ئه‌ڤرۆ نیوز:
حسێن عه‌ره‌ب ئه‌ندامێ جڤاتا نوونه‌رێن عیراقێ راگه‌هاندهه‌فتیا بهێت كابینا نوو یا حوكمه‌تا عیراقێ ب سه‌رۆكاتیا محه‌مه‌د عه‌لاوی ده‌ست بكار بیت.
ئه‌ندامێ جڤاتا نوونه‌رێن عیراقێ راگه‌هاند عه‌لاوی ل گه‌ل پێكهاته‌یێن عیرای دانوستاندنێ دكه‌ت، كابینا نوو دێ ژ 23 وه‌زیران پێك هێت و جڤاتا وه‌زیران ره‌تكرنا به‌ربژاران هه‌یه.
ئیكێ هه‌یڤا دوو به‌رهه‌م سالح سه‌رۆك كۆمارێ عیراقێ محه‌مه‌د توفیق عه‌لاوی بۆ پێك ئیننا كابینا نوو راسپاردیه.
ئه‌ڤرۆ نیوز، مه‌حمود نهێلی:
به‌رپرسێ پشكا كه‌شناسیێ ل قه‌زا ئامێدیێ بۆ ئه‌ڤرۆ نیوز دیار كر، ل پرانیا ده‌ڤه‌را ئامێدیێ به‌فر باریه و بوویه به‌ستی ژ به‌ر وێ یه‌كێ ئاسته‌نگی ل هه‌مبه‌ر هاتن و چونا هاولاتیان دروست بوویه.
هاشم یه‌حیا به‌رپرسێ پشكا كه‌شناسیێ ل قه‌زا ئامێدیێ بۆ ئه‌ڤرۆ نیوز دیاركر، كو د 24 ده‌مژمێرێن بوری دا ل سه‌نته‌رێ قه‌زا ئامێدیێ 7 سه‌نتیمێن به‌فرێ و 5 ملیمێن بارانێ بارینه و پاشان سه‌قا گه‌له‌ك سار بوویه و بوویه به‌ستی زێده‌باری وێ یه‌كێ كو به‌رده‌وام تیمێن رامالینێ جاده ڤه‌كرینه لێ هاتن و چون گه‌له‌ك ب زه‌حمه‌ت كه‌فتیه.
گۆت: ل سه‌رسنكی 12 ملیم و باران و 3 سمتیمێن به‌رفرێ و كانی ماسێ 20 ملیم باران و 26 سه‌متیمێن به‌فرێ و بامه‌رنێ 6 ملیم باران و 10 سه‌متیمێن به‌فرێ و ناحیا چه‌مانكی ژی 21 ملیم باران و 2 سه‌متیمێن به‌فرێ بارینه.
ناڤهاتی دیار ژی كر، كو ل سالا چووی ڤی ده‌مێ 300 ملیمێن بارانێ پتر ئه‌ڤ ساله باری بوون كو ئه‌ڤ ساله بتنێ 545 ملیم بارینه هه‌مبه‌ر سالاچووی ل ڤی ده‌می 841 ملیمێن بارانێ باری بوون.
ژلایێ خوه ڤه باژێرڤانیا سه‌رسنكی دیار كر، ژ به‌ر وێ پێلا به‌فرێ یا شڤێدڤی ده‌ڤه‌ر ب خوه گرتی، ل پرانیا جاده‌یێن سه‌رسنكێ به‌ستی دروست بوویه و ئاسته‌نگه ل هه‌مبه‌ر هاتن و چونا وه‌لاتیان دروست بوویه و ژ به‌ر وێ یه‌كی داحاز ژ شوفێران كریه كو هه‌كه بۆ كاره‌كی فه‌ر نه‌بیت هاتن و چونێ نه‌كه‌ن داكو توشی روودانێن هاتن و چونێ نه‌بن.
ئه‌ڤرۆ نیۆز، ئه‌میر ئه‌ترووشی
په‌نه‌له‌كێ تایبه‌ت ل ژێر درۆشمێ (جوانترین پارێزگه‌هـ، پیسترین ژینگه‌ه ل دهۆكێ) هاته سازكرن و تێدا رێڤه‌به‌رێ كارگه‌ها كواشێ ئاشكرا كر كو بێهنا گلێشێ كارگه‌هێ چو مه‌ترسی ل سه‌ر ژینگه‌هێ نینن.
