پەیڤدارێ حوكمەتا هەرێما كوردستانێ ڕاگەهاند، ئەو ڕاپۆرتێن باس ل پڕچەككرنا هێزێن كوردی بۆ ناڤ ئیرانێ دكەن، دوورن ژ ڕاستیێ.
پێشەوا هەورامی، پەیڤدارێ حوكمەتا هەرێما كوردستانێ د بەیاننامەیەكێدا هەموو ئەو دەنگوباسە ڕەتكرن یێن ئاماژەكرین كو هەرێما كوردستانێ پشكەك بیت ژ پلانەكێ بۆ پڕچەككرن و هنارتنا هێزێن كوردی یێن ئۆپۆزسیۆن بۆناڤ ئاخا ئیرانێ و گوت» ئەو جۆرە ڕاپۆرتە ب مەبەست دهێنە بەلاڤكرن».
پێشەوا هەورامی دوپاتكر كو حوكمەتا هەرێما كوردستانێ و پارتێن سیاسی یێن هەرێما كوردستانێ پشكەك نینن ژ هیچ هەوەكێ بۆ بەرفرەهكرنا شەڕ و ئالۆزییان ل دەڤەرێ.
سەبارەت ب هەلوەستێ هەرێما كوردستانێ ل سەر ڕەوشا دەڤەرێ، پەیڤدارێ حوكمەتا هەرێما كوردستانێ ڕۆهنكر» بەرۆڤاژی ئەم داخواز ئاشتی و ئارامییا دەڤەرێ دكەین».
د پشكەكا دی یا بەیاننامەیێدا، پەیڤدارێ حوكمەتا هەرێما كوردستانێ ئەو هێرشێن ڕۆژانە ل سەر هەرێما كوردستانێ دهێنە كرن پرۆتەستۆ كرن و ب هێرشێن ترسناك هەژمارتن.
پێشەوا هەورامانی داخواز ژ حوكمەتا ئیراقا فیدرال و جڤاكا نێڤدەولەتی كر، هێرشێن سەر هەرێما كوردستانێ دهێنە كرن ڕابگرن و كاری بۆ پاراستنا ئاخ و خەلكێ هەرێما كوردستانێ و دەڤەرێ بكەن.

ئیلهام ئەحمەد بەرپرسا پەیوەندیێن دەرڤە یا رێڤەبەریا خوەسەر یا رۆژئاڤایێ کوردستانێ دیار کر، هەتا سیستەمێ سووریێ نەبیتە فیدرالی ئالۆزیێن هەی ژی چارەسەر نابن، هێشتا رێککەفتنا هەسەدێ و شامێ ب تەمامی نەهاتیە بجهئینان و دڤێت شام رێزی ل ئیرادەیا گەلێ کورد بگریت، ل ئالیێ دی دورزی و عەلەوی و پێکهاتەیێن دی یێن ل سووریێ ژی داخوازا مافێن خوە دکەن، پێکهاتەیێن ل سووریێ نها ل دژی سیستەمەک ناڤەندی نە و دڤێت سیستەمێ سووریێ ببیتە فیدرالی، چونکی سووریێ تنێ یا عەرەبان نینە، بەلکو یا هەموو خەلکێ سووریێ یە و دڤێت هەموو پێکهاتەیێن ل سووریێ دژین د برێڤەبرنا وەلاتی دا پشکدار بن.
ناڤهاتیێ ئەو یەک ژی دیار کر، بەری نها ژی وان گەلەک جاران دیار کرینە کو دڤێت سیستەمێ سووریێ ببیتە سیستەمەک نە ناڤەندی، چونکی رەوشا چەند مەهێن بۆری سەلماندیە کو کەس نەشێت وەکو بەری نها حوکمێ ل هەموو سووریێ بکەت و گۆت: (دڤێت ئەمریکا و وەلاتێن ئێکەتیا ئۆرۆپا ژی هاریکار بن دا شام یا نەچار بیت دەست ژ زۆرداریێ بەردەت و رێزێ ل ئیرادەیا هەموو نەتەوە و پێکهاتەیێن ل سووریێ بگریت، ژ بەر ڤێ یەکێ ژی وەکو رێڤەبەریا خوەسەر ئەم دبێژین فیدرالی باشترین چارەسەریە بۆ رەوشا نها یا ئالۆز ل سووریێ و دڤێت هەموو وەلاتێن دی ژی هاریکار بن).

