ئەڤرۆ نیوز:
نێچیرڤان بارزانی سەرۆکێ هەرێما کوردستانێ پێشوازی ل هانس ئاکەربووم کونسولێ گشتی یێ وەلاتێ هۆلەندا ل هەرێما کوردستانێ کر و نێچیرڤان بارزانی راگەهاند کو هەرێما کوردستانێ دشێت مفای ژ ئەزموونا سەرکەفتی یا وەلاتێ هۆلەندا د بیاڤێ چاندنیێ دا وەربگریت، و ل هەمبەر دا کونسولێ گشتی یێ وەلاتێ هۆلەندا ژی راگەهاند کو نها پەیوەندیێن هۆلەندا و هەرێما کوردستانێ د ئاستەکێ باش دانە و هۆلەندا بەرهەڤە پەیوەندیێن خوە ل گەل هەرێما کوردستانێ د هەموو بیاڤان دا باشتر لێ بکەت.
ئەڤرۆ نیوز، زنار تۆڤی:
ل سپێدەهیا ئه‌ڤرۆ ئێکشەمبی، 25/10/2020، (کاکە مەم فەخری سامی) یێ ناسیار ب كاكه مه‌م بۆتانی، سه‌رۆكێ ئێكەتیا نڤیسه‌رێن كوردستانێ وەغەر كر، ئەڤرۆ پشتی نیڤرۆ د ل گۆرستانا شێخ ئه‌حمه‌دی ل هه‌ولێرێ هێتە ڤەشارتن.
كاكه مه‌م بۆتانی، ل 10-1-1937 ل باژێرێ (کۆیە) ژ دایک بوویە، قۆناغێن خواندنا سه‌ره‌تایی ل گوندی هه‌رته‌لی خۆشناوه‌تی و باژێرێ كۆیێ و سلێمانیێ ته‌مام كرینه، خواندنا دویێ ناڤنجی ل كه‌ركووكێ خواندیە، خواندنا بلند ژی ل به‌غدا ته‌مام كریه.
كاكه‌مه‌م بۆتانی، ئێکەم چیرۆکا خوە ل سالا (1957) بەلاڤەکریە، ل سالا (1968) ب هاریکاریا هندەک ئەدیبێن کورد ل بەغدا، مژوولی دروستکرنا رێکخراوەکا ئەدەبی بوو، هەتا ل (10-2-1970) ب شێوەکێ فەرمی ئێکەتیا نڤیسەرێن کورد دامەزراند.
ل گەل چار ئەدیبێن گەنج بانگەوازیا (روانگە) بەلاڤکر، کو وەک رێبازەکا نوو یا ئەدەبێ کوردی دهێتە دیتن.
ل سالا (1971) دا ل گەل (30) ئەدیبان، دژی بیروباوەریا کەڤنەپەرست راوەستیان و پشگیریا سەربەستیا ژنان کر، بانگەوازیا (ئەی قەلەمێن نەترس ئێکبگرن ) بەلاڤکریه،
ل (1993) هەتا (2000) بۆ دەمێ حەفت سالان راوێژکارێ رووناکبیری بوو ل وەزارەتا رەوشەنبیری یا حوکمەتا هەرێما کوردستانێ.
ل سالا (2000) حوکمەتا (سوید) ئیقامە دا بوویێ، کاکەمەم سەرۆکێ ئێکەتیا نڤیسەرێن کورد و ئەندامێ ئێکەتیا ئەدیبێن سویدێ بوویە.
ئەڤرۆ نیوز:
بەری دەمەکێ د روودانەکا گرتنا کارەبێ دا ل سەنتەرێ ناحیا دێرەلۆکێ کەسەکێ گیانێ خوە ژ دەستدا.
ژێدەرەکێ ل نەخۆشخانا ئامێدیێ، بۆ ئەڤرۆ نیوز دیار کر: بەری دەمەکێ کەسەک گەهاندیە نەخۆشخانێ کو ژ ئەنجامێ گرتنا کارەبێ گیانێ خوە ژ دەست دایە و دیار کر: ناڤێ وی محەمەدە و ژ دایکبوویێ سالا ١٩٩٨٠ یە، ئاکنجیێ سەنتەرێ ناحیا دێرەلۆکێ یە.
