پەیڤدارێ ئەنجوومەنێ نشتیمانی یێ کوردی ل سووریێ دیار دکەت، پێدڤیە کورد د ئاڤاکرنا سووریا نوو دا پشکدار بن و هەرێما کوردستانێ رۆلەک سەرەکی بۆ پاراستنا رۆژئاڤایێ کوردستانێ دگێریت و کارێن باش بۆ ئێکەتیا کوردان ل سووریێ هاتیە کرن.

فەیسەل یوسف پەیڤدارێ ئەنجوومەنێ نشتیمانی یێ کوردی ل سووریێ دیار کر، سەرۆکێ هەرێما کوردستانێ بەرێز نێچیرڤان بارزانی رۆلەک گەلەک مەزن بۆ ئێکەتیا ناڤمالیا کوردی ل رۆژئاڤایێ کوردستانێ دگێریت و خەباتێن بۆ ئێکەتیا کوردان ل رۆژئاڤایێ کوردستانێ ب رەنگەکێ باش هەتا نها ژی بەردەوامن و گۆت: (بابەتێ سووریێ گەلەک جودایە، چونکی د ئاستێ نێڤدەولەتی و هەرێمی دا هەر وەلاتەک ل سووریێ کار بۆ بەرژەوەندیێن خوە دکەت و بێگومان وەکو کورد مە دڤێت ئەم د ئاڤاکرنا سووریا نوو دا پشکدار بین، ئانکو ببینە شریک د رێڤەبرنا سووریێ دا، وەلاتێ سووریێ تنێ یێ عەرەبان نینە).
ناڤهاتی ئەو یەک ژی دیار کر دڤێت کورد و هەموو پێکهاتیێن دی یێن ل سووریێ د رێڤەبرنا سووریێ دا پشکدار بن و ژ بەر ڤێ یەکێ ژی گرنگە سیستەمێ سووریێ ببیتە فیدرالی، چونکی ئێدی کەس نەشێت سووریێ وەکو بەری نها برێڤە ببەت و فیدرالی باشترین سیستەمە بۆ سووریێ و گۆت: (مە بەری نها ژی داخواز کریە کو دستوورەک نوو بۆ سووریێ بهێتە نڤیسین و دڤێت ناڤ ژی ببیتە کۆمارا سووریێ نە یا عەرەبی، چونکی سووریێ یا هەموو پێکهاتەیێن ل سووریێ یە و ژ بەر ڤێ یەکێ ژی پێدڤیا سووریێ ب دستوورەک نوو و دیموکراتی هەیە کو ببیتە ژێدەرێ چارەسەریا هەموو پرسێن نها یێن ل سووریێ).
پەیڤدارێ ئەنجوومەنێ نشتیمانی یێ کوردی ل سووریێ د بەردەوامیا ئاخڤتنا خوە دا سوپاسیا رۆلێ هەرێما کوردستانێ ژی کر کو د مەرجێن گەلەک زەحمەت دا خەلکێ هەرێما کوردستانێ ب هەموو شیانێن خوە هاریکاریا برایێن خوە ل رۆژئاڤایێ کوردستانێ کرن و ئەو ب تنێ نەهێلن و ئەو یەک ژی گەلەک یا گرنگە و گۆت: (ب تایبەتی ژی دەزگەهێ خێرخوازیێ بارزانی گەلەک هاریکاریا خەلکێ مە ل رۆژئاڤایێ کوردستانێ کر و هەتا نها ژی هاریکاریا خەلکێ مە دهێتە کرن).
ناڤهاتی د دووماهیا ئاخڤتنا خوە دا ئەو یەک ژی نەڤەشارت کو پێدڤیا سووریێ ب سیستەمەک نوو هەیە، پرسێن ل سووریێ هەتا نها ژی نەهاتینە چارەسەرکرن، دەستێوەردانێن دەرەکی ژی بووینە پشکەک ژ ئاستەنگان، لێ هەر چاوا بیت دڤێت دەستهەلاتا نها یا سووریێ هەست ب بەرپرسیاریا خوە بکەت و پرسێن هەی چارەسەر بکەت و گۆت: (سیستەمێ نها یێ سووریێ نەشێت ببیتە بەرسڤا پرسێن هەی، ژ بەر ڤێ یەکێ ژی مە دڤێت سیستەمێ سووریێ ببیتە فیدرالی و مافێ کوردانە کو دەڤەرێن خوە برێڤە ببەن و گرنگە د دستوورێ نوو یێ سووریێ دا ئاماژە ب ڤێ یەکێ ژی بهێتە کرن).

