریكی بۆ رێوڕەسمێ ڤەكرنا ئاڤاهیێ نوو یێ قۆنسلخانەیا گشتییا ئەمریكا ل هەولێرێ ڤەخواند، وی ژی ب خوەشحالیڤە پشكداریكرن د رێوڕەسمیدا نیشاندا. ماركۆ رۆبیۆ دوپاتكر كو ئەمریكا وەكو هەڤپەیمانەك، ب گرنگی دنێریتە پەیوەندیێن خوە ل گەل ئیراقێ و هەرێما كوردستانێ و ئاماژە ب گرنگییا هاریكارییا ئەمنی و لەشكری كر بۆ روو ب رووبوونا ئاستەنگێن هەڤپشك و ب هێزكرنا گەشەیا ئابووری.
ژ ئالیێ خوەڤە، پەتریارك ئیگناتیۆس ئەفرامێ دویێ، سوپاسییا هەرێما كوردستانێ كر بۆ پاراستن و پشتەڤانیكرنا مەسیحیێن ئاوارە و پەنابەر، هەروەسا رۆلێ هەرێما كوردستانێ ژی وەكو نموونەیەك بۆ پێكڤەژیانا ئاشتییانە ل دەڤەرێ، بلند هەلسەنگاند.
هەر ل میۆنشن سەرۆكێ هەرێمێ د د دیدارا خوە دا ل گەل ئەسعەد شیبانی وەزیرێ دەرڤەیێ سووریێ، دوپاتی ل سەر پاراستنا مافێن گەلێ كورد و هەموو پێكهاتەیێن سووریێ و گرنگییا ب دەستڤەئینانا ئاشتیێ و سەقامگیریێ كر، ژ ئالیێ خوەڤە وەزیرێ دەرڤەیێ سووریێ پێگیرییا وەلاتێ خوە بۆ ب دەستڤەئینانا سەقامگیریێ و پەیداكرنا رەوشا گونجای بۆ دانوستاندنێن نیشتمانی دوپاتكر و خواستا سووریێ بۆ ب هێزكرنا پەیوەندییان ل گەل ئیراقێ و هەرێمێ دیاركر.
د بەردەوامییا كۆمبوونێن خوە دا ل میونشین، نێچیرڤان بارزانی، سەرۆكێ هەرێما كوردستانێ ل گەل هەر ئێك ژ دیك سخووڤ، سەرۆك وەزیرێن هۆلەندا و رۆمین رادیف، سەرۆكێ بەلگاریا و جوناسان پاول، شیرەتكارێ ئاسایشا نەتەوەییا بریتانیا و ژان نوێل بارۆ، وەزیرێ دەرڤەیێ فرەنسا و نیكول پاشینیان، سەرۆك وەزیرێن ئەرمینیا و ئیلیسا سلۆتكین، ئەنداما لژنەیا هێزێن چەكدار ل كۆنگرێسێ ئەمریكی.
ژ رۆژا 14 هەتا 16 شواتا 2025، ب پشكدارییا پشكەكا مەزن یا سەركردەیێن رۆژهەلاتا ناڤین، ئۆرۆپا و جیهانێ كۆنفرانسێ ئاسایشێ ل میۆنشن ل ئەلمانیا هاتە گرێدان.
د كۆنفرانسیدا، هەژمارەكا مەزن یا سەرۆك، سەركردە، بەرپرسێن سیاسی و لەشكری یێن وەلاتێن جیهانێ پشكداربوون و گەنگەشە ل سەر كێشە و ئاستەنگێن ئەمنی ل جیهانێ كر، پرسێن گرنگ وەكو شەڕ، تیرۆر، گوهۆڕینا سەقای و ئاسایشا سایبەری هاتنە گەنگەشەكرن. هەروەسا سێ ژ پرسێن سەرەكی یێن كۆنفرانسێ ئەڤسالە هاتنە گەنگەشەكرن ئەوژی ئاگربەستا ل غەزە، راوەستییانا شەڕێ د ناڤبەرا رووسیا و ئۆكراینا و رەوشا سووریێ.

مەسرور بارزانی، سەرۆكێ حوكمەتا هەرێما كوردستانێ د چاڤپێكەفتنەكا تایبەتدا ل گەل كەنالێ ئەسمانیێ (العربیە) راگەهاند: پشتەڤانیێ ل پشكدارییا كوردێن سووریێ دكەین د پڕۆسەیا نوو یا وی وەلاتیدا، هەروەسا باس ل وێ چەندێ كر، هێزێن سووریا دیموكرات (هەسەدە) نوونەرایەتییا هەموو كوردێن سووریێ ناكەن.
سەرۆكێ حوكمەتا هەرێمێ ئەو دەنگوباس ژی رەتكرن كو باس ل هەبوونا بنگەه و پێگەهێن ئیسرائیلی ل هەرێما كوردستانێ دكەن، ئاماژە كر ژی كو كێشەیێن ئابووری یێن هەرێما كوردستانێ و ئیراقێ یێن هاتینە سیاسی كرن.
