ئەڤرۆ نیوز:
دادگەها باژێرێ دیاربەکرێ ئەڤرۆ بریار دا کو ئۆسمان بایدەمیر ئەندامێ بەرێ یێ پەرلەمانێ تورکیا و سەرۆکێ باژێرڤانیا مەزن یا ئامەدێ ژ بەر ئەندامەتیا وی بۆ رێکخراوەکا نە قانوونی کو دژبەریا تورکیا کریە بهێتە زیندانکرن.
بریارا دادگەهێ بۆ وەزارەتا دادێ یا تورکیا هاتە هنارتن و بەرپرسەکێ وەزارەتا دادێ ژی دیار کریە کو نها ئۆسمان بایدەمیر ل بریتانیا دژیت و ئەو دی داخواز ژ وەلاتێ بریتانیا کەن کو ئۆسمان بایدەمیری رادەست بکەت.
ئەڤرۆ نیوز:
رەجەب تەیب ئەردۆگانێ سەرۆک کۆمارێ تورکیا راگەهاند کو ماکرۆنی دڤێت وەکو سەردەمێن بۆری دیسان گەلەک وەلاتێن رۆژهەلاتا ناڤین بکەتە ژێر کۆنترۆلا فرەنسا و ژ بەر هندێ ژی نها ب توندی دژبەریا تورکیا دکەت، لێ ئەو سەردەم ب سەر چوو.
سەرۆک کۆمارێ تورکیا راگەهاند ئەو شەری بۆ ئازادیا هەموو برایێن خوە ل سووریێ، لیبیا و دەڤەرێن دی دکەن و دیار کر هەکە تورکیا هێزێن خوە ژ سووریێ ڤەکێشیت ما دێ رەوشا سووریێ ئارام بیت؟
ئەردۆگانی دیار ژی کر بێی تورکیا دێ رەوش ل سووریێ، لیبیا و عیراقێ گەلەک ئالۆزتر لێ هێت و تورکیا دەستان ژ خەباتا خوە ل وان دەڤەران بەرنادەت.
ئەڤرۆ نیوز:
ل گۆر زانیاریان رۆژا ئێکشەمبیێ ٢٠/٩/٢٠٢٠ شاندەکێ هەڤپشک یێ وەزارەتێن دارایی و پلاندانان یێ حوکمەتا هەرێما کوردستانێ دێ سەرەدانا بەغدا کەن و ل دۆر پرۆژە بۆدجا سالا ٢٠٢٠ ل گەل وەزارەتا دارایی یا عیراقێ دەست ب دانوستاندنان کەن.
هەروەسا شاندێ هەرێمێ د پشکداریێ د دارێتنا بۆدجێ عیراقێ یێ هەر سێ سالێن ٢٠٢١،٢٠٢٢ و ٢٠٢٣ کەت دا پشکا هەرێمێ و شایستێن دارایی یێن هەرێما کوردستانێ تێدا بهێتە جێگرکرن.
ئەڤرۆ نیوز:
وەزارەتا ساخلەمیا هەرێما کوردستانێ ئامارا ٢٤ دەمژمێرێن بۆری یا کۆرۆنایێ ل هەرێما کوردستانێ بەلاڤکر کو تێدا هاتیە دیار کرن ل هەرێما کوردستانێ ٦٨٠ کەسێن دی تووشی کۆرۆنایێ بووینە و ٢٩ تووشبوو ژی مرینە.
ل گۆر ئامارا وەزارەتا ساخلەمیێ ٣٠٥ کەسێن دی ل پارێزگەها دهۆکێ تووشی کۆرۆنایێ بووینە کو دبیتە نێزیکی نیڤا تووشبوویان ل هەرێما کوردستانی و هەروەسا ل دهۆکێ ١٢ توشبوویێن دی ژی مرینە.
ئەڤرۆ نیوز، زنار تۆڤی:
تۆپخانا سۆپایێ تورکی گوندێ دوورێ ل ناحیا کانی ماسێ یێ سەر ب قەزا ئامێدیێ ڤە تۆپباران کریە و ژ ئەگەرێ وێ تۆپبارانێ ئاگر بەربوویە ئاقارێ وی گوندی.
سەربەست سەبری ئاکرەیی رێڤەبەرێ ناحیا کانی ماسێ، بۆ ئەڤرۆ نیوز دیار کر: ل دەمژمێر 12 نیڤرۆیا ئەڤرۆ پێنجشەمبی، 17.9.2020، تۆپخانا سۆپایێ تورکی دەردورا گوندێ دوورێ ل ناحیا کانی ماسێ بوردۆمان کریە، ژ ئەگەرێ وێ تۆپبارانی ئاگرەکێ مەزن بەربوویە ئاقارێ گوندێ دوورێ و هەتا نوکە ئاگری رێژەکا مەزن یا زەڤیان و دارستانێ سۆتیە و نوکە ئاگر یێ بەردەوامە.
