ئامینە بەكر، سەرۆكا پشكا ڤەكۆلینێن وزەی ل رۆژهەلاتا ناڤین و ئۆپێك پلەس ل كۆمپانییا كێپلەر، كو كۆمپانییەكا سەربخوەیا جیهانییە بۆ پێزانینێن بازرگانی یێن تایبەت ب كەرەستان، راپۆرتەك ل پێگەهێ دەنگوباسێن ناشنال بەلاڤكریە.
ئامینە بەكر د راپۆرتا خوەدا باس ل وێ چەندێ كریە»ئەڤ هێرشا ل سەر زەڤییا كۆرمۆر یا غازی د وەختەكیدا بوو كو ل دەستپێكا ڤێ مەهێ، مەسرور بارزانی، سەرۆكێ حوكمەتا هەرێما كوردستانێ د دیدارەكا تایبەتدا كو من ل گەل ئەنجامدابوو ل كۆڕبەندێ ئاشتیێ و ئاسایشا رۆژهەلاتا ناڤین (MEPS) هۆشدارییەكا رۆهن ل دۆر ڤێ چەندێ دابوو».
دیاركر ژی» ئەو هێرشا ل سەر زەڤییا كۆرمۆر یا غازی كو بوویە ئەگەرێ بڕینا كارەبێ ل سەر وەلاتییان، راستی و دروستییا هۆشداریێن مەسرور بارزانی، سەرۆكێ حوكمەتا هەرێما كوردستانێ د سەلمینیت كو د كۆڕبەندیدا راگەهاندبوو و ئازادكرنا ئەنجامدەرێن هێرشان ژ ئالیێ بەغدایێ ڤە، دێ بیتە ئەگەرێ بەردەوامییا هێرشان».
سەرۆكا پشكا ڤەكۆلینێن وزەیا رۆژهەلاتا ناڤین و ئۆپێك پلەس داخۆیانیێن مەسرور بارزانی دئینیتە بیر و دبێژیت» سەرۆكێ حوكمەتا هەرێما كوردستانێ گوتبوو: ناسنامەیا وان كەسان ئاشكرابوویە كو دەست د هێرشێن بۆریدا هەبوویە، بەلێ وەختێ هندەك ژوان كەسان هاتینە دەستەسەركرن، ژ ئالیێ دەستهەلاتدارێن حوكمەتا فیدرالی ڤە ب كەفالەت هاتنە ئازادكرن».
سەرۆكێ حوكمەتا هەرێمێ وی وەختی دوپاتكربوو و گوتبوو» پێنگاڤێن ئیراقێ بۆ ئازادكرنا وان گرۆپان تنێ دێ بیتە ئەگەرێ ئەنجامدانا هێرشێن زێدەتر. تنێ چەند رۆژان پشتی ئاخڤتنێن وی، پێشبینییا مەسرور بارزانی راست دەرچوون و زەڤییا كۆرمۆرێ كرە ئارمانج.
هەروەسا د وێ راپۆرتێدا هاتیە، مەسرور بارزانی هۆشدارییا وێ چەندێ دا كو دبیت ئیراق بزاڤێ بكەت جارەكادی هنارتنا پەترۆلێ ب رێكا بۆرییا د ناڤبەرا هەرێما كوردستانێ و توركیا دا رابگریت، كو پشتی دو سالان ژ راوەستیانێ ل مەها ئیلۆنا بۆری دەستپێكربوو، هەروەسا ئاماژە ب وێ چەندێ كر كو دبیت هۆكارێن سیاسی ببنە ئەگەرێ راوەستیانەكا دی یا هنارتنا پەترۆلێ».

فازل میرانی، بەرپرسێ دەستەیا كارگێرییا مەكتەبا سیاسی یا پارتی دیموكراتی كوردستان، پێشوازی ل (شارلێت دیكسون) جێگرا قونسلی و كاربڕێڤەبەرێ قونسلخانەیا گشتییا بریتانیا ل هەولێرێ و شاندێ د گەلدا كر.
د دیدارەكێدا فازل میرانی باس ل رەوشا ئەڤرۆ یا هەرێما كوردستانێ و ئیراقێ و دەڤەرێ كر و دوپاتكر كو دەڤەر ب رەوشەكا هەستیاردا دەرباز دبیت و پێدڤییە هەموو ئالییەك ب ژێرانە رەفتارێ ل گەل پێشهاتان بكەن و بەرژەوەندییا بلند یا خەلكێ دەڤەرێ ل بەرچاڤ بگرن.