ئه‌ندازیار حازم عه‌بدی، رێڤه‌به‌رێ كارگه‌ها كواشێ یا ژێك ڤاڤارتنا گلێشی بۆ ئه‌ڤرۆ نیۆز دیار كر، به‌ری نها راپۆرته‌ك ل سه‌ر پیسبوونا ژینگه‌هێ ب سه‌ده‌ما هه‌بوونا كارگه‌ها گلێشی ژ لایێ نۆژداره‌كێ دهۆكێ ڤه هاتبوو به‌لاڤكرن، لێ پشتی وی نۆژداری سه‌ره‌دانا رێڤه‌به‌ریا گشتی یا باژێرڤانیان ل پارێزگه‌ها دهۆكێ كری دیاركر، مه‌به‌ستا وی كارگه‌ه ب خوه نه‌بوو، به‌لكو مه‌به‌ست پێ دووكێلا گلێشی و دووكێلا وان كارگه‌هێن نه‌یاسایی و پارزینگه‌هێن په‌ترۆلێ یێن وێ ده‌ڤه‌را پیشه‌سازی نه كو دبنه سه‌ده‌ما پیسبوونا ژینگه‌هێ.
زێده‌تر گۆت: ل ده‌مێ كاركرنا كۆمپانیا ئه‌لمانی، وێ كۆمپانیێ ژ بۆ مه ته‌كه‌ز كربوو، جووداكرنا گلێشی چو مه‌ترسیه‌ك نینه، به‌لكو ل ده‌ما ئاگر به‌ربوونا گلێشی و دروست بوونا دووكێلێ مه‌ترسی دروست دبیت، هه‌ر ده‌ما دووكێل دروست ببا ڤێ كۆمپانیا ئه‌لمانی كار ب جه دهێلا و كار نه‌دكر.
فه‌رمانگه‌ها ژینگه‌ها دهۆك و ب هه‌ماهه‌نگی دگه‌ل په‌یمانگه‌ها ئارارات یا ئه‌هلی راببوون ب گێرانا په‌نێله‌كی ب ناڤ و نیشان (جوانترین پارێزگه‌هـ، پیسترین ژینگه‌ه ل دهۆكێ) ل هولا زانكویا دهۆك ب پشكداریا چه‌ندین و رێڤه‌به‌رێن فه‌رمانگه‌هێن دهۆكێ و ماموستایێن زانكۆ و چالاكڤان و ژینگه دوست و فه‌رمانبه‌ر و قوتابیان و رۆژنامه‌ڤانان.
ئه‌ڤرۆ نیوز:
رێڤه‌به‌راتیا هاتنوچونا هه‌ولێرێ، چه‌ند بریار بۆ هێسانكاریا وه‌لاتیان ده‌ر خستن، كۆ ئیك ژ وان بریارا ده‌مێ پشكنینیا ترۆمبێلێن بۆ كرین و فروتنێ ژ شه‌ش هه‌یڤان كره ساله‌ك.
ئه‌ڤرۆ هاتنوچونا هه‌ولێرێ ل هژمارا خویا تورێن جڤاكی به‌لاڤكر، عه‌میدێ مافپه‌روه‌ر دیدار عومه‌ر قادر رێڤه‌به‌رێ هاتنوچونا هه‌ولێری چه‌ند بریاره‌ك ب مه‌به‌ستا هێسانكاریان بۆ وه‌لاتیان ده‌رخستن، كۆ بڤی شیوه‌یی خوارێ:
ئه‌ڤرۆنیۆز، هه‌رهین محه‌مه‌د:
ژ بزاڤ و چالاكێن مالا لاوان یا ئێكه‌تیا لاوێن دیموكراتا كوردستانێ وب چاڤدێریا پارێزگه‌رێ دهۆكێ به‌رێز فه‌رهاد ئه‌مین ئه‌تروشى دێ فیسته‌ڤالا خوە یاسیێ یا لاوێن داهێنه‌رل روژا چارشەمبی رێکەفتی 2020/2/12 دەمژمێر(10)سپێدێ ل ھولا کونفرەنسان گێریت و دێ بۆ ماوێ دو رۆژان دێ یا بەردەوام بیت ئه‌ڤ ڤیسته‌ڤاله دێ ل سه‌ر ئاستێ هه‌رێماكوردستانێ هێته كرن و دێ بیست لاوێن داهێنه‌ر تێدا هێنه هه‌لبژارتن.