مەسرور بارزانی دیاركر ژی كو پەیوەندییەكا باش د ناڤبەرا هەرێما كوردستانێ و ئەمریكا دا یا هەی ب تایبەتی كو ئەمریكا پشتەڤانیكەرەكا ب هێز یا ئیراقێ و هەرێما كوردستانێ ژی بوو نەخاسمە د بەرهنگاربوونا داعشێ و تیرۆرێدا ب گشتی.
سەرنج بۆ وێ چەندێ ژی راكێشا، ئەمریكا ژ سالا 2003 و وێڤە گەلەك هاریكارییا ئیراقێ یا كری، هەروەسا هەرێما كوردستانێ پەیوەندیێن خوە ل گەل هەموو دەزگەهێن كاریگەرێن ئەمریكا یێن پێشئێخستین و سوپاسییا هاریكارییا وان یا گرنگ كر.
سەرۆكێ حوكمەتا هەرێمێ گۆت ژی: هەرێما كوردستانێ د شەڕێ دژی تیرۆرێدا ل گەل ئەمریكا راوەستییا و شەڕێ تیرۆرێ كر، هەروەسا ئەمریكا رۆل د پێشڤەبرنا هەرێما كوردستانێدا هەبوو.
سەبارەت پرسا مانا هێزێن ئەمریكی و هەڤپەیمانان ل هەرێما كوردستانێ پشتی خوە ژ ئیراقێ ڤەدكێشن كو بڕیارە ئەوە ل دوماهییا سالا داهاتی روو بدەت، مەسرور بارزانی دیاركر، ڤێ بڕیارێ پەیوەندی ب ئەمریكا ڤە یا هەی كو ئایا دێ هێزێن خوە ل هەرێما كوردستانێ هێلن و چاوانییا هێلانا وان.
هەروەسا خویاكر: پلانا ئێكێ ب ڤی شێوەی بوو كو هێزێن هەڤپەیمانییا نێڤدەولەتی ل دوماهییا سالا 2025 ئیراقێ بجه بهێلن و پشكەكا وان هێزان هەتا دوماهییا سالا 2026 ل هەرێما كوردستانێ بمینن و پاشی هەرێمێ بجه بهێلن، بەلێ پشتی گوهۆڕینێن د دەمێ چەند مەهێن بۆریدا رووداین، ب دیتنا من هەلوەستێ ئیراقییان ژی ل دۆر ڤی بابەتی یێ هاتیە گوهۆڕین، لەوما ب دیتنا من ئەو پلان د نوكە دا وەكو خوە نەمایە، ب تایبەتی كو پێشهات و پێشكەفتنێن نوو و رێككەفتنێن نوو دێ هەبن، لەوما شرۆڤەكرنەكا نوو بۆ هەموو وان پێشهاتان دێ هێتە كرن و ئەڤ شرۆڤەكرنێن نوو دێ دەمێ مانا هێزێن هەڤپەیمانان و هەژمارا وان ل دەڤەرێ دیاركەن، بەلێ ل دوماهیێ ئەڤە گرێدای بڕیارا ئەمریكایە.
مەسرور بارزانی رۆناهی ئێخستە سەر وێ چەندێ ژی، ل گەل حوكمەتا فیدرال د پەیوەندییا بەردەوام دانە و ل دۆر هێزێن هەڤپەیمانان ل ئیراقێ دانوستاندن یا كری و هەتاكو پشكداری د دانوستاندنان دا ژی یا كری و هەرێما كوردستانێ نوور د دانوستاندناندا هەبوو، بەلێ ل دوماهیێ ئەڤ بڕیارا ڤێ پرسێ یا ل دەف حوكمەتا فیدرالی و هەرێما كوردستانێ ژی خواستا خوە بۆ مێهڤاندارییا هێزێن هەڤپەیمانان یا دیاركری، چونكە هەرێمێ ئاماژە ب مەترسی و ئاستەنگێن ئەمنی یێن دەڤەرێ یا كری كو تووشی هەموویان دبن، بەلێ بەغدا ژی ل دۆر ڤێ چەندێ چاڤخشاندن ب بڕیار و هەلوەستێ پێشتر دا سەبارەت دەمێ مانا هێزێن هەڤپەیمانان د ئاخا وێدا دكەت ب تایبەتی كو دێ پێدڤی ب مانا وان هێزان بیت بۆ دەمەكێ دی.
سەبارەت هەبوونا پێگەه و بنگەهێن ئیسرائیلی ل هەرێما كوردستانێ، سەرۆكێ حوكمەتا هەرێمێ دوپاتكر ئەو دەنگوباس تۆمەتن و هیچ بنەمایەك بۆ نینە و تنێ بانگەشەیێن بێ بەلگەنە، گەلەك ب كورتی ئەوا سەبارەت ڤێ چەندێ هاتیە گۆتن و دهێتە گۆتن چو راستی بۆ نینە، ئیسرائیلی ل هەرێما كوردستانێ نینن، مخابن ئەوا سەبارەت ڤێ چەندێ دهێتە گۆتن هیچ بەهانەیەكا دی نینە بۆ وێ چەندێ هێرشێ بكەنە سەر هەرێما كوردستانێ لەوما كار ل سەر دروستكرنا ڤان تۆمەتان دكەن بۆ وێ چەندێ بەهانەیان بۆ رەفتارێن خوە یێن خراب بینن و هێرشان بكەنە سەر هەرێما كوردستانێ. پرسیار ئەوە بۆچی ڤێ چەندێ دكەنە بەهانە؟ ب پشتڕاستیڤە ئیسرائیلییان هەبوون ل هەرێما كوردستانێ نینە.
