ئەڤرۆ نیوز:
رێکخراوا چاڤدێریا مافێن مرۆڤی یا سووریێ راگەهاند کو شەڤا بۆری گرۆپێن چەکدارێن سەر ب تورکیا ل گوندێ بیرنووح یێ سەر ب قەزا تلتەمرێ ٥ وەلاتیێن کورد رەڤاندن و هەتا نها ژی چارەنڤیسێ وان کەسان دیار نینە.
وەلاتیەکێ هەمان گوندی ژی دیار کریە کو گرۆپێن چەکدار گەف ل خەلکێ گوندی کرینە کو چو ئاریشان بۆ وان دروست نەکەن.
ئەڤرۆ نیوز، عەلی حاجی :
ئەڤرۆ ل روژا ئێکشەمبێ ب ئامادەبوونا هژمارەکا بەرپرسێن حزبی و حکومی و کەسایەتیێن دەڤەرێ ژ پێکهاتەیێن باژێرێ زاخۆ، د رێ و رەسمەکێ تایبەت دا مەترانەکێ نوو یێ کلدانان ل زاخۆ هاتە دانان پشتی کو بۆ دەما ١٠ سالان کورسیا مەترانێ کلدانان ل زاخۆ ڤالا مایی.
د داخویانیەکێ دا مەترانێ نوو یێ کلدانان فێلیکس سەعید الشابی بۆ دەزگایێن راگەهاندنێ گۆت: (پشتی هاتیمە دەستنیشان کرن ل جهێ مەتران رەبا قەس ل زاخۆ دێ هەمی هەولان مەزێخم پێخەمەتی وێ چەندێ ئەو پێکڤەژیانا ل زاخۆ هەی ئەم موکومتر لێ بکەین و هەر دیسان دگەل حکومەتا هەرێما کوردستانێ و حکومەتا خوەجهی هەمی دەمان ببینە کلیلێن چارەسەریا هەمی پرسگرێکان دناڤبەرا هەمی ئول و ئاینان ل زاخۆ ژ بەر کو باژێرێ زاخۆ ب باژێرێ پێکڤە ژیانێ دهێتە نیاسین و دێ وی ناڤێ ژی پارێزین).
ژلایێ خوەڤە عەلی عەونی بەرپرسێ لقا هەشت ل زاخۆ یا پارتی دیموکراتی کوردستان گۆت: (وەکو لقا هەشت دێ پشتەڤانێ مەترانێ نوو یێ ئەرمەنان بین ل زاخۆ ژ بەر کو ئێک ژ ئارمانجێن مە پاراستنا پێکڤەژیانێ یە ل زاخۆ و ئەوا د شیانێن مە دا بیت دێ ئەنجام دەین بۆ هەمی پێکهاتەیێن باژێرێ زاخۆ) .
ئەڤرۆ نیوز، زنار تۆڤی:
لێبرینا مووچێ فەرمانبەرێن هەرێما کوردستانێ هەتا چەند هەیڤێن دیتر دێ یا بەردەوام بیت، حوکمەتا هەرێما کوردستانێ دڤێت هەتا پەسەندکرنا بودجێ عیراقێ دێ 30 رۆژان جارەکێ 79% یا مووچەی دابەش کەت.
لدووڤ ژێدەرەکێ جڤاتا وەزیرێن هەرێمێ: لدووڤ وێ رێککەفتنا ل گەل عیراقێ هاتیە کرن، هنارتنا 320 ملیار دیناران هەتا پەسەندکرنا بودجێ گشتی دێ یا بەردەوام بیت، هەروەسا ڤرێکرنا بەشە بودجێ هەرێما کوردستانێ ژ بەغدا ڤە ل گەل داهاتێ نافخۆ یێ هەرێما کوردستانێ، حوکمەت هەیڤانە و 30 رۆژان جارەکێ دێ 79% یا مووچەی دەتە فەرمانبەران.