سەرۆكێ هەرێما كوردستانێ ل گەل وەزیرێ دەولەتێ بۆ كاروبارێن دەرڤە یێ ئەلمانی و شاندێ د گەلدا كۆمبوو. وەزیرێ ئەلمانی و شاندی دوپاتكر، وەلاتێ وان ب گرنگی ڤە دنێڕیتە ئارامییا ئیراقێ و هەرێما كوردستانێ.
ل ڕۆژا چارشەمبی 25/2/2026، نێچیرڤان بارزانی، سەرۆكێ هەرێما كوردستانێ پێشوازی جێزا ئەندریاس ڤۆنگایەر، وەزیرێ دەولەتێ بۆ كاروبارێن دەرڤە یێ ئەلمانی و شاندەكێ د گەلدا كر.
سەرۆكایەتییا هەرێما كوردستانێ بەلاڤكر» د كۆمبوونەكێدا هەردو ئالییان، پێشڤەبرنا هەڤبەندیێن ئەلمانیا ل گەل ئیراقێ و هەرێما كوردستانێ، دوماهی پێشهاتێن ڕەوشا سیاسییا ئیراقێ و هەرێما كوردستانێ و هەڤبەندیێن هەولێرێ- بەغدایێ و ڕەوشا پەكەكێ، هاتنە گەنگەشەكرن».
سەرۆكایەتییا هەرێمێ دیاركر ژی» شاندێ ئەلمانی دوپاتكر، ئەلمانیا ب گرنگی ڤە دنێڕیتە ئارامییا ئیراقێ و هەرێما كوردستانێ و خواستا وەلاتێ خوە بۆ بەردەوامییا هاریكارییا هەڤپشك د وارێن جودا جودا دا، دیاركر».
ژ ئالیێ خوەڤە نێچیرڤان بارزانی سوپاسییا هاریكاری و پشتەڤانیێن ئەلمانیایێ بۆ هەرێما كوردستانێ د هەموو واراندا كر، هەروەسا دوپاتی ل گرنگییا چارەسەركرنا ئاشتییانەیا كێشەیان و پاراستنا ئارامییا ناڤچەیێ كر.
گەڤ و مەترسیێن داعشێ، ڕەوشا سووریێ و چەند پرسێن جهێ گرنگییا هەردو ئالییان، تەوەرەكێ دی یێ كۆمبوونێ بوو كو بالیۆزێ ئەلمانیا ل ئیراقێ و قونسلێ گشتیێ ئەلمانیا ل هەرێما كوردستانێ بەرهەڤ بوون.

سەرۆكێ حوكمەتا هەرێما كوردستانێ ل گەل بریكارێ وەزارەتا دەرڤەیا ئەلمانیا كۆمبوو و هەردو ئالییان دوپاتی ل پێشڤەبرنا هاریكارییان بۆ ڕوو ب ڕووبوونا داعشێ كر.
ل ڕۆژا چارشەمبی 25/2/2026، مەسرور بارزانی، سەرۆكێ حوكمەتا هەرێما كوردستانێ پێشوازی ل جیزا ئەندریاس ڤۆنگەیر، بریكارێ وەزارەتا دەرڤەیا ئەلمانیا و شاندەكێ د گەلدا كر.
حوكمەتا هەرێما كوردستانێ د بەیاننامەیەكێدا بەلاڤكر» د كۆمبوونەكێدا كو دانیال كرێبەر، بالیۆزێ ئەلمانیا ل ئیراقێ بەرهەڤبووی، هەردو ئالی هەڤڕابوون ل سەر گرنگییا بهێزكرنا هەڤبەندیێن دوقۆلی».
