ئەڤرۆ نیوز، زنار تۆڤی:

پەیڤدارێ کۆمەلگەها دەروازێ نێڤدەولەتی یێ ئیبراهیم خەلیل دیار کر: د ڤان هەشت هەیڤێن بوری دا پتری ٣٠ هزار تەنێن کەلوپەلێن دەم بسەرڤەچوویی ل دەروازێ ئیبراهیم خەلیل هاتینە ژناڤبرن و هندەک ژی هاتینە زڤراندن بۆ وەلاتێ تورکیا.

کامی کەمال بەرپرسێ په‌یوه‌ندى و راگه‌هاندنا كومه‌لگه‌ها ده‌روازێ نێڤده‌وله‌تى یێ ئیبراهیم خه‌لیل بۆ ئەڤرۆ نیوز گۆت: د دەمێ هەشت هەیڤێن بوری دا یێن سالا 2020 ، وان دەست ب سەر پتری ٣٠ هزار تەنێن کەلوپەلێن جۆدا، یێن دەم بسەر ڤەچوویی دا گرتینە، پشکەک ژ وان کەلوپەلان ھاتینە زڤراندن بۆ تورکیا و پشکەک ژی ژبەر دەم بسەرڤەچوونێ هاتینە سۆتن و ژناڤبرن.

ناڤهاتی ئەو ژی ئاشکرا کر: د دەمێ ھەیڤەکێ دا ل رێكه‌فتى ١\٨\٢٠٢٠ هه‌تا رێكه‌فتى ٣١\٨\٢٠٢٠، سێ هزار و شەش سەد و حەفتێ و چار تەن و شەش سەد و حەفتێ و حەفت كیلوگرامێن كه‌ره‌ستێن جۆدا ل تاقیگه‌هـ و لژنێن په‌یوه‌ندیدار یێن سه‌ر ب كۆمه‌لگه‌ها ده‌روازێ نێڤده‌وله‌تى یێ ئیبراهیم خه‌لیل ڤه‌ نه‌هاتینە پەسەند کرن و‌ پشکەک ژ وان هاتینه‌ زڤراندن و پشکەک ژى هاتینە ژناڤبرن، ژبه‌ر كو ل گه‌ل رێنمایێن حوکمه‌تا هه‌رێما كوردستانێ نه‌دگۆنجان، ب رەنگەکێ گشتی ئەو كه‌ره‌سته‌ پێكهاتبوون ژ كه‌لوپه‌لێن (ساخله‌میێ، خوارن و ڤه‌خوارنێ، جوانکاریێ، فیتێرنه‌رى، چاندن و ئاڤاکرنێ).

 
ئەڤرۆ نیوز، بارزان مزووری:
د روودانەکا ترافیکێ دا، شۆفێرەکێ وەغەر کر.
عومەر فەخری، کەسەکێ نێزیکی وێ روودانێ بۆ ئەڤرۆ نیوز گۆت: ئەڤرۆ دەمژمێر 7:30 مەغرەب 13/9/2020 ل سەر رێیا سەرەکی یا شێخان بۆ بەدریکێ و ل نێزیک ناحیا ئەلقۆش روودانەک دناڤبەرا ترۆمبێلەکا بارهەلگر و ترۆمبێلەک تویۆتا لاندوکۆرۆز روودایە د ئەنجام دا شۆفێرێ لاندوکۆرۆزێ وەغەرکر، شۆفێرێ ترۆمبێلا بارهەلگر بریندار بوویه و بۆ دەمەکێ درێژ شۆفێرێ بارهەلگر دناڤا ترۆمبێلێ مابوو ئاسێ، پاشی وەلاتی و هێزێن ئەمنی شیان وی شۆفێری ژ ترۆمبێلێ بیننە دەر.

ئەڤرۆ نیوز، زنار تۆڤی:

ئەڤرۆ شەمبیێ، دو گەنجێن رۆژئاڤایێ کوردستانێ ل جەمبۆری خەندقین و بەری چەندەکێ تیمێن نقۆمڤانێن دهۆکێ ب هەڤکاری ل گەل تیمێن نقۆمڤانێن سێمێلێ شیان تەرمێن وان هەردویان ژ ئاڤێ بیننە دەر.

رائید بێوار عەبدولعەزیز، بەرپرسێ راگەهاندنا بەرەڤانیا باژێری ل پارێزگەها دهۆکێ بۆ ئەڤرۆ نیوز دیار کر: ئەڤرۆ دو گەنجێن رۆژئاڤایێ کوردستانێ کو د ژیێن 14 سالیێ و 17 سالیێ دابوون، چووینە جەمبۆری، خوە هاڤێتینە ئاڤێ، لێ پشتی دەمەکێ هەردو د ئاڤێ دا خەندقینە، پاشی پەیوەندی ب مه هاتینە کرن و هەر زوو مە تیمێن نقۆمڤانیێ هنارتینە وی جهی ژبۆ دەرخستنا تەرمێن وان، پشتی گەهشتنا تیمێن نقۆمڤانیا بەرەڤانیا باژێرێ دهۆکێ ب هەڤکاری ل گەل تیمێن نقۆمڤانیا سێمێلێ شیان تەرمێن وان هەردو گەنجان ژ ئاڤێ بینەدەر و نوکە تەرمێن وان هاتینە رەوانەکرن بۆ نۆشداریا داد ل دهۆکێ.