جێگرێ سەرۆكێ جڤاتا نوونەرێن ئیراقێ ئاشكەرا دكەت كو د ڕەشنڤیسێ یاسایا بودجەی دا چەندین خالێن نەرێنی و سزایێن نەدادی بەرامبەر هەرێما كوردستانێ هاتینە بنەجهكرن، د هەمان دەم دا دوپاتیێ ل سەر وێ چەندێ دكەت كو وەك فراكسیۆنێن كوردی د بزاڤێن بەردەوام دانە بۆ دروستكرنا هەلوەستەكێ ئێكگرتی ب مەرەما داكوكیلیكرنێ ل شایستەیێن دارایی یێن كوردستانێ.
فەرهاد ئەتروشی، جێگرێ سەرۆكێ جڤاتا نوونەرێن ئیراقێ، ڕاگەهاند، «بزاڤێن مە بەردەوامن بۆ وێ چەندێ كو هەموو فراكسیۆنێن كوردی ل دۆر پرسا شایستەیێن دارایی یێن هەرێما كوردستانێ ببنە خودان هەلوەست، د ڤی چارچۆڤەیدا ب بەرهەڤبوونا نوونەرێن فراكسیۆنان ئەم ل گەل وەزیرێ دارایی كۆمبووینە. پشتی هووربینی كرنێ ل كۆپییەكا ڕەشنڤیسێ بودجەی، مە تێبینی كر كو گەلەك خالێن نەرێنی بەرامبەر هەرێمێ د ناڤ دا هەنە، لەوڕا لەزاتی د دەربازكرنا وێ دا ناهێتە كرن و دەمێ پێدڤی دێ بۆ هێتە تەرخانكرن هەتا دانوستاندنێن هوور ل سەر دهێنە كرن و ئاستەنگ دهێنە چارەسەركرن، ب تایبەتی مادەیا 10 یا كو پەیوەندیدارە ب هەرێما كوردستانێ و هووركاریێن ئالۆز د ناڤ دا هەنە».
جێگرێ سەرۆكێ جڤاتا نوونەران ڕۆهن ژی كر، «ڕەشنڤیس ژ 22 بەرپەران پێك دهێت و گەلەك تێبینی ل سەر هەنە، ژ كۆما 217 ترلیۆن دینارێن بودجەیا گشتی، بتنێ 13 ترلیۆن دینار بۆ هەرێما كوردستانێ هاتینە دیاركرن، كو ژ بەر باسكرنا قەران، ئەڤە ژی ب تمامی ناگەهیتە هەرێمێ. ژ بلی وێ چەندێ، د دەمەكێ دا 47 ترلیۆن دینار بۆ كەرتێ كارەبێ هاتینە دانان كو هەرێم مفای ژێ نابینیت، بودجەیا سیادی ژی كو ب گۆتنا وەزیرێ دارایی 72 ترلیۆنە، د ڕەشنڤیسی دا ئاماژە پێ نەهاتییە كرن و بهایێ بەرمیلەكا نەفتێ ژی نەهاتییە دیاركرن. د هەمان دەم دا كۆمەكا مەرج و سزایێن دژوار ب سەر هەرێمێ دا هاتینە سەپاندن».
د دووماهیێ دا فەرهاد ئەترووشی دوپاتی ل وێ چەندێ كر»ئەم د پەرلەمانی و حوكمەتا هەرێما كوردستانێ دا ب هەموو شیانێن خوە ڕێگێ نادەین بودجە ب ڤی شێوەیی دەرباز بیت و ئەم دێ ب تمامی داكوكیلیكرنێ ل شایستە و مافێن دەستووری یێن گەلێ كوردستانێ كەین».

پشتی بانكا ناڤەندی یا ئیراقێ بڕیار دای بهایێ فرۆتنا دۆلاری ب 1,520 دیناران دەستنیشان بكەت – وەك بجهئینانا بڕیارا جڤاتا وەزیران و ل سەر پێشنیازا وەزیرێ دارایی و پارێزگارێ بانكا ناڤەندی – ئاڤێستا مام یەحیا، ئەنداما جڤاتا نوونەرێن ئیراقێ ژ فراكسیۆنا پارتی دیموكراتی كوردستان، هەلوەستێ خوە لسەر ڤێ بڕیارێ دیار كر و ڕەخنەیێن توند ل ڤێ پێنگاڤێ گرتن و ڕاگەهاند كو ئارمانجا سەرەكی یا حوكمەتا ئیراقێ ژ ڤێ دەستكاریكرنا بهایێ دۆلاری، زڤڕاندنا وی 20 هزار دیناری بوو بۆ داهاتێ گشتی، لێ ئەڤە بوویە ئاریشە و كارەسات بۆ بەریكا خەلكێ هەژار و كێم داهات، نەدبوو ب ڤی شێوەی سەرەدەری ل گەل ڤێ پرسا ئابۆری بهێتە كرن. دیسان دوپاتی ل وێ چەندێ كر كو دڤیا حوكمەتێ بەری بنەجهكرنا بهایێ دراڤی، بەرهەڤییێن پێدڤی كربان و جڤاتا نوونەران ژ ڤێ پێنگاڤێ ئاگەهدار كربا.
ل دۆر ڕۆلێ جڤاتا نوونەران، وێ پەرلەمانتارێ ڕۆهنكر كو هەرچەندە جڤاتا نوونەران ب ڕێكەكا ڕاستەوخوە دەستهەلاتا دەستنیشانكرنا بهایێ دۆلاری و دیناری نینە، لێ د دووماهیێ دا ئەڤ پرسە بۆ پەسەندكرنێ پێدڤی ب دەنگدانێ دبیت ل جڤاتا نوونەران و یا ب زەحمەتە بێ رێككەفتن دەرباز ببیت.
وێ پەرلەمانتارێ دوپات كر كو پێدڤی بوو حوكمەتێ پێشوەخت پێنگاڤێن كریاری بۆ كونترۆلكرنا بازاڕی و دانانا سنۆرەكی بۆ بهایێ كەلوپەلان هاڤێتبان. نوكە ژی پێدڤییە لژنەیەكا تایبەت بۆ چاڤدێریكرنا بهایان ل بازاڕان بهێتە پێكهینان، داكو ڕێگری ل قۆرخكاریێ و بارگرانییا زێدەتر ل سەر ملێن وەلاتییان بهێتە كرن و گڤاشتن ل سەر حوكمەتێ بهێتە كرن تاكو ئەركێ خوە یێ پاراستنا ژیارا خەلكی بجهـ بینیت

ئەندامەكێ بەرێ یێ لژنەیا دارایی ل جڤاتا نوونەرێن ئیراقێ ڕاگەهاند: بڕیارا كێمكرنا بهایێ دینارێ ئیراقێ ل هەمبەر دۆلاری، بژارەیەكا «ڕووكەشی» و ب ساناهی بوو كو حوكمەتێ پەنا بۆ بری داكو كێماسییا دارایی پڕ بكەت، هەروەسا دوپاتی ل وێ چەندێ كر كو خودانێن داهاتێن سنۆردار و بنەجه، قوربانییێن مەزنێن ڤێ ڕێكارێ نە، د ناڤ ئابۆرییەكا ڕەیعی (پشتگرێدانێ ب پەترۆلێ دكەت) كو د بن دەستهەلاتا سیستەمێ پشكداری و بەلاڤكرنا دەستكەفتان دایە.