رێڤینگ شێخكى، به‌رپرسێ مالا لاوان یا ئێكه‌تیا لاوێن دیموكراتا كوردستانێ دیداره‌كێ دا بۆ ئەڤرۆ نیوز دیاركر كو به‌رى نوكه مالا لاوان پیشانگه‌ها لاوێن داهێنه‌ر هه‌بوویه و دو پیشانگه‌ه هه‌بووینه و به‌لێ مه هزر پتر پێشئێخستیه و مه كریه فیسته‌ڤال و دێ ل سه‌ر ئاستێ هه‌رێما كوردستانێ بیت و دڤێ ڤیسته‌ڤالى َدا دێ نێزیكى بیست لاوێن داهێنه‌ر ل سه‌ر ئاستێ هه‌رێما كوردستانێ دێ هێنه هه‌لبژارتن و دیسان دێ مه په‌نه‌له‌ك هه‌بیت كا دێ چه‌وان شى شیانێن خوه پێش ئێخیت و داهێنانێ كه‌ت و ب ئانه‌هیا خودێ ئه‌ڤ ڤیسته‌ڤاله ل ده‌ستپێكا سالا نوو هێته كرن و ئه‌م وه‌كو لژنه و مالا لاوان دێ ل سه‌ر ئاستێ هه‌رێمێ لێگه‌رین ل هه‌موو باژێرێن كوردستانێ ژبۆ هندى ئه‌م داهێنانێن لاوان بینین و بهێینه دهۆكێ و پشته‌ڤانیێ لێبكه‌ین.
ئه‌ڤرۆ نیوز، سالار دۆسكی:
گوتاربێژه‌كێ ئاینی ل دهۆكێ دیار كر، دانانا سه‌نته‌ره‌كێ ئوتیزمێ یان نه‌خۆشخانه‌كێ به‌رامبه‌ر چوونا 10 عومرانه و كێمتر نینه ژ ئاڤاكرنا مزگه‌فته‌كێ و خێرا وێ پتره، خودێ به‌حسێ مه‌زاختنا دراڤی دكه‌ت و ده‌ست نیشان نه‌كریه كو د بیاڤێ ئاڤاكرنا مزگه‌ڤته‌كێ دا بهێته مه‌زاختن، به‌لكو چ ئاسته‌نگ ل جڤاكی هه‌یه و ئه‌ڤرۆ روحا مرۆڤی به‌راهیتره و ئه‌ڤه ئه‌ركه دڤێت چاره‌سه‌ریا مرۆڤی بهێته‌كرن.
مه‌لا عیماد رێكانی، گوتاربێژێ مزگه‌ڤتا سه‌باح ئه‌تروشی بۆ ئه‌ڤرۆ دیار كر، هاندانا خه‌لكی ل سه‌ر هاریكاریا نه‌خۆشێن ئوتزمێ په‌یاما ئاینێن به‌ری ئیسلامێ بوویه و دیسا په‌یاما ئاینێ پرۆزێ ئیسلامێ ژی بوویه، ئیسلام ب تنێ نه‌هاتیه بۆ عیباده‌تی، به‌لكو هاتیه بۆ برێڤه‌برنا ده‌وله‌تداریێ و عیباده‌تی ژی و هه‌موو ئالیێن ژیانێ ب خوه ڤه گرتینه.
گوتاربێژ عیماد رێكانی ئه‌و ژی گۆت: دانانا سه‌نته‌ره‌كێ ئوتیزمێ یان نه‌خوشخانه‌كێ به‌رامبه‌ر چوونا 10 عومرانه، دێ گه‌له‌ك باشتر بیت ده‌وله‌مه‌نده‌ك پێنچ زارۆیان ل ده‌ڤه‌ره‌كێ ب ستوویێ خوه‌ڤه بگریت و كا پێدڤی ب چ هه‌یه و هاریكاری بۆ بهێته‌كرن كو چاره‌سه‌ری بۆ بهێته‌كرن.