مەسرور بارزانی ل دۆر راگرتنا هەڤسەنگیێ د پەیوەندیێن هەرێما كوردستانێ دا ل گەل هەر ئێك ژ ئەمریكا و ئیرانێ گۆت: هەرێما كوردستانێ ب خوە دێ بڕیارێ ل چارەنڤیسێ خوە دەت و ل دۆر خوە بڕیارێ وەردگریت، هەرێما كوردستانێ بریكارا هیچ ئالییەكی نینە، پەیوەندییەكا باش ل ئەمریكا یا هەی، هەڤدەم ب شانازیڤە پەیوەندییەكا باش ل گەل ئیرانا هەڤسنوور ژی یا هەی كو سنوورەكێ بەرفرهە پێكڤە یێ هەی. هندەك جاران گوهۆڕین یێن ب سەر ڤان پەیوەندییان هاتین، كو مخابن ژ ئەگەرێ نەرۆهنییا تێكگەهشتنێ ئەو پەیوەندییە تێكچوون، بەلێ مە ئەو قۆناغ یا دەربازكری و مە باوەرییا هەی خەز و نیازێن باش دێ تێكچوونا پەیوەندییان چارەسەركەن.
گۆت ژی: پەیوەندیێن هەرێما كوردستانێ ل گەل ئەمریكا و ئیرانێ ل سەر حیسابا قوربانیدانا وەلاتەكی نینە، بەلكو هەرێما كوردستانێ رێزێ ل پەیوەندیێن خوە ل گەل هەردو وەلاتان دگریت، پەیوەندی ل سەر رێزگرتنێ یێن دروست بووین، ئەو رێزێ ل هەرێما كوردستانێ دگرن و هەرێما كوردستانێ ژی رێزێ ل وان دگریت.
مەسرور بارزانی ل دۆر بۆچوونا دۆنالد ترەمپی، سەرۆكێ ئەمریكا ،تایبەت پێشڤەبرنا پەیوەندیێن ئابووری، باس ل وێ چەندێ كر، كو نەشێت ل شوونا سەرۆك ترەمپی بەرسڤێ بدەت، بەلێ هەرێما كوردستانێ شیانێن مەزن نەكو تنیچ د وارێ پەترۆلی و غازێدا یێن هەین بەلكو شیانێن دی ژی یێن هەین.
سەبارەت پێكئینانا حوكمەتا نوو یا هەرێما كوردستانێ، مەسرور بارزانی هیڤی خواست ب زووترین دەم حوكمەتا نوو بهێتە پێكئینان، كو ئەڤە د بەرژەوەندییا خەلكێ هەرێما كوردستانێ دایە، بۆ ڤێ مەبەستێ ژی داخواز ژ هەموو ئالیێن سەركەفتی د هەلبژارتنان دا كریە بۆ وێ چەندێ پشكداریێ د كابینەیا نوو یا حوكمەتێدا بكەن، بەلێ ڤێ پرسێ پەیوەندی ب سروشتێ دانوستاندنانڤە یا هەی كو ل دوماهیێ كی دێ پشكداریێ د حوكمەتێدا كەت؟.
هەروەسا دیاركر ژی: رێكێ بدە من بابەتەكێ رۆهن بكەم، پارتی دیموكراتی كوردستان 39 كورسی د هەلبژارتناندا یێن ب دەستڤەئیناین، بەلێ گوهۆڕین ب سەر قانوونا هەلبژارتناندا هات كو هەرێما كوردستانێ پێشتر ئێك بازنە بوو، بەلێ د دوماهی هەلبژارتناندا هەر پارێزگەهەك بوو بازنەیەكێ سەربخوە، ڤێ چەندێ ژی وەكر گوهۆڕین د كورسیێن پەرلەمانیدا دروست ببیت، هەكە سەحكەیێ، دێ بینی پارتی دیموكراتی كوردستان شیایە رێژەیا 46% ژ دەنگان ب دەستڤەبینیت، بەلێ تنێ 39 كورسی یێن ب دەستڤەئیناین، چونكە ئارمانج ژ فرەبازنەییێ بۆ وێ چەندێ بوو كو هەژمارا كورسییان بهێتە كێمكرن. نابینم ئەڤ پێرابوونە ژ روویێ دیموكراسیڤە باشترین نموونە بوویە، بەلێ بڕیارا لژنەیا بلند یا هەلبژارتنان بوو، دخوازم وێ چەندێ ژی بێژم دوماهی هەلبژارتنێن هەرێما كوردستانێ پڕۆسەیەكا سەركەفتی بوو، دوور ژ ئەنجامان، گەلێ كورد یان گەلێ كوردستانێ د وان هەلبژارتناندا یێ سەركەفتی بوو، ل دوماهیێ ژی مە هەموویان پێدڤی ب پێكئینانا حوكمەتێ یا هەی.