د. ئەحمەد سەفار، شارەزایێ ئابۆری و ئەندامێ بەری یێ لژنەیا دارایی ل جڤاتا نوونەرێن ئیراقێ گۆت: بڕیارا دەستكاریكرنا بهایێ لێكگۆهارتنێ كو بانكا ناڤەندی و وەزارەتا دارایی دەركری، بۆ جادەیا ئیراقێ وەكی كارەسات بوو، ئەڤە ژی پشتی وێ چەندێ بوو كو بەرپرسێن بانكا ناڤەندی ب دووبارە پشتڕاست دكرن كو چو نیەت بۆ دەستكاریكرنا بهایی نینە، د دەمەكی دا كو پڕۆژەیاسایا بودجەیێ ژ چەند مەهان ڤە ئەڤ دەستكاریكرنە تێدا هەبوو.
سەفاری ئاماژە ب وێ چەندێ ژی كر كو ئەو وەلاتێن خودان ئابۆرییەكا بهێز، پرەنسیپێ شەفافییەتێ دگرنە بەر و پێشوەخت بەرهەڤیێ بۆ ڤان پێنگاڤان دكەن داكو بازاڕ و وەبەرهێنەر بشێن خوە ل گەل بگونجینن و زیانێن مەزن ل خوە نەدەن.
وی شارەزایێ ئابۆری ڕۆهن كر كو قەیران و ئالۆزییێن دەرەكی یێن، لاوازییا ئابۆرییا نیشتمانی ئاشكەرا كر، ئابۆرییەك كو ب ڕێژەیا زێدەتر ژ 90% پشتگرێدانێ ب داهاتێن پەترۆلێ دكەت، دیار كر ژی كو حوكمەت د دەستەبەركرنا مووچەیێن فەرمانبەران دا تووشی كێماسییێ ببوو، لەوما نەچار ببوو پەنا بۆ قەرێن ناڤخوەیی ببەت ب گوژمەیێ چار ترلیۆن دیناران مەهانە، ئەڤە ژی بوو ئەگەرێ وێ چەندێ كو یەدەگا دراڤی یا بانكا ناڤەندی ب ڕەنگەكێ مەترسیدار كێم ببیت.
د. ئەحمەد سەفاری زێدەكر «دو ڕێك ل بەر حوكمەتا بەغدایێ بوون، یان كێمكرنا مووچەیان یان پاشئێخستنا وان، ئەڤ بژارەیە حوكمەتێ ژ ترسا گڤاشتنێن جەماوەری و خوەنیشاندانان ڕەت كر، یان ژی پەنا برن بۆ بژارەیا ب ساناهی كو ئەو ژی كێمكرنا بهایێ لێكگۆهارتنا دیناری بوو داكو نێزیكی 20 ترلیۆن دیناران بۆ پڕكرنا كێماسییا كارگێری پەیدا بكەت، ب ڤێ چەندێ ژی حوكمەتێ خوە ژ هەر بزاڤەكا چاكسازییا ئابۆری و بەرهنگاربوونا گەندەلیێ و زڤڕاندنا وان پارەیێن هاتینە دزین دووركر.
ل دۆر كارتێكرێن وێ بڕیارێ ل سەر ژیانا خەلكی، سەفار هوشداری دا كو «شیانا كڕینێ» یا وەلاتییان ب ڕەنگەكێ مەزن كێم بوویە و ڕێژەیا هەلاوسانێ بلند بوویە، چونكێ زێدەتر كەلوپەل ب دۆلاری دهێنە ئینان.
هەروەسا دوپات كر ژی كو «داهاتێ ڕاستەقینە یێ فەرمانبەر و خانەنشینان و خودان گرێبەستان ب ڕێژەیا 40% كێم بوویە، مووچەیێ كو ملێونەك دینار بوو، نوكە بهایێ وێ یێ ڕاستەقینە نێزیكی 600 هزار دینارانە، ئەو سەبەتا خۆراكێ یا كو بەرێ 10 كەرەستە د ناڤ دا بوون، نوكە ژ بەر گرانیێ بوویە 6 كەرەستە، د دەمەكی دا كو تەخێن زەنگین و بازرگان ژ ڤان زیانان دوورن، ژ بەر كو داهاتێن وان د گوهۆڕینێ دانە».
ناڤبری دوپات كر كو مانا ل سەر بهایێ كەڤن یێ لێكگۆهارتنێ ببوو ئەگەرێ كێماسییەكا زێدەتر ژ 60 ترلیۆن دیناران د بودجەیێ دا، لێ چارەسەری ل سەر حسێبا ژیانا وەلاتییان هاتە كرن.
دوپات كر ژی كو «ئابۆری ئیراقێ دێ هەر ب ڕەنگەكێ بێ سەروبەر و نە بنەجه مینیت هەتا كو ب سیستەمەكێ سیاسی ڤە گرێدایی بیت كو ل سەر بنەمای پشكداری و گەندەلیێ ئاڤا بوویە، كو پشكا مەزن یا فرۆتنا پەترۆلێ دچیت بۆ حزب و ئالییێن دەستهەلاتدار، و ژ بلی خەرجییێن بنەجه یێن سنۆردار، چو تشت بۆ خەلكی نامینیت».

فەرماندەیێ میحوەرێ كەركووك – پردێ یێ هێزا پێشمەرگەیێ كوردستانێ، باسێ مەترسییا سەرهەلدانا داعشێ و لڤینێن گرۆپێن چەكدار ل سنۆرێ كەركووكێ دكەت و داخوازیۆا ب لەز هەیە كو رێككەفتن بهێتە كرن بۆ ڤەگەڕاندنا پێشمەرگەی بۆ سنۆرێ گوندێن پارێزگەها كەركووكێ.