سەرۆكێ حوكمەتا هەرێما كوردستانێ سوپاسییا پشتەڤانی و هاریكاریێن ئەلمانیایێ بۆ هەرێما كوردستانێ كر و دوپاتی ل پێشئێخستنا هەڤبەندییان كر.
تەورەكێ سەرەكیێ كۆمبوونێ تایبەت بوو ب پرسا تیرۆرێ، هەردو ئالییان دوپاتی ل پێدڤییا پێشڤەبرنا هاریكاری و هەماهەنگییا جڤاكا نێڤدەولەتی كر بۆ ڕوو ب ڕووبوونا گەف و مەترسیێن تیرۆرستێن داعشێ ل ئیراقێ و سووریێ.
د پشكەكا دی یا دیدارێدا، ڕەوشا گشتییا ئیراقێ و دەڤەرێ، هەروەسا بزاڤ و دانوستاندنێن تایبەت ب هەلبژارتنا سەرۆككۆماری و پێكئینانا حوكمەتا فیدرال و حوكمەتا هەرێما كوردستانێ هاتنە گەنگەشەكرن.

ڕێڤەبەرێ گشتیێ دەستەیا دیوانا چاڤدێرییا دارایی ل هەرێما كوردستانێ، ڕاگەهاند: حوكمەتا فیدرالی هندەك جاران باس وێ چەندێ دكەت كو بەهرا تمام یا هەرێما كوردستانێ هنارتییە بەلێ ئەڤە تنێ بۆچوون و لێكدانا مزاجییە و یا پشتبەستنكری نینە ب هیچ ڕاستی و قانوونەكێ.
محەمەد زراری، ڕێڤەبەرێ گشتیێ دەستەیا دیوانا چاڤدێرییا دارایی ل هەرێما كوردستانێ گوت» بودجەیا سالا 2026 یا ئیراقێ، هەتا دەرچوونا وێ قانوونێ، دبیت كێشە ب وی شێوەیی نەبن، هەكە بودجە نەبوو، ب گۆرەی قانوونا ئیدارەیا مالی (1/12) یا سالا بۆری دێ بیتە بنەما، ئەڤە دەنگوباسەكێ دلخوەشكەرە ب ڕاستی».
محەمەد زراری گوت ژی» حوكمەت نەهاتیە پێكئینان، هەكە حوكمەت نەهێتە پێكئینان، قانوونا بودجەی نابیت، قانوونا بودجەی دڤێت ژ ئالیێ حوكمەتێ ڤە بۆ لیژنەیا دارایی ل جڤاتا نوونەران بهێتە هنارتن، ل وێرێ دانوستاندن ل سەر بهێتە كرن، دو هەتا سێ جاران تاكو وی وەختێ كو دەنگدان ل سەر دهێتە كرن، بەلێ پێدڤی وەختەكێ زۆرە، بەلێ ئەوا نوكە یا گرێدای ب سالێن 2023 هەتا نوكە د ناڤبەرا هەرێما كوردستانێ و بەغدایێ دا گەلەگ گرنگە، چونكە حوكمەتا ئیراقێ باسێ وێ چەندێ دكەت كو بەهرا هەرێما كوردستانێ هنارتییە یان ب زێدەیی ڤە، بەلێ ئەو بابەتە هەموو دوورن ژ ڕاستیێ و بەهانەنە دئینیت».
هەروەسا ناڤبری ئاماژە ب وێ چەندێ كر» چارەسەریێن نوكە هەڤبەندی ب قانوونا بودجەی ڤە هەیە، نەبوونا قانوونا بودجەی ئەگەرێ كێشەیێن هەولێرێ و بەغدایێ یە».
دیاركر ژی» حوكمەتا فیدرالی هندەك جاران باس ل وێ چەندێ دكەت كو بەهرا تمام یا هەرێما كوردستانێ هنارتییە، بەلێ ئەڤە تنێ بۆچوون و لێكدانا میزاجییە و پشتبەستنكری نینە ب هیچ ڕاستی و قانوونەكێ «.

