ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویا کرن: ئەڤ شەڤە دو روودانێن ترافیکێ هاتنە رووان و د وان هەردو روودانان دا کەسەک بریندار بوو.
ناڤهاتی زێدەتر دا دیار کرن: ئەڤ شەڤە ل سەر رێیا سێمێل زاخۆ و ل نێزیکی مەرینا دو رودانێن ترافیکێ هاتنە روودان و د وان هەردو روودانێن لێکدانێ دا کەسەک بریندار بوو، هەروەسا زیانێن مادى ژی ب وان ترۆمبێلان كەفتن
ئەڤرۆ نیوز:
رێڤەبەریا گشتی یا سەقاناسی و ئەردهەژان ل هەرێما کوردستانێ بەلاڤکر، ئەڤ شەڤە دەڤەرا حاجی ئۆمەران ل سنورێ قەزا چۆمان یا سەر ب پارێزگەها هەولێرێ ڤە، سارترین دەڤەرە ل هەرێما کوردستانێ.
هەروەسا گۆتیە، ئەڤ شەڤە ١٠ شواتا ٢٠٢٠، ناحیا حاجی ئۆمەران سارترین دەڤەرا هەرێمێ یە و نزمترین پلا گەرماتیێ تێدا هاتیە تۆمارکرن ١٤ پلە ل ژێر سفرێ دایە، هەروەسا پشتی حاجی ئۆمەران، هەر ئێک ژ دەڤەرێن کانی ماسێ و هەلشۆ و چۆمان دهێن، کو ب ١٠ پلان ل ژێر سفرێ دا سارترین دەڤەرێن ئەڤ شەڤە نە ل هەریمێ.
ئەڤرۆ نیوز:
رێڤەبەریا راھێنانا پیشەیی ل پارێزگەها دھوکێ، راگەهاندنەک بەلاڤکڕیە و تێدا دیار کریە، کو کرێکارێن کەرتێ تایبەت ل ھەرێما کوردستانێ ل دەمێ ھەبوونا ھەر سکالایەکێ یان پسیارەکێ دەربارەی دەستەبەرێ کومەلایەتی (ضمان اجتماعي) و وەرگرتنا پارێ دەستەبەرێ کومەلایەتی و خانەنشینکرنێ و داخوازا دەرفەتا کاری، هوون دشێن دەمژمـــێر ٩ سپـــێدێ هەتا ٥ ئێــڤــاری پەیوەندیێ ب ھێلا گەرما ھشیاریا کرێـــکاران یا ژمـــارە 5500 بـکەن و دێ بەرسڤا ھەموو پسیارا و سکالان ھێتە دان.
ئه‌ڤرۆ نیوز ، زنار تۆڤى:
دێوالى حه‌مێ بریندار رێڤه‌به‌رێ سه‌خبێرى و پاراستنا رێك و پرا ل پارێزگه‌ها دهۆكێ، بۆ ئه‌ڤرۆ نیوز دیار كر: وان حه‌فت تیمێن رامالینا به‌فرێ ل سه‌رانسه‌رى پارێزگه‌ها دهۆكێ پێكئیناینه و ئه‌و تیمه هه‌رده‌م د كارى دانه و ده‌مێ به‌فر دباریتن هه‌موو تیمێن مه ره‌نگه‌كێ به‌رده‌وام به‌فرێ ل سه‌ر رێكێن گشتى یێن هاتنوچوونێ رادمالن.
ناڤهاتى زێده‌تر گۆت: ئه‌ڤرۆكه رێژه‌كا باش یا به‌فرێ ل سنۆرێ پارێزگه‌ها دهۆكێ باریه، هه‌روه‌سا تیمێن وان شیاینه هه‌موو رێكێن هاتنوچوونێ یێن ژ ده‌رڤه ژ به‌فرێ رابمالن، هه‌ر چه‌نده ئاسته‌نگ دكه‌ڤنه ل پێشیا كارێ وان، ده‌مێ به‌فر ب رێژه‌كا مه‌زن دباریت و ئاسته‌نگا وان یا مه‌زن به‌ستیه، ده‌مێ سه‌قا ب شه‌ڤێ دبیته ساهى به‌ستى رێیان دگریت و ئه‌و نه‌شێن وێ به‌ستیێ راكه‌ن، له‌وما ئه‌ڤ چه‌نده دبیته ئاسته‌نگ ل پێشیا كارێ وان، دیسان ئه‌و ئه‌ڤرۆكه ل گه‌ل تیمه‌كێ بوویه ل ده‌مێ پاقژكرنا رێیا سحێلا بۆ ره‌بیعه ژ به‌فرێ، كو ئه‌ڤرۆ پترى 20 سه‌نتیمێن به‌فرێ ل وێ ده‌ڤه‌رێ بارینه.
