ئه‌ڤرۆ:

سه‌رۆك مه‌سعود بارزانی، ل سالیادا حه‌فتێ یا جینوسایدا شنگالێ راگه‌هاند، شنگال برینه‌كا كویره‌ ل سه‌ر له‌شێ گه‌لێ كوردستانێ و ئازاره‌كه‌ چو جاران ژبیرا كوردستانیان ناچیت.

سه‌رۆك بارزانی د په‌یاما خوه‌دا ئاماژه‌ ب وێ چه‌ندێ كر، باش دزانین ل ده‌مێ هێرشا تیرۆرستان بۆ سه‌ر كوردستانێ، ئێزدی ژبه‌ر كوردبوون و بیروباوه‌رێن وان یێن ئاینی كه‌فتنه‌ به‌ر هه‌وێن بێویژدانانا یێن تاوانبارێن داعشێ و هاتنه‌ جینوسایدكرن.

ئاماژه‌كر ژی، ئه‌و تاوانێن داعشێ ل ده‌ڤه‌را شنگالێ ئه‌نجامداین، درێژه‌پێده‌رێن وان زنجیره‌ جینوساید و كۆمه‌لكوژی و تاوانان بوو، كو ب درێژیا دیرۆكی دژی گه‌لێ كوردستانێ هاتینه‌ ئه‌نجامدان.

ده‌قێ په‌یاما سه‌رۆك بارزانی

شنگال برینه‌كا كویره‌ ل سه‌ر له‌شێ گه‌لێ كوردستانێ و ئه‌وا تیرۆرستێن داعشێ به‌ری حه‌ف سالان دژی خوشك و برایێ نمه‌ یێن ئێزدی ئه‌نجامدای، ئازاره‌كه‌ چو جاران ژ بیرا كوردستانیان ناچیت، ئه‌م باش دزانین ل ده‌مێ هێرشا تیرۆرستان بۆ سه‌ر كوردستانێ، ئێزدی ژ به‌ر كوردبوون و بیروباوه‌رێن وان یێن ئاینی كه‌فتنه‌ به‌ر هه‌وێن بێویژدانیا تاوانبارێن داعشێ وهاتنه‌ جینوسایدكرن، ئه‌و تاوانا داعشێ ژی ل ده‌ڤه‌را شنگالێ ئه‌نجامدای، درێژه‌پێده‌را وان زنجیره‌ جینوساید و كۆمه‌رلكوژی وتاوانان بوو، كو ب درێژیا دیرۆكێ دژی گه‌لێ كوردستانێ هاتینه‌ ئه‌نجامدان.

ل سالیادا حه‌فتێ یا وێ كاره‌ساتێ، سلاڤان بۆ گیانێ شه‌هید و قوربانیێن وێ تاوانێ دهنێرین و ب رێز یادا وان پێشمه‌رگێن قه‌هره‌مان دكه‌ین، كو بۆ ئازادكرنا چیایێ شنگالێ و باژێرێ شنگالێ خوینا خوه‌ به‌خشی و سه‌رێ داعشا درنده‌ خستیه‌ بن پێیێن خوشك و برایێن مه‌ یێن ئێزدی و تۆلا وێ نه‌حه‌قیێ و سته‌مێ ژ تیرۆرستان ڤه‌كری.

جهێ داخیێ یه‌ ژی پشتی ده‌ربازبوونا حه‌فت سالان ب سه‌ر وێ كاره‌ساتێ دا هێشتا ئێش و ئازارێن ئێزدیان هه‌ر دبه‌رده‌وامن، شنگال یا دده‌ستێ هژماره‌كا هێز و چه‌كداران دا، كو هیچ په‌یوه‌ندی ب به‌رژه‌وه‌ندیا شنگالێ و ئێزدیان ڤه‌ نینه‌، هه‌ر ئه‌و ژی رێگربوون ل زڤرینا خه‌لكی و ئاڤه‌دانكرنا شنگالێ. ل ڤێرێ بۆ خوشك و برایێن ئێزدی وێ چه‌ندێ دووپات دكه‌م، كو ب هه‌موو شیانێن خوه‌ ل گه‌ل داخوازی و ئازارێن وانم، داخوازێ ژی وان دكه‌م دناڤخوه‌یا خوه‌ دا د ئێكرێز بن و ئومێد ل ده‌ف هه‌بیت و پشت راست ژی دكه‌ مكو هه‌ر تشته‌كێ ل سه‌ر بنه‌مایێ سته‌مێ و خوه‌سه‌پاندنێ بیت، ل دووماهیێ دێ هه‌ر به‌ر ب نه‌مانێ چیت و ئه‌و ره‌وشا نه‌ ئاسایی و نه‌ قانوونی یا نوكه‌ د شنگالێ دا هه‌ی، هه‌ر یا به‌رده‌وام نابیت و پێدڤیه‌ خوشك و برایێ نمه‌ یێن ئێزدی ب سه‌ربلندی بزڤرن بۆ سه‌ر مال و حالێ خوه‌.