د. سه‌میان عه‌بدولخالق سه‌عدی، رێڤه‌به‌رێ گشتیێ ئه‌وقاف و كارۆبارێن ئاینی ل پارێزگه‌ها دهۆكێ گۆت: گرنگه بۆ خێرخاز و ده‌وله‌مه‌ندان بهێته رونكرن ده‌مێ سه‌ردانا مه دكه‌ن و داخازا ئاڤاكرنا جهه‌كی دكه‌ن بۆ عیباده‌تی هه‌مان ده‌م بۆ بهێته دیاركرن كا خێرا ئاڤاكرنا سه‌نته‌ره‌كی یان نه‌خوشخانه‌كێ بۆ نه‌خۆشیه‌كا ب ڤی ره‌نگی تایبه‌ت زارۆكان چه‌ند و هاندان بهێته‌كرن كو هاریكاریا خه‌لكی بكه‌ن و خێر چه‌نده به‌رامبه‌ر ئاڤاكرنا جهه‌كێ عیباده‌تی و ئه‌ڤه ئه‌ركێ مامۆستایێن ئاینی یه.
شیلان سه‌عید ئه‌حمه‌د سه‌رۆكا رێكخراوا جوده‌ل بۆ زارۆكێن خودان پێدڤیێن تایبه‌ت بۆ ئه‌ڤرۆ گۆت: نه‌خۆشیا ئوتیزمێ نوكه یا به‌ربه‌لاف دبیت و پتر ژ 3000 هزار زارۆ هاتینه تۆماركرن و گه‌له‌ك نه‌هاتینه تۆماركرن و پێدڤیه هاریكاریا حوكمه‌تێ بهێته‌كرن و زارۆ بهێنه تۆماركرن، دیسا دڤێت خه‌لكێ دی بزانیت دێ چه‌وا سه‌رده‌ریێ ل گه‌ل وی زارۆی كه‌ت، ل دووڤ داتایێن سالا بووری پتر ژ 3000 هزار زارۆكان ل هه‌رێما كوردستانێ هاتینه تۆماكرن، ل سلێمانیێ 1300 زارۆ هاتینه تۆماركرن، ل هه‌ولێرێ 900 زارۆ و ل دهۆكێ 800 زارۆ هاتینه تۆماركرن.
به‌رپرسا هه‌مان رێكخراوا نه‌حكومی ئاماژه كره وێ چه‌ندێ ژی، ئه‌ڤ رێژه رۆژ بۆ رۆژێ به‌ر ب زێده‌بوونێ یه، چونكو ئه‌م پشكه‌كین ژ وه‌لاتێ عیراقێ و ئه‌و عه‌رده گه‌له‌ك چه‌ك و مادێن كێمیاوی و چه‌ك ل سه‌ر دهێته بكارئینان و ڤێ هه‌موویێ كارتێكرن ل سه‌ر ڤێ چه‌ندێ هه‌یه و كارتێكرن ل زارۆیان دهێته‌كرن.
ئه‌ڤرۆ نیوز، بارزان مزووری:
ل سالا 2011 نه‌خشه دیزاین بۆ ڤه‌گوهاستنا ئه‌ترووشا كه‌ڤن بۆ ئه‌ترووشا نوی ل ده‌شتا بلدێشا هاتیه چێكرن، لێ هه‌تا نها ل ئه‌ترووشا نوو ب تنێ ئاڤاهیێ فه‌رمانگه‌هێن میری لێ هاتینه دانان. ئه‌ڤه چه‌ندین ساله خه‌لكێ ئه‌ترووش چاڤه‌رێ دابه‌شكرنا پارچێن ئه‌ردی یه ل ئه‌ترووشا نوی ئاڤابكه‌ن. ل دووڤ گۆتنێن سه‌رۆكێ باژێرڤانیا ئه‌ترووش نه‌خشه و دیزاین بۆ هاتیه كرن د ناڤ دا 800 پارچه ئه‌ردان دا هاتینه ده‌ست نیشانكرن ل گه‌ل 250 پارچێن ئه‌ردی بۆ وان مه‌لاكێن ئه‌ردێ وان دكه‌ڤیته به‌ر نه‌خشه‌یێ باژێری كۆ ب وان پارچا بهێن قه‌ره‌بووكرن.