دوهی سێشەمبی 11/2/2024 11/2/2025، مەسرور بارزانی، سەرۆكێ حوكمەتا هەرێما كوردستانێ د چارچۆڤەیێ گۆپیتكا جیهانییا حوكمەتان كو ل باژێرێ دوبەی ل ئیماراتێ بڕێڤە دچیت، پشكداری د پانێلەكیدا كر ب ناڤونیشانێ( دەربازكرنا ئاستەنگان و ژ دەستنەدانا دەلیڤەیان).
سەرۆكێ حوكمەتا هەرێما كوردستانێ خوەشحالییا خوە ب دوبارە پشكداریێ د گۆپیتكا جیهانییا حوكمەتاندا ل دوبەی دیاركر و هەڤدەم بەرسڤا چەندین پرسیاران ل دۆر پەیوەندیێن هەولێرێ و بەغدایێ، رەوشا دەڤەرێ، كەرتێ پەروەردێ و چەندین پرسین دی دا.
مەسرور بارزانی راگەهاند» ئەو ئاسایش و سەقامگیرییا مە ل هەرێما كوردستانێ هەی، گەلەك یا گرنگ بوو بۆ هاندانا بازرگان و وەبەرئێنەرێن بیانی تاكو بهێن ل هەرێما كوردستانێ وەبەرئێنانێ بكەن و كارێ خوە یێ بازرگانی بكەن».
سەبارەت پەیوەندیێن هەولێرێ و بەغدایێ، سەرۆكێ حوكمەتا هەرێمێ دوپاتكر» بزاڤێ دكەین كێشەیێن خوە یێن سیاسی ل گەل حوكمەتا فیدرالییا ئیراقێ چارەسەر بكەین».
سەرۆكێ حوكمەتا هەرێمێ دوپاتكر ژی» ژ نێزیك ل گەل كەرتێ تایبەت كاردكەین تاكو بەردەوامیێ ب چاكسازیێ د پڕۆژەیێن حكومیدا بدەین د چارچۆڤەیێ وان ئەجیندە و پلانێن كو مە هەین. دشێم بێژم، ئەم د سەركەفتی بووین د پرسا ب دەستڤەئینانا پشكەكا مەزن یا وان ئارمانجێن مە هەبوون. بەلێ ب پشتڕاستیڤە گەلەك یا مای هەتا ل پاشەڕۆژێ ئەنجام بدەین».
مەسرور بارزانی رۆهنكر ژی» پێدڤییە خەلك سەنتەرێ ئەجیندایێن كارێن هەر حوكمەتەكێ بیت هەكە بخوازیت د پڕۆژە و كارێن خوە دا سەركەفتی بیت. ئەم ژی دنێرینە خواستێن خەلكی، بۆ وێ چەندێ ب باشترین شێوە خزمەتا وان بكەین، ژ پێخەمەت ڤێ چەندێ ژی پێدڤییە چەند كاران بكەی، سازانێ و دانوستاندنێ بكەین، ل بەرەیێن جودا شەڕی بكەی بۆ گەهشتنێ ب ئارمانجان كو د بەرژەوەندییا خەلكیدا بن. مە بزاڤ یا كری، باشی و ساخلەمییا خەلكی ل بەرچاڤ وەربگرین».
ل دۆر پەیوەندیێن هەرێما كوردستانێ و ئیماراتێ، گۆت» گرنگە ژ ئەزموون و چیرۆكێن سەركەفتنا وەلاتان فێر ببین، ئیمارات ئێكە ژ وان وەلاتان ئەم دنێرینێ و ژێ فێر دبین د بجهئینانا وان پڕۆژەیێن چاكسازیێ ئەوێن مە ل هەرێما كوردستانێ دەستپێكرین».
پڕۆسەیا پەروەردە و فێركرنێ، پشكەكا دی یا ئاخڤتنێن سەرۆكێ حوكمەتا هەرێمێ بوو د چارچۆڤەیێ پانێلیدا و باس ل وێ چەندێ كر» ب پتڕاستیڤە باشتركرنا پڕۆسەیا پەروەردێ ژ كارێن مە یێن بەراهیێیە، كار دكەین بۆ وێ چەندێ خواندن و پەروەردەكرن ل هەرێما كوردستانێ، بگەهیتە ئاستەكێ نێڤدەولەتی. ب شانازیڤە چەندین زانكۆ و پەیمانگەهێن حكومی و ئەهلی و نێڤدەولەتی ل هەرێما كوردستانێ یێن هەین، گەلەك ژ دەرچوویێن مە ل هەردو كەرتێن گشتی و تایبەتدا كار دكەن».