لیوا حەمە ڕێگر، فەرماندەیێ میحوەرێ كەركووك – پردێ یێ هێزا پێشمەرگەیێ كوردستانێ، گۆت: «دوژمنێن كوردان ژ میژە گرفتا وان یا سەرەكی كەركووك بوویە كو دەڤەرەكا كوردستانییە و نوكە هاتییە ناڤكرن (دەڤەرێن كێشە ل سەر!)، دوژمن چاڤ ل كەركووكێ یە، چونكێ ژ ڕوویێ سامانێ سەرئەرد و بن ئەرد ڤە یا زەنگینە و هەردەم گرفت بۆ دروست كرینە. ژ سالێن شێستان ڤە ب ڕەنگەكێ بەردەوام ب ئەرەبكرن لێ كرییە، چونكێ حوكمەتا ئیراقێ پشتەڤانییا وێ پرۆسێسێ كرییە و كورد ژی ل وێ دەڤەرێ ب زۆری پاشڤەبرینە و ب دەستێ ئەنقەست گرفتان بۆ وێ دەڤەرێ دروست دكەن.
لیوا حەمە ڕێگر ئاشكراكر ژی: شەڤان ژ ڤێ سەرێ كەركووكێ هەتا وێ سەری لڤینێن داعشێ هەنە، ئەو دوژمنێن كوردانە وان دهنێرن وێرێ، چونكێ چو ژ دەستێ كوردان ل وێ دەڤەرێ ناهێت، گرفتان بۆ دروست دكەن، لەوما هەر ڕۆژەكێ ب ناڤێ داعشێ و حەشد و لەشكەرێ ئیراقێ دهێنە وێ دەڤەرێ. ئەو گرۆپە هەتا بەری 16ێ ئۆكتۆبەرێ ل ڕەخێن حەویجە بوون و هەموو داعش بوون، نوكە حەشدا عەشائیری بۆ كرییە و د چەكدارن و مۆلەت هەیە و مووچەیێ وان ژ ئالیێ حوكمەتا ئیراقێ ڤە دهێتە دان. ب ڕۆژ ل مالێن خوەنە و ب شەڤ ل هێزا پێشمەرگەی و ل پۆلیسان د دەن، لەوما گرفتا ئەمنی یا هەی وهەكە پێشمەرگە ل وێ دەڤەرێ با، ئەڤ ئەڤ ڕەوشە نە داهتە ڕوودان.
وی فەرماندەیێ سەربازی یێ پێشمەرگەی بەرچاڤكر ژی «نەشێین پشتگرێدانێ ب لەشكەرێ ئیراقێ بكەین، چونكی ل بازگەیێن خوەنە، دەقە ب دەقە حیساب دكەن كا دێ كەنگی مووچە هێت، دچیت ڤە بۆ مال، ئانكو ئەركێ سەربازی وەكی فەرمانبەرێن مەدەنی وەرگرتییە، ئەڤە نەشێن ل وێ دەڤەرێ بەرپرسیارییا ڤالاهییا ئەمنی بگرنە دەست، نوكە ب شەڤ داعش دهێت و كامێرێن حەراری دكەنە ئارمانج، لێ ئەو نەشێن ل وان بدەن».
لیوا حەمە رێگر هوشداری دا ل وێ چەندێ كو لەز بهێتە كرن ل بنەجهكرنا هێزا پێشمەرگەی ل كەركووكێ، ب تایبەت ل داقووق و دووبز و دۆروبەرێن وان، ئەو دوو دەڤەرە د مەترسیدارن و جوگرافییا وان یا وەسایە داعش دشێت هێرشێ بكەت. داخواز دكەین ب لەز رێككەفتن د ناڤبەرا وەزارەتا پێشمەرگەی و وەزارەتا بەرگرییا ئیراقێ بهێتە كرن، تاكو پێشمەرگە بهێتە ڤەگەڕاندن بۆ وێ دەڤەرێ بەری نوكە تێدا، نوكە ژی سەنگەر ماینە، پێدڤییە ئاسایش بزڤڕیتە كەركووكێ و دووبزێ، وێ دەمێ تەناهییا كورد و عەرەب و توركمان و مەسیحییان دێ هێتە پاراستن. گرنگە پێشمەرگە بزڤڕیت و بارێ ئەمنی ل وێ دەڤەرێ باش بییت و سەرومالێ خەلكی بهێتە پاراستن.
ڕاگەهاند ژی «ڕۆژ ب ڕۆژ جوتیارێن كورد ل وێ دەڤەرێ پاشڤە دچن، داخواز دكەم هێز بهێتە هنارتن بۆ وێ دەڤەرێ، تاكو داعش داگیر نەكەت. ب ڕاستی ئەو دەڤەرە دێ زیاندار بن هەكە ل ڤێ ڕەوشێ دا پێشمەرگە بۆ نەزڤڕیت، ئەو دەڤەرە عەرەبێن هاوردە بۆ هاتینە د دەمەكی دا دەڤەرێن كوردستانیینە و گوهۆڕین د دیمۆگرافییا وان دا هاتییە كرن. جوتیارێن كورد ل وێ دەڤەرێ نوكە چەقۆیەك ژی نینە بەرگریێ پێ ل خوە بكەن، لێ حەشدا عەشائیری ل وێرێ ب تەمامی یا چەكدارە و بەرگریێ ژی نەشێن بكەن هەكە ە داعش هێرشێ ل وان بكەت».

سەرۆك بارزانی پێشوازی ل پارێزگارێ سەلاحەدین كر و د دیدارێ دا ڕۆناهی هاتە ئێخستن سەر هەماهەنگییا د ناڤبەرا پارێزگەهێن ئیراقێ دا.
سەرۆك بارزانی ل پیرمام پێشوازییا هەیسەم ئەلزەهوانی پارێزگارێ سەلاحەدین كر.
بارەگەهێ بارزانی ئاماژە ب وێ چەندێ كر، د دیدارێ دا ڕۆناهی هاتە ئێخستن سەر ڕەوشا سیاسی یا ئیراقێ و ڕەوشا خزمەتگۆزاری و هەماهەنگییا د ناڤبەرا پارێزگەهێن ئیراقێ دا.

مەسرور بارزانی، سەرۆكێ حوكمەتا هەرێما كوردستانێ، پێشوازییا دانیێل كرێبهەر، بالیۆزێ ئەلمانیایێ ل ئیراقێ كر. هەردوو ئالی هەڤڕا بوون ل سەر گرنگییا پێشڤەبرنا پەیوەندییێن هەرێما كوردستانێ و ئەلمانیایێ د بوارێن جۆراوجۆر دا.