ئاشکرا کر ژی: پشتی ڤەکۆلینێن دەستپێکی بۆ نۆشداریا داد ل ئامێدیێ هاتیە شاندن و تەرمێ وی رادەستی کەس و کارێن وی هاتیە کرن.
لدووڤ وان زانیاریێن ب دەست ئەڤرۆ نیوز کەفتین، ل دەمێ کارکرنێ ل سەر ئاڤاهیەکێ دو قاتی کارەبێ گرتیە و پشتی هنگێ د وی ئاڤاهیێ دوقات دا کەفتیە خوارێ و گیانێ خوە ژ دەست دایە.
ئەڤرۆ نیوز:
رێڤەبەریا خوەسەر یا رۆژئاڤایێ کوردستانێ د داخۆیانیەکێ دا راگەهاند د دەمەکێ دا کو ل هەموو جیهانێ بابەتێ کۆرۆنایێ بوویە ئاریشەکا مەزن و مەترسیێن وێ ل سەر مرۆڤاتیێ رۆژ ب رۆژێ زێدەتر لێ دهێن، تورکیا و هێزێن سەر ب وێ ب چەکێن گران هێرشی خەلکێ سڤیل یێ رۆژئاڤایی کوردستانێ ل عەین عیسا و دەوروبەرێن وێ دکەن.
رێڤەبەریا خوەسەر داخواز ژ جڤاکێ نێڤدەولەتی دکەت کو ل هەمبەر هێرشێن تورکیا و هێزێن سەر ب وێ ڤە بێدەنگ نەمینن.
ئەڤرۆ نیوز:
وەزارەتا ساخلەمیا هەرێما کوردستانێ راگەهاند کو د ماوەیێ ٢٤ دەمژمێرێن بۆری دا ٨٦٠ کەسێن دی ل هەرێما کوردستانێ تووشی کۆرۆنایێ بووینە و ٢٦ نەخوش ژی مرینە.
ل گۆر ئامارا وەزارەتا ساخلەمیێ ٤٥٤ نەخوشێن کۆرۆنایێ ژی ب تەمامی چارەسەر بووینە.
ل پارێزگەها دهۆکێ ژی ٣٨٣ کەسێن دی تووشی کۆرۆنایێ بووینە و ١١ نەخوش ژی مرینە، هەروەسا ٢٥٨ نەخوشێن کۆرۆنایێ ژی ل پارێزگەها دهۆکێ چارەسەر بووینە.
ئەڤرۆ نیوز:
دەزگەهێن راگەهاندنا ئیسرائیلێ دیار دکەن کو پشتی سودانێ راگەهاندی وان دڤێت پەیوەندیێن خوە ل گەل ئیسرائیلێ ئاسایی بکەن نها ژی ٥ وەلاتێن دی یێن عەرەبی بریار داینە کو پەیوەندیێن خوە ل گەل ئیسرائیلێ ئاسایی بکەن کو ئێک ژ وان ژی سعوودیێ یە.
لێ هەتا نها ژ بلی سعوودیێ ناڤێ چار وەلاتێن دی یێن عەرەبی نەهاتیە راگەهاندن.
ئەو یەک د دەمەکێ دایە کو هەتا نها ئیمارات، بەحرێن، ئوردن، سودان و مسرێ پەیوەندیێن خوە ل گەل ئیسرائیلێ ئاسایی کرینە.
ئه‌ڤرۆ نیوز، زنار تۆڤى:
ده‌سته‌یا ده‌سپاكیا عیراقى راگه‌هاندیه: دێ مووچێ وان په‌رله‌مانتار و به‌رپرسێن حكومى هێته راگرتن، ئه‌وێن قه‌بارێ مولك و سامانێ خوه ئاشكرا نه‌كرین.
رۆژناما سه‌باح یا عیراقى، ئه‌ڤرۆ شه‌مبیێ راگه‌هاندیه، ل سه‌ر داخوازیا ده‌سته‌یا ده‌ستپاكیێ مووچێ وان په‌رله‌مانتار و به‌رپرسێن ئه‌منى ناهێته خه‌رج كرن، یێن سامانێ خوه ئاشكرا نه‌كرین، هه‌ر چه‌نده 94% یا په‌رله‌مانتارێن عیراقى پابه‌ند بووینه ب ڤێ بریارێ.
