ئەڤرۆ رۆژا چوارشەمبی رێکەفتی ٢٠٢١/٧/٢٨ د.عەلی تەتەر” پارێزگارێ دهۆکێ سەرپەرشتیا کۆمبوونا ژۆرا بەرهەنگاربوونا ڤایروسێ کرونایێ ل پارێزگەها دهۆکێ کر.
دکۆمبوونێدا ب بەرهەڤبوونا جێگرێ پارێزگاری و رێڤەبەرێن گشتی و لایەنێن پەیوەندیدار هەلسەنگاندن بۆ بلندبوونا رێژەیێن تووشبویێن کرونایێ ل پارێزگەها دهۆکێ کر و پارێزگارێ دهۆکێ راگەهاند بریارێن لژنا بلندا کرونایێ ل هەرێما کوردستانێ بو ماوێ حەفتیەکێ وەکی خو دێ هێنە جێبەجێکرن و بەردەوام ل دویڤ هەلسەنگاندنا رەوشێ بریارێن پێدڤی دێ هێنە دان.
پاشان دکۆنگرەکێ رۆژنامەڤانیدا هەر ئێک ژ پارێزگارێ دهۆکێ و رێڤەبەرێ گشتی یێ ساخلەمیا پارێزگەها دهۆکێ هوشداری ژ خرابتربوونا رەوشا تووشبوونێ ب کۆرۆنایێ دانە هاولاتیان و پارێزگارێ دهۆکێ راگەهاند: ئەگەر نەچار ببین، دێ قەدەغەیا هاتنوچوونێ راگەهینن.
هەروەسا پارێزگارێ دهۆکێ گوت: رەوشا کۆرۆنایێ ل ئیراقێ گەهشتیە هێلا سۆر و ل هەرێما کوردستانێ ژی نێزیکە بگەهیتە وێ هێلێ، لەورا پێدڤیە وەلاتی هاریکاریا حکومەتێ بکەن و پێگیریێ ب رێنمایێن لژنەیا بلندا بەرهنگاریا کۆرۆنایێ، وەزارەتا نافخۆ، وەزارەتا ساخلەمیێ، پارێزگەها دهۆکێ و هەروەسا ساخلەمیا پارێزگەها دهۆکێ بکەن.
پارێزگارێ دهۆکێ هەروەسا دیار کر: هەر کارێ پێدڤی بیت بۆ پاراستنا سەر و مالێ وەلاتیان ئەو دێ کەن و هەر بریارا پێدڤی بیت، دێ دەن و ئەگەر رەوش ژ نوکە خرابتر بوو، ئەو دێ نەچار بن بریارا قەدەغەیا هاتنوچوونێ دەن.
د. ئەفراسیاب مووسا، رێڤەبەرێ گشتیێ ساخلەمیا پارێزگەها دهۆکێ هوشداری ژ رەوشا خرابا کۆرۆنایێ ل پارێزگەهێ دان و راگەهاند: د 24 دەمژمێرێن بووری دا 1517 کەس ل دهۆکێ تووشی کۆرۆنایێ بووینە و 12 تووشبوویان ژیانا خۆ ژ دەست دایە و دوپات کر، پێدڤیە وەلاتی پێگیریێ ب رێنمایێن خۆپارێزیێ بکەن
نيشاندان