ئه‌ڤرۆ:

شیره‌تكارێ سه‌رۆكێ حوكمه‌تا هه‌رێما كوردستانێ بۆ كاروبارێن ئێزدیان، به‌حس ل ره‌وشا شنگالێ و ژیان و گوزه‌رانیا خه‌لكێ وێ دكه‌ت و ئاشكرا دكه‌ت، هه‌كه‌ رێككه‌فتنا شنگالێ هاتبا بجهئینان، ره‌وشا كوردێن ئێزدی دا باشتر بیت.

ل 3 ته‌باخا 2021، تیرۆرستێن داعشێ شنگال داگیركر و تاوانا جینوسایدێ به‌رامبه‌ر كوردێن ئێزدی ئه‌نجامدا، پاشی هه‌رچه‌نده‌ شنگال ژلایێ پێشمه‌رگه‌ی و ب سه‌رپه‌رشتیا راسته‌وخوه‌ یا سه‌رۆك بارزانی هاته‌ ئازادكرن، به‌لێ pkk ره‌وشا روودانێن 16 ئه‌وكتۆبه‌رێ ب ده‌لیڤه‌ زانی و ب رێككه‌فتن ل گه‌ل میلیشیێن حه‌شدا شه‌عبی، ده‌ست ب سه‌ر ده‌ڤه‌رێ دا گرت.

ل رۆژا 10/10/2020 حوكمه‌تا ئیراقێ و هه‌رێما كوردستانێ، ل پیناڤی ڤه‌گه‌راندنا ئێمناهیێ و سه‌قامگیریێ و ئاساییكرنا ره‌وشا شنگالێ، رێككه‌فتنه‌ك ئیمزاكربوو، به‌لێ هه‌تا نوكه‌ ئه‌و رێككه‌فتنه‌ نه‌كه‌فتیه‌ د وارێ بجهئینانێ دا.

ل دۆر ڤێ چه‌ندێ، شێخ شامۆ، شیره‌تكارێ سه‌رۆكێ حوكمه‌تا هه‌رێما كوردستانێ بۆ كاروبارێن ئێزدیان گۆت” مخابن گرۆپێن دناڤ شنگالێ دا هه‌لگرێن هزرێن هه‌رێمایه‌تی نه‌ و كارێ بۆ وێ چه‌ندێ دكه‌ن رێككه‌فتن نه‌هێته‌ بجهئینان، كو د ناڤبه‌را هه‌ردو حوكمه‌تێن هه‌رێمێ و به‌غدا هاتیه‌ كرن، بۆ ئاساییكرنا ره‌وشا شنگالێ”.

گۆت ژی” ئه‌جیندایه‌كا هه‌رێمی یا هه‌ی كو ئه‌و رێككه‌فتنه‌ نه‌هێته‌ بجهئینان، چونكی شنگال یا بوویه‌ جهێ ئه‌جیندایێن هه‌رێمایه‌تی، به‌لێ ئه‌و رێككه‌فتن دێ ئارامیێ په‌یداكه‌ت و خه‌لكێ شنگالێ دێ زڤرینیت، ئه‌و گرۆپێن شنگال كریه‌ مۆلگێ سیخوریێ بۆ ده‌ڤه‌رێ، ئه‌ڤه‌ ژی مه‌ترسیه‌كا مه‌زنه‌ ل سه‌ر كوردستانێ و ئیراقێ ژی”.