فەرماندارێ گشتی یێ هەسەدێ دیار دکەت، رێککەفتنا ل گەل شامێ د رەوشا نها دا بۆ کوردان باشە، لێ وەکو کوردێن سووریێ ئەو داخوازا ئۆتۆنۆمیێ دکەن و هەتا کورد ل سووریێ نەگەهنە مافێن خوە ئالۆزیێن ل سووریێ ژی دێ بەردەوام بن.

مەزلوم عەبدی فەرماندارێ گشتی یێ هێزێن سووریا دیموکرات دیار کر، رێککەفتنا وان یا ل گەل شامێ خراب نینە، ئانکو رێککەفتنەک باش هاتیە کرن، رەنگە ئەو یەک ب دلێ کوردان نەبیت، چونکی کوردێن سووریێ داخوازا هەرێمەکا کوردی ل سووریێ دکەن، لێ د رەوشا نها یا ئالۆز دا بۆ وان گرنگە کو دەڤەرێن کوردی د دەستێ وان دا بیت، ئانکو دڤێت کورد دەڤەرێن خوە برێڤە ببەن، دڤێت شام ژی رێزێ ل ئیرادەیا گەلێ کورد ل سووریێ بگریت و گۆت: (کورد د شەڕێ ل دژی داعشێ دا گەلەک قوربانی دان، هەروەسا د سەردەمێ رژێما بەعس دا ژی گەلەک زۆرداری ل گەلێ کورد هاتە کرن، بێگومان مافێ کوردانە ل سووریێ داخوازا هەرێمەکا کوردی بکەن، مە وەکو کوردێن سووریێ ئۆتۆنۆمی دڤێت، لێ ژ بەر رەوشا ئالۆز یا نها ئەم دبێژین رێککەفتنا کو هاتیە کرن خراب نینە، لێ د هەمان دەمی دا د ئاستێ داخوازیێن کوردێن سووریێ دا نینە).
فەرماندارێ گشتی یێ هەسەدێ د پشکەکا دی یا داخویانیا خوە دا ئەو یەک ژی دیار کر، رێککەفتنا کو ڤێ دووماهیێ ل گەل شامێ هاتە ئیمزا کرن د رەوشەکا تایبەت دا بوو، چونکی پشتی شەڕی و ئێرشێن شامێ ب فشارێن ئەمریکا و فرەنسا و هندەک وەلاتێن دی شام ژی نەچار ما هندەک ژ داخوازییێن گەلێ کورد قەبوول بکەت و گۆت: (لێ خالا هەری گرنگ دیسان کورد بوون، شەرڤانێن مە ل سەنگەرێن شەڕی بەرخوەدانیەک مەزن کرن، هەروەسا گەلێ مە ل هەرێما کوردستانێ و پارچەیێن دی و هەروەسا ل ئۆرۆپا ژی دەست ب خوەنیشادانێن گەلەک مەزن کرن، ئێکەتیا کوردان وەسا کر شام ژی نەچار بیت دەست ژ پیلانا خوە بەردەت، ئەم سوپاسیا هەرێما کوردستانێ دکەین کو د رەوشەکا وەسا ئالۆز دا پشتەڤانیا رۆژئاڤایێ کوردستانێ کر و هەروەسا برایێن مە ل هەرێما کوردستانێ هاریکار بوون دا چو کارەساتێن مەزن ل رۆژئاڤایێ کوردستانێ روو نەدەن).
