ئەڤرۆ نیوز، زنار تۆڤی:
وەسا بریاربوو، ل بیرەوەریا شەهیدێن 1 شواتێ فیستەڤالا سینەمایی یا دژی تیرۆرێ ل هەولێرێ دەست ب کارێن خوە بکەت، ئەڤ فیستەڤالە دابۆ دەمێ چار رۆژان یا بەردەوام بیت و دیسان دێ 35 کورتە فلم پشکداریێ تێدا کەن، لێ ژبەر چەند ئەگەران بۆ ناڤەراستا ڤێ هەیڤێ هاتە پاشخستن.
بشتیوان عەبدوللا سەرۆک و رێکخەرێ گەرا پێنجێ یا فیستەڤالا سینەمایی یا دژی تیرۆرێ ل هەولێرێ بۆ ئەڤرۆ نیوز گۆت: ل سالا بوری وەزارەتا رەوشەنبیری یا حوکمەتا هەرێما کوردستانێ پشتەڤانیەکا تەمام ل فیستەڤالێ کر و بێی هەبوونا چ سپۆنسەران، لێ د ئەڤ سالەدا مە نڤیسارەک دایە وەزیرێ رەوشەنبیری، هەتاکو پێر ژی ئەو نڤیساره ل دەف وەزیرێ رەوشەنبیری بوو، وەزیری گۆت، فیستەڤالا دژی تیرۆرێ کارێ وەزارەتا رەوشەنبیری نینە، گۆتیە، ئەڤە کارێ حزبێ یە، یان ژی وەزارەتا شەهیدان، لدووڤدا مە سەرەدانا پارێزگارێ هەولێرێ کریە، وی گۆتیە ئەڤە کارێ وەزارەتا رەوشەنبیری یە، پاشی ئەم چووینە وەزارەتا شەهیدان، وان گۆتیە مە دێ پشتەڤانیێ ل هەوە کەین، لێ وەزارەتا دارایی گۆتیە، ئەڤە کارێ وەزارەتا رەوشەنبیری یە، لێ ژ روویێ دارایی ڤە چ لایان پشتەڤانی ل مە نەکر.
ناڤهاتی گۆت ژی: هەر چەندە مە کۆمەکا سپۆنسەران هەبوو، لێ ئەڤ فیستەڤالا مەزن ب وان سپۆنسەران ب تنێ برێڤە ناچیت، لەوما مە بریاردا ئەڤ فیستەڤالە هەتا ناڤەراستا ڤێ هەیڤێ بهێتە پاشخستن، ژ پێخەمەت ئەم بشێین هندەک سپۆنسەرێن دیتر پەیدا بکەین، داکو ئەڤ فیستەڤالە باشتر برێڤه بچیت، دیسان دبێژین مخابن وەزارەتا رەوشەنبیری پشتەڤانی ل ڤێ فیستەڤالێ نەکر.
نيشاندان