سەرۆكێ حوكمەتا هەرێمێ سوپاس و پێزانینێن هەرێما كوردستانێ بۆ هاریكاری و پشتەڤانییا ئەلمانیایێ و هێزێن هەڤپەیمانان دوپات كر. بالیۆزێ ئەلمانیایێ دوپاتی ل سەر بەردەوامبوونا پشتەڤانیكرن و هەماهەنگیكرنێ ل گەل هەرێما كوردستانێ كر. هەروەسا ئاماژە ب وێ چەندێ دا كو هەرێما كوردستانێ دێ بیتە پشكەك ژ هەر تێكگەهشتنەكا دوو ئالییانە كو د پاشەڕۆژێ دا د ناڤبەرا ئەلمانیایێ و ئیراقێ دا بهێتە ئیمزاكرن.

ل ئێڤارییا ڕۆژا دووشەمبی 5/10/2026، ب بەرهەڤبوونا مەسرور بارزانی، سەرۆكێ حوكمەتا هەرێما كوردستانێ ئاهەنگا دەرچوویێن خۆلا 31ێ یا زانكۆیا دهۆكێ هاتە بڕێڤەبرن.
مەسرور بارزانی، ل دووماهیكا ڤێ ڕێوڕەسمێ دا پەیڤەك پێشكێش كر و تێدا پیرۆزباهی ل قوتابیێن دەرچووی كر و ڕاگەهاند «هوون دبنە كەسێن كاریگەر بۆ خزمەتكرنا وەلاتی و پاشەڕۆژا وەلاتی د دەستێ هەوە دایە و ڕێكێ نەدەن كەس هەوە بێهیڤی بكەت».
گۆت ژی»چاكسازییەكا زۆر ل زانكۆیا دهۆكێ هاتییە كرن و سوپاسییا سەرۆكاتییا زانكۆیێ دكەم، هەروەسا سوپاسییا هەموو مامۆستا و كەسوكارێن قوتابییان دكەم، زانست تشتەكێ باشە بەلێ بێ ڤیان بۆ وەلاتی تەمام نینە».
هەروەسا ڕاگەهاند «بۆ دامەزراندنا دەرچوویان ل گەل حوكمەتا ئیراقێ د دانوستاندنان داینە».
سەرۆكێ حوكمەتا هەرێمێ دەربارەی پێكهینانا حوكمەتا نوو یا هەرێمێ گۆت»دەستێ دۆستینیێ مە بۆ پێكهینانا حوكمەتێ بۆ هەموو ئالییان درێژ كرییە و داخوازێ دكەم هەموو ئالی بەرژەوەندییا وەلاتی بێخنە بەری بەرژەوەندییا كەسی».
دەقێ گۆتارا سەرۆكێ حوكمەتا هەرێما كوردستانێ:
ئەز گەلەك سوپاسییا مامۆستا و سەرۆكێ زانكۆیێ و فەرمانبەرێن ڤێ زانكۆیێ دكەم بۆ وەستیانا وان، ئەز دزانم چەند خوە وەستاندییە بۆ وێ چەندێ كو ئاستێ خواندنێ ل ڤێ زانكۆیێ بەر ب پێش ببەن و گەلەك ڕیفۆرم و چاكسازییێن باش ل ئاستێ خواندنێ دا كرینە، جارەكا دی سوپاسییا هەوە دكەم و ماندی نەبن.
سوپاس و دەستخوەشی ل كەسوكارێن قوتابییێن خوەشتڤی دكەم، بۆ پشتەڤانییا وان، وەستیانا وان، بێ وان ڕەنگە ئەڤ سەركەفتنە بۆ قوتابییان ب ساناهی نەبا، پشتەڤانییا هەوە و خەمخۆرییا هەوە كو بوویە ئەگەرێ وێ چەندێ قوتابی ئەڤ شەڤە ب سەربلندی بەرامبەری هەوە ڕاوەستن و ببنە جهێ شانازییا هەوە و مە و هەموویان. دەستخوەشیێ ل هەوە دكەم و پیرۆزباهییا ڤێ سەركەفتنێ ل كەسوكارێن هەموو قوتابییان دكەم.
پیرۆزباهی ل قوتابییان دكەم، بۆ وەستیانا وان، بۆ زەحمەتا وان، بۆ وان دەستكەفتێن مەزن یێن ب دەست خوە ڤە ئیناین كو بێگومان گەلەك ژ وان دچنە قووناغەكا دی یا ژیانا خوە و بەلكو هندەك ژ وان بخوازن كو درێژیێ ب خواندنا خوە بدەن و حەز بكەن هێشتا بخوونن و ئاستێ زێدەترێ زانستی وەرگرن، هندەكێن دی ژی دزڤڕنەڤە بۆ دناڤ جڤاكی دا و دبنە كەسێن كاریگەر و دخوازن خزمەتا وەلاتێ خوە بكەن.
ئەو زانستێ هەوە وەرگرتی، ئەو خواندنا هەوە، دبیتە كەرەستەیەك، دبیتە ئامرازەك د دەستێ هەوە دا تاكو بشێن زێدەتر خزمەتا خوە و كەسوكار و وەلاتێ خوە بكەن. زانست تشتەكێ باشە، بەلێ زانست بێ وێ چەندێ كو مرۆڤی ڤیان بۆ وەلاتێ خوە هەبیت، تەمام نینە. هیڤییا من ئەوە چەندە هوونفێر ببن و چەند بخوونن، تێكەلییا خوەشتڤییا خوە ل گەل نیشتمانێ خوە بكەن، دا بشێن زێدەتر خزمەتا وەلاتێ خوە بكەن، وەلاتێ هەوە چاڤەڕێی هەوەیە، پاشەڕۆژا وەلاتێ هەوە د دەستێ هەوە دایە، هوون دشێن وەلاتێ خوە ئاڤەدانتر بكەن، باشتر بكەن، بەر ب پێش ببەن، گۆهێ خوە نەدەنە چو كەسان و ڕێكێ ب كەسێ نەدەن هەوە بێ هیڤی بكەت.
گۆهێ ب چو كەسێ نەدەن یێ كو وە بكەت هوون ژ خوەشتڤییا وەلاتێ خوە دوور بكەڤن، ئەم خەلكێ ڤی وەلاتی نە، ئاخا مە، وەلاتێ مە و دەستكەفتێن مە، بەرهەم و خوونا شەهیدێن مە نە، وەستیانا پێشمەرگەیێن مە یە، گەلەك ژ وان كەسوكارێن هەوەنە. بۆ بلندڕاگرتنا خزمەتا وان شەهیدان و وان پێشمەرگەیان و قوربانیدانا وان، پێدڤییە ئەم وی وەلاتێ خوە و وان دەستكەفتان بپارێزین، ئەڤ بەرپرسیارەتییە ژ ئەڤرۆ ڤە دكەڤیتە سەر ملێ هەوە.