ب هەلكەفتا هاتنا سەرێ سالا نوو یا مشەختی (1448)، سەرۆك مەسعود بارزانی، نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێما كوردستانێ، د پەیامێن جودا دا گەرمترین پیرۆزباهی ئاراستەی تەڤایا خووشك و برایێن موسلمان ل كوردستانێ، ئیراقێ و جیهانێ كرن.
د وان پەیامان دا، سەرۆك بارزانی، سەرۆكێ هەرێمێ و سەرۆكێ حوكمەتا هەرێمێ هیڤی خواستن ئەڤ هەلكەفتا پیرۆز ببیتە رێخۆشكەر بۆ ئاشتی، تەبایی و ئارامییا بەردەوام بۆ دەڤەرێ و تەڤایا مرۆڤایەتیێ. هەروەسا ژ خودایێ مەزن و مێهرەبان نزاكار بوون كو سالا نوو یا مشەختی ببیتە سالا خێر و خۆشگوزەرانیێ بۆ هەموو ئالییان.

ل رۆژا سێشەمبی 16/6/2026، ل پیرمام، سەرۆك مەسعود بارزانی پێشوازی ل بالیۆز تۆم باراک، هنارتیێ تایبەتێ سەرۆكێ ئەمریكا بۆ كاروبارێن ئیراقێ و سووریێ كر.
بارەگەهێ بارزانی د بەیاننامەیەكێ دا بەلاڤكر» د دیدارێ دا، هنارتیێ تایبەتێ سەرۆكێ ئەمریكا، سەرەرای گەهاندنا سلاڤێن سەرۆك ترەمپی ب سەرۆك بارزانی، خۆشحالییا خۆ ب دیتنا سەرۆك بارزانی نیشادا و پێزانین بۆ رۆل و پێگەهێ سەرۆك بارزانی ل ئارامییا ئیراقێ و دەڤەرێ هەبوو. هەروەسا دوپاتی ل وێ چەندێ كر كو ئیراق و دەڤەر پێدڤی ب ئارامیێ نە و د ڤێ چەندێ دا، هەرێما كوردستانێ رۆلەكێ گرنگ و جهێ گرنگیێ ل نوكە و پاشەڕۆژێ دا هەیە. دیسان حێبەتییا خۆ ب گەشەكرن و پێشكەفتنا هەرێما كوردستانێ دەربڕی و ب نموونەیی هەژمارت.
بارەگەهێ بارزانی دیاركر ژی» سەرۆك بارزانی دوپاتكر كو هەرێما كوردستانێ هەردەم فاكتەرێ ئارامیێ بوویە و ل گەل دیالۆگ و چارەسەرییا دیپلۆماسی بوویە بۆ هەموو كێشەیێن ئیراقێ و دەڤەرێ. هەرێما كوردستانێ نەبوویە پشكەك ژ كێشەیان، بەلێ ب ناهەقی چریسكێن شەڕ و ناكۆكییێن دەڤەرێ بەركەفتییە. سەرۆك بارزانی ئەو ژی بەرچاڤكر كو پێدڤییە رۆژهەلاتا ناڤین ب رەوشەكا ئارام و خۆشگوزەران بۆ ئاكنجیێن خۆ بچیت».
د تەوەرەكێ دی یێ دیدارێ دا، باسێ گرنگییا پێكڤەكاركرنێ و هەماهەنگییا هەرێما كوردستانێ و حوكمەتا نوو یا ئیراقێ هاتە كرن. هنارتیێ تایبەتێ ئەمریكا باس ل پێدڤییا ئارامكرن و پاراستنا سیستەمێ سیاسی یێ ئیراقێ و پاراستنا رۆلێ دەولەتێ ل كۆنترۆلكرنا هێزێن چەكدارێن نەفەرمی كر و پشتەڤانییا خۆ بۆ سەرۆك وەزیرێن ئیراقێ دوپاتكر د پرۆسەیا دامالینا چەكی ژ دەستێ میلیشیایان و هاتنەڤە بۆ بن دەسەلاتا دەولەتا ئیراقێ.