ئەڤرۆ نیوز:
ژێدەرەکێ ژ وەزارەتا دارایی و ئابووریا هەرێما کوردستانێ راگەهاند، سەرەرای هندێ کو سوبەهی بهێنڤەدانا فەرمیە ل ناڤەندێن خواندنێ، لێ سوبەهی سێشەمبیێ ١١ شواتا ٢٠٢٠، پارڤەکرنا مووچێ وێ وەزارەتا پەروەردێ ناهێتە راگرتن و دێ هێتە پارڤەکرن.
دیارکریە ژی، رێڤەبەریێن قوتابخانەیان دشێن سەرەدانا بەنکان بکەن و مووچێ مامۆستایان وەربگرن.
سوبەهی دێ مووچێ هەیڤاا ١١ یا سالا بوری یا وەزارەتا پەروەردێ هێتە پارڤەکرن و ژبەر داکەفتنا پلێن گەرمێ هەر ئێک ژ پەروەردێن هەولێر، سلێمانی، دهۆک، هەلەبجە، ئیدارەیا ڕاپەڕین، سوبەهی کریە بهێنڤەدانا فەرمی بۆ قوتابخانان.
ئەڤرۆ نیوز:
رێڤەبەریا گشتی یا پەروەردێ ل پارێزگەها دهۆکێ روونکرنەک بەلاڤکریە و تێدا هاتیە:
ژبەر بارینا بەفرەکا زۆر ل پرانیا دەڤەرێن پارێزگەها دهوکێ و ژبەر نزمبوونا پلێن گەرماتیێ و گرتنا رێکێن هاتنوچوونێ ل پرانیا دەڤەران، لەوما رێڤەبەریا گشتی یا پەروەردێ ل پارێزگەها دهۆکێ رادگەهینیت، کو سوبەهی رێکەفتی 11/2/2020 بهێنڤەدانا فەرمی یە ل هەموو قوتابخانە و ناڤەندێن خواندنێ ل سەرانسەری پارێزگەها دهوکێ.
ئه‌ڤرۆ نیوز، ناجی به‌ده‌ل:
ئه‌ڤرۆ دو شه‌مب 10/2/2020 پێنجی سال بورین ژ دامه‌زراندنێ وهه‌لكه‌فتا یوبیلا زێرین یا ئێكه‌تیا نڤیسه‌رێن كورده، رۆله‌ك مه‌زن گێرایه د پێشڤه‌برن و خزمه‌تكرنا زمان و دیرۆك و وێژه‌یا كوردی.
محه‌مه‌د عه‌بدولا جێگرێ سه‌رۆكێ ئێكه‌یتا نڤیسه‌رێن كورد دهۆك بۆ ئه‌ڤرۆ نیوز دیاركر رۆژا 10/2/1970 ئێكه‌تیا نڤیسه‌رێن كورد ل به‌غدا هاته راگه‌هاند و ژ وێ رۆژێ هه‌تا نها به‌رده‌وامه دبیاڤێ نڤیسین و زمان و ئه‌ده‌ب و وێژه‌یا كوردی دا، ئیكه‌م كه‌سێ بوویه سه‌رۆكێ ئێكه‌تیا نڤیسه‌رێن كورد ژی هه‌ژار موكریانی بوو كۆ رۆله‌كێ بهێز هه‌بوو بۆ پێشڤه‌برنا ئێكه‌تیا نڤیسه‌رێن كورد.
محه‌مه‌د عه‌بدولا جێگرێ سه‌رۆكێ ئێكه‌یتا نڤیسه‌رێن كورد دهۆك گۆت: هه‌ر ل سالا 1971 تایێ دهۆكێ یێ ئێكه‌تیا نڤیسه‌رێن كورد هاته دامه‌زراندن، كۆ كه‌سێ ئێكێ یێ بوویه سه‌رۆكێ نڤیسه‌رێن كورد دهۆكێ، شێخ مه‌مدوح بریفكانی بوو ئه‌و بخۆ كه‌سه‌كێ شاره‌زا بوو دبیاڤێ وێژه‌یا كۆردی.
جێگرێ سه‌رۆكێ ئێكه‌یتا نڤیسه‌رێن كورد دهۆك گۆت ژی ئێكه‌تیا نڤیسه‌رێن كورد یا گشتی ل هه‌ولێرێ هه‌لكه‌فته‌كا مه‌زن ل سه‌ر ئاستێ هه‌می تایێن خوڤه كریه و ئه‌م ژی وه‌ك تایێ دهۆكێ تێدا پشكدارین و دڤێ چالاكیێ دا چه‌ندین لایه‌ن و به‌رپرسێن مه‌زنێن حوكمی تێدا پشكدارن و ب هه‌ماهه‌نگی و هه‌ڤكاریا وه‌زاره‌تا ره‌وشه‌نبیری، چالاكی ل هه‌ولێرێ دئێته رێك خستن.
محه‌مه‌د عه‌بدولا دازانین ب ژڤان بووین چالاكیا بیرهاتنێ ل دهۆكێ بكه‌ین لێ نڤیسه‌رێن كورد یا گشتی ده‌ست پێكر و ئه‌م ژی تێدا پشكدارین له‌ورا مه ل دهۆكێ چ چالاكی ئه‌نجام نه‌دان.
نيشاندان