سیداد له‌زگین، ئێك ژ ئاكنجیێن ناحیا ئه‌ترووش دیار كر، ئه‌ڤه چه‌ندین ساله فه‌رمانگه‌هێن میری یێن ناحیا ئه‌ترووش بۆ ئه‌ترووشا نوی هاتینه ڤه‌گوهاستن، ب تنێ ئه‌م وه‌كۆ ئاكنجیێن ناحیێ ل ئه‌ترووشا كه‌ڤن ماینه ژبه‌ر گیرۆبونا ئاڤاكرنا ئه‌ترووش زێده‌تری 20 مالا هاتینه ڤه‌گوهاستن بۆ باژێرێ دهۆك و شێخان ژ مه‌ترسیا هه‌رفینا خانیێن وان یێن كه‌ڤن ژیان تێدا نه‌مایه.
ناڤهاتی خویاكر ناحیا ئه‌ترووش زێده‌تری 120 مال لێ هه‌بوون، نها ب تنێ 100 مال ماینه گه‌فێن هه‌رفتنا خانیێن وان ل سه‌ر دهێته كرن، ژ به‌ر كۆ ئه‌و خانی ل ده‌ستپێكا ئاڤاكرنا ئه‌ترووش هاتینه ئاڤاكرن ب به‌رێن كه‌ڤنار و نها نێزیكی 100 خانیا د ڤالانه هنده‌ك ژ وان هه‌رفتینه هنده‌ك ژی مه‌ترسیا هه‌رفینێ یا ل سه‌ره.
عائیشا حه‌مید، ئێك ژ ئافره‌تێن دانعه‌مر ل ناحیا ئه‌ترووش دیار كر هه‌ر وه‌خته‌كێ باران دباریت مه‌ترسیا هه‌رفینێ ل سه‌ر خانیێن مه دروست دبیت، چونكۆ ئه‌ڤ خانیه ل ده‌ستپێكا ژدایك بوونا باب و باپیرێن مه‌نه و مه شیان نینن دووباره ئاڤاكه‌ین.
سالم به‌ره‌كات، سه‌رۆكێ باژێرڤانیا ئه‌ترووش دیار كر، ئه‌م وه‌كۆ سه‌رۆكاتیا باژێرڤانیا ئه‌ترووش رابووینه ب ئه‌ركێ خوه ب دروستی ب دانانا نه‌خشه و دیزاینا ئه‌ترووشا نوی د نها دا یا قوناغێن كوژاندنێ دا دناڤ نه‌خشه‌ی دا 800 پارچێن ئه‌ردی هاتینه دابینكرن ل گه‌ل 250 پارچێن ئه‌ردی بۆ قه‌ره‌بووكرنا مه‌لاكان، ژ ئه‌گه‌رێن قه‌یرانێن دارایی ئه‌ڤ بریاره هاتیه راوه‌ستاندن ئه‌م ژی به‌رده‌وامین د قوناغێن جێبه‌جێكرنێ دا.
ناڤهاتی خویاكر، مه ل سالا 2011 ئه‌ڤ نه‌خشه و دیزاینه دروست كریه و هاتیه په‌سه‌ندكرن، به‌لێ قه‌یرانا دارایی ب سه‌ر دا هات و ژ به‌ر قه‌ره‌بوویا وان مه‌لاكێن ئه‌ردێ وان د نه‌خشه‌ی دا هه‌تا نوكه مایه هه‌لاویستی.
ئەڤرۆ نیوز:
رێڤەبەریا ھاتنوچوونا ھەرێما كوردستانێ راگەهاند، پشتی راگرتنا بڕیارا رێ پێدانێ ب ره‌شكرنا جامێن ترۆمبێلان بۆ دەمەکێ كورت ب مه‌به‌ستا ده‌رچوونا رێنمایێن نوو، ئه‌ڤرۆ دوباره رێک هاتە دان ب جێبه‌جێكرنا ڤێ بڕیارێ :
1- رێک دهێتە دان ب ره‌شكرنا هه‌ردو جامێن ته‌نشتێ یێن پێشیێ، یێ لایێ شوفێری لایێ سه‌كەنی ب رێژا 50% كو پێشتر ب تنێ 30% بوو.