سەبارەت ب سیاسەتا ئەمریکا ژی فەرماندارێ هەسەدێ دیار کر، ئەمریکا خیانەت ل وان نەکریە، چونکی بەری نها ژی گەلەک جاران بەرپرسێن ئەمریکا دیار کربوون ئەو ژ بەر داعشێ هاتینە سووریێ و ئەمریکا چو جاران سۆز نەدابوو هەسەدێ یان ژی کوردێن سووریێ کو دێ ژ بۆ کوردان شەرێ شامێ یان ژی ئالیەکێ دی کەت، لێ خالا بۆ کوردان باش نەبوو هەلوەستێ هێزێن هەڤپەیمانان بوون، چونکی دەمێ هێزێن سەر ب شامێ ئێرشی دەڤەرێن کوردی کری و گەلەک وەلاتیێن سڤیل بوونە قوربانی وی دەمی هێزێن هەڤپەیمانان دشیان ئاستەنگیان دروست بکەن و رێ نەدەن گرۆپێن چەکدار ئێرشی خەلکی مە بکەن، لێ مخابن ئەو یەک نەهاتە کرن و گەلەک وەلاتیێن سڤیل بوونە قوربانی.
فەرماندارێ هێزێن سووریا دیموکرات ئاماژە ب ڤێ یەکێ ژی کر کو، کوردێن سووریێ دەست ژ داخوازیێن خوە بەرنادەن، هەکە شام پێگیریێ ب رێککەفتنێ نەکەت و بزاڤا ڤێ یەکێ بکەت دەستکەفتیێن کوردان ژناڤ ببەت وەکو کوردێن سووریێ ئەو دێ هەتا دووماهیێ شەڕی کەن و گۆت: (مە بەری نها ژی چەندین جاران دیار کریە، کو هەرێمێن کوردی بۆ مە هێلێن سۆرن، ئانکو رێ نادەین چو هێزەک دەربازی رۆژئاڤایێ کوردستانێ ببیت، دڤێت شام ژی رێزێ ل رێککەفتنێ بگریت، لێ هەکە رێککەفتن بهێتە بنپێکرن و ئێرشی رۆژئاڤایێ کوردستانێ بهێتە کرن وی دەمی ئەم دێ هەتا دووماهیێ شەڕی کەین و رێ نادەین چو هێزێن سەر ب شامێ دەربازی رۆژئاڤایێ کوردستانێ ببن).
مەزلوم عەبدی سەبارەت ب پاشەرۆژا سووریێ ژی دیار کر، نها رەوشا سووریێ گەلەک ئالۆزە، چونکی عەلەوی و دورزی و پێکهاتەیێن دی یێن ل سووریێ داخوازا مافێن خوە دکەن، بەری نها ژی مە گەلەک جاران دیار کریە کو دڤێت سیستەمێ سووریێ سیستەمەک نە ناڤەندی بیت دا هەموو پێکهاتەیێن ل سووریێ بشێن د دەستهەلاتا نها دا جه بگرن، هەکە حوکمەتا بەروەخت بزاڤا ڤێ یەکێ بکەت ب زۆرێ خوە ل سەر خەلکێ دی بسەپینیت وی دەمی دێ سووریێ تووشی شەڕەکێ ناڤخوەیی بیت و گۆت: (دڤێت مافێن گەلێ کورد و هەموو پێکهاتەیێن دی د دستوورێ نوو یێ سووریێ دا بهێتە گەرەنتیکرن، مە بەری نها ژی چەندین جاران دیار کریە کو پێدڤیا سووریێ ب دستوورەک نوو و دیموکراتی هەیە، دڤێت کورد و هەموو پێکهاتەیێن دی یێن کو ل سووریێ دژین د ئامادەکرنا دستوورێ نوو دا پشکدار بن، دڤێت شام رێزێ ل ئیرادەیا هەموو پێکهاتەیان بگریت، هەکە تشتەک وەسا بهێتە کرن بێگومان دێ هەموو پرسێن هەی ل سووریێ هێنە چارەسەرکرن).

نێچیرڤان بارزانی، سەرۆكێ هەرێما كوردستانێ پێشوازی ل تۆم باراك، هنارتیێ تایبەتێ سەرۆكێ ئەمریكا بۆ كاروبارێن سووریێ وبالیۆزێ ئەمریكا ل توركیا كر. سەرۆكاتییا هەرێما كوردستانێ ژی ڕاگەهاند: سەرۆكێ هەرێمێ بۆ تۆم باراكی دوپاتكر كو هەرێما كوردستانێ وەك هەردەم دێ فاكتەرێ ئارامیێ بیت.