هیڤیا من ئەوە ژ بلی وێ چەندێ كو هەوە وەلاتێ خوە خۆش بڤێت، پێدڤییە بپارێزن، پێدڤییە ژینگەها ڤی وەلاتی ژی بپارێزن، چونكی پاراستنا ژینگەها مە بۆ دروستكرنا وەلاتەكێ ساخلەم و ئاڤەدان و پاقژ باشتر دبیت بۆ نڤشێ پشتی هەوە ژی دهێن.
خۆشك و برایێن هێژا و خوەشتڤی.. ئەز دزانم بۆ هەوە ب ساناهی نەبوویە و گەلەك ژ هەوە دخوازن كو ڕۆلێ خوە ببینن ل كۆمەلگەهـ و جڤاكێ خوە دا دا خزمەتەكا زێدەتر یا وەلاتێ خوە بكەن.
هیچ وەلاتەك ل جیهانێ نەبوویە بێ وێ چەندێ كو خەلكێ وی وەلاتی زەحمەت نەكێشابیت و خۆ نەوەستاندبیت بۆ ئاڤەدانییا وەلاتێ خوە، كەس ژی ژ دەرڤەی وەلاتێ وان نەهاتییە كو خزمەتا وان بكەت. وان ب خوە بڕیار دایە كو وەلاتێ خوە ئاڤەدان بكەن.
ل ڤێرە ژی هیڤییا مە ئەوە هەر تشتەك ببیت، بڕیار د دەستێ هەوە دایە، گۆهێ خوە نەدەنە كەسێ ، هوون دشێن وەلاتێ خوە زێدەتر ئاڤەدان بكەن و زێدەتر بەر ب پێش ببەن، ئەوا ل سەر حوكمەتێ ئەوە كو هاریكارییا هەوە بكەت، دەرفەتان بۆ هەوە ڕێك بێخیت.
بەلێ ب مخابنی ڤە ئەو پێشكەفتنا كو نوكە هوون ل كوردستانێ دبینن، بێ ئاستەنگ نەبوویە، بەلكو گەلەك ڕێگری ل مە هاتنە كرن ئەگەر نە ئەڤرۆ كوردستانا مە ل قووناغەكا گەلەك باشتر و پێشكەفتیتر دا بوو. گەلەك نەحەزێن مە چاڤێن وان ب سەركەفتن و پێشكەفتنا وەلاتێ مە ناڕابیت، بزاڤكرن نەهێلن ئەم پێش بكەڤین و نەهێلن ئەم سەركەڤین، بەلێ خۆڕاگرییا میللەتێ مە و خۆڕاگرییا هەوە و زەحمەتا هەوە و قوربانیدانا پێشمەرگەی و كەسوكارێن هەوە بوویە ئەگەرێ وێ چەندێ كوردستان ڕۆژ ب ڕۆژ پێشكەفتیتر و سەركەفتیتر بیت.
ئەڤە ل سەر هەوە دمینیتەڤە و بڕیار د دەستێ هەوە دایە كو هوون چەند دخوازن خۆ ب وەستینن ، وەكی حوكمەت ئەم د هەموو بزاڤێن خوە دایە و ل گەل حوكمەتا فیدرالی ژی بەردەوام دبین بۆ وێ چەندێ كو هاریكارییا زێدەتر بۆ دەرفەتا كاری، بۆ دامەزراندنا دەرچوویێن زانكۆیێ بهێتە ڕێكخستن.
ب مخابنی ڤە ژ سالا 2013ێ ڤە هەتا نوكە حوكمەتا فیدرالی ڕێك نەدایە چو كەسەك ل هەرێما كوردستانێ بهێتە دامەزراندن، بەلێ ئەم نە ڕاوەستاینە، ئەو هەموو پڕۆژەیێن لڤێرە هاتینە كرن، بەرهەمێ خەبات و زەحمەتا هەوە ب خوە نە، كەرتێ تایبەت ل هەرێما كوردستانێ هاریكار بوو ل گەل حوكمەتێ بۆ وێ چەندێ ئەم بشێین پێنگاڤ ب پێنگاڤ بەر ب پێش بچین و چو ئەگەر و چو ڕێگرەك نەشێت كاروانێ پێشكەفتنێ ل هەرێما كوردستانێ ڕابگریت.
ئەم ئەڤرۆ ژی ل گەل حوكمەتێ بەردەوام دبین بۆ وێ چەندێ دامەزراندن ل سەر ئاستێ حوكمەتا فیدرالی بهێتە چارەسەركرن، بۆ وێ چەندێ ئەم بشێین ڤێ دەرفەتێ زێدەتر بۆ دەرچوویان و خەلكێ كوردستانێ زێدەتر بكەین، بەلێ ئەڤە ب تنێ بەس نینە، بەرنامەیێ حوكمەتێ ئەوە كو ئەم دەرفەتا كاری ل كەرتێ تایبەت زێدەتر بكەین، ئەم هاریكارییا كەرتێ تایبەت بكەین بۆ وێ چەندێ ئەڤ كەرتە بشێت ڕۆژ ب ڕۆژ بەر ب پێشتر بچیت و دەرفەتا زێدەتر بۆ هەوە پەیدا بكەت دا هوون بشێن د بوارێ كارێ خوە دا ئەو تشتێ هەوە خواندی و زانستێ هەوە وەرگرتی و ئەزموون و شارەزاییا خوە هوین بشێن زێدەتر تێدا كار بكەن.
ئەڤە سۆزەكە ئەم بەردەوام دبین ل سەر بۆ وێ چەندێ ئەم هاریكارییا ئێك بكەین، هوون چەند چاڤەڕێیا حوكمەتێ نە، ئەم ژی هندە چاڤەڕێیا زەحمەت و پشتەڤانییێن هەوەینە. حوكمەت تشتەكێ جودا نینە ژ هەوە، پشكەكە ژ هەوە ، هەوون حوكمەتێ پێك دهینن، پاشەڕۆژا هەوە و حوكمەتا داهاتی جهێ هەوە تێدا دبیت، هوون دشێن وەلاتێ خوە بۆ وی ئاستی ببەن یێ كو هوون ب خوە دخوازن.