شێخ شامۆ دووپات كر ژی” تاكه‌ چاره‌سه‌ری بۆ شنگالێ، بجهئینانا رێككه‌فتنا هه‌ولێر و به‌غدایه‌ ل دۆر وی باژێری، چونكی وێ رێككه‌فتنێ پشته‌ڤانیا نێڤده‌وله‌تی یا هه‌ی، ب تایبه‌ت ئه‌مریكا و نه‌ته‌وێن ئێكگرتی، ژ بلی وێ چه‌ندێ، ل ئاستێ هه‌رسێ سه‌رۆكایه‌تیێن كوردستانێ، سه‌رۆكایه‌تیا هه‌رێمێ و یا حوكمه‌تێ و یا په‌رله‌مانی، بزاڤێن جدی هاتینه‌ كرن ل گه‌ل مێهڤانێن جیهانی ژی، كو سه‌ره‌دانا هه‌رێما كوردستانێ دكه‌ن،  به‌حسێ ڤێ پرسێ بكه‌ن و جیهانێ لێ تێبگه‌هینن”.

شیره‌تكارێ سه‌رۆكێ حوكمه‌تا هه‌رێما كوردستانێ بۆ كاروبارێن ئێزدیان، رۆهنكر ژی” یا گرنگ ئه‌وه‌، هێزێن چه‌كدار ل شنگالێ نه‌مینن  و باژێر راده‌ستی ئیدارا مه‌ده‌نی بهێته‌ كرن، نوكه‌ شنگال یا بوویه‌ جهێ ب ده‌هان گرۆپێن چه‌كدار و بێ ناسنامه‌، ب تایبه‌تی چیایێ شنگالێ وه‌كو جهێ كۆمبوون و قاچاخچیه‌تا ئه‌جندایه‌كا هه‌رێمایه‌تی دهێته‌ بكارئینان و شنگالی ب هیچ شێوه‌كی نه‌شێن بچنه‌ وی چیای، گرۆپێن pkk ژی ل وێرێ ل سه‌ر ئه‌جیندایه‌كا ده‌ره‌كی كاری بۆ تێكدانا ره‌وشا شنگالێ دكه‌ن و ژ به‌ر وان ئاڤه‌دانی بۆ شنگالێ نه‌چوویه‌ و وان ره‌وشه‌كا پر مه‌ترسی ب سه‌ر شنگالێ دا ئینایه‌”.

ئه‌ڤرۆ:

قایمقامێ قه‌زا شنگالێ ره‌خنه‌ ل جڤاتا نوونه‌رێن ئیراقێ گرت كو هه‌تا نوكه‌ كۆمه‌لكوژیا ئێزدیان ب جینوساید نه‌هژمارتیه‌ و راگه‌هاند كو حوكمه‌تا ئیراقێ ژی هه‌تا نوكه‌ هیچ بزاڤه‌ك بۆ قه‌ره‌بووكرنا ئێزدیان و ئاڤه‌دانكرنا شنگالێ نه‌كریه‌.

مه‌حما خه‌لیل، قایمقامێ شنگالێ گۆت” سه‌ره‌رای وێ چه‌ندێ شنگال ل چریا دویێ 2015 ژ تیرۆرستێن داعشێ هاتیه‌ ئازادكرن، به‌لێ هێشتا شوونوارێن وێرانكاری ب 85% ل سه‌نته‌ر قه‌زایێ و ده‌وروبه‌رێن وێ یێن ماین، هه‌روه‌سا هه‌شت هزار و 150 خانی ل شنگالێ و ده‌وروبه‌رێن وێ یێن هاتینه‌ وێرانكرن”.

قایمقامێ شنگالێ ئاماژه‌ ب وێ چه‌ندێ ژی كر كو ژ ئه‌گه‌رێ هێرشا تیرۆرستێن داعشێ ل سه‌ر شنگالێ ل ته‌باخا 2014، هزار و 292 كه‌س هاتنه‌ كوشتن و شه‌ش هزار و 417 كه‌س ژی هاتنه‌ ره‌ڤاندن و هه‌تا نوكه‌ سێ هزار و 530 ئێزدی ژده‌ستێ داعشێ یێن هاتینه‌ ئازادكرن”.

خویاكر ژی” یا جهێ دلته‌نگیێ ئه‌وه‌ سه‌ره‌رای كو هه‌ر ئێك ژ په‌رله‌مانێ كوردستانێ، جڤاتا نوونه‌رێن ئه‌مریكا، په‌رله‌مانێ بریتانیا، په‌رله‌مانێ ئورۆپی، په‌رله‌مانێ ئه‌رمینیا ، په‌رله‌مانێ سكوتلاندا، په‌رله‌مانێ ئوسترالیا، په‌رله‌مانێ پورتۆگال، په‌رله‌مانێ به‌لجیكا، په‌رله‌مانێ هولاندا و په‌رله‌مانێ فره‌نسا، كۆمه‌لكوژیا ئێزدیان ب جینوساید هژمارتیه‌، به‌لێ هه‌تا نوكه‌ جڤاتا نوونه‌رێن ئیراقێ ئه‌و كۆمه‌لكوژیه‌ ب جینوساید نه‌هژمارتیه‌ و حوكمه‌تا ئیراقێ هه‌تا نوكه‌ هیچ بزاڤه‌ك ژی بۆ قه‌ره‌بووكرنا ئێزدیان و ئاڤه‌دانكرنا شنگالێ نه‌كریه‌”.

