ئەڤرۆ نیوز:
ب فەرمانا سەرۆکێ حوکمەتا هەرێما کوردستانێ، بوودجێ دویێ یێ هەوارهاتنێ بۆ بەرهنگاربوونا نەخۆشیا کۆرۆنا یێ هاتە تەرخانکرن.
وەزارەتا ساخلەمیا حوکمه‌تا هه‌رێما کوردستانێ راگەهاندیە، ب فەرمانا مەسرور بارزانی سەرۆکێ حوکمەتا هەرێما کوردستانێ، ژ بۆ پاراستنا ساخلەمیا وەلاتیان، بوودجێ دویێ بۆ بەرهنگاربوونا ڤایرۆسێ کۆرۆنا یێ هاتیە تەرخانکرن.
ئەڤرۆ نیوز:
هژمارەکا بەلێندەرێن پارێزگەها دھۆکێ بریار دایە سوبەهی 18 ئادارێ دەست ب دروستکرنا نەخۆشخانەکا 104 تەختی بکەن کو دێ یا تایبەت بیت ب تووشبوویێن کۆرۆنا یێ ڤە.
زیرەک دۆسکی، سەرۆکێ کۆمەلا بەلێندەرێن کوردستانێ لقێ دھۆک، بۆ رووداوێ راگەهاند، ئەڤرۆ 17 ئادارێ هژمارەک ژ بەلێندەرێن دھۆکێ پشتی ئەنجامدانا کۆمبوونەکێ بڕیار دایە ھەر ئێک لدووڤ شیانێن خوە، پشکداریێ د پرۆژێ دروستکرنا نەخۆشخانەکا تایبەت بۆ کۆرۆنا یێ ڤە بکەن.
گۆتیە ژی، مە نڤیسارەک پێشکێشی پارێزگارێ دھۆکێ کریە بۆ دەستنیشانکرنا پارچە زەڤیەکێ و پشتی رەزامەندیا وی بۆ دابینکرنا پارچە زەڤیەکێ ل سنوورێ ناحیا رزگاری یا سەر ب قەزا سێمێلێ ڤە، بڕیارە ب چاڤدێریا رێڤەبەرایا گشتی یا ساخلەمیا دھۆکی و لژنا بلند یا خۆپاراستنێ ژ کۆرۆنا یێ، دەست ب دروستکرنێ بهێته کرن و د زووترین دەمدا بهێتە تەمام کرن، هەر ھێشتا پەم نزانین دێ چەند پارە بۆ هێته خەرج کرن، بەلێ دێ یا 104 تەختی بیت و ھەموو پێدڤیێن ساخلەمیێ دێ تێدا هەبن.
ئه‌ڤرۆ نیوز، زنار تۆڤى:
مه‌نار زیاد، خه‌لكا شنگالێ یه و ئه‌ڤه ده‌مێ چه‌ند سالانه ل باژێرێ دهۆكێ دژیت، نوكه قۆتابیه ل قۆناغا چارێ ل كۆلیژا ئه‌ندازیارى ل زانكۆیا حه‌دبا ل مۆسل، د دیداره‌كێ دا بۆ ئه‌ڤرۆ نیوز دیار كر: وێ پێلاڤه‌ك بۆ كه‌سێن نابینا و ئه‌وێن گه‌له‌ك هه‌ست ب ده‌نگان ژى نه‌كه‌ن چێكریه، مه‌ره‌ما وێ ژ ڤى پرۆژه‌ى ئه‌و بوویه، كو ئه‌و كه‌سێن نابینا، ده‌مێ وێ پێلاڤێ دكه‌نه پێن خوه، ل دووراتیا مه‌تره‌كێ ئه‌و پێلاڤ دێ وان ئاگه‌هدار كه‌ت و دێ پێن وان ره‌جفینیت و دێ بۆ دیار كه‌ت، كو تشته‌كێ ب مه‌ترسى ل پێشیا وان هه‌یه، ب رێیا وێ پێلاڤێ ئه‌و كه‌سه دێ ژ وێ مه‌ترسیێ هێته پاراستن و دێ وى كه‌سى ئاگه‌هدار كه‌ت، كو نابیت ئه‌و كه‌سه د وى جهى را بچیت و باشتره رێیا خوه ب گوهۆریت، داكو توشه كه‌فتنێ نه‌بیت، دیسان ئه‌و دشێت هه‌تا دووراتیا چار مه‌تران ژى ب رێیا وێ پێلاڤێ وان كه‌سێن نابینا ئاگه‌هدار بكه‌ت.