هەروەسا میرانی باس ل بڕێڤەچوونا پرۆسەیا هەلبژارتنێن جڤاتا نوونەرێن ئیراقا فیدرال كر و گوت» هەلبژارتن ب سەركەفتی هاتنە ئەنجامدان و چاڤەڕی دهێتە كرن ئەنجام بهێنە پەسەندكرن تاكو دەست ب دانوستاندنێن پێكئینانا حوكمەتا فیدرالییا ئیراقێ بهێتە كرن».
بەرپرسێ دەستەیا كارگێرییا مەكتەبا سیاسی یا پارتی دوپاتی ل وێ چەندێ كر كو چاڤێن نەحەز و دوژمنێن ئارامیێ وپێكڤەژیانێ و ئاڤەدانكرنێ ب وان پێشكەفتنێن هەرێما كوردستانێ رانابن و ب هەموو شیانێن خوە و هەموو رێكەكێ دژایەتییا هەرێمێ دكەن و دووماهی رێك ژی ئەو كارێ تیرۆرستی بوو كو ل دژی زەڤییا كۆرمۆر یا غازی ئەنجامدای و بوویە ئەگەرێ ژكارئێخستنا دەرئینانا غازێ ژ وێ زەڤیێ كو ئەڤ كارە یێ دوورە ژ هەر بنەمایەكێ مرۆڤایەتی.
ژ ئالیێ خوەڤە شارلێت دیكسون پیرۆزباهی ل پارتی دیموكراتی كوردستان كر ب هەلكەفتا سەركەفتنا وێ د هەلبژارتنێن جڤاتا نوونەرێن ئیراقا فیدرالدا و ب دەستڤەئینانا زێدەتر ژ ئێك ملیۆن دەنگان و دوپاتكر كو بریتانیا ب گرنگییەكا مەزن ڤە چاڤدێرییا دەڤەرێ دكەت و حوكمەتا بریتانیا یا بەرهەڤە بۆ پێشكێشكرنا هەر هاریكارییەكێ و هیڤی خواست هەرێما كوردستانێ هەر د پێشكەفتنێدا بیت.

سەرۆكێ هەڤپەیمانییا نیشتمانییا ئیراقی، ناڤەڕۆكا دیدارا خوە یا ڤێ دوماهیێ ل گەل سەرۆك بارزانی ئاشكراكر و راگەهاند: تێبینیێن سەرۆك بارزانی ل دۆر بجهئینانا دەستووری و قانوونا هەلبژارتنان د رەوانە و پشتەڤانیێ لێ دكەین، هەڤدەم دوپاتی ل وێ چەندێ كر كو تاكە چارەسەری بۆ دادپەروەریێ د نوونەرایەتیكرنا خەلكیدا، ئیراق ببیتە ئێك بازنەیا هەلبژارتنان.
د. ئەیاد عەلاوی، سەرۆكێ هەڤپەیمانییا نیشتمانی د هەڤپەیڤینەكێدا ل گەل كەنالێ كوردستان 24 باس ل هەڤبەندیێن دیرۆكی، رەوشا سیاسی یا ئیراقێ و سەرەدانا وی بۆ ئالیێ سەرۆك بارزانی كر.
ل دۆر سەرەدانا وی بۆ هەولێرێ، د. ئەیاد عەلاوی رۆهنكر، دەمەكێ درێژ بوو دیدار ل گەل سەرۆك بارزانی ئەنجام نەدابوو، لەوما ئەڤ سەرەدانە وەك دەلیڤەیەك بۆ دانوستاندنێ و نووكرنا هەڤبەندییان ب كارئینا.
ناڤبری دوپاتی ل وێ چەندێ كر كو سەرەدانا وی تمام یا سەربخوە بوویە و هیچ هەڤبەندییەك ب سەرەدانا نووری ئەلمالكی ڤە بۆ هەولێرێ نەبوو، عەلاوی خوە ب دۆستەكێ نێزیكی گەلی كورد هەژمارت و ئاماژە ب قووناغێن بۆری یێن دژوار دا، ب تایبەتی وی وەخێ كورد ل بن دو ئابلۆقەیان ڤە بوون، ئابلۆقەیەكا نێڤدەولەتی ل سەر ئیراقێ و ئابلۆقەیا حوكمەتا ئیراقێ ل سەر هەرێما كوردستانێ، كو تێدا هەردو ئالی ل سەر ئاستێ سیاسی و جەماوەری پشتەڤانییا هەڤدو كریە.
