ئه‌ڤرۆ نيوز، نيوار محه‌مه‌د سه‌ليم:
رێڤه‌به‌ريا هاتنوچوونا پارێزگه‌ها دهۆكێ راگه‌هاند كو ئه‌و سوبه‌هى مامه‌له‌يێن فه‌رمانبه‌ران ب رێڤه نابه‌ن.
رائيدێ ماف ئازاد تاها، به‌رپرسێ راگه‌هاندنا رێڤه‌به‌ريا هاتنوچوونا پارێزگه‌ها دهۆكێ راگه‌هاند كو سوبه‌هى ئه‌و مامه‌له‌يێن وه‌لاتيان ب رێڤه نابه‌ن.
ئاشكه‌را ژى كر كو هه‌تا سالا نوو چو مامه‌له‌يه‌ك ل رێڤه‌به‌ريا وان ب رێڤه ناچيت و مه‌ره‌م ژى پێ جه‌ردا سالانه يا رێڤه‌به‌ريێ يه.
ئه‌ڤرۆ نيوز:
ئه‌ڤرۆ رۆژا دوشه‌مبى وه‌زيرێ دارايى و ئابوورى و لژنا دارايى ل په‌رله‌مانێ كوردستانێ دێ كۆم بن بۆ دانوستاندن ل دۆر پرۆژێ چاكسازيێ.
ب گۆره‌يى پێزانينێن ل به‌ر ده‌ستێ ئه‌ڤرۆ نيوز بڕياره ئه‌ڤرۆ ئاوات شێخ جه‌ناب وه‌زيرێ دارايى و ئابوورى و رێڤه‌به‌رێ گشتى يێ خانه‌نشينيێ ل هه‌رێما كوردستانێ سه‌ره‌دانا لژنا دارايى ل په‌رله‌مانێ كرودستانێ بكه‌ن و ده‌رباره‌ى پرۆژێ قانوونا چاكسازيێ ل گه‌ل لژنێ دانوستاندنێ بكه‌ن.
ئەڤرۆ نیوز، نەوزاد هلۆری:
دەستەیا گەشتوگۆزار یا حوکمەتا هەرێما کوردستانێ ب هەڤکاری ل گەل هەر ئێک ژ رێکخراوا کوردستان فوتۆ و زانکۆیا سترانفورد یا ئەمریکی بەریکانەک بۆ هەلبژارتنا باشترین وێنێ سالێ یێ گەشتوگۆزاری ئەنجام دا.
شێرزاد رەسول، جێگرێ سەرۆکێ رێکخراوا کوردستان فوتۆ بۆ ئەڤرۆ نیوز گۆت”ب مەرەما دانەنیاسینا زێدەتر یا جهێن گەشتوگۆزاری و دەرخستنا شیانێن فوتوکرافەران، هەر ئێک ژ رێکخراوا کوردستان فوتۆ و دەستەیا گەشتوگۆزار و زانکۆیا سترانفورد یا ئەمریکی بەریکانەک بۆ هەلبژاردنا باشترین فوتۆ ئەنجام دا”.
زیدەتر گۆت”د بەریکانێ دا 145 فوتوگرافەرێن هەرێما کوردستانێ ب 293 فوتۆیان پشکداربوون، 25 ژ وان هاتنە بەربژارکرن بۆ خەلاتێ سالێ، بەلێ ل دوماهیێ ژلایێ لژنەکا تایبەت هەلسەنگاندن بۆ فوتویێن هەموان هاتنەکرن و فوتویێن سێ ژ وان وەکو باشترین فوتویێن گەشتوگۆزاری بۆ سالا 2019 هاتنە هەلبژارتن”.
خەلاتکرنا فوتوگرافەر و فوتۆیێن سەرکەفتی بڤی رەنگی بۆ.
- فوتوگرافەر محەمەد موراد ئاکوی، خەلاتێ ئێکێ ب وێنەکێ گوما بێکودیان دەستخوڤە ئینا.
- فوتوگرافەر شه‌مال غەریب خەلاتێ دویێ ب وێنەکێ تەنگانەیا تابینا دەستخوڤە ئینا.
- فوتوگرافەر نازم مانیا، خەلاتێ سێیێ ب وێنەکێ ئێک ژ مەزارگەهێن ئاینی یێن کوردستنانێ دەستخوڤە ئینا.
