ئەڤرۆ، ڤەگێر سەعدوللا:

بشار کیکی سەرۆکێ جڤاتا پارێزگەھا نەینەوا د ھەڤپەیڤینەکێ دا بۆ رۆژناما ئەڤرۆ دیار کر کو پلانەک بۆ رزگارکرنا مووسل یا ھەی و ھێزێن ھەڤپەیمانان، وەزارەتا بەرگریا عیراقێ، ھێزێن پێشمەرگەی و حوکمەتا خوەجھی یا پارێزگەھا نەینەوا تێدا د پشکدارن و گۆت”ھەماھەنگیەک ل گەل خەلکەکێ د ناڤ باژێری دا ژی یا ھەی و ل گەل گەلەک عەشیرەتان ژی و بەرھەڤیەکا دەرونی ژی ژلایێ گەلەک خەلکی ڤە یا ھەی و نێزیکی ٩٠% ژ خەلکێ مووسل چاڤەرێی نە کا دێ کەنگی دەرگەھەک بۆ رزگارکرنا مووسل ڤەبیت”.

ل دۆر وێ یەکێ کا ئایا خەلکێ مووسل دێ قەبوول کەت پێشمەرگە پشکداریێ د زرگارکرنا مووسل دا بکەت و د ناڤ مووسل دا بمینیت، بشار کیکی گۆت”خەلکێ مووسل و ئیدارا مووسل داخواز دکەت کو پێشمەرگە پشکداریێ د شەڕێ ئازادکرنا مووسل دا بکەت و خەلکێ مووسل دێ ھەبوونا پێشمەرگەی د ناڤ مووسل دا بۆ ھندەک جھێن تایبەت قەبوول کەت، لێ نەبوو دەمەکێ درێژ”.

ل دووڤ گۆتنێن بشار کیکی، ل دەف خەلکێ مووسل پێشمەرگە یێ پەسەندترە ژ (حەشد شەعبی) و لەشکرێ عیراقێ، ژ بەر کو خەلکێ مووسل دبێژیت دڤێت لەشکرێ عیراقێ و سەرکردایەتیا وی لەشکری ژ خەلکێ مووسل ب خوە بن.

د پشکەکا دی یا ئاخڤتنێن خوە دا کیکی گۆت”وەزیرێ بەرگریا عیراقێ سونەیە و خەلکێ مووسلە، سوزا دایە مە کو ھەماھەنگیەکا راستەوخوە ل گەل مە بکەت وەکو جڤاتا پارێزگەھا نەینەوا و حوکمەتا کوردستانێ بۆ دانانا ژۆرەکا ئۆپەراسیۆنان ل مووسل”.

بشار کیکی ئەو یەک ژی دیار کر کو چەند ھزار کەسەک یێن ھاتینە ئامادەکرن بۆ رزگارکرنا مووسل و ھندەک ژ وان ل جھێن جودا جودا یێن عیراقێ راھێنان یێن ب دووماھی ئیناین و گۆت” ل باشووری و بەغدا و ھەولێرێ راھێنان یێن ھاتینە کرن و نوکە سەربازگەھەک ل (دوبەردان) یێ ھەی یێ پۆلیسایە و ھەر کەسەکێ خەلکێ نەینەوا کو بەری نوکە پۆلیس بوویە یان ژ ھێزێن ئێمناھیێ یێن ناڤخوەیی، رێنما یێن دەرکەفتین کو پەیوەندیێ ب سەربازگەھەکا مەشقکرنێ بکەت دا کو بھێنە وەرگرتن و مەشق و راھێنانان بکەت و مووچێ خوە وەربگرن”.

ل دۆر وێ یەکێ کو ھندەک سەرکردێن سیاسی و شرۆڤەکارێن کورد دبێژن پێدڤیە پێشمەرگە ل دەرڤەی ئاخا کوردستانێ قوربانیان نەدەت و ناچێبیت پێشمەرگە بچیتە شەڕێ رزگارکرنا مووسل، بشار کیکی گۆت” ئێمناھیا مووسل پشکەکە ژ ئێمناھیا ھەرێمێ و بەری کەفتنا مووسل ب دو رۆژان من بۆ (رووداو) گۆت مووسل دێ کەڤیت و ھەکە پێشمەرگە ئالیێ چەپێ یێ مووسل نەپارێزیت، بارودۆخێ مووسل یێ تێکچوویە، دیارە پێشمەرگەی ئامادەی ھەبوو، لێ ھەرێمێ نەدڤیا راستەوخوە بھێت، بەلکو ھەرێمێ دڤیا ب رازیبوونا حوکمەتا بەغدا بھێت دا کو چارچۆڤەکێ قانوونی ھەبیت، نوکە مە وەکو خەلکێ پارێزگەھا نەینەوا و ئێمناھیا پارێزگەھا نەینەوا، بۆ ئێمناھیا پارێزگەھێ پێدڤی یا ب پێشمەرگەی ھەی، ژ مەخمورێ و ھەتا شنگالێ و دەشتا نەینەوا ب تایبەتی قەزا حەمدانیێ و تلکێفێ، ھەکە پێشمەرگە ل وان دەڤەران نەبیت کو دەشتەکا پان و بەرینە، یا ب زەحمەتە بھێتە کونترۆلکرن”.

