ئەڤرۆ نیوز، رێوار محەمەد رەشید:
لژنا دوڤچوونا جوانکاریا و سەنتەر و کلینیکێن جوانکاریا ل قایمقامیا قەزا دهۆکێ هژمارەکا رێنمایان ئاراستەیی جوانکاریا و سەنتەر و کلینیکێن جوانکاریا ل پارێزگەها دهۆکێ کرن.
ژ وان رێنمایێن ئاراستەیی جهێن ناڤهاتی هاتینەکرن نابیت نۆشدارێ پیستی سەرپەرشتیێ ل دو جهێن سەنتەرێ جوانکاریێ بکەت و بەرۆڤاژی دێ سەنتەر هێتە داخستن، هەروەسا دڤێت هەر دو سالان مۆلەتا سەنتەرێ جوانکاریێ بهێتە نووکرن.
د خالەکا دی یا ڤان رێنمایان دا هاتیە کو پێدڤیە ل سەر هەر سەنتەرەکێ جوانکاریێ پێزانینێن خوە ل دۆر ئامیرێن جوانکاریێ دیار بکەن کا کەنگی ئەو ئامیرە هاتیە چێکرن و چارەسەریا چ جورە نەخۆشیان دکەت و نابیت هیچ ئامیرەکێ دی یێ پەیوەندی ب کارێ جوانکاریێ ڤە نەبیت د ناڤ سەنتەری دا بهێتە دانان.
هەروەسا پێدڤیە ئەو کارمەندێن ل کلینیک و سەنتەرێن جوانکاریێ کاردکەن پشکداری د خۆلێن جوانکاریێ دا کربیت و پێدڤیە ل سەر نۆشدارێ سەرپەرشت رێنمایان ئاراستەیی کارمەندێن سەنتەری بکەت و پێزانینان نیشا وان بدەت.
ئەڤ رێنمایە و چەندین رێنمایێن دی یێن گرێدایی ب کارێ جوانکاریێ ڤە ل سەر جوانکاریا و سەنتەر و کلینیکێن جوانکاریا ل پارێزگەها دهۆکێ هاتنە بەلاڤکرن.
نيشاندان