د چارچۆڤەیێ پشكداریێ د گۆپیتكما جیهانییا حوكمەتاندا ل دوبەی، مەسرور بارزانی ل گەل شێخ حەمدان بن محەمەد بن راشد جهنشینێ دوبەی و جێگرێ سەرۆك وەزیرێن ئیماراتێ و وەزیرێ بەرگریێ كۆمبوو.
د كۆمبوونەكێدا هەردو ئالییان دوپاتی ل پەیوەندیێن دو ئالییانە د وارێن جۆراوجۆردا كر و سەرۆكێ حوكمەتا هەرێمێ سوپاسییا پشتەڤانی و هاریكارییا بەردەوام یا دەولەتا ئیماراتێ كر.
هەروەسا مەسرور بارزانی، سەرۆكێ حوكمەتا هەرێمێ ل گەل جاسم محەمەد ئەلبدێوی، ئەمیندارێ گشتیێ جڤاتا هاریكاریییا وەلاتێن كەنداڤی كۆمبوو و هەردو ئالییان دوپاتی ل زێدەتر پێشئێخستنا پەیوەندیێن هەرێما كوردستانێ ل گەل وەلاتێن كەنداڤی ل سەر بنەمایێ بەرژەوەندیێن هەڤپشك و ب ئاراستەیا گەشپێدانا دەڤەرێ، كر. هەروەسا هەردو ئالییان گوهۆڕینێن رەوشا گشتییا سووریێ گەنگەشەكرن و د هەڤڕابوون ل سەر پاراستنا سەقامگیری و ئاسایشا سووریێ و رێزگرتن ل مافێن گەلێ كورد و پێكهاتەیێن دی یێن وی وەلاتی.
هەر ل دوبەی، سەرۆكێ حوكمەتا هەرێما كوردستانێ ل گەل عەبدولرەحمان بن محەمەد ئەلعوەیس، وەزیرێ ساخلەمیێ و خوەپاراستنا جڤاكی یێ ئیماراتی كۆمبوو و هەردو ئالی د هەڤڕابوون ل سەر گرنگییا پێشڤەبرنێ ب هاریكاریێ و هەماهەنگیێ د ناڤبەرا هەرێما كوردستانێ و ئیماراتێدا د وارێ ساخلەمیێدا.

ل رۆژا دوشەمبی 10/2/2025 ل هۆلا راگەهاندنێ یا پشكا رەوشەنبیری و راگەهاندنا پارتی دیموكراتی كوردستان ب بەرهەڤبوونا فازل میرانی، بەرپرسێ دەستەیا كارگێرییا مەكتەبا سیاسییا پارتی و سیداد بارزانی و مەحمود محەمەد، ئەندامێن دەستەیا كارگێرییا مەكتەبا سیاسی و د. سالار عوسمان، ئەندامێ كۆمیتەیا ناڤین و بەرپرسێ پشكا رەوشەنبیری و راگەهاندنێ و هەژمارەكا ئەندامێن كۆمیتەیا ناڤین و بلند ئیسماعیل بەرپرسێ لقێ دو یێ پارتی و ئومێد خوشناو پارێزگەرێ هەولێرێ و هەژمارەكا بەرچاڤ ژ رەوشەنبیر و نڤیسەر و راگەهاندكاران، رێوڕەسمەكێ هەژی بۆ دانەنیاسین و بلند هەلسەنگاندنا وەرگێرانا شاكارا دیرۆكییا (مەم و زین) یا ئەحمەدێ خانی بۆ زمانێ فارسی ژ ئالیێ د. شێرزاد شەفیع بابۆ بارزانی، بڕێڤەچوو.
ل دەستپێكێ
د. سالار عوسمان، بەرپرسێ پشكا رەوشەنبیری و راگەهاندنا پارتی دیموكراتی كوردستان د پەیڤەكێدا ئاماژە كر كو د. شێرزاد شەفیع بابۆ بارزانی، ئێك ژ ئەكادیمیست و نڤیسەر و وەرگێرێن دیارێن كوردستانێیە، كو خوە ل كارەكێ گەلەك گرنگ كریە خودان ئەوژی وەرگێرانا (مەم و زین) بۆ زمانێ فارسی، ژ وی روانگەهیڤە گرنگە ب رێكا وەرگێرانێ خوە و ئەدەب و دۆز و خەباتا مللەتێ خوە بدەینە نیاسین.
پاشی فازل میرانی، بەرپرسێ دەستەیا كارگێرییا مەكتەبا سیاسییا پارتی پەیڤا مەكتەبا سیاسی پێشكێشكر و گۆت» دەستخوەشیێ ل د. شێرزادی دكەم، كارەكێ جوان و مەزن و دیرۆكیێ ئەنجامدای و جهێ دەستخوەشیێیە» هەروەسا ئاماژەكر» وەرگێران هونەر و زانست و لێهاتن و ژێهاتنە، هەموو كەس نەشێن وەرگێرانێ بكەن».
