ئه‌ڤرۆ نیوز:
وه‌زاره‌تا به‌ره‌ڤانیا توركیا راگه‌هاند چار سه‌رباز ژ ئه‌نجامێ بوردومانكرنێن حوكمه‌تا سوریا ل نیزیك ئه‌دلبێ هاتینه كوشتن و وان ژی به‌رسڤا حوكمه‌تا سوریا دایه.
وه‌زاره‌تا به‌ره‌ڤانیا توركیا ئه‌و چه‌نده ژی دازانین كو دوێ بوردومانكرنێ دا ژبلی كوشتنا چار سه‌ربازان نه‌هـ سه‌ربازی بریندار بوینه.
سه‌رۆك كۆمارێ توركیا گه‌ف ل حوكمه‌تا سوریا كر و راگه‌هاند: د به‌رسڤا ئه‌وێ هێرشا سوریایێ دا ل ئه‌دلبێ هاتیه كرن، 30 هه‌تا 35 چه‌كدارێن سوریا كوشتینه ب فرۆكه‌یێن ئێف شازده به‌رسڤا حوكمه‌تا سوریا هاتیه دان.
ئه‌ڤرۆ نیوز:
وه‌زاره‌تا پلاندانانێ یا حوكمه‌تا هه‌رێما كوردستانێ ل گه‌ل نوونه‌رێ رێكخراوا UNDPل هه‌رێما كوردستانێ گرێبه‌سته‌كا پلانا ستراتیژیا ده‌هـ سالان ل چه‌ند سێكته‌ره‌كان دا ئیمزاكر.
د. دارا ره‌شید وه‌زیرێ پلاندانانێ یێ حوكمه‌تا هه‌رێما كوردستانێ د پرێس كۆنفرانسه‌كی دا راگه‌هاند: د پلانانا ستراتیژی دبیاڤێ ڤه‌كۆلینان دا هه‌ولدانه بۆ هه‌ڤسه‌نگیكرنا دناڤبه‌را شاره‌زایێن ناڤخو و بیانی دروست بكه‌ین، چونكو خودان سه‌رمایه‌كێ مرۆڤی یێ باشین ئه‌م بخو دزانین گرفتێن مه چ نه و كیڤه‌دانه، پلانانا ستراتیژیا ده‌هـ سالان دناڤبه‌را 2020 هه‌تا 2030 دا هاتیه دارشتن هه‌موو سیكته‌رێن ساخله‌می و په‌روه‌رده و چاندن و پیشه‌سازی و ژینگه‌هـ و كاره‌ب و ئاڤ و چالاكیێن باژێرڤانیان و وه‌به‌رهێنان كارێن ده‌ستپێكیێن مه‌نه.
د. دارا ره‌شید وه‌زیرێ پلاندانانێ یێ حوكمه‌تا هه‌رێما كوردستانێ ئه‌و چه‌نده ژی دیاركر كاركرن ل سه‌ر سێكته‌ران لگۆری ئه‌ڤێ پلانانا ستراتیژی كۆ ئێك ده‌نگه ل گه‌ل كارنامه‌یا كابینا نه‌هێ یا حوكمه‌تا هه‌رێما كوردستانێ كۆ ب روونی ل هێلێن گشتی به‌حس لێ هاتینه كرن كو حوكمه‌ت ل ده‌مێ چار سالێن خودا چ كه‌رت و سێكته‌ر گرنگن كار ل سه‌ر كه‌ت.
ئه‌ڤرۆ نیوز، ناجی به‌ده‌ل:
وه‌زاره‌تا بازرگانی و پیشه‌سازیا حوكمه‌تا هه‌رێما كوردستانێ رێنمایێن نوو بۆ كوگه‌هێن خارنێ كۆ 28 خالن وه‌ك بریار ده‌رخستن.
لگوری نڤیسارا وه‌زاره‌تا بازرگانی و پیشه‌سازیا حوكه‌تا هه‌رێما كوردستانێ كۆ ل رۆژا پێنجشه‌مبی 29/1/2020 ده‌ركه‌تیه، و دوێ نڤیسیارێ دا هاتیه كۆ دڤێت كوگه‌هێن خارنێ ب تابلویێن ناڤێ كۆمپانی و خودانكاری و جورێ تشتێ تێدا هاتیه دانان بهێته هه‌لاویستن، رێك ژی ب چ ماده‌یه‌كێ سه‌رڤه‌چویی ل كوگه‌هێڤه بهێته هه‌لگرتن ناهێته‌دان و به‌رۆڤاژی دێ هێته سزا دان لگۆری پێرابونێن یاسایی.