ب گۆرەی بەیاننامەیەكا سەرۆكاتییا هەرێما كوردستانێ، د كۆمبوونەكێدا كو جۆشوا هاریس، كاربڕێڤەبەرێ بالیۆزخانەیا ئەمریكا ل ئیراقێ بەرهەڤبووی، هەڤبەندیێن ئەمریكا ل گەل ئیراقێ و هەرێما كوردستانێ، دووماهی پێشهاتێن ڕەوشا سووریێ و پرۆسەیا سیاسی ل ئیراقێ و هەرێما كوردستانێ هاتنە گەنگەشەكرن».
شاندێ ئەمریكی ڕێز بۆ ڕۆلێ نێچیرڤان بارزانی د بزاڤێن خوە یێن دیپلۆماسیدا بۆ ئارامییا دەڤەرێ و ڕێككەفتنا د ناڤبەرا دیمەشقێ و هەسەدە دا، هەبوو.
ژ ئالیێ خوەڤە سەرۆكێ هەرێما كوردستانێ دوپاتكر كو هەرێما كوردستانێ وەك هەردەم دێ فاكتەرێ ئارامیێ بیت.
دووماهی پێشهاتێن دەڤەرێ، تەوەرەكێ دی یێ كۆمبوونێ بوو و نێچیرڤان بارزانی دوپاتی ل گرنگییا چارەسەركرنا ئاشتییانەیا كێشەیان و پاراستنا ئارامیێ ل دەڤەرێ، كر.

مەسرور بارزانی، سەرۆكێ حوكمەتا هەرێما كوردستانێ، پێشوازی ل قوسەی مەحبووبە، سەرۆكێ حزبا ئەمارجی یا لیبرالییا ئیراقی و سەركردە ل هەڤپەیمانییا ئاڤەدانكرن و گەشەپێدان كر.
حوكمەتا هەرێما كوردستانێ د بەیاننامەیەكێدا ل دۆر كۆمبوونا د ناڤبەرا هەردو ئالییاندا بەلاڤكر» د دیدارەكێدا ڕەوشا گشتییا ئیراقێ و دەڤەرێ و بزاڤ و دانوستاندنێن پێكئینانا كابینەیا نوو یا حوكمەتا ئیراقا فیدرال هاتە گەنگەشەكرن».

ل ڕۆژا سێشەمبی 24/2/2026، مەسرور بارزانی، سەرۆكێ حوكمەتا هەرێما كوردستانێ، د ڕێورەسمەكێ تایبەتدا، پڕۆژەیێ دوسایدیێ هەولێر – گۆمەسپان ڤەكر، هەروەسا پەیڤەك ژی پێشكێشكر و ئەڤە دەقێ وێ یە:
بەری هەر تشتەكی سوپاس بۆ خودای كو دەلیڤە دا مە بشێین خزمەتگوزارییان پێشكێشی خەلكێ هەموو كوردستانێ بكەین و ب تایبەتی خەلكێ باژێڕێ هەولێرا خوەشتڤی و دەوروبەرێن هەولێرێ.
سوپاسییەكا مەزن یا كاك هێمنی و هێمن گرۆپ دكەم كو وەك هەردەم د وەختەكێ پیڤانەییدا، ب شێوازەكێ گەلەك جوان و ستانداردەكێ نێڤدەولەتی، شیان ڤی پڕۆژەیێ مەزن بجهبینن و بێخنە د خزمەتا خەلكێ كوردستانێدا.