هیڤییا من ژ هەوە ئەوە جارەكا دی هاریكار بن ل گەل ئێك، ل گەل حوكمەتا خوە و ڕێكێ نەدەن چو كەسەك هەوە بێ هیڤی بكەت، ئەم نە د وەستین ، نە بێ هیڤی دبین، ڕۆژ ب ڕۆژێ ژی سەركەفتی دبین.
ئەز حەز دكەم لڤێرە باس ل هندەك بابەتێن تایبەت یێن ئەڤرۆ بكەم كو بۆ هەوە هەمووان گرنگن، ئێك ژ وان پەیوەندییێن مەنە ل گەل حوكمەتا فیدرالی، ل گەل ڤێ حوكمەتا نوو پێنگاڤێن باش مە هاڤێتینە و پەیوەندییێن مە بەر بچارەسەری و باشتربوونێ دچن، مە پشتەڤانییا خوە بۆ سەرۆك وەزیران و حوكمەتا نوو یا فیدرالی ڕاگەهاندیە و ئەو دزانن كو داخوازییا مە بجهئینانا دەستووری و مەرجێن مە بۆ پشتەڤانییا تەمام، بجهئینانا دەستووری و بەرهەڤكرن و بجهئینانا هەموو مافێن خەلكێ كوردستانێ یە، ئەم بەردەوام دبین ل داكۆكیكرنێ ل سەر مافێن خەلكێ مە د هەر بوارەكێ دا بیت و ل هەر دەمەكی دا بیت.
نوكە گەلەك ژ وان ئاریشەیێن هەین یێن هاتینە چارەسەركرن و گەلەك ژی ماینە بەلێ بەردەوام دبین بۆ وێ چەندێ ئەو ژی بهێنە چارەسەركرن.
ل ڤان چەند ڕۆژێن بۆری دا هەوە دیت هێزێن هەڤپەیمانان دوماهی ب ئەركێن خوە ئینا وەكی ئەركێ هەڤپەیمانیێ ل دژی داعشێ، ئەم ب ناڤێ خەلكێ كوردستانێ و ب ناڤێ هەوە هەموویان سوپاسییا هێزێن هەڤپەیمانان دكەین بۆ پشتەڤانییا وان و هاریكارییا وان ل گەل هێزا پێشمەرگەی یا كو هێزا شەڕكەر بوون بۆ شكاندنا هێزا تیرۆرێ. داعش ب دەستێ پێشمەرگەی هاتە شكاندن، ڕاستە هاریكارییا هەڤپەیمانان زۆر بوو، بەلێ قارەمانێ شكاندنا تیرۆرێ پێشمەرگە بوو، ئەو پێشمەرگە ژی كەسوكارێن هەوە بوون، ژ بەر وێ چەندێ جارەكا دی هەم سوپاسییا هەڤپەیمانان دكەین ود هەمان دەم دا گەلەك سوپاسییا پێشمەرگەیێ خوە دكەین بۆ وی دەستكەفتا مەزن كو هەموو جیهان شانازیێ پێ دكەت. سوپاسییا هەڤپەیمانان دكەین، بەلێ حەز دكەم ئەو ژی بزانن، هندی ئەم خودانێن وان پێشمەرگان بین، كوردستان یا ئارام و پاراستییە و بلا چو جارەكێ كەسەك چاڤ ێ خوە نەبەتە وێ چەندێ كو كوردستان پشتی چوونا هەڤپەیمانان دێ بیتە پارییەكێ ساناهی بۆ دوژمن و نەحەزێن مە، كوردستان ب دەستێ پێشمەرگەی پاراستییە و ب دەستێ پێشمەرگەی ژی ب ئارامی و پاراستی دێ مینیت.
دەرچوون یان تەمامبوونا ئەركێ هەڤپەیمانان ڕامانا وێ چەندێ نینە كو پەیوەندییا مە ل گەل هەڤپەیمانان دووماهیك هاتیە، شێوازێ پەیوەندیكرنێ ل گەل هەڤپەیمانان هاتییە گۆهۆڕین، ئەركێ هەڤپەیمانان بۆ شەڕێ دژی داعشێ بوو، بەلێ پەیوەندییێن مە ل سەر ئاستێ ئیراقێ، یان ل سەر ئاستێ هەرێما كوردستانێ ل گەل هەڤپەیمانان بەردەوام دبیت ب شێوازەكێ دی، ئەو پەیوەندی بەردەوام دبیت، پشتەڤانییا وەلاتێن دۆستێن مە بۆ هەرێما كوردستانێ بەردەوام دبیت.
بەلێ دیسان ئەز دووبارە دكەمەڤە، پشتا مە ب خودێ گەرمە، ب پێشمەرگەیێ مە گەرمە و ب هەوە گەرمە، إن شا الله ئەڤ باوەڕە دناڤ میللەتێ مە دا بەردەوام بیت، هەم باوەرییا هەوە بۆ حكومەتێ جهێ سەربلندی و شانازیێ یە، هەم باوەرییا حكومەتێ ب هەوە بۆ مە جهێ شانازی و سەربلندیێ یە، ژ بەر وێ چەندێ ئەو پەیوەندی چەند یا بهێزتر بیت، هندە ژی هەڤپەیمان و دۆستێن مە زێدەتر دشێن هاریكار بن بۆ مە.
خۆشك و برایێن هێژا ..
بابەتەكێ دی یێ كو ئەڤرۆ ئەز حەز دكەم بۆ هەوە بەرچاڤ بكەم ، بابەتێ پێكهینانا حوكمەتا هەرێما كوردستانێ یە، ڤێ مەهێ دبیتە دوو سال كو ب سەر هەلبژارتنێن هەرێما كوردستانێ دا دەرباز دبن، ب مخابنی ڤە پشتی دوو سالان هێشتا نە پەرلەمان كارا بوویە و نە حوكمەت هاتیە پێكهینان، گەلەك درێژ بوو كو ئەڤە ب ڕاستی تشتەك نینە ب دلێ مە بیت، مە ڕۆژەكێ پشتی هەلبژارتنان داخواز كر كو پەرلەمان كۆمبیت و حوكمەت بهێتە پێكهینان، ئەم هەموو دەمان بەرهەڤ بووین و دەستێ دۆستینیێ ژی مە بۆ هەموو وان ئالییێن سیاسی درێژ كریە یێن كو دەنگێ خەلكێ كوردستانێ وەرگرتیی و ئەندامێن پەرلەمانی هەنە كو بهێن هەم پەرلەمانی كارا بكەن و هەم حوكمەتێ ژی پێك بهینن، پێكهینانا حوكمەتێ دڤێت ڕەنگڤەدانا ئەنجامێن هەلبژارتنان بیت، هەرچەندە ئەم گەلەك بەرهەڤ بووین و نوكە ژی د بەرهەڤین، زێدەتر ژ هەقێ ئالییێن دی ژی بەرهەڤییا مە تێدایە كو بساناهی ئێخستنێ تێدا بكەین، ل گەلەك مافێن خوە ب خوەش بین بۆ بەرژەوەندییا میللەتێ مە و ئاشتی و ئاڤەدانییا وەلاتێ مە دا حوكمەت بهێتە پێكهینان.