ناڤهاتیێ گۆت ژى: ئه‌ڤه ده‌مه‌كێ درێژ بوو، ئه‌ز مژوولى ڤى كارى، لێ پشتى من ب دووماهى ئیناى، من سه‌ركه‌فتن تێدا ئینایه و مه ئه‌و پێلاڤه جه‌رباندى یه ل دووراتیا مه‌تره‌كێ مرۆڤى ئاگه‌هدار دكه‌ت، هه‌كه تشته‌ك د رێیا مرۆڤێ نابینان دا هه‌بیت، هه‌روه‌سا داخوازیا من ئه‌وه، كو جهێن شۆله‌ژێ هاریكاریا وێ یا مادى بكه‌ن، داكو ئه‌ز بشێم ڤى پرۆژه‌ى به‌رفره‌ه بكه‌م و ڤێ چه‌ندێ بێخمه د خزمه‌تا كه‌سێن نابینا دا ل كوردستانێ.
مه‌نارێ ئه‌و ژى گۆت: ئه‌ڤ هزره بۆ من ژ هندێ هات، ده‌مێ من ل زانكۆیێ دخواند، من كه‌سێ نابینا دیت و ڤێ چه‌ندێ كارتێكرنه‌كا مه‌زن ل من كر، له‌وما من هزر د چێكرنا ڤێ پێلاڤێ دا كر، ژ پێخه‌مه‌ت ئه‌ز بشێم هاریكاریا كه‌سێن نابینا بكه‌م، نوكه ب تنێ من پێدڤى ب هاریكاریا مادى هه‌یه، ژ پێخه‌مه‌ت ئه‌ز بشێم ڤان پێلاڤان بێخمه دناڤا بازارى دا، هه‌روه‌سا من ل به‌ره ڤى پرۆژه‌ى بێخمه د خزمه‌تا هه‌موو مرۆڤێن جیهانێ دا.
ئه‌ڤرۆ نیۆز، عه‌زیز هه‌ورامی:
پارێزگاری هه‌ڵه‌بجه له كۆبونه‌وه‌ی لیژنه‌ی ڕوبه‌ڕوبونه‌وه‌ی كۆرۆنا ڕای گه‌یاند، 72 سه‌عاتی داهاتوو هه‌موو هاتوچۆیه‌ك قه‌ده‌غه نوێ ده‌كرێته‌وه هه‌ركه‌س سه‌رپێچی بكات سزاده‌درێت.
له ڕاگه‌یه‌ندراوه‌كه‌ی پارێزگای هه‌ڵه‌بجه هاتووه، نانه‌واخانه و سه‌مونخانه و سۆپه‌رماركێته‌كانی ناو كۆڵانه‌كان كراوه‌ده‌بێ، ڕۆژی 18ی مانگیش له سه‌عات شه‌شی به‌یانی تاوه‌كو 11ی پێش نیوه‌ڕۆ قه‌ساب خانه‌كان كراوه‌ده‌بن.
ته‌واوی بڕیاره‌كانی پارێزگاری هه‌ڵه‌بجه.
– بە هیچ شێوەیەك قەرەباڵغی رێگەپێدراو نییە.
– لە كاتی وەستان و سەرەدا، دەبێت نێوان كڕیارەكان لە دوو مەتر كەمتر نەبێت.
– پێویستە رەچاوی سەرجەم رێنماییە تەندروستییەكان بكرێت، كە لە بەڕێوەبەرایەتی گشتی تەندروستی و بەڕێوەبەرایەتی ڤێتێرنەری و لیژنەكان دەردەچێت، وەك بەكارهێنانی دەمامك و دەستكێش و بە بەردەوامی مەوادی پاكژكردنەوە بەكار بهێنن .