تەوەرەكێ سەرەكیێ دیدارا د. ئەیاد عەلاوی و سەرۆك بارزانی، پرسا پێكئینانا حوكمەتا نوو یا ئیراقێ و كێشەیێن هەلاویستی بوویە، ل دووڤ گوتنا عەلاوی، سەرۆك بارزانی ترسا جدی هەیە ل دۆر بجهئینانا دەستووری و پێگیری نەبوون ب وان خالێن رێككەفتن ل سەر كری، ب تایبەتی قانوونا هەلبژارتنان و مادەیا 140، سەرۆكێ هەڤپەیمانییا نیشتمانییا ئیراقی دانپێدان ب وێ چەندێ كر كو ئەو تێبینیێن سەرۆك بارزانی د جهێ خوەدانە و پێدڤییە ئاخڤتن ل سەر ریهوریشالێن كێشەیان بهێتە كرن، ژ وان ژی ئێكلاكرنا چارەنڤیسێ دەڤەرێن كوردستانی و بڕگەیێن گرێدای ب داهاتێ پەترۆلێ و غازێ و چاوانییا برێڤەبرنا سامانێن سروشتی، كو بەری پێنج سالان بزاڤا چارەسەركرنا وان كریە بەلێ سەركەفتێ نەبوون.
د پشكەكا دی یا ئاخڤتنێن خوە دا، ئەیاد عەلاوی، رەخنە ل قانوونا نوكە یا هەلبژارتنان ل ئیراقێ گرت و ب ئەگەرەك بۆ نەدادپەروەریێ هەژمارت، ب باوەرییا وی، پێدڤییە ئیراق ببیتە ئێك بازنەیا هەلبژارتنان بۆ وێ چەندێ جوداهی نەمینیت و نوونەرایەتییەكا راستەقینەیا هەموو پێكهاتەیان بهێتە كرن، ب دیتنا عەلاوی دڤێت دەنگێ وەلاتییەكی ل هەولێرێ و وەلاتییەكی ل بەسرە ئێك بها و كاریگەری هەبیت، ناڤبری هۆشداری ژی دا كو سروشتی ململانێیان ل ئیراقێ هاتیە گوهۆڕین، هەكە پێشتر ململانێ ب چەكی وتوندوتیژیێ بوون، نوكە هاتیە گوهۆڕین بۆ ململانێیا خەرجكرنا پارەی و كڕینا دەنگان، كو ئەڤە ژی مەترسییەكا مەزنە.
سەبارەت مافێن دارایی یێن هەرێما كوردستانێ، عەلاوی ئاماژە ب وێ چەندێ كر كو جۆرەكێ خوەڤەدزینێ ژ پێدانا مافێن دارایی یێن كوردان دهێتە كرن، ناڤبری قووناغا سەرۆكایەتییا خوە ل حوكمەتا ئیراقێ باسكر و راگەهاند: ل سەردەمێ من رێژەیا 17% بودجەیا ئیراقێ بۆ هەرێما كوردستانێ هاتبوو دیاركرن و ماف د پاراستی بوون.
ل دوماهیێ ئەیاد عەلاوی بۆچۆنا خوە ل دۆر حوكمەتا داهاتی بەرچاڤكر و دوپاتی ل وێ چەندێ كر، نابیت حوكمەت تنێ نوونەرایەتییا زۆرینەیا سیاسی یان مەزهەبی بكەت، بەلكو پێدڤییە بەراهییا كارێن وێ خزمەتكرنا هەموو ئیراقییان بیت بێی جوداهی.

كۆڤارەكا ئەمریكی یا ناڤدار بەلاڤكر، هێرشێن ل سەر زەڤییا كۆرمۆر یا غازی دیاركر كو پێدڤییە ب لەز سیستەمێ بەرگریێ بۆ هەرێما كوردستانێ بهێتە دابینكرن.