قایمقامێ شنگالێ داخواز ژ حوكمه‌تا ئیراقێ كر كو سه‌قایه‌كێ گونجای بۆ ڤه‌گه‌راندنا ئاوارێن ئێزدی و دووباره‌ ئاڤه‌دانكرنا شنگالێ په‌یداكه‌ت و بزاڤێن جدی بۆ ئارمانجا لێگه‌ریان و دیتنا ره‌ڤاندیێن ئێزدی بكه‌ تكو هه‌تا نوكه‌ چاره‌نڤیسێ وان یێ دیار نینه‌، هه‌روه‌سا داخوازێ ژ حوكمه‌تا ئیراقێ دكه‌ین بزاڤێن خوه‌ بۆ ژناڤبرنا شانێن نڤستی یێن داعشێ كو ل ده‌وروبه‌رێن شنگالێ خوه‌ حه‌شاردایه‌، زێده‌تر بكه‌ت، هه‌روه‌سا دووماهیێ ب هه‌بوونا گرۆپێن چه‌كداری یێن ژ ده‌رڤه‌ی قانوونێ و pkk  ل شنگالێ بینیت و قانوونێ ل شنگالێ ب سه‌پینیت، ب تایبه‌تی هه‌بوونا pkk ل شنگالێ بوویه‌ جهێ نه‌ سه‌قامگیریێ و رێگرتنێ ل ڤه‌گه‌راندنا ئاواران بۆ جهێن خوه‌”.

ناڤبری دووپاتی ل سه‌ر وێ چه‌ندێ كر كو ب بجهئینانا وێ رێككه‌فتنا د ناڤبه‌را حوكمه‌تا ئیراقی و حوكمه‌تا هه‌رێما كوردستانێ هاتیه‌ ئیمزاكرن، دێ ره‌وشا شنگالێ ئاسایی بیت.

ئه‌ڤرۆ:

دوهی 1/8/2021 مه‌حموود محه‌مه‌د ئه‌ندامێ مه‌كته‌با سیاسی و به‌رپرسێ ده‌زگه‌هێ ره‌وشه‌نبیری و راگه‌هاندنێ یێ پارتی دیموكراتی كوردستان، پێشوازی ل (ئه‌راكاوا میكیهیرۆ) كونسۆلێ وه‌لاتێ ژابۆنێ ل هه‌ولێرێ كر.

مه‌حموود محه‌مه‌د د وێ دیدارێ دا به‌حسێ راگه‌هاندنا پارتی و رۆلێ كه‌نالێن راگه‌هاندنێ یێن پارتی د گه‌هاندنا په‌یاما پارتی دیموكراتی كوردستان سه‌باره‌ت هه‌ر روودان و پێشهاته‌كێ و شێوێ كارێ ئۆرگانێن راگه‌هاندنا پارتی ب به‌راورد ل گه‌ل راگه‌هاندنا حزبێن سیاسی یێن دی و راگه‌هاندنا سه‌ربخوه‌ كر.

ل دۆر رێككه‌فتنا ستراتیژی د ناڤبه‌را ئیراقێ و ئه‌مریكا دا و هه‌لویستێ پارتی دیموكراتی كوردستان، مه‌حموود محه‌مه‌د ئاماژه‌ ب بۆچوونا فه‌رمی یا پارتی دیموكراتی كوردستان كر كو ب رێیا به‌یاننامه‌یه‌كا مه‌كته‌با سیاسی یا پارتی خوه‌شحالیا خوه‌ دیاركر سه‌باره‌ت وێ رێَككه‌فتنێ چونكی ب دیتنا پارتی هێشتا گه‌فێن مه‌زن ل سه‌ر ئیراقێ یێن هه‌ین و ئه‌مریكا دشێت رۆله‌كێ مه‌زن هه‌بیت د هاریكاریا ئیراقێ داب ۆ به‌رهنگاریا وان گه‌فان، پاشی به‌حسێ ره‌وشا نوكه‌ یا ئیراقێ و هه‌لبژارتنێن پێشوه‌خت یێن ئیراقێ كر و ئاماژه‌ كر كو پارتی دیموكراتی كوردستان ل گه‌ل ئه‌نجامدانا وان هه‌لبژارتنان دایه‌ و به‌رهه‌ڤیێن دروست یێن بۆ كرین، هه‌روه‌سا به‌حسێ هه‌لبژارتنێن جڤاتێن پارێزگه‌هێن ئیراقێ كر كو بریاره‌ ل سالا داهاتی بهێنه‌ ئه‌نجامدان.

