ئه‌ڤرۆ نیوز، عه‌زیز هه‌ورامی:

له‌ هه‌رێمی كوردستان 34 حاڵه‌تی هه‌ڵگری ڤایرۆسی كۆرۆنا تۆماركراوه‌، یه‌ك دانه‌یان ماموستای ئاینی بو له‌ سلێمانی گیانی له‌ ده‌ستدا، وه‌زیری ته‌ندروستی ده‌ڵێ، ته‌ندروستی هه‌ڵگرانی ڤایرۆسی كۆرۆنا باشن.

دكتۆر سامان به‌رزنجی وه‌زیری ته‌ندروستی هه‌رێمی كوردستان، به‌ ئه‌ڤرۆ نیۆزی ڕاگه‌یاند:” له‌ كوردستان 34 حاڵه‌تی هه‌ڵگری فایرۆسی كۆرۆنا تۆماركراوه‌، به‌رده‌وامیش پشكنین بۆ ئه‌و كه‌سانه‌ ده‌كه‌ین نیشانه‌كانی كۆرۆنایان لێ ده‌ركه‌وێ.

سامان به‌رزنجی ده‌ڵێ، ڕه‌وشی ته‌ندروستی هه‌ڵگرانی ڤایرۆسی كۆرۆنا زۆر باشن، ته‌نها دانه‌یه‌كیان نه‌بێت ژنێكه‌ و باری ته‌ندروستی ناجێگره‌.

هه‌روه‌ها وتیشی، هه‌ركه‌سێ له‌ هه‌روڵاتێك هاتبێته‌وه‌ له‌ فڕۆكه‌خانه‌كانه‌وه‌ ڕاسته‌وخۆ براون بۆ كه‌ره‌نتینه‌كان به‌رده‌وامیش ده‌بین له‌سه‌ر ئه‌وه‌ی كه‌ره‌نتینه‌ی ته‌واوی ئه‌و گه‌شتیارانه‌ بكه‌ین له‌ وڵاتان ده‌گه‌ڕێنه‌وه‌، سودێكی زۆر باشمان له‌ كه‌ره‌نتینه‌ بینیوه‌.

له‌ ڕونكردنه‌وه‌یه‌كدا دكتۆر سه‌باح هه‌ورامی به‌ڕێوه‌به‌ری گشتی ته‌ندروستی سلێمانی ڕای گه‌یاند” سێ كه‌س له‌ سلێمانی په‌تای كۆرۆنایان په‌ڕاندووه‌، به‌ته‌واوه‌تی چاك بونه‌ته‌وه‌ نێردراونه‌ته‌وه‌ بۆ ناو ماڵ و منداڵه‌كانیان.

ئه‌ڤرۆ نیۆز، عه‌زیز ڕه‌سووڵ:

حكوومه‌تی هه‌رێمی كوردستان، بۆ به‌ره‌نگاربوونه‌وه‌ی په‌تای كۆرۆنا چه‌ندین ڕێكارو ڕێنمایی گرتوه‌ته‌به‌ر، گوته‌بێژی وه‌زاره‌تی ته‌ندروستی ده‌ڵێ، ئێستا ئێمه‌ له‌ نێوان چاره‌سه‌ر و به‌رگریداین به‌رامبه‌ر كۆرۆنا.
محه‌ممه‌د خۆشناو، گوته‌بێژی وه‌زاره‌تی ته‌ندروستیی حكوومه‌تی هه‌رێمی كوردستان، به‌ ئه‌ڤرۆ نیۆزی ڕاگه‌یاند”: ئێستا ئێمه‌ له ‌كوردستان زۆرباش توانیومانه‌ كۆنتڕۆڵی ڤایرۆسی كۆرۆنا بكه‌ین، به‌رده‌وام كار له‌سه‌ر ڕێكاره‌كان ده‌كه‌ین،هاونیشتمانیان دڵنیا ده‌كه‌ینه‌وه‌ له‌ ڕێكاره‌كان بۆ سه‌لامیتی ته‌ندروستی هه‌موو لایه‌ك به‌رده‌وام ده‌بێت.

خۆشناو ده‌ڵێ:” له‌ ماوه‌یه‌كی نزیكدا ده‌رئه‌نجامی قه‌ده‌غه‌ی هاتوچۆ ده‌رده‌كه‌وێت کە چه‌ند سوودی هه‌بووه‌، هه‌رئه‌وه‌ش وای كرد جارێكی تر 72 سه‌عاتی تر قه‌ده‌غه‌ی هاتوچۆ درێژبكه‌ینه‌وه‌.

گوته‌بێژی وه‌زاره‌تی ته‌ندروستی گوتیشی: ”هاوڵاتیان زۆرباش پابه‌ندی ڕێنمایه‌كانن، سه‌رۆكوه‌زیران مه‌سروور بارزانی، به‌رده‌وام له‌سه‌ر خه‌ته‌ له‌گه‌ڵمان، ئه‌و پێشنیار و داوایانه‌ی وه‌زاره‌تمان بیكات جێبه‌جێ ده‌كرێن و ئاراسته‌ی وه‌زاره‌ته‌ مه‌عنییه‌كانی تر ده‌كرێن بۆ جێبه‌جێ كردنیان.

هه‌روه‌ها ده‌ڵێ:” یه‌كێك له‌ پلانه‌ باشه‌كان حكوومه‌تی هه‌رێم گرتیه‌به‌ر بۆ ڕوبه‌ڕوبونه‌وه‌ی ڤایرۆسی كۆرۆنا، كه‌ره‌نتینه‌ بوو بۆ ئه‌وكه‌سانه‌ی له‌ ئێران ده‌گه‌ڕانه‌وه‌،كه‌ ئێستا ده‌زاندرێت ئه‌گه‌ر كه‌ره‌نتینه‌ نه‌بوایه‌ چه‌ دۆخێكی خه‌راپ دروست ده‌بو، بۆیه‌ كاركردن به‌به‌رنامه‌ی كه‌ره‌نتینه‌ به‌رده‌وام ده‌بێت هاوڵاتیان له‌ هه‌ر وڵاتێكی تر بێته‌وه‌ ئه‌وه‌ كه‌ره‌نتینه‌ ده‌كرێن.