كۆڤارا (فۆربسی) یا ئەمریكی راپۆرتەك ل دۆر هێرشا چەند رۆژێن بۆری ل سەر زەڤییا كۆرمۆر یا غازی بەلاڤكر و ئاماژەكر» ئەو هێرشە بۆ ئەگەرێ بڕینا كارەبێ ب رێژەیا 80% ل هەموو باژێرێن هەرێما كوردستانێ، ئەڤە ژی وێ چەندێ دیار دكەت پێدڤییە ب لەز سیستەمێ بەرگریێ ل وێ دەڤەرێ بهێتە دانان. چونكە هەرێما كوردستانێ جهێ وەبەرهێنانا كۆمپانیێن مەزن یێن ئەمریكی یە و بەرژەوەندیێن هەڤپشك هەنە».
ب گۆڕەی وێ كۆڤاری» هێرشێن ل سەر هەرێما كوردستانێ د بێ بهانەنە و ژێرخانەیا مەدەنی و جهەكێ گرنگ یێن وێ هەرێمێ بۆ دابینكرنا كارەبێ كریە ئارمانج، ئەڤە د وەختەكی دایە حوكمەتا هەرێما كوردستانێ كارەبا 24 ساتی بۆ خەلكی دابینكریە كو ژ ئەگەرێ وێ هێرشێ كارەبا بۆ تنێ پێنج ساتان د رۆژەكێدا كێمبوو، لەوما پێدڤییە ئیدارەیا ئەمریكی ب جدی هزر د پێدانا سیستەمێ بەرگریێ دا بۆ هەرێما كوردستانێ بكەت، بۆ وێ چەندێ بشێت ژێرخانەیێن خوە گرنگ و وەلاتیێن خوە دژی وان هێرشێن پێ بهانە بپارێزیت».

بەرپرسێن کورد ل رۆژئاڤایێ کوردستانێ دیار دکەن هەلوەستێ شامێ ل هەمبەر داخوازیێن رەوا یێن کوردان گەلەک خرابە و ژ بەر ڤێ یەکێ ژی نها دانوستاندنێن کوردان و شامێ هاتینە راگرتن و ئەنجامێن قووناغا ئاشتیێ ل تورکیا دێ کاریگەریا خوە ل سووریێ ژی کەت.

ئالدار خەلیل ئێک ژ بەرپرسێن پەیەدێ دیار کر، هەلوەستێ ڤێ دووماهیێ یی شامێ ل هەمبەر کوردان گەلەک خرابە، کوردان دڤێت د چارچۆڤەیێ سووریایەک نوو و دیموکراتی دا ل گەل هەموو نەتەوەیێن دی پێکڤە بژین، کورد داخوازا پارچەکرنا سووریێ ناکەن، لێ مخابن هەلوەستێ نها یێ شامێ گەلەک خرابە و هەلوەستێ نها یێ شامێ دێ بیتە ئەگەرێ پارچەبوونا سووریێ، چونکی مە بەری نها ژی گەلەک جاران دیار کریە پێدڤیا سووریێ ب دستوورەک نوو و دیموکراتی هەکە کو مافێن هەموو نەتەوەیێن ل سووریێ ب تایبەتی ژی مافێن رەوا یێن گەلێ کورد گەرەنتی بکەت.
ناڤهاتی ئەو یەک ژی دیار کر، ڤێ دووماهیێ ئێرشێن نە رەوا ل دژی گەلێ کورد ل سووریێ زێدەتر بووینە و درووشمێن خراب ل دژی کوردان دهێنە گۆتن، ئەو یەک گەلەک خرابە و دڤێت شام رێ نەدەت کارێن وەسا بهێنە کرن، چونکی ئاشکرایە هەتا کورد ل سووریێ نەگەهنە مافێن خوە یێن رەوا دێ رەوشا ئالۆز یا ل سووریێ بەردەوام بیت و دبیت خرابتر ژی ببیت و گۆت: (مخابن نها دانوستاندنێن کوردان و شامێ هاتینە راگرتن و وەکو کوردێن سووریێ ئەم جارەکا دی دیار دکەین کو مە دڤێت هەموو پرسێن هەی ب رێیا دانوستاندنان چارەسەر بکەین، لێ مخابن هەلوەستێ نها یێ شامێ خزمەتا چارەسەریێ ناکەت).