د وێ نڤیسارا وه‌زاره‌تا بازرگانی و پیشه‌سازیا حوكمه‌تا هه‌رێما كوردستانێ دا تێدا هاتیه كۆ لگۆری رێنمایێن وه‌زاره‌تا بازرگانیێ، دڤێت كوگه‌هـ مه‌رجێن ساخله‌میێ و ته‌زینگه‌ه و باگوهور تێدا هه‌بن بۆ كۆنترولكرنا سه‌قایه‌كێ گونجای بۆ تشتێن خورانێ، ل رۆژا ده‌ركه‌تنا وان رێنمایان كار دێ پێ هێته‌كرن.
ئه‌ڤرۆ نیوز:
سه‌ركرده‌كێ ره‌وتێ سه‌دری یێ به‌رێ پێشنیاز دكه‌ت پایته‌ختێ عیراقێ ب شێوه‌كێ ده‌مكی ژ به‌غدا بۆ پارێزگه‌هه‌كا دی بهێته ڤه‌گوهاستن وداخوازكر ژی راده‌ك بۆ میلیشیێن كونترۆل ل سه‌ر ده‌وله‌تا عیراقێ كری ( وه‌كو ئاماژه‌ك بۆ حه‌شدا شه‌عبی) بهێته دانان.
ئه‌سعه‌د ئه‌لناسری، سه‌ركردێ دیار یێ به‌رێ یێ ره‌وتێ سه‌دری د نڤیسینه‌كێ دا ل سه‌ر تۆرا جڤاكی یا تویته‌ری به‌لاڤكر” گۆمان د وێ چه‌ندێ دا نینه كو ئه‌و میلیشیێن ب سه‌ر ئیرانێ ڤه نوكه كونترۆل ل سه‌ر ده‌وله‌تا عیراقێ یا كری ل بن ناڤێ شه‌رعیه‌تا دستووری”.
وی سه‌ركردێ به‌رێ یێ ره‌وتێ سه‌دری داخوازا دانانا راده‌كی بۆ وان میلیشیاتان كر، هه‌روه‌سا پێشنیازا ڤه‌گوهاستنا پایته‌ختێ عیراقێ ب شێوه‌كێ ده‌مكی ژ به‌غدا بۆ پارێزگه‌هه‌كا دی كو ئه‌و پێرابوونه ژی ب ئیرادا وه‌لاتیێن عیراقێ بیت و داخواز ژ جڤاكێ نیڤده‌وله‌تی ژی بهێته كرن كو سه‌ره‌ده‌ریێ ل گه‌ل ڤێ بژاردێ بكه‌ت.
ناڤبری ئاماژه ب به‌رده‌وامبوونا نه‌رازیبوونێن مللی ل عیراقێ كر و ب تایبه‌تی نه‌رازیبوونا خوه‌نیشاده‌ران ل سه‌ر پرسا به‌ربژاركرنا محه‌مه‌د ته‌وفیق عه‌لاوی بۆ پۆستێ سه‌رۆكێ وه‌زیران كر كو ب (به‌ربژارێ ده‌ستهه‌لاتێ) ناڤكری و گۆت” مه‌یدانانێن خوه‌نیشادانێ ل عیراقێ ب دروستی بۆچوونا خوه ل سه‌ر به‌ربژاركرنا محه‌مه‌د ته‌وفیق عه‌لاوی بۆ پۆستێ سه‌رۆكێ وه‌زیران دیاركربوو هه‌ر به‌ری به‌ربژاركرنا وی، ئه‌وژی ره‌تكرنا هه‌ر كه‌سه‌كێ ژلایێ حزبێن ده‌ستهه‌لاتێ ڤه بۆ پۆستێ سه‌رۆكاتیا وه‌زیران دهێته به‌ربژاركرن”.
ئه‌ڤه داخویانیه د ده‌مه‌كی دا هات كو ل به‌غدا و پارێزگه‌هێن باشوورێ عیراقێ خوه‌نیشادانێن نه‌رازیبوونێ دژی به‌ربژاركرنا محه‌مه‌د ته‌وفیق عه‌لاوی بۆ پۆستێ سه‌رۆكێ وه‌زیران هاتینه ئه‌نجامدان.