– كڕیارەكان بە هیچ شێوەیەك بواری چوونە ناو دوكانی گۆشت فرۆشەكانیان نییە و دەبێت شریتی قردێلەیی دابنرێت بۆ جیاكردنەوەیان.
– هەر دووكانێك پێویستە كەسێكی تایبەت، بۆ وەرگرتن و ژماردنی پارە لە كڕیارەكان دابنێت .
– سەرجەم هەفتە بازاڕەكانی ناو شاری هەڵەبجە جگە ئەوانەی ناو بازاڕ، كراوە دەبن، لەژێر چاودێری لیژنە ھاوبەشەكانی قایمقامیەت بە رەچاوكردنی سەرجەم رێكارە تەندروستییەكان و ئەم رێنماییانەی خوارەوە:
– بە پێی بەیانی ژمارە (19)ی ساڵی 2020 وەزارەتی ناوخۆی حكوومەتی هەرێمی كوردستان، هاتوچۆی ئۆتۆمبێل و ماتۆڕ بە هەموو شێوەیەك بۆ هەفتەبازاڕ و شوێنە رێگەپێدراوەكان قەدەغەیە و رووبەڕووی ئیجرائاتی یاسایی دەبنەوە .
ئەڤرۆ نیوز:
حوکمەتا هەرێما کوردستانێ راگەهاند، د کۆمبوونا جڤاتا وەزیران دا چەندین بریارێن تایبەت ب جێبەجێکرنا رێنمایێن بەرهنگاربوونا ڤایرۆسێ کۆرۆنا یێ و نرخاندنا رەوشا ئابووری هاتنە دان، حوکمەتێ بریاردایە میکانیزمەکا گونجای بۆ بجهئینانا مووچەی ببینن.
ئەڤرۆ سێشەمبی 17.3.2020 حوکمەتا هەرێمێ راگەهاندیە، د کۆمبوونا جڤاتا وەزیران دا کو ب ئاوایەکێ ڤیدیۆ کۆنفرانس برێڤەچوویە، هەر ئێک ژ وەزارەتێن دارایی و ئابووری، ناڤخۆ، کاروبارێن پێشمەرگەی و دەزگەهێ ئاسایش هاتینە راسپاردن د نێزیکترین دەم دا میکانیزمەکا گونجایی بۆ خەرجکرنا مووچێ فەرمانبەران ببینن، ب تایبەتی مووچێ هێزێن پێشمەرگەی و پۆلیسان و ئاسایشا ناڤخۆ، ب مەرجەکێ رێکارێن خۆپاراستنێ بەرچاڤ بهێنە وەرگرتن.
دیار کریە ژی، بریار هاتیەدان د چارچۆڤێ جێبەجێکرنا قانوونا چاکسازیێ دا، دارایا گشتی بهێتە رێکخستن ب ئاراستا خزمەتکرنا وەلاتیان و دابینکرنا دەبارا وان و خەرجیێن گشتی ژی بهێنە کێمکرن، هەروەسا بریار دایە ل ڤان نێزیکان کۆمبوونەکا تایبەت ب نەفت و گازێ بهێتە ئەنجامدان، ب مەرەما گۆتۆبێژکرنا دەلیڤێن ڕێکخستنا داهاتی و خەرجیێن نەفت و گازێ ل هەرێمێ، دیسان بەرچاڤگرتنا رەوشا دارایی و لێکەفتێن دارایی ل هەرێمێ، هەروەسا پەیوەندی و هەڤبەندی دێ ل گەل حوکمەتا فیدرالی د بەردەوام بن، ژ پێخەمەت دابینکرنا شایستێن دارایی و مافێن دستوری یێن هەرێمێ.
ئەڤرۆ نیوز:
د کۆنگرەکێ رۆژنامەڤانی دا فەرهاد ئەترۆشی پارێزگارێ دهۆکێ دیار کر، ژ بلی نانپێژی و سەمونخانا و جهێن فرۆتنا کەرەستێن هشک و دەرمانخانە و پیشەسازیێن ترۆمبێلا، بریار دا هەموو بازارێن پارێزگەها دهۆکێ بهێنە داخستن، ئەڤ بریارە دێ بۆ دەمێ ١٠٠ دەمژمێران و هەتا ٢٣ ڤێ هەیڤێ یا بەردەوام بیت.
