ئەڤرۆ نیوز:
وەزارەتا ساخلەمیا ھەرێمێ راگەھاند: ٣٤٤ حالەتێن نوویێن توشبوون ب کۆرۆنایێ و ١٢٢ حالەتێن چێبوونێ و ٩ حالەتێن وەغەرکرنێ ھاتینە تۆمار کرن.
هەروەسا گوتیە: د دەمێ ۲٤ دەمژمێرێن بوری دا ٣٤٤ حالەتێن نوویێن توشبوون ب کۆرۆنایێ ھاتینە تۆمار کرن، کو ٢٠٧ حالەت ل هەولێرێ، ٧٧ ل دهۆکێ، ٣٣ ل سلێمانیێ، ١٧ حالەت ل گەرمیان بووینە.
هەروەسا دیار کریە: ١٢٢ کەسێن دی ژ وێ نەخۆشیێ چێبووینە، ٧٧ ل هەولێرێ، 10 ل هەلەبجە، 9 ل دهۆکێ و ٢٦ ل گەرمیان.
ئەڤرۆ نیوز، زنار تۆڤی:
موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا دو کەس بریندار بوون.
ناڤهاتی زێدەتر ئاشکرا کر: ئەڤرۆ ئێکشەمبی 2020/8/2 ل دەمژمێر (8:00) شەڤ ل ناڤا تۆنێلا گەلیێ زاخۆ دو ترۆمبێلا لێکدا، کو ترۆمبێلەک ژ وان تایبەت جێب ئینفنتی ب رەنگێ رەش ل گەل ترۆمبێلەکا تەکسی تۆیۆتا کۆرۆلا بوویە، د ئەنجامدا دو کەس بریندار بوون و زیانێن مادی یێن مەزن ژی ب هەردو ترۆمبێلان کەفتینە.
ئەڤرۆ نیوز، هۆشەنگ تاجر:
بەرپرسەکێ پارت دیموکراتی کوردستان/ ئیران بۆ ئەڤرۆ نیوز دیار کو چەند رۆژن جەلیل گادانی کەسایەتیێ سیاسی و ئەندامێ بەرێ یێ سەرکردایەتیا پارتی دیموکراتی کوردستان/ ئیران تووشی کۆرۆنایێ بوویە و نها ل ژێر چاڤدێریا توند یا نوشداران دایە.
هەمان بەرپرسی دیار ژی کر کو وی بەری دەمەکێ ب رێیا تەلەفونێ ل گەل جەلیل گادانی ئاخڤیە و مخابن رەوشا وی باش نینە، لێ نوشدار دبێژن یا د شیان دا بیت دێ بۆ کەن.
ئەڤرۆ نیوز:
د. سامان بەرزنجی وەزیرێ ساخلەمیا حوکمەتا هەرێما کوردستانێ راگەهاند کو مخابن د ماوەیێ حەفتیەکێ دا ١٠٣ کەس ل هەرێما کوردستانێ ژ بەر ڤایرۆسێ کۆرۆنایێ مرینە و ئەو یەک ژی نیشا ددەت کو رەوش گەلەک ب مەترسیدارە.
ناڤهاتی ئەو یەک ژی دیار کر کو دو حەفتیێن داهاتی دێ رەوش خرابتر لێ هێت، دێ هژمارا تووشبوون و مرنا ب کۆرۆنایێ زێدەتر لێ هێت و دڤێت وەلاتی کۆرۆنایێ ب جدی وەربگرن و خوە ب پارێزن.
ل دۆر ئەگەرێن زێدەبوونا تووشبوون و مرنا ب کۆرۆنایێ ل هەرێما کوردستانێ ژی سامان بەرزنجی دیار کر کو خالا سەرەکی ئەوە کو گەلەک نووچێن دوور ژ راستیێ ل دۆر کۆرۆنایێ دهێنە بەلاڤکرن و خالا دی ژی وەلاتی وەکو پێدڤی خوە ناپارێزن و ژ بەر هندێ ژی رەوش هەر کو دچیت خرابتر لێ دهێت.