ئەڤرۆ نیوز، هۆشەنگ تاجر:
کەریم سالحی چاڤدێرێ سیاسی یێ رۆژهەلاتێ کوردستانێ بۆ ئەڤرۆ نیوز دیار کر کو رۆژانە ب سەدان گەنجێن کورد ل رۆژهەلاتێ کوردستانێ بەرێ خوە ددەنە ئورۆپا و کۆچبەر دبن و گۆت: (بێکاری و رەوشا خراب یا ژیانێ وەسا کریە کو گەنج نەچار بن بەرێ خوە بدەنە وەلاتەکێ دی).
ناڤهاتی راگەهاند کو رۆژانە کۆلبەر ل سەر سنوران دهێنە کوشتن، بێکاری رۆژ ب رۆژێ زێدەتر دبیت و گەنج ژ پاشەرۆژا خوە بێ هێڤی بووینە و نەچارن بەرێ خوە ددەنە ئورۆپا و ئەو یەک دێ مەترسیەکا خوە یا مەزن بۆ پاشەرۆژا کوردان ل ئیرانێ هەبیت.
ئەڤرۆ نیوز:
دەزگەهێن راگەهاندنا عیراقێ دیار کرن کو ئەڤرۆ محەمەد حەلبوسی سەرۆکێ پەرلەمانێ عیراقێ دێ سەرەدانا هەرێما کوردستانێ کەت و ل دۆر قانوونا هەلبژارتنان دێ ل گەل سەرکردێن سیاسی یێن هەرێما کوردستانێ دانوستاندنان کەت.
ل گۆر زانیاریان سەرەدانا حەلبوسی بۆ هندێ یە دا نێرینا کوردان ل دۆر هەلبژارتنێن پێشوەخت و قانوونا هەلبژارتنان وەربگریت.
ئەڤرۆ نیوز:
سەرۆک مەسعود بارزانی ژ بەر وەفاتا ئەندامێ بەرێ یێ سەرکردایەتیا پارتی و کەسایەتیێ ناڤدار عەلی سنجاری پەیامەکێ بەلاڤ دکەت، ئەڤە ژی دەقێ پەیاما سەرۆک بارزانی یە:
بەناوی خودای بەخشندە و میهرەبان
بە داخێكی زۆرەوە هەواڵی كۆچی دوایی سیاسەتمەدار و تێكۆشەری ناسراوی گەلەكەمان و ئەندامی پێشووی سەركردایەتیی پارتی دیموكراتی كوردستان (عەلی سنجاری)ـیمان بیست. خوالێخۆشبوو عەلی سنجاری بە درێژایی تەمەنی خەباتی سیاسیی خۆی لە شۆڕشی ئەیلوول و گوڵان و قۆناغی دوای ڕاپەڕیندا پێشمەرگە و كەسایەتییەكی خاوەن هەڵوێست و وەفادار بە ڕێبازی پارتی و كوردایەتی بوو. هەمیشە لە خەبات و تێكۆشانی سیاسی و جەماوەریدا ئەركەكانی دڵسۆزانە و ماندوونەناسانە بەجێ گەیاندووە و، لەدەستدانی خەسارەتێكی گەورەیە.
سەرەخۆشی لە خۆمان و خانەوادەی تێكۆشەری عەلی سنجاری و تەواوی دۆست و هەڤاڵانی دەكەم و خۆم بە هاوبەشی خەمیان دەزانم. لە خودای مەزن داواكارم خوالێخۆشبوو بە بەهەشتی بەرین شاد بكات و سەبر و ئارامیش بە هەموو لایەك ببەخشێت.
انا للە و انا الیە راجعون
مسعود بارزانی
6ـی ئەیلوولی 2020
ئه‌ڤرۆ نیوز:
لژنا دارایی ل په‌رله‌مانێ كوردستانێ بریار دا سه‌ره‌دانا خالێن توخیبی یێن هه‌رێمێ بكه‌ت، داخاز ژ حوكمه‌تێ كر چاكسازیێ د داهاتی ژی دا بكه‌ت.