کیکی ئەو یەک ژی دیار کر کو پێشمەرگە ب ساناھی ناچیتە د ناڤ مووسل دا، بەلکو پێدڤی ب رێککەفتنێ یە ل گەل حوکمەتا بەغدا و ھەروەسا دبیت پێدڤی ب رازیبوونا پەرلەمانێ کوردستانێ بیت کا چاوا پێشمەرگە چوویە کۆبانێ دشیاندایە بھێتە مووسل ژی، بەری نوکە ژی پێشمەرگە ل مووسل دا بوو، لێ ب رێککەفتن دەرکەفت و چەند بارودۆخێ کۆبانێ بۆ مە یا گرنگە، مووسل ژی وەسا یا گرنگە ژ بەر کو چەند بارودۆخێ مووسل تێکبچیت کاریگەریێ ل سەر رەوشا ئێمناھیا ھەرێمێ ژی دکەت، ژ بەر کو ھەرێمێ بەرژەوەندیێن گەلەک گرنگ ل گەل مووسل یێن ھەین، بەرژەوەندیێن ئابووری و پەترۆلێ و مادا١٤٠ لەوما دڤێت پەیوەندیێن مە د دومدرێژ بن و پێشمەرگە وەکو ھێزەکا فەرمی یا بەرھەڤ بیت بۆ بەرسینکگرتنا ھەر ھەوەکا توندرەویێ و بێگومان ھندی سنور ل گەل سووریێ د ڤەکری بن و ھندی قەیرانا سووریێ ب ڤی رەنگی بیت مەترسی یا ل سەر مووسل ژی ھەی و ئانکو مەترسی یا ل سەر کوردستانێ ژی ھەی. ئەو رۆژا مووسل کەفتی و بارەگاھێ پارێزگەھی َھاتیە گرتن من ب ئاشکرایی ل (رووداو) گۆت کو ئەڤ شەڤە دێ پارێزگەە کەڤیت و ئەڤە مەترسیە ل سەر ھەرێما کوردستانێ ژی و بۆ مەترسی ل سەر ھەرێما کوردستانێ، ژ بەر کو تو نەشێی رەفتارێ ل گەل جیرانەکێ تیرۆریست بکەی و ئەڤ جیرانە چ سنور و مەزھەبان نزانن و ھوڤن و بزاڤێ دکەن بچنە ھەموو جھان.

ل دۆر سەرەدانا وان یا ڤێ دووماھیێ بۆ بەغدا بشار کیکی گۆت”د ھەڤدیتنا مە دا ل گەل عەبادی ،مە دیت کو ئیرادەیکا رژد و پلانەک یا ھەی بۆ رزگارکرنا مووسل ب تمامی و عەبادی گۆت رزگارکرنا مووسل رزگارکرنا ھەموو عیراقێ یە و ھندی مووسل نەھێتە رزگارکرن، عیراق ژ داعش ناھێتە رزگارکرن. مە دیت کو عەبادی یێ ئامادەیە ئێمناھیا پارێزگەھان بکەتە د دەستێن پۆلیسان دا و لەشکر ژی دەوروبەرێن باژێران ب پارێزن و پشتبەستنەکا راستەوخوە ل سەر خەلکێ ڤان پارێزگەھان ب خوە بھێتە کرن و ب باشی بھێنە مەشقکرن و پرچەککرن و ھەروەسا رۆلەکێ باشتر ب حوکمەتێن خوەجھی بھێتە دان کو رۆلێ خوە ببینن د بادەکا ئێمناھیێ و مرۆڤایەتی دا”.