ئەڤرۆ نیوز:
نێچیرڤان بارزانی سەرۆکێ هەرێما کوردستانێ ب هەلکەفتا جەژنا چلێ هاڤینێ یا ئێزدیان پەیامەک بەلاڤکر و د پەیاما خوە دا سەرۆکێ هەرێما کوردستانێ دیار دکەت کو جەژنا چلێ هاڤینێ ل هەموو برایێن ئێزدی ل کوردستانێ و جیهانێ پیرۆز دکەم و هێڤیدارم جەژنا وان د ناڤ خێر و خوشیێ دا دەرباز بیت.
سەبارەت ب چارەنڤیسێ وان کەسوکارێن ئێزدیان کو بەری نها ژ ئالیێ رێکخراوا تیرۆرستی یا داعشێ ڤە هاتنە رەڤاندن ژی سەرۆکێ هەرێما کوردستانێ دیار دکەت کو دێ بەردەوام بین هەتا هەموویان پەیدا دکەین.
ئەڤرۆ نیوز، زنار تۆڤی:
وەزارەتا كارەبا هەرێمێ راگەهاندیە: پشتی کارپێكرنا یەكا دویێ یا وێستگەها 300 مێگاواتی یا هەلما خەبات، بەرهەمئینانا كارەبێ ل كوردستانێ گەهشتیە بلندترین ئاست، ب رەنگەکێ کو نوکە نێزیكی 3500 مێگاواتێن كارەبێ دهێنە بەرهەمئینان و دیسان گۆتیە: نوکە ئەم دشێین 21 دەمژمێران کارەبا گشتی بدەینە وەلاتیان.
هەروەسا گۆتیە: وێستگەها 300 مێگاواتی یا هەلما خەبات، ب تەمامی یا کەفتیە کار و یا کارەبێ بەرهەم دئینیت، ب ڤێ چەندێ ئاستێ بەرهەمئینانا كارەبێ ل هەرێما كوردستانێ گەهشتیە 3400 بۆ 3500 مێگاواتان، ب ڤێ رەنگی پێدانا كارەبا نیشتمانی 20 هەتا 21 دەمژمێران بلند بوویە.
ئه‌ڤرۆ نیوز:
ژماره‌یا توشبوویێن ڤایرۆسێ كورونایێ ل جیهانێ ژ 18 ملیۆن كه‌سان ده‌رباز بوو ژماره‌یا گیان ژ ده‌ست دانێ ژی ژ 700 هزار كه‌سان نێزیك بوو.
لگۆری داتایێن مالپه‌رێ worldometers ژماره‌یا توشبوویێن ڤایرۆسێ كورونایێ ل جیهانێ گه‌هشته 18 ملیۆن و 26 هزار و 297 كه‌سان، ژ ئه‌ڤێ ژماره‌یێ ژی زێده‌تری 4 ملیۆن و 764 توشبوو ل ئه‌مریكا و زێده‌تری دو ملیۆن و 708 هزار ل به‌رازیل و زێده‌تری ئێك ملیۆن و 754 هزار ل هندستانێ، پشتی ئه‌ڤان ژی هه‌ر ئێك ژ روسیا و ئه‌فریكا باشوور و مه‌كسیك و پیرۆ و چیلی و ئیسپانیا و ئیران و كۆلومبیا و بریتانیا دهێن.
هه‌ر لگۆری ئاماران تانوكه 688 هزار و 974 توشبوویان گیانێ خوه ژ ده‌ست دایه و زێده‌تری 11 ملیۆن و 334 هزار كه‌س ژی ساخ بووینه.
ژماره‌یا گیان ژ ده‌ست دانا توشبوویێن كورونایێ ل ئه‌مریكا 157 هزار و 989 كه‌سن كۆ ل رێزا ئێكێ دهێت، به‌رازیل 93 هزار و 616 كه‌سان گیانێ خوه ژ ده‌ست دایه، پاشی بریتانیا و مه‌كسیك و هندستان و ئیتالیا و فه‌ره‌نسا و ئیسپانیا دهێن.