2- رێک دهێتە دان ب ره‌شكرنا هه‌ردو جامێن ته‌نشتێ یێن پشتێ لایێ شۆفێری و سه‌كەنی ب رێژا 80% كو پێشتر ب تنێ 50% بوو.
3- جامێ پێشیێ یێ ترۆمبێلێ ب هیچ رەنگەکێ و ب هیچ رێژەکێ ناهێته ره‌ش کرن.
4- ئه‌و ترۆمبێلێن كو ژ ئالیێ كۆمپانیایێ ڤە ب خوە د جام ره‌شن ئه‌و ژی رێژا ره‌شكرنا وان نابیت ژ 80% زێدەتر بیت.
5- جام ره‌شكرن ب تنێ دێ بۆ ترۆمبێلێن تایبه‌ت بیت، بۆ یێن كرێ و تەكسیان نابیت.
6- هه‌مان رسومات كو د رێنمایان هاتبوونە دیاركرن دێ ژ وەلاتیان هێنە وه‌ر‌گرتن، ل جهێ جام ره‌شكرنا ترۆمبێلێن خوە سالانە.
7- ئه‌ڤ بڕیاره دێ ل رۆژا 10/2/2020 هێتە جێبه‌جێ کرن و وەلاتی دشێن سه‌رەدانا هاتنوچوونا باژێرێن خوە بكه‌ن ب مه‌به‌ستا رێگە پێدانێ ب جام ره‌شكرنێ.
ئه‌ڤرۆ نیوز:
ژێده‌رێن ده‌نگوباسان ل عیراقێ ئاشكرا دكه‌ن كو موقته‌دا سه‌در، رێبه‌رێ ره‌وتێ سه‌دری چاڤێ خوه بریه جهێ مه‌رجه‌عێ بلند یێ شیعان عه‌لی سیستانی وئیران ژی پشته‌ڤانیێ لێ دكه‌ت، به‌لێ چاڤدێره‌كێ سیاسی ئاماژێ دكه‌ت كو بۆچوونێن جیاواز و یێن هه‌دژ یێن موقته‌دا سه‌دری نابنه هاریكار بۆ گه‌هشتنا وی بۆ پێگه‌هێ مه‌رجه‌عیه‌تا بلند یا شیعان ل عیراقێ.
ناڤه‌ندێن عیراقی یێن ئاگه‌هدار، لڤینێن سیاسی یێن موقته‌دا سه‌دری، ب زڤرینێ بۆ جه‌ماوه‌رێ نه‌رازی ل جادێ و دووباره ڤه‌گه‌راندنێ، وه‌سا دیار دكه‌ن كو به‌رده‌وام موقته‌دا سه‌در دخوازیت د به‌رژه‌وه‌ندیا سیاسی یا خوه دا، وه‌به‌رئینانا سیاسی د ڤێ ره‌وشێ دا بكه‌ت، ژلایه‌كی سیاری پێلا نه‌رازیبوونێ دبیت و ژلایه‌كی دی ڤه ئیرانێ ژ خوه رازی دكه‌ت، نوكه ژی ب تمامی خوه بۆ دژایه‌تیكرنا هه‌ژموونا ئه‌مریكا ل عیراقێ ئێكلاكریه، ئه‌ڤ چه‌نده ژی د پێناڤێ وێ ئێكێ دایه تاكو ل داهاتی بشێت جهێ عه‌لی سیستانی مه‌رجه‌عێ بلند یێ شیعان ل عیراقێ بگریت.
هه‌ڤده‌م هنده‌ك شرۆڤه‌كارێن سیاسی و ناڤه‌ندێن عیراقی یێن ئاگه‌هدار ئاشكرا دكه‌ن كو ئیرانێ سۆز دایه موقته‌دا سه‌دری كو پشتی عه‌لی سیستانی، ئه‌و خودان بریار بیت و هه‌ڤشێوه‌ی پێگه‌هێ مه‌رجه‌عێ بلند رۆله‌كێ كارا د عیراقێ دا هه‌بیت، ئه‌و سۆزا ئیرانێ ژی بۆ موقته‌دا سه‌دری ب تایبه‌تی پشتی نه‌مانا قاسم سلێمانی، ب ئاشكراتر ب لڤینێن موقته‌دا سه‌دری ڤه یا دیاره.
