ئەڤرۆ نیوز، زنار تۆڤی:

ئەڤرۆ ئینیێ 14.8.2020، ل سنورێ ناحیا ئەترووش یا سەر ب قەزا شێخان ڤە، گەنجەکێ رۆژئاڤایێ کوردستانێ د ناڤ ئاڤێ دا خەندقی.

بێوار عەبدولعەزیز پەیڤدارێ رێڤەبەریا بەرەڤانیا باژێرێ ل پارێزگەها دھۆکێ، بۆ مالپەرێ ئەڤرۆ نیوز دیار کر: ل دەمژمێر ٤:٣٠ ئێڤاریا ئەڤرۆ ئەینیێ پەیوەندی ب یەکا کونترۆلا بەرەڤانیا باژێری ل دھۆکێ ھاتیە کرن، ب ھەبوونا روودانەکا خەندقینێ.

ناڤهاتی گۆت ژی: روودانا خەندقینێ، ل گەلیێ بێدلێ ل سنوری ناحیا ئەترووش یا سەر ب قەزا شێخان ڤە بوویە، کو گەنجەکێ خەلکێ رۆژئاڤایێ کوردستانێ ب ناڤێ (عەگید حسێن) د ژیێ ٢٧سالیێ دا د ناڤ ئاڤێ دا خەندقیە.

بێواری ئەو ژی ئاشکرا کر: پشتی تیما نقومڤانێن بنگەھێ بەرەڤانیا باژێرێ دھۆکێ ل جھێ روودانێ بەرهەڤ بووین، شیان لەشێ وی گەنجی ژ ناڤ ئاڤێ بینەدەر، تەرمێ وی بۆ نۆشداریا داد ل دهۆکێ هاتە رەوانە کرن.

هەتا نوکە ل سنورێ پارێزگەها دهۆکێ، ھژمارا وان کەسێن دناڤ ئاڤێ دا خەندقین گەھشتنە ١٩ کەسان.

ئەڤرۆ نیوز، زنار تۆڤی:

ئەڤرۆ ئەینیێ 14.8.2020، گەریلایێن پەکەکێ تەقە ل رەبیێن تورکیا یێن سەر سنۆری کریە، سۆپایێ تورکیا ژی ب چەکێ گران و گولە تۆپان بەرسڤا هێرشا پەکەکێ دایه و ئەو دەڤەرە بوردۆمان کریە و بۆ دەمەکێ درێژ شەر دناڤبەرا وان دا روودایە.
وەلاتیەکێ ناحیا کانی ماسێ، بۆ مالپەرێ ئەڤرۆ نیوز دیار کر: ئەڤرۆ ل دەمژمێر 9:50 خولەک، گەریلایێن پەکەکێ ل باکوورێ گوندێ بەربیرێ یێ سەر ب ناحیا کانی ماسێ ڤە، تەقە ل هەردو رەبیێن سەرێ کورێ زێری یێ ل هنداڤ خالا سنۆری یا سەرزێری و دەرێ دێمێ کریە و شەر دناڤبەرا هەردو ئالیان دا روودایە، د هەمان دەمدا، تۆپخانا سۆپایێ تورکی ئەو دەڤەرە بوردۆمان کریە و چەندین تۆپ ل نێزیکی خانیێن خەلکێ گوندێ بەربیرێ کەفتینە و ڤێ چەندێ ترس ل دەف خەلکێ گوندێ پەیدا کریە، دیسان ژ ئەگەرێ وێ شەری و تۆپ بارانکرنا تورکیا ئاگر بەربوویە دارستانێ و پیش و پەلەخی ل گوندێ بەربیرێ.

 
ئەڤرۆ نیوز، زنار تۆڤی:

ئەڤ شەڤە ل دەمژمێر 9:40 خولەک، فرۆکێن تورکی ترۆمبێلەکا گەریلایێن پەکەکێ ل گوندێ رەشانکێ ل سنورێ ناحیا زاویتە بۆمبەبارانکر و چار گەریلا د وێ بۆمبەبارانێ دا شەهیدبوون و ئاگر بەربوویە پیش و پاوانێ وێ دەڤەرێ و ترۆمبێل ژی ب تەمامی هاتیە سۆتن.
گوندێ رەشانکێ نێزیکی ٢٠ کیلۆمەتران ژ سەنتەرێ پارێزگەها دهۆکێ یێ دوورە.