ل درێژیا دانوستاندنێن د ناڤبه‌را هه‌ردولا، به‌حسێ خواستا چاره‌سه‌ركرنا كێشێن ئیراقێ ب گشتی و كێشا هه‌رێما كوردستانێ ب تایبه‌تی ژ لایێ حوكمه‌تێن ئیراقێ ڤه‌، كو ب درێژیا دیرۆكا دامه‌زراندنا ئیراقێ و پشتی نه‌ماما رژێما به‌عس ژی ئه‌و كێشه‌ نه‌هاتینه‌ چاره‌سه‌ركرن.

ئه‌ندامێ مه‌كته‌با سیاسی و به‌رپرسێ ده‌زگه‌هێ ره‌وشه‌نبیری و راگه‌هاندا پارتی ئاماژه‌ ب پشكداریا سه‌ركردایه‌تیا سیاسی یا كوردستانێ و سه‌رۆك مه‌سعود بارزانی د دارێشتنا دستوورێ به‌رده‌وام یێ ئیراقێ ل سالا 2003 و بزاڤ و هه‌لویستێ پارتی دیموكراتی كوردستان كر سه‌باره‌ت چاره‌سه‌ركرنا كێشان د ناڤبه‌را به‌غدا و هه‌ولێرێ دا ب گۆره‌ی دستوورێ ئیراقێ و په‌یداكرنا ره‌وشه‌كا سیاسی بۆ ئیراقێ كو به‌رسڤا خواستێن ئیراقیان بیت و تێدا مافێن گه‌لێ كوردستانێ ژی د پاراستی بن.

ئه‌ڤرۆ:

پارتێن باكورێ كوردستانێ دیار دكه‌ن كو هێرشا ڤێ دووماهیێ یا ل باژێرێ كۆنیا نیشا دده‌ت كو ده‌ستێ ده‌ستهه‌لاتا نها د ڤان هێرشان دا هه‌یه‌، ده‌ستهه‌لات راستیا روودانێ بۆ خه‌لكی ئاشكرا ناكه‌ت و به‌ری نها ژی گه‌له‌ك روودانێن وه‌سا روو داینه‌ لێ به‌رپرسێن وان روودانان نه‌هاتینه‌ ده‌سته‌سه‌ر كرن.

پارتێن كوردی یێن باكورێ كوردستانێ د داخۆیانیه‌كێ دا دیار دكه‌ن كو هێرشا ل باژێرێ كۆنیا كو د ئه‌نجام دا حه‌فت وه‌لاتیێن كورد هاتنه‌ كوشتن نیشا دده‌ت كو ده‌ستهه‌لاتا نها به‌رپرسه‌ ژ كوشتنا كوردان، چونكو به‌ری نها ژی گه‌له‌ك روودانێن وه‌سا روو داینه‌ لێ هه‌تا نها ژی به‌رپرسێن وان روودانان نه‌هاتینه‌ ئاشكرا كرن، ئه‌و یه‌ك ژی نیشا دده‌ت كو ده‌ستهه‌لاتا نها به‌رپرسه‌ ژ كوشتنا كوردان و دڤێت راستیا روودانا كۆنیا بۆ رایا گشتی بهێته‌ ئاشكرا كرن و به‌رپرسێن روودانێ ژی بگه‌هنه‌ سزایێن خوه‌.