چو ئەگەرەك نینە پشتی دوو سالان هێشتا پەرلەمان كار نەبیت و نەهێتە كرن؟ هەكە هزر ل وێ چەندێ بكەنەڤە بۆچی پەرلەمانی كارا ناكەن و بۆچی حوكمەت ناهێتە پێكئینان، ئیلا ئالییەكی دڤێت بەرژەوەندی تێدا هەبیت، حوكمڕانیێ بكەت بێ وێ چەندێ بەرپرسیار بیت بەرامبەری مللەتێ خوە و بێ وێ چەندێ بەرپرسیار بیت بەرامبەری چو حكومەتەكێ، ڕەنگە بڤێت ئەڤ ڕەوشە ب ڤی شێوەی بەردەوام بیت.
بەلێ ب ڕاستی مللەتێ مە و خەلكێ كوردستانێ نابیت ئێدی ژ چو هێزەكا سیاسی قەبوول بكەت یاریێ ب چارەنڤیسێ مللەتێ مە بكەت. ئەندامێن پەرلەمانی نوونەرێن دەنگێ خەلكێ كوردستانێ نە، بەرپرسیارەتییا هەر ئەندامەكێ پەرلەمانی ئەوە كو وەفادار بیت بۆ وی دەنگێ كو خەلكێ كوردستانێ پێ دای و ئەڤرۆ بهێت ل پەرلەمانی ڕوونیت و ئەو وەفایا كو هەیە بەرامبەری خەلكێ خوە ل پەرلەمانی، بەرگریێ ژ داخوازیێن مللەتێ خوە بكەت.
ئەم دخوازین پەرلەمان كارا ببیت، چونكی ڕوونشتنا پەرلەمانی ئێكەم پێنگاڤە بۆ پێكهینانا حوكمەتێ. داخوازا مە ئەوە جارەكا دی بەرژەوەندییا مللەتێ مە و بەرژەوەندییا وەلاتێ مە بێخنە بەری بەرژەوەندییا حزبی و بەرژەوەندییا تەسكا كەسی، دەست ژ دەستكەفتێن كەسی یێن خوە بەردەن و هزر ل بەرژەوەندییێن وەلاتێ خوە و مللەتێ خوە بكەن، دەستێ خوە بكەنە دناڤ دەستێ مە دا ، پەرلەمانی كارا بكەنەڤە و حوكمەتێ ژی پێك بهینن، چونكی سەبرا مە ژی سنۆرەك هەیە و ئەم دخوازین ڕاستگۆ بین ل گەل مللەتێ خوە، ڕاستگۆ بین ل گەل دەنگدەرێن خوە، ئەم دخوازین ئەو حوكمەتە ب زووترین دەم بهێتە پێكهینان، ئەم بەرهەڤین هەمر هاریكارییەكێ بكەین بۆ وان ئالییێن كو خەمخۆرێ وی خەلكی و وی وەلاتی نە دا ئەم بەر ب ئاڤەدانییا زێدەتر و دەستكەفتێن زێدەتر پێنگاڤان بهاڤێژین.
خۆشك و برایێن هێژا من گەلەك درێژ كر بەلێ من حەز كر ڤان ئاخڤتنان د خزمەتا هەوە دا بكەم، چونكی هوون دێ چنە دناڤ ژیانەكا نوو دا. قووناغا خواندنێ تەمام بوو، هوونبەرامبەری وان ئاستەنگ دبن، بەلێ دەرفەت ژی بۆ هەوە گەلەك دی هێنە پێش. خواندن ب تنێ ئەو نینە پرتووكەكێ بخوینن یان ژی زانستەكێ فێر ببن، دەمێ هوون دهێنە زانكۆیێ، هوون خوە بەرهەڤ دكەن چەوا بشێن ڕۆلێ خوە ببینن و كاریگەرییا هەوە ل سەر جڤاكا هەوە و مللەتێ هوین دیار بیت.
ئەم دخوازین كوردستانا مە سال ب سال بەر ب پێش بچیت. ل سەر ئاستێ خواندنێ مە پێنگاڤێن باش هاڤێتینە، دەستەیا باوەریبەخشینێ ل جڤاتا وەزیران ب بڕیارا جڤاتا وەزیران هاتە دامەزراندن بۆ وێ چەندێ ئاستێ خواندنێ ب پێڤەر و ستانداردەكا نێڤدەولەتی بەر ب پێش ببەت، ئەز دبینم ئەنجامێن زانكۆیێن مە سال ب سال باشترن و خواندن ل هەرێما كوردستانێ ژ ئاستێ دەستپێكی هەتا زانكۆیێ بەر ب پێش دچیت، بەلێ هێشتا ل ئاستێ خواستا مە نینە، هیڤی و ئۆمێدا مە ئەوە كوردستان چ جارەكێ ژ پێشكەفتنێ نە ڕاوەستیت، ئەو پێشكەفتن ژی ل سەر دەستێ هەوە بجهـ دهێت.

ب بەرهەڤبوونا سەرۆك مەسعوود بارزانی، ل باژێڕێ هەولێرێ، ڕێوڕەسمێن دووماهیكهاتنا خۆلا 20ێ یا پەیمانگەها كادرێن پارتی دیموكراتی كوردستان هاتنە بڕێڤەبرن.
سەرۆك بارزانی پەیڤەك پێشكێش كر و پیرۆزباهی ل قوتابییێن دەرچوویێن خۆلا 20ێ كر و سوپاسییا بەرپرسێ پەیمانگەهێ و مامۆستایان ژی كر ل پێگەهاندنا ڤێ سامانا مەزن.
سەرۆك بارزانی ڕاگەهاند: دڤێت قوتابییێن دەرچووی مفایەكێ مەزن ژ وی زانستی ببینن یێ كو وەرگرتی و پەروەردەیا سیاسی بۆ كادران گەلەك گرنگە ب تایبەت د ڤی سەردەمێ دا و دڤێت كادرێ مە چەكدار بیت ب وی زانستی یێ كو بشێت ڕووبڕووی هەموو ئاستەنگیان ببیت.
