ئه‌ڤرۆ نيوز:
وه‌زاره‌تا پێشمه‌رگه فه‌وجێن ليوا 16 يا پێشمه‌رگه‌ى به‌ر ب سه‌نگه‌رێن به‌راهيێ يێن به‌رگريێ ل سننوورێ گه‌رميان هنارت، جێگرێ سه‌رۆكێ هه‌رێما كوردستانێ، جه‌عفه‌ر شێخ مسته‌فا سه‌رپه‌رشتيا پرۆسا هنارتنا وێ هێزێ كر.
ئه‌و هێزا هاتيه هنارتن بۆ وێ ده‌ڤه‌رێ پێدڤيێن له‌شكرى د گه‌لدانه و ژ نوكه ووێڤه دێ د ئه‌ركى دا بن بۆ به‌رهنگاريا گه‌فێن تيرۆرێ ل سنوورێ ده‌ڤه‌را گه‌رميان.
ئه‌ڤرۆ نيوز:
قایمقامیا قەزا دهۆکێ راگەهاند، ژبەر خرابیا کوالێتیێ پانزینخانا (خاك) ل دهوکێ هاتە سزادان.
یوسف محمەد حەسەن، سەرۆکێ لیژنا دوفچوونێ ل قایمقامیا قەزا دهوکێ، ل دووڤ به‌رپه‌رێ قايمقاميا ل سه‌ر تۆرا فيسبووكى، دياركر، پشتی نڤێسارا رێڤەبەریا گاز وکانزایان ل دهۆکێ گەهشتیە قايمقاميا قەزا دهۆکێ وپشکنین بۆ پانزینا پانزیخانا (خاك) هاتیە کرن ودیاربووی کو کوالێتیا وێ یا باش نەبوو و ل دووڤ رێنمایێن رێڤەبەریا ناڤبری نەبوو ، بریار هاتە دان ، ب سزادانا پانزینخانا (خاك) ب گوژمێ دو ملیون دیناران و بۆ دەمێ (۱۰)رۆژان هاتە داخستن.
ئه‌ڤرۆ نيوز:
سه‌رۆك مه‌سعود بارزانى ئه‌ڤرۆ پێنجشه‌مبى 5/12/2019 ل دۆر شه‌هيدكرنا سێ پێشمه‌رگه‌يان د هێرشه‌كا تيرۆرستێن داعشێ دا ل نێزيك خانه‌قين، په‌يامه‌ك به‌لاڤكر.
سه‌رۆك بارزانى د په‌ياما خوه‌دا گۆت” ل شه‌ڤا بۆرى، ژ ئه‌گه‌رێ هێرشا تيرۆرستان ل سه‌ر پێشمه‌رگه‌ى ل ده‌وروبه‌رێن خانه‌قينێ، مخابن 3 پێشمه‌رگه شه‌هيد بوون، سه‌ره‌خوه‌شيا خوه ئاراسته‌ى كه‌سوكارێن شه‌هيدان دكه‌ين و هێڤيا سلامه‌تيا بله‌ز بۆ برينداران دخوازين”.
سه‌رۆك بارزانى گۆت ژى” هێرشێن ڤێ دووماهيێ يێن تيرۆرستان دياردكه‌ن كو تيرۆرستان يا خوه رێكخستى و گه‌فه‌كا جدى نه بۆ سه‌قامگيريا هه‌موو ده‌ڤه‌رێ”.
ئه‌ڤرۆ نيوز:
سه‌رۆكێ نوونه‌راتيا حوكمه‌تا هه‌رێما كوردستانێ ل به‌غدا فارس عيسا راگه‌هاند، ئه‌ڤرۆ پێنجشه‌مبى 5/12/2019 ب فه‌رمى رێككه‌فتنا هه‌ولێرێ وبه‌غدا ل سه‌ر بودجێ گشتيێ عيراقێ بۆ سالا 2020 هاته ئه‌نجامدان.
فارس عيسا گۆت” ب گۆره‌ى وێ رێككه‌فتنێ، هه‌رێما كوردستانێ رۆژانه دێ 250 هزار به‌رميلێن په‌ترۆلێ راده‌ستى كۆمپانيا بازاركرنا په‌ترۆلێ عيراقێ (سۆمۆ) كه‌ت و شێوازێ دانا قه‌ران ژى هاتيه دياركرن”.
سه‌رۆكێ نوونه‌راتيا حوكمه‌تا هه‌رێما كوردستانێ ل به‌غدا ب پێدڤى زانى فراكسيۆنێن كوردى ل په‌رله‌مانێ عيراقێ ب ئێكده‌نگ بزاڤا په‌سه‌ندكرنا پرۆژێ قانوونا بودجا گشتى يا عيراقێ بۆ سالا 2020 بكه‌ن.
ئەڤرۆ نیوز ، زنار تۆڤی:
فلمێ دکیومێنتاری The Challenge کو ژ ئامادەکرن و دەرھێنانا رێبەر روشدی یە خەلاتێ ئێکێ د فیستەڤالا شاريقە ل وەلاتێ ئیماراتێ دا ب دەسخوڤە ئینا.