د رێوڕەسمیدا (د. شێرزاد شەفیع بابۆ بارزانی) دانەنیاسینەك بۆ پرتۆكا مەم و زینا ئەحمەدێ خانی كر و رۆناهی ئێخستە سەر ناڤەرۆكێ وەرگێرانا وێ و ب شێوەیەكێ هوور هەموو بڕگە و قۆناغێن وەرگێرانا شاكارێ مەم و زینێ بۆ زمانێ فارسی بۆ بەرهەڤبوویێن رێوڕەسمێ بەرچاڤكر، ل گەل وێ چەندێ ژی دا دەستخوەشی ل پشكا رەوشەنبیری و راگەهاندنا پارتی كر كو ب وی شێوازێ جوان رێزێ ل بەرهەمێن ئەدەبی و رەوشەنبیری یێن نڤیسەرێن كوردستانێ دگریت.
ستران و مۆزیك پشكەكا گرنگ یا رێوڕەسمێ دا و تێدا هونەرمەند ژیوار شێخولئیسلام چەند سترانەك پێشكێشكرن.
د پشكەكا دی یا رێوڕەسمێدل پانێلەك ب ناڤونیشانێ (مەم و زین شاكارەكا گەش یا ئەدەبییە) برێڤەچوو. تێدا هێرۆ شێخولئیسلام ب ناڤونیشانێ (كاریگەرییا مینیاتۆر ل پرتۆكا مەم و زینی) دا، د. مایكل لیزینبێرگ ( مەم و زینا ئەحمەدێ خانی ژ ئەدەبێ كلاسیك بۆ ئەدەبێ جیهانی) و تەحسین دۆسكی ( ئارمانجا ئەحمەدێ خانی ژ نڤیسینا مەم و زینا) پشكدار بوون.
پاشی رێزلێنان و قەفتا گولا رێز و وەفاداریێ پێشكێشی د. شێرزاد شەفیع بابۆ بارزانی هاتە كرن.
ل دوماهییا رێوڕەسمی 30 میناتۆرێن پرتۆكا مەم و زین ب شێوەیێ پانۆراما ژ ئالیێ هیرۆ شێخولئیسلام ڤە هاتنە نمایشكرن.

کۆڤارەکا ناڤدار یا ئەمریکی دیار دکەت کورد مەزنترین گەلێ ڤێ جیهانێ نە کو هەتا نها دەولەتا وان نینە و زۆرداریا ل سەر کوردان ژ ئالیێ چار دەولەتێن رۆژهەلاتا ناڤین بوویە ئەگەرێ ڤێ یەکێ هەتا نها ژی رەوشا رۆژهەلاتا ناڤین هەردەم یا ئالۆزە و بێی کوردان رۆژهەلاتا ناڤین ئارامیێ بخوە ڤە نابینیت.

کۆڤارا تایم یا ئەمریکی د راپۆرتەکێ دا دیار کریە نها جارەکا دی رۆژهەلاتا ناڤین بەر ب گوهۆڕینێن مەزن ڤە دچیت، د سەدسالێن بۆری دا گەلەک زۆلم ل کوردان هاتە کرن لێ کوردان ل ئیرانێ، تورکیا، ئیراقێ و سووریێ ل هەمبەر زۆرداران خەبات کرن و خەباتا کوردان یا بۆ ئاڤاکرنا دەولەتەکێ هەتا نها ژی بەردەوام دکەت، ئەو یەک ژی نیشا ددەت هەتا کورد ل رۆژهەلاتا ناڤین نەگەهنە مافێن خوە ئاشتی و ئارامی ژی ناهێتە رۆژهەلاتا ناڤین، چونکی کورد مەزنترین گەلێ رۆژهەلاتا ناڤین و جیهانێ نە کو هەتا نها نەبووینە خوەدان دەولەت، لێ خەباتا کوردان یا بۆ ئاڤاکرنا دەولەتێ هەتا نها ژی بەردەوام دکەت.
هەمان کۆڤارێ ئەو یەک ژی دیار کریە، ل ئیراقێ کوردان شیان پشتی سالا ١٩٩١ هەرێمەکێ بۆ خوە ئاڤا بکەن و نها هەرێما کوردستانێ ئێکە ژ دەڤەرێن هەری ئارام و پێشکەفتی ل رۆژهەلاتا ناڤین، بەرۆڤاژی وەلاتێن ل رۆژهەلاتا ناڤین نها ل هەرێما کوردستانێ پێکڤەژیانەکا گەلەک باش یا هەی و ئەو یەک بوویە جهێ سەرنجێ بۆ هەموو وەلاتێن جیهانێ، کوردان ل هەرێما کوردستانێ شیانە د گەلەک بیاڤان دا وەلاتێ خوە ئاڤا بکەن و بەر ب پێش ببەن، لێ د ڤان چەند سالێن دووماهیێ دا حوکمەتا بەغدا ئالۆزیێن مەزن ل هەمبەر پێشڤەچوونا هەرێما کوردستانێ دروست کرن و ئەو یەک ژی نیشا ددەت هێشتا ئالۆزی و ناکۆکی د ناڤبەرا کوردان و بەغدا دا ب تەمامی چارەسەر نەبووینە.
