ئەڤرۆ نیوز،عەلی حاجی:

ئەڤرۆ ل رۆژا پێنچ شەمبێ رێکەڤتی ١١/٦/٢٠٢٠ ل بەرامبەر سایلویا زاخۆ ل سەر وێ پشکا وەرگرتنا گەنمێ جۆتیارێن زاخۆ ژلایێ حکومەتا عێراقێ ڤە خرڤەبوونەکا نەرازی بوونێ ئەنجام دان. ل دەست پێکێ دا جۆتیارەکێ زاخۆ بناڤێ محەمەد یوسڤ گۆت : د ئەڤ سالە دا بتنێ رەزامەندی ل سەر وەرگرتنا ١٢ هزار تەنێن گەنمی وەک پشکا جۆتیارێن زاخۆ هاتیە دەست نیشان کرن و ئەڤە ژی رێژەیەکا گەلەک کێمە بۆ باژێرێ زاخۆ بەرامبەر دا ل باژێرێن دیتر رێژەیەکا زێدەتر هاتیە دەست نیشان کرن و ل سالا بوری ٢١ هزار تەن بون و ئەڤ سالە پشکا زاخۆ هاتیو ب نیڤیکرن لەورا ئەم ئامادەنینن وێ پشکا هاتیە دەست نیشان کرن گەنمێ خوە رادەست بکەین و دێ ترۆمبێلێن خوە هێلینە د سرا ترۆمبێلان دا رێکێ نادەینە چ کەسەکی ژی بەرهەمێ خوە رادەست بکەت، ژبەر کو غەدرەیەکا سور و سور ل زاخۆ دهێتە کرن.

جۆتیارەکێ دیتر بناڤێ خالێ حەسەن دیار کر داخازا مە ژ پارێزگەها دهۆکێ ئەوە پشکا بەرهەمێ مەیێ گەنمی زێدە بکەت هەکە ئەو پشکا هاتیە دەست نیشان کرن ژلایێ حکومەتا عێراقێ ڤە کو رادەستی سایلویێ بکەم ئەو پشکا دیتر یا گەنمێ خوە چ لێبکەم دڤێت پاشی وێ پشکێ باڤێژم لەورا هێڤیدارم د زووترین دەم دا پشکا گەنمێ جۆتیارێن زاخۆ بهێتە زێدە کرن.

ل دور ئاریشەیا جۆتیارێن زاخۆ رێڤەبەرێ چاندنێ گۆت : ئەڤ پشکا هاتیە دەست نیشان کرن نەیا چاڤەرێ کری بوو مە هزر زێدەتر دکر ژ ڤێ پشکا هاتیە دەست نیشان کرن لەورا دێ هەولدەین زووترین دەم دا چارەیەکەکێ بۆ ڤێ کێشەیێ ببینن .