دەرهێنەر رێبەر روشدی بۆ ئەڤرۆ نیوز گۆت: ئەڤ فلمە د فیستەڤالا شاريقە ل وەلاتێ ئیماراتێ ب نوونەراتیا زانکویا دھۆک، کولیژا زانستێن مرۆڤایەتی پشکدارببوو و پتر ژ ٢٢ زانکویێن عەرەبی پشکداری تێداکربوو، ژ ئەنجامێ ٦٦ فلمان ، فلمێ (ئەلتەحەدی) یێ ئێکێ دەرکەت د رێزا فلمێن دکیومێنتاری دا.
ناڤهاتی گۆت ژی: چیرۆکا ڤی فلمی ل دۆر کەسەکێ خودان پێدڤیێت تایبەتە و پەنابەرە و خودان ئیرادەکا ب ھێزە و ب رێکا وێنا دەربرینێ ژ نه‌خوه‌شيێن خوە دکەت و ڤان وێنا ب پیان چێدکەت، ئەڤ فلمە نامەکا مرۆڤایەتیە و پێکڤە ژیانێ د دەتە دیارکرن.
ئه‌ڤرۆ نيوز، نيوار محه‌مه‌د سه‌ليم:
بڕياره رۆژا سێشه‌مبى 10ى كانوونا ئێكێ 2019 په‌رله‌مانێ كوردستانێ كۆم ببيت و د وێ كۆمبوونێ دا خواندنا دويێ بۆ پێشنيازا قانوونا ريكلامێ بازرگانى بكه‌ت.
ب گۆره‌ى پێزانينێن ل به‌ر ده‌ست بڕياره ده‌مژمێر 11:00ى سپێده‌هيا رۆژا سێشه‌مبى 10ى كانوونا ئێكێ 2019 په‌رله‌مانێ كوردستانێ كۆم ببيت و كۆمبوونا په‌رله‌مانى دێ يا تايبه‌ت بيت ب خواندنا دويێ بۆ پرۆژێ قانوونا ريكلاما بازرگانى.
بڕياره د روونشتنا رۆژا سێشه‌مبى يا بهێت يا په‌رله‌مانێ كوردستانێ دا، وه‌زيرێ پێشه‌سازى و بازرگانى يێ حوكمه‌تا هه‌رێما كوردستانێ ژى پشكدار بيت.
ئەڤرۆ نیوز ، زنار تۆڤی:
شەش سەرکردە و کەساتیێن عێراقێ دێ خوە بۆ پۆستێ سەرۆک وەزیرێن عێراقێ کاندید کەن.
ل دووڤ نووچەیێن راگەهاندنا عێراقی، حزب و لایەنێن سیاسی یێن عێراقێ بەردەوام ل سەر کۆمبوونێن خوە ژ بۆ دەستنیشانکرنا کەسەکێ بۆ وەرگرتنا پۆستێ سەرۆک وەزیرێن ڤی وەلاتی، هەروەسا بەحسێ شەش کەسان دکەن بۆ کاندید کرنا پۆستێ سەرۆک وەزیران، کو پێکهاتینە ژ:
– ئیبراهیم بەحر ئەلعلوم، کاندیدێ میلیشیاتێن بەدر و رەوتێ حیکمە.
– فەریق روکن عەبدولوەهاب ساعدی، کاندیدێ ئەیاد عەللاوی و ئوسامە نوجێفی.
– عەدنان زەرفی، کاندیدێ هەڤپەیمانیا نەسر، کو حەیدەر عەبادی سەرۆکاتیا وێ دکەت
– عەلی شوکری، کاندیدێ بەرهەم سالحی
– قوسەی سوهێل، کاندیدێ هەڤپەیمانیا دەولەتا قانوونێ، کو نوری مالکی سەرۆکاتیا وێ دکەت.
– فالح فەیاز، کاندیدێ کوتلا عەتا
دەست ژکار کێشانا عەبدولمەهدی ل سەر داخوازا لێڤەگەرێ بلند یێ شیعێن عێراقێ بوو، پشتی کو خوە نیشاندانان پرانیا باژێرێن شیعا ڤەگرتین، هەروەسا خوە نیشاندان ل رۆژا 2-10-2019 ل بەغدا و زۆربەیا باژێرێن عێراقێ ل دژی گەندەلیێ و نەبوونا خزمەتگوزاریان ، دەست پێ کرینە.
ئه‌ڤرۆ نيوز، نيوار محه‌مه‌د سه‌ليم:
وه‌زيرێ دارايى و ئابوورى يێ حوكمه‌تا هه‌رێما كوردستانێ راگه‌هاند كو هه‌رێم و به‌غدا ل دۆر پرسێن په‌ترۆل، قه‌ر و بوودجێ گه‌هشتنه رێكه‌فتنێ.