هەروەسا سەرۆك بارزانی ئاماژە ب دیرۆك و پێدڤییا دامەزراندنا پارتی دیموكراتی كوردستان كر و گۆت: پارتی ل قووناغەكا گەلەك هەستیار و زەحمەت بۆ كوردان هاتییە دامەزراندن، بەلێ پارتی نەهێلا بێ هیڤیاتی بنەجه ببیت و هیڤی ئێخستە دناڤ دەرۆونێ هەر تاكەكێ كورد دا.
هەر د پەیڤا خوە دا سەرۆك بارزانی باس ل شۆڕشێن كوردستانێ كر و ل دۆر شۆڕشا ئیلۆنێ ڕاگەهاند: شۆڕشا ئیلۆنێ ب سەركردایەتییا بارزانیێ نەمر شۆڕشا هەموو نەتەوەیا كورد بوو و كورد ل هەموو پارچەیێن كوردستانێ د وێ شۆڕشێ دا پشكدار بوون و شۆڕشا گولانێ ژی هەكە هاریكارییا برایێن مە ل باكوور و ڕۆژئاڤا نەبا ئەم نەدشیاین بەردەوام بین.
سەرۆك بارزانی گۆت ژی: پارتی ڕاستییا نەتەوەیی گەهاندە هەموو پارچەیێن كوردستانێ و پارتی باوەری ب خوەبوون دروست كر و ئەڤە ڕاستییە.
هەر د پەیڤا خوە دا سەرۆك بارزانی دووپاتی ل سەر پێدڤییا باوەری ب خوەبوونا تاكێ كورد كر و ڕاگەهاند: هەكە ئەم ب خوە نەبین كەس مە ناپارێزیت. گۆتە كادیرێن پارتی ژی: وێ باوەریێ بۆ هەر تاكەكێ كورد دروست بكەن.
سەبارەت ب ڕەوشا نوكە یا دەڤەرێ، سەرۆك بارزانی د پەیڤا خوە دا ئاماژە ب وێ چەندێ كر كو ڕەوشا دەڤەرێ گەلەك هەستیارە و كەس نزانیت بەر ب كیڤە دچیت، شەڕەكێ مەزن ل مەها شواتا بۆری ڕوودا و هەرێما كوردستانێ و خەلكێ كوردستانێ هەتا ڕادەیەكێ مەزن ژ بەلایەكا گەلەك مەزن هاتنە پاراستن.
دەربارەی پەیوەندییان ژی ل گەل وەلاتێن دەوروبەر، سەرۆك بارزانی گۆت: حەز دكەین باشترین پەیوەندی هەبیت و نە دوژمنین ل گەل ئێرانێ و نە ل گەل توركیایێ و چو دەولەتەكا دی. سەرۆك بارزانی هیڤی ژی خواست كو شەڕێ دەڤەرێ ب ئاشتی دووماهیك بهێت.
سەبارەت ب پەیوەندییان ژی ل گەل حوكمەتا فیدرالی، سەرۆك بارزانی ڕاگەهاند: پەیوەندییێن مە نوكە باشن و ئەم ل سەر بنەمایێ دەستووری داخوازییان دكەین، داخوازا پتر ژ وێ ناكەین یا كو ل دەستووری دا هاتی و كێمتر ژ وێ یا كو د دەستووری دا هاتییە قەبوول ناكەین.
هەروەسا باس ل وێ ڕێككەفتنێ كر یا كو د ناڤبەرا نێچیرڤان بارزانی و هادی عامری دا هاتییە ئیمزاكرن و دووپات كر كو هەكە ئەڤ ڕێككەفتنە بهێتە بجهئینان باشە، بەلێ هەكە بجهنەئینن، ئەم دێ بیر ل وێ چەندێ كەین كا هەلوەستێ مە دێ چەوا بیت.
ل دووماهیێ دووبارە سەرۆك بارزانی پیرۆزباهی ل قوتابییێن خۆلا 20 یا كادران كر. هەروەسا سەرۆك بارزانی باوەرنامە و خەلاتێ ڕێزلێنانێ پێشكێشی مامۆستا و قوتابییێن سەركەفتی و دەرچوویێن خۆلا 20 یا پەیمانگەها پێگەهاندنا كادرێن پارتی دیموكراتی كوردستان كر كو د وێ خۆلێ دا 96 كەس پشكدار ببوون.

سەرۆكێ هەرێما كوردستانێ ل سالڤەەگەڕا نەهێ یا مالئاڤاییا ڕەحمەتی مام جەلال تالەبانی سەرۆككۆمارێ پێشتر یێ ئیراقێ پەیامەك ڕاگەهاند، ئەڤە دەقێ وێ یە:
ل سالڤەگەڕا مالئاڤاییا سەرۆك مام جەلال تالەبانی ، ب بلندترین ڕێز و پێزانین ڤە یادا سەركردەیەكێ مەزنێ نیشتمانی دكەینەڤە یێ كو ژیانا خوە بۆ خەباتێ د پێناڤ مافێن گەلێ كوردستانێ و خزمەتكرنا ئیراقێ تەرخان كری ود دژوارترین قووناغان دا دەنگێ دانوستاندنێ، تێكگەهشتن و پێكڤەكاركرنێ بوو.
باشترین وەفاداری بۆ یاد و میراتێ مام جەلالی ئەوە كو دانوستاندن، تەبایی و ئێكڕێزیێ بكەینە ڕێكا چارەسەركرنا ناكۆكییان و پێكڤە كار بكەین بۆ پاراستنا ماف و دەستكەفتێن گەلێ كوردستانێ و چەسپاندنا هەڤپشكی وئارامیێ ل ئیراقێ.

مەسرور بارزانی، سەرۆكێ حوكمەتا هەرێما كوردستانێ، پێشوازییا ئیڤان یۆریچ، بالیۆزێ كرواتیایێ ل ئیراقێ كر.
د كۆمبوونێ دا بیروبوچوون سەبارەت ب دووماهیك پێشهاتێن ڕەوشا گشتی یا هەرێما كوردستانێ و ئیراق و دەڤەرێ هاتنە گەنگەشەكرن.
سەرۆكێ حوكمەتا هەرێمێ ئاماژە ب دۆستینی و پەیوەندییا دێرین یا د ناڤبەرا كوردستانێ و كرواتیایێ دا كر و دوپاتی ل سەر گرنگییا بهێزكرنا پەیوەندیێن دوو قۆلی كر.
بالیۆزێ كرواتیایێ حەزا وەلاتێ خوە بۆ پێشڤەبرنا پتر یا پەیوەندییان ل گەل هەرێما كوردستانێ ل بوارێن جۆراوجۆر دوپات كر.