سەبارەت ب حوكمەتا نوو یا ئیراقێ، سەرۆك بارزانی سەرەرای دوپاتكرنێ ل سەر پشتەڤانیكرنا عەلی ئەلزەیدی، دیاركر كو پێدڤییە هەموو ئالی پەندێ ژ شاشیێن بۆری وەرگرن و ل سەر بنەمایێ هەڤپشكییا راستەقینە، هەڤسەنگیێ و ل هەڤهاتنێ د چارچۆڤەیا دەستووری دا كار بكەن.
د پشكەكا دی یا دیدارێ دا، بیروڕا ل دۆر بارودۆخ و هەڤكێشەیێن دەڤەرێ هاتنە لێكگۆهارتن و هەردو ئالی ل سەر وێ چەندێ هەڤڕا بوون كو پێكڤە كاركرن ل سەر كۆمەكا ئەولەویەتێن هەڤپشك بكەن ژ بۆ ئارامییا ئیراق و هەرێما كوردستانێ و ئاڤاكرنا دۆستایەتییا ستراتیژییا درێژخایەن د بوارێن ئابۆری و وەبەرهێنانێ دا.

ل رۆژا سێشەمبی 16/6/ 2026، نێچیرڤان بارزانی، سەرۆكێ هەرێما كوردستانێ، كۆمبوونەكا هەڤپشك ل گەل تۆم باراک، هنارتیێ تایبەتێ دۆنالد ترەمپ، سەرۆكێ ئەمریكا بۆ كاروبارێن ئیراقێ و سووریێ، و مەزلووم عەبدی، فەرماندەیێ گشتی یێ هێزێن سووریای دیموكرات (هەسەدە) ئەنجام دا.
سەرۆكاتییا هەرێما كوردستانێ د بەیاننامەیەكێ دا بەلاڤكر» د كۆمبوونێ دا، دووماهی پێشهاتێن سیاسی و ئەمنی یێن دەڤەرێ و رەوشا سووریێ و هاریكارییا كوردان و دیمەشقێ هاتنە گەنگەشەكرن. هنارتیێ تایبەتێ سەرۆكێ ئەمریكا دوپاتی ل سەر بەردەوامییا پشتەڤانییا وەلاتێ خۆ كر بۆ پاراستنا ئارامیێ و دیتنا چارەسەریێن گونجای بۆ كێشەیێن سووریێ».
سەرۆكاتییا هەرێمێ د بەیاننامەیا خۆدا دیاركر « نێچیرڤان بارزانی، سەرۆكێ هەرێما كوردستانێ دوپات كر كو دانوستاندن و تێكگەهشتنا د ناڤبەرا ئالییان دا و پاراستنا مافێن كوردان و پێكهاتەیان ل سووریێ، رێكا چارەسەركرنا كێشەیانە. هەروەسا هاریكاری و پشتەڤانییا هەرێما كوردستانێ بۆ چارەسەركرنا كێشەیان و پاراستنا ئاسایش و ئارامیێ نیشا دا».
پێشڤەبرنا هاریكاری و هەماهەنگییا هەڤپشك ژ بۆ بەرهنگاربوونا مەترسیێن تیرۆرێ و پەیداكرنا ئاسایش و ئارامییەكا بنەجه ل دەڤەرێ، تەوەرەكێ دی یێ كۆمبوونێ بوو.

ل رۆژا سێشەمبی 16/6/2026، نێچیرڤان بارزانی، سەرۆكێ هەرێما كوردستانێ، ل گەل مەزلووم عەبدی، فەرماندەیێ گشتی یێ هێزێن سووریا دیموكرات (هەسەدە) كۆمبوو.
سەرۆكاتییا هەرێما كوردستانێ د بەیاننامەیەكێ دا بەلاڤكر»د كۆمبوونێ دا، دوماهی پێشهاتێن سیاسی و ئەمنی یێن سووریێ و دەڤەرێ، رەوشا كوردان و پێكهاتەیاان ل وی وەلاتی، بزاڤێن چارەسەركرنا كێشەیان، تێكگەهشتنا د ناڤبەرا ئالیێن كوردی دا و هەماهەنگی و هاریكارییا ل گەل دیمەشقێ هاتنە گەنگەشەكرن».
سەرۆكاتییا هەرێما كوردستانێ دیاركر ژی»هەردو ئالییان دوپاتی ل سەر گرنگییا بەردەوامییا دیالۆگێ، پاراستنا ئارامیێ و دابینكرنا ئاشتیێ ل دەڤەرێ كرن. هەروەسا بەرهنگاربوونا مەترسیێن تیرۆرێ و گەشەپێدانا هەماهەنگیێ ژ بۆ پاراستنا ئارامیێ، تەوەرەكێ دی یێ كۆمبوونێ بوو».