ل ئالیێ دی ئەنجوومەنێ نشتیمانی یێ کوردی ل سووریێ ژی د داخویانیەکێ دا دیار کر، بانگەوازیا ڤێ دووماهیێ یا ئەحمەد شەرعی ژ بۆ خوەنیشادانان ژ بەر سالڤەگەرا ژناڤچوونا رژێما بەشاری رەوشەکا دی دروست کر و د خوەنیشادانان دا درووشم ل دژی گەلێ کورد هاتنە بلند کرن و ئێرشی کوردان هاتە کرن، ئەو یەک ل دژی پێکڤەژیانێ یە، پێدڤیا سووریێ ب سیستەمەک نوو و دیموکراتی هەیە، کو هەموو خەلکێن سووریێ بشێن پێکڤە بژین، مخابن یا نها ل دژی کوردان و پێکهاتەیێن دی یێن سووریێ دهێتە کرن دێ ئەنجامێن خوە یێن خراب بۆ پاشەرۆژا سووریێ هەبیت.
ئەنجوومەنێ نشتیمانی یێ کوردی جارەکا دیار داخواز ژ شامێ دکەت کو ب رێیا دانوستاندنان پرسێن هەی بهێنە چارەسەرکرن، چونکی ئەزموونا چەندین سالێن بۆری ل سووریێ سەلماندیە ب توندوتیژیێ چو پرسەک ناهێتە چارەسەرکرن و دانوستاندن باشترین رێیە بۆ چارەسەریا هەموو پرسێن نها یین ل سووریێ، لێ مخابن هەلوەستێ نها یێ شامێ ل دۆر مافێن رەوا یێن گەلێ کورد باش نینە.

دوهی ئێكشەمبی 30/11/2025، سەرۆك مەسعود بارزانی، ئێكەمین پێشانگەها نێڤدەولەتییا پرتووكێ ل زاخۆ ب ناڤونیشانێ (زاخۆ دخوینیت) ڤەكر و سەرەدانا پشكێن پێشانگەهێ كر.
هەر د پێشانگەهێدا سەرۆك بارزانی، دلخوەشییا خوە ب ڤەكرنا پێشانگەها نێڤدەولەتییا زاخۆ دیاركر و راگەهاند» سوپاس بۆ خودای بۆ ڤان رۆژێن خوەش، دوهی ل جزیرێ و ئەڤرۆ ل زاخۆ. ئینشائەللا خودێ هەر خێر و خوەشیێ بدەت، هەر كەیفێ بدەت و ئەڤ پێشانگەها نێڤدەولەتییا پرتووكێ كو ئەڤرۆ ل زاخۆ هاتیە ڤەكرن جهێ دلخوەشییەكا مەزنە».
سەرۆك بارزانی زاخۆ ب باژێرێ هونەری و كەلتووری و كوردایەتیێ هەژمارت و راگەهاند» زاخۆ جهێ هونەری و كەلتووری و مێرانی و كوردایەتیێ و پێشمەرگایەتیێیە».
سەرۆك بارزانی، دەستخوەشی هەبوو بۆ ڤەكرنا پێشانگەها نێڤدەولەتییا زاخۆ و هیڤییا زێدەتر پێشكەفتنێ بۆ زاخۆ خواست.
ل دووماهیێ سەرۆك بارزانی پەسنا زاخۆییان كر وگوت» جارەكێ من گوتە زاخۆ روحا منە، جارەكا دی من گوت هوون دلێ منن، هوون نەك هەر روحا منن، هوون دل و روحا منن».
ئەڤە ئێكەمین پێشانگەها نێڤدەولەتییا پرتووكێیە ل ئیدارەیا سەربخوە یا زاخۆ بڕێڤەدچیت. پشتی هەولێرێ و سلێمانیێ، زاخۆ دبیتە باژێرێ سیێ ل هەرێما كوردستانێ پێشانگەهەكا نێڤدەولەتییا پرتووكێ ڤەدكەت كو تێدا زێدەتر ژ 20 هزار ناڤونیشانێن جودا جودا دهێنە نیشادان و 50 دەزگەهێن چاپ و بەلاڤكرنێ ژ 10 وەلاتان پشكداریێ تێدا دكەن. پێشانگەها ناڤبری بۆ دەمێ شەش رۆژان دێ یا بەردەوام بیت.