ژ لایه‌كێ دی ڤه موقته‌دا سه‌در سه‌رۆكێ ره‌وتێ سه‌دری و لیستا سائیروون داخوازا پێكئینانا لژنێن تایبه‌ت بۆ ڤه‌گه‌راندنا ده‌واما فه‌رمی ل قوتابخانێن پارێزگه‌هێن باشوورێ عیراقێ و ڤه‌كرنا رێیان و بزاڤا ڤه‌گه‌راندنا خوه‌نیشادانان بۆ ئارمانجا وان یا سه‌ره‌كی ئه‌وژی خوه‌نیشادانێن ئاشتیانه كر.
ئه‌ڤرۆ نیوز، سالار دۆسكی:
سه‌رۆكێ هه‌ڤپه‌یمانیا كوردستانی ل ده‌ڤه‌رێن كوردستانی یێن ده‌رڤه‌ی ئیدارا هه‌رێمێ دیاركر كو تاكه چاره‌سه‌ری بۆ ده‌ڤه‌رێن كوردستانی و قورتالبوون ژ كێشه و ئاریشان بجهئینانا مادێ 140ێ ده‌ستوورێ عیراقێ یه.
عه‌بدولره‌حمان مسته‌فا، پارێزگه‌رێ به‌رێ یێ كه‌ركووكێ و سه‌رۆكێ هه‌ڤپه‌یمانیا كوردستانی ل پارێزگه‌هێن(كه‌ركووك، نه‌ینه‌وا، دیالا) گۆت: كاودانێن كه‌ركووكێ وه‌كو هه‌موو پارێزگه‌هێن عیراقێ نوكه تووشی گه‌له‌ك گرفتان بووینه و كێشێن مه‌زن هه‌نه ب تایبه‌تی كێشێن خزمه‌تگوزاری وه‌ك ئاڤ و كاره‌ب.
عه‌بدولره‌حمان مسته‌فای گۆت ژی” پشتی 16ی ئه‌كتوبه‌رێ، سه‌نگا كوردان گه‌له‌ك هاتیه خوارێ ووه‌كوپێشتر نه‌مایه و كوردان ده‌ستهه‌لات ل كه‌ركووك نینه و پتریا فه‌رمانگه‌هێن حوكمه‌تێ وه‌ك رێڤه‌به‌ر نوكه ژ ده‌ست كوردان ده‌ركه‌فتینه كو باژێرێ مه كوردا و هه‌موو پێكهاتێن وی باژێری یه”.
سه‌رۆكێ هه‌ڤپه‌یمانیا كوردستانی ل ده‌ڤه‌رێن مادێ 140، ئه‌و ژی دیاركر كو یێ گه‌شبینه هه‌كه هه‌لبژارتن ل كه‌ركووكێ بهێنه‌كرن، دێ كورد ب ئه‌نجامه‌كێ باش ده‌ركه‌ڤن چنكو هێشتا كورد د كه‌ركووكێ دا یێن ماین.
ئه‌وژی دیاركر كو” خه‌لكێ كه‌ركووكێ و هه‌موو پێكهاتێن وێ شاهدن ل سه‌ر وێ خزمه‌تا ل سه‌رده‌مێ وی ده‌مێ پارێزگه‌رێ كه‌ركووكێ بۆ جارا ئێكێ ل كه‌ركووكێ هاتیه‌كرن و گه‌له‌ك ده‌سكه‌فت هه‌بووینه ، دیسا ل سه‌ر پرۆژێ پترۆ دولار مه گه‌له‌ك خزمه‌تا وی باژێری كر وهه‌تا نوكه ژی پتریا كارێن ل وی باژێری دهێنه‌كرن ل سه‌ر وی پاره‌یه”.
زێده‌تر گۆت”چاره‌سه‌ریا پرسا كه‌ركووكێ ب رێیا بجهئینانا مادێ 140 ێ یه، هه‌كه ئه‌و مادێ ده‌ستووری بهێته بجهئینان دێ هه‌موو كێشێن وی باژێری و هه‌موو ده‌ڤه‌رێن كوردستانی هێنه چاره‌سه‌كرن و دڤێت هه‌موو پێكهاتێن وی باژێری بگه‌هنه وێ باوه‌ریێ كو بجهئینانا وی مادێ ده‌ستووری دێ ره‌وشا كه‌ركووكێ ئاسایی بیت و پێدڤیه سه‌ركرداتیا كوردستانێ كار ل سه‌ر بجهئینانا ڤی مادێ دستووری بكه‌ت و ب تایبه‌ت ل به‌غدا”.