ئه‌ڤ بۆچوونا شرۆڤه‌كار و ناڤه‌ندێن عیراقی یێن ئاگه‌هدار ل سه‌ر موقته‌دا سه‌دری زێده‌تر بۆ وێ چه‌ندێ ڤه‌دگه‌ریت كو د سێ هه‌یڤێن بۆری دا لایه‌نگرێن موقته‌دای ل جادێ كو ب (خودانێن كولاڤێن شین) دهێنه نیاسین، موقته‌دا سه‌در وه‌سا نیشا ددا، كو وی ناكۆكی ل گه‌ل هه‌ژموونا ئیرانێ ل عیراقێ یا هه‌ی، به‌لێ ژ نشكه‌كێڤه بوو هه‌ڤپه‌یمانێ ئیرانێ و ده‌ست ب ئه‌نجامدانا كۆمبوونان و كێشانا وێنان كر ل گه‌ل سه‌ركردێن هێزێن حه‌شدا شه‌عبی و ئه‌و لایه‌نێن كو پێشتر موقته‌دا سه‌دری ب پاشگۆیێ ئیرانێ د هژمارتن، هه‌ڤده‌م موقته‌دای خوه بۆ دژایه‌تیا ئه‌مریكا ل عیراقێ ئێكلا كریه.
ب دیتنا چاڤدێرێن سیاسی ئه‌و گوهۆرینا موقته‌دای په‌یوه‌ندی یا ب وێ چه‌ندێ ڤه هه‌ی كو ل دۆر هزرا وی مه‌رجه‌عیه‌تا بلند یا شیعێن عیراقێ ل داهاتی دێ بۆ وی بیت، ژبه‌ر وێ چه‌ندێ ژی دخوازیت هێزێن شیعی و جادێ و ئیرانێ ژ خوه رازی بكه‌ت.
د هه‌مان ده‌م دا ئاماژێ دكه‌ن كو ئه‌و بۆچوونێن هه‌ڤدژ یێن موقته‌دا سه‌در و ئه‌و ره‌وشا پشتی خوه‌نیشادانان ل عیراقێ هاتیه پێش، د هاریكار نینن كو موقته‌دا بشێت ل پاشه‌رۆژێ جهێ مه‌رجه‌عێ بلند یێ شیعان بگریت، به‌لێ هه‌ڤ بۆچوونه‌ك د ناڤ ناڤه‌ندێن عیراقی دا یا هه‌ی كو چاڤێ موقته‌دای یێ ل جهێ مه‌رجه‌عێ بلند، به‌لێ بۆچوونێن هه‌ڤدژ یێن وی نابن ئه‌گه‌ر بۆ ڤه‌كرنا ده‌رگه‌هێ پێگه‌هێ مه‌رجه‌عیه‌تا بلند ل به‌رده‌م وی. دیار دكه‌ن ژی كو زڤرینا لایه‌نگرێن موقته‌دای بۆ مه‌یدانا ته‌حریر ل به‌غدا، په‌یوه‌ندی ب دووباره سیاربوونا پێلا نه‌رازیبوونێ ڤه یا هه‌ی كو ژ ئه‌گه‌رێ ڤه‌كێشانا وان تووشی ره‌خنێن دژوار ببوون.
ئه‌ڤرۆ نیوز، قائید میرۆ
بڕیاره هه‌تا ده‌مێ دووماهیا ڤێ هه‌یڤێ به‌ربژارێ راسپاردی بۆ پۆستێ سه‌رۆك وه‌زیرێن عیراقێ، محه‌مه‌د ته‌وفیق عه‌لاوی كابینا خوه پێشكه‌شی جڤاتا نوونه‌رێن عیراقێ بكه‌ت، په‌یڤدارێ فراكسیۆنا پارتی دیموكراتی كوردستان ژی ل جڤاتا نوونه‌ران راگه‌هاند، پارتی دێ پشته‌ڤانیا هه‌ر سه‌رۆك وه‌زیره‌كی كه‌ت هه‌كه بشێت عیراقێ ژ ڤێ قه‌یرانێ ده‌رباز بكه‌ت و دبێژیت، مه‌رجێ مه بۆ سه‌رۆكێ وه‌زیران یێ نوو بجهئینانا دستوورێ عیراقێ یه.