سەرۆكێ هەرێما كوردستانێ پێشوازی ل قونسلێ نوو یێ چیكێ ل هەولێرێ كر و پشتەڤانییا خوە بۆ سەرئێخستنا ئەركێ وی دوپاتكر. د دیارێدا قونسلێ نوو یێ وەلاتێ چیك، هێرشا سەر زەڤییا كۆرمۆر یا غازی پرۆتەستۆ كر و دوپاتی ل بەرفرەهكرنا هەڤبەندیێن ئابۆری كر.
دوهی ئێكشەمبی 30/11/2025، نێچیرڤان بارزانی، سەرۆكێ هەرێما كوردستانێ پێشوازی ل لوكاس گیوریچ، قونسلێ گشتیێ نوو یێ كۆمارا چیك ل هەرێما كوردستانێ كر.
ب گۆڕەی بەیاننامەیەكا سەرۆكایەتییا هەرێما كوردستانێ» نێچیرڤان بارزانی پیرۆزباهییا دەستبكاربوونێ ل قونسلێ نوو چیك كر و هیڤییا سەركەفتنێ د ئەركێ وی دا بۆ خواست، هەروەسا بەرهەڤییا پشتەڤانیێ بۆ سەرئێخستنا ئەركێ وی دیاركر».
نێچیرڤان بارزانی سوپاسییا هاریكاریێن كۆمارا چیك كر و خواستا هەرێما كوردستانێ ژی بۆ پێشڤەبرنا هەڤبەندییان ل گەل وی وەلاتی نیشادا.
قونسلێ گشتیێ نوو یێ كۆمارا چیك هێرشا ل سەر زەڤییا گۆرمۆر یا غازی پرۆتەستۆكر و خوەشحالییا خوە ب وەرگرتنا ئەركێ خوە ل هەرێما كوردستانێ نیشادا. هەروەسا دوپاتی ل كاركرنێ بۆ پێشڤەبرنا هەڤبەندییان د ناڤبەرا هەردو وەلاتاندا د هەموو واراندا كر، ب تایبەتی بەرفرەهكرنا هاریكارییا هەڤپشك د ناڤبەرا واندنا د وارێ ئابۆریدا.

سەرۆكێ حوكمەتا هەرێما كوردستانێ، د پەیامەكێدا سەرەرای سوپاسیكرنا خۆڕاگرییا وەلاتییان بەرانبەر كێمبوونا ساتێن كارەبێ، مزگینییا دەستپێكرنا بەرهەمئینانا غازێ و زڤرینا كارەبێ راگەهاند و دوپاتكر نابیت ئەو هێرشە ببنە روودانێن ئاسایی و پێدڤییە ئەنجامدەرێن وان ژی بهێنە سزادان.
مەسرور بارزانی، سەرۆكێ حوكمەتا هەرێما كوردستانێ د پەیامەكێدا ئاماژە ب وێ چەندێ كر كو پشتی تمامكرنا بەرهەڤیێن تەكنیكی و گەهشتن ب رێككەفتنێ ل گەل كۆمپانییا (داناغاز)، پرۆسەیا بەرهەمئینانێ دەستپێكریە و رەوشا كارەبێ دێ ئاسایی بیت.
سەرۆكێ حوكمەتا هەرێما كوردستانێ ئیرادەیا رێڤەبەری و كارمەندێن كۆمپانیێ بلند هەلسەنگاند كو سەرەرای وێ چەندێ ئەڤە هێرشا یازدێ یە ل سەر وان دهێتە كرن، بەلێ د رژدن ل سەر مانێ و بەردەوامیێ ب كارێن خوە.
د پشكەكا دی یا پەیاما خوەدا، سەرۆكێ حوكمەتا هەرێما كوردستانێ رۆهنكر كو ل گەل محەمەد شیاع سوودانی، سەرۆك وەزیرێن ئیراقێ ل سەر هێلن بۆ وێ چەندێ ئەنجامدەرێن وێ هێرشا تیرۆرستی، سەر ب هەر گرۆپ و ئالییەكی ڤە بن و ل هەر جهەكی بن، دڤێت روو ب روویێ قانوونێ ببن.