ئه‌و ژى گۆتیه: هه‌ر ئێك ژ سه‌رۆكاتیا په‌رله‌مانى، سه‌رۆكاتیا جڤاتا وه‌زیران، وه‌زیر و جێگرێن وان، ئه‌ندامێن په‌رله‌مانى و ئه‌وێن د وان پله‌یان دا، سه‌رۆكێ جڤاتا بلند یا دادى، داواكارێ گشتى، سه‌رۆك و ئه‌ندامێن دادگه‌ها بلند یا فیدرالى لدووڤ قانوونا ده‌سته‌یا ده‌ستپاكیێ دڤێت سامانێ خوه ئاشكرا بكه‌ن.
موعته‌ز عه‌باسى، رێڤه‌به‌رێ خوه پارێزیێ ل ده‌سته‌یا ده‌ستپاكیێ گۆتیه: هه‌رسێ سه‌رۆكاتیان و هه‌موو وه‌زیران، ژ بلى وه‌زیرێ دارایى و په‌یوه‌ندیان سامانێ خوه ئاشكرا كریه، لیستا ناڤێن په‌رله‌مانتاران و به‌رپرسێن دیتر و وه‌زیران هاتینه هنارتن بۆ جهێن شۆله‌ژێ، داكو مووچێ وان بهێنه راگرتن، هه‌تا وى ده‌مێ زانیاریان دده‌نه ده‌سته‌یا ده‌ستپاكیێ، هه‌كه ئه‌و به‌رپرسه د به‌رده‌وام بن ژ ئاشكرا نه‌كرنا زانیاریان ده‌رباره‌ى سامانێ خوه، دێ ده‌سته‌یا ده‌ستپاكیێ رێكارێن تۆندتر ل دژى وان گرته‌به‌ر.
ئه‌ڤرۆ نیوز:
ئه‌ڤرۆ شه‌مبیێ، گۆره‌كێ ب كۆم یێ ژنێن كوردێن ئێزدى ل شنگالێ هاته هه‌لكۆلان، كو پێشبینى دهێته كرن رۆفاتێن زێده‌تر ژ 75 ژنێن كوردێن ئێزدى تێدا بیت، ئه‌ڤه ئێكه‌م گورێ ب كۆم یێن ژنێن كوردێن ئێزدى یى دهێته هه‌لدان.
رێوره‌سمه‌ك بۆ هه‌لدانا گۆرێن ب كۆم برێڤه دچیت و سوبه‌هى ئێكشه‌مبى دێ ده‌ست ب هه‌لدانا رۆفاتان هێته كرن، ئه‌و ژنێن د وى گۆرى دا ب كۆم هاتینه ڤه‌شارتن، ژیێ هه‌موویان د سه‌ر 40 سالیێ دایه و هه‌موو خه‌لكێ گوندێ كۆچۆ نه.
د وى رێوره‌سمى دا نوونه‌رێ سه‌رۆك وه‌زیرێن عیراقێ و نوونه‌رێ وه‌زراه‌تا شه‌هید و ئه‌نفالكریان یا هه‌رێما كوردستانێ، نوونه‌رێ ده‌سته‌یا ڤه‌كۆلینێ د به‌لگه‌نامێنتاوانێن شتگالێ ل هه‌رێما كوردستانێ و هژماره‌كا چ كه‌سوكارێن قوربانیان به‌رهه‌ڤ ببوون.
ئەڤرۆ نیوز، زنار تۆڤی:
موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: ل چیایێ پیرس یێ گرێدایی قەزا ئاکرێ ڤە، ئاگر بەربوو ترۆمبێلەکێ و ب تەمامی سۆت.
ناڤهاتی گۆت ژی: ئەڤرۆ ئەینیێ، ٢٣ چریا ئێکێ ٢٠٢٠، ل چیایێ پیرس ل ناحیا دینارتە یا گرێدایی قەزا ئاکرێ، ئاگر بەربوو ترۆمبێلەکێ ژ جۆرێ جێب تایبەت و ب تەمامی سۆتیە.
ئەو ژی دیار کریە: د وێ روودانێ دا چ زیانێن گیانی نەبووینە و لێ زیانێن مادی هەبووینە.
نيشاندان