ل ئالیێ دی هشیار ئۆزالپ په‌یڤدارێ پارتی دیموكراتی كوردستان/ باكور ژی راگه‌هاند كو هێرشا ل باژێرێ كۆنیا نیشا دده‌ت كو مه‌ترسی ل سه‌ر ژیانا هه‌موو كوردان ل توركیا هه‌یه‌، چونكو به‌ری نها گه‌له‌ك روودانێن وه‌سا ل توركیا روو داینه‌، گه‌له‌ك وه‌لاتیێن كورد د چه‌ند سالێن بۆری دا هاتنه‌ كوشتن و هه‌تا نها ژی به‌رپرسێن وان روودانان نه‌هاتنه‌ ئاشكرا كرن، نه‌هاتنه‌ سزا دان، ئه‌و یه‌ك ژی نیشا دده‌ت كو كوشتنا كوردان ب ده‌ستێ هنده‌ك نه‌ته‌وه‌په‌رستان ژ ئالیێ ده‌وله‌تێ ڤه‌ دهێته‌ كرن ئانكۆ ده‌وله‌تا توركیا پێ خوه‌شه‌ رۆژانه‌ كورد بهێنه‌ كوشتن.

ناڤهاتی هه‌روه‌سا دیار كر كو هێرشێن نه‌ته‌وه‌په‌رستێن تورك ل دژی كوردان ل توركیا رۆژ ب رۆژێ زێده‌تر لێ دهێت، نه‌ته‌په‌رستان پشتی كوشتنا حه‌فت وه‌لاتیێن كورد درووشم ل دژی كوردان بلند كرن و دیار كرن كو ڤێرێ جهێ كوردان نینه‌ و نابیت ئێك كورد ژی ل كۆنیا بژیت، داخۆیانیا به‌رپرسێن توركیا ژی ل هه‌مبه‌ر روودانێ گه‌له‌ك نه‌رم بوو و ئه‌و یه‌ك ژی نیشا دده‌ت كو به‌رپرسێ سه‌ره‌كی یێ كوشتنا كوردان ل توركیا ده‌ستهه‌لاتا توركیا یه‌ و ده‌ستهه‌لات رێ ژی ناده‌ت كو كورد ل هه‌مبه‌ر هه‌ر هێرشه‌كێ خوه‌ ب پارێزن، ژ به‌ر هندێ ژی ئه‌ز دبێژم كو مه‌ترسی ل سه‌ر ژیانا هه‌موو كوردان ل توركیا هه‌یه‌.

چاڤدێرێن سیاسی یێن توركیا و باكورێ كوردستانێ ژی دیار دكه‌ن كو هه‌كه‌ ده‌ستهه‌لاتا ئاكپارتیێ د زووترین ده‌م دا به‌رپرسیارێن روودانا كۆنیا ئاشكرا نه‌كه‌ت و وان راده‌ستی دادگه‌هێ نه‌كه‌ت دێ ره‌وش گه‌له‌ك ئالۆزتر لێ هێت، چونكو د ماوه‌یێ حه‌فتیه‌كێ دا ل چه‌ندین باژێرێن توركیا هێرشی كوردان هاتیه‌ كرن و ده‌ستهه‌لاتا توركیا ل هه‌مبه‌ر كوشتنا كوردان بێ هه‌لویست مایه‌، وی ده‌می كورد ژی دێ نه‌چار بن كو به‌ره‌ڤانیێ ژ خوه‌ بكه‌ن، ئه‌و یه‌ك دێ توركیا تووشی قه‌یرانه‌كا مه‌زن كه‌ت، دڤێت وه‌زاره‌تا ناڤخوه‌ و ئالیێن په‌یوه‌ندیدار د زووترین ده‌م دا به‌رپرسێن هێرشا دووماهیێ راده‌ستی دادگه‌هێ بكه‌ن دا ئه‌و كه‌سه‌ بهێنه‌ سزادان.

چاڤدێرێن سیاسی دیار ژی دكه‌ن كو داخۆیانیا سلێمان سویلو وه‌زیرێ ناڤخوه‌ یێ توركیا د جهێ خوه‌ دا نه‌بوو و پتر بۆ ڤه‌شارتنا هنده‌ك راستیان بوو، ژ به‌ر هندێ ژی دڤێت ده‌وله‌ت ب ئه‌ركێ خوه‌ رابیت، دڤێت ده‌وله‌تا نها هه‌موو وه‌لاتیێن خوه‌ بپارێزیت و چو جوداهیه‌كێ دا ناڤبه‌را كوردان و توركان دا نه‌كه‌ت، چونكو ئه‌و یه‌ك دێ بیته‌ ئه‌گه‌رێ روودانا ئالۆزیێن گه‌له‌ك مه‌زن، ژ به‌ر كو نها ره‌وشا ناڤخوه‌یی یا توركیا ژی گه‌له‌ك خرابه‌.