مەسرور بارزانی هۆشداری ژی دا كو ئیراق نەشێت وەبەرهێنانا بیانی بۆ خوە رابكێشیت هەكە گرۆپێن چەكدارێن ژ دەرڤەی قانوونێ بێی سزادان بەردەوام بن د ئارمانجگرتنا ژێرخانەیا ئابۆرییا وەلاتیدا.
سەرۆكێ حوكمەتا هەرێما كوردستانێ ئەوژی بەرچاڤكر كو چاڤێن نەحەزان ب پێشكەفتنێن كوردستانێ ناڕابن و دخوازن تاریێ بزڤرینن، بەلێ پشتڕاستبوون دا كو حوكمەتا هەرێمێ ل گەل هەڤپشكێن نێڤدەولەتی كار دكەت بۆ پاراستنا خەلكی و ژێرخانەیا ئابۆری و ئەو هێرشە ژی نەشێن كاروانێ ئاڤەدانیێ رابگرن.
ل دووماهیێ مەسرور بارزانی سەرەرای دەستخوەشیێ ل تیمێن تەكنیكی یێن وەزارەتێن سامانێن سروشتی و كارەبێ و هێزێن ئەمنی، داخواز ژ خەلكێ كوردستانێ كر، وەك بەردەوام پشتەڤانێن حوكمەتا خوە بن بۆ دەربازكرنا ئاستەنگان.

ئەندامەكێ كۆمیتەیا ناڤین یا پارتی دیموكراتی كوردستان راگەهاند: ل رۆژا دوشەمبی 1/12/2025 پارتی دیموكراتی كوردستان و ئێكەتی نیشتمانی كوردستان ل سەر ئاستێ بلند دێ كۆمبن.
هیوا گەیلانی، ئەندامێ كۆمیتا ناڤین یا پارتی دیموكراتی كوردستان گوت» ل رۆژا دوشەمبی 1/12/2025، پارتی دیموكراتی كوردستان و ئێكەتی نیشتمانی كوردستان ل سەر ئاستێ بلند دێ كۆمبن».
هەروەسا دیاركر ژی» ل رۆژێن داهاتیدا ژی پارتی دێ سەرەدانا ئالیێن سیاسی كەت».
ل دۆر كۆمبوونا پارتی ل گەل ئێكەتیێ، هیزا گەیلانی زێدەتر بۆ كەنالێ كوردستان 24 گوت» دێ هەموو بزاڤان كەین بۆ وێ چەندێ كابینەیا نوو یێ حوكمەتا هەرێما كوردستانێ بهێتە پێكئینان، چونكە ل بۆری ژی دا پارتی نەرمی بەرچاڤكریە بەلێ ئێكەتی نەهاتە پێش».
وی ئەندامێ كۆمیتەیا ناڤین یا پارتی دیموكراتی كوردستان ئاماژە ب وێ چەندێ ژی كر» مەبەستا پارتی دیموكراتی كوردستان گەهاندنا دو پەیامایە بۆ ئالییان، پەیاما ئێكێ رێكخستنا پەرت و بەلاڤبوونا ناڤمالا كوردی، پەیاما دویێ ل گەل ئالیێن سەركەفتی د هەلبژارتناندا ئێك پاكێچ و گۆتار د حوكمەتا داهاتییا ئیراقیدا هەبیت».
دووماهی كۆمبوون د ناڤبەرا پارتی دیموكراتی كوردستان و ئێكەتی نیشتمانی كوردستان ل رۆژا 30/9/2025 ب سەرپەرشتییا سەرۆك بارزانی ل پیرمام هاتبوو ئەنجامدان.

ڤەكۆلەرێن كاروبارێن ئەمنی ل ئیراقێ رادگەهینن، ڤەكۆلینێن ل دۆر هێرشا ل سەر زەڤییا كۆرمۆر یا غازی یێن گەهشتینە ئەنجام، بەلێ راناگەهینن، چونكە د مەترسیدارن، ئاماژە ب وێ چەندێ ژی دكەن، هۆكارێن سیاسی ل پشت وان هێرشان هەنە و ڤەكۆلین بووینە تشتەكێ رۆتینی ئەگەر نە كا ئەنجامێن ڤەكۆلینێن پێشتر؟
موجاهد ئەلسومەیدعی، ڤەكۆلەرێ كاروبارێن ئەمنی یێ ئیراقی، ل دۆر هێرشا ل سەر زەڤییا كۆرمۆر یا غازی هاتیە كرن د دیدارەكا تەلەڤزیۆنیدا كو پێگەهێ (ئەلجیبال) یێ دەنگوباسان یێ ئیراقی دووڤچوون بۆ كری، دبێژیت» هۆكارێ سیاسی ل پشت هێرشا ل سەر زەڤییا كۆرمۆر یا غازی هەیە و ڤەكۆلین یێن بووینە تشتەكی رۆتینی ئەگەر نە كا ئەنجامێن پێشتر یێن ڤەكۆلینان؟».
