ئەڤرۆ نیوز ، زنار تۆڤی:

ب بریارا فەرماندێ گشتی یێ هێزێن چەکدار یێن عیراقێ، لیوا شەهاب جاهد حەمەخان زەنگەنە کو ئەفسەرەکێ کوردە و خەلکی پارێزگەها هەولێرێ یە وەک فەرماندێ گشتی یێ هێزێن ئەسمانی یێن عیراقێ دەست ب کاربوو.

ل دووڤ نڤیسارەکا وەزارەتا بەرگریا عیراقێ کو ئیمزا وەزیرێ بەرگریێ ل سەرە، ئاماژە ب هندێ هاتیە دان کو لیوا شەھاب زەنگەنە، ب بریارا فەرماندێ گشتی یێ ھێزێن چەکدارێن عیراقێ، پۆستێ فەرماندێ گشتی یێ ھێزێن ئەسمانی وەرگرتیە و گرتنەبەرا رێکارێن پێدڤی بۆ دەست ب کاربوونێ مایە.

لیوا شەھاب چەندین سالە وەکو سەرپەرشتیار ل فەرماندا ھێزێن ئەسمانی یێن عیراقی بوویە، پشتی کو ل دەستپێکا ڤێ هەیڤێ فەریق ئەنوەر حەمەئەمین، فەرماندێ گشتی یێ ھێزێن ئەسمانی خانەنشین بوو، لیوا شەھاب ل جهێ وی دەست ب کاربوو، هەر ژ سالا 2003 هەتا نوکە پۆستێ فەرماندێ ھێزێن ئەسمانی یێن عیراقێ د دەستێ کوردان دایە.

ئه‌ڤرۆ نيوز:

سه‌رۆكێ حوكمه‌تا هه‌رێما كوردستانێ، مه‌سرور بارزانى ب هه‌لكه‌فتا سه‌رێ سالا نوو يا زايينى 2020 په‌يامه‌كا پيرۆزباهيێ به‌لاڤ دكه‌ت.

مه‌سرور بارزانى د په‌ياما خوه‌ دا دبێژيت” ب هه‌لكه‌فتا سه‌رێ سالا زايينى، پيرۆزباهيه‌كا گه‌رم ل وه‌لاتيێن كوردستانێ و عيراقێ و جيهانێ دكه‌م، ئومێده‌وارم سالا نوو، ساله‌كا پر خوه‌شى و ئاشتى و دووماهى ئينان بيت ب نه‌هامه‌تيێ و نه‌ ئاراميێ ل ده‌ڤه‌رێ”.

گۆت ژى” هيڤيدارم د سالا نوودا، حوكمه‌تا هه‌رێما كوردستانێ ب هه‌ڤكاريا هه‌موو لايه‌نێن كوردستانى و خه‌لكێ هه‌رێما كوردستانێ بشێت كارناما خوه‌ ب باشترين شێوه‌ بجهبينيت و خوه‌شگوزه‌رانى و گه‌شه‌پێدانه‌كا ئابوورى يا هه‌مه‌لايه‌نه‌ په‌يدا ببيت، بۆ وێ چه‌ندێ خزمه‌ته‌كا هه‌ژى بۆ وه‌لاتيێن هه‌رێما كوردستانێ بهێته‌ كرن، بێگۆمان ئه‌ڤه‌ژى يا گرێداى سه‌قامگيريا ره‌وشا عيراقێ يه‌ و جێگيربوونا ئاشتيێ و ئاراميێ يه‌ ل ده‌ڤه‌رێ و هيڤيدارم ب پشته‌ڤانيا خودێ مه‌زن و خه‌لكێ نيشتمانپه‌روه‌ر و دلسۆز، كوردستان ژ هه‌موو پێشهاتێن نه‌خوه‌ش يا پاراستى بيت”.

ئه‌ڤرۆ نيوز:

وه‌زيرێ ساخله‌ميێ ل هه‌رێما كوردستانێ، سامان به‌رزنجى ئه‌ڤرۆ دوشه‌مبى 30/12/2019 راگه‌هاند، 20 حاله‌تێن په‌رسيڤا به‌رازان (H1N1) ل كوردستانێ يێن هاتينه‌ تۆماركرن و سێ وه‌لاتى ژى گو خه‌لكێ ده‌رڤه‌ى هه‌رێما كوردستانێ نه‌ ژئه‌گه‌رێ وى په‌رسيڤى گيانێ خوه‌ ل هه‌رێما كوردستانێ ژده‌ستدايه‌.

گۆت ژى” په‌رسيڤا به‌رازان په‌رسيڤه‌كێ وه‌رزى يه‌ ژ به‌رازى ژ ئه‌گه‌رێ هه‌واى دهێته‌ ڤه‌گوهاستن بۆ مرۆڤى و ڤايرۆسێ وێ ژى ل هه‌موو جيهانێ يێ به‌ربه‌لاڤه‌”.

هه‌روه‌سا گۆت”دو جۆرێن رێنمايان بۆ ناڤه‌ندێن ساخله‌ميێ هاتينه‌ به‌لاڤكرن و چو وه‌لاتيه‌كێ خه‌لكێ هه‌رێما كوردستانێ ژئه‌گه‌رێ وێ نه‌خوه‌شيێ گيانێ خوه‌ ژ ده‌ست نه‌دايه‌، ئه‌وێن سێ حاله‌تێن گيان ژ ده‌ستدانێ ژى وه‌لاتيێن ده‌رڤه‌ى هه‌رێما كوردستانێ بوون و هه‌لگرێن وى ڤايرۆسى بوون و ل ده‌مێ سه‌ره‌دانا خوه‌ بۆ هه‌رێمێ گيانێ خوه‌ ژ ده‌ستدايه‌ كو ئێك ژوان خه‌لكێ مووسل بوو وئێك ژى خه‌لكێ شرگات و يێ سيێ ژى خه‌لكێ سووريێ بوو”.