زیاد جه‌باری سه‌رۆكێ لژنا دارای و ئابووری یا په‌رله‌مانێ كوردستانێ راگه‌هاند ژ سوبه‌هی وێڤه دێ لژنا دارایی سه‌ره‌دانا خالێن توخیبی یێن هه‌رێما كوردستانێ كه‌ت بۆ زانینا چه‌وانیا برێڤه‌چوونا كارێن وان ل ئه‌وان خالێن توخیبی، پاشی راپۆرته‌كێ ل سه‌ر ئه‌وێ پرسێ پێشكێشی سه‌رۆكاتیا په‌رله‌مانێ كوردستانێ كه‌ین.
سه‌رۆكێ لژنا دارای و ئابووری ل په‌رله‌مانێ كوردستانی ئه‌و چه‌نده ژی راگه‌هاند به‌ریا نها راپۆرته‌ك راسپارده‌و پێشنیار داینه حوكمه‌تا هه‌رێما كوردستانێ كۆ بۆ چه‌وانیا چاكسازیكرن ل داهات و داخاز ژ حوكمه‌تێ كر ژبلی مه‌زاختیان چاكسازیێ ل داهاتی ژی دا بكه‌ت.
ئه‌ڤرۆ نیوز:
وه‌زیرێ ساخله‌میا هه‌رێما كوردستانێ راگه‌هاند 574 توشبوویێن دی ل هه‌رێما كوردستانێ هاتنه توماركرن.
د.سامان به‌رزنجی وه‌زیرێ ساخله‌میا حوكمه‌تا هه‌رێما كوردستانێ راگه‌هاند د 24 ده‌مژمێرێن بوری دا 21 توشبویێن دی گیانێ خوه ژ ده‌ست داینه بڤی شیوه‌یێ خوارێ( 7 ل هه‌ولێرێ و 10 ل سلێمانیێ و 1 ل راپه‌رین و 2 ل دهۆكێ و 1 ل هه‌له‌بجه.
وه‌زیرێ ساخله‌میی ئه‌و چه‌نده ژی راگه‌هاند پرانیا توشبوویێن 24 ده‌مژمێرێن بوری ل توخیبێ پارێزگه‌ها دهۆكێ نه كۆ 336 كه‌س ل دهۆكێ وه‌ك هه‌لگرێ ڤایرۆسێ كورونایێ هاتینه توماركرن، جهێ داخی یه به‌لاڤبوونا كورونایێ ل دهۆكێ هوسا به‌ربه‌لاڤ بوو.
وه‌زیرێ ساخله‌میێ ئه‌و چه‌نده ژی دازانین ل 24 ده‌مژمێرێن بوری دا 299 توشبوویێن كورونایێ ل هه‌رێما كوردستانێ ساخ بووینه.
ئه‌ڤرۆ نیوز:
زانكۆیا ئه‌مریكی كوردستان ل دهۆكێ هه‌ڤكاریێن ساخله‌میێ پێشكێشی وه‌زاره‌تا ساخله‌میا حوكمه‌تا هه‌رێما كوردستانێ كرن، د. سامان به‌رزنجی وه‌زیرێ ساخله‌میێ راگه‌هاند ئه‌و هه‌ڤكاری دێ كارتێكرنه‌كا باش ل سه‌ر به‌رهنگاربوونا ڤایرۆسێ كورونایێ كه‌ت، چونكو پێدڤیێن رۆژانه بارگرانیه‌كا زۆره ل سه‌ر حوكمه‌تێ، زێده‌باری هه‌ڤكاریێن حوكمه‌تا هه‌رێمێ، هه‌ڤكاریێن رێكخراو و سازیان كارتیكرن هه‌‌بوویه د به‌رهنگاربوونا كورونایێ دا.
زانكۆیا ئه‌مریكی كوردستان ل دهۆكێ هه‌ڤكاریێن نوژداری ل دهۆكێ پارڤه‌كر بوون، ئه‌ڤێ جارێ هه‌ڤكاریێن نوژداری پێشكێشی وه‌زاره‌تا ساخله‌میا هه‌رێمێ كر بۆ ئه‌وێ چه‌ندێ هه‌رێم مفایی ژ ئه‌وان هه‌ڤكاریان ب بینیت، كۆ 183 كارتونێن هه‌ڤكاریێن نوژاری یێن جودا جودا بوون تایبه‌ت ب خوه پارێزرێ ژ كورونایێ.
نيشاندان