د راپۆرتێ دا بەحسێ ڤێ یەکێ ژی هاتیە کرن کو پشتی ژناڤچوونا رژێما بەشاری نها ل سووریێ ژی دەلیڤەکا دیرۆکی بۆ کوردان هاتیە پێش و کوردان دڤێت ل سووریێ ژی بگەهنە مافێن خوە، لێ تورکیا ئاستەنگان دروست دکەت، لێ د هەمان دەمی دا گەلەک وەلاتێن جیهانێ پشتەڤانیێ ل مافێن رەوا یێن گەلێ کورد ل سووریێ دکەن، چونکی بۆ هەموو وەلاتێن جیهانێ ئەو یەک هاتیە سەلماندن کو د سەد سالێن بۆری دا گەلەک زۆرداری ل کوردان هاتە کرن، لێ کوردان دەست ژ خەباتا خوە یا بۆ ئازادیێ بەرنەدان و خەباتا کوردان هەتا نها بەردەوام دکەت و ئەو یەک دیارە هەتا کورد ل رۆژهەلاتا ناڤین نەگەهنە مافێن خوە دێ رەوشا قەیراناوی و ئالۆز یا ل دەڤەرا رۆژهەلاتا ناڤین بەردەوام بیت، ژ بۆ ئارامی و ئاشتیێ ل رۆژهەلاتا ناڤین دڤێت رێز ل کوردان بهێتە گرتن و دڤێت کورد بگەهنە مافێن خوە یێن رەوا.

فەرماندارێ گشتی یێ هێزێن سووریا دیموکرات د داخۆیانیەکێ دا دیار کر، نها دانوستاندنێن وان ل گەل شامێ بەردەوامن، لێ وەکو هێزێن سووریا دیموکرات ئەو وەسا ب ساناهی دەست ژ چەکی بەرنادەن و نابنە پشکەک ژ لەشکرێ نوو یێ سووریێ، بەلکو وان دڤێت وەکو هێزێن سووریا دیموکرات ب تایبەتمەندیێن خوە ببنە پشکەک ژ لەشکرێ سووریێ، چونکی هێزێن سووریا دیموکرات تایبەتمەندیێن خوە هەنە و دڤێت دەستهەلاتا نوو یا سووریێ ژی ڤێ راستیێ قەبوول بکەت.
مەزلوم عەبدی ئەو یەک ژی دیار کر، فشار و گەفێن تورکیا نابنە ئەگەرێ ڤێ یەکێ ئەو وەکو هێزێن سووریا دیموکرات هەما وەسا دەست ژ چەکی بەردەن، چونکی هێزێن سووریا دیموکرات د شەڕێ ل دژی داعشێ دا هێزەکا سەرەکی بوویە و ئەڤرۆکە ژی ژ بۆ پاراستنا کوردان و نەتەوەیێن دی یێن ل سووریێ هەبوونا هێزێن سووریا دیموکرات گەلەک یا گرنگە.

دوهی دوشەمبی 10/2/2025، مەسرور بارزانی، سەرۆكێ حوكمەتا هەرێما كوردستانێ، ب سەرۆكایەتییا شاندەكێ حكومی، گەهشتە دەولەتا ئیماراتێ، بۆ پشكداریكرنێ د گۆپیتكا جیهانی یا حوكمەتاندا، كو بڕیارە ئەڤرۆ 11/2/2025 ل دوبەی دەستپێبكەت و هەتا 13 ڤێ مەهێ یا بەردەوام بیت.
د چارچۆڤەیێ وێ گۆپیتكا جیهانیدا، سەرۆكێ حوكمەتا هەرێما كوردستانێ دێ چەندین دیدار و كۆمبوونان ل گەل هەژمارەكا سەرۆك و سەركردە و بەرپرسێن بلند یێن جیهانێ ئەنجام دەت.
د وان دیداراندا، دێ گەنگەشە ل دۆر پێشڤەبرنا پەیوەندیێن هەرێما كوردستانێ ل گەل وەلات و ئالیێن پشكداربویێن گۆپیتكێ و بەرفرەهكرنا ئاسۆیێ هاریكارییا هەڤپشك، ب تایبەتی د وارێن ئابووری و وەبەرئێنانێ و بازرگانی و گەشەپێدانێ هێنە كرن، ئەڤە ژ بلی گەنگەشەكرنێ ل سەر دووماهی گوهۆڕینێن ئیراقێ و دەڤەرێ.
پشكدارییا شاندێ هەرێما كوردستانێ، پشكەكە ژ بزاڤێن بەردەوامێن سەرۆكێ حوكمەتا هەرێما كوردستانێ بۆ پشكدارییا چالاكانەیا هەرێما كوردستانێ د كۆنفرانس و كۆڕبەندێن نێڤدەولەتیدا، ب ئارمانجا ب هێزكرنا رۆل و پێگەهێ هەرێما كوردستانێ وەكو فاكتەر و هەڤپشكەكا كاریگەر و جهێ باوەرییا جڤاكێ نێڤدەولەتی.