ئارام باله‌ته‌یی، په‌یڤدارێ فراكسیۆنا پارتی دیموكراتی كوردستان ل جڤاتا نوونه‌رێن عیراقێ دیاركر” بابه‌تێ دیاركرنا سه‌رۆك وه‌زیرێن عێراقێ هه‌ر ژ ده‌ستپێكێ مه گوتیه گرێدای ناڤمالیا شیعی ڤه‌یه، زێده‌تر هه‌ر كه‌سه‌كێ ئه‌و بگه‌هنه رێككه‌فتنێ ل سه‌ر به‌ربژاره‌كی بۆ پۆستێ سه‌رۆكێ وه‌زیران، مه چو هێلێن سۆر ل سه‌ر چو كه‌سه‌كی نینن، بۆچوونا پارتی ئه‌وه كه‌سه‌ك ببیته سه‌رۆكێ وه‌زیران كو شیانێن چاره‌سه‌ركرنا ئاریشێن عیراقێ هه‌بن و بشێت عیراقێ ژ ڤان ئاریشێَن نوكه تێدا ده‌رباز دبیت قورتال بكه‌ت، هه‌روه‌سا داخوازیێن خوه‌نیشانده‌ران ژی بجهبینیت، به‌رۆڤاژی ئه‌م دێ هاریكاربین د گه‌ل حوكمه‌تا عیراقێ بۆ چاره‌سه‌ركرنا ئالۆزیێن وه‌لاتی، تنێ داخوازیا مه ژ محه‌مه‌د ته‌وفیق عه‌لاوی سه‌رۆك وه‌زیرێن نوو راسپاردی یێ عیراقێ، بجهئینانا دستوورێ عیراقێ یه و پێگیریێ ب رێككه‌فتنێن د ناڤبه‌را هه‌ردو حوكمه‌تێن به‌غدا و هه‌رێما كوردستانێ دا بكه‌ت”.
ل دۆر رێ و جهێن قانوونی بۆ پێكئینانا كابینا نوو یا حوكمه‌تا عیراقی َ ب سه‌رۆكایه‌تیا محه‌مه‌د ته‌وفیق عه‌لاوی، په‌یڤدارێ فڕاكسیۆنا پارتی دیموكراتی كوردستان گوت” ب گۆره‌ی دستووری، هه‌ر ل رۆژا هاتیه راسپاردن، پێدڤیه سه‌رۆك وه‌زیرێن راسپاردی بۆ ده‌مێ 30 رۆژان كابینا خوه پێشكه‌شیجڤاتا نوونه‌رێن عیراقێ بكه‌ت تاكو ده‌نگی ل سه‌ر بده‌ت، ئانكو دێ هه‌تا دووماهیا ڤێ هه‌یڤێ، عه‌لاوی ده‌لیڤه هه‌بیت بۆ پێشكه‌شكرنا كابینا خوه یا نوو حوكمه‌تێ”.
سه‌باره‌ت رێككه‌فتنێن د ناڤبه‌را هه‌رێما كوردستانێ و به‌غدا ژی، ئارام باله‌ته‌یی ئاماژه‌كر” ئه‌م داكۆكیێ ل سه‌ر وێ چه‌ندێ دكه‌ین كو رێككه‌فتن د به‌رده‌وامن د ناڤبه‌را هه‌رێما كوردستانێ و عیراقێ دا و هه‌ردولا ژی د پێگیربن بجهئینانا رێككه‌فتنێن هاتینه ئه‌نجامدان، ئه‌م باوه‌رین هه‌موو رێككه‌فتنێن هاتینه كرن د چوارچوڤێ قانوونێ و دستوورینه، چو به‌هانه نینن پێگیری ب رێككه‌فتنێن به‌ری نوكه نه‌هێته‌كرن وئه‌م د گه‌شبینین كو سه‌رۆك وه‌زیرێن نوو ژی دێ پێگیربیت ب وان رێككه‌فتان،”.
هه‌روه‌سا گۆت” دانوستاندن و لێك تێگه‌هشتن د ناڤبه‌را هه‌ردولا دا یێن هه‌ین، به‌لێ هێشتا ئه‌م ب هووری بابه‌تان دا”.
نيشاندان