ناڤهاتی گۆت ژی: هەر ل دەمێ ئاگر بەربوونێ پۆلیسێن دارستانێ و باژێرڤانیێ و خەلکێ گوندی، چووینە ئاگری بڤەمرینن، لێ هێشتا ئەو ئاگر نەهاتیە کونترۆل کرن.
ل ڤان حەفتیێن بوری، هەردو گوندێن راڤینا و ئۆرمانا و چەندێن جهێن دیتر ژ ئالیێ تۆپخانێن تورکی هاتبوونە تۆپباران کرن.
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا کەسەکێ وەغەر کر و دو یێن دیتر ژی بریندار بوون.
ناڤهاتی زێدەتر گۆت: ئەڤرۆ پێنجشەمبی، 2020/9/17 ل دەمژمێر (10:20) سپێدێ ل سەر جادە سەرەکیی یا دێرەبینێ و ل نێزیکی گوندێ کێلکێ دو ترۆمبێلان لێکدا، کو ترۆمبێلەکا تایبەت شوفرلێت ئۆپترا رەنگێ سپی، ل گەل ترۆمبێلەکا بارهەلگر تۆیۆتا ب رەنگێ سپی بوویە، د ئەنجامدا کەسەکێ وەغەر کر و دو کەسێن دیتر بریندار بووینە و زیانێن مادی یێن مەزن ب هەردو ترۆمبێلان کەفتینە و ترۆمبێلا بارهەلگر تۆیۆتا وەرگەریایە.
ئەڤرۆ نیوز ،عەلی حاجی :
بەرپرسێ راگەهاندنا ساخلەمیا زاخۆ بۆ ئەڤرۆ نیوز دیار کر د ماوەیێ ٢٤ دەمژمێرێن بوری دا ل سنورێ رێڤەبەریا ساخلەمیا زاخۆ ٣٨ کەس تووشی کورونایێ بون.
زێدەتر ئەمیر عەلی گۆت : ل دویف وان ئامارێن د ماوەیێ ٢٤ دەمژمێرێن بوری دا ل زاخۆ کو ل تاقیگەها تایبەت ب کورونایێ ڤە هاتینە تومار کرن ٣٨ کەس تووشی کورونایێ بون و چو حالەتێن گیان ژ دەست دانێ ب کورونایێ نەهاتینە توماکرن و رەوشا کورونایێ ل زاخۆ بەرەڤ مەترسیێ ڤە چوویە و هەتا نوکە نێزیکی ٩٠٠ کەسان ل زاخۆ تووشی کورونایێ بووینە و دهێتە چاڤەرێکرن ئەڤ رێژەیە زێدەتر بیت .
ئه‌ڤرۆ نیوز:
ئێكه‌تیا مامۆستایێن كوردستانێ ل هه‌ولێرێ كۆمبوونه‌كا ئاسایی سازكر و ئاماژه ب وێ چه‌ندێ دان پرۆسه‌یا خاندنێ و پاشكه‌تنا موچه‌ی و چه‌ند پێشنیاره‌ك ئێخستنه ری.
ئه‌حمه‌د گه‌رمیانی جێگرێ سه‌رۆكێ ئێكه‌تیا مامۆستایێن كوردستانێ، راگه‌هاند سێ هه‌یڤان جاره‌كی كۆمبوونا مه‌كته‌با ته‌نفیزیا ئیكه‌تیا مامۆستایێن كوردستانێ برێڤه دچیت، د ئه‌ڤێ كۆمبوونێ دا پرۆسه‌ی خاندنا سالا 2020-2021 گه‌نگه‌شه ل سه‌ر هاته‌كرن، وه‌ك ئێكه‌تیا مامۆستایێن كوردستانێ چه‌ند پێشنیاره‌ك مه هه‌نه بۆ پرۆسه‌یا خاندنێ یا ئیسال ب تایبه‌ت كۆ تێبینیا مه ل سه‌ر پرۆسه‌یا ته‌مامكاریێ ل خاندنا ب شیوه‌یێ ئه‌لكترۆنی و ئونلاین هه‌یه ئه‌م دوێ هزرێ داینه سیسته‌مێ ئونلاین ل هه‌رێما كوردستانێ گرفته‌كا زۆره ب وی شیوه‌یی ئاسان نینه.