سەرۆكێ هەرێما كوردستانێ ل گەل هنارتیێ تایبەتێ دۆنالد ترەمپی بۆ كاروبارێن ئیراقێ و سووریێ كۆمبوو. هنارتیێ تایبەتێ ترەمپی «پشتەڤانییا بهێز یا وەلاتێ خۆ بۆ حوكمەتا نوو یا ئیراقێ دوپات كر»، هەردو ئالی ژی ل سەر «گرنگییا كۆنترۆلكرنا چەكی ل بن دەسەلاتا دەولەتێ» ئێك دەنگ بوون.
ل رۆژا سێشەمبی 16/6/2026، نێچیرڤان بارزانی، سەرۆكێ هەرێما كوردستانێ پێشوازی ل تۆم باراک، هنارتیێ تایبەتێ دۆنالد ترەمپ، سەرۆكێ ئەمریكا بۆ كاروبارێن ئیراقێ و سووریێ كر.
د كۆمبوونێ دا، ل گۆرەی بەیاننامەیا سەرۆكاتییا هەرێما كوردستانێ، «پەیوەندیێن ئەمریكا ل گەل ئیراقێ و هەرێما كوردستانێ هاتنە گەنگەشەكرن. د ڤی واری دا، هنارتیێ تایبەتێ سەرۆكێ ئەمریكا پشتەڤانییا بهێز یا وەلاتێ خۆ بۆ حوكمەتا نوو یا ئیراقێ دوپات كر، هەروەسا هەردو ئالی ل سەر گرنگییا كۆنترۆلكرنا چەكی ل بن دەسەلاتا دەولەتێ ئێك دەنگ بوون».
ژ ئالیێ خۆڤە، نێچیرڤان بارزانی «دوپاتی ل سەر پشتەڤانییا هەرێما كوردستانێ بۆ حوكمەتا عەلی ئەلزەیدی و چارەسەركرنا كێشەیێن ئیراقێ، ب تایبەتی كێشەیێن هەلاویستی یێن د ناڤبەرا هەرێما كوردستانێ و حوكمەتا فیدرال دا، ل سەر بنەمایێ دەستووری كر».
هەروەسا نێچیرڤان بارزانی د هەژمارا خۆ یا فەرمی دا ل تورا جڤاكییا ئێكس دا ل دۆر كۆمبوونێ نڤیسییە: «مە گەنگەشە ل دۆر بهێزكرنا پەیوەندیێن دوو ئالی، دوماهی گوهۆڕینێن دەڤەرێ، گرنگییا بەردەوامبوونا هاریكاری و دانوستاندنان بۆ گەشەپێدانا ئارامیێ و خۆشگوزەرانیێ ل دەڤەرێ كر. پێگیریبوونا ئیراقێ و هەرێما كوردستانێ ب هەڤپشكییەكا بهێز ل گەل ئەمریكا دوپات كر».
ل گۆرەی بەیاننامەیا سەرۆكاتیا هەرێما كوردستانێ، «هەردو ئالی هەڤڕا بوون ل سەر گرنگییا گوهۆڕینا شێوازێ پەیوەندیێن د ناڤبەرا ئەمریكا و ئیراقێ دا بۆ هەڤپشكییەكا ئاب‌وری یا هەڤسەنگ و درێژخایەن، ب شێوەكێ كو خزمەتا بەرژەوەندیێن بلند یێن هەردو ئالییان بكەت».
دوماهی پێشهاتێن دەڤەرێ، رەوشا ناڤخۆیا هەرێما كوردستانێ و پەیوەندیێن هەولێرێ و بەغدایێ، تەوەرەكێ دی یێ كۆمبوونێ بوون، «تێدا رێككەفتنا د ناڤبەرا ئەمریكا و ئیرانێ بلند هەلسەنگاندن بۆ ب دوماهیئینانا شەڕی و هیڤی خواستن ببیتە ئەگەرێ پەیداكرنا ئاشتی و ئارامیێ ل دەڤەرێ».