عەزیز هەورامی:

سیاسەتمەدارەكێ كورد دبێژیت، سەرۆك بارزانی وەكو رێبەرێ گەلێ كورد، ئەركێ وی كۆمكرن و ئاراستەكرن و پاراستنا بەرژەوەندیێن گەلێ كوردە، پێدڤییە هەموو حزبێن كوردستانێ گوهدارییا رێنما و شیرەتێن وی بكەن و ئێكڕێز بن بۆ پاراستنا بەرژەوەندیێن گەلێ مە ل هەر چار پارچەیێن كوردستانێ.
سەرۆ قادر، سیاسەتمەدارێ كورد، بۆ رۆژنامەیا (ئەڤرۆ) گۆت» سەرۆك بارزانی د قۆناغا گوهۆڕینان ل دەڤەرێ، پێشنیاز و شیرەت پێشكێشی بزاڤا كوردی كرن، ل باكوور و رۆژئاڤایێ كوردستانێ، پێشبینیێن خوە ل سەر روودانان ئاشكراكرن».
سیرۆ قادر گۆت ژی» ئەركێ سەرۆك بارزانی یە، د ڤێ قۆناغێدا وەكو رێبەرێ گەلێ كورد، ب ئەركێ كۆمڤەكرن و شیرەتكرن و رێنیشاندەر بیت، ئەوا د بەرژەوەندییا گەلێ كورد دا بێ جوداهی پێشنیاز دكەت».
رۆهنكر ژی» سەرۆك بارزانی ئەو گوهۆڕینە دیاركرن كو دڤێت د ناڤ بزاڤا رزگاریخوازا كوردی دا روو بدەن، چەك بهێتە لادان و جوداهیێن بیر و بۆچوونان بهێنە سەر مێزێن دانوستاندنێ، ل ڤی دەمی دڤێت هەموو حزب ل باكوور و رۆژئاڤا و باشوور د هەڤدو بگەهن و تێبگەهن هەكە هەر روودانەك روو بدەت، هەكە ب باشی خوە بۆ بەرهەڤ نەكەی دێ زیان هەبیت، گەلەك جاران رەوتێ روودانان د بەرژەوەندییا كوردان دایە، بەلێ هندەك ئالیێن سیاسی ب باشی رەفتارێ ناكەن و تێناگەهن كو دێزیان د دووڤدا هەبیت».
سەرۆ قادر ئەوژی گۆت» هیڤیدارین هەموو بالێن چەكداری و سیاسەتمەدار ب تایبەتی، پەكەكە و یەپەكە د وێ چەندێ بگەهن كو سەرۆك بارزانی د بەرژەوەندییا كەسی دا نائاخڤیت، بەلكو سەرۆك دناڤ رووداناندا دژیت و گەلێ مە یێ بەر ب قۆناغەكا نوو چووی، هەموو روودانێن روو ددەن سەرەرای وێ چەندێ كو گەف یێن تێدا، هەكە ب باشی ل گەل بچین دێ د بەرژەوەندییا كوردان دا ب دووماهی هێت، ب قانوونی و دستووری هەبوونا مافێ كوردان ل دەولەتا نوو یا سووریێ دامەزراندنا هەرێمەكا كوردیە، ل دیمەشقێ هەتا نوكە ب زمانەكێ نەرم باس ل چارەسەرییا دۆزا كوردی دهێتە كرن، ل باكوورێ كوردستانێ پڕۆسەیا دانوستاندنێ ل گەل دەولەتا توركیا دێ دەستپێكەت و هەكە پەكەكە دەست ژ چەكی بەردەت و بهێتە سەر مێزا دانوستاندنێ و گوهۆڕینان د هزرا خوە دا بكەت، دەولەتا توركیا یا گەهشتییە وێ باوەریێ ل گەل كوردان ل سەر مێزا دانوستاندنێ كۆمبیت».
هەروەسا ئاماژەكر» سەرۆك بارزانی باس ل وێ چەندێ كریە كو گوهۆڕین ب سەر هەڤسەنگییا هێزا دەولەتان ل دەڤەرێ روودایە، دۆستێن كوردان یێن ب هێز بووین، كورد دوژمنێن هیچ دەولەتەكێ نینن و دەرگەهێ دانوستاندنێ یێ ڤەكریە بۆ هەر ناكۆكییەكا ل گەل دەولەتێن ئیراقێ و ئیرانێ و توركیا و سووریێ نوو هەبیت، كێشەیا گەلێ مە بهێتە چارەسەركرن، ئەو چار دەولەتە نەشێن چارەسەرییا پرسا كوردی ل وەلاتێن خوە پشت گوه ب هاڤێژن، سەرۆك بارزانی ب رۆهنی باسكر، سەرەرای هەبوونا مافێ كوردان بۆ سەربخوەییا ئێكگرتنا نەتەوەیی بەلێ د ڤێ قۆناغێدا، هیچ درووشمەكێ سەربخوەیێ ل پارچەیێن كوردستانێ یێ واقعی نینە، بەلێ ب هێزكرنا مافێن گەلێ كورد ل دستوورێ سووریێ وئیراقێ و گەهشتن ب ئارمانجا باش د ناڤبەرا كوردێن باكوور و دەولەتا توركیا یا گرنگە».