ئاوات شێخ جه‌ناب، د كۆنگره‌كێ رۆژنامه‌ڤانى دا ل گه‌ل شاندێ هه‌رێمێ بۆ به‌غدا گۆت: “شياين رێكه‌فتنێ ل سه‌ر په‌ترۆلێ بكه‌ين و رۆژان 250 هزار به‌رميلێن په‌ترۆلێ راده‌ستى سۆمۆ بكه‌ين. هه‌روه‌سا شياين ده‌رباره‌ى قه‌ران بگه‌هينه لێك تێگه‌هشتنه‌كێ”.
زێده‌تر گۆت: “هه‌كه به‌غدا رێكه‌فتنێ بجهـ بينيت، كێشا مووچان نامينيت. حوكمه‌ت ل دانا مووچێن فه‌رمانبه‌ران به‌رپرسياره، چونكو حوكمه‌تا هه‌رێما كوردستانێ هه‌شت مووچێن فه‌رمانبه‌ران و 12 مووچێن خانه‌نشينان يا قه‌رداره”.
وه‌زيرێ دارايى دا زانين ژى كو پێشتر بڕيارا بڕينا بوودجێ هه‌رێما كوردستانێ سياسى بوو، “بۆ بوودجێ سالا 2020ێ نها ته‌په د گۆره‌پانا جڤاتا نوونه‌ران دايه، مه وه‌كو شاندێ دانوستاندنكار يێ حوكمه‌تێ كارێن خوه ته‌مام كرن و ئه‌ركێ نوونه‌رێن كورده ل به‌غدا د ده‌مێ دانوستاندنان دا ل سه‌ر بوودجێ به‌ره‌ڤانيێ ژ مافێن خه‌لكێ كوردستانێ بكه‌ن و بچه‌سپينن”.
ئاوات شێخ جه‌ناب ئاماژه ب وێ چه‌ندێ ژى كر كو دانوستاندنێن ڤێ جارێ ل گه‌ل به‌غدا د سه‌ركه‌فتى بوون و د رێكه‌فتنێ به‌رژه‌وه‌نديێن هه‌ردولا به‌رچاڤ هاتينه وه‌رگرتن.
ئه‌ڤرۆ نيوز:
شڤێدى ده‌مژمێمر 09:00، چه‌كدارێن داعش هێرش كره سه‌ر هێزێن پێشمه‌رگه‌ى ل گوندێ ده‌كه يێ سه‌رچه‌م ل باشوورێ رۆژئاڤايێ خانه‌قين و د روو ب رووبوونه‌كا دژوار دا سێ پێشمه‌رگه شه‌هيد و دو ژى بريندار بوون.
دهۆك، لەزگین جوقی
بەرپرسێ نڤیسینگەها رزگاركرنا رەڤاندیێن ئێزدی دیاركركو ئەڤرۆ 4/12/2019 هێمن هەورامی جێگری پەرلەمانێ كوردستانێ ل هەولێر پێشوازی ل نڤیسینگەها رزگاركرنا رەڤاندیێن ئێزدی كر و نڤیسینگەه ژئالیی پەرلەمانێ كوردستانێ ڤە هاتە خەلاتكرن.
حسێن قائێدی، بەرپرسێ نڤیسینگەها رزگاركرنا رەڤاندیێن ئێزدی دیاركركو رۆلێ كادرێن نڤیسینگەهێ هەموویان ب بەرزی هاتە نرخاندن ژبەر كاركرنا وان ب شەڤ و رۆژ بۆ لیگەریان و دووڤچوون و رزگاركرنا رەڤاندیێن ئێزدی و میكانزما كاركرنێ وچەندین بابەتێن چارەنڤیساز دگەل پەرلەمانتارێن كوردستانێ هاتە بەحسكرن وپاشی نڤیسینگەها رزگاركرنا رەڤاندییان ب درعێ پەرلەمانێ كوردستانێ هاتە خەلاتكرن كو ل جینوسایدا شنگالێ 6417 كەس هاتبوونە رەڤاندن ژوانا ژی 3548 كچ وژنن بوون و2869 زارۆك وزەلام بووینە هەتا نوكە زێدەتر ژ 3500 رەڤاندی هاتینە رزگاركرن و هیشتا چارەنڤیسی پتر ژ دو هزاران ژی دیارنینە و كار یێ بەردەوامە بۆ رزگاركرنا هەموو رەڤاندیێان.
گۆت ژی ئەڤرۆ ژی كچەكا ئێزدی 17 سالیی ب ناڤێ ( رنا) خەلكا تل قەسەب ژبن دەستی تیرۆرستێن داعش هاتە رزگاركرن و پلانا رزگاركرنا رەڤاندیێان بەردەوام دهێتە گوهۆرین ل دووڤ دەمێ و وەختی پێخەمەت لیگەریان و رزگاركرنا هەموو رەڤاندییان.
ل كارەساتا شنگال 3/8/2014 تیرۆرستێن داعش ب شێوەیەكێ هوڤانە هیرشی سەر قەزا شنگال كرن دئەنجامدا 360000 ئێزدی ژبەر تیرۆرستێن داعش ئاوارە بوون هەتا نوكە پتریا وان ماینە ل سنۆری دهۆكێ نەشین ڤەگەرنە سەر جه و مالێن خوە.
نيشاندان