عیراق ژی ژ روویێ ژماره‌یا توشبوویان ڤه د رێزبه‌ندا 21 دایه، تانوكه 126 هزار و 704 هاتینه توماركرن و ژڤێ ژماره‌یێ ژی 4 هزار و 805 كه‌سان گیانێ خوه ژ ده‌ست دایه و 89 هزار و 275 كه‌س ژی ساخ بووینه.
ئه‌ڤرۆ نیوز:
وه‌زاره‌تا كاره‌با حوكمه‌تا هه‌رێما كوردستانێ راگه‌هاند ب ئه‌گه‌رێ ئێسگه‌هێ 300 میگاواتیا هه‌لمی ل خه‌بات ب هه‌موو شیانێن خوه بۆ به‌رهه‌م ئینانێ ده‌ستپێكریه، ئاستێ به‌رهه‌م ئینانا كاره‌بێ ل هه‌رێما كوردستانێ گه‌هشته 3400 بۆ 3500 میگاواتان، بڤێ رێژه‌یێ ژی كاره‌ب ب ته‌ڤایا 20 بۆ 21 ده‌مژمێران هاتیه دان ب وه‌لاتیان.
وه‌زاره‌تا كاره‌با حوكمه‌تا هه‌رێما كوردستانێ د راگه‌هاندنه‌كێ دا به‌لاڤكریه، كۆ ب سه‌رپه‌رشتیا وه‌زیرێ كاره‌بێ ئێسگه‌هێ 300 میگاواتی یێ هه‌لمی ل خه‌بات ب ته‌ڤایا شیانێن خوه ده‌ست ب به‌رهه‌م ئینانێ كر، بڤێ چه‌ندێ ئاستێ به‌رهه‌مئینانا كاره‌بێ ل هه‌رێما كوردستانێ گه‌هشته 3400 بۆ 3500 میگاواتان، شیان بۆ 20 بۆ 21 ده‌مژمێران كاره‌بێ بده‌نه وه‌لاتیان.
ئێسگه‌هێ هه‌لمی یێ خه‌بات جودایه ژ ئێسگه‌هێن دی یێن كاره‌بێ و ب پرۆژه‌یه‌كێ مه‌زن و ستراتیژی دهێته دانان، بۆ جارا ئێكێ یه ل سه‌ر ئاستێ كوردستانێ ب ته‌كنولوژیه‌كا بلند و ب كێمترین مه‌زاختن مفایه‌كی زۆرێ ئابوورێ هه‌یه.
ئەڤرۆ نیوز:
ل پارێزگەھا دھۆکێ نەخۆشەکێ پەنجەشێرێ یێ د ژیێ ٨٣ سالیێ دا ب تەمامی ژ کۆرۆنایێ چارەسەربوو.
د. موئەیەد ئەغالی سەرپەرشتێ چارەسەریا نەخۆشێن کۆرۆنایێ ل ھۆکێ راگەهاند: نەخۆشەکێ کۆرۆنایێ د ژیێ ٨٣ سالیێ دا پشتی تووشی کۆرۆنایێ بووی ئەڤرۆ ئەنجامێن وی دەرچوون و دیاربوو ب تەمامی ژ کۆرۆنایێ چێبوویە، هەر چەندە ژبەر دژواریا حالەتێ وی نەخۆشی و بێھنتەنگی لێ بوو، لەوما حەفکا وی ھاتبوو کۆنکرن وەکو پشکەک ژ چارەسەریێ.
ئەڤرۆ نیوز:
رێڤەبەریا گشتی یا ساخلەمیا پارێزگەها دهۆکێ راگەهاند : ژ ئەگەرێ تووشبوونا وان ب نەخۆشیا کۆرۆنایێ دو نەخۆشێن د ژیێن (60-66) سالیێ دا، ل نەخۆشخانا گۆلان ل ئاکرێ وەغەر کرن.
ئێک ژ تووشبوویان پاسەوان بوویە و یێ دیتر کاسبکار بوویە، ل رۆژا 1/8/2020، پشتی سەرەدانا نەخۆشخانێ کرین و نموونە ژێ هاتینە وەرگرتن، بەری دەرچوونا ئەنجامان وەغەر کر.
نيشاندان