ناڤهاتی گۆت ژی، هەتا نوکە بریارا قەدەغەیا هاتنوچوونێ ل دهۆکێ و سنورێن وێ نەهاتیە راگەهاندن و نوکە هاتنوچوون ل دهۆکێ و قەزا و ناحیێن وێ یا ئاسایە.
پارێزگارێ دهۆکێ دیارکر ژی، هەتا نوکە ل سنورێ پارێزگەها دهۆکێ چ حالەتێن گومانلێکری یان توشبوون ب ڤایرۆسا کۆرۆنایێ نەهاتیە تۆمار کرن.
ئەو ژی گۆت، رۆژانە ل سەنتەرێ باژێرێ دهۆکێ و هەموو قەزا و ناحیێن گرێدایی وێ، رێنمایێن نوو ژ ئالیێ لیژنا بەرهنگاربوونا کۆرۆنایێ ب سەر وەلاتیان دا دهێنە پارڤە کرن.
ئه‌ڤرۆ نیوز، زنار:
ئێكه‌تیا ته‌پا پێ یا ئوروپا ئه‌ڤرۆ د كومبوونا خوه دا دگه‌ل نوونه‌رێن هه‌موو ئێكه‌تیێن ته‌پا پێ یا ئوروپى بریار دا هه‌ڤركیێن قاره‌مانیا 2020 یا ئوروپا بۆ سالا بهێت 2021 بهێته پاشخستن ژ ئه‌ڤه‌رێ به‌لاڤ بوونا ڤایروسێ كورونا.
ئێكه‌تیا ته‌پا پێ یا ئوروپى د كومبوونا خوه یا ئه‌ڤرۆ دا راگه‌هاند ژ ئه‌گه‌رێ به‌لاڤ بوونا ڤایروسێ كورونا ل سه‌رانسه‌رى جیهانێ وان بریار دا قاره‌مانیا هه‌لبژارتیان یا 2020 بۆ هاڤینا سالا داهاتى پاشبێخن ئانكو ل هه‌یڤا تیرمه‌ها 2021.
ده‌رباره‌ى خولێن ته‌پا پێ ژى ئێكه‌تیا ناڤهاتى بریار دایه ل ماوێ بهێت خول بهێنه تمام كرن بێ جه‌ماوه‌ر ئه‌گه‌ر ره‌وشا ساخله‌مى باشتر لێنه‌هات.
ئەڤرۆ نیوز:
سەرۆکێ حوکمەتا هەرێما کوردستانێ سەرەپەرشتیا کۆمبوونەکا تایبەت کر کو ل دۆر رێکارێن حوکمەتێ بۆ رێگریکرن ل بەلاڤبوونا کۆرۆنا برێڤە چوو.
کۆمبوون د چارچۆڤێ ڤیدیو کۆنفرانس بوو و تێد قوباد تالەبانی و گەلەک وەزیر ژی پشکدار بوون.
سەرۆکێ حوکمەتێ داخواز کر کو وەزارەتا دارایی و پێشمەرگە ل گەل ئالیێن دی پێکڤە ئالیەتەکێ پەیدا بکەن کو بشێن مووچێ فەرمانبەران ب تایبەتی ژی یێن پێشمەرگەی و هەموو فەرمانبەران دابەش بکەن ب رەنگەکێ کو کارتێکرنا خوە ل رێکارێن تایبەت یێن حوکمەتێ و وەزارەتا ساخلەمیێ ل دۆر کۆرۆنا نەکەت.
سەرۆکێ حوکمەتێ ئەو یەک ژی دیار کر کو دڤێت دەست ب هەوەکا نشتیمانی بهێتە کرن بۆ کۆمکرنا هاریکاریان بۆ خەلکێ هەژار و ب هەموو رەنگەکێ هاریکاریا وان کەسان بهێتە کرن.
نيشاندان