ل ڤێرێ ب تایبەت دخوازم دەستخوەشیێ ل ئەندازیارێ خودان شیان كاك ئەمیر و هەموو فەرمانبەر و ئەندازیار و وان كەسان ژی بكەم كو كار تێدا كری، دەستخوەشیێ ل هەوە هەموویان دكەم، هەوە گەلەك زەحمەت كێشا و ئەم گەلەك دلخوەش و سەربلندین كو نوكە مە ل هەرێما كوردستانێ كۆمپانیێن وەسا هەنە بشێن پڕۆژەیێن وەسا مەزن ب ڤی ئاستێ بلند دروست بكەن، ئینشائەللا نموونەیێن وەك هەوە گەلەك بن.
سوپاسییا وەزیرێ ئاڤەدانكرنێ، پارێزگەرێ هەولێرێ و هەموو وان بەرپرس و ئالیێن پەیوەندیدار دكەم كو زەحمەت كێشای و پشكداربووین د بجهئینان و تمامكرنا ڤی پڕۆژەیێ مەزن دا. ئەڤە پڕۆژەیەكێ مەزنە كو دشێت خزمەتا هاتنوچوونا وەلاتییان بكەت، د هەمان وەختدا بابەتێ سلامەتییا وەلاتییان ژی ل بەرچاڤ هاتیە وەرگرتن و بێگومان دێ وەلاتی و پاراستیتر بن.
مە هەموویان هاتنوچوون د ڤێ ڕێكێدا یا كریە، ل بیرا منە گەلەك جاران دهاتینە ڤێرێ، مە سەرەدانا هەولێرێ دكر یان د ڤێ ڕێكێدا دزڤڕین، ب ڕاستی جهێ مەترسیێ بوو، بەلێ نوكە ب ڤی شێوازێ كو ئەڤ ڕێكە هاتیە دروستكرن، هەم وەلاتی دێ شێن ب وەختەكێ كێمتر سەرەدانا دەڤەرێن خوە كەن، هەم خەلكێ دەوروبەرێ هەولێرێ دێ شێن بۆ ئەنجامدانا كارێن خوە سەرەدانا هەولێرێ كەن و ئەڤە دێ پێكڤەگرێدانا باژێڕ و باژێڕكان د ناڤبەرا هەموو باژێڕێن كوردستانێدا ب ساناهی ئێخیت، د ڤی وەختیدا ب تایبەتی ل ڤێرێ كو هەولێر ب گۆمەسپان و دۆلا سماقۆلی و ڕێكا كۆیە و سلێمانیێ گرێددەت. ژ ئالییەكێ دی ژی ڤە دیشان ئەڤە دێ بەردەوام بیت بۆ زڤڕینێ ب ڕێكا بەستۆرە و جارەكادی بۆ هەولێرێ.
گەلەك جهێن گەشتیاری ل ڤێ دەڤەرێ هەنە و دەست ب هندەكان هاتیە كرن و بووینە جهێن گەشتیاری، ب تایبەتی بەنداڤا گۆمەسپان كو نوكە هاتیە دروستكرن، دیسان پێشتر ژی ڕێكەكا هەڤشێوەیێ ڤێ ل دەوروبەرێ بەنداڤێ هەیە، كو ئەڤە دێ ب ساناهی ئێخستنەكا مەزن بۆ خەلكێ كوردستانا خوەشتڤی و هەولێرێ كەت، كو ئینشائەللا د ڤی وەرزیدا، وەرزا هاتنا بوهارێ، هیڤیدارین وەرزەكێ خوەش بیت، دخوازم ئاڤ و سەقا د خوەش بن چونكە بارانەكا باش بارییە، خەلك بشێن خوەشیێ ل سروشتێ جوان یێ كوردستانێ ببەن.
داخوازییا من ژی ژ خەلكی ئەوە ڕێنمایێن هاتنوچوونێ ل بەرچاڤ وەربگرن و بۆ پاراستنا ژیانا خوە و وەلاتیێن دی، ب لەز ترۆمبێلێن خوە نەهاژون. هیڤیدارم هوون هەموو سەربلند بن، ئەم ژی بشێین زێدەتر خزمەتا هەوەیێن خوەشتڤی بكەین.