د پشکەکا دی یا ئاخڤتنێن خوەدا بشار کیکی گۆت”پتریا پەنابەرێن مووسل ئەون یێن کو د بنیات دا جھێ گرنگیا حوکمەتا کوردستانێ و پتریا وان دکەڤنە سنورێ مادا ١٤٠ و ب رەنگەکێ ژ رەنگان ئەڤ پەنابەرە دەنگدەرێن لیستا کوردستانی بووینە، لەوما ھەتا نوکە ژلایێ حوکمەتا عیراقێ و پارێزگارێ نەینەوا ڤە گرنگی ب وان پەنابەران نەھاتیە دان، بۆ نموونە ھەتا نوکە سەرۆک وەزیرێن عیراقێ نەھاتیە دھۆکێ سەرا پەنابەران بدەت و پارێزگارێ نەینەوا ب خوە ژی رەفتارەکا پێدڤی نەکریە، رەنگە ئەگەر ھەبن، لێ ب راستی ب شێوەکێ نەدادپەروەرانە رەفتار ل گەل ڤان پەنابەران ھاتیە کرن، ژ بەر کو پێکھاتێن نە موسلمان بوون و دەنگدەرێن لیستێن کوردی بوون. راستە پارێزگارێ نەینەوا ھەڤپەیمانێ مەیە و مە رێککەتنەکا ستراتیژی ل گەل یا ھەی و مە پێکڤە بریار یا دای کو مووسل رزگار بکەین و ئاڤەدان ژی بکەین، لێ ئەڤە گازندا منە ل سەر کو ئەوا پێدڤی بیت بۆ پەنابەران بکەت وەکو کەس نەکریە، بۆ نموونە ھەتا نوکە من نەدیتیە سەرەدانا ئێک کەمپ یان ئێک پەنابەر کر بیت”.

د بەردەوامیا ئاخڤتنێن خوە دا بشار کیکی گۆت”مە گۆتە ھەموو لایەنێن پەیوەندیدار ل بەغدا ھەکە ھەر گیروبوونەک بۆ رزگارکرنا مووسل بھێتە کرن ئەم قەبوول ناکەین و رەنگە پشتی ھنگی ئەم بزاڤێ بکەین راستەوخوە داخوازێ ژ ھێزێن ھەڤپەیمانان بکەین کو د ھەوارا مە بھێن و ھێزێن ئەردی ژی داخل بن و سەرۆکێ جڤاتا پارێزگەھا سەلاحەدین پەیوەندی یا ب من کری و یا گۆتی ئەم حەز دکەین ئەم و نەینەوا و ئەنبار رێککەفتنێ بکەین و کونگرەکێ چێ کەین ھەکە مە دیت حوکمەتا عیراقێ دێ گیروبیت د ڤی بابەتی دا ئەم ب خوە دێ داخوازێ ژ ئەمریکا کەین کو ھێزێن ئەردی بھێن بۆ رزگارکرنا ڤان ھەر سێ پارێزگەھان، ھەرچەندە حوکمەتا عیراقێ حەژ ڤێ چەندێ ناکەت، لێ ھەکە مە دیت د شیاندا نینە کو لەشکرێ عیراقێ بھێت ڤان دەڤەران ئازاد بکەت ئەم نەشێین بۆ دەمەکێ ڤەکری باژێرێن خوە بھێلینە د دەستێن داعش دا، ژ بەر کو داعش ئێدی یێ خەلکی و جە و شینواران خراب دکەت و یێ سیستەمێ خوە دسەپینیت و ئەڤە ناھێتە قەبوولکرن”.

ل دور وێ یەکێ کا دشیاندایە ھێزێن ئەمریکی بۆ رزگارکرنا موسل بھێ،ە د ناڤ عیراقێ دا، کیکی گۆت: (ئەڤە دەرگەھەکێ ڤەکریە، ژ بەر کو ھەکە لەشکرێ عیراقێ شیانێن پێدڤی نەبن بێگومان ئەم ژی دێ بۆ خو ل رێیەکێ گەرین).

ل دووڤ گۆتنێن بشار کیکی ھێشتا زوو بوو لەشکرێ ئەمریکی ژ عیراقێ دەرکەفتی ب تایبەتی بۆ موسل و ئەنبار ژ بەر کو حکوومەتا عیراقێ ھێشتا جھێ پێن خو نەدانابوون و ھێشتا خو ئامادەنەکربوو سنورێن خو ب پارێزیت، ئەمریکا ب ھەیڤێن دەستکرد سنور د پاراستن و نەدھێلا تیروریست دەرباز بن، و پشتی ئەمریکا عیراق بجە ھێلای عیراق بۆ پاریەکێ ب ساناھی بۆ تیروریستان.