عه‌بدالرحمان مسته‌فا ئه‌و ژی گۆت” ژڤان بوو هه‌لبژارتنێن جڤاتێن پارێزگه‌هان ل ئێكێ نیسانا ئه‌ڤ ساله‌هاتبانه‌كرن و نوكه حوكمه‌تا عیراقێ جڤاتێن پارێزگه‌هان ب جڤاتا پارێزگه‌ها كه‌كووكێ ڤه‌یێن هه‌لوه‌شاندین و ئه‌م چاڤه‌رێی دیاركرنا ده‌مێ هه‌لبژارتنان دكه‌ین و پێشبینیێ دكه‌ین ژ ئه‌نجامێ هه‌لبژارتنان پارێزگه‌ره‌كێ كورد بۆ كه‌ركووكێ بهێته دانان”.
ئه‌ڤرۆ نیوز:
پشتی بۆرینا دو هه‌یڤان ل سه‌ر ده‌ست ژكارێشانا عادل عه‌بدولمه‌هدی ژ پۆستێ سه‌رۆك وه‌زیرێن عیراقێ، محه‌مه‌د ته‌وفیق عه‌لاوی ب شێوه‌كێ فه‌رمی ژ لایێ سه‌رۆك كۆمارا عیراقێ بۆ پێكئینانا حوكمه‌تا نوو هاته راسپاردن، سه‌رۆكا فراكسیۆنا پارتی دیموكراتی كوردستان ل جڤاتا نوونه‌رێن عیراقێ ژی راگه‌هاند، كورد و سوننه دژی به‌ربژارێ شیعان بۆ پۆستێ سه‌رۆكێ وه‌زیران نینن.
ڤیان سه‌بری، سه‌رۆكا فراكسیۆنا پارتی دیموكراتی كوردستان ل جڤاتا نوونه‌رێن عیراقێ راگه‌هاند” كورد و سوننه دژی به‌ربژارێ شیعان بۆ پۆستێ سه‌رۆك وه‌زیرێن عیراقێ محه‌مه‌د ته‌وفیق عه‌لاوی نینن، چونكی ئه‌و د ناڤ خوه‌دا یێن ل سه‌ر رێككه‌فتین”.
ل دۆر ده‌مێ دیاركری بۆ پێكئینانا حوكمه‌تا نوو یا عیراقێ ژ لایێ محه‌مه‌د ته‌وفیق عه‌لاوی ڤه ئه‌وێ هاتیه راسپاردن بۆ پێكئینانا حوكمه‌تا نوو، ڤیان سه‌بری دبێژیت” سه‌رۆكێ وه‌زیران یێ راسپاردی ده‌مێ هه‌یڤه‌كێ یێ ل به‌ر بۆ پێكئینانا حوكمه‌تا عیراقی یا نوو، هه‌كه هات و د وی ده‌مێ دیاركری دا نه‌شیا حوكمه‌تا نوو پێك بینیت، دێ كه‌سه‌كێ دی ل شوونا وی هێته راسپاردن بۆ پێكئینانا حوكمه‌تا نوو”.
سه‌باره‌ت ده‌م و كار و ئه‌ركێ حوكمه‌تا عیراقی یا نوو ژی، سه‌رۆكا فراكسیۆنا پارتی دیموكراتی كوردستان ل جڤاتا نوونه‌رێن عیراقێ ئاماژه دا كو ئه‌ركێ ل سه‌ر ملێ حوكمه‌تا عیراقی یا نوو وه‌كو راسپاردێ پێكئینانا وێ چاوان سۆز دای، ئێمناهیێ دابین بكه‌ت و داخوازیێن خوه‌نیشاده‌ران بجهبینیت، له‌وما یا دیار نینه دێ ده‌مێ كارێ حوكمه‌تا عیراقی یا نوو چه‌ند بیت، هه‌كه حوكمه‌تا نوو شیا داخوازیێن خوه‌نیشاده‌ران بجهبینیت و ببیته جهێ رازیبوونا خه‌لكی، دبیت هه‌تا ب دووماهی هاتنا ڤێ خۆلا جڤاتا نوونه‌رێن عیراقێ د ئه‌ركێ خوه دا یا به‌رده‌وام بیت.