مەسرور بارزانی، سەرۆكێ حوكمەتا هەرێما كوردستانێ ل گەل تۆم باراک، هنارتیێ تایبەتێ سەرۆكێ ئەمریكا بۆ ئیراقێ و سووریێ، دوپاتی ل سەر گرنگییا كاركرنا پەرلەمانێ كوردستانێ، پێكئینانا كابینەیا نوو یا حوكمەتا هەرێمێ و ب دوماهیئینانا قەیرانا سیاسی ل نێزیكترین دەم كرن.
ل رۆژا سێشەمبی، 16/6/2026، مەسرور بارزانی، سەرۆكێ حوكمەتا هەرێما كوردستانێ، پێشوازی ل شاندەكێ ئەمریكی ب سەرۆكاتییا بالیۆز تۆم باراک، هنارتیێ تایبەتێ سەرۆكێ ئەمریكا بۆ ئیراقێ و سووریێ و بالیۆزێ ئەمریكا ل توركیا كر.
د كۆمبوونێ دا، كو جۆشوا هاریس، رێڤەبەرێ كارێن بالیۆزخانەیا ئەمریكا ل بەغدا و جەنەرال كێڤن لامبێرت، فەرماندەیێ گشتی یێ هێزێن هەڤپەیمانان ل ئیراقێ و سووریێ بەرهەڤ بوون، رەوشا گشتی یا هەرێما كوردستانێ، ئیراقێ و دەڤەرێ هاتنە گەنگەشەكرن.
سەرۆكێ حوكمەتا هەرێمێ سوپاس و پێزانینێن هەرێما كوردستانێ بۆ هاریكاری و پشتەڤانییا بەردەوام یا ئەمریكا هەبوون و دوپاتی ل سەر گرنگییا بهێزتركرنا پەیوەندیێن دوو ئالی دبوارێن جودا دا كر.
بالیۆز تۆم باراکی، ل گەل بلند هەلسەنگاندا كاروانێ پێشكەفتن و ئاڤەدانییا هەرێما كوردستانێ، ئاماژە ب وێ دا كو سەرۆك ترەمپی رێزەكا تایبەت بۆ گەلێ كورد و هەرێما كوردستانێ و سەركردایەتییا سەرۆك مەسعود بارزانی هەیە.
هەردو ئالی هەڤڕا بوون ل سەر گرنگییا گەشەپێدانا پتر یا پەیوەندیێن بازرگانی د ناڤبەرا ئەمریكا، ئیراقێ و هەرێما كوردستانێ دا و چالاككرنا پتر یا كۆمپانیێن ئەمریكی ل ئیراقێ و هەرێمێ، ب تایبەتی د بوارێ وزەیێ دا.
هەردو ئالییان دوپاتی ل سەر پێدڤییا پشتەڤانیكرنا حوكمەتا نوو یا فیدرال ب سەرۆكاتییا عەلی ئەلزەیدی كر، ژ بۆ گەشەپێدانا ئابۆری و خزمەتكرنا هەموو وەلاتی و پێكهاتەیێن ئیراقێ ب وەكهەڤی و بێ جوداهی، هەروەسا چارەسەركرنا كێشەیان ل گەل هەرێما كوردستانێ ل سەر بنەمایێ دەستووری.
هەروەسا هەردو ئالی هەڤڕا بوون ل سەر گرنگییا كاركرنا پەرلەمانێ كوردستانێ، پێكئینانا كابینەیا نوو یا حوكمەتا هەرێمێ و ب دوماهیئینانا قەیرانا سیاسی ل نێزیكترین دەم.

مەسرور بارزانی، سەرۆكێ حوكمەتا هەرێما كوردستانێ، پشتی دیدارا خۆ ل گەل شاندێ ئەمریكی ب سەرۆكاتییا تۆم بەراكی، هنارتیێ تایبەتێ ترەمپی بۆ كاروبارێن ئیراقێ و سووریێ بۆ رۆژنامەڤانان راگەهاند: «مە كۆمبوونەكا گەلەك باش هەبوو، تێدا باسێ هەموو بابەتان هاتە كرن كو بۆ هەرێما كوردستانێ و ئیراقێ گرنگن. هەروەسا باسێ چەوانییا هەماهەنگی و كاركرنێ ل گەل حوكمەتا عەلی ئەلزەیدی هاتە كرن، ب مەرەما باشتركرنا رەوشا ئابۆری و ئەمنی ل دەڤەرێ».