ئەلسومەیدعی گوت ژی» زەڤییا كۆرمۆر یا غازی مەزنترین زەڤییا غازییە و كاریگەرییا وی چەندین پارێزگەهان ڤەدگریت و تۆپبارانكرنا وێ زیان گەهاندییە ئیراقێ و ژێرخانەیا ئابۆرییا هەرێما كوردستانێ».
ناڤبری رۆهنكر ژی» ئەمریكا ب رێكا هەیڤێن دەستكرد شیانێن ڤەدیتنێن هوور هەنە و دشێت وێ خالا فرۆكەیا درۆن ئەوا كۆرمۆر تۆپبارانكری ژێ بلند بووی، دیار بكەت».
هەڤدەم غالب ئەلدەعمی، شرۆڤەكارێ سیاسی، دبێژیت» هزرا هەموو ئیراقییان بۆ وێ دچیت كو گرۆپێن چەكدار دەست د هێرشا ل سەر كۆرمۆرێ دا هەیە».
هەروەسا گوت» ڤەكۆلینێن پێشتر ل سەر هێرشێن دژی وەستگەهێن وزەیێدا گەهشتینە ئەنجامان، بەلێ رانەگەهاندینە، چونكە د (مەترسیدارن) ، هەر تاوانەكا د ساتێن ئێكێدا نەهێتە ئاشكراكرن، ئەو تاوانەكا سیاسییە».
ب دیتنا ئەلدەعمی» ناڤەندێن دەستهەلاتێ د سیستەمێ نوكە دا دێ هێنە گوهۆڕین، ئیسلاما سیاسی د ڤێ قووناغێدا نامینیت و رۆژهەلاتا ناڤین یا نوو دێ پەیدا بیت، ئەم نوكە بەر ب گوهۆڕینان د هەڤسەنگییا هێزێن ناڤخوەییدا دژین».
هەر سەبارەت ڤێ بابەتی، فوئاد حسێن، وەزیرێ دەرڤەیێ ئیراقێ، د دیدارەكا تەلەڤزیۆنیدا راگەهاند» یا رۆهنە ئەوا هاتیە كرن، هێرشا ل سەر كۆرمۆر كارەكێ تیرۆرستی بوو و هێرش ژی ژ ناڤخوەیا ئیراقێ هاتیە كرن. بۆ زانین و ئاشكراكرنا ئەنجامدەرێن وێ هێرشێ ژی دڤێت چاڤەڕێی راپۆرتا ڤەكۆلینێ بكەین».
وەزیرێ دەرڤەیێ ئیراقێ ئاماژە ب وێ چەندێ ژی كر» د راپۆرتێن ڤەكۆلینێ ل دۆر هێرشا پێشتر كو نوكە ل دەف حوكمەتا ئیراقێ نە، ناڤێن كەس و ئالیێن هێرشكار هەنە، بەلێ مخابن حوكمەت ئەو راپۆرت بەلاڤ نەكرینە».
دیاركر ژی» ب دیتنا من هەكە راپۆرت هاتبا بەلاڤكرن و پیرابوون هاتبانە وەرگرتن، ئەو هێرشا ل ڤێ دووماهیێ نە دهاتە كرن و دوبارە نەدبوو».
سەبارەت گرۆپا ئەو هێرشا ل ڤێ دووماهیێ ل سەر زەڤییا كۆرمۆرێ ئەنجامدای، فوئاد حسێن بەرچاڤكر» ئەو ئالی یێ دیارە و ئەو ئالیێ هێرش ئەنجامدای گرۆپەكە كو چەكێ گرنگ و پێشكەفتی هەیە».