ئەڤرۆ نیوز، عەلی حاجی :
رێڤەبەرێ رێڤەبەریا گشتی یا چاڤدێری و گەشەپێدانا جڤاکی ل پارێزگەها دهوکێ بۆ ئەڤرۆ نیوز دیار کر ب رێیا برێکارێن ئاهێن خوارنێ ل پارێزگەها دهوکێ دێ هاریکاریێن حکومەتا هەرێمێ ب سەر وەلاتیێن کێم دەرامەت ل پارێزگەهێ هێنە بەلاڤ کرن.
زێدەتر د. شێرزاد هروری گۆت: ل دور میکانیزما نوو کۆمبوونەک دگەل وەزیرێ پێشەسازی کومبونەک هات بوو ئەنجام دان ل دور دانانا میکانیزمەکێ بۆ بەلاڤ کرنا هاریکاریێن حکومەتا هەرێما کوردستانێ بۆ خێزانێن کێم دەرامەت ، میکانیزمەکا باش هاتیە دانان کو ئەو ژی ب رێیا برێکارێن ئاهێن خوارنێ وان هاریکاریان ب سەر خێزانێن کێم دەرامەت دا بەلاڤ بکەین،روژا دو شەمبێ دێ کومبونەکێ ل پارێزگەها دهوکێ ئەنجام دەین داکو چەند برێکارەکان دەست نیشان بکەین و دێ هەول دەین نێزیکترین برێکار دەست نیشان بکەین دا کو بۆ وەلاتیان ئاسان بیت دەما وەرگرتنا هاریکاریێن حکومەتا هەرێما کوردستانێ و بریارە د دەمەکێ نێزیک دا ئەو هاریکاری بگەهن.
ناڤهاتی ئەو چەندە ژی ئاشکەرا کر ” بارا پارێزگەها دهوکێ بۆ ٥٠ هزار خێزانێن کێم دەرامەت هاریکاری دێ گەهن، نوکە دا چەندین کەرەستە هاتینە بەرهەڤ کرن و بتنێ کەرەستەیەک نەگەهشتیە دەستێ مە هەردەما ئەو کەرەستە ژی گەهشتە دەستێ مە دێ دەست ب بەلاڤ کرنا هاریکاریان کەین و نوکە دا هەمی بەرهەڤی ژی تەمام بوینە بۆ دەست پێکرنا وێ هەوا هاریکاریان”.
ئەڤرۆ نیوز، عەلی حاجی :
بەرپرسێ نڤێسینگەها زاخۆ سەندیکا کرێکارێن کوردستانێ دا داخویانیەکێ دا بۆ ئەڤرۆ نیوز دیار کر ژ دەست پێکا هاتنا کورونایێ ل زاخۆ ژلایێ نڤێسینگەها وان ڤە هاریکاری ب سەر ٤٥٠ کرێکاران ل زاخۆ دا بەلاڤ کرینە.
زێدەتر سەگڤان عۆمەر گۆت : هەر ژ دەست پێکا هاتنا کورونایێ و وەکو نڤێسینگەها زاخۆ یا سەندیکا کرێکاران ب چەند قوناغەکان هەتا نوکە شیاینە هاریکاریان کو ژ کەرەستەیێن خوارنێ و کوژمەیەکێ پارەی پێک دهات ب سەر ٤٥٠ کرێکاران دا بەلاڤ بکەن،هەر دیسان نوکە دا بەردەوامین ل سەر وێ چەندێ کو هەژمارەکا دیتر ژی یا کرێکاران مفادار بن ژ وان هاریکاریان و ناڤێ ٤٨٠ کرێکارێن دیتر ژی هاتینە تومار کرن داکو بۆ قوناغێن بهێت ژی ئەم بشێن هەژمارەکا دیتر یا هاریکاریان ب سەر وێ تەخێ دا بەلاڤ بکەین ژبەر کو د ماوەیێ قەدەغەیا هاتن و چوونێ دا و زیانەکا مەزن بەر ب تەخا کرێکاران کەڤت و دێ بەردەوام ژی بین دا کو هەر چو نەبیت بشێن هاریکاریان بۆ کرێکاران دابین بکەین.