دهێتە زانین کو فوتو گرێدای گەشتوگۆزار، سرۆشت، کەلتوور و ئاینی بوون و بۆ جارا دویێ یە ئەڤ بەریکانە ل هەرێما کوردستانێ ژلایێ رێکخراوا کوردستان فوتو دهێتەکرن.
ئەڤرۆ نیوز، مەحمود نهێلی
رێڤەبەرێ ناحیا دێرەلۆک بو ئەڤرۆ نیوز دیار کر، کو ئەو دێ هەموو شیانێن خوە دەنە کاری ژ پێخەمەت کێمکرن و نەهێلانا رێژا بێکاریێ و دیتنا دەلیڤێن کاری بۆ گەنجان.
سامی ئوشانە، رێڤەبەرێ ناحیا دێرەلۆک بۆ ئەڤرۆ نیوز دیارکر، کو رۆژبۆ رۆژێ رێژا بێکاریێ زێدەتر دبیت و سال بۆ سالێ رێژا دەرچویێن کولیژ و پەمانگەهان پتر دبیت و گۆت : ژ بەر کو دەڤەرا مە یا دووری سەنتەرێ پارێزگەهێ یە و هەروەسا ژ بەر رەوشا ئەمنی یا دەڤەرێ دەستێ وه‌لاتیان ناگەهیتە گوند و ئاقار ورەزو بیستانێن وان، ب ڤێ یەکی ژی وه‌لاتی هاتینە دورپێج کرن دناڤ کومەلگەهان دا و کارکرن تێدا ب زەحمەت کەفتیە و گەلەک کێمبوویە.
ناڤهاتی ئەگەرەکی دی یێ زێدەبوونا رێژا بێ کاریێ ڤەگەراند بۆ نەبوونا کەرتێ تایبەت و نەبوونا کارگەهان و جهێن پیشەسازی ل دەڤەرێ . و گۆت: بۆ ڤێ مەرەمێ ئەو ل گەل لایەنێن پەیوەندیدار کومبوویە و چەندین پێشنیار داینە ئەندام پەرلەمانێن کوردستانێ بۆ نەهێلانا بێکاریێ و دیتنا دەلیڤێن کاری بۆ گەنجان بتایبەت ڤەکرنا کارگەهان و دامەزراندنا دەرچویێن کولیژ و پەیمانگەهان و گرنگی دان ب کەرتێ گەشتوگوزاری.
ئه‌ڤرۆ نيوز:
ل دووڤ نڤيساره‌كا رێڤه‌به‌ريا گشتى يا گۆمركێ كو بۆ هه‌موو رێڤه‌به‌ريێن گۆمركان هاتيه هنارتن، ل ده‌ستپێكا سالا نوو 2020 ئينانا ترومبێلێن لێداى و دووباره هاتينه چێكرن و ئه‌وێن د بن ئاڤ كه‌فتين، ب تمامى دێ هێته قه‌ده‌غه‌كرن.
وه‌زاره‌تا ناڤخوه ل هه‌رێما كوردستانێ به‌لاڤكر، ل رۆژا 1 كانوونا دويێ 2020، چو جۆره ترۆمبێله‌كا لێداى و يێن دوباره هاتينه چێكرن و ترۆمبێلێن د بن ئاڤێ دا كه‌فتين، ناهێنه د ناڤ هه‌رێما كوردستانێ دا”.
وه‌زاره‌تا ناڤخوه دياركر ژى” تنێ دێ رێ ب ترومبێلێن نه‌هاتينه لێدان (Clean Title) هێته دان بهێنه دناڤ هه‌رێما كوردستانێ دا، ب مه‌رجه‌كى چو جۆره لێدانه‌ك پێڤه ديار نه‌بيت”.
ئه‌ڤرۆ نيوز:
وه‌زاره‌تا ره‌وشه‌نبيرى و لاوان ل هه‌رێما كوردستانێ ئه‌ڤرۆ ئێكشه‌مبى 22/12/2019 رۆهنكرنه‌ك به‌لاڤكر و تێدا ده‌نگوباسه‌كێ دناڤ تۆرێن جڤاكى دا به‌لاڤ بووى ره‌ت دكه‌ت.