ناڤبری ئه‌و چه‌نده ژی راگه‌هاند: ژ رۆوویێ ته‌كنیكی ڤه نه مامۆستای خۆل بۆ هاتینه ڤه‌كرن نه چ جهه‌كی پشكدار نه‌بوویه، له‌ورا له‌ورا زۆرا زه‌حمه‌ته، دڤێت به‌ریا نها به‌رهه‌ڤكاریێن باش بۆكربانه، هه‌تا روشه‌نبیریا وقوتابیان و كه‌سوكارێن وان رێكێ ناده‌ت بڤی شیوه‌یی پرۆسه برێڤه بچیت.
ناڤبری ئه‌و چه‌نده ژی دازانین كو د ئه‌ڤێ كۆمبوونێ دا دانوستاندن ل سه‌ر پاشكه‌ڤتنا مۆچه‌ی و پرۆسه‌یا په‌روه‌ردی كه‌ین، بێگۆمان دوماهیێ ژی چه‌ند پێشنیاره‌ك ده‌ركه‌ڤن كۆ ئاراسته‌ی حوكمه‌تا هه‌رێما كوردستانێ كه‌ین.
ئه‌ڤرۆ نیوز،بارزان مزوورى:
لوقمان سلێمان،به‌رپرسێ نڤیسینگه‌ها لالش بۆ ئه‌ڤرۆ نیوز گۆت: دوو سالا جاره‌كێ ب به‌شداریا جڤاتا رۆحانیا ئێزدیان و ئولدارۆ سه‌ره‌ده‌رێن هه‌موو مه‌زارا دگه‌ل سێ بنه‌مالێن ئێزدى رێوره‌سمێن په‌رى سواركرنێ ل په‌رستگه‌ها لالش دهێتە گێران،دڤێ رێوره‌سمێ دا په‌رى یێن شه‌ش قوبێن پیرۆز یێن ئێزدیان دهێنه گوهارتن و ئه‌و قوبا پیرۆز دهێتە نوێژه‌نكرن د سالێن كه‌ڤندا ب ئاخێ دهاتن نوێژه‌نكرن به‌لێ د نها دا ب حه‌لانى هاتینه نوێژه‌نكرن،
ناڤهاتى خویاكر د كه‌ڤندا ئه‌ڤ قوبێن پیرۆز یێن لالش ژلایێ سێ بنه‌مالێن ئێزدیان ڤه دهاتە نوێژه‌نكرن دبێژن وه‌ختێ شێخادى قه‌ستا لالش كرى ئه‌و بنه‌مال دگه‌ل هات بون له‌وما هه‌تا نها ئه‌و رێوره‌سمه ییێن ڤان بنه‌مالا ڤه گرێدایه ده‌ستپێكێ دێ دوو سه‌رێن په‌زێ كه‌نه خێر ل په‌رستگه‌ها لالش دیسان رێوره‌سم ب قه‌ولێن ئاینى دهێن گێران.
پیر خه‌لات ، ئێك ژ كه‌ساتیێن ئاینى یێن وان بنه‌مالا بۆ ئه‌ڤرۆ نیوز گوت :حه‌فتیه‌كێ به‌رى جه‌ژنا جه‌مایێ ئه‌ڤ رێوره‌سمه دهێت ئه‌نجام دان دڤێ رێوره‌سمێ دا شه‌ش قوبێن پیروز یێن په‌رستگه‌ها لالش دهێن نوێژه‌نكرن ب په‌ریا ژلایێ بنه‌مالا كنجوى ڤه د نها دا ئه‌و بنه‌مال بویه سێ بنه‌مال ،
ناڤهاتى خویاكر ئه‌ڤه زێده‌ترى سه‌د ساله ئه‌و بنه‌مال كارێ نوێژه‌نكرنا قوبێن لالش رادبن .
ئەڤرۆ نیوز:
سلێمان ئۆسۆ ئەندامێ جڤاتا سەرکردایەتیا ئەنجوومەنێ نشتیمانی یێ کوردی ل سووریێ راگەهاند کو کۆمبوونێن وان ل گەل تەڤدەمێ بەردەوام دکەن و گۆت: (شاندێ ئەمریکا ل رۆژئاڤایێ کوردستانێ پشکداریێ د پرانیا کۆمبوونان دا دکەن و ئەمریکا پێشنیازا خوە بۆ چارەسەریێ ژی ئاشکرا کریە).
ل دۆر پێشنیازا ئەمریکا ژی ناڤهاتی دیار کر کو ئەمریکا داخواز کریە جڤاتەک بۆ رۆژئاڤایێ کوردستانێ بهێتە ئاڤاکرن کو تێدا ٤٠% بۆ ئەنجوومەنێ نشتیمانی یێ کوردی و ٤٠% ژی بۆ تەڤدەمێ بیت و ٢٠% ژی بۆ پێکهاتێن دی یێن رۆژئاڤایێ کوردستانێ بیت.
نيشاندان