سەرۆكێ حوكمەتا هەرێمێ ئاماژە ب وێ ژی دا كو تەوەرەكێ دی یێ كۆمبوونێ تایبەت بوو ب پەیوەندیێن دوو ئالی یێن هەرێما كوردستانێ و ئیراقێ ل گەل ئەمریكا، ب تایبەتی ژی زێدەتركرنا وەبەرهێنانا كۆمپانیێن ئەمریكی ل هەرێما كوردستانێ كو دێ هاریكار بیت بۆ ب هێزكرنا ئابۆرییا ئیراقێ.
ل دۆر پێكئینانا حوكمەتا هەرێما كوردستانێ، مەسرور بارزانی دوپاتی ل سەر وێ چەندێ كر كو پێنگاڤا ئێكێ یا پێكئینانێ، كاراكرنا پەرلەمانی یە و گۆت: «ئەڤە كارەكێ گەلەك گرنگە، هەتا نوكە پەرلەمان نەهاتییە كاراكرن. ئەم ژ رۆژا ئێكێ ڤە ل گەل وێ یەكێ بووین، پەرلەمان مولكێ هەموو خەلكێ هەرێما كوردستانێ یە، یێ هیچ حیزبەكا سیاسی نینە. چو كەس ژی بۆ وی نینە رێگریێ ل كاراكرنا پەرلەمانی بكەت».
مەسرور بارزانی گۆت ژی: «پەرلەمان جهێ وێ یەكێ یە، هەكە بیروبۆچوونێن جودا ژی هەبن، ل وێرێ گەنگەشە ل سەر بهێنە كرن. هەكە پەرلەمان هاتە كاراكرن، دێ پاشی ئاخڤتنێن پێدڤی ل دۆر پێكئینانا حوكمەتا هەرێما كوردستانێ هێنە كرن».
سەبارەت ب رێككەفتنا ئەمریكا و ئیرانێ ژی؛ سەرۆكوەزیرێ هەرێما كوردستانێ دوپات كر: «ئەم هەمیشە دگەل ئاشتیێ بووینە، هەر رێككەفتنەكا كو دەڤەرێ بەر ب ئاشتی و سەقامگیریێ ببەت، ئەم پێشوازیێ لێ دكەین».

د رێورەسمەكێ ژ هەژی دا، سەرۆك مەسعود بارزانی ، بارەگەهێ نوو یێ لقێ ئێكێ پارتی دیموكراتی كوردستان ل باژێڕێ دهوكێ ڤەكر.
ل دەستپێكا سەرەدانێ، سەرۆك بارزانی، ئاڤاهیێ نوو یێ لقێ ب فەرمی ڤەكر و پاشی ل گەل بەرپرس و كارگێر و بەرپرسێن ناڤچێن لقێ كۆمبوو و پیرۆزباهییا بارەگەهێ نوو ل وان كر، و ژ نێزیكڤە ئاگەهداری رەوشا كار و چالاكیێن لقێ بوو.
هەروەسا د هەمان رێورەسم دا، سەرۆك بارزانی پێشانگەها «پانوراما چالاكیێن لقێ ئێك» ڤەكر كو د ڤێ پێشانگەهێ دا، دیرۆكا پڕ شكۆیا لقێ ئێك و قۆناغێن جودایێن خەباتا وێ ب رێیا وێنە، بەلگەنامە و دۆكیۆمێنتان هاتبوونە نیشادان، كو دیتنەكا بەرفرەهـ ل سەر رۆلێ لقێ ل دەڤەرێ دایە.
سەرۆك بارزانی د پەیڤەكێ دا، دەستخۆشی ل بەرپرس و هەموو كارگێر و كادرێن لقێ ئێك كر بۆ وان بزاڤێن بەردەوام یێن دكەن ژ پێخەمەت خزمەتكرنا ئاخ و خەلكێ دەڤەرێ و پاراستنا بنەمایێن نیشتیمانی و ئایدیۆلۆژییا پارتی و بجهئینانا ئەركێن نەتەوەیی و ئەو راسپاردن كو بەردەوام د ناڤا جەماوەرێ دەڤەرێ دا بن و خزمەتا خەلكێ شەرەفمەندێ دهۆكێ و سێمێلێ بكەن.

سەرۆك مەسعود بارزانی پێشوازی ل محەمەد حاجی مەحموود، سەرۆكێ پارتا سۆسیال دیموكراتا كوردستان كر.
د دیدارێ دا هەردو ئالییان ل دۆر پێشهاتێن ئیراقێ، دەڤەرێ و رەوشا ناڤخۆیا هەرێما كوردستانێ گەنگەشە كر.