ئه‌ڤرۆ نیوز، عه‌زیز هه‌ورامیی:

له‌ پاش خیانه‌تی 16ـی ئۆكۆبه‌ری 2017 كشانه‌وه‌ی پێشمه‌رگه‌ له‌ ناوچه‌كانی ده‌ره‌وه‌ی ئیداره‌ی هه‌رێمی كوردستان ،له‌ وه‌رزی دروێنه‌ی گه‌نم و جۆ به‌رهه‌می ساڵی جووتیارانی كورد ئاگر تێبه‌رده‌درێت، به‌رپرسێكی باڵای پارتی ده‌ڵێ، جوتیارانی عه‌ره‌ب به‌رهه‌می خۆیان دروێنه‌ ده‌كه‌ن و به‌رهه‌می جووتیارانی كوردیش ده‌سوتێندرێت.

ئه‌كبر حیده‌ر جێگری به‌رپرسی لقی 15ی خانه‌قینی پارتی دیموكراتی كوردستانی به‌ ئه‌ڤرۆ نیۆزی ڕاگه‌یاند:” گومان هه‌یه‌ له‌ سووتاندنی به‌رهه‌می گه‌نم و جۆی جووتیارانی كورد له‌ خانه‌قین و ده‌وروبه‌ری، له‌ لایه‌ن چه‌كدارانی داعش و ئه‌و عه‌ره‌به‌ هاوردانه‌ی له‌ پاش 16ـی ئۆكتۆبه‌ر هاتوونه‌ته‌ سنووره‌كه‌.

ئه‌كبر حیده‌ر وتیشی:” له‌ كاتێكدا به‌رهه‌می گه‌نمی ساڵێكی جووتیارانی كورد ده‌سوتێندرێت ،جووتیاره‌ عه‌ره‌به‌كان زۆر به‌ ئازادی دروێنه‌ی به‌رهه‌می گه‌نم و جۆ ده‌كه‌ن ،ئه‌ی خێره‌ به‌رهه‌می جووتیارانی عه‌ره‌ب ناسوتێندرێت.

به‌رپرسه‌كه‌ی پارتی له‌ خانه‌قین ده‌ڵێ:” گروپێكی چه‌كداری حه‌شدی شه‌عبی كه‌ له‌ هۆزه‌عه‌ره‌به‌كانن به‌شه‌ودا ده‌بنه‌ چه‌كداری داعش و به‌ ڕۆژدا ده‌بنه‌وه‌ به‌ حه‌شدی شه‌عبی ، هه‌موو ئه‌و ئازاردانه‌ی جووتیارانی كورد بۆ ئه‌وه‌یه‌ ناچاریان بكه‌ن زێدی باو باپیرانیان به‌جێ بهێڵن و ئێستا به‌عه‌ره‌ب كردن زۆر خه‌راپتر ده‌ستی پێكراوه‌ له‌ سه‌رده‌می حكوومڕانی دیكتاتۆر سه‌ددام حوسێن.

هه‌روه‌ها زانیاری زیاتریدا و گوتی:” سه‌ددان دۆنم زه‌وی گه‌نمی جوتیارانی كورد سوتێندراون جووتیاران ته‌نها زه‌وێكی سوتاویان بۆماوه‌ته‌وه‌ ،چاو پڕله‌ فرمێسك له‌ دۆخه‌كه‌یان ده‌ڕوانن هێزه‌ عێراقییه‌كان هیچ هاوكاری و پشتیوانییه‌كیان نین.