د رۆهنكرنا وه‌زاره‌تا ره‌وشه‌نبيرى دا هاتيه” ل هنده‌ك هژمارێن تۆرا جڤاكى (فه‌يسبووك) ى ده‌نگوباسه‌ك به‌لاڤ بوويه كو ل وه‌زاره‌تا ره‌وشه‌نبيرى و لاوان و ب فه‌رمانا وه‌زيرێ ره‌وشه‌نبيرى، نوكته و پێكه‌نين ل فه‌رمانبه‌ران هاتينه قه‌ده‌غه‌كرن، هه‌روه‌سا هاتيه به‌لاڤكرن ژى راوێژكار و په‌يڤدارێ وه‌زاره‌تێ ل سه‌ر وى بابه‌تێ هاتينه دوورخستن”.
ل دۆر ڤى ده‌نگوباسى، په‌يڤدارێ وه‌زاره‌تا ره‌وشه‌نبيرى و لاوان دبێژيت” ئه‌م وه‌كو وه‌زاره‌تا ره‌وشه‌نبيرى و لاوان ڤان ده‌نگوباس ره‌ت دكه‌ين، دووپاتيێ ل سه‌ر پێرابوونێن فه‌رمى و په‌يداكرنا ره‌وتا ئاسايى يا ره‌فتاركرنا مه ل گه‌ل فه‌رمانبه‌ران دكه‌ين، ب شێوه‌كى مامه‌له‌كا شارستانيانه و دوور ژ ده‌ركه‌فتنێ ژ داب و نه‌ريتان، چو فه‌رمانبه‌ر ژى نه‌هاتينه دوورخستن”.
دياركر ژى” هه‌كه گوهۆرينه‌ك د ئيدارێ دا هاتبيته ئه‌نجامدان، ئه‌ڤه ب مه‌ره‌ما رێكخستنا كاروبارێن وه‌زاره‌تێ بوو وچو په‌يوه‌ندى ب ڤى بابه‌تى ڤه نينه، دوو پاتيێ ژى دكه‌ين كو ئه‌ڤ ئاخڤتنه نابنه رێگر ل به‌رده‌م ستراتيژيه‌تا وه‌زاره‌تێ كو ب ئه‌ركه‌كێ نوو و سياسه‌ته‌كا نوو به‌رنامه بۆ هاتيه دارێژتن”.
ئەڤرۆ نیوز:
سەرۆکێ هەرێما کوردستانێ نێچیرڤان بارزانی پێشوازی ل محەمەد حەلبوسی سەرۆکێ پەرلەمانێ عیراقێ کر و د روونشتنەکێ دا بەحسێ ئالۆزیێن ڤێ دووماهیێ ل عیراقێ هاتنە کرن و هەر دو ئالیان دیار کرن کو دڤێت ئالۆزیێن نها ل عیراقێ بهێنە چارەسەرکرن و بابەتێ دەستنیشانکرنا سەرۆک وەزیرێن عیراقێ ژی بهێتە ئێکلا کرن.
سەرۆکێ پەرلەمانێ عیراقێ و سەرۆکێ هەرێما کوردستانێ دیار کرن ژی دڤێت کار بۆ چارەسەرکرنا هەموو ئاریشێن ل عیراقێ بهێتە کرن و دڤێت ئەو یەک ل گۆر هندەک ئالیەتان بیت دا د خزمەتا هەموو پێکهاتێن ل عیراقێ دا بیت. چونکو ب وی رەنگی دێ رەوشا عیراقێ ئارام بیت.
ئه‌ڤرۆ نيوز، نيوار محه‌مه‌د سه‌ليم:
دادگه‌ها بلندا فيدرالا عيراقێ ده‌رباره‌ى مه‌زنترين كوتلا جڤاتا نوونه‌ران به‌رسڤا سه‌رۆك كۆمارێ عيراقێ دا.
ئه‌ڤرۆ رۆژا ئێكشه‌مبى 22ى كانوونا ئێكێ 2019 ئياس سامۆك ئاخفتنكه‌رێ ب ناڤێ دادگه‌ها بلند فيدرال ل عيراقێ د به‌ياننامه‌كێ دا راگه‌هاند كو به‌رهه‌م سالح سه‌رۆك كۆمارێ عيراقێ ده‌رباره‌ى مه‌زنترين كۆتلا جڤاتا نوونه‌ران داخوازا روونكرنه‌كێ ژ دادگه‌هێ كربوو.
ئياس سامۆك ئاشكه‌را كر كو دادگه‌هێ ب ئاماده‌بوونا هه‌موو ئه‌ندامێن خوه، كۆمبوونه‌ك ئه‌نجام دا و تێدا ب پشت به‌ستن ب ماددێ دستوورێ وه‌لاتى، بڕيار دا، مه‌زنترين كۆتلا كو پشتى هه‌لبژارتنان هاتيه پێكئينان دێ به‌ربژارێ خوه ديار كه‌ت.
