ئەڤرۆ نیوز:
جڤاتا وەزیرێن هەرێما كوردستانێ كۆمبوونەك سازكر و تێدا بڕیار هاتەدان خەرجیێن حكومەتێ لدووڤ شیانێن بەردەستێن وەزارەتا دارایی بهێنە كێمكرن، شاندێ حوکمەتا هەرێمێ ژی دێ درێژیێ دەتە دانوستاندنان ل گەل حكومەتا بەغدا.
جڤاتا وەزیرێن هەرێما كوردستانێ ب رێیا ڤیدیۆ كۆنفرانس كۆمبوونا خوە ب سەرۆكاتیا مەسرور بارزانی سەرۆكێ حوکمەتێ و قوباد تالەبانی جێگرێ سەروكێ وەزیران سازكر، تێدا دانوستاندن دەربارەی ڕێكخستنا خەرجیێن حوکمەتێ و خوە گونجاندن ل گەل ی بوودجێ ل بەر دەستێ وەزارتا دارایی هاتنە كرن، ب مەرجەكی مافێ مووچەخۆرێن ئاسایی بهێتە پاراستن.
هەروەسا جڤاتا وەزیران دكۆمبوونا خۆدا پێداگیری ل سەر وێ چەندێ كر، کو مووچێ خۆدان پلێن تایبەت بهێتە كێمكرن، دیسان بریار هاتەدان ماوێ لێخۆشبوونێ بۆ 15% هەتا 1/9 بهێتە درێژكرن بۆ وان وەلاتیێن قەرێن ئاڤ و كارەبێ ددەن.
هەروەسا گۆتیە: ل حەفتیا بهێت دێ شاندێ حوکمەتا هەرێمێ سەرەدانا بەغدا كەت بۆ درێژە پێدانا دانوستاندنان ل گەل حوکمەتا عیراقێ، ژ پێخەمەت گەهشتنا رێككەفتنەكێ دەربارەی دابینكرنا شایستێن دارایی یێن هەرێما كوردستانێ.
ئەڤرۆ نیوز:
وه‌زاره‌تا ده‌ر‌ڤه یا ئه‌مریكا راگه‌هاند: وان سزایێن نوو ب سه‌ر 39 كه‌س و قه‌وارێن سووریێ دا سه‌پاندیه، دناڤا وێ لیستا سزادانێ ناڤێ هه‌ر ئێك ژ بەشار ئه‌سه‌دی، سه‌رۆكێ وی وەلاتی و ئه‌سما ئه‌سه‌دا هەڤژینا وی هه‌یە، ب وان سزایان دێ دیمه‌شق ژ پشتەڤانیێن دارایی هێتە بێ بەهر کرن.
د به‌یانناما مایك پۆمپێیۆ، وه‌زیرێ ده‌رڤە یێ ئەمریكا دا هاتیە: بۆ ئاشكرا كرنا ناڤێن وان كه‌سێن مە مەرەم پێ هەی د چارچۆڤێ قانوونا قه‌یسه‌ر ی دا، پێدڤیه پێشبینیێن سه‌پاندنا سزایێن گەلەک زێدەتر، د ڤێ حه‌فتیێ و هەیڤێن بهێت دا ب سه‌ر سووریێ دا بهێنە کرن.
ئەڤرۆ نیوز:
ئەڤرۆ رۆژا چارشەمبیێ ل سنورێ پارێزگەها سلێمانیێ ٩ تووشبوویێن دی یێن ڤایرۆسێ کۆرۆنایێ جانێ خوە ژ دەست دان.
بەرپرسەکێ رێڤەبەریا ساخلەمیێ ل سلێمانیێ دیار کریە کو ٨ زەلام و ئافرەتەکێ جانێ خوە ژ دەست داینە.
هەمان بەرپرسی دیار ژی کریە کو کەسێن جانێ خوە ژ دەست دای چەند رۆژ بوو رەوشا وان یا ساخلەمیێ گەلەک خراب بوو.
ئەڤرۆ نیوز:
کاروان سدیق پەیڤدارێ رێڤەبەریا هاتنوچوونا سلێمانیێ راگەهاند کو چەند کارمەندێن رێڤەبەریا هاتنوچوونا سلێمانیێ تووشی ڤایرۆسێ کۆرۆنایێ بووینە و ژ بەر هندێ ژی وان بریار دایە کو سپێدێ ئانکۆ رۆژا پێنجشەمبیێ بکەنە بێهنڤەدان.
ناڤهاتی راگەهاند کو حەفتیا بۆری چەند کارمەندێن هاتنوچوونێ تووشی کۆرۆنایێ بووینە و پاشی هژمارا تووشبوویان زێدەتر لێ هاتیە لێ هەتا نها هژمارا دروست یا تووشبوویێن رێڤەبەریا هاتنوچوونا سلێمانیێ نەهاتیە راگەهاندن.
ئه‌ڤرۆ نیوز:
رێكخراوا ساخله‌میا جیهانێ راگه‌هاند لگۆری ئه‌و ڤه‌كۆلینێن هاتینه ئه‌نجامدان، ده‌رمانێ دێكسامیسازون كۆ ل سالێن هه‌شتیان تا نوكه بۆ كێمكرنا هه‌وكرنا جومگه‌یان دهاتنه بكار ئینان، ته‌ڤایا مرنێ دناڤ توشبوویێن كورونایێ ب رێژا ئێك ل سه‌ر سێ كێم دكه‌ت.
تێدهروس ئه‌دهانوم گیبه‌رسوس رێڤه‌به‌رێ رێكخراوا ساخله‌میا جیهانێ ئه‌و چه‌نده ژی راگه‌هاند: حه‌بكێن دێكسامیسازون كۆ ل سالێن هه‌شتیان بۆ كێمكرنا ئازارێن جومگه‌یان دهاته بكار ئینان، ل سه‌ر توشبوویێن كورونایێ هاتیه تاقیكرن و ئه‌نجامه‌كێ زۆر باش بده‌ست خوڤه ئینا.
رێكخراوا ناڤبری ئه‌و چه‌نده ژی دازانین كۆ ده‌مێ ئه‌و ده‌رمان دناڤبه‌را ئه‌وان توشبوویین كورونادا هاتیه تاقیكرن كو پێدڤی ب بكارئینانا ئامێرێ ده‌ستكرد بو یان ئاریشه هه‌بووینه د كوئه‌ندامێ هه‌ناسه‌دانێ دا، ژماره‌یا مرنێ دناڤ ئه‌وان نه‌خوشان دا ب رێژا ئێك ل سه‌ر سێ كێم كریه، بڤان نێزیكان رینمایێن چه‌وانیا بكارئینانا ئه‌ڤی ده‌رمانی به‌لاڤ كه‌ین.
ئه‌ڤرۆ نیوز:
ئاژانسا ووزه‌یا نێڤ ده‌وله‌تی راگه‌هاند پترۆلێ مه‌زنترین داكه‌تنا خو توماركر د دیرۆكێ دا، كۆ ئیسال روودایه، به‌ره‌ڤ زڤرینا بلند بوونا بهایێ دچیت، به‌لێ ب ئه‌گه‌رێ پاشڤه زڤرین ل كه‌رتێ فرۆكه‌ڤانیا ئاستێ ناڤه‌گه‌ریت به‌ری ڤایرۆسێ كورونایێ.
ئاژانسا ووزه‌یا نێڤ ده‌وله‌تی د راپۆرته‌كێ دا به‌لاڤ كریه و تێدا پێشبینی یا ئه‌وێ چه‌ندێ دكه‌ن ل سالا 2021 ب رێژا 5 ملیۆن و 700 هزار به‌رمیل خواست ل سه‌ر پترۆلێ زێده دبیت، ئه‌ڤه ژی رامانا ئه‌وێ چه‌ندێ یه كۆ خواستێ رۆژانه ل سه‌ر پترۆلێ دگه‌هته 97 ملیۆن و 400 هزار به‌رمیلانه، به‌لێ ل چاڤ سالا 2019 ب رێژا 2 ملیۆن و 400 هزار به‌رمیلان كێمتر بیت.
ئاژانسا ووزه‌یا نێڤ ده‌وله‌تی ئه‌و چه‌نده ژی دازانین كۆ پاشڤه زڤرینا خواستی ل سه‌ر سوته‌مه‌نیا فرۆكه‌یێ كارتێكرن ل سه‌ر ته‌ڤایا گشتی خواست ل سه‌ر پترۆلێ دبیت ئه‌ڤه ژی لایه‌نێ كێم تا سالا 2022 دێ به‌رده‌وام بیت، چونكو نوكه كه‌رتێ فرۆكه‌ڤانیێ ریب ری ته‌حه‌دایێ بوون.
ئاژانسا ووزه‌یا نیڤ ده‌وله‌تی كۆ باره‌گه‌هێ وێ ل پاریسا پایته‌ختێ فه‌ره‌نسایه، ئه‌و چه‌نده دازانین كۆ گه‌شتكرنا ئاسمانی ب ئه‌گه‌رێ رێ و ئاوایێن ڤایرۆسێ كورونایێ 79% داكه‌تن بخوڤه دیتی یه بڤی شێوه‌یێ به‌رده‌وام بیت.
نيشاندان