ژلایه‌كێ دی ڤه حه‌سه‌ن ئالی ئه‌ندامێ كورد د جڤاتا نوونه‌رێن عیراقێ دا راگه‌هاند، وه‌زیرێن كورد یێن حوكمه‌تا بۆری ب سه‌رۆكاتیا عادل عه‌بدولمه‌هدی دێ هه‌ر د پۆستێن خوه دا مینن و به‌رده‌وام بن و گۆت” چو به‌حس ل دۆر گوهۆرینا وه‌زیرێن كورد نینن”.
پشتی خوه‌نیشادانێن نه‌رازیبوونێ ل عیراقێ ل ده‌ستپێكا هه‌یڤا چریا ئێكێ 2019 ده‌ستپێكرن و به‌رده‌وام بووین، عادل عه‌بدولمه‌هدی سه‌رۆك وه‌زیرێن عیراقێ یێ به‌ری، ده‌ست ژكاركێشانا خوه پێشكێشی جڤاتا نوونه‌ران كر و ل رۆژا 1/12/2019 جڤاتا نوونه‌ران ده‌ست ژ كاركێشانا وی په‌سه‌ند كر.
پشتی محه‌مه‌د توفیق عه‌لاوی هاتیه راسپاردن بۆ پێكئینانا حوكمه‌تا نوو د په‌یڤه‌كێ دا راگه‌هاند كو دێ حوكمه‌ته‌كێ پێكئینیت كو نوونه‌راتیا هه‌موو پێكهاتێن گه‌لێ عیراقێ بكه‌ت، هه‌روه‌سا داخواز كر خوه‌نیشادان د به‌رده‌وام بن خوه‌نیشادانێن داخوازا چاكسازیێ تێدا دهێته كرن تاكو حوكمه‌ت ده‌ست ب چاكسازیێن جدی بكه‌ت، هه‌روه‌سا ئاماژه كر كو دێ تیمه‌كا شیره‌تكاران ل ئۆفیسا سه‌رۆكێ وه‌زیران هێته پێكئینان كو نوونه‌رێن خوه‌نیشاده‌ران ژی تێدا د پشكدار بن.
ئەڤرۆ نیوز:
وەزارەتا ناڤخۆیا عێراقێ دیار کر: وەک پێنگاڤەک بۆ ڕێگریکرنێ ژ بەلاڤبوونا ڤایرۆسێ کۆرۆنا، ئەو رێکێ نادەن وان گەشتیارێن بیانی یێن کو ژ چینێ دهێن، بهێنە دناڤا ئاخا عێیراقێ دا.
هەروەسا گۆتیە، بڕیار هاتیەدان ئەو خەلکێ ژ چینێ دهێن ناهێلن بهێنە عیراقێ.
ئاشکرا کر ژی، ئەڤ پێنگاڤە وەک رێکارەکێ یە بۆ خۆ پاراستن ژ بەلاڤبوونا ڤایرۆسێ کۆرۆنا و پاراستنا وەلاتیێن عیراقێ.
ئەڤرۆ نیوز:
فڕۆکخانێن نێڤدەولەتی یێن چینێ، شەپرزەیی پێڤە دیارە و وەلاتێن سەرانسەری جیهانێ ب نیگەرانی و هشیاری خەلکێ خوە ژ چینێ دبەن، کەیسا توشبوویان ب ڤایرۆسێ کۆرۆنا یێ د زێدەبوونێ دایە.
می فێنگ، پەیڤدارێ کۆمیسیۆنا ساخلەمیا نیشتمانی راگەهاند، کۆمیسیۆنا ساخلەمیا نیشتمانی راپۆرتا خوە ل سەرانسەری چینێ پێگەهشتیە، کو پتری 11 هزار و 791 کەیسێن پشتڕاستکری هەنە، دناڤ وان دا هزار و 795 کەیسێن تۆند هەنە، 259 کەسان گیانێ خوە ژ دەستدایە، 243 کەس ژی ژ نەخۆشخانان دەرکەفتینە.
لدووڤ دوماهی راپۆرتا بلۆمبێرگ، زیانێن دارایی یێن ڤایرۆسێ کۆرۆنا بۆ ئابووریێ جیهانێ 160 ملیار دۆلارن، زەرەرمەندێ ئێکێ یێ هەموو جیهانێ ژ وی ڤایرۆسی وەلاتێ چینێ یە، بازارێن چینێ ب هەموو جۆران ڤە سستی یا پێفە دیارە، نوکە ئەڤ ڤایرۆسە ل 28 وەلاتان هەیە و وەلاتێن جیهانی بەردەوامن ژ راگرتنا گەشتان بۆ چینێ.
نيشاندان