ب گۆره‌ى وێ بڕيارا دادگه‌هێ، كوتلا بينا (هه‌ڤپه‌يمانيا فه‌تح و ده‌وله‌تا قانوونێ) مه‌زنترين كوتلا ناڤ جڤاتا نوونه‌رانه و ب گۆره‌ى دستوورى ژى كانديدێ وان دێ جهێ عادل عه‌بدولمه‌هدى گريت كو قوسه‌ى سوهيله.
پشتى به‌ربژاركرنا قوسه‌ى سوهيل ژ لايێ هه‌ڤپه‌يمانيێ ڤه خوه‌نيشانده‌رێن عيراقێ ل هه‌موو باژێرێن عيراقێ دژاتيا خوه بۆ راسپاردنا وى وه‌كو سه‌رۆك وه‌زيران دياركريه.
ئه‌ڤرۆ نيوز، نيوار محه‌مه‌د سه‌ليم:
وه‌زاره‌تا ناڤخۆ يا حوكمه‌تا هه‌رێما كوردستانێ د نڤيساره‌كێ دا ئاماژه ب وێ چه‌ندێ دكه‌ت كو ل سالا 2020ێ ب تنێ ترۆمبێلێن لێنه‌دايى دێ هێنه ناڤ هه‌رێما كوردستانێ.
وه‌زاره‌تا ناڤخۆ يا حوكمه‌تا هه‌رێما كوردستانێ د نڤيساره‌كێ دا كو ئه‌ڤرۆ نيوز وێنه‌ك ب ده‌ست خوه ئێخستيه، تێدا هاتيه: “ژ 1ى كانوونا دويێ 2020ێ چو ترۆمبێلێن لێداى و راستڤه‌كرى و بن ئاڤ كه‌فتى ناهێنه ناڤ هه‌رێما كوردستانێ”.
به‌حس ل وێ چه‌ندێ ژى كريه كو ب تنێ رێ دێ ب ترۆمبێلێن (Clean Title) هێته دان بهێنه ناڤ هه‌رێما كوردستانێ، ب مه‌رجه‌كى چو جهێن لێدانێ پێڤه د ديار نه‌بن.
هه‌ر د نڤيسارێ دا ئاماژه ب وێ چه‌ندێ ژى كريه كو ترۆمبێلێن سفر كيلۆمه‌تر ب گۆره‌يى مۆدێلێن رێ پێدايى و ب گۆره‌ى راپۆرتا (CarFax) و باوه‌رناما (COC) دێ هێنه ناڤ هه‌رێما كوردستانێ.
ئه‌ڤرۆ نيوز، نيوار محه‌مه‌د سه‌ليم:
سه‌رۆكا په‌رله‌مانێ كوردستانێ گازى هه‌موو ئه‌ندامێن په‌رله‌مانى دكه‌ت بۆ ئاماده‌بوون د روونشتنا ژماره 12 يا ئاسايى ل سالا ئێكێ يا خولا هه‌لبژارتنێن پێنجێ يا په‌رله‌مانى.
رێواز فايه‌ق، سه‌رۆكا په‌رله‌مانێ كوردستانێ د نڤيساره‌كێ دا كو وێنه‌ك بۆ ئه‌ڤرۆ نيوز ره‌وانه كريه داخوازێ ژ په‌رله‌مانتاران دكه‌ت ئاماده بن د كۆمبوونا په‌رله‌مانى دا ل ده‌مژمێر 11:00ى سپێده‌هيا رۆژا سێشه‌مبى رێكه‌فتى 24ى كانوونا ئێكێ 2019ێ.
ئاماژه ب وێ چه‌ندێ ژى كريه كو گازيكرن ب پشت به‌ستنه ب حوكمێ برگا (سێ) ژ ماددێ (18) و برگا (ئێك) ژ ماددێ (19) يێ په‌يره‌وێ ناڤخۆ يێ په‌رله‌مانێ كوردستانێ – عيراق.
د ڤێ نڤيسارا فه‌رمى يا په‌رله‌مانێ كوردستانێ دا نه‌هاتيه دياركرن كا دێ ناڤه‌رۆكا كۆمبوونا په‌رله‌مانێ كوردستانێ ل سه‌ر چ ته‌وه‌ر بيت.
نيشاندان