ناڤبری ئەو چەندە ژی خویا کر ” قایمقامێ زاخۆ هاریکاریەکا باش دگەل مە دا کری یە بۆ دابین کرنا هاریکاریان و زێدەباری وێ چەندێ ژی د ماوەیێ بوری دا بهێن ڤەدانا فەرمی بوو بەلێ مە بەردەوام کار دکر پێخەمەتی وێ چەندێ بشێن خزمەتا تەخا کرێکاران بکەین “.
ئەڤرۆ نیۆز، قائید میرۆ:
چەند رۆژەکە چەکدارێن تیرۆرستێن داعش ل عێراقێ دەست ب لڤینانکریە و کریستیان ژی دلگرانن بڤێ چەندێ عێراقێ شیانێن پاراستنا وان نینە نوونەرەکا کریستیانان ژی ب دوور نابینیت کارەساتێن سەردەمێ ھاتنا داعش دوبارە ببن.
رۆبینا تیاری، نوونەرا کریستیانان ل پەرلەمانێ کوردستانێ بۆ ئەڤرۆ نیۆز دیارکر” پشتی زێدەبوونا لڤینێن چەکدارێن داعش ل عێراقێ جارەکادی مەترسی بۆسەر کریستیان و ھەموو پێک ھاتەیێن دی پەیدابوویە و وەلاتیێن کریستیان دلگرانن ب لڤینێن داعش، ژبەرکو ترس ھەیە کارەساتێن مینا سالا ٢٠١٤ێ بسەر وان بھێن.
رۆبیتا تیاری ئاشکراکر” ھێزێن عێراقی شیانێن پاراستنا رەوشا ئەمنی ل دەڤەرێن کریستیان تێدا نینە و ھێشتا مەترسی بۆسەر دەڤەرێن کریستیانان ھەیە ژئالیێ گرۆپا چەکدارێن داعش یێن تیرۆرست.
ئەڤرۆ نیۆز، قائید میرۆ:
سەرۆکێ ئێکەتیا زانایێن ئاینێ ئیسلامی داخوازێ ژ مامۆستایێن ئاینی دکەت مایتێکرنێ د پرسێن دەرڤەی ئاینی دا نەکەن و بەرۆڤاژی رێکارێ قانوونی دێ ھەمبەر ھێنە وەرگرتن.
مەلا عەبدولا سەعید، سەرۆکێ ئێکەتیا زانایێن ئاینێ ئیسلامی بۆ ئەڤرۆ نیۆز دیارکر ” مامۆستایێن ئاینی ھاتینە ھایدارکرن خوە دوور بگرن ژ پرسێن سیاسی و زانستی و دیرۆکی، بەلکۆ ئەڤە کارێ کەسێن پسپۆرە و تنێ د چوارچوڤێ ئاینی دا مامۆستایێن ئاینی دکارن بۆچوونا خۆ دیاربکەن.
مەلا عەبدولا سەعید گۆت ژی” ھەر مامۆستایەکێ پشکداربیت د ناڤبرنێ دا ئەڤە ژئالیێ داخوازکارێ گشتی و دادگەھێ دێ لێپرسین دگەلدا وەرە کرن و ھەتا نھاژی چەندین مامۆستایێن ئاینی چووینە دادگەھێ و چەندین کەس ژوان ھاتینە سزادان.
ئەڤرۆ نیوز:
وەزارەتا ساخلەمیا عیراقێ تووشبوونا 76 کەسێن دی ب ڤایرۆسێ کۆرۆنا یێ راگەهاند، سەرجەمێ گشتی یێ تووشبوویێن کۆرۆنا یێ ل عیراقێ گەهشتە دو هزار و 679 کەسان.
هەروەسا گۆتیە: د دەمێ 24 دەمژمێرێن بوری دا 76 کەسێن دی تووشی ڤایرۆسێ کۆرۆنا یێ بوون، هەروەسا 41 کەس چێبووینە و سێ کەسان ژی گیانێ خوە ژ دەستدایە.
ئەڤرۆ نیوز:
ژێدەرەکێ ژ شاندێ هەرێمێ ل بەغدا راگەهاند، شاندێ هەرێمێ و بەغدا ل سەر رادەستکرنا ٢٥٠ هزار بەرمیلێن نەفتێ بۆ بەغدا رێککەفتینە، دەربارەى هنارتنا مووچێ هەرێمێ شاندێ هەرێمێ راگەهاندیە، پشتى رێککەفتنێ ل سەر بابەتان هنارتنا مووچەی یا ب ساناهیە.
هەروەسا گۆتیە: ل چەند رۆژێن بهێت دا دێ شاندەکێ دی یێ هەرێمێ سەرەدانا بەغدا کەت و دێ کۆمبوون د بەردەوام بن، هەروەسا هەرێم یا بەرهەڤە ٢٥٠ هزار بەرمیلێن نەفتێ رۆژانە بۆ بەغدا بهنێریت و داهاتێ گومرکان ژى دێ ٥٠ ب ٥٠ بیت.
ئەڤرۆ نیوز:
ئەڤرۆ شەمبیێ 9.5.2020 حوکمەتا نوو یا عیراقێ ب سەرۆکاتیا مستەفا کازمی کۆمبوو و چەند بریارێن نوو دەربارەی مەزاختنا مووچێ خانەنشینان و هەلوەشاندنا بریارا راگرتنا مەزاختنا پارەی و مووچەی و ئەنجامدانا هەلبژارتنان دەر کرن.
د وێ کۆمبوونێ دا سەرۆکێ حوکمەتا عیراقێ و وەزیرێ دارایی سەرپشکن ژ بۆ مەزاختنا پارەی و مووچێ خانەنشینان، هەروەسا هەلوەشاندنا بریارا بەرێ یا راگرتنا پارێ مووچەی و مەزاختنان و رێدان ب پرۆژە قانوونێ قەرێن ناڤخۆ و دەرڤە بۆ پرکرنا کورتئینانا بودجێ سالا ٢٠٢٠ یێ عیراقێ.
ئەڤرۆ نیوز:
پێنج تووشبوویێن کۆرۆنا یێ ل هەولێرێ باشبوون، هەتا نوکە 194 کەس ل سنووری پارێزگەها هەولێرێ باشبووینە.
د. دلۆڤان محەمەد، رێڤەبەرێ ساخلەمیا هەولێرێ راگەهاند: پێنج تووشبوویێن ڤایرۆسێ کۆرۆنا یێ پشتی وەرگرتنا چارەسەریێن نۆشداری ب تەمامی باشبووینە و هاتینە رەوانەکرن بۆ مال.
ل هەرێما کوردستانێ 391 کەس تووشی ڤایرۆسێ کۆرۆنا یێ بووینە، ژ وان ژی 366 کەس چێبووینە و پێنج کەسان ژی گیانێ خوە ژ دەستدایە، هەتا نوکە ب تنێ 20 نەخۆش ل ژێر چاڤدێریا نۆشداران دا ماینە.
ئەڤرۆ نیوز:
سەرۆک مەسعود بارزانی سەرەخۆشیێ ل خێزانا پێشمەرگێ هەر دو شۆرەشێن ئەیلول و گۆلانێ عەبدولرەحمان حاجی عەلی دکەت، ئەڤە ژی دەقێ پەیاما سەرۆک بارزانی یە.
ب ناڤێ خودێ مەزن و دلۆڤان
ب داخ و خەمەکا زۆر ڤە، نووچەیێ وەغەرا دووماهیێ یا کەسایەتیێ نشتیمانپەوەر و پێشمەرگێ هەر دو شۆرەشێن ئەیلول و گۆلانێ عەبدولرەحمان حاجی عەلی گەهشتە مە.
خودێ ژێ رازی عەبدولرەحمان حاجی عەلی رۆلەکێ بەرچاڤ د هەر دو شۆرەشێن ئەیلولا مەزن و گۆلانێ دا هەبوویە و ب درێژاهیا ژیێ خوە خزمەتا رێبازا بارزانی و کوردایەتیێ کریە و ژ دەستدانا وی زیانەکا گەلەک مەزنە.
سەرەخوشیێ ل خێزانا تێکوشەرێ خودێ ژێ رازی عەبدولرەحمان حاجی عەلی و هەموو کەسوکارێن وی دکەین و خوە ب شریکێ خەما هەوە دزانین.
ژ خودایێ مەزن دخوازین گیانێ کاک عەبدولرەحمان حاجی عەلی بێخیتە بەر رەحمەتا خوە و ئۆقرەیی و ئارامیێ ببەخشیتە ھەموو ئالیان.
انا للە و انا الیە راجعون
مەسعود بارزانی
